Jesus — naalagaq ’killinganit pilereersoq’

QANIGISAVIT sivisuumik takusimanngisavit tikeraarnissaa pissangaqalutit utaqqivat. Kiisami tikippoq — tikilluaqquneqangaarluni. Suna pillugu ataatami ilinnut tikeraartikkaani oqaluttuartillugu tusarnaaqqissaarpat. Angerlarnissaali nalliutilertoqaaq, inuulluaqqusariaqalerpallu. Aallarmat maqaaseqaat, nuannaarputilli tusarakku angerlamut apuulluarsimasoq.

Kingunerileraa allagatoqqat misissortillugit allakkat naatsut qanigisavit ilinnut tikeraarnini sioqquterujussuarluguli sulerisimaneranik eqqartuisut naammattoorpatit. Allakkat imaasa qanigisavit tunuliaqutaanik soqutiginartunik paasisaqartippaatsit tikeraarsimaneranillu, minnerunngitsumillu, maannakkut suliaanik pingaartitsinerulersillutit.

’Killinganit pilereersoq’

Allagatoqqat ukiuni hundredelinni siullerni juutit atuarsinnaasaasa ilagaat Guutip pruffiitiata Mikap allagai ukiut 700-nit amerlanerusut tamanna sioqqullugu allassimasai. Allakkani taakkunani sumi Messias inunngussasoq oqaatigineqarpoq. ’Illit, Betlehem Efrata, mikivallaaraluartutit Judap tuusintilittaanut ilanngutissallutit, ilinnit pissavoq sugisassara Israelikkunni naalagaasussaq; taanna killinganit pilereersoq, ullormik ersitsoqanngikkallarmat.’ (Migga 5:1) Oqaatsit taakku eqquutitillugit Jesus illoqarfimmi Judeamiittumi Betlehemimi inunngorpoq ullumikkut ukiutut 2-tut u.n.k. taasatsinni. Qanorli ililluni ’killinganit pilereerpa’?

Jesus inuttut inuunngikkallarami anersaatut piusimavoq. Apustilip Paulusip kristumiunut Kolossamiittunut allakkamini Jesus tassaanerarsimavaa ’Guutip takussaanngitsup assinga pinngortitat tamarmik siornatigut erniusoq’. — Kulorsamiut 1:15.

Jehovap, ilisimassutsip pilerfiata, ernini siulleq ’siulliutillugu pinngortissimavaa’, kunngi Salomonip isumassarsisitaalluni Ussatit-nik allatsinneqarnermini oqarneratut. Jesus nunarsuarmeereerluni qilammullu utereerluni nammineerluni nalunaajaasimavoq tassaalluni ’Guutip pinngortitaasa aallaqqaataat’. Ilisimassutsitut kinaassusilikkatut Jesus inuttut inuunngikkallarami ima nalunaarsimavoq: „Najuuppunga [Jehovap] qilak siaarmagu.“ — Ussatit 8:22, 23, 27; sarĸúmersitat 3:14.

Aallaqqaataanit Guutip ernera asseqanngitsumik suliassinneqarpoq Ataatami saani ’suliortutut’. ússatit 8:30-mi ima allassimasoqarpoq: ’Taamani sanianiippunga suliortuullunga nuannarisaallungalu ullut tamaasa, saani [nuannaartuaannarlunga, NV].’

Kingorna Jehovap ernini kajumissaarpaa inuup pinngortinneqarneranut peqataaqqullugu. „Inunnik pinngortitsisa immitsinnik assililluta,“ Jehova oqarpoq, „uatsitut ittussanik.“ (1 Moses 1:26) Taamaalilluni nuannaarutissaq nutaaq pilerpoq. ’Inuit nuannaarutigisarpakka,’ Jesus inuttut inuunngikkallarami taama oqarsimavoq. (Ussatit 8:31) Jesusip inuttut inuunngikkallarami pinngortitsinermut peqataasimanera apustili Johannesip iivangkiiliumi aallartinnerani akueraa: ’Suut tamarmik taassumuuna pinngorput; taassumuuna pinngitsumik pinngortut ataatsimilluunniit pinngortoqanngillat.’ — Juánase 1:3.

Jehovap oqaaseqartitaa

Guutip ernerata aamma immikkut pisinnaatitaaffigalugu oqaaseqartartuusimaneranik Johannesip eqqaasippaatigut. Aallaqqataaniilli Oqaatsitut kiffartorsimavoq. Taamaattumik Jehova Adamimut kingornalu inunnut aappariinnut Adamimut Evamullu oqalummat qularnanngitsumik Oqaaseq aqqutigalugu pivoq. Kinalu Guutip unnersuussutaanik pitsaasunik ingerlatitseqqittussatut inunnik asannittumit taassumunnga piukkunnarnerusinnaanerpa? — Juánase 1:1, 2.

Eva kingornalu Adam Pinngortitsisiminnut naalanngitsut takullugit Oqaatsip aliasuutigisimassaqaa. Naalliuutillu naalannginnermikkut kinguaaminnut atugassarititariligaasa aaqqiiffiginissaat erinigisimassaqaa. (1 Moses 2:15-17; 3:6, 8; Rûmamiut 5:12) Satan, Evap pikitsitsinissaanik kajumissaarisimasoq, Jehovap ima nalunaarfigaa: ’Akerariissikkumaarpassilu illillu arnarlu, illit kinguaassat taassumalu kinguaassaa.’ (1 Môrsase 3:15) Edenimi pisunik takunnittutut Oqaatsip paasivaa nammineq arnap ’kinguaassaatut’ pingaarnertut sakkortuumik uumissorneqarumaarluni. Nalunngilaa Satan inuartuusoq. — Juánase 8:44.

Kingorna Satanip Jobip aalajaatsup assuarnaassusia apeqqusermagu Oqaatsip Ataataminik unnerluussinerit mamarleerpalaartut ajuallaatigisimassaqai. (Job 1:6-10; 2:1-4) Oqaaseq inngiliunertut Mikaelitut atilittut ilisimaneqarpoq, aterlu taanna isumaqarpoq „kina Guutitut ippa?“, tassuunalu erserpoq Jehovap kisimi oqartussaassusianut unammillertunut tamanut Jehovamik illersuisuusoq. — Daniel 12:1; sarĸúmersitat 12:7-10.

Israelip oqaluttuarisaanera ingerlatillugu Satanip pallorfiginninnermit minguitsumit inunnik tunussititsiniaanerpassui Oqaatsip takusarpai. Egyptenimit aallarnerup kingorna Guuti Moses aqqutigalugu Israelikkunnut ima oqarpoq: „Inngilimik siunissigut aallartitsiumaarpunga aqqutissassinni paareqqullusi apuutiteqqullusilu ilissi nunassassitut piareersakkannut. Inngili taanna mianeralugu naalassavarsi anneruniarfiginagulu, pinerluttuliasi ilaginnaannassanngimmagit atera taassumaniimmat.“ (2 Moses 23:20, 21) Inngili taanna kinaava? Qularnanngitsumik Jesus inuttut inuunngikkallarami.

Aalajaalluni naalatsigitinneq

Moses ukiumi 1473-imi u.n.s. toquvoq, ilineqarporlu „qooqqumi Moabikkut nunaanni Bet-Peorip akerpiaani“. (5 Moses 34:5, 6) Timaa Satanip pissarsiarerusussimagunaraluarpaa, immaqa guutipilussiorneq siuarsarniarlugu. Mikaelip taanna akerlilersorpaa, Ataatamili, Jehovap, oqartussaassusianut naalalluni naalatsigitilluni. ’Satan mitalliutaasumik pineq saperamiuk’ Mikaelip ima mianersoqquaa: ’Jehovap appisaluullisit.’ — Jûtarse 9.

Taava Israelip nuna neriorsuutigisaasoq, Kana’an, tigualerpaa. Oqaatsip Israelikkunnik nakkutiginnittuarsinnarneranik Josua illoqarfiup Jerikop eqqaaniitillutik uppernarsaaffigineqarpoq. Tamaani angut panaminik silugussisimasoq naapippaa. Josuap takornartaq ornippaa aperalugulu: ’Uagut iliginerpatsigit, qinngarsortittaluunniit iliginerpaatsit?’ Takorlooruk Josuap tupaallannera takornartap kinaanini oqaatigimmagu: ’Naagga, Jehovap katersaarsuisa naalagarimmannga maanna tikiuppunga.’ Tupinnanngitsumik Josua Jehovap aallartitaanut nuimasumut taassumunnga, qularnanngitsumik tassaasumut Jesus inuttut inuunngikkallarami, kingorna ’Messiasimik, Siulersuisumik’ taaneqartumut, pallorpoq. — Jôrsua 5:13-15; Dâniale 9:25.

Guutip pruffiitiata Danielip nalaani aamma Satan saqitsaateqatigineqaqqippoq. Taamani Mikaelip inngili alla illersorpaa inngilipilunnut naalagaatitap Persiamik illersuisup sapaatit-akunnerini pingasuni ’akiormagu’. Inngili nassuiaavoq: „Taava Mikaelip inngilit nuimanerit ilaata akiuuttunga takugamiuk ikioriartorpaanga Perserit naalaagaaffiata illersortaa akiorlugu.“ — Daniel 10:13, 21.

Qilammi nunarsuarmilu naalannassusia

778-imi u.n.s. Judami kunngi Uzzija toquvoq, pruffiitilu Esajas Jehovamik issiavissaarsuarmini issiasumik takorruuisitaavoq. „Kina aallartissavara, kina oqariartortissavarput?“ Jehova aperivoq. Esajas piumavoq, Jehovalli mianersoqquaa oqariartuutaa Israelikkoqataasa tusaajumanavianngikkaat. Apustili Johannesip ukiuni hundredelinni siullerni juutit upperumanngitsut Esajasip nalaani inunnut assersuussimavai oqarlunilu: ’Taama Esajas oqaluppoq naalannassusia takugamiuk.’ Kia naalannassusia? Jehovap naalannassusia Jesusillu inuttut inuunngikkallarami Jehova ilagalugu qilammiikkallarami naalannassusia. — Jesaja 6:1, 8-10; Juánase 12:37-41.

Ukiut hundredellit arlallit qaangiummata Jesus aatsaat taama annertutigisumik suliassinneqarpoq. Jehovap ernermi asasami inuussutaa Mariap illiaanut nuuppaa. Qaammatit qulingiluat qaangiummata nukappiaqqamik ernertaarpoq, tassa Jesus. (Lúkarse 2:1-7, 21) Soorlu apustili Paulus oqartoq: ’Ullulli naammatsiffissaat nalliummat Guutip erni aallartippaa arnamit erniusoq, inatsisit ataanniilluni erniusoq.’ (Galâsiamiut 4:4) Soorlu apustili Johannesip uppernarsaraa: ’Oqaaserlu uininngorpoq akornatsinniilerlunilu, takuarpullu naalannassusia soorlu ernituap ataataminit naalannassuserisaa, saammaannermik sallusuissummillu ilumioqangaartoq.’ — Juánase 1:14.

Messias saqqummerpoq

Aqqaneq-marlunnik ukioqarluni, immaqaluunniimmi siusinnerusukkut, Jesusip paasivaa Ataatami qilammiusup piumasaatut iliorluni ulapittariaqarluni. (Lúkarse 2:48, 49) Ukiut 18-it missaanniittut qaangiuttut Jesus Johannes Kuisisumukarpoq Jordanillu kuussuani kuisilluni. Jesus qinutillugu qilak ammarpoq, anersaallu illernartup qulangerpaa. Takorluukkit ukiuni tuusintilikkuutaani kisissaanngitsuni Ataatami saniani suliortutut, oqaaseqartitatut, Guutip sakkutuuinut naalakkatut inngiliunertullu Mikaelitut kiffartorsimanini eqqaaleramiuk eqqaajortugarpassui. Ataatani Johannes Kuisisumut ima oqartoq tusarlugu Jesus nuannaarsimassaqaaq: ’Tassa ernera asanartoq nuannarisara.’ — Matîuse 3:16, 17; Lúkarse 3:21, 22.

Jesusip inuttut inuunngikkallarami piusimanera Johannes Kuisisup qularutiginngilaa. Jesusip qanillimmani oqarpoq: ’Tassa Guutip savaaraa silamiut ajortaannik ersuttoq.’ Nangillunilu: ’Taannaavoq oqaatigisara: Angut kingunikkut pissasoq siuninniittoq, uannimmi siulliuvoq.’ (Juánase 1:15, 29, 30) Aammattaaq apustili Johannesip nalunngilaa Jesus inuttut inuunngikkallarami piusimasoq, imami allappoq: ’Pavannga pisoq tamanit anneruvoq, . . . qilammit pisoq tamanit anneruvoq. Takusaminillu tusakkaminillu nalunaajaavoq, nalunaajaataalu ilassineqanngilaq.’ — Juánase 3:31, 32.

Ukiup 61-ip u.n.k. missaani apustili Paulusip juutit kristumiuusut kajumissaarpai Messiasip nunarsuarmut tikiunnerata palasiunertullu kiffartornerata pingaaruteqassusianik tamakkiisumik paasinninnissaannik. Jesusip palasiunertut suliassaa Paulusip erseqqissarpaa ima oqarluni: ’Guutip . . . makkua naalerneranni ernermigut oqaluffigaatigut, . . . taassumuunalu silarsuaq pinngortippaa.’ Tassani Jesusip pinngortitsinermi ’suliortutut’ sulisimanera imaluunniit inuit Guutimit saammaanneqarsinnaaqqullugit Guutip aaqqissuussaani siumukariartortuni peqataanera pineqaraluarpalluunniit, Paulus Jesusip inuttut inuunngikkallarami piusimaneranik taamaalilluni uppernarsaatissamik saqqummiussivoq. — Eprîarit 1:1-6; 2:9.

Itsarli ilumoorfiginnittoq

Ukiuni hundredelinni siullerni Paulus kristumiunut Filippimiittunut ima oqaassivoq: ’Ima isumaqaritsi soorlu Kristus Jesus; Guutip taattua Jesusip pigigaluaramiuk Guutisut issutsi paggatigisatut isumaqartinngilaa, pissutsili iperarpaa kiffap taattua atillugu inuillu assigilerlugit; inuttullu pissuseqarluni malunnarsigami imminik nikanarsarpoq naalaannarluni toqumut allaat, massami [nappakkami naalliutsitaaffimmi, NV] toqumut allaat.’ (Filípimiut 2:5-8) Jesusip ilumoorfiginnilluni inuusimanera pillugu Jehovap toqusunit makitippaa qilammullu uternerani tikilluaqqullugu. Jesus taamaalilluni ukiuni kisissaanngitsuni assuarnaattuaannarsimanermigut uagutsinnut maligassiuilluarpoq. — 1 Pîtruse 2:21.

Jesusip inuttut inuunngikkallarami piusimanera pillugu Biibilimi paasissutissat qujamasuutigisinnaavavut. Ilumoorfiginnilluni kiffartornera ilaarniarlugu aalajangiusimanninnitsinnik tamakkua nakussatsitsipput, ingammik massakkut Guutip naalagaaffiani Messiasikkoortumi naalakkersuinerani. „Naalagaq eqqissisitsisoq“, Kristus Jesus, siulersorterput naalagarpullu, ’killinganit pilereersoq’, unnersiutiginiartigu. — Jesaja 9:6; Migga 5:1. (wE 15/6 98)

[Qupp. 27-mi ungalusaq]

Inuttut inuunngikkallarami piusimaneranut takussutissat

Jesusip nammineq oqaasiisa ataani issuarneqartut uppernarsarpaat taanna inuttut inuunngikkallarami piusimasoq:

◻ ’Allalu qilammut pavunnassanngilaq, qilammit aqqartoq kisimi, tassa Inuup Ernera qilammiusoq.’ — Juánase 3:13.

◻ ’Mosesip neqissamik qilammit pisumik tuninngilaasi, Ataatamali neqissamik qilammit pisumik piviusumik tunivaasi. Guutip neqissaataa tassaammat qilammit aqqartoq silamiunik inuutitsisoq. . . . Qilammimmi aqqarpunga peqqusara naammassiniarnagu, aallartitsisimali peqqusaa naammassiartorlugu.’ — Juánase 6:32, 33, 38.

◻ ’Tamassa neqissaq qilammit aqqartoq, tassannga nerisut toqunaveeqqullugit. Uangaana neqissaq uumasoq qilammit aqqartoq; neqissamit tamatumannga nerisoq naassaanngitsumik inuussavoq.’ — Juánase 6:50, 51.

◻ ’Immaqali Inuup Ernera inigigaluaminut pavunnartoq isigissagussiuk?’ — Juánase 6:62.

◻ ’Nalunaajaatiga ilumoorpoq, ilisimagama sumit pisunga sumullu pissasunga; . . . Ilissi samannga pivusi, uangali pavannga pivunga; ilissi silamit matumannga pivusi, uangali silamit matumannga pinngilanga.’ — Juánase 8:14, 23.

◻ ’Guuti Ataatagigussiuk asaqqajaqaassinga, Guutimit pisimallunga tikiukkama; isumannimmi tikiutinngilanga, taassumali aallartippaanga.’ — Juánase 8:42.

◻ ’Ilumut, ilumut oqarfigaassi: Abraham piunngikkallarmat uanga ippunga.’ — Juánase 8:58.

◻ ’Maannalu, Ataataraa, ilinni naalannarsisinnga naalannassutsinnik silarsuaqanngikkallarmat ilinni pigisannik. Ataataq, uannut tunniussatit uanneeqquakka najukkanni, uannut naalannassuserititat taakkununnga takoqqullugu, silarsuaq tunngavilerneqanngikkallarmat asagamma.’ — Juánase 17:5, 24.

[Qupp. 26-mi assiliartaq]

Jehovap sakkutuuisa naalagaat Josuap naapikkaa