Pitsaasumik pulaaqqiisinnaassagaanni pitsaasumik ilinniartitsisinnaasariaqarpoq
1 Pulaaqqiisarneq oqaluussiartortarnitta pingaaruteqarluartut nuannaarutissarsiffiginartullu ilagaat. Sooq soqutiginnittunut aggeqqinnissarput noqqaassutigisariaqarparput? Ajoqersuganngortitsiniarluni sulinermi Jehovap aqqa ilisimaneqalertarpoq, Guutimillu mianerinnittut inuunissaminnut aqqutissartik ikiorneqarlutik nassaarisinnaavaat. — 2 Kor. 2:17 – 3:3.
2 Ilinniartitsisuulluartup ilinniartoq ikiorsinnaavaa ilisimariigai ineriartorteqqinniassallugit. Soorlu atuarfimmi ilinniartitsisup ilinniartut ilisimasaat ullormiit ullormut ineriartortittarai, taamattaaq pulaakkatta aallaqqaammut pereersimasatsinniit ingerlateqqinnissaat isumagisariaqarparput. Taamaalilluni ataqatigiissaarinikkut pulaagarput siumukariartorsinnaavoq.
3 Kingullermik atuagassiaaraq „Guutip ilumut soqutigaatigut?“ atorsimagukku inussiarnersumik ilassinnereeruit ima oqarsinnaavutit:
◼ „Naapeqqinnissat qilanaarisimavara. Sapaatip akunnera kingulleq oqaloqatigiilaaratta eqqartorparput Guutip soqutigineraatigut imaluunniit soqutiginnginneraatigut. [Pulaakkap kissaatigippagu oqaloqatigiissutigisimasaq oqaaseqarfigiliuk.] Eqqarsaatigaara atuagassiaaqqami kingullermik pinikuusanni allassimasumik ilinnut takutitaqarusullunga. Immaqa qanittumi maani pigissavat?“ [Immikkoortoq 3 imaluunnit 6 takutiguk immikkoortullu ilaaniit atuffallugu. Quppernerup ataaniittut apeqqutai atukkit. Tullissaanut suna oqaluuserissanerlusiuk takutiguk aggeqqinnissannillu isumaqatigiissuteqarfigalugu.]
4 „Inuuneq sumik siunertaqarpa?“ atorlugu oqaloqateqarniaruit immaqa periaaseq manna atorsinnaassavat:
◼ „Aluu . . . Piffissaqalaaruit atuagassiaaqqami kingullermik pinikuusanni takutitaqalaarniarpunga. [Qupperneq 20-21-lu qupperuk. Pulaakkamut assiliartaa takutiguk.] Assilissap oqaasertai maluginiariakkit. [Assiliartaasa oqaasertai atuakkit.] Kisianni silarsuaq maannakkut taamatut isikkoqarpa? [Pulaakkat akili.] Uani qupperneq 22-23-milu erseqqissumik assersuutigineqartumi suna pissutaanersoq nassuiarneqarpoq. [Immikkoortoq 3-4-miittut atuakkit oqaluttuareqqillugilluunniit immikkoortullu 5-ip aallaqqaata ilanngullugu. Naggataatigullu immikkoortumi oqaaseqatigiit kingulliit atuakkit.] Inuit angerlarsimaffigisartik nunarsuaq paarinerlussimavaat.“ [Qupperneq 24-25-imilu assilissat innersuutigikkit immikkoortorlu 15 sammillusiuk. Nutaamik isumaqatigiissuteqarfigeqqiguk.]
5 Kingullermik atuagassiaaraq „nuname inûneĸ nâgssáungitsumik nuánârutigiuk!“ tunniussimagukku pulaaqqiileruit immaqa siunnersuut manna atorsinnaassavat:
◼ „Aluu . . . [Atia atoruk.] Pulaaqqinnissat qilanaarisimavara. Ilimanarpoq atuagassiaaqqami kingullermik pinikuusanni eqqarsaatissinneqarsimassasutit. [Pulaagaq oqaaseqartilli.] Tamatta nalunngilarput ajussuseqarneq atugaangaartoq. [Assiliaq nr. 22 takutiguk.] Tupaallaatigaajuk Guuti qanoq iliortariaqartoq pissutsit soorlu kingullermik atuagassiap ungaluarniittumi eqqartorsimasatsinni pilersitsissappat? [Assiliaq nr. 28 takutiguk pulaagarlu oqaaseqartillugu.] Eqqarsaatigeriakkit Guutip aniguisunut qanoq iliuuseriumaagassarpassuit nuannersut! [Assilissat nr. 47-49-miittut takutikkit.] Aniguissagutta qanoq iliortariaqarpugut? [Assiliaq nr. 50 takutiguk.] Illit paratiisimi alianaatsumi tassani inoorusuppit? [Pulaakkat akili Juánase 17:3-lu atuarlugu.] Guuti ilisarineruleqqaartariaqarparput. Tulliani aggeqqikkuma allakkani illernartuni paratiisissaq alianaatsoq pillugu eqqartoqqinneqaqqinnera oqaloqatigiissutigiumaarparput tassuunakkullu qanoq Guuti ilisarinerusinnaagipput.“
6 Pulaaqqiisimagaanni pitsaasuuvoq misissueqqissaassalluni, taamaalilluni kiffartuussineq pitsanngorsarnerujumallugu. Imminut aperigit: Aalajangersimasunik oqarseqarsinnaavunga? Biibili innersuussutigaara? Pulaakkanni siullermi kingullermik pinikuusavut ineriartortippakka? Saqqummiinikka atuaqqissaaqateqalernissamik kinguneqarsinnaappat? Ilumoorlutit apeqqutit taakkua akinerisigut takutippaa ilungersortutit pitsaanerusumik allanut Guutip oqaasia ilinniartitsisutingerusullugu. (kmD 95/8 Gode genbesøg kræver gode lærere)