Illumiit-illumut oqaluussinermi atuagassiat atortakkit
1 Iteritsi!-p normuini tamani qupperneq 4-mi atuagassiap siunertaa ersarissumik allaatigineqarpoq: „Kinguaariit 1914-imi pisunik misigisaqarsimasut suli inuutillugit silarsuarmik nutaamik toqqissisimanartumik eqqissineqarfiusumillu pilersitsinissamik Pinngortitsisup neriorsuutaanut neriulluarnissamut tunngavissiivoq.“ Atuagassiaq tamanna illumiit-illumut oqaluussinitsinni siammarterneqartorujussuusariaqarpoq.
2 Inuit anersaakkut ittunik oqaloqatigiissutiginnikkusuppallaanngitsut soqutiginnilersissagaanni Iteritsi! ikuutaavoq pitsaasoq. Atuagassiat atuarukkit eqqarsaatit oqaluussinissamut tulluartuusut malugisinnaavatit. Oqaluussisartut ilaasa namminneq atugassiaatiminni tamakku allattortarpaat, taavalu atuagassiaq tamanna neqeroorutigitinnagu allattukkatik misissortarlugit pulaakkanut aalajangersimasut takutissinnaajumallugit.
3 Aallarniillutit Iteritsi!-mi neqeroorutigisassanni eqqartorneqartoq oqaatigisinnaavat.
Pulaakkat soqutiginnippasippat atuagassiaq neqeroorutigisinnaavat ima oqarlutit:
◼ „Iteritsi!-mi ilanngutassiap matuma tamanna pillugu paasissutissat amerlanerusut imarai.“ Taava oqaaseqatigiit marlussuit toqqarsimasatit atuarsinnaavatit nangillutillu ima oqarlutit: „Tamanna pillugu atuarusukkuit Iteritsi!-milu ilanngutassiat allat atuarusullugit atuagassiaq Napasuliaq Alapernaarsuiffik ilanngullugu tigusinnaavat.“
4 Pulaakkavit anersaakkut ittut soqutigippagit allassimaffimmik innersuussinnaavat, assersuutigalugu 2 Timûtiuse 3:1-5 ullut kingulliit pillugit. Taava atuagassianut soqutiginnilersitsisinnaavutit atuagassiami qupperneq 2-mi immikkoortoq „Napasuliaq Alapernaarsuiffik-up siunertaa“ atuarlugu. Taavalu atuagassiaq Iteritsi! ilanngullugu neqeroorutigisinnaavat.
5 Oqaluussiffimmi nunasisut qimaasullu amerlasuut najugaqarpata atuagassiat neqeroorutiginngikkaluarlugit ima oqarsinnaavutit:
◼ „Maannakkut allamiorpassuit Danmarkimut nunasisimammata upperisarsiornerit nammineq upperisarsiornitsinnit allaalluinnartut naammattoortarpavut. Isummat assigiinngitsorujussuusut malunnarnerungaarput. Kisianni sooq upperisarsiornerit taama amerlatigippat? [apustilit suliait 17:26, 27 atuaruk.] Imaannginnerpa amerlanersaasa angajoqqaamik upperisarsiornerat maliinnartaraat namminneq Guuti ujarnagu? [Pulaakkat oqaaseqartiguk.] Tamanna eqqartorneqarpoq atuakkami matumani Menneskets søgen efter Gud-imi kapitalimi siullermi. [Qupperneq 8-mi immikkoortoq 12-imi allassimasoq takutiguk.] Upperisarsiornernik allanik ilisimasaqarnerulerneq paasisaqarnarlunilu ilikkarnaqaaq. Aammalu inuit assigiinngitsunik tunuliaqutallit paaseqatigiinnerusinnaassapput. Atuakkami matumani silarsuarmi upperisarsiornerit pingaarnerusut aallaavii, ileqqorisaat ajoqersuutaallu sammineqarput.“ Periarfissaqaruit atuakkap imarisaa assiliartaalu ilaat takutissinnaavatit.
6 Eqqarsaatigeriaruk illumiit-illumut oqaluussisarnitsinni silarsuarmi ikiuutissat pitsaanerpaartaasa ilaat marluk atorsinnaagivut, Napasuliaq Alapernaarsuiffik Iteritsi!-lu, inuit anersaakkut siumukarnissaannut ikiorniarlugit. Atuagaassiat taakku sukkulluunniillu neqeroorutigalugit sapinngisamik inuit taakkuninnga soqutiginnilersinniartigik. (km 93/10 Brug bladene . . .)