Qarmat isatikkit ikaartarfiliorlutillu
ILAQUTARIIT inuiaqatigiilluunniit inuuffigisavut nammineq qinersimanngilavut, eqqarsariartaatsittalu kulturimit sorlermit ilusilersorneqarnissaa nammineq aamma qinersimanngilarput. Tamakku inuup nammineq aalajangeeqataaffigineq ajorpai. Tamatta nalaatsornikkut pisartunit qulangerneqarsimavugut. Namminerli aalajangersinnaavarput inuit allat qanoq isigissanerlugit iliorfigissanerlugillu.
Tamatumani Biibilimi pitsaasunik siunnersorneqarpugut. Najoqqutassiarpaaluit quppap, allamik tunuliaqutalinnik attaveqatiginnissinnaanitsinnut akornutaasup, ikaartarfiliornissaanut iluaqutigisinnaasavut eqqarsaatigeriakkit.
’Guutip silarsuarmik taassumaniittunillu tamanik pinngortitsisup . . . inooqatigiissorpassuit tamaasa nunap tamarmi qaani ineqartippai aammit ataatsimit naggueqartillugit.’ (apustilit suliait 17:24, 26) Tamatta ataatsimik naggueqarpugut arlalippassuartigullu assigiissuteqarluta. Assigiissutivut eqqaamagaangatsigik attaveqatigiinnissarput ajornannginnerusarpoq. Tamatta pitsaasunik ikinnguteqarnissarput kissaatigaarput, aammalu asaneqartutut ataqqineqartutullu misiginissarput pisariaqartipparput. Kikkut tamarmik timikkut misigissutsikkullu anniaatissanik ingalassimanninniartarput. Inuit kulturinit tamaneersut eqqumiitsulianik nipilersukkanillu nuannarisaqarput quianartunillu oqaluttuarnissartik nuannarisarlugu; allanik inussiarnersumik pinnikkusuttarput pilluarnermillu ujartuisarlutik.
’Saqitsaagajunnermit piunngitsumillu ataqqineqarumanermit pinnasi, kisianni qanilaarlusi ilasi immissinnit annerutinniarsigik.’ (Filípimiut 2:3) Tamanna isumaqanngilaq isumaqassasugut allat sutigut tamatigut uagutsinnit pitsaanerusut. Akuerisariaqarparpulli allat arlaatigut uagutsinnit pitsaanerusut. Isumaqassanngilagut uagut, imaluunniit kulturerput, sutigut tamatigut allanit tamanit pitsaanerusoq.
’Taamaattumik piginnaaffissaqartilluta tamanut ajunngitsuliorta.’ (Galâsiamiut 6:10) Siulliulluni inussiarnersumik allanut qanorluunniit kulturilinnut iliuuseqalaarnerinnarluunniit attaveqatigiinnikkut avissaarutaasup ikaartarfiliornissaanut iluaqutaasinnaasorujussuuvoq.
’Nalunngilarsimi, qatanngutikka asasakka. Inulli kinaluunniit tusarasuarluni pili oqalukkumaarnertullunilu kamakkumaarnertullunilu.’ (Jâko 1:19) Attaveqatiginnillaqqissut oqaluinnarneq ajorput; tusarnaaraangamik naleqqussarsinnaassusertik atortarpaat.
„Inuup eqqarsaatai imertut itisuutut ipput; silassorissoq taakkuninnga qalooraasinnaasarpoq.“ (Ussatit 20:5) Misigissutsit inuup pissusilersorneranut tunngaviusinnaasut eqqumaffigisakkit. Inuit ilisarisimanerulerniakkit.
’Kialuunniit namminissani pinnagu, kisianni allattaaq iluaqutissaat piniarliuk.’ (Filípimiut 2:4) Misiginneqataanermik ersersitsisarit pissutsit illua’tungaanit isiginiartarneratigut. Namminissarsiornaveersaarit.
Jehovap nalunaajaasuisa akornanni kulturikkut assigiinngissutit
Najoqqutassiat tamakkua atoriaannaasut naleqassusiat Jehovap nalunaajaasuisa, maannakkut nunani 232-ni sulisut, akornanni ataasiussutsikkut malugisarialikkut takuneqarsinnaavoq. ’Inuiaqatigiinnit immikkullu naggueqatigiinnit immikkullu inuiaasunit immikkullu oqaasilinnit’ tamaneersuupput Jehovallu unnersuussutaanik asannittunik sutigut tamatigut maleruaanissartik aalajangiusimallugu. — sarĸúmersitat 7:9; 1 Korintumiut 10:31-33.
Jehovap nalunaajaasua allat kulturiannik nikaginninniarneq ajorpoq. Jehovamullu nalunaajaasunngortut kulturimik perorsagaaffigisaminnik ajattuinialerneq ajorput, Biibilimi najoqqutassianut akerliusut pineqanngikkaangata. Biibilimi najoqqutassianut akerliusutigut inooriaatsiminni allannguiniartarput. Akueraat kulturit tamarmik ajunngitsortaqartut, ajunngitsortallu tamakku pallorfiginninnermik ilumoortumik aallussilersuni sakkortusarneqartartut.
Nunarsuaq Guutip tamatuminnga isiginnikkunarneratut isiginiartarpaat — alutornaqaluni, tungujorluni kusanaqalunilu silaannarsuarmi kaavittoq; ulloriarsuaq assigiinngitsorpassuarnik inoqarlunilu kulturilik. Inuit Nunarsuarmiittut tamarmik ilaqutariissuartut ataasiussuseqartutut inuulernissaat Jehovap nalunaajaasuisa qilanaareqaat. (gE 8/7 96)
[Qupp. 8-mi assiliartaq]
Kulturikkut assiaqutit isaternissaat Jehovap nalunaajaasuisa ilinniarsimavaat