Tusarnaarit ilinniarlutillu
1. Sooq ataatsimeersuarnermi tusarnaarsinnaajumalluni ilinniarsinnaajumallunilu immikkut iliuuseqarnissaq pisariaqarsinnaava?
1 Qanittukkut 2013-imi ataatsimeersuarnerit aallartissapput. Nunarsuaq tamakkerlugu pisariaqartinneqartunik matussusiisussanik ataatsimeersuarnissamik pilersaarusiorneq suliarujussuuvoq. Ataatsimeersuarnerup ulluini pingasuni tamani najuussinnaajumallutit pilersaarusioreerpit? Ataatsimeersuarnerni akornutaasinnaasut amerlapput, taamaattumik saqqummiunneqartunut malinnaalluarsinnaajumalluni immikkut iliuuseqarnissaq pisariaqarsinnaavoq. Ataatsimeersuarnerit ataatsimiinnernit sivisunerusarmata malinnaaniarnissaq sivisunerusarpoq. Tamatuma saniatigut angalanerit pissutsillu allat qasoqqanerulersitsisinnaapput. Tusarnaarsinnaajumalluta ilinniarsinnaajumallutalu malinnaaniarnitsinnut suna iluaqutigisinnaavarput? — 5 Mos 31:12.
2. Qanoq uummaterput ataatsimeersuarnermi saqqummiunneqartussanut piareersarsinnaavarput?
2 Ataatsimeersuarneq sioqqullugu: Ataatsimeersuarnermi saqqummiussassat, tassa oqalugiaatinut tamanut qulequttat oqalugiaammullu allassimaffik allassimaffiilluunniit marluk pingaarnerit, nittartakkatsinni, www.pr2711.com-imi, saqqummersinneqartarput. Internetikkut paasissutissanik tamakkuninnga misissuisinnaagutta uummaterput saqqummiunneqartussanut piareersarsinnaavarput. (Ezra 7:10) Ilaqutariinniittut tamarmik qilanaarsinnaaniassammata ilaqutariittut atuaqqissaaqatigiinnissinni ataatsimeersuarnermi saqqummiunneqartussat eqqartorsinnaavisigit?
3. Tusarnaaqqissaarnissatsinnut suut iluaqutigisinnaavavut?
3 Ataatsimeersuarnermi: Pisariaqarpat ataatsimeersuarnerup aallartinnginnerani perusuersartarfimmukaqqaarit. Sianerfigitinnernit allagarsinernilluunniit akornusersorneqaqqunak saqqummiisoqarnerataluunniit nalaani allanut allannissannut ussernartorsiunnginniassagavit mobilit qamiguk. Mobilivit ikumatittariaqarnera pissutigalugu sianertoqassappat mobilit allanut akornutaasussaajunnaarsissavat. Saqqummiisoqarnerata nalaani atortorissaarut elektroniskiusoq atussagukku allanut akornutaatissanngilat. Saqqummiisoqarnerata nalaani nerinaveersaarlutillu imernaveersaassaatit. (Oqal 3:1) Oqalugiartoq isigiuk. Allassimaffimmik atuartoqaraangat Biibilinni malinnaasarit. Naatsunik allattuigit.
4. Qanoq angajoqqaat qitornamik tusarnaarnissaannut ilinniarnissaannullu ikiorsinnaavaat?
4 Qitornatta tusarnaarlutillu ilinniarnissaat aamma kissaatigaarput. ‘Nukappiaraq imminiiginnarneqarsimasoq anaanaminut kanngunarsaataassaaq’. (Uss 29:15, NW) Taamaattumik ajunnginnerussaaq ilaqutariit issiaqatigiikkunik, taamaalillutik angajoqqaat qitornamik oqalunnatik, allanut sms-ernatik pisuttuaqattaarnatillu saqqummiunneqartunut malinnaanissaat qulakkeersinnaaniassammassuk. Meeqqat saqqummiunneqartunik tamanik paasinninnissaminnut mikivallaaraluarpataluunniit eqqumanissaannut nipaarsaarnissaannullu sungiusarneqarsinnaapput.
5. Sooq saqqummiunneqarsimasunik uteqqiineq iluaqutaasarpa, aamma qanoq taamaaliorsinnaavugut?
5 Ullut ataatsimeersuarfiit: Pigaarnak. Naammattumik sinissinnaajumallutit innajaarit. Uteqqiinikkut tusakkat eqqaamalluarnerulerneqarsinnaapput. Taamaattumik unnuit tamaasa saqqummiunneqarsimasunik ilaqutariittut eqqartueqatigiittarneq iluaqutaassaaq. Ikinngutitit neriniartarfiliaqatigigukkit allattorsimasatit nassarsinnaavatit saqqummiunneqarsimasullu nuannarisatit eqqaallugit. Ataatsimeersuareernerup kingorna paasissutissat ilaqutariittut qanoq maleruarsinnaanerlusigit ilaqutariittut atuaqqissaaqatigiinnissinni eqqartorsinnaavarsi. Sapaatit-akunneri tamaasa saqqummersinneqarsimasunik aamma misissueqatigiittarsinnaavusi.
6. Ataatsimeersuarnermut najuunneq naammappa? Nassuiaruk.
6 Nerersuartitsinermi nerisassat nerineqanngippata nerersuartitsineq siunertaqarnavianngilaq. Anersaakkut nerisassanut ataatsimeersuarnerni sassaalliutigineqarsimasunut tunngatillugu aamma taamatut oqartoqarsinnaavoq. Qanortoq ataatsimeersuarnermi saqqummiunneqartunut tamanut tusarnaaqqissaarnikkut ilikkarsimasatsinnillu maleruaanikkut malinnaalluaqqissaarisa.