Eqqaaniaalluni nalliuttorsiornissamut qaaqqusissutit apriilip aappaanniit agguaanneqalissapput
1. Eqqaaniaalluni nalliuttorsiornissamut qaaqqusissutit ukiumi matumani qaqugu agguaanneqalissappat, immikkullu suliniuteqarneq tamanna qanoq naleqartigaa?
1 Apriilip aappaanniit 17-iata tungaanut ukiumi pisimasunit tamanit pingaarnerpaamut — tassa Kristusip toquneranik eqqaaniaalluni nalliuttorsiornermut — qaaqqusissutinik agguaassilissaagut. Soqutiginnittorpassuit ukiumoortumik immikkut suliniuteqarneq tamanna siornatigut qisuariarfigisarsimavaat. Assersuutigalugu ullormi eqqaaniaalluni nalliuttorsiorfimmi arnaq immikkoortortaqarfimmut sianersimavoq oqarlunilu: ”Angerlaqqammerpunga, iseramalu qaaqqusissut matuma ataani nassaaraara. Aggerusukkaluarpunga qassinulli piniarnersoq paasinngilara.” Qatanngutip angutip nassuiaappaa qaaqqusissutip suatungaani tamanna takusinnaagaa. Arnaq oqaloqatigiinneq naggaserlugu oqarpoq, ”nalliuttorsiornissinnut aggissaanga!”
2. Qaaqqusissut tunniukkutsigu qanoq oqarsinnaavugut?
2 Qanoq iliussaagut: Angalaarfigisartakkatsinni agguaanissatsinnut piffissaq sivikimmat naatsunnguamik oqaloqatiginnittarutta pitsaanerussaaq. Imatut oqarsinnaavugut: ”Haluu, silarsuaq tamakkerlugu sapaammi apriilip 17-ianni ukiumi matumani nalliuttorsiornermut pingaarutilimmut ilaquttatillu qaaqqujumallusi qaaqqusissut una tunniukkusupparput. [Pulaakkannut qaaqqusissut tunniuguk.] Ulloq taanna Jiisusi toquvoq. Kristusip utertitsissutaa uagutsinnut qanoq iluaqutaasimanera nassuiarlugu Biibili tunngavigalugu oqalugiartoqassaaq. Illoqarfimmi maani sumi qaqugulu tamanna pissanersoq qaaqqusissummi takuneqarsinnaavoq.”
3. Qanoq iliorluta inuit sapinngisamik amerlasuut qaaqqusinnaavavut?
3 Ilagiit angalaarfigisartagaat aakkajaajuppat, imaassinnaavoq utoqqaanertat aalajangiisut angerlarsimasoqanngitsunut allanut takuneqarsinnaanngitsumik qaaqqusissut ilineqarsinnaasoq. Pulaaqqittakkavit, ilaquttavit, suleqativit, atuaqativit allallu ilisarisimasavit qaaqqunissaat qulakkeeruk. Sapaatip akunnerata naanerani qaaqqusissutinik agguaanermi tulluarpat, atuagassiat ilanngullugit neqeroorutigineqarsinnaapput. Apriilimi immikkut suliniuteqarnermut nuannersumut peqataanerujumallutit ikiorti-pioneriusinnaavit?
4. Sooq kissaatigaarput soqutiginnittut eqqaaniaalluni nalliuttorsiornermut najuutissasut?
4 Nalunaajaaneq sunniuteqarluartoq soqutiginnittut najuuttut qularutissaanngitsumik pissarsiaqarfigilluassavaat! Jehovap utertitsissummik pilersitsineratigut asanninnersua tusassavaat. (Joh 3:16) Guutip Naalagaaffia inuiannut qanoq iluaqutaassasoq ilikkassavaat. (Es 65:21-23) Aamma kajumissaarneqassapput ilikkagaqarnerujumallutik Biibilimik atuaqqissaaqatigineqalerumallutik Jehovap Nalunaajaasuinut najuuttunut saaffiginneqqullugit. Qinnutigaarput soqutiginnittut eqqortuliorusuttut amerlasuut immikkut suliniuteqarneq tamanna qisuariarfigilluassagaat peqatigaluta eqqaaniaalluni nalliuttorsiornermut najuullutik!