3 | Biibilimi oqaluttuarineqartut tuppallersaatigikkit

BIIBILIMI OQALUTTUARINEQARPUT … Angutit arnallu aalajaatsut ‘uatsitulli misigissuseqartut’. – JAAKU 5:17.

Qanoq paasisariaqartoq

Biibilimi angutit arnallu assigiinngitsorpassuarnik misigissusillit oqaluttuarineqarput. Taamaattumik Biibilimi atuartilluta immaqa paasissavarput oqaluttuarineqartut ilaat uagutsinnut assingusumik atugaqarsimasut.

Qanoq iluaqutaasinnaasoq

Tamatta paasineqarnissarput pisariaqartipparput, ingammik eqqarsartaatsikkut napparsimagutta. Biibilimi uagutsinnut assingusumik eqqarsartaasillit misigissusillillu pillugit atuartarpugut. Taamaaliortarutta paasissavarput nanertisimanitsinni, annilaanganermi misigissutsikkullu akiuunnermi kisimiinnata.

Biibilimi atuarneqarsinnaapput inuit ikiortissaaleqisut neriuutaarussimasullu oqaasii. Imatut misiginikuuit: ‘Sapilerpunga!’ Moorsisi, Daavi Elialu taamatut misiginikuupput. – Mosesimik 4. 11:14; Kunnginik 1. 19:4; Tussiaat 55:5.
Biibilimi oqaluttuarineqarpoq arnaq Hannamik atilik meerartaarsinnaannginnami uimilu nuliata aappaanit mitaatigineqartarami ‘isumatsassimaqisoq’. – Samuelimik 1. 1:6, 10.
Angut Jobimik atilik uagutsitulli misigisimagunartoq Biibilimi oqaluttuarineqarpoq. Upperluartuugaluarluni misigissutsikkut nanertisimangaarluni ima oqarsimavoq: “Taamaannera qatsuteqaara, inuuinnarusunngilanga!” – Jobi 7:16.

Biibilimi oqaluttuarineqartut taakkua nikallornartunik eqqarsaatersortarnertik iluatsittumik qanoq qaangersimagaat paasigutsigu uaguttaaq nanertisimanitsinni nakussatsinneqarsinnaavugut.

Biibili qanoq iluaqutigigaa – Kevin

Bipolarimik nappaateqarnera qanoq uannut sunniuteqartoq

“50-it missaanni ukioqarlunga ilisimatinneqarpunga aqussinnaanngisannik nuannaarujussuartarnermik nikallorujussuartarnermillu (bipolarimik) nappaateqarlunga. Ilaannikkut sapigaqanngitsutut misigisarpunga ilaannikkullu inoorusukkuunnaartarlunga.”

Biibili qanoq iluaqutigigiga

“Apustili Petrusi Biibilimi oqaluttuarineqartoq paasilluarsinnaavara. Kukkussuteqarami naleqanngitsutut misigisimassaaq. Nikallunganiinnarnanili ikinngutini imminut asannittut ilagisarpai. Ajorluinnaraangama naammalluinnanngissusera ajuusaarutigalugu naleqanngitsutut misigilertarpunga. Petrusi ilaarlugu ikinngutikka tunniutiinnannginnissannut ikiortarmannga ilaginiartarpakka.

Aamma kunngip Daavip misigisaa tuppallersaatigingaarpara. Kukkussutigisimasani pissutigalugit peqqissimingaarpoq atukkanilu nammineq sunniuteqarfigisinnaanngisani nikallussutigisarlugit. Ilaannikkut peqqissimissutigisannik iliuuseqarlungalu oqartoortarama paasilluarsinnaasarpara. Tussiaat 51-imi Daavip oqaasii tuppallersaatigaakka. Versi 5-imi Daavi ima oqarpoq: ‘Massami unioqqutitsinikka ilisimavakka, ajortuliaralu sianigiuarpara.’ Uanga taamatut aamma misigisarpunga isumatsaqqajussuarninni ajorluinnartunik eqqarsaateqartarama. Versi 12-imili Daavip oqaasii aamma ilisaraakka: ‘Uummammik minguitsumik pinngortitsiviginnga, Guuti, aammaarlutit anersaamik aalajaatsumik tuninnga!’ Imminut ajunnginnerusumik isiginnittaaseqalerniassagama taamatupajaaq aamma Guutimut qinusarpunga. Aamma versi 19 tuppallersaatigisarpara. ‘Uummat peqqissimisoq artorsaateqangaartorlu itigartittarinngilat, Guuti.’ Oqaatsit taakku pissutigalugit upperilluinnarpara Guutip asagaanga.

Biibilimi oqaluttuat Guutillu uannut iliuusii pissutigalugit siunissamut neriuuteqalerpunga. Biibilimi neriorsuutit piviusutut isiginerulertarpakka, tamannalu tunniutiinnannginnissannut iluaqutigisarpara.”