Apeqquteqartarfik

◼ Naalagaaffilersaartarfiup atuagaateqarfiani atuakkat suut pigineqartariaqarpat?

Atuagassiarpassuit Guutip innuttaasa iluaqutissaat saqqummersinneqarsimapput. Oqaluussisartut amerlasuut tamakku tamaasa namminerisaminnik piginngilaat, naalagaaffilersaartarfiulli atuagaateqarfiani atuagassiat atuakkallu atuaqqissaarnissaannut periarfissaqarpoq. Taamaattumik atuagaateqarfik assigiinngitsunik Biibililersaarutinik imaqartariaqarpoq, Biibilimik nutsikkanik, Peqatigiiffiup atuagassiaataanik, Naalagaaffimmut Kiffartorneq-mi ilanngutassiat, Napasuliaq Alapernaarsuiffik-mik Iteritsi!-millu ungalulikkat ukiumoortut aammalu Register til Vagttårnet publikationer (Napasuliaq Alapernaarsuiffik-mut ujarliut). Aammattaaq naleqquttumik pitsaasumillu oqaatsinik qinerlerfissiaateqartariaqarpoq. Qinerlerfissianittaaq peqarnissaa iluaqutaassaqaaq, nunat assinginik imaluunniit atuakkanik oqaasilerutinik atuakkanillu oqaluttuarisaanermut tunngasunik. Pingaarnerusumilli atuagassiat ’inussiap aalajaallunilu silatuup’ saqqummersitai eqqarsaatigineqartariaqarput. — Mat. 24:45, NV.

Nalunaarusiat takutippaat naalagaaffilersaartarfiit ilaasa atuagaateqarfii atuakkanik naleqqulluarpallaanngitsunik imaqartut. Eqqortuliornerussanngilaq atuakkiat Biibilimullu isornartorsiuisunik nassuiaatit, imaluunniit atuakkat ilisimaqqissaarniarnermut tunngasut anersaarsiornermillu iserfiginnittut atuagaateqarfimmiissappata. Naalagaaffilersaartarfiup atuagaateqarfiani pigineqartariaqartut tassatuaasariaqarput atuisut anersaakkut ineriartornissaannik ikiuutissat. — 1 Tim. 4:15.

Teokratiimik ilinniarfimmut tunngasunik nakkutilliisup atuagaateqarfik akisussaaffigaa, qatanngulli alla ikiorniarlugu tamatuminnga suliassinneqarsinnaavoq. Atuagaateqarfiup nalitsinnut naleqquttuunissaa atuagassiallu nutaat pisinnaanngorniariaraangat pigilernissaat isumagisariaqarpaa. Atuakkap ungaluata iluatungaatigut tamarmik erseqqissumik ilagiit pigisarigai nalunaaqutserneqartariaqarput. Ukiumut ataasiarluni atuakkat misissorneqartariaqarput ilaat iluarsarneqartariaqalernersut imaluunniit allamik taarserneqartariaqalernersut takuniarlugit.

Tamatta atuagaateqarfiup paarinissaanut ikiuussinnaavugut. Atuakkat qajassuuttariaqarpagut. Meeqqanut pinnguaritinniassanngilavut, kialuunniillu titarnilersortariaqarnagit. Allagartannguamik nivinngaasoqarsinnaavoq atuakkat naalagaaffilersaartarfimmiit peerneqassanngitsut.

Ilagiit nutaat pilersinneqartuarput taamaattumillu atuagaateqarfippassuugaluit killilimmik annertussuseqartariaqarlutik. Oqaluussisartut ilaat pisoqaanerusunik atuagaateqartut immaqa eqqarsaatigisinnaavaat ilagiinnut tunniutissallugit. Ilitsersuutit tamakku malinnerisigut naalagaaffilersaartarfiup atuagaateqarfia iluaqutaassaqaaq Guutip oqaasianik erlinnartunik ilisimasaqarnermik siuneqarnermillu tunisisunik ujarlernermi ilisarsinermik. — Us. 2:4-6.