Atuakkami nutaami pissanganartumi Guutimik ilisarsineq itisilerneqarpoq
1 Aasaq ataatsimeersuarnitsinni nuannaarutissarpassuatsinnik tunineqarpugut, minnerunngitsumik ullup aappaani ualikkut oqalugiartup atuagaq nutaaq, Ilisarsineq inuunermut naassaanngitsumut sammisoq, oqaaseqarfigiitigalugu saqqummersimmagu. Nunarsuup inuisa milliardilikkuutaat ilisarsineq Guutip kisimi tunniussinnaasaa pisariaqartippaat, tassa Guutimik erneranillu, Jesus Kristusimik, ilisarsineq. — Uss. 2:1-6; Juá. 17:3.
2 Oqalugiartup uummaarissumik atuagaq tigusiffigillattaarpaa. Kapitalit qulequtaat eqqarsariaallannartut, assersuutit sunniuteqarluartut, sallusuissutip isumalluarpaluttumik saqqummiunneqarnera, apeqqutit paasiuminartut apeqqutillu uteqqiissutissat „Suna ilikkarpiuk?“-mik qulequtallit kapitalit naanerini tamaniittut — tamakku tamarmik atuartumut kajumissinartuupput. Ingammilli Biibilimik atuaqqissaartut Biibilimi ajoqersuutinik tunngaviusunik ilikkapallassutigisinnaassavaat.
3 Ataatsimeersuarnermi ullut pingajussaanni oqalugiaammi naggataarutaasumi kajumissaarneqarpugut ilaqutariinni atuakkap nutaap atuaqqissaarnissaanik. Maanna atuakkap imai iserfigipajaareersimavavut, qularnanngitsumillu oqaloqatigiissutigereersimallugu atuagaq neqeroorutigilerutsigu suna erseqqissaatigissanerlugu.
4 Eqqarsaatigisassat: Eqqaamajunnarsivat ’Sooq kikkut tamarmik Guutimik ilisarsinermik atorfissaqartitsisut’-mik qulequtalimmik oqalugiartup ilaatigut makku erseqqissaatigimmagit: (1) Atuagaq soqutiginnittumut atuaqqissaaqatigiissutigigaangatsigu silatusaassaagut pingaarnersat paasiuminaallissutigisaannik saniatigut misissugaqartanngikkutta; kapitalini ataasiakkaani ilikkagassat kisiisa sammiinnarsinnaavavut. (2) Kapitalit takisoorsuunngillat, taamaattumik atuaqqissaarnerit tamaasa kapitali ilivitsoq atuaqqissaarneqarsinnaassaaq. (3) Kapitalit naanerini tamani apeqqutit uteqqiissutissat „Suna ilikkarpiuk?“-mik qulequtallit sammineqarsinnaapput.
5 Biibilimik atuaqqissaaqateqarnermi: Oqaluussisartut ilaat aperisimapput atuaqqissaaqatigisartakkat atuakkamik nutaamik ingerlaannaq atuaqqissaaqatigilernissaat siunertaanersoq. Atuagaq atuaqqissaaqatigiissutigisaq naangajalersimagaanni pitsaanerpaassaaq naaqqaassallugu. Siunnersuutigaarpulli ingerlaannaq ’Ilisarsineq’ atuaqatigiissutigineqalissasoq. Atuagassiaaraq imaluunniit naqitaaraq atorlugu atuaqqissaaqateqalersimagaanni piffissakkut naleqquttukkut atuagaq nutaaq ilisaritinneqarsinnaavoq atuaqqissaaqatigiissutigilerlugulu. Qanoq ililluni ’Ilisarsinerup’ neqeroorutiginissaanut qaammatini aggersuni siunnersuuteqartassaagut.
6 Ilisarsinermik inuunermut naassaanngitsumut sammisumik allat ilinniartissinnaaniassagatsigik Jehovap atuakkamik nutaamik tamatuminnga tunisimavaatigut. Piareersarluartariaqarpugut suliamullu suli ingerlanneqartumut tamakkiisumik peqataasariaqarluta. (kmD 95/11 Spændende ny bog . . .)