’Tusarnaaruit suli annerusumik ilisimasaqalissaatit’
1 Ussatit ilisimassuseq allaatigaat, ima suaartartoq: „Tusaaniaritsi, oqaatigisassarami eqqortuuvoq; uanga qarlunnit tutsiutissaaq peqqusersuissuseq. Uanniipput siunnersuineq silatusaarnerlu. . . . tusaaniarsinga. Pilluarput uanga aqqusininnik atuaasut. Uannimmi nanisisoq inuussummik nanisivoq [Jehovamullu] iluarinartunngorluni.“ (Uss. 8:6, 14, 32, 35) Oqaatsit taakkua ersersilluarpaat, ataatsimeersuarnermi „Guutip oqaasianik ilinniartitsivugut“-mik qulequtalimmi ilinniartitaanissarput qilanaarisinnaagipput.
2 Ataatsimeersuarnissami sammisassat silarsuaq tamakkerlugu uppeqatigiit pisariaqartitaat matussuserniarlugit aaqqissuunneqarsimapput. Anersaakkut unnersuussutit atortarutsigit siunnersuutillu piviusorsiortut maleruartarlugit nuannaarnerulissaagut, Jehovamut qanimut ataaveqarluassaagut inuunerullu aqqutaaniiginnarluta. Aap, ’naalaaruit suli annerusumik ilisimasaqalernissannut’ patsisissaqarluarputit. — Uss. 1:5.
3 Ataatsimiinnerup aallartinnginnerani: Sammineqartut pissarsiffigiumallugit aallartinnermi issiavissatsinneeriissaagut isummatsigullu piareersimalluta. Pilersaarusiorluarnissaq pisariaqarpoq. Makiaarnissaq pingaaruteqarpoq. Unnukkut innajaartaritsi ullaakkullu makiaarlusi, tamarmik piareersareersimallutillu neriniassapput. Issiavissarsereerumallusi sammisassallu aallartinnginnerani pisarialinnik angumerisassaqarumallusi aggiaaritsi. Ullut tamaasa nalunaaqutaq 9.30 ataatsimiinnerit aallaartittassapput.
4 „Katersorsimasuni“ pingaarnerusumik Jehova unnersiutiginiarlugu katersuukkatta sammisassat tamatigut Guutimut ataqqinaataasumik aallartinneqartariaqarput. (Tus. 26:12) Taamaattumik kajumissaarneqarpugut erinarsuutip aallartinnginnerani inissatsinneereeqqulluta. Unnersuummut Biibilimeersumi tamanna naleqquppoq: „Suulli tamarmik ippinnanngitsumik torersumillu ingerlalit“ (1 Kor. 14:40) Tamatsinnut qanoq isumaqarpa? Tassa aqutsisoq oqaluttarfimmut qaqippat nipilersullu aallartippat inissatsinnukarnissatsinnut piffissanngussaaq. Taamaalilluta uummammik pisumik Jehovamullu ataqqinaataasumik erinarsuummut aallarniutaasumut erinarsoqataasaagut. — Tus. 149:1.
5 Ataatsimiinnerup nalaani: Ezrap ’aalajangiussimavaa Jehovap inatsisai paasiniarluarniarlugit maleruarniarlugillu’. (Ezra 7:10) Jehovamit ilinniartitaanitsinni tusarnaaqqissaarnissamut qamuuna qanoq aalajangersinnaavugut? Sammisassat qulequtaalu qimerlualaarutsigit immitsinnut aperisinnaavugut: ’Jehovamuna sumik ilinniartinniaraanga? Paasisakka uannut ilaquttannullu iluaqutissatut qanoq atorsinnaavakka?’ (Es. 30:21; Ef. 5:17) Ataatsimeersuarneq naallugu imminut taama aperisarit. Siunnersuutit atorusutatit allattukkit. Ataatsimeersuarnermi ulloq naagaangat allanut oqaloqatigiissutigisakkit, taamaalioruit eqqaamallugillu unnersuussutit atoriaannaassavatit.
6 Nalunaaquttap akunnerpassuini malinnaaqissaarniarneq unamminiarnarsinnavoq. Allanik eqqarsaateqalinnginnissarput qanoq pinngitsoortissinnaavaput. Isigisatta allamut saatsissinaavaatigut. (Mat. 6:22) Taamaattumik aalassallattoqarpat nipiliulaartoqarpallu qiviaqinak. Oqalugiartoq nakkuguk. Allassimaffiit atuarneqartut Biibilinni malinnaaffigikkit eqqartorneqarneranilu quppersimatiinnarlugu.
7 Kristumiutut asanninnerup ataatsimiinnerup nalaani allanik ajoqusersuitsaalissavaatigut. (1 Kor. 13:5) Tamanut piffissaqarpoq, nipangerfissaqarpoq tusarnaarfissaqarlunilu. (Oqal. 3:7) Taamaattumik pisariaqanngitsumik angalaarlutillu oqaloqinak. Sapinngisamik perusuersariartarnerit killilersimaakkit. Pisarialimmik naappaateqanngikkuit ataatsimiinnerup nalaani nerinaveersaarit. Inunnik ujaarliuteeqqat, videonik immiussissutit assiliiviilluunniit nassaraanni allanut ajoqutaasumik atorneqassanngillat. Telefonit angallattakkat ikumatinneqassanngillat. Angajoqqaat meeqqatik — aamma inuusuttuaqqat — nakkutiginiassammatigit issiaqatigissavaat. — Uss. 29:15.
8 Siorna utoqqaanertaq ukiorpassuarni ataatsimeersuaqataasarsimasoq oqarpoq: „Misigisimavunga ataatsimeersuarneq una immikkut ittumik maluginiarnartuusoq. Tusarnaartut tamangajammik allattuipput, meeqqanut allaat. Tamanna takullugu nuanneqaaq. Oqalugiartoq peqqusigaangat Biibili quppertarpaat.“ Malinnaalluarnersi nersornaqaaq. Uagutsinnut uppeqatitsinnullu ataatsimeersuarnerput iluaqutaaginnanngilaq, aammali ataatsimut tamaat isigalugu ilinniartitsisorsuarput, Jehova Guuti naalannarsisinneqarpoq. — Es. 30:20.