Ulluni pingasuni anersaakkut nakussatsinnartut
1. Ukiumi tamatumani ataatsimeersuarneq qanoq iluaqutigisinnaavarput?
1 Saatanip silarsuaani nunami anersaakkut suitsumi Jehovap kiffani inuummarissartuarsinnarpai. (Es 58:11) Ukiumoortumik ataatsimeersuarneq, nakussatsinniarluta Jehovap atortagaasa ilagaat. Ukiumi tamatumani ataatsimeersuarnissaq qanilliartortillugu anersaakkut nakussatsinnartut pissarsiarinissaannut tunniuteqqinnissaannullu qanoq piareersarsinnaavavut? — Uss 21:5.
2. Suut piareersassavavut?
2 Taamaalioreersimanngikkuit, ulluni pingasuni ataatsimeersuarnermut najuunnissannut pilersaarutitit suliffiillu piareersalereerniakkit. Ullut tamaasa saqqummiussassat aallartinnginneranni ataatsimeersuartarfimmut apuutereersimanissat issiavissannillu nassaarnissat eqqarsaatigalugit qanoq sivisutigisumik angalanissat naatsorsoreerpiuk? Anersaakkut inuussutissat nakussatsinnartut Jehovap uagutsinnut piareersarsimasai pinngitsoorumanngilluinnarpavut! (Es 65:13, 14) Inissaqarnissat angallatissallu piareersareerpigit?
3. Saqqummiussassat pissarsiaqarfigilluarumallugit siunnersuutit suut uagut ilaquttavullu atorsinnaavavut?
3 Saqqummiussat nalaanni eqqarsaativit allamut sammitinnaveersaarnissaannut suna iluaqutigissaviuk? Ajornanngippat, ataatsimeersuarnerup ulluini innajaartarit. Oqalugiartoq nakkunniarsariuk. Biibilinni allassimaffiit tamaasa quppertakkit. Naatsunik allattuigit. Angajoqqaat meeqqatik tusarnaarnissaannik eqqaasittarniassammatigit ilaqutariit issiaqatigiippata pitsaanerussaaq. (Uss 29:15) Immaqa ilaqutariittut unnuit tamaasa saqqummiussanit pingaarnersiuisinnaavusi. Ataatsimeersuareernerup kingorna nakussatsissimajuaqqullusi unnummi ilaqutariittut anersaakkut ittunik sammisaqarfimmi pingaarnerit atorsinnaasasi sammisinnaavasi.
4. Ilagiinniittut allat anersaakkut nakussatsinnissaannut qanoq ikiorsinnaavavut?
4 Allat anersaakkut nakussatsinnissaannik ikiukkit: Allat anersaakkut nakussatsinnissaat aamma kissaatigaarput. Ilagiinni utoqqaat oqaluussisartut imaluunniit allat ataatsimeersuarnermut najuunnissamut ikiorneqarnissamik pisariaqartitsissagunarpat? Ikiuussinnaavit? (1 Joh 3:17, 18) Utoqqaanertat, pingaartumik angalaaqatigiittartunut eqimattanut nakkutillisut, oqaluussisartut taakku ikiorneqarnissaat isumagissavaat.
5. Ataatsimeersuarnissamut qaaqqusissutit qanoq agguaanneqassappat? (Ungalusaq qulaaniittoq ilanngullugu takuuk)
5 Ataatsimeersuarnissaq sapaatip akunneranik pingasunik sioqqullugu, pisarnitsitut allanik qaaqqusilluta immikkut suliniarnermut peqataassaagut. Ilagiit anguniagarissavaat angalaarfigisartagartik sapinngisamik tamaat qaaqqusissutinik tigusaminnik agguaassiffigissallugu. Immikkut suliniarnerup naalernerani qaaqqusissutit ilaquttavit sinnerutitaat ataatsimeersuarialerussi nassassavasi, torrutiinnarlugu oqaluussinermi qaaqqusilluta atorniassagatsigit. Tallimanngornermi saqqummiussassanut ilanngullugu tamanna nalunaarutigineqarumaarpoq. Qaaqqusissutit ilaquttavit atornianngisaat Katuamut nassarneqassapput nakkutilliisumullu tunniunneqarlutik. Illit pissannik immikkoortitsigit sapaammi oqalugiaammi naggasiutaasumik atugassannik.
6. Ataatsimeersuarnermi pissuserissaarnerput qanoq ersersissinnaavarput?
6 Pissuserissaarneq qiimmassaataasarpoq: Nalitsinni inuit ‘imminut asasut’ inuuffigisaanni allallu misigissusaannik soqutigisaqarfiunngitsumi uppeqatit pissuserissaarniarlutik ilungersortut ilagalugit qiimmassaataasarpoq. (2 Tim 3:2) Katuaq nalunaaqutaq 8.00 ammarpat, pissuserissaarnerput takutissavarput eqqissilluta torersumillu iserutta taamaallaat ilaquttatsinnut, angalaqatitsinnut atuaqqissaaqatitsinnulluunniit issiavissatsinnik inniminniigutta. Nipilersuummut tusarnaaqqulluta aqutsisup issiavissatsinnut ingikkiartoqquppatigut naalassavarput. Saqqummiisoqarnerani mobilit allanut akornusersuinngitsumik inissinneqarunik pissuserissaarnerussaaq. Aamma saqqummiisoqarnerani oqalunnginnitsigut, sms-eqattaannginnitsigut, nerinnginnitsigut aamma torsuusarsuarmi pisariaqanngitsumik angalaartannginnitsigut pissuserissarnermik ersersitsisinnaavugut.
7. Qatanngutit ilagalugit qanoq immitsinnut qiimmassaqatigiissinnaavugut?
7 Katerisimaarneq qiimmassaataasoq: Kristumiutut qatanngutigiissuartullu ataasiussuseqarnitta nuannaarutiginnissaannut ataatsimeersuarnerit periarfissaqarnerulersittarpaatigut. (Tuss 133:1-3) Soormi siulliullutit ‘ammarlutit’ qatanngutit angutit arnallu ilagiinnit allaneersut naapisimaarukkit? (2 Kor 6:13) Ullut tamaasa inuk ataaseq imaluunniit ilaqutariit ataatsit ilinniarnissaat anguniagarisinnaavat. Ulloqeqqasiornermi taamaaliornissaq periarfissaalluarsinnaavoq. Illoqarfimmi neriniartarfimmut neriartornasi imaluunniit pisiniarnasi, oqitsunik taquarlusi Katuami nereqatigiinneq nuannaarutigisiuk. Tamanna nutaanik ataavartumillu ikinnguteqalernermik kinguneqarsinnaavoq.
8. Sooq ataatsimeersuarnermi ikiuunniarluta nalunaassaagut, qanorlu taamaaliorsinnaavugut?
8 Kiffartornermi illernartumi uppeqatit suleqatigalugit nakussatsinnangaarami! Immaqa ataatsimeersuarnitsinnut tunngatillugu ikiuutaaniarluta nalunaarsinnaavugut. (Tuss 110:3) Soormi, suliaqariinngikkuit, nammineq kajumissutsimik suliaqarusullutit illit ilagiinni allatsimut saaffiginnikkuit? Amerlasuut ikiuutaagaangata suliaq nuannernerullunilu oqinnerusarpoq.
9. Sooq ataatsimeersuarnitsinni ileqqorput isikkorpullu pingaartumik eqqumaffigisariaqarpavut?
9 Ileqqorissaarnerput isiginnittunut nuannaarutaavoq: Ullut pingasut naallugit ataatsimeersuarpugut, Katuamiinnaanngitsoq. Illoqarfimmi ataatsimeersuarfitsinni nalunaajaasuunngitsullu assigiinngissutsivut isiginnittut nuannaarutigalugit takusinnaasariaqarpaat. (1 Petr 2:12) Katuami, ineqarfitsinni neriniartarfinnilu atisalersoriaatsivut takujuminartuunerpullu Jehovamut ataqqinaataasariaqarput. (1 Tim 2:9, 10) Kinaassutsitsinnik allagartaqarutta isiginnittut Jehovamut Nalunaajaasuusugut qularutigissanngilaat, immaqalu nalunaajaaffigalugit ataatsimeersuarnitsinnik oqaluttuussinnaavavut.
10. Qanoq akunnittarfinni neriniartarfinnilu sulisunut ataatsimeersuarnerput nuannersumik isigineqalersissinnaavarput?
10 Akunnittarfinni neriniartarfinnilu sulisunut qanoq suleqataasinnaavugut? Init atorfissaqartitavut sinnerlugit inniminniissanngilagut ataatsimeersuariartut allat inissarsisinnaajunnaarsillugit akunnittarfiullu iluanaarutissaraluami taartissaanik pissarsinissaraluat akornuserlugu. Akunnittarfimmut iserternitsinni qimalerneranilu akunnittarfimmiittut ulapippata, erinitsajuillutalu inussiarnersuusariaqarpugut. (Kol 4:6) Pisarnitsitut neriniartarfinni saqisunut akunnittarfinnilu nassatatsinnik assartuisunut eqqiaasunullu kajumissaasiisariaqarpugut.
11. Misigisimasat suut takutippaat kristumiutut ileqqorissaarnerput nalunaajaataalluartartoq?
11 Ataatsimeersuarnitsinni ileqqorissaarnerput allanut qanoq sunniuteqarsinnaava? Aviisimi allaaserisaq naapertorlugu ataatsimeersuarfiusumi pisortaq oqarpoq: “Inuit inussiarnersorsuupput. Ukiut tamaasa maaniittarnerat nuannaarutigisarparput.” Siorna akunnittarfimmi ataatsimeersuariat ineqarfigisaanni angutip nalunaajaasuunngitsup aningaasivini katassimavaa. Aningaasivik, imai tamaasa ilanngullugit, akunnittarfiup pisortaanut utertinneqarmat, pisortaq angummut oqarpoq: “Iluanaarputit Jehovap Nalunaajaasui illoqarfimmi maani ataatsimeersuarmata akunnittarfillu taakkuninnga ulikkaarmat. Taamaattoqarsimanngikkaluarpat aningaasiviit tigoqqissimanavianngikkaluarpat.”
12. Ataatsimeersuarneq qanilliartortillugu suna anguniagarissavarput, aamma sooq?
12 Ukiumi matumani ataatsimeersuarnissat qanilliartorasuarput. Saqqummiussassat pissarsiaqarfiulluarnissaannut avatangiisittalu nuannersuunissaanut piffissarujussuaq nukippassuillu atorneqarsimapput. Jehovap peqatigiiffiatalu suut ilinnut piareersarsimanerai piareersimaffigalugit ullut pingasut tamaasa najuuffiginissaat anguniagariuk. Pissuserissaarnikkut, nuannersumik katerisimaaqatigiinnikkut ileqqorissaarnikkullu allat nuannisarnissaat aalajangiussimajuk. Taamaalillutit illit allallu, siorna ataatsimeersuaqataasimasoq ima allassimasoq isumaqatigissavarsi: “Allamik taamak nuannertigisumik nassaassaqanngilaq!”
[Qupp. 4-mi issuagaq]
Ataatsimeersuarnissaq sapaatip akunneranik pingasunik sioqqullugu, pisarnitsitut allanik qaaqqusilluta immikkut suliniarnermut peqataassaagut
[Qupp. 6-mi issuagaq]
Ineqarfitsinni neriniartarfinnilu atisalersoriaatsivut takujuminartuunerpullu Jehovamut ataqqinaataasariaqarput
[Qupp. 7-mi issuagaq]
Pissuserissaarnikkut, nuannersumik katerisimaaqatigiinnikkut ileqqorissaarnikkullu allat nuannisarnissaat aalajangiussimajuk
[Qupp. 6, 7-mi ungalusaq]
2011-mi ataatsimeersuarnissamut eqqaasitsissutit
◼ Nutserineq: Saqqummiussassat nutserneqartassapput, FM-imilu 100,0 Mhz-tikkut aallakaatinneqassalluni. Nutserineq tusarnaarniarukku FM-radio-mik siutequsertakkamik nassassaatit.
◼ Ikiueqqaarneq: Kavaajaartarfimmut saaffiginnittoqassaaq. Pinartumik pisoqarpat, nakkutilliisumut qaninnerpaamut saaffiginnittoqassaaq, taannalu ikiueqqaarnermik ilinniarsimasumut qanoq navianartorsiortigisoqarneranik naliliisussamut ikiortissarsiortussamullu saaffiginnipallassaaq. Pisariaqarpat, ikiueqqaartut Sana-mut sianissapput.
◼ Qasuersaartarfik: Ini, inersuup isaariaata isiginnaartitsiviullu akunneraniittoq, qasuersaartarfittut atorneqarsinnaavoq.
◼ Perusuersartarfiit: Kavaajaartarfiup eqqannguaniipput. Innarluutillit perusuersartarfiat Cafep eqqaaniippoq.
◼ Saqqummiussassanik immiussineq: Immiussissutit Katuap sarfalersuutaanut imaluunniit nipilerissutaanut ikkunneqassanngillat. Saqqummiussassanik immiussisoqassappat allanut akornutaanngitsumik taamaaliortoqarsinnaavoq.
◼ Aqutsisup allaffia: Isiginnaartitsiviup tunuaniippoq.
◼ Biilinik inissiineq: Biilit Katuap tunuanut inissinneqarsinnaappata ajunnginnerussaaq.
◼ Nangilersuisarfik: Perusuersartarfimmiippoq Cafep eqqaani.
◼ Issiavinnik inniminniineq: Inersuaq unnukkut atorneqartarmat ullup tullissaanut issiavinnik inniminniisoqarsinnaanngilaq.
◼ Katatat qimatallu: Kavaajaatarfimmiissapput.
◼ Taquaasiviit: Kavaajaartarfimmut imaluunniit isiginnaartitsiviup tunuanut inissinneqarsinnaapput. Inersuup isiginnaartitsiviullu tungaani tunuanilu nerisoqarsinnaavoq. Torsuusarsuarmi neresoqaqqusaanngilaq. Ingiffissat killeqarmata immitsinnut eqqarsaatigisariaqarpugut inissaqartitsiniarlutalu.
◼ Saqqummiussassat piffissaat: Ulluni pingasuni saqqummiussassat nalunaaqutaq 9.20 aallartittassapput. Matu nalunaaqutaq 8.00 ammarneqassaaq. Aqutsisoq nipilersuutip aallartinnissaanik ilisimatitsippat, tamatta issiavissatsinnut ingikkiartortariaqarpugut saqqummiineq ataqqinnippaluttumik aallartinniassammat. Tallimanngorneq arfininngornerlu saqqummiussassat nalunaaqutaq 16.55 naassapput sapaammilu nalunaaqutaq 15.40 naassaaq.
◼ Tunissut: Ataatsimeersuartarnermut aaqqissuussamut qujamasunnerput takutissinnaavarput silarsuaq tamakkerlugu suliniarnermut, naalagaaffilersaarfipput aqqutigalugu imaluunniit ataatsimeersuarnermi nammineq kajumissutitsinnik tunisinikkut.
[Qupp. 5-mi ungalusaq]
Qanoq qaaqqusissut neqeroorutigissavarput?
Angalaarfigisartagarput tamakkissagutsigu naatsumik saqqummiissaagut. Imatut oqarsinnaavugut: “Haluu. Nunarsuaq tamakkerlugu qaaqqusissutinnguaq una agguaapparput. Aajuna illit pissat. Uani annertunerusumik paasisaqarnerusinnaavutit.” Qaaqqusissutip saqqaa soqutiginnilersitsisinnaavoq, taamaattumik takusinnaasaanik tunniutissavat. Angorniorit. Sapaatip akunnerata naanerani atuagassiat ilanngullugit neqeroorutigineqarsinnaapput.