Qanoq ilillutit naassaanngitsumik inuulersinnaasutit
INUUP timaata ullumikkornit sivisuneroqisumik uumasinnaanissaa ilimanaateqaqimmat inuit ilaat isumalluarput qanoq ililluni naassaanngitsumik inuusinnaalernissaq ilisimatuussutsikkut paasineqarumaartoq. „Timip kemiimut tunngasortai qanorlu imminnut sunneqatigiittarnerat pillugit ilisimasaqarnerujartortilluta,“ Dr. Alvin Silverstein allappoq, „inuunerup siunertaa paasinerujartussavarput. Paasisinnaalissavarput . . . sooq inuk utoqqaliartortartoq.“
Tamatuma suna kingunerissavaa? Silversteinip oqarneratut ’inuiaat oqaluttuarisaaneranni ukiunik nutaanik’ kinguneqassaaq. „Inunni ’utoqqaarutissaaq’, ilisimasaqalernerummi toqumik ajugaaffiginninnermik kinguneqartup inuusuttuujuarneq nassatarissavaa.“
Inuit tamanna angusinnaassavaat? „Tunaareqinasigit naalagaanertat, inuit annaassisinnaanngitsut,“ Biibilimi allassimavoq. „Anerningerunik kingumut issunngussapput, pilersaarutaallu ulloq taanna maangaannassapput.“ (Tussiaat 146:3, 4) Soorlu nalunngereeripput inuit innarluut kingornussaasoq utoqqaliartornermik toqumillu kinguneqartoq sumiissusersisinnaasimanngilaat, ingammillu pinaveersimatissinnaasimanagu. Pinngortitsisoq kisimi taamaaliorsinnaavoq.
Ilumulli inuit nunarsuarmi naassaanngitsumik inuunissaat Guutip siunertaraa?
Guutip siunertaa
Inuit aappariit siulliit Guutip sumut inissippai? Nunarsuarmut paratiisiusumut. Imalu peqquai: „Kinguaassiorlusi amerliartoritsi nuna tamakkerlugu ilissinnullu naalatsigitillugu.“ (1 Moses 1:28) Aap, Guutip siunertarisimavaa nunarsuaq inunnik naapertuilluartunik ilaqutariissuartut ittunik, eqqisseqatigiillutik pilluarlutillu inuusunik, ulikkaariartuaassasoq. — Jesaja 45:18.
Naak Adam naalannginnini pillugu toqumik eqqartuussaagaluartoq inuit nunarsuarmi naassaanngitsumik inuulernissaannik siunertani Guutip allanngortinngilaa. (1 Moses 3:17-19) Imami oqarpoq: „Oqatsiaannaruma taamaalisissavara.“ (Jesaja 46:11; 55:11) Guutip nunarsuarmik siunertani allanngortissimanngikkini ersersippaa ima oqarami: ’Iluartut nuna kingornussarissavaat, naassaanngitsumillu nunagissavaat.’ — tugsiaut 37:29.
Pinngortitsisitsitut Guutip innarluut inunnik utoqqalisitsillunilu toqutitsisartoq iluarsisinnaavaa. Suna tunngavigalugu taamaaliussava? Innarluut inummit siullermit, Adamimit, pilerfeqarpoq, kisianni Guuti ernermi, Jesus Kristusip, inuttut inuuneratigut naammalluinnartukkut utertitsissummik pilliuteqarsimavoq, ’kinaluunniit taassumunnga uppertoq tammaqqunagu, naassaanngitsumilli inuussuteqaqqullugu’. — Juánase 3:16; Matîuse 20:28.
Taamaattumik Jesus Kristus Adam taarserlugu tassaalerpoq ataatavipput imaluunniit inuunermik tunisiserput. Taamaattuminguna Biibilimi Jesus tassaanerarneqartoq ’Adam kingulleq’. (1 Korintumiut 15:45) Adamip qitornaasut toqumut eqqartuunneqarnissaraluamut taarsiullugu inuit naalattut ’naassaanngitsumik Ataataasumut’, Jesus Kristusimut, qitornaasutut naassaanngitsumik inuulernissaminnut qinngaqqunnanngitsutut isigineqalersinnaapput. — Jesaja 9:6.
Soorunami Jehova Guuti tassaavoq ’naassaanngitsumik Kunngiusoq’ aamma ’Naalakkatta Jesus Kristusip Ataataa’. (1 Timûtiuse 1:17; sarĸúmersitat 15:3; Kulorsamiut 1:3) Jesus Kristusili tassaavoq ’naassaanngitsumik Ataatarput’, ’annaassiserput’ aammalu ’Naalagarput eqqissisitsisoq’. (Lúkarse 2:11) Ataataminut sinniisutut Kristusip naalagaassutsini nunarsuarmi eqqissinermik pilersitsinissamut atussavaa. — Tussiaat 72:1-8; 110:1, 2; Eprîarit 1:3, 4.
Jesus Kristusip naalakkersuinerani nunarsuarmi paratiisi maangaannarsimasoq pilerseqqinneqassaaq. Tamanna pissaaq Jesusip oqarneratut ’pinngoqqiffimmi Inuup Ernera issiavissaarsuarmini naalannassutsimi piani issiappat’. (Matîuse 19:28) Kristusip ajoqersugai aalajaatsut, katillutik 144.000-iusut, nunarsuarmut paratiisiusumut naalakkersueqataassapput. (2 Timûtiuse 2:11, 12; sarĸúmersitat 5:10; 14:1, 3) Inuit millionilikkuutaat naalakkersuinermik tamatuminnga iluaqutiginnissapput, nunarsuarmi paratiisiusumi inuulissagamik. Taakkununnga ilaassaaq pinerluttuusimasoq Jesusip saniani toqusoq imalu taassumannga neriorsorneqartoq: ’Paratiisimeeqatigiumaarparma.’ — Lúkarse 23:43.
Allaat iluaatsut toqusimasut makititaassapput nunarsuarmilu naassaanngitsumik inuunissamut piukkunnarsarnissaminnut periarfissinneqassallutik. (apustilit suliait 24:15) Nappaatit, utoqqalisarnerup toqullu qanoq ilillutik peerukkumaarnerat Biibilimi tusarnersumik ima allaatigineqarpoq: ’Guutip nammineq najorumaarpai; qulliillu tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.’ — sarĸúmersitat 21:3, 4.
Qanoq naassaanngitsumik inuulersoqarsinnaasoq
Qularnanngitsumik nunarsuarmik kingornussisussat tassanilu naassaanngitsumik inuulersussat akornanneerusupputit. Taamaattumik Paratiisimi naassaanngitsumik inuusinnaalerumaguit piumasarineqartut naammassisariaqarpatit. Ataataminut qilammiusumut qinunermini Jesus Kristusip piumasarisaasoq tunngaviusoq eqqaavaa, ima oqarluni: ’Tassaavoq inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ — Juánase 17:3.
Jehovap nalunaajaasuisa nuannaarlutik ikiorumavaatsit ilisarsinermik inuunermik kinguneqartumik tamatuminnga pigisaqalernissannik. Saaffigiinnarsinnaavatit, akissarsiassartillu eqqarsaatiginagu illit iluarisakkut ornissavaatsit Guutillu inuiaat anersaakkut timikkullu naammalluinnartunngortinniarlugit siunertaanik oqaluttuullutit. Qularutiginngilluinnaruk Pinngortitsiserput ajugaqanngitsoq innarluutip kingornussaasup utoqqalisarnermik toqumillu kinguneqartartup peernissaanut tamakkiisumik piginnaaneqarmat. Sivikitsuinnarmik inuusarunnaarfissarput nalliutissaaq, ilami nalliulluinnalerpoq. Jehovap innuttani ’inuunermik soraajuitsumik’ pilluaqqusaatissavai. — Tussiaat 133:3. (gE 22/10 95)
[Qupp. 10-mi assiliartaq]
Kristusip naalakkersuinerani utoqqalisarneq toqulu ajugaaffigineqassapput