Ilumoortup inuunerit allanngortissinnaavaa
ALLAASERISANI ukunani salluliuutit qulaakkavut immaqa ulloq manna tikillugu upperisimavatit. Taamaappat imaassinnaavoq isummat allanngortissallugu nangaasutit ingammik taakkua ilaat sivisuumik upperisimagukkit.
Taamatut nangaaneq paasinarluarpoq. Oqaluffeqarfiit ilaasa inassutiginngilaat ajoqersuutitik Biibilimi allassimasunut naleqqiunneqarnissaat. Allat kukkusumik ilinniartitaasimanertik illersorniarlugu oqartarput Biibili atuagaasoq paasiuminaatsoq, imaanngitsorlu kikkut tamarmik paasissagaat. Jiisusilli ajoqersugai inuupput nalinginnaasut ilinniarnertuujunngitsut sumillu ilinniartinneqarnertik paasiuminaatsinngilaat. — Apustilit Suliaat 4:13.
Immaqa aamma upperisavit misissoqqissaarnissaa tunuarsimaarfigaat uppernikinninnut ersiutaassasoralugu. Kisianni takorloorneqarsinnaava Guutip iluarinngikkaatit illit Biibili, Guutip inunnut tusarliussaa, misissorusukkukku paaserusullugu qanoq piumaffigigaatit? Naamik, Biibilimi kajumissaarneqarpugut qanoq allassimasoqarnersoq nammineerluta misissussagipput, imami allassimavoq: ‘Sianigilerniarsiuk [Qulakkeerniarsiuk, NV] sunaasoq Guutip piumasaa: ajunngitsoq, iluarinartoq, naammalluinnartoq.’ — Romamiut 12:2.
Guuti pillugu ilumoortup ilinniarnera tassaaginnanngilaq ilisimasaqalerneq — inuuninni ajunngitsumik allannguerujussuartitsisinnaavoq. (Johannesi 8:32) Deanne, allaaserisami siullermi eqqaaneqartoq, maanna upperisani Guutip oqaasianik tunngaveqartilerpaa. Ima oqaluttuarpoq: “Nammineerlunga Biibilimik atuaqqissaartalerama aatsaat paasivara Biibili taama paasiuminartigisoq. Maanna nalunngilara Jehova tassaanngitsoq Guuti qanillineqarsinnaanngitsoq; tassaavoq uanga Ataataga qilammiusoq asannittoq. Inuunerup siunertaa paasivara.”
Immaqa siornatigut Biibilimik atuartareerputit pissarsiaqarnalli. Uniinnaqinalli. Siornatigut Guuti pillugu kukkusumik ilinniarsimagaanni, Biibilimik atuarneq paasinninnerlu assigissavaa asseq kukkusoq najoqqutaralugu katitertakkanik katiteriniarsarineq. Immaqa katitertakkat ilaat inississinnaavatit, assimulli takorluukkamut assingunngimmat unitsiinnarpat. Asserli eqqortoq najoqqutaralugu aallartikkaanni katitertakkat tamarmik inissinneqarsinnaassapput.
Guuti pillugu ilumoortoq ilinniarusuppiuk? Taava kajumissaarpatsigit akeqanngitsumik Biibilimik atuaqqissaaqatigineqaqqullutit Jehovap Nalunaajaasui attavigeqqullugit adressemulluunniit atuagassiami matumani qupperneq 4-mi allassimasumut allaqqullutit.
[Issuagaq 9-mi assiliartaq]
‘Qulakkeerniarsiuk sunaasoq Guutip piumasaa.’ — Romamiut 12:2