Guutip oqaasii eqqumaffigikkit
1 Oqaatsit anisut tamarmik eqqumaffiginiarneqartariaqanngillat. Inuunermulli pingaaruteqarluinnarpoq Guuti oqaaseqaraangat tusarnaarnissaq. (5 Mos. 28:1, 2) Qujamasuutigisariaqarpavut Biibilimik isumassarsisitaallutik allattut ’Guutip oqaasii’ iluaqutissatsinnut allassimammatigik. (Rûm. 3:2) Ataatsimeersuarnissami oqaatsit taakku atuarneqarneranni nassuiarneqarnerannilu tusarnaarnissaat periarfissaalluarpoq. Qanoq ilillugit eqqumaffiginiarneqarsinnaappat?
2 Aggiaarniarna: Takorlooriarsiuk Israelikkut qanoq pissangatigisimassanersut paasitinneqaramik Sinajip qaqqaani inatsisai tusarniarlugit Jehova naapinnialermassuk. (2 Mos. 19:10, 11, 16-19) Ataatsimeersuarnermi Jehovamit pissarsiassannut taakkunatut assingusumik isiginnittaaseqaruit, ullut tamaasa aggiaarnissat isumagiumassavat. Kingusinaarluta takkukkutta ataatsimiinneq tamaat pissarsiffigisinnaanngilarput issiavissarsiornitsinnilu allat akornuserlugit. Ataatsimiinneq aallartittarpoq ullut tamaasa nalunaaqutaq 9.30.
3 Ilaat takkutiaaraluarlutik ataatsimiinneq aallartikkaangat ingiffissaminiinneq ajorput. Suna pissutigalugu? Saqqummiussassanik aqutsisup erinarsuutip aallarniutissap oqaatiginissaata tungaanut ikinngutitik aatsaat oqaloqatigiunnaarlugit utaqqisaramik inissaminukarnialerlutillu, imaluunniit oqaloqatigiinnerat erinarsornerup aatsaat kipitippagu ingikkiartortaramik. Maluginiassavarput aallarniutitut erinarsuutissaq allartinnginnerani teokratiskiusunik nipilersortoqartillugu saqqummiussassanik aqutsisussaq minutsialunnik sioqqullugu oqaluussisarfimmi issiasarmat. Taava nalussanngilarput ingikkiartortariaqarluta. Erinarsuut aallarniutissaq oqaatigineqarpat Jehova erinarsuummik unnersiutiginissaanut taammaattumik piareersimassaagut.
4 Ilaqutariittut issiaqatigiigitsi sammineqartullu tusarnaarlugit: Israelikkunnut katersuussimasunut Guutip oqaasia atuffassissutigineqaraangat ilaqutariikuutaat, „meeqqat“ ilanngullugit, tusarumallutik ilikkagaqarumallutillu aggiasarput. (5 Mos. 31:12) Ataatsimeersuarnerni meeqqat ’isumamineersinneqassanngillat’. (Uss. 29:15) Angajoqqaat ilaqutariittut issiaqatigiinnissaq isumagissavaat, meeqqatik inuusuttuaraagaluarpataluunniit. Angajoqqaat ilaasa erinarsuut ataatsimiinnerlu aallartinnginneranni meeqqamik quiartornissaat isumagisanngilaat. Taamaappat ilimagisinnaanngilarput meeqqat pallorfiginninnitsinni erinarsornerup qinunerullu pingaaruteqarneri ilikkassagaat.
5 Unnuami sinilluarsimagutta ullukkullu oqimaatsunik nerivallaanngikkutta tusarnaarluarnerusinnaavugut. Oqalugiartup oqaasiisa malinnaaffigilluarnissaat uagutsinnut iluaqutaassaaq. Eqqarsaatit ungasissumiitinnaviikkit. Allassimaffiit atuarneqartut quppertakkit. Naatsunik allattuigit. Oqalugiartup oqaasii eqqarsaatikkut uteqqikkit, eqqarsaatigiullu illit taakkua qanoq atorsinnaaneritit. Ataatsimiinnermi sammineqartut ullup naalernerani ilaqutariittut oqaloqatigiissutigisarsigit. Tamassi immikkut oqaaserineqartuni suut soqutiginartippisigit? Paasissutissat ilaquttavit qanoq pitsaanerpaamik atorsinnaavaat?
6 Guutip oqaasii ataqqikkit: Ataatsimeersuarnermi ikinngutivut oqaloqatigissallugit ineriartornartumillu katerisimaaqatigissallugit periarfissaqarluarpugut. Ataatsimiinnissap aallartinnginnerani aggiaarutta oqaloqatigiinnissatsinnut periarfissaqarluassaagut. Ilaat ataatsimiinnerup nalaani oqaloqatigiilersarput, kukkusumik isumaqaramik ataatsimeersuarnermi angisuumi akornusiisinnaanatik. Taamaakkaluarpalli ataatsimiinnerit inerujussuarmiikkaluarpataluunniit tusarnaanissatsinnut piffissaavoq, soorlu naalagaaffilersaarfimmi ataatsimiinnertitorluinnaq. Oqarasuaatit angallattakkat, personsøgerit (pigaartumik ujaarliutit), videomik assiliissut assiliiviilluunniit atorlugit ataatsimiinneq akornusersussanngilarput.
7 Moses Jehovamit inatsisinik tunineqarami ’nerinanilu iminngilaq’. (2 Mos. 34:28) Taamatuttaaq ataatsimiinnerup nalaani nerinissaq imernissarlu naleqqutinngilaq. Tamanna ’aalajangersimasumik piffissaligaanera’ utaqqineqartariaqarpoq, perulunnartumik nappaateqanngikkaanni. — Nal. oq. 3:1.
8 Ataatsimeersuarnerit ilaatigut ataatsimiinerup nalaani qatanngutit angalasaqattaartut meeqqallu arpattaqattaarlutillu pinnguartut suli ajornartorsiutaasarput. Nakkutilliisut pisussaaffigaat taakku qinnuigissallugit inigisaannut ingikkiartoqqullugit. Piumassutsiminik kiffartortoq suliani naammassiniariarlugit inissaminut ingikkiartupallattariaqarpoq. Pisariaqanngippat suliassarsiortariaqanngillat allallu ataatsimiinerup nalaani oqaloqatiginagit.
9 Guutip oqaasii tusarnaaraangatsigit kissaatiginngilarput ’tusassaaqqajaaginnalernissarput’. (Epr. 5:11) Taamaattumik aalajangiutsigu naleqquttumik ataqqinnilluta ataatsimeersuarnermi Jehovap oqaasii illernartut tusarnaassallugit.