Eqqaaniaalluni nalliuttorsiornissap nalaa nuannersuutiguk!

1. Eqqaaniaalluni nalliuttorsiornissap nalaani nuannaarneq annerusoq ilaatigut qanoq misigisinnaavarput?

¹ Marsimi, apriilimi maajimilu nuannaarneq annerusumik misigerusuppiuk? Ajornanngippat ilaatigut ikiorti-pioneriunikkut oqaluussisarnivit annertusineratigut tamanna misigisinnaavat. Qanoq nuannaarnerit annerulersissinnaaviuk?

2. Oqaluussinitsinnik annertusisitsineq qanoq nuannaarnerulernermik kinguneqartitsisarpa?

² Nuannaarnerulerit. Jehovap pinngortippaatigut pallorfiginninnitsinni anersaakkut pisariaqartitavut pisimatillugit nuannaarsinnaatilluta nalerisimaarsinnaatillutalu. (Matt 5:3) Allanittaaq ikiuinitsigut nuannaarutiginnilersinnaatilluta pinngortippaatigut. (ApS 20:35) Oqaluussinitsinni taakku marluutillugit, Guutimut pallorfiginninneq aamma inunnik ikiuineq, misigisinnaavavut. Una pissusissamisuuginnarpoq: Oqaluussinermi suliniuteqarneruleraangatta nuannaarnerulertarpugut. Aamma oqaluussinerulernerput ilutigalugu pikkorinnerulertarpugut. Pikkorinneruleraangatta imminut tatiginerulerlutalu annilaangavallaarunnaartarpugut. Nalunaajaariataarnissatsinnut Biibilimillu atuaqqissaaqateqalernissatsinnut periarfissaqarnerulertarpugut. Tamakkua tamarmik oqaluussineq nuannernerulersittarpaat.

3. Sooq marsi apriililu ikiorti-pioneriuffigissallugit ajunnginnerussava?

³ Pingaartumik marsimi apriilimilu nalunaaquttap akunneri 30-t imaluunniit 50-it anguniarnissaanut periarfissaammata ikiorti-pioneriuffigissallugit ajunnginnerussaaq. Tamatumunnga atatillugu, eqqaaniaanissatta tungaanut, arfininngornermi marsip 22-anniit ataasinngorneq apriilip 14-iat tikillugu qaaqqusissutinik agguaassinissaq peqataaffigalugu immikkut suliniuteqarneq nuannaarutigisinnaavarput. Piffissami tamatumani sapinngisamik amerlasuut ‘suleqatigiillutik’ angalaarfigisartagaq tamakkerniarlugu angalaarnermut peqataappata ilagiit nuannaangaarlutik ulapputissapput. — Sef 3:9.

4. Ikiorti-pioneriorusukkutta qanoq iliussaagut?

⁴ Piareersalereerit. Piareersareersimanngikkuit qaammatini taakkunani kiffartornerpit annertusinissaanut qanoq aaqqiisinnaanerlutit qaammatisiutitit misissuataakkit qinusarlutillu. (Jaak 1:5) Tamanna pillugu ilaquttatit ilagiinniittullu allat oqaluttuutikkit. (Uss 15:22) Naak peqqiillioraluarlutit ulluinnarnilu ulapittuugaluarlutit ikiorti-pioneriunermi nuannaarneq illit aamma misigisinnaavat.

5. Eqqaaniaalluni nalliuttorsiornissap nalaani oqaluussinerput annertusigutsigu qanoq kinguneqassava?

⁵ Jehovap kissaatigaa kiffani nuannaartuussasut. (Tuss 32:11) Eqqaaniaalluni nalliuttorsiornissap nalaani oqaluussinermut nukivut tamaasa atorutsigit imminut nuannaartiinnarnata aamma Ataatarput qilammiusoq nuannaartissavarput. — Uss 23:24; 27:11.