atek suna Gûtimut atorpiuk?
ateĸ suna aternit tamanit avdlanit bîbilime atorneĸarnerpaunersoĸ nalúngiliuk? oĸásagaluarpit David? Abraham? imalũnît Jesus?
isumaĸaruvit arĸit táukua ardlât atorneĸarnerpausimassoĸ, tauva atuagagssiamut ilángutagssiat uko soĸutiginartísavatit, tássame pâsilísavat bîbilime ateĸ pingârnerpâĸ atorneĸakulanerungmat arĸit ĸulâne taineĸartut katitdlugit atorneĸarneránît.
ATUAGAGSSIAP ugperissarsiornermut túngassunik imagdlup ersserĸigsarpâ asangnigkáine asassaĸ arĸatigut taineĸartarmat. imatut oĸartoĸarneĸ ajorpoĸ: „angut, asavavkit.“ imalũnît: „arnaĸ, asavavkit.“ imatutdle: „Ujût, asavavkit.“ imalũnît: „Magdalît, asavavkit.“ atuagagssiamilo tássane ãma ima aperissoĸarpoĸ: „Gûte kináussusersísaguvtigo ĸaningnerulerusugkuvtigulo ĸanoĸ ateĸartísavarput?“
ĸúperneĸ ilivitsoĸ atuagagssiap táussuma aperĸúmut tássunga atorpâ atausínguamigdlũnît ateĸ Gûtip ingminut taigûtâ erĸainago. tauva isumaliut una nãmagsineĸarpoĸ: „ivdlit nangmineĸ aulajangigagssarât avdlat nalussãnik ivdlit kisivit atugkangnik Gûte ateĸartísavdlugo.“ kisiáne pitsaunerúsángínerpa ateĸ Gûtip nangmineĸ torĸarsimassâ bîbilime tûsintileriardlune atorneĸartoĸ atoráine?
ilumut Gûte ateĸarpa?
âp, ateĸarpoĸ. eprîarisut grîkerisutdlo bîbilip agdlangneĸarĸautigissãne, oĸauseĸ „gûte“ Gûtimut ilumôrtuínarmut atorneĸartaríngilaĸ. sôrdlo kalâtdlisût, gûtinut ilumũngitsunut gûtipilungnutdlo atorneĸartarpoĸ. tauva ĸanoĸ ilivdlune Gûte ilumôrtoĸ, píngortitsissoĸ, inuitdlo gûtipilugsiorfê ingmíkôrtíneĸarsínáusápat? Gûtip nangmineĸ arĸata atorneĸarneratigut. inuitdle amerdlaĸaut Gûtip arĸanik ilisimangníngitsut, sulilo ikingneroĸalutik Gûtip arĸanik uvdlumíkut atuissut.
ímaĸa ivdlit nangmineĸ bîbilingne Gûtip arĸa takúngisáinarsimavat. sôĸ? píssutigalugo bîbilimik kalâtdlisũngortitsissut avdlángortiterisimangmata. bîbilip eprîarisôrtânik agdlagtut Gûtip súnîneratigut isumagssarsisíneĸarnermíkut Gûtip arĸanik tûsintilingnik atuisimassut isumaĸatigíngínamíkik taimailiorput.
bîbilip kalâtdlisûmut nugterneĸarnerane ãmátaoĸ Gûtip arĸa atorneĸángilaĸ. taimâgdlât bîbilip ĸavdlunâtôrtâne oĸautsit navsuiarneĸarneráne bîbilimik nugterissut atorsimavât oĸauseĸ „Nâlagaĸ“, navsuiarsimavdlugulo „atermut Jahve-mut, Israelip Gûtianut, taorsiutdlugo atorsimavdlugo“. agdlât bîbilime nutaunerussume Det danske Bibelselskabip nugtertitâne (Tussiaatit ãma Esajasip agdlagai) ateĸ atorneĸarsimángilaĸ, oĸauserdle „Nâlagaĸ“ taorsiutdlugo atorneĸarsimavdlune, ersserĸigsarneĸarsimananilũnît. Gûtip nangmineĸ atuagkiâne arĸa miníneĸarsimavoĸ!
ARK’UP táussuma nugterissut taorsiússãnit pingârnerunera pâsivdluardlugo tulugtũngortitsissut ilaisa oĸauseĸ „Nâlagaĸ“ Gûtip arĸanut taorsiutdlugo atorneĸarsimassoĸ naĸínernik angisûnik agdlagtalersimavât, atuartartut pâsitíniardlugit Gûtip arĸa bîbilime agdlagsimarĸârfingme ĸaĸugúkut atorneĸarsimanersoĸ. atuagaĸ ĸinerdlerfigssiaĸ ilisimaneĸardluartoĸ navsuiaivoĸ: „erĸaimassariaĸarpoĸ bîbilime tulugtũngortitame atermut eprîarisûmut Jehovamut taorsiutdlugo oĸauseĸ LORD (ilâtigut GOD) atorneĸarajungmat, naĸínernik angisûtut ilusigdlit mikissututdle angíssusigdlit agdlangneĸarsimassardlune.“ oĸauseĸ „LORD“ [„Nâlagaĸ“] taimatut agdlagneĸarsimassoĸ takugáine pâsineĸásaoĸ tássaussoĸ Gûtip aterigâ, Jehova, bîbilime agdlagsimarĸârfingme atorneĸarsimassoĸ. — McClintockip Strongivdlo Cyclopedia, 1981, atuagaĸ IV, ĸúperneĸ 811.
ateĸ táuna ivdlit nangmineĸ bîbilingne takusimagaluarugko takusimángíkaluarugkulũnît, bîbilime agdlagsimarĸârfingme eprîarisûjussume agdlagsimavoĸ. tyskit ilisimatûtut misigssuissut, Keilip Delitzschivdlo, tíkuarpât oĸautsit „Jehova Elohim“ (Jehova Gûte) Môrsasip agdlagaine sujugdlerne kapitale 2-me 3-milo versine 50-iúngitsunilũnît katitdlugit 20-riardlune atorneĸarsimangmata. oĸautigât „ingmíkut pingârtíneĸardlune atorneĸartartoĸ ersserĸigsarniardlugo Jehova ilumut tássaussoĸ Elohim“, tássa Gûte. — Commentary on the Old Testament, Keilimit Delitzschimitdlo, 1973, atuagaĸ 1, ĸúpernerit 72, 73.
Jesusip nangmineĸ arĸa isumaĸarpoĸ „Jah-p [Jehovap] ánássutâ“ imalũnît „Jehova ánássutauvoĸ“. oĸartoĸarângamilo „alîlûjâ“, tauva Jehovap arĸa nailisardlugo taigdlamut ilángutdlugo taineĸartarpoĸ. oĸausersiorfingme (ordbogime) oĸauseĸ alîlûjâ ujarsínauvat, takúsavatdlo isumaĸartoĸ ’Jah únersiutigisiuk’, imalũnît ’Jehova únersiutigisiuk’.
erĸaimajuk Jehova Gûtip nangmineĸ ateringmago. NANGMINEK’ ateĸ táuna torĸarsimavâ kináussusersíneĸautigiumavdlugo. pâsisínaorusugpiuk táussuma arĸata atorneratigut ĸanoĸ ilivdlune Gûtimik sujunertânigdlo pâsissatit angnerulersísínaugai? tamána ilángutagssiame tugdliútume erĸartornerúsavarput.