Biibili silarsuarmi ajornartorsiorfioqisumi tuppallersaatissiillunilu neriuutissiivoq
1 Silarsuarmi matumani inuit annertuumik tatineqaqqapput pisariaqartitsillutillu tuppallersaatissamik neriuutissamillu. Biibili kisimi piviusumik tuppallersaatissaqarpoq, silarsuarmimmi nutaamik naapertuilluarfiusumik neriuummik imaqarami. (Rûm. 15:4; 2 Pîtr. 3:13) Hjælp til forståelse af Bibelen-imi quppernermi 144-mi allassimavoq: „Biibileqanngitsuuppat Jehova nalusimassagaluarparput, Kristusip pilliutaa utertitsissutaasoq qanorlu iluaqutigisinnaagipput nalusimassagaluarlugu, Guutillu naalagaaffiata naapertuilluartup iluani imaluunniit ataani naassaanngitsumik inuusinnaanissamut piumasarisat paasisimassanngikkaluarlutigik.“
2 Novembarimi ingammik pingaartissavarput Guutip oqaasiata inuit ulluinnarni tatisinernik aniguiniarnissaannik ikiorneranni qanoq iluaqutaatigisinnaassusia. Ny Verden-Oversættelsen aamma Bibelen — Guds ord eller menneskers? neqeroorutigissavavut. Qanoq ililluta inuit eqqortumik isumallit Biibilip naleqassusianik paasinnilersissinnaavavut?
3 Inussiarnersumik qungujulallutillu ilisariteriarlutit ima oqarsinnaavutit:
◼ „Qularnanngitsumik ilumoornerassavarma oqaruma ajornartorsiutit annertuut avatangiisitsinniittut siunissamut isumalluarnissaq ilaannikkut ajornakusuulersittaraat. Isumaqarpit unnersuussutinik unamminiarnartumi tamatumani ataannarnissatsinnut iluaqutigisinnaasatsinnik nassaassaqartoq? [Pulaakkat akili.] Uanga isumaqarpunga Biibili ikiortissaalluartoq, takutitsigami qanoq ililluta pillualersinnaasugut. [Lúkarse 11:28 atuaruk.] Ullumikkut taamatut isumaqartoqanngikkaluarpoq, illilli qanoq isumaqarfigaajuk? [Pulaakkat eqqarsarnissaanut akinissaanullu piffissaqartiguk.] Kisianni ilaa eqqarsariaallannarpoq? . . . Inuit pulaartarpavut Biibilimik atuarnissaannik kajumissaarniarlugit unnersuussutai iluaqutiginiassammatigik. Biibilimik atuaqqissaarnermut ikiuutissaq una Bibelen — Guds ord eller menneskers? tamatumunnga atatillugu iluaqutaavoq. Malugeriassagit ajornartorsiutitta amerlanersaannut suna pissutaanersoq pillugu qanoq allassimasoqartoq. [Immikkoortoq 9-mi, qupperneq 187-imiittumi, oqaaseqatigiit aappaat atuakkit.] Atuagaq atuarusukkukku tigusinnaavat.“
4 Aamma ima ajornanngitsumik saqqummiisinnaavutit:
◼ „Biibilimut ataqqinninnerulersitsinissarput soqutigisaraarput. Naqitaaraq una Suna pillugu Biibili tutsuigisinnaagit ilinnut tunniukkusukkaluarpara. Tassani nassuiarneqarpoq sooq Biibilimi siunissamut neriuummik qularnaatsumik nassaarsinnaasugut. [Qupperneq 6 qupperuk Tussiaat 37:29-lu immikkoortorlu tulliuttoq atuarlugit.] Naqitaaraq nammineq atuarniariuk. Aggeqqikkuma tusarusussinnaavara neriuut Biibilimi eqqartorneqartoq qanoq isumaqarfiginerit.“
5 Immaqa oqaluussisartut ilaasa Biibilimik atuaqqissaarnissamik toqqaannartumik kajumissaarut una atorumassavaat:
◼ „Neqeroorfigiartorikkinuna illit angerlarsimaffinni Biibilimik atuaqqissaaqatiginissannik. Upperaarput Biibili Guutimit isumassarsiarititaasoq, aammalu unnersuussutai maleruarutsigik assut iluaqutigisinnaagipput. Ny Verden-Oversættelsen-imi oqaatsit ullumikkut atorneqartut nammineq atuaqqissaarnissamut piukkunnarluarput, nunarsuarlu tamakkerlugu Biibilimik atuaqqissaartartut millionilikkuutaat atussallugu assut iluaraat. Sivikitsunnguamik takutilaarlakkit qanoq ililluni atorneqarsinnaasoq. [Qupperneq 1658 qupperuk 34A-lu takutillugu. Soqutiginnissusia naapertorlugu quppersinnaavatit Matîuse 6:9, 10 aamma/imaluunniit Daniel 2:44 oqaloqatigiissutigalugillu. Nassuiaruk allassimaffiit atuarnerisigut paasineqarsinnaasoq Guuti naalagaaffini aqqutigalugu sunik naammassisaqassamaartoq.] Pulaaqqikkusussinnaavakkit Naalagaaffimmillu neriuut pillugu oqaloqatigalutit.“
6 Biibili tuppallersaatissiillunilu neriuutissiivoq, sallusuissummillu inuunermik naassaanngitsumik tunisisinnaasumik imaqarpoq. (Juá. 17:3, 17) Inuit allat Biibilimik ilisimasaqalersikkaangatsigik Jehova nuannaartarpoq, ’inuit tamaasa annaqqugamigit’. — 1 Tim. 2:4. (kmD 94/11 Bibelen giver trøst og håb . . .)