Takorlooriaruk: Silarsuaq piumatuffiunngitsoq
TAKORLOORSINNAAVIUK silarsuaq unammillerfiunani suleqatigiiffiusoq? Inunnit allanit iliorfigineqarnissamik kissaat naapertorlugu inunnik allanik iliorfiginniffiusoq? Silarsuarmi piumatuffiunngitsumi inuuneq taamaassaaq. Nuannerunarpa? Qaquguluunniit taamaalissava? Aap. Qanorli ililluni piumatussuseq peerneqarsinnaava, taama inuit pigiliussimatigigaat?
Akissutissarsiumagutta piumatussutsip pilerfia paaseqqaartariaqarparput. Bibelimi ersersinneqarpoq inuit piumatujuaannarsimanngitsut. Pruffiiti Mosesip eqqaasippaatigut inuk siulleq, Pinngortitsisup piliaa naammalluinnartoq, soorlu piumatussutsimik, innarluuteqarsimanngitsoq. Pinngortitsisoq „Qaarsuuvoq,“ Moses oqarpoq, „assuarnaatsuupput suliai, naapertuilluartuupput aqqutigisai tamarmik.“ Qanorli ililluni piumatussuseq pilerpa? Inuit siulliit piumatussutsip imminni ineriartornera ilaginnarsimavaat — Eva piumatulluni paarnamik Guutip neriffigeqqunngisaanik neriguni sumik angusaqarnissani pissangagalugu, Adamilu piumatulluni nuliani pinnersoq annaajumannginnamiuk. Aammattaaq Adamimut Evamullu tunngasumik Moses oqaaseqarpoq: „Eqqarleriit peqquserluttut naalasseriitsullu ilumuunngitsuliorfigimmanni Guutip ajortuliaat pillugit qitornariunnaarpai.“ — 5 Moses 32:4, 5; 1 Timûtiuse 2:14.
Noap nalaani nunarsuaq tamakkerlugu ulersuaqarnera sioqqullugu piumatussuseq ima ingasatsigilersimavoq „nunami inuit ajussusiat annertusiartuinnartoq, piumasaallu pilersaarutaallu ajortuinnaasut“. — 1 Moses 6:5.
Taamanimiilli piumatussuseq inuit pissuserisimavaat saqqumilaartoq, nalunanngilarlu ullumikkut inuiaqatigiinni qujasuitsuni pilerituunilu ingasannerpaaffissani angujumaaraa.
Piumatussuseq ajoqersorneqarnikkut peerneqartarpoq
Piumatussuseq inuit akornanni siaruaannissamut periarfissaqarsimaguni, aammattaaq killilerneqarnissamut periarfissaqassaaq. Aap, piumatussuseq ajugaaffigineqarsinnaavoq. Tamatumanili ajoqersorneqarnissaq aammalu maleruagassanik najoqqutassianillu maleruaanissamik ilinniarnissaq pisariaqarput. Manna apeqqutaaginnarpoq: Kia taamatut ajoqersorsinnaavaatigut ilinniakkatsinnillu maleruaanissarput isumagalugu?
Piumatunngitsoq kisimi taamatut ajoqersuisinnaavoq. Taamatut ajoqersuinermi isertukkamik siunertarisaqartoqaranilu pisuunngornissamik kissaatigisaqartoqassanngilaq. Aammalu oqaatsikkut iliuutsikkullu ersarissumik takutinneqartariaqarpoq namminissarsiunngitsumik ersersitsinissaq ajornaranilu iluaqutaasoq. Tamatuma ajornannginneranik ajoqersorneqartut qularunnaarsinneqaannassanngillat, aammattaarli qularunnaarsinneqassapput taamaaliorneq inooriaasiusoq pitsaanerpaaq, namminermut avatangiisinullu iluaqutaassasoq.
Qilaap Guutia kisimi taamatut ajoqersuisinnaavoq, nunamimi inuk kina peqatigiiffilluunniit suna tamatumunnga eqqortumik piginnaassuseqarlunilu periusissaqarpa? Inuup kialuunniit suliaq tamanna suliarisinnaanngilaa, Bibelimimi allassimavoq: ’Tamarmik ajortuliorput Guutimi nersornaammik ajorsarlutik.’ — Rûmamiut 3:23.
Pilluarnangaarpoq Jehova Guutip atuakkamini ajoqersuutaasumi, Bibelimi, pisariaqartumik ajoqersormatigut. Ernera Jesus Kristus nunami inuugallarami ajoqersuummik tamatuminnga illersuisuuvoq. Qaqqami oqaluutsimini tusaamasaasumi inooriaatsimik, allaat akeqqanut akerlerisanullu namminissarsiortuunnginnissamik piumasaqarnera pissutigalugu, tusarnaartut amerlanersaannit eqqumiigineqartumik eqqartuivoq. Jesus oqarsimavoq: ’Ilissinnik perloqqusisut pilluaqqusigik; ilissinnik uumissuisut ajunngitsuliorfigisigik; ilissinnik innarliisut qinuginnittullu qinnussigik qitornareqqullusi ataatassinnut qilammiusumut; taassumami seqerni ajortunut ajunngitsunullu nueqqusarpaa, sialleqqusisarlunilu iluartunut iluaatsunullu. Ilissinnimmi asannittut asagussigik, sumik taava akileriaqassavisi? Ilanngaaserisuttaaq taamaattarinnginnerlutik?’ — Matîuse 5:44-46.
Jesusip nunamiikkallarami suliassaasa ilagaat inunnik namminissarsiunngitsunik ajoqersuinissaq, taamaalillutik piumatunani inuunissamik inunnik allanik ajoqersuisinnaaqqullugit. Jesusip toqunerata makinneratalu kingunitsianngua Paulus ajoqersuisunut taakkununnga ilaalerpoq. Paulusip allakkamini isumassarsiariatitaasuni arlaqartuni kajumissaarutigaa piumatussutsip sorlai tamaasa ilanngullugit peerneqarnissaa. Assersuutigalugu, Efesusimiunut ima allappoq: ’[Kanngunartuliorneq] mingunnartullu nalinginnaat piumatuunerlu taaneqassanngillalluunniit ilissinni, iluartut taama ileqqussaqarmata.’ — Evfisumiut 5:3.
Ullumikkut Jehovap Nalunaajaasui taamatut arnanik angutinillu piumatoriataartarnermik naqisimanninnissamik ajoqersuipput. Ajoqersorneqartut piffissaq ingerlatillugu Guutimik mianerinnilluni inooriaatsimik tamatuminnga inunnik allanik ajoqersuiartornissaminnut piukkunnarsisarput.
Bibelip ajoqersuinerata kingunera
Immaqa ima aperissaatit: ’Piumatussuseq taama inuit naammalluinnanngitsut pigiliussimatigigaat tamatumunnga ersiutaasut ilumut asoorunneqarsinnaappat?’ Aap, taamaaliortoqarsinnaavoq. Soorunami naammalluinnartumiunngitsoq, malunnarluartumilli asoorunneqarsinnaapput. Assersuummik taasaqariarta.
Spaniami tillikkumatoorsuaqarsimavoq, taassumalu illua tillitanik ulikkaarpoq. Jehovap Nalunaajaasui ilagalugit Bibelimik atuaqqissaartalerpoq, kingunerileraalu ilerasuuteqalerpoq. Taamaattumik aalajangerpoq tillitani tamaasa piginnittuinut utertinniarlugit. Sulisitsisorisimasani oqaloqatigaa nassuerlunilu atisanik errorsissummik nutaamik tilliffigisimallugu. Allanngorsimanera sulisitsisorisimasaata tupaallaatigingaaramiuk taamaaliorsimanera politiinut nalunaarutiginngilaa, atisanilli errorsissut akiliinnarsillugu.
Taava tilliffigisimallugit eqqaamasani tamaasa pulaarpai tillitani utertillugit. Bibelip najoqqutassiaanik maleruaalersimanini pissutigalugu taama allanngorsimatigineranik tupaallaatiginninnertik taakku tamavimmik oqaatigaat.
Maannali ataatsimik ajornartorsiuteqalerpoq. Tillitami ilarpassuisa piginnittui naluai. Taamaattumik Jehovamut qinoreerluni politeeqarfimmukarpoq biilillu radiui arfinillit tunniullugit. Politiit tupaallattorujussuupput, aqqami allattuiffimminni allassimanngimmat. Akiliisussanngortitaavoq sivikitsumillu parnaarusimaneqartussanngortitaalluni.
Tillinniartartuusimasoq taanna maanna ilerasuuteqanngilaq, pinerlunniartartuulluni piumatullunilu inuunini asoorussimagamiuk Jehovap Nalunaajaasuisalu silarsuaq tamakkerlugu ilagiissaannut ilanngussimalluni.
Assersuuterpassuit oqaluttuarineqarsinnaagaluarput. Taamatut inuunerminnik allannguisimasut nunarsuup inuinut naleqqiullugit ikikkaluartut ersersinneqarpoq Bibelimi najoqqutassianik ilisimanninneq maleruaanerlu qanoq iluaqutaatigisumik kinguneqartartut.
Ukiut tamarluinnaasa inuit amerliartuinnartut taamatut inooriaaseqalertarput. Jehovap Nalunaajaasuisa ilagiissaanni nunarsuaq tamakkerlugu 60.000-init amerlanerusuni Bibelimik ajoqersuineqarpoq. Jehovap Nalunaajaasui isumaqanngillat silarsuaq tamaat allanngortissinnaallugu nunarsuullu inui milliartilikkuutaat piumatunnginnissamik ilikkartissinnaallugit. Bibelimili siulittuutigineqarpoq piumatussuseq nunarsuarmi qanittukkut peerneqarumaartoq!
Silarsuassaq piumatuffiunngitsoq
Silarsuassami nutaami piumatooqaranilu namminissarsiortoqassanngilaq. Apustili Peterip neriorsoqqissaarpaatigut ’qilaat nutaat’ kisimiunngitsut aammattaarli ’nuna nutaaq’ naapertuilluassuseqarfiujumaartoq. (2 Pîtruse 3:13) Piumatussuseq nappaatit, aliasunneq toqulu assigalugit ’siullernut’ peereersunut ilaassaaq. — sarĸúmersitat 21:4.
Piumatuumik namminissarsiortumillu inooriaaseq sumi tamaani atuuttoq isumakuluutigigukku isumallualernissamut pissutissaqarputit! Silarsuassaq nutaaq qanittukkut piviusunngortussaq eqqarsaatigalugu maannangaaq inuulerit. Guuti ikiortigalugu isummanni piumatussutsip ersiutasa suulluunnit peernissaat sulissutigiuk. Kristumiutut inuunerup qanoq iluaqutaatigineranik inuit allat paasinnissinnaanissaannik ikiukkit. Piumatussutsip ’peereersunut eqqaamaneeruttussanut eqqaaqqinneqanngitsussanullu’ qanittuararsuakkut ilaalernissaanik Jehova Guutip neriorsuutaa isumalluarfigiuk. — Jesaja 65:17. (wD 15/2 90)
[Qupp. 5-mi assiliartaq]
Inooriaaseq namminissarsiunngitsoq piumatunngitsorlu Jesusip eqqartorpaa
[Qupp. 7-mi assiliartaq]
Silarsuaq erniinnaq piumatooqarunnaassaaq