Ataatsimeersuarneq „Guutip oqaasianut upperneq“
1 Apustilip Paulusip Timoteus eqqaasissimavaa ’allakkat illernartut tamarmik Guutip sunniineratigut isumassarsiarititaasut’. (2 Tim. 3:16, NV) Guutip oqaasia sunnerneqarluni isumassarsiarititaammat upperinissaanut pissutissaqarluarpugut. Ukioq manna ataatsimeersuarnermi qulequtaassaaq: „Guutip oqaasianut upperneq“. Sallusuissut ukiorpassuarni nalunngissimagaluarutsigu qanittukkulluunniit aatsaat Jehovap peqatigiissortai attaveqarfigilersimagaluarutsigik saqqummiussassat Biibilimut uppernerput nakussatsissavaa. Taamaattumik saqqummiussassat tamarmik tusarnaarnissaat pilersaarutigiuk. Nutaat najuuteqataanissaannut aamma qaaqqukkit, pingaartumik Biibilimik atuaqqissaaqatigisartakkavut.
2 Ullut pingasut ataatsimeersuarneq: Ukioq manna aamma ulluni pingasuni ataatsimeersuarnissaq pilersaarutigineqarpoq. Ullormi siullermi ullullu aappaanni piffissani ukunani saqqummiussassat ingerlanneqassapput: 9.30-12.05 aamma 13.50-17.20. Ullut pingajuanni piffissani ukunani: 9.30-12.15 aamma 14.00-16.30. Ilaqutariit tamarmik najuussinnaaniassammata sulinngiffeqarnissat qinnutigisimaviuk? — 5 Mos. 31:12.
3-4 Immikkoortuni makkunani Silkeborgimi Herlufmaglemilu ataatsimeersuarnerit pillugit paasissutissaqarpoq.
5 ’Oqaaseq sianiginiarsiuk’: Apustilip Peterip ukiuni hundredelinni siullerni kristumiut eqqaasissimavai pruffiitit oqaasii, naneruutitut taartumi qaamasutut, sianigigunikkik iluartuliussasut. (2 Pît. 1:19) Uagutsinnut aamma taamaappoq. Maani silarsuatoqqami Satanip pissaaneqarfigisaani inuuneq taartumiittutut ippoq. Anersaakkut taartumit qaamasumut qaaqquneqarsimanerput qujamasuutigaarput. (Kul. 1:13; 1 Pît. 2:9; 1 Juá. 5:19) Qaamasumiittuaannassagutta uppernerput nukittuujuartittariaqarparput oqaatsit Jehovap sunniineratigut isumassarsiarititaasut sianiginerisigut. Ataatsimeersuarnerup taamaaliornissatsinnut ikiussavaatigut.
6 Saqqummiussanut tusarnaarluassagaanni noqqaassuteqartariaqarpoq pilluaqquneqaatigissavarpulli. Malinnaalluarumalluta qasuerluarsimalluta ataatsimeersuariartariaqarpugut. Saqqummiussassat aallartippata inissereersimaniarlusi ataatsimeersuarfissamukarnissamut piffissamik naammattumik naatsorsuuteqaritsi. Aallarniutaasumik erinarsuut qinnullu aamma peqataaffigisigik. Inersimasut maligassiuilluartariaqarput, angajoqqaallu qitornatik ilinniartittariaqarpaat. — Evf. 6:4.
7 Ulloq ataatsimeersuarfik aallartitsinnagu saqqummiussassanik naqinneqarsimasoq misissorutsigu suut saqqummiunneqassanersut takorloorniarsinnaavavut. Soqutiginninnerput allisissavaa. Sooq Guutimut ujarlersinilu akilerumallugit neriorsuutaanut qularnaatsumut uppernerput allanut oqaluttuarinissaanut iluaqutigisinnaasagut immikkut eqqumaffigikkit. (Epr. 11:1, 6) Pingaarnersanik eqqaasitsisinnaasunik naatsunik allattuinissarput kajumissaarutigineqarpoq. Allattuivallaarutta eqqarsaatit pingaartut tusanngitsoorsinnaavavut.
8 Suli inersimasoqarpoq inuusuttoqarlunilu saqqummiussat nalaanni torsuusani silamilu uteqattaartartunik oqaloqatigiittartunillu ’inussiap aalajaallunilu silatuup’ iluaqutissatsinnik sassaalliussaanut tusarnaarnatik. Jesus neriorsuisimavoq piffissaq eqqorlugu anersaakkut nerisassanik tunisarumalluta. (Mat. 24:45-47, NV) Taamaattumik nerisassat tamakkiisumik iluaqutiginiarlugit najuuttariaqarpugut pingaartitsinnginnermillu ersersitsinata. (2 Kor. 6:1) Meeqqat ilaat aamma eqqissiveeruttarunarput aninissaminnullu perusuersartarfiliarnissaq utoqqatsissutigisarlugu. Angajoqqaat eqqumaffiginnittut taamaaliunnginnissaq akiorniassavaat. Aamma takuneqarsimavoq inuusuttut eqimattakkuutaartut, issiavinni tunorlerniunerusoq, isussuuttaqattaarlutik imminnullu allaffigisaqattaarlutik issiaqatigiittartut. Inuusuttortavut, ullumikkut tatineqangaartut, saqqummiussanut tusarnaarnissartik immikkut pisariaqartippaat allarpassuarnik eqqarsaateqaratik. Biibilip najoqqutassiaanut akerliusunik inuusuttut kajungerisaannik kissaateqarunik ingalassimaniartariaqarpaat. (Naleqqiuguk 2 Timûtiuse 2:22) Tamarmik, inersimasut inuusuttullu, saqqummiussanut tusarnaarluarpata Jehovamut ataqqinaataassaaq nuannaarutaallunilu.
9 Nakkutilliisut unnersuussisariaqassagaluarpat Jehovap asannittumik aaqqissuussineratut isigisariaqarpoq. (Gal. 6:1) Eqqaamasariaqarparput ataatsimeersuarnermut najuunniarluta ilungersuutigisarput tassaasoq ’tusarnissaq ilikkarnissarlu’. (5 Mos. 31:12) Ussatit 1:5-imi ima allassimavoq: „Inuk sianisooq tamakkuninnga tusartoq suli annerusumik ilisimasaqalersittarpaat.“ Ataatsimeersuarneq sioqqullugu ilaqutariittut issiaqatigiinnerup pingaaruteqassusia oqaloqatigiissutigisariaqarparsi, saqqummiussallu nalaani issiaqatigiillusi oqaatigineqartullu tamakkiisumik iluaqutigalugit.
10 Isikkorinneq Jehovap nuannaarutigisaa: Jehovap kiffai sumi tamaani inunnit isigineqartarput. (1 Kor. 4:9) Atisarissaartarnerput isikkorissaartarnerpullu inuit malugigajuppaat. Kristumiut ilagiissaannut najuuttalersut amerlasuut tamatuma tungaatigut annertuunik allannguuteqartarsimapput Timûtiusimut agdlagkat sujugdlît 2:9, 10-mi aamma Pîtrusip agdlagai sujugdlît 3:3, 4-mi najoqqutassiat maleruarnerisigut. Silarsuarmi ileqquusunut appariartuinnartunut akerliulluinnarput. Ingasattunik kanngunartunilluunniit isikkulinnik atisaqannginnissaq nutsallu isikkui silamiorpaluttut malinnginnissaat eqqumaffigisariaqarpavut. Atisatsigut isikkorinnitsigullu maligassiuilluarnitsigut ataatsimeersuarnermut najuuttut nutaat kristumiut qanoq isikkoqartariaqarnerinut ikiorneqartariaqarput.
11 Ukioq kingulleq ataatsimeersuarnerit nalinginnaasumik isigalugit iluarinarput, atisalli isikkullu silamiorpaluttut qatanngutit angutit arnallu ilaanni suli ajornartorsiutaapput, ingammik saqqummiussat kingorna. Ataatsimeersuarneq najuuffiginiarlugu pilersaarutta atisagut isikkugullu eqqarsaatigisariaqarpavut. Ilissi angajoqqaajususi qitornassi inuusuttortassilu atisariniagaat eqqumaffigisariaqarpasi. Tamatta kristumiutut isikkorissuunerput silamiorpaluttunik mutinilluunniit alannginneqannginnissaat qulakkeertariaqarparput.
12 Ileqqorissuugit: Kristumiut ilumoortut ileqqorissuuneq ilisarnaatigaat. (1 Pît. 2:12) Sumiluunniit — ataatsimeersuarfinni, neriniartarfinni hotelinilu angalagaangattalu — ileqqorissuunitsigut nalunaajaateqarluarsinnaavugut Guutimullu oqaasianullu upperneq sumik nassataqarnersoq allat paasininnissaannut ikiorlugit. Tamatuma ilaasa Jehovap ilinniarnissaanut kissaateqalersissinnaavaat. (Naleqqiuguk 1 Pîtruse 3:1, 2.) Ileqqorinnitsigut Jehova ataqqinaatissinnissaa immikkut pisinnaatitaaffigaarput.
13 Ajoraluartumik unnuisarfik teokratiimik ataatsimeersuarnermut peqataajumasunut naatsorsuussaasoq eqqaasitsissutigissallugu pisariaqarpoq. Ukioq kingulleq inuusuttorpaaluit kingusissorujussuakkut angerlarput ullullu tulliani saqqummiussat nalaanni unnuisarfimmiillutik. Inuusuttut taamaattut nalunaajaanerlupput, allanillu akornusiillutik Jehovallu sassaalliussaanut ataqqinninnginnermik ersersitsillutik. Feeriarnissamik silamiutullu sukisaarsaarnissamik kissaateqartunut unnuisarfik naatsorsuussaanngilaq. (1 Pîtruse 4:3 atuaruk) Ataatsimeersuarnerit sioqqullugit utoqqaanertat unnuisarfinni ineqarumasut oqaloqatigisariaqarpaat, anersaaq qulaani unnersuussutigineqartoq malinneqarnissaa qulakkeerniarlugu.
14 Ataatsimeersuarnermi aningaasartuutit: Naak ataatsimeersuarnerni nerisassat aningaasartuutaajunnaaraluartut, nammineq ataatsimeersuartarfitsinnut, tassunga ilaavoq unnuisarfik, atatillugu suli assigiinngitsunut aningaasartuuteqarpoq. Aningaasat tungaatigut tukkorlusi tunissutisi pingaartinneqaqaat. — ap. sul. 20:35; 2 Kor. 9:7, 11, 13.
15 Issiavinnik inniminniineq: Ilaquttat qaniginerusat angalaqatigisalluunniit issiavinnik inniminniissunnissaat ajunngilaq. Saqqummiussalli ilaminiinnaanut najuuttunut issiavinnik inniminniisoqartariaqanngilaq. Immikkut pisariaqartitsisoqalerpat programmip aallartinnerani issiaviit atorneqanngitsut nakkutilliisunit innersuunneqarsinnaapput.
16 Ullut tamaasa saqqummiussat naagaangata issiavinnit tæppit erinarsuutit il. il. peerneqartassapput qatanngutit eqqiaasussanut akornutaaqqunagit. Ullup tullianut issiavinnik inniminniisoqarsinnaanngilaq. Pigisat qimatat KATATAT QIMATALLU-mi aaneqarsinnaapput.
17 Utoqqarnut allanullu immikkut pisariaqartitalinnut ataatsimeersuarnerni tamani aaqqissuussisoqassaaq. Issiaviit nerisarfiillu taamaattunut naatsorsuussat ingiffiginaveersaakkit. Ikiortigisinnaasaminnik ingiaqateqanngippata ikiornissaat eqqumaffigikkit.
18 Ataatsimeersuarnerup nalaani ataatsimeersuartarfik naalagaaffilersaartarfittut angisuutut isigaarput. Ataatsimeersuarnerli tamanut ammammat pigisavut, aamma akisuut soorlu assiliiviit, videoliuutit immiussissitillu paarisariaqarpavut. Biilit qimakkaangakku parnaarnissaa eqqaamajuk akisuunillu saqqumititseqinak. Angajoqqaat isumagisariaqarpaat qitornamik nakkutigineqartuaannarnissaat.
19 Assiliiviit, videoliuutit immiussissutillu: Tamakkua atornissaat ajornanngilaq najuuttulli allat innimigisariaqarpavut. Saqqummiussat nalaanni assiliiartortaqattaarutta allat allamut saasaannarnagit aamma nammineq tusaanngitsuussaagut. Amerlanertigut saqqummiussat pissarsiffiginerussavavut tusarnaaqqissaarutta naatsunillu allattuilluta. Immaqa qatanngummut napparsimasumut saqqummiussat immiuppavut, tamannalu ajunngeqaaq; paasisimavarpulli imminut immiussisut amerlasuut nalunaaquttap akunnerpassuinik saqqummiussanik immiussatik tusarnaarnissaannut piffisaqarneq ajortut. Aamma malugiuk sumilluunniit Peqatigiiffiup atortuinut ikkussisoqarsinnaanngimmat torsuusallu asserneqassanngimmata. Aamma allat assersorneqassanngillat.
20 Ikiueqqaarneq: Immikkoortortaq taanna ikiueqqaarnerinnaq suliarisarpaa. Ataavartunik nappaatilinnik passussineq ajorpoq. Taamaattumik siumoorlugu nammineq ilaqutaasullu peqqissusiat eqqarsaatigisariaqarpoq. Nipaallisaatinik nakorsaatinillu allanik atukulasannik nassarnissat isumagiuk. Ajornartorsiutillit tamarmik, soorlu noqartartut, sukkortut uummalluttulluunniit sapinngisatik naapertorlugu pisariaqartitatik siumut nalilertariaqarpaat. Nakorsaatit pisariaqartut nassartariaqarpaat, ilaqutaanullu ilaasortap ilageeqataataluunniit pissutsinik atugaanik ilisimannittup ilagiuaannartariaqarpaa pisariaqartumik ikiorsersinnaaniarlugu. Ataavartunik nappaatillit imminiiginnarneqaraangata ataatsimeersuarnerullu nalaani ajortikkaangata ajornartorsiutaasarsimavoq. Ataavartumik nappaatilimmik ilaqutaqartut tamarmik qulakkeertariaqarpaat nakkutigineqartuaannarnissaat. Peqqiilliortut ilaqutaqanngippata ilagiinni utoqqaanertat tamanna eqqumaffigisariaqarpaat ikiuinerlu pisariaqartoq isumagalugu.
21 Ataatsimeersuarnerup nalaani nerisassat imigassallu: Ataatsimeersuarnerup nalaani nammineerluta nerisassanik imigassanillu nassartarneq sungiussimagunarparput. Aaqqissuussineruvoq pitsaasoq ataasiakkaanut suliaqarnerutitsisoq programmilli nalaani suliassarpassuugaluanut peersitsisoq. Maanna anersaakkut nerisassat tusarnaarluarsinnaalerpaat. Aammattaaq nammineq ilaquttamillu pisariaqartitaannik pilimanianngitsunik isumagisaqarneq amerlanersaasa ilikkarsimagunarpaat taamaalillutik allanik ilassisaqarnissaq utoqqarnillu allanillu immikkut pisariaqartitalinnik ikiuinissaq piffissaqarfigilerlugu. Asanninneq ikiuiumatunerlu taamaattoq takullugu nersortariaavoq. Eqqaasitsissutigissavarpulli saqqummiussat nalaanni nerineq imernerluunniit eqqortuliornerussanngimmat. Ataqqinninnginnermik ersersitsinerussaaq.
Malugiuk: pooqattat nillataartitsiviit nillornaveeqqutillu il. il. atsiukkit, adressillu immaqalu aamma ilagiit atiat allaguk.
22 Anersaakkut nerersuarneq ullullu qeqqani unikkallarnermi peqatigiilluni misigineq eqqissisimanartoq pingaarteqaarput. Aaqqissuussinerup tamatuma siunertaa naapertorlugu kajumissaatigissavarput illoqarfimmut neriartunnginnissaq. Angerlarsimaffimmiit nerisassanik nassarneq pitsaanerussaaq. Qatanngutitsinnik peqatigiinnissamut piffissaqarnerussaagut.
23 Kuisinneq: Kuisittussaq qinnuigineqarput ullup aappaani ullaap tungaani saqqummiussat aallartitsinnagit oqaluttarfiup saavanut ingereeqqullugit. Nalunnguffasit pilimanianngitsut kusanartullu qinikkit. Tamanna utoqqaanertat apeqqutit ’Organisationsbogimiittut’ sammigunikkik erseqqissassavaat. Kuisittussaq nammineerlutik nalunnguffasinik allarummillu nassassapput. Silkeborgimi stævnepladsimi kuisittussanut aamma kajumissaarutigineqarpoq makiaarummik nassaqqullugit.
24 Kinaassusermut allagartannguit ataatsimeersuarnermik kinaassutsitsinnillu nalunaartuupput. Ataatsimeersuariarluta ataatsimeersuareerlutalu angalanitta saniatigut ataatsimeersuarfimmi unnuisarfimmilu atortariaqarpagut. Nakkutilliisut ikinngutit eqqaasittarumaarpaat. Allagartat unnuisarfimmi ineqartussanut ataatsimeersuarnernullu najuuttussanut tamanut siumoortumik tunniunneqarsinnaapput. Peqataasussat inuunerminnik Biibilip najoqqutassiai naapertorlugit suli aaqqiisimanngitsut allagartamik atuinerup akisussaaffeqarnera paasisariaqarpaat akueralugulu.
25 Nammineq kajumissutsimik kiffartorneq: Nammineq kajumillutik sulerusuttut amerlasuut atorfissaqartitsinneqarput. Ataatsimeersuarneq sioqqullugu immikkoortortat arlaanni ikiuiniarlutik isumaqatigiissuteqarsimanngikkuit kajumissaarpatsigit ataatsimeersuarfissamut apuukkuit nammineq kajumissutsimik kiffartuussiffimmut nalunaaqqullutit.
26-27 Aamma immikkoortuni makkunani Silkeborgimi Herlufmaglemilu ataatsimeersuarnerit pillugit immikkut paasissutissaqarpoq.
28 Katatat qimatallu: Nassaat KATATAT QIMATALLU-mut tunniunneqassapput, pigisaminnik annaasaqarsimasut qinnuigineqarput ataatsimeersuarfik qimatsinnagu tassunga saaffiginneqqullugit. Ataatsimeersuarnerit kingorna nassaat ataatsimeersuarfinnit piniarneqarsinnaapput. Tamarmik pigisaminnik, aamma Biibiliminnik erinarsuutiminnillu, paarinnilluarpata iluaqutaangaassaaq. (Atuagaativit atsiornissaat adressivillu allannissaa eqqaamajuk.)
29 Atuagaasivik: Atuagaasivinni saqqummersut nutaat kisimik pineqarsinnaapput. Kinaassutsimut allagartannguit atuagaasivinni pineqarsinnaanngillat, siumoortumilli ilagiinni piniarneqassallutik aaneqassallutillu.
30 Ataatsimiinnerit immikkut ittut: Pioneerit 20-t 40-llu akornanni ukiullit Gileadimik ajoqersuiartortitaanermillu soqutiginnittut ataatsimeersuarnerup ulluisa siullianni nalunaaqutaq 12.30 qaaqquneqarput. Ataatsimeersuarnerup ulluisa aappaanni nalunaaqutaq 12.30 oqaluussisartut kuisimasut Betelimi kiffartornissamut soqutigisaqartut ataatsimiitsinneqassapput. Ataatsimmiinnerit sumi pissanersut ataatsimeersuarnermi nalunaarutigineqassapput.
31 Ataatsimeersuarneq „Guutip oqaasianut upperneq“ najuuffigissallugu qilanaarpugut. Saqqummiussat tamaasa peqataaffiginissaat piareersarluarfigisimanerlutigu qulakkeertariaqarparput Jehovap peqatigiiffini aqqutigalugu anersaakkut nerersuartitsinissaa tamakkiisumik iluaqutiginiarlugu. Taamaalilluta piffissami aggersumi ’ajunngitsuliornernut tamanut piginnaaneqalissaagut’. — 2 Tim. 3:17.