Jehovap angajulliliaa nersoruk!
1 Sapaammi nisanip 9-ani ukiumi 33-mi inuppassuit palmip avalequtaanik tigumiarlutik katersuussimapput Jehovallu angajulliliaa, Jesus Kristus, kunngitut ’Jehovap aqqani tikiuttutut’ nersorlugu. (Lúk. 19:38; Epr. 1:6) Ataasinngornermi marlunngornermilu, nisanip 10-ani 11-anilu, Jesus tamanut oqaluussilluni ulapittorujussuusimavoq. Ullut taakku marluk nunami inuunermini ulapinnerpaaffiinut ilaapput.
2 Ullumikkut inuit suli amerlanerusut palmip avalequtaanik assersuutaasumik tigumiarlutik ima suaartarput: ’Annaassut Guutitta issiavissaarsuarmi issiasup savaaqqallu pigaat.’ (sarĸ. 7:9, 10) Marsip 26-ani Kristusip toqunera eqqaaniarlugu katersuutissaagut. Ullup tamatuma tungaanut oqaluussinerput annertusisissinnaavarput nunarsuaq tamakkerlugu unnersiutiginninneq annertusisinnaaqqullugu?
3 Kiffartornerit annertusiuk: Oqaluussisartorpassuit marsimi ikiorti-pioneriuniarlutik nalunaareersimapput. Ilaaqquffigissavigit? Tamatumunnga periarfissaqaruit qinnuteqaatit sapinngisamik erniinnaq tunniutissavat. Tamatumunnga atatillugu apeqqutissaqaruit utoqqaanertat ilaata nuannaarluni akiumassavaatit.
4 Immaqa ikiorti-pioneriunissamut periarfissaqanngikkaluarluta marsimi kiffartornermut tamakkiisumik peqataanissarput kissaatigaarput. Ilaatigut ilagiit ullut tamaasa gruppeqatigiit oqaluussiartoqatigiinnissaannik aaqqissuussisinnaapput. Oqaluussiffissanik naammattunik isumagineqassapput.
5 Ilagiit tamarmik marsip 26-ani immikkut katersuuttoqarnissaa aaqqissuutissavaat. Naak eqqaaniaalluni nalliuttorsiornissamut piareersagassaqaraluaqisoq periarfissallit tamarmik arfininngornermi oqaluusseqataanissaminnut kajumissaarneqarput. Illumiit illumut oqaluusseqataanerpit saniatigut qulakkeertariaqarpat eqqaaniaalluni nalliuttorsiornermut qaaqqusimasatit nalliuttorsiorfissamukarnissaminnut ilaaffissaqarnersut, aammalu sumi qassinullu pinissaa paasilluarsimaneraat.
6 Qaaqqusillutillu kajumissaarigit: Jesusip ajoqersukkani ima peqqusimavai: ’Taamaaliortaritsi eqqaallunga.’ (1 Korintumiut 11:24) Jesusip ajoqersugai tanitaasut taamaaliormata Jehovap kiffai tamarmik eqqaaniaalluni nalliuttorsiornermut najuunnissaminnut qaaqquneqarput. Eqqaamajuk atuaqqissaaqatigisartakkatit, qanigisatit, soqutiginnittut, aappat uppinngitsoq niuernikkullu attaveqarfitit qaaqqussagakkit. Tulleriiaarlugit allattukkit puiugaqaqqunak.
7 Eqqaaniaalluni nalliuttorsiornermi aamma soqutiginnittut kajumissaassallugit periarfissaqassaaq. Aggiaarniarna siullermeerlutik takkuttut tikilluaqqusinnaaqqullugit. Qaaqqusatit amerlappata pitsaassaaq oqaluussisartoq alla qinnuigissallugu eqqassinnut inginnissaanik. Aamma nutaat marsip 27-ani tamanut ammasumik oqalugiaammut qaaqqusinnaavatit. Oqalugiartussaq piareersarluartariaqarpoq kajumissinartumik saqqummiusisinnaajumalluni.
8 Qanortoq eqqaaniaalluni nalliuttorsiorneq naggaserlugu erinarsuut nr. 105, „Jehovap ernera angajulliliaa ataqqinarsili!“, erinarsulerutsigu qaammat Jehovap unnersiutigineqarnissaanut ulapaarfigisimasarput nalerisimaarluta kingumut qiviarsinnaagisigu! (kmD 2/94 Hyld Jehovas førstefødte!)