‘Inuit katersortikkit’
1. Ataatsimeersuarnerit Israelikkut katersuuttarnerannut pingaarutilinnut qanoq assinguppat?
1 Israelikkut Egyptenimit aniguisitaaqqammernerisa kingorna Jehovap Mosesi oqarfigaa inuit imminerminik mianerinninniassammata piumasamisullu qitornaminnik ilinniartitsisinnaaqqullugit oqaaseriumasaminullu tusarnaarsinnaaqqullugit qaqqami Sinajimi ‘katersortissagai’. (5 Mos 4:10-13) Katersuunneq tamanna puigunaallunilu uppernikkut nakussatsinnarsimassaqaaq! Qaammatini tulliuttuni Jehovap innuttai Jehovamit ilinniartinneqarumallutik ataatsimeersuarnerni katersuuttassapput. Ataatsimeersuarneq tamakkiisumik iluaqutigisinnaajumallugu susariaqarpugut?
2. Ataatsimeersuarnissatsinnut ‘piareersimajumalluta’ susariaqarpugut?
2 ‘Piareersimagit.’ Jehovap Israelikkut qaqqami Sinajimi katersuunnissamut pingaarutilimmut ‘piareersimaqquai’. (2 Mos 19:10, 11) Taamatuttaaq ataatsimeersuarnermut najuuttussat, saqqummeeqataasussaannaanngitsut, tamarmik piareersarluarsimasariaqarput. Assersuutigalugu amerlasuut ataatsimeersuaqataajumallutik sulinngiffeqartariaqarput. Imaassinnaavoq atukkatit Nehemiap atugaanut assingusut. Taanna Kunngip Artaxerxesip immitsisartuatut suliunnaarluni Jerusalemip qarmarsuinik qarmaaqqinnermi ikiuukkusukkami Jerusalemiliarusuppoq, nalunngilaali kunngi akuersaarnaviarunanngitsoq. Nehemia qinupallariarluni sapiilluni eqqarsaatigilluakkamik noqqaassuteqarpoq. Nehemiap aallarnissaa kunngip akueralugulu sanaartornissaanut pisariaqartitaanik tunivaa. (Neh 2:1-9) Sulinngiffeqarnissat pillugu qinnuteqarsimanerpit saniatigut angalanissannut unnuisarfissannullu allagartat piginerlugit qulakkeernikuuiuk? Utoqqaanertat ikiorneqarusuttunik ikiuinissaminnut piareersimapput. Piffissaalluartumi ataatsimeersuarfissamukarnissat pilersaarusiorlugulu ‘tusarliunneqartut sianigilluaqqissaarniarnissaat’ piareersimaffigiuk. — Hebr 2:1.
3. Uummatitta saqqummiussassanut piareersarnissaanut suna iluaqutigisinnaavarput?
3 Aamma tusarnaaqqissaarumalluta ilikkagaqarsinnaajumallutalu uummaterput piareersartariaqarparput. (Ezra 7:10) Ataatsimeersuarnermi saqqummiussassat oqalugiaatinilu allassimaffiit pingaarutillit nittartakkatsinni jw.org-imi saqqummersinneqassapput. Saqqummiussassat ilaqutariittut atuaqqissaaqatigiinnermi ataatsimeersuarnissaq sioqqullugu sammineqarsinnaapput. Oqaluussisartut ilaasa saqqummiussassat allattorsimaffiat ataatsimeersuarnermi allattuinerminni atorniarlugu anillatsereertarpaat.
4. Qanoq angajoqqaat ataatsimeersuarnerit iluaqutigalugit qitornaminnik ilinniartitsisinnaappat?
4 ‘Qitornatit ajoqersukkit.’ Israelimi angajoqqaat ‘qitornaminnik ajoqersuinissaat’ qaqqami Sinajimi ataatsimeersuarnermi siunertarineqartut ilagaat. (5 Mos 4:10) Ullumikkut angajoqqaat ataatsimeersuarnermi taamaaliornissaminnut periarfissatsialassuaqarput. Ataatsimeersuarnerup nalaani angajoqqaat qitornatik issiaqatigisariaqarlugillu malinnaanissaannut ikiortariaqarpaat. Ilaqutariit ataatsimeersuarnerup nalaani kingusinnerusukkullu ilaqutariittut atuaqqissaaqatigiinnermi saqqummiunneqarsimasut eqqartorsinnaavaat.
5. Ataatsimeersuarnermut najuunnerput qanoq iluaqutigissavarput?
5 Israelikkut qaqqami Sinajimi pingaarutilimmik ataatsimeersuarneq immikkut pisinnaatitaaffilerneqarnermikkut Guutimut innuttaanerminnik qujamasuutiginninnissamut iluaqutigaat. (5 Mos 4:7, 8) Taamatuttaaq ataatsimeersuarnissarput uagutsinnut iluaqutissanngorlugu piareersarneqarsimavoq. Ulluni pingasuni Saatanip silarsuaanit inoqajuitsutullusooq ittumit qimagussinnaallutalu anersaakkut nukissaqalersinneqarnerput anersaakkullu paratiisimi qatanngutinik ineriartornartumik peqateqarnerput nuannaarutigisinnaavavut. (Es 35:7-9) Qanortoq Jehovap ullussaa qanilliartortillugu kajumissaaqatigiinniarluta katisimasarnivut peqataaffigiuarisigit! — Hebr 10:24, 25.