Peqqissaartumik nalunaajaanerit nuannaarutigiuk
1 Suliamik naammassilluagaqarneq nuannaarutissaqartarnarpoq. Mákorse 7:37 naapertorlugu amerlasuut Jesus pillugu ima oqarsimapput: ’Tamaasa ajunngitsumik iliorpai.’ Tupinnanngilaq Jesusip Jehovap piumasaa iliuuserissallugu nuannarimmagu. (Naleqqiuguk Tussiaatit 40:9.) Siunnersuutit tulliutut isumaliutigiitigalugit assinganik nuannaarneq nanisinnaavarput Jesusip peqqussutaata naalanneratigut, tassa ’inunnut oqaluussilluta nalunaajaallutalu’. (ap. sul. 10:42) Februaarimi atuagaativut pisoqqat 192-inik quupernillit neqoroorutigissavavut, ilagiit taama ittunik atuagaateqassusiat naapertorlugu. Qanoq ililluta peqqissaartumik nalunaajaasinnaavugut atuakkat pisoqqat taakku atorlugit?
2 Inuit amerlasuutigut peqqinnissaq soqutigisarmassuk ima oqarsinnaavutit:
◼ „Naak nakorsaatitigut ilisimatussuseq siumukariartortuaraluartoq, amerlasoorpassuit nappaatit assigiinngitsut peqqutigalugit suli naalliuuteqaqaat. Allaanerulissasoraajuk? [Pulaakkat akili.] Naak immaqa isumaqarnarsinnaagaluartoq takorluuineriinnaasoq, taava Biibilip piffissaq nappaateqarfiunngitsoq eqqartorpaa. [Atuaruk Esajas 33:24, pulaakkallu tusarnaaruk.] Taamaalisinnaassagaluarpat nuannissagaluarpoq, ilaa? [Apeqqut tamanna pillugu pulaakkat eqqarsalersinniarlugu oqaloqatigiuk.] Uuma atuakkap Biibili tunngavigalugu allatap takutissinnaavaa sooq silatusaarnerusoq eqqartukkavut upperissallugit patsisissaqartugut.“ Atuakkami allassimasut ilaannik erseqqissaagit, neqoroorutigalugulu.
3 Niuertarfiit eqqaanni sukkulluunniit nalunaajaagaanni ilassinnilaariarluni ima aperisoqarsinnaavoq:
◼ „Isumaqarpit akit qaffasinnerujussuisa ajornakusoortikkaat suut tamarmik ingerlaannarnissaat? [Pulaakkat akili.] Isumaqarpit qaquguluunniit aningaasarsiornikkut toqqissisimanarluinnalerumaartoq?“ Pulaakkat akili, allassimaffimmillu tulluartumik atuakkat ilaannit atuaagit. Taava ima oqarit: „Uuma atuakkap takutippaa Guutip naalagaaffini ikiortigalugu inuuniarnermi ajornartorsiutit aaqqikkumaarai.“ Atuagaq neqeroorutigiuk. Immaqa taava oqarfigisinnaavat oqaloqatigiinnersi nuannaralugu, aperalugulu: „Ullu-alla oqaloqatigiinnerput nangeqqissinnaavarput?“ Immaqa taava telefon normua najugaataluunniit sumiiffia pisinnaavat.
4 Inuit amerlanerusut ’Ataatarpooq’-mi oqaatigineqartut suli nalunngilaat, taamaattumik immaqa ima oqarsinnaavutit:
◼ „Kutaa, uanga ateqarpunga . . . Qinnut Ataatarpooq nalugunanngilat, eqqarsaatiginikuuiulli suna qinnutigisarneripput ima oqaraangatta ’Naalagaaffiit tikiulli’? [Pulaakkat oqaaseqarli.] Akissutaa uani sarĸúmersitat 21:3, 4-mi nanineqarsinnaavoq. [Atuarneqassaaq, oqaaseqarfigineqarlunilu.] Isumaqarpit piviusorsiorpalaartoq? [Pulaakkat tusarnaaruk, akissutai itisilernerusigit.] Versi 5-imi oqaatsit maluginiakkit. [Atuarneqassapput oqaluuseralugillu.] Atuakkami uani [atuagaq takutiguk] takutinneqarpoq sooq piviusorsiortuunersoq upperissallugu atuakkatta piviusunngornissaat.“ Kapitalimut aalajangersimasumut innersuuguk, atuagarlu neqeroorutigiuk.
5 Soqutiginnissimasut pulaaqqikkukkit Biibilimik atuaqqissaaqatiginiarsinnaavatit ima iliorlutit:
◼ „Kingullermik oqaloqatigiikkatta soqutiginartumik taasaqarputit. [Oqaaserisimasaanik taasaqarit.] Oqaatigisat eqqarsaatigisimavara, eqqaasallu misissuataarakku nassaarisimasara takutikkusuppara. [Allassimaffimmik tulluartumik takutiguk.] Akeqanngitsumik misissueqqissaarnissamik neqerooruteqartarpugut millionilippassuarnik periarfissiisimasumik Biibilip tungaviusumik ajoqersuutaanik piffissaq sivikitsoq atorlugu misissuinissamik. Taamatut misissuinerni Guutip neriorsuutaasa eqquunnissaannut tatiginninnerulernissannik nakussatsissinnaavaatit.“ Apeqqutissat akineqarsinnaasut ilaat eqqaakkit. Pulaakkavit Biibilimik atuaqqissaarnissamik neqoroorutit itigartippagu, eqqaasinnaavat immikkut ittumik sukkasuumik pikkorissartitsisartugut sapaatip akunneranut 15 minuttiinnarnik sivisussisulimmik sapaatip akunnerini 16-ini. Takutiguk Guutip sumik piumaffigaatigut? Ilinniut siulleq qupperuk, aperalugulu qanoq ingerlasarnerat takutilaarsinnaanerlugu.
6 Qaaqqusissutit atornissaat eqqaamajuk: Tamakku aallarniiniarnermi ajunngitsumik atorneqarsinnaapput anersaakkut eqqartugassamut soqutiginnilersinniarlugit, imaluunniit atuagassianik perusunngitsunut tunniussinnaavavut. Inuilli soqutiginninnermik ersersitsippata, naqitaaqqap tunuaniittut atorsinnaavavut pulaagaq kajumissaarlugu Biibilimik atuaqqissaartalernissaanik ataatsimiinnernullu peqataasalernissaanik.
7 Suliamut pikkorikkaanni, nuannaarutaasarpoq. Piareersimajuartarit sapinngisannik peqqissaartumik nalunaajaanissannut, kiffartoriaatsillu assigiinngitsut tamaasa ajunngitsumik atornerisigut nuannaalerit. — 1 Tim. 4:16.