សំបុត្រទីមួយជូនចំពោះគ្រិស្តសាសនិកនៅក្រុងកូរិនថូស
១ ពីខ្ញុំ ប៉ូល ដែលបានត្រូវហៅឲ្យធ្វើជាសាវ័ក* របស់លោកយេស៊ូគ្រិស្ត* តាមបំណងប្រាថ្នារបស់ព្រះ ព្រមទាំងពីសូស្តែនជាបងប្រុសរបស់យើង ២ ជូនចំពោះក្រុមជំនុំរបស់ព្រះនៅឯក្រុងកូរិនថូស គឺអ្នករាល់គ្នាដែលបានត្រូវញែកចេញជាបរិសុទ្ធក្នុងនាមជាអ្នកកាន់តាមគ្រិស្តយេស៊ូ ក៏បានត្រូវហៅ ដើម្បីឲ្យធ្វើជាអ្នកបរិសុទ្ធ ហើយជូនចំពោះអស់អ្នកដែលកំពុងហៅរកនាមលោកម្ចាស់របស់យើងនៅគ្រប់ទីកន្លែង គឺនាមលោកយេស៊ូគ្រិស្ត ជាម្ចាស់របស់ពួកគាត់និងរបស់យើងដែរ៖
៣ សូមឲ្យអ្នករាល់គ្នាបានប្រកបដោយគុណដ៏វិសេសលើសលប់និងសេចក្ដីសុខសាន្តពីព្រះ ជាបិតារបស់យើង និងពីលោកម្ចាស់យេស៊ូគ្រិស្ត។
៤ ខ្ញុំតែងតែអរគុណព្រះអំពីអ្នករាល់គ្នា ដោយគិតពីគុណដ៏វិសេសលើសលប់របស់ព្រះដែលបានត្រូវផ្ដល់ឲ្យអ្នករាល់គ្នាតាមរយៈគ្រិស្តយេស៊ូ ៥ ពោលគឺអ្នករាល់គ្នាបានទទួលអ្វីៗជាបរិបូរដោយសាររួបរួមជាមួយនឹងលោក ដែលរួមបញ្ចូលសមត្ថភាពពេញលេញក្នុងការប្រកាសបណ្ដាំរបស់ព្រះ និងចំណេះសព្វគ្រប់ ៦ ពីព្រោះសក្ខីភាពអំពីគ្រិស្តបានចាក់ឫសយ៉ាងរឹងមាំក្នុងចំណោមអ្នករាល់គ្នា ៧ ដើម្បីកុំឲ្យអ្នករាល់គ្នាខ្វះអំណោយណាមួយឡើយ កាលដែលទន្ទឹងចាំដោយចិត្តរំភើបនូវគ្រាដែលលោកយេស៊ូគ្រិស្តជាម្ចាស់របស់យើងនឹងត្រូវសម្ដែងឲ្យឃើញ។ ៨ ព្រះក៏នឹងធ្វើឲ្យអ្នករាល់គ្នារឹងមាំរហូតដល់ទីបញ្ចប់ ដើម្បីកុំឲ្យអ្នករាល់គ្នាមានកន្លែងចាប់កំហុសបាននៅថ្ងៃរបស់លោកយេស៊ូគ្រិស្តជាម្ចាស់របស់យើង។ ៩ ព្រះគឺស្មោះត្រង់ គឺលោកហើយដែលបានហៅអ្នករាល់គ្នាឲ្យមករួមចំណែកជាមួយនឹងបុត្ររបស់លោក គឺលោកយេស៊ូគ្រិស្តជាម្ចាស់របស់យើង។
១០ ឥឡូវនេះ បងប្អូនអើយ តាមរយៈនាមរបស់លោកយេស៊ូគ្រិស្តជាម្ចាស់របស់យើង ខ្ញុំសូមបំផុសទឹកចិត្តអ្នកទាំងអស់គ្នាឲ្យនិយាយដូចគ្នាទាំងអស់ ហើយមិនត្រូវមានការបែកបាក់ក្នុងចំណោមអ្នករាល់គ្នាឡើយ តែត្រូវមានគំនិតឯកភាព និងមានរបៀបគិតគូរតែមួយ។ ១១ បងប្អូនខ្ញុំអើយ ព្រោះមានមនុស្សពីក្រុមគ្រួសារខ្លូអេប្រាប់ខ្ញុំអំពីអ្នករាល់គ្នាថា មានការទាស់ទែងក្នុងចំណោមអ្នករាល់គ្នា។ ១២ ខ្ញុំចង់និយាយថា អ្នករាល់គ្នាម្នាក់ៗពោលថា៖ «ខ្ញុំកាន់តាមប៉ូល» «តែខ្ញុំកាន់តាមអាប៉ូឡុស» «ឯខ្ញុំកាន់តាមកេផាស» «តែខ្ញុំកាន់តាមគ្រិស្ត»។ ១៣ គ្រិស្តបែកសាមគ្គីហើយ។ គេមិនបានព្យួរ* ប៉ូលដើម្បីអ្នករាល់គ្នាទេ មែនទេ? ឬក៏អ្នករាល់គ្នាបានទទួលការជ្រមុជទឹក* ក្នុងនាមប៉ូល? ១៤ ខ្ញុំមានអំណរគុណដែលខ្ញុំមិនបានជ្រមុជទឹកឲ្យអ្នកណាម្នាក់ក្នុងចំណោមអ្នករាល់គ្នា ក្រៅពីគ្រីស្ពូសនិងកៃយុស ១៥ ដើម្បីកុំឲ្យអ្នកណានិយាយថាអ្នករាល់គ្នាបានទទួលការជ្រមុជទឹកក្នុងនាមខ្ញុំ។ ១៦ ខ្ញុំក៏បានជ្រមុជទឹកឲ្យពួកអ្នកផ្ទះស្ទេផាណាសដែរ។ ក្រៅពីនោះ ខ្ញុំមិនដឹងថាខ្ញុំបានជ្រមុជទឹកឲ្យអ្នកណាទៀតទេ។ ១៧ ព្រោះគ្រិស្តមិនបានចាត់ខ្ញុំទៅជ្រមុជទឹកឲ្យគេឡើយ តែបានចាត់ខ្ញុំឲ្យទៅប្រកាសដំណឹងល្អវិញ មិនមែនដោយប្រើសម្ដីរបស់អ្នកប្រាជ្ញទេ ព្រោះបើធ្វើដូច្នេះនាំឲ្យបង្គោលទារុណកម្ម* របស់គ្រិស្តទៅជាឥតប្រយោជន៍។
១៨ ព្រោះអ្នកដែលកំពុងវិនាសចាត់ទុកការនិយាយអំពីបង្គោលទារុណកម្មថាជាការនិយាយផ្ដេសផ្ដាស តែយើងដែលកំពុងទទួលសេចក្ដីសង្គ្រោះចាត់ទុកការនោះជាឫទ្ធានុភាពរបស់ព្រះ។ ១៩ ព្រោះបទគម្ពីរចែងថា៖ «ខ្ញុំនឹងធ្វើឲ្យប្រាជ្ញារបស់ពួកអ្នកប្រាជ្ញសាបសូន្យទៅ ហើយចំណេះរបស់អ្នកចេះដឹង ខ្ញុំនឹងច្រានចោល»។ ២០ តើអ្នកប្រាជ្ញ អ្នកជំនាញខាងច្បាប់* និងអ្នកជជែកវែកញែកនៃពិភពលោកនេះនៅឯណា? ព្រះបានបង្ហាញឲ្យឃើញថាប្រាជ្ញារបស់ពិភពលោកនេះ ជាអ្វីដែលផ្ដេសផ្ដាសទៅវិញ មែនទេ? ២១ ព្រោះទោះជាពិភពលោកមិនបានស្គាល់ព្រះដោយប្រាជ្ញារបស់ពួកគេក៏ដោយ ក៏ព្រះបានយល់ដោយប្រាជ្ញារបស់លោកថាជាការល្អដែលសង្គ្រោះពួកអ្នកជឿ តាមរយៈការផ្សព្វផ្សាយអ្វីដែលផ្ដេសផ្ដាស។
២២ ព្រោះជនជាតិយូដាសុំសញ្ញាសម្គាល់ ហើយជនជាតិក្រិចស្វែងរកប្រាជ្ញា ២៣ តែយើងផ្សព្វផ្សាយអំពីគ្រិស្តដែលបានត្រូវព្យួរ ជាអ្វីដែលធ្វើឲ្យជនជាតិយូដាជំពប់ដួល តែជនជាតិដទៃចាត់ទុកជាការនិយាយផ្ដេសផ្ដាស ២៤ ក៏ប៉ុន្តែចំពោះជនជាតិយូដានិងជនជាតិក្រិចដែលបានត្រូវហៅ គ្រិស្តជាឫទ្ធានុភាពរបស់ព្រះ និងជាប្រាជ្ញារបស់ព្រះ។ ២៥ ការរបស់ព្រះដែលគេចាត់ទុកថាផ្ដេសផ្ដាស គឺប្រកបដោយប្រាជ្ញាវាងវៃជាងមនុស្ស ហើយការរបស់ព្រះដែលគេចាត់ទុកថាខ្សោយ គឺខ្លាំងជាងមនុស្ស។
២៦ ព្រោះបងប្អូនអើយ អ្នករាល់គ្នាអាចឃើញក្នុងករណីរបស់អ្នករាល់គ្នាថា ព្រះមិនបានហៅមនុស្សជាច្រើនដែលជាអ្នកប្រាជ្ញតាមទស្សនៈមនុស្ស ឬជាអ្នកមានអំណាច ឬក៏ជាអ្នកដែលបានកើតក្នុងវង្សត្រកូលខ្ពង់ខ្ពស់ឡើយ ២៧ តែព្រះបានជ្រើសរើសមនុស្សដែលពិភពលោកចាត់ទុកថាល្ងង់ខ្លៅ ដើម្បីលោកអាចធ្វើឲ្យអ្នកប្រាជ្ញអាម៉ាស់មុខ ហើយព្រះក៏បានជ្រើសរើសមនុស្សដែលពិភពលោកចាត់ទុកថាទន់ខ្សោយ ដើម្បីលោកអាចធ្វើឲ្យអ្នកខ្លាំងពូកែអាម៉ាស់មុខ ២៨ ព្រះបានជ្រើសរើសអ្វីដែលពិភពលោកចាត់ទុកថាអាប់ឱន អ្វីដែលគេមើលងាយ និងអ្វីដែលគេចាត់ទុកថាគ្មានតម្លៃសោះ ដើម្បីលោកអាចធ្វើឲ្យអ្វីដែលគេចាត់ទុកថាសំខាន់ទៅជាអសារឥតការវិញ ២៩ ដើម្បីកុំឲ្យមនុស្សណាម្នាក់មានហេតុអួតខ្លួននៅចំពោះព្រះឡើយ។ ៣០ ប៉ុន្តែគឺដោយសារព្រះហើយដែលអ្នករាល់គ្នាគឺជាអ្នកកាន់តាមគ្រិស្តយេស៊ូ។ ចំពោះយើង លោកបានទៅជាប្រាជ្ញាពីព្រះ ក៏បានទៅជាសេចក្ដីសុចរិត សេចក្ដីបរិសុទ្ធ និងការរំដោះដោយការលោះ ៣១ ដើម្បីឲ្យបានដូចបទគម្ពីរដែលចែងថា៖ «អ្នកណាដែលអួត ចូរឲ្យអ្នកនោះអួតពីព្រះយេហូវ៉ា»។
២ ដូច្នេះ បងប្អូនអើយ ពេលដែលខ្ញុំមកឯអ្នករាល់គ្នា ខ្ញុំមិនបានមកដើម្បីធ្វើឲ្យអ្នករាល់គ្នាកោតស្ងើចនឹងសម្ដី ឬប្រាជ្ញាក្នុងការប្រកាសប្រាប់អ្នករាល់គ្នាអំពីអាថ៌កំបាំងដ៏ពិសិដ្ឋឡើយ។ ២ ព្រោះខ្ញុំបានសម្រេចចិត្តបញ្ជាក់ប្រាប់អ្នករាល់គ្នាអំពីលោកយេស៊ូគ្រិស្តតែប៉ុណ្ណោះ ជាពិសេសបញ្ជាក់ថាលោកបានត្រូវគេព្យួរ។* ៣ ហើយខ្ញុំបានមកឯអ្នករាល់គ្នាទាំងទន់ខ្សោយ ភ័យខ្លាច ព្រមទាំងញាប់ញ័រជាខ្លាំង ៤ ហើយសម្ដីរបស់ខ្ញុំ និងអ្វីដែលខ្ញុំផ្សព្វផ្សាយ មិនមែនជាពាក្យបញ្ចុះបញ្ចូលដែលប្រកបទៅដោយប្រាជ្ញាទេតែជាការសម្ដែងនៃសកម្មពល* និងឫទ្ធានុភាពរបស់ព្រះវិញ ៥ ដើម្បីឲ្យអ្នករាល់គ្នាមានជំនឿលើឫទ្ធានុភាពរបស់ព្រះ មិនមែនលើប្រាជ្ញារបស់មនុស្សឡើយ។
៦ ក្នុងចំណោមអ្នកដែលមានចិត្តគំនិតចាស់ទុំក្នុងការគោរពប្រណិប័តន៍ព្រះ យើងនិយាយអំពីប្រាជ្ញា ប៉ុន្តែមិនមែនប្រាជ្ញានៃរបៀបរបបពិភពលោកនេះទេ ក៏មិនមែនប្រាជ្ញារបស់ពួកអ្នកគ្រប់គ្រងនៃពិភពលោកនេះដែលនឹងវិនាសសាបសូន្យទៅដែរ។ ៧ ប៉ុន្តែយើងនិយាយអំពីប្រាជ្ញារបស់ព្រះដែលបានត្រូវសឲ្យឃើញក្នុងអាថ៌កំបាំងដ៏ពិសិដ្ឋ គឺប្រាជ្ញាកំបាំង ដែលព្រះបានកំណត់ទុកជាមុន តាំងពីមិនទាន់មានរបៀបរបបពិភពលោកនៅឡើយ ដើម្បីឲ្យយើងទទួលសិរីរុងរឿង។ ៨ គ្មានអ្នកគ្រប់គ្រងណាម្នាក់នៃពិភពលោកនេះដែលបានស្គាល់ប្រាជ្ញានោះទេ ព្រោះប្រសិនបើពួកគេបានស្គាល់មែន នោះពួកគេមិនបានព្យួរលោកម្ចាស់ដែលប្រកបទៅដោយសិរីរុងរឿងឡើយ។ ៩ ប៉ុន្តែដូចបទគម្ពីរចែងថា៖ «ភ្នែកមិនធ្លាប់ឃើញ ត្រចៀកមិនធ្លាប់ឮ ហើយចិត្តរបស់មនុស្សមិនដែលនឹកស្មានដល់អ្វីដែលព្រះបានរៀបចំទុកសម្រាប់អ្នកដែលស្រឡាញ់លោក»។ ១០ ព្រោះព្រះបានបើកបង្ហាញការទាំងនោះដល់យើងតាមរយៈសកម្មពលរបស់លោក ព្រោះសកម្មពលរបស់លោកស្ទង់មើលអ្វីៗទាំងអស់ សូម្បីតែសេចក្ដីជ្រាលជ្រៅរបស់ព្រះក៏ដោយ។
១១ ព្រោះគ្មានមនុស្សណាដឹងគំនិតរបស់បុគ្គលម្នាក់ទៀតឡើយ មានតែចិត្ត* របស់បុគ្គលម្នាក់នោះប៉ុណ្ណោះដែលដឹង មែនទេ? ដូចគ្នាដែរ គ្មានអ្នកណាដឹងអំពីគំនិតរបស់ព្រះទេ មានតែសកម្មពលរបស់លោកប៉ុណ្ណោះដែលដឹង។ ១២ ឯយើងមិនបានទទួលចិត្តគំនិតរបស់ពិភពលោកនេះទេ តែបានទទួលសកម្មពលពីព្រះ ដើម្បីឲ្យយើងដឹងអ្វីដែលព្រះបានមេត្ដាផ្ដល់ឲ្យយើង។ ១៣ យើងក៏និយាយការទាំងនេះដែរ មិនមែនដោយប្រើពាក្យដែលយើងបានរៀនពីប្រាជ្ញារបស់មនុស្សទេ តែដោយប្រើពាក្យដែលយើងបានរៀនពីសកម្មពលរបស់ព្រះវិញ ដោយប្រើពាក្យដែលយើងទទួលតាមរយៈសកម្មពលរបស់ព្រះ ដើម្បីពន្យល់អំពីរឿងដែលទាក់ទងនឹងព្រះ។
១៤ ប៉ុន្តែមនុស្សដែលឲ្យសេចក្ដីប៉ងប្រាថ្នារបស់ខ្លួនដឹកនាំគំនិត មិនទទួលអ្វីៗពីសកម្មពលរបស់ព្រះទេ ព្រោះគេចាត់ទុកអ្វីៗទាំងនោះថាជារឿងផ្ដេសផ្ដាស ហើយគេមិនអាចស្គាល់អ្វីៗទាំងនោះបានឡើយ ពីព្រោះគេត្រូវតែមានសកម្មពលរបស់ព្រះទើបអាចយល់បានត្រឹមត្រូវ។ ១៥ ក៏ប៉ុន្តែមនុស្សដែលឲ្យសកម្មពលរបស់ព្រះដឹកនាំគំនិត អាចយល់ត្រឹមត្រូវអំពីអ្វីៗទាំងអស់ តែគ្មានមនុស្សណាម្នាក់អាចយល់ត្រឹមត្រូវអំពីអ្នកនោះបានឡើយ។ ១៦ ព្រោះ«តើអ្នកណាស្គាល់គំនិតរបស់ព្រះយេហូវ៉ា ដើម្បីអាចណែនាំលោកបាន?» តែយើងមានចិត្តគំនិតរបស់គ្រិស្តវិញ។
៣ ដូច្នេះ បងប្អូនអើយ ខ្ញុំមិនអាចនិយាយទៅកាន់បងប្អូនដូចនិយាយទៅកាន់មនុស្សដែលឲ្យសកម្មពល* របស់ព្រះដឹកនាំគំនិតទេ តែខ្ញុំត្រូវនិយាយទៅកាន់បងប្អូនដូចនិយាយទៅកាន់មនុស្សដែលមានគំនិតដូចពិភពលោកនេះ គឺអ្នកដែលជាកូនខ្ចីក្នុងគ្រិស្ត។ ២ ខ្ញុំបានឲ្យទឹកដោះដល់អ្នករាល់គ្នា មិនបានឲ្យអាហាររឹងទេ ព្រោះអ្នករាល់គ្នាទទួលមិនបាន។ តាមពិត ឥឡូវនេះ អ្នករាល់គ្នានៅតែទទួលមិនបាន ៣ ព្រោះអ្នករាល់គ្នានៅតែមានគំនិតដូចពិភពលោកនេះ។ ក្នុងចំណោមអ្នករាល់គ្នាមានសេចក្ដីច្រណែននិងការឈ្លោះប្រកែកគ្នា ដូច្នេះ អ្នករាល់គ្នាមានគំនិតដូចពិភពលោកនេះ ហើយកំពុងប្រព្រឹត្តដូចមនុស្សខាងពិភពលោកនេះដែរ មែនទេ? ៤ ព្រោះពេលដែលមានអ្នកណានិយាយថា៖ «ខ្ញុំកាន់តាមប៉ូល» តែម្នាក់ទៀតនិយាយថា៖ «ខ្ញុំកាន់តាមអាប៉ូឡុស» នោះអ្នករាល់គ្នាគឺដូចមនុស្សឯទៀត មែនទេ?
៥ ដូច្នេះ តើអាប៉ូឡុសជាអ្វី? ហើយប៉ូលជាអ្វី? ត្រឹមតែជាអ្នកបម្រើ ដែលបានបំពេញកិច្ចការដែលលោកម្ចាស់របស់យើងបានផ្ដល់ឲ្យ ហើយជាអ្នកដែលបានត្រូវប្រើដើម្បីនាំឲ្យអ្នករាល់គ្នាទៅជាអ្នកជឿ។ ៦ ខ្ញុំជាអ្នកដាំ អាប៉ូឡុសជាអ្នកស្រោច តែព្រះបានធ្វើឲ្យដុះលូតលាស់ ៧ ដូច្នេះ អ្នកដាំនិងអ្នកស្រោចមិនមែនជាអ្នកដែលសំខាន់ទេ គឺព្រះវិញដែលធ្វើឲ្យដុះឡើង។ ៨ ឯអ្នកដាំនិងអ្នកស្រោចរួមគ្នាតែមួយ តែពួកគេម្នាក់ៗនឹងទទួលរង្វាន់តាមការខំប្រឹងរបស់ពួកគេរៀងៗខ្លួន។ ៩ ពីព្រោះយើងជាអ្នករួមការងារជាមួយនឹងព្រះ។ អ្នករាល់គ្នាជាវាលកំពុងដាំដុះរបស់ព្រះ ក៏ជាសំណង់របស់ព្រះ។
១០ ខ្ញុំបានចាក់គ្រឹះ ដូចជាមេជាងដ៏ជំនាញ ស្របទៅតាមគុណដ៏វិសេសលើសលប់របស់ព្រះដែលបានត្រូវផ្ដល់ឲ្យខ្ញុំ ប៉ុន្តែមានអ្នកផ្សេងទៀតសង់លើគ្រឹះនោះ។ តែពួកគេម្នាក់ៗត្រូវប្រយ័ត្នអំពីរបៀបដែលពួកគេសង់លើគ្រឹះនោះ។ ១១ ព្រោះគ្មានមនុស្សណាម្នាក់អាចចាក់គ្រឹះមួយផ្សេងទៀត ក្រៅពីគ្រឹះដែលបានត្រូវចាក់រួចហើយនោះទេ ពោលគឺលោកយេស៊ូគ្រិស្ត។ ១២ ប្រសិនបើអ្នកណាប្រើមាស ប្រាក់ ថ្មប្រណីតៗ ឈើ ចំបើង ឬជញ្ជ្រាំងដើម្បីសង់លើគ្រឹះនោះ ១៣ ស្នាដៃរបស់ពួកគេម្នាក់ៗនឹងត្រូវសឲ្យឃើញច្បាស់ ព្រោះថ្ងៃនោះនឹងបង្ហាញឲ្យឃើញដោយភ្លើង ហើយភ្លើងនោះនឹងបញ្ជាក់គុណភាពនៃស្នាដៃរបស់ពួកគេម្នាក់ៗ។ ១៤ ប្រសិនបើស្នាដៃរបស់អ្នកណាដែលបានត្រូវសង់លើគ្រឹះនោះធន់នៅ អ្នកនោះនឹងទទួលរង្វាន់ ១៥ ប្រសិនបើស្នាដៃរបស់អ្នកណាឆេះអស់ទៅ អ្នកនោះនឹងខាត តែខ្លួនអ្នកនោះនឹងទទួលសេចក្ដីសង្គ្រោះ ប៉ុន្តែនោះនឹងដូចជាឆ្លងកាត់ភ្លើង។
១៦ តើអ្នករាល់គ្នាមិនដឹងទេឬថា អ្នករាល់គ្នាជាវិហាររបស់ព្រះ ហើយសកម្មពលរបស់ព្រះស្ថិតនៅក្នុងអ្នករាល់គ្នា? ១៧ ប្រសិនបើអ្នកណាបំផ្លាញវិហាររបស់ព្រះ ព្រះនឹងបំផ្លាញអ្នកនោះ ព្រោះវិហាររបស់ព្រះគឺបរិសុទ្ធ ហើយអ្នករាល់គ្នាជាវិហាររបស់ព្រះ។
១៨ កុំបញ្ឆោតខ្លួនឡើយ៖ ប្រសិនបើអ្នកណាក្នុងចំណោមអ្នករាល់គ្នាគិតថាខ្លួនមានប្រាជ្ញានៅក្នុងរបៀបរបបពិភពលោកនេះ ចូរឲ្យអ្នកនោះទៅជាអ្នកល្ងង់ខ្លៅ ដើម្បីឲ្យគាត់ទៅជាអ្នកមានប្រាជ្ញាវិញ។ ១៩ ពីព្រោះប្រាជ្ញារបស់ពិភពលោកនេះជាអ្វីដែលផ្ដេសផ្ដាសចំពោះព្រះ ព្រោះបទគម្ពីរចែងថា៖ «លោកបណ្ដាលឲ្យពួកអ្នកប្រាជ្ញជាប់អន្ទាក់របស់ខ្លួន»។ ២០ ហើយមួយទៀតថា៖ «ព្រះយេហូវ៉ាជ្រាបថា ការវែកញែករបស់ពួកអ្នកប្រាជ្ញគឺឥតប្រយោជន៍»។ ២១ ដូច្នេះ កុំឲ្យអ្នកណាអួតអំពីមនុស្សណាម្នាក់ឡើយ ព្រោះអ្វីៗទាំងអស់ជារបស់អ្នករាល់គ្នា ២២ ទោះជាប៉ូល អាប៉ូឡុស កេផាស ពិភពលោកនេះ ជីវិត សេចក្ដីស្លាប់ អ្វីៗនៅគ្រាឥឡូវនេះ ឬអ្វីៗនៅគ្រាខាងមុខក៏ដោយ អ្វីៗទាំងអស់ជារបស់អ្នករាល់គ្នា ២៣ រីឯអ្នករាល់គ្នាជារបស់គ្រិស្ត ឯគ្រិស្តជារបស់ព្រះ។
៤ មនុស្សត្រូវរាប់យើងជាអ្នកដែលនៅក្រោមបង្គាប់* គ្រិស្ត និងជាអ្នកបម្រើដែលបានត្រូវតែងតាំងឲ្យមើលការខុសត្រូវលើអាថ៌កំបាំងដ៏ពិសិដ្ឋរបស់ព្រះ។ ២ ម្យ៉ាងទៀត ក្នុងករណីនេះ អ្នកបម្រើដែលទទួលការតែងតាំងឲ្យមើលការខុសត្រូវនោះ ត្រូវតែជាអ្នកស្មោះត្រង់។ ៣ ចំពោះខ្ញុំ ការដែលអ្នករាល់គ្នា ឬសាលាក្ដីណាមួយរបស់មនុស្សចង់វិនិច្ឆ័យខ្ញុំ នោះជារឿងតូចតាចទេ។ សូម្បីតែខ្ញុំក៏មិនវិនិច្ឆ័យខ្លួនដែរ។ ៤ ព្រោះខ្ញុំមិនឃើញថាខ្ញុំបានធ្វើអ្វីខុសឡើយ។ ប៉ុន្តែ នេះមិនបញ្ជាក់ថាខ្ញុំជាមនុស្សសុចរិតទេ តែអ្នកដែលវិនិច្ឆ័យខ្ញុំគឺព្រះយេហូវ៉ា។ ៥ ដូច្នេះ កុំវិនិច្ឆ័យអ្វីសោះមុនពេលកំណត់ ដរាបដល់លោកម្ចាស់មកដល់។ លោកនឹងបំភ្លឺឲ្យឃើញអ្វីដែលនៅកំបាំងក្នុងទីងងឹត ក៏នឹងសឲ្យឃើញបំណងចិត្ត រួចមនុស្សម្នាក់ៗនឹងទទួលសេចក្ដីសរសើរពីព្រះ។
៦ បងប្អូនអើយ ខ្ញុំបាននិយាយការទាំងនេះដោយយកខ្លួនខ្ញុំនិងអាប៉ូឡុសជាឧទាហរណ៍ ជាប្រយោជន៍ដល់អ្នករាល់គ្នា ដើម្បីឲ្យរៀនគោលការណ៍ដែលថា៖ «កុំធ្វើលើសពីអ្វីដែលបានត្រូវសរសេរទុក» ដើម្បីកុំឲ្យអ្នករាល់គ្នាណាម្នាក់មានអំណួត ដោយចាត់ទុកអ្នកនេះថាប្រសើរជាងអ្នកនោះ។ ៧ ព្រោះតើអ្នកណាបានធ្វើឲ្យអ្នកខុសពីអ្នកឯទៀត? អ្វីៗដែលអ្នកមាន សុទ្ធតែជាអ្វីដែលអ្នកបានទទួល មែនទេ? ឥឡូវ បើអ្វីៗដែលអ្នកមាន ជាអ្វីដែលអ្នកបានទទួលមែន ហេតុអ្វីបានជាអ្នកអួតខ្លួនដូចជាមិនបានទទួលវិញ?
៨ តើអ្នករាល់គ្នាមានអ្វីសព្វគ្រប់ហើយឬ? អ្នករាល់គ្នាជាអ្នកមានហើយឬ? អ្នករាល់គ្នាបានចាប់ផ្ដើមគ្រប់គ្រងជាស្តេច ដោយគ្មានយើងឬ? ប្រាកដជាមិនដូច្នេះទេ ប៉ុន្តែបើអ្នករាល់គ្នាបានចាប់ផ្ដើមគ្រប់គ្រងជាស្តេចមែន ខ្ញុំអរណាស់ ព្រោះបើដូច្នោះ យើងក៏អាចចាប់ផ្ដើមគ្រប់គ្រងជាស្តេចជាមួយនឹងអ្នករាល់គ្នាដែរ។ ៩ ព្រោះតាមមើលទៅ ព្រះបាននាំយើងជាពួកសាវ័កចេញមកលើឆាកក្រោយគេបង្អស់ ដូចអ្នកដែលបានត្រូវកាត់ទោសប្រហារជីវិត ពីព្រោះយើងបានក្លាយទៅជាអ្វីសម្រាប់ឲ្យពិភពលោក បណ្ដាទេវតា និងមនុស្សលោកទស្សនា។ ១០ យើងត្រូវគេចាត់ទុកជាមនុស្សល្ងង់ខ្លៅដោយសារគ្រិស្ត តែអ្នករាល់គ្នាចាត់ទុកខ្លួនជាអ្នកដែលចេះពិចារណាដោយសារគ្រិស្ត យើងជាអ្នកទន់ខ្សោយ តែអ្នករាល់គ្នាជាអ្នកខ្លាំងក្លា អ្នករាល់គ្នាមានកេរ្ដិ៍ឈ្មោះល្អ តែយើងត្រូវគេមើលងាយ។ ១១ រហូតដល់ឥឡូវនេះ យើងនៅតែស្រេកឃ្លាន ខ្វះអ្វីសម្រាប់បិទបាំងកាយ ត្រូវគេធ្វើបាប គ្មានផ្ទះសម្បែង ១២ ហើយធ្វើការនឿយហត់ដោយដៃរបស់យើងផ្ទាល់។ កាលដែលត្រូវគេជេរប្រមាថ យើងជូនពរគេវិញ។ កាលដែលត្រូវគេបៀតបៀន យើងស៊ូទ្រាំ។ ១៣ កាលដែលយើងត្រូវគេបង្កាច់បង្ខូច យើងប្រើសម្ដីសប្បុរស។ យើងបានក្លាយទៅជាសំរាមរបស់ពិភពលោក និងកម្អែលនៃអ្វីៗទាំងអស់ រហូតដល់ឥឡូវនេះ។
១៤ ខ្ញុំសរសេរអ្វីៗទាំងនេះមកកាន់អ្នករាល់គ្នា មិនមែនដើម្បីធ្វើឲ្យអៀនខ្មាសទេ តែដើម្បីដាស់តឿនអ្នករាល់គ្នាដែលខ្ញុំចាត់ទុកជាកូនជាទីស្រឡាញ់។ ១៥ ព្រោះទោះជាអ្នករាល់គ្នាមានគ្រូ* ប្រហែលមួយម៉ឺននាក់ក្នុងគ្រិស្តក៏ដោយ ក៏អ្នករាល់គ្នាប្រាកដជាមិនមានឪពុកជាច្រើនទេ ព្រោះក្នុងគ្រិស្តយេស៊ូខ្ញុំបានទៅជាឪពុករបស់អ្នករាល់គ្នាតាមរយៈដំណឹងល្អ។ ១៦ ដូច្នេះ សូមអ្នករាល់គ្នាយកតម្រាប់តាមខ្ញុំ។ ១៧ ហេតុនេះខ្ញុំនឹងចាត់ធីម៉ូថេឲ្យមកឯអ្នករាល់គ្នា ព្រោះគាត់ជាកូនដ៏ស្មោះត្រង់និងជាទីស្រឡាញ់របស់ខ្ញុំក្នុងលោកម្ចាស់។ គាត់នឹងរំលឹកអ្នករាល់គ្នាអំពីវិធីផ្សេងៗដែលខ្ញុំប្រើក្នុងកិច្ចបម្រើគ្រិស្តយេស៊ូ ដូចខ្ញុំបង្រៀនក្នុងក្រុមជំនុំទាំងឡាយនៅគ្រប់ទីកន្លែង។
១៨ អ្នកខ្លះអួតខ្លួន ហាក់ដូចជាខ្ញុំនឹងមិនមកឯអ្នករាល់គ្នាទេ។ ១៩ ប៉ុន្តែមិនយូរទៀត ខ្ញុំនឹងមកឯអ្នករាល់គ្នាមែន ប្រសិនបើស្របតាមបំណងប្រាថ្នារបស់ព្រះយេហូវ៉ា ហើយពេលនោះខ្ញុំនឹងស្គាល់ឫទ្ធានុភាពរបស់ពួកអ្នកដែលអួតខ្លួន មិនមែនស្គាល់សម្ដីរបស់ពួកគេទេ។ ២០ ព្រោះរាជាណាចក្ររបស់ព្រះមិនអាស្រ័យលើសម្ដីទេ តែអាស្រ័យលើឫទ្ធានុភាព។ ២១ តើអ្នករាល់គ្នាចង់បានមួយណា? តើចង់ឲ្យខ្ញុំមកឯអ្នករាល់គ្នាដោយមានរំពាត់? ឬមកដោយមានសេចក្ដីស្រឡាញ់និងចិត្ត* ស្លូតបូត?
៥ តាមពិត គេរាយការណ៍ប្រាប់ខ្ញុំថា មានអំពើប្រាសចាកសីលធម៌ខាងផ្លូវភេទ* ក្នុងចំណោមអ្នករាល់គ្នា ហើយជាអំពើដែលសូម្បីតែអ្នកមិនជឿ* ក៏មិនប្រព្រឹត្តដែរ គឺ បុរសម្នាក់បានរួមរស់ជាមួយនឹងប្រពន្ធរបស់ឪពុកគាត់។ ២ តើអ្នករាល់គ្នាអួតខ្លួនឬ? តើមិនគួរកើតទុក្ខវិញ ហើយដកបុរសដែលបានប្រព្រឹត្តអំពើនេះចេញពីចំណោមអ្នករាល់គ្នាទេឬ? ៣ ទោះជាខ្លួនខ្ញុំមិននៅទីនោះក៏ដោយ តែចិត្ត* ខ្ញុំនៅទីនោះ ហើយខ្ញុំបានវិនិច្ឆ័យបុរសដែលបានប្រព្រឹត្តអំពើនេះរួចហើយ ហាក់ដូចជាខ្ញុំនៅទីនោះដែរ។ ៤ ដូច្នេះ ក្នុងនាមលោកម្ចាស់យេស៊ូ ពេលដែលអ្នករាល់គ្នាជួបជុំគ្នា ដោយមានចិត្តគំនិតរបស់ខ្ញុំនិងឫទ្ធានុភាពរបស់លោកយេស៊ូជាម្ចាស់របស់យើង ៥ អ្នករាល់គ្នាត្រូវប្រគល់បុរសបែបនេះទៅសាថាន* ដើម្បីឲ្យអ្នករាល់គ្នាបំផ្លាញឥទ្ធិពលខុសឆ្គង* * នៃបុរសនេះ ដើម្បីរក្សាការពារចិត្តគំនិតរបស់ក្រុមជំនុំ ក្នុងអំឡុងថ្ងៃលោកម្ចាស់។
៦ ហេតុដែលអ្នករាល់គ្នាអួតខ្លួនគឺមិនសមរម្យសោះ តើអ្នករាល់គ្នាមិនដឹងទេឬថា ដំបែតែបន្ដិចធ្វើឲ្យដុំម្សៅទាំងមូលដោរឡើង? ៧ ចូរជម្រះដំបែចាស់ចេញ ដើម្បីឲ្យអ្នករាល់គ្នាទៅជាដុំម្សៅថ្មី ដោយសារអ្នករាល់គ្នាគ្មានដំបែ។ ព្រោះគ្រិស្តដែលជាកូនចៀមបុណ្យរំលងរបស់យើងបានត្រូវបូជាហើយ។ ៨ ហេតុនេះ ចូរយើងធ្វើបុណ្យនោះ មិនមែនដោយដំបែចាស់ ឬដោយដំបែជាសេចក្ដីអាក្រក់និងអំពើទុច្ចរិតទេ ប៉ុន្តែដោយនំឥតដំបែជាសេចក្ដីស្មោះអស់ពីចិត្តនិងសេចក្ដីពិត។
៩ ក្នុងសំបុត្ររបស់ខ្ញុំ ខ្ញុំបានសរសេរប្រាប់អ្នករាល់គ្នាថា ឈប់ចូលលាយឡំជាមួយនឹងអ្នកដែលប្រព្រឹត្តអំពើប្រាសចាកសីលធម៌ខាងផ្លូវភេទ ១០ នេះមិនមានន័យថាឈប់ចូលលាយឡំជាមួយនឹងមនុស្សទាំងអស់ក្នុងពិភពលោកនេះ ដែលប្រព្រឹត្តអំពើប្រាសចាកសីលធម៌ខាងផ្លូវភេទ អ្នកលោភលន់ អ្នកគំរាមយកទ្រព្យ ឬអ្នកគោរពបូជារូបព្រះនោះទេ។ ព្រោះបើធ្វើដូច្នោះមានន័យថាអ្នករាល់គ្នានឹងត្រូវចេញពីពិភពលោកនេះ។ ១១ ប៉ុន្តែឥឡូវនេះ ខ្ញុំសរសេរមកអ្នករាល់គ្នាឲ្យឈប់ចូលលាយឡំជាមួយនឹងអ្នកណាដែលមានឈ្មោះថាជាបងប្អូនរួមជំនឿ ដែលជាអ្នកប្រព្រឹត្តអំពើប្រាសចាកសីលធម៌ខាងផ្លូវភេទ ជាអ្នកលោភលន់ អ្នកគោរពបូជារូបព្រះ អ្នកជេរប្រមាថ អ្នកប្រមឹកស្រា អ្នកគំរាមយកទ្រព្យ សូម្បីតែបរិភោគ ក៏កុំបរិភោគជាមួយនឹងមនុស្សបែបនោះដែរ។ ១២ ព្រោះតើការវិនិច្ឆ័យអ្នកក្រៅទាក់ទងអ្វីនឹងខ្ញុំ? អ្នករាល់គ្នាវិនិច្ឆ័យអ្នកដែលនៅក្នុងក្រុមជំនុំ ១៣ ហើយព្រះវិនិច្ឆ័យអ្នកក្រៅ មែនទេ? «ចូរដកមនុស្សទុច្ចរិតចេញពីចំណោមអ្នករាល់គ្នា»។
៦ ក្នុងចំណោមអ្នករាល់គ្នា ពេលដែលអ្នកណាម្នាក់មានរឿងអ្វីប្ដឹងម្នាក់ទៀត ហេតុអ្វីអ្នករាល់គ្នាហ៊ានទៅតុលាការដើម្បីឈរនៅមុខមនុស្សមិនសុចរិត ជាជាងនៅមុខពួកអ្នកបរិសុទ្ធ? ២ ឬតើអ្នករាល់គ្នាមិនដឹងទេឬថា ពួកអ្នកបរិសុទ្ធនឹងវិនិច្ឆ័យពិភពលោក? ហើយប្រសិនបើអ្នករាល់គ្នានឹងវិនិច្ឆ័យពិភពលោក តើអ្នករាល់គ្នាមិនសមនឹងជំនុំជម្រះរឿងតូចតាចទេឬ? ៣ តើអ្នករាល់គ្នាមិនដឹងទេថា យើងនឹងវិនិច្ឆ័យពួកទេវតា? បើដូច្នេះ យើងគួរមានសមត្ថភាពវិនិច្ឆ័យរឿងរ៉ាវនៃជីវិតនេះដែរ។ ៤ ម្ល៉ោះហើយ ប្រសិនបើអ្នករាល់គ្នាមានរឿងរ៉ាវនៃជីវិតនេះដែលត្រូវជំនុំជម្រះ ហេតុអ្វីអ្នករាល់គ្នាជ្រើសរើសមនុស្សដែលមិនទទួលការគោរពពីក្រុមជំនុំឲ្យធ្វើជាចៅក្រម? ៥ ខ្ញុំនិយាយដូច្នេះដើម្បីធ្វើឲ្យអ្នករាល់គ្នាអៀនខ្មាស។ តើជាការពិតទេថា ក្នុងចំណោមអ្នករាល់គ្នាគ្មានអ្នកណាម្នាក់មានប្រាជ្ញា ដែលអាចវិនិច្ឆ័យរឿងរ៉ាវរវាងបងប្អូនខ្លួន? ៦ ផ្ទុយទៅវិញ បងប្អូនប្ដឹងបងប្អូនទៅតុលាការ ហើយឈរនៅមុខពួកអ្នកមិនជឿទៀត។
៧ ដោយសារអ្នករាល់គ្នាប្ដឹងផ្ដល់គ្នាដូច្នេះ នេះមានន័យថាអ្នករាល់គ្នាបានបរាជ័យទាំងស្រុង។ ហេតុអ្វីមិនសុខចិត្តទ្រាំអំពើអយុត្ដិធម៌នោះវិញ? ហេតុអ្វីមិនសុខចិត្តទ្រាំពេលមានគេបោកយកទ្រព្យ? ៨ ផ្ទុយទៅវិញ អ្នករាល់គ្នាប្រព្រឹត្តដោយអយុត្ដិធម៌ ហើយបោកយកទ្រព្យពីបងប្អូនរបស់អ្នកទៀត។
៩ ចុះតើអ្នករាល់គ្នាមិនដឹងទេឬថា មនុស្សមិនសុចរិតនឹងមិនទទួលរាជាណាចក្ររបស់ព្រះជាមត៌ក? កុំច្រឡំឲ្យសោះ។ អ្នកដែលប្រព្រឹត្តអំពើប្រាសចាកសីលធម៌ខាងផ្លូវភេទ* អ្នកដែលគោរពបូជារូបព្រះ អ្នកផិតក្បត់ បុរសដែលសុខចិត្តបម្រើបុរសឯទៀតខាងផ្លូវភេទ បុរសដែលរួមដំណេកជាមួយនឹងបុរសឯទៀត ១០ ពួកចោរ មនុស្សលោភលន់ អ្នកប្រមឹកស្រា អ្នកជេរប្រមាថ និងអ្នកគំរាមយកទ្រព្យ នឹងមិនទទួលរាជាណាចក្ររបស់ព្រះជាមត៌កឡើយ។ ១១ ក៏ប៉ុន្តែអ្នករាល់គ្នាខ្លះធ្លាប់ជាមនុស្សបែបនោះ។ តែអ្នករាល់គ្នាបានត្រូវលាងសម្អាត ក៏បានត្រូវញែកចេញជាបរិសុទ្ធ ហើយបានត្រូវប្រកាសថាជាមនុស្សសុចរិត ក្នុងនាមលោកយេស៊ូគ្រិស្តជាម្ចាស់របស់យើង និងដោយសកម្មពល* នៃព្រះរបស់យើង។
១២ មានច្បាប់ឲ្យខ្ញុំធ្វើអ្វីៗទាំងអស់ ប៉ុន្តែអ្វីៗទាំងអស់មិនមែនសុទ្ធតែមានប្រយោជន៍ទេ។ មានច្បាប់ឲ្យខ្ញុំធ្វើអ្វីៗទាំងអស់ ប៉ុន្តែខ្ញុំមិនព្រមបណ្ដោយឲ្យអ្វីក៏ដោយមានអំណាចលើខ្ញុំឡើយ។ ១៣ អាហារគឺសម្រាប់ក្រពះ ហើយក្រពះគឺសម្រាប់អាហារ ប៉ុន្តែព្រះនឹងធ្វើឲ្យទាំងក្រពះទាំងអាហារសាបសូន្យ។ ឯរូបកាយមិនមែនសម្រាប់អំពើប្រាសចាកសីលធម៌ខាងផ្លូវភេទទេ តែរូបកាយគឺសម្រាប់លោកម្ចាស់វិញ ហើយលោកម្ចាស់គឺសម្រាប់រូបកាយ។ ១៤ ប៉ុន្តែព្រះបានប្រោសលោកម្ចាស់ឲ្យរស់ឡើងវិញ ក៏នឹងប្រោសយើងឲ្យរស់ឡើងវិញពីសេចក្ដីស្លាប់ដែរ ដោយឫទ្ធានុភាពរបស់លោក។
១៥ តើអ្នករាល់គ្នាមិនដឹងទេឬថា រូបកាយរបស់អ្នករាល់គ្នាជាអវយវៈរបស់គ្រិស្ត? ដូច្នេះ តើខ្ញុំគួរយកអវយវៈរបស់គ្រិស្តចេញទៅធ្វើជាអវយវៈរបស់ស្រីពេស្យាឬ? មិនអាចទេ! ១៦ ចុះតើអ្នករាល់គ្នាមិនដឹងទេថា អ្នកណាដែលរួមជាមួយនឹងស្រីពេស្យាគឺជារូបកាយតែមួយជាមួយនឹងស្រីនោះ? ព្រោះលោកមានប្រសាសន៍ថា៖ «អ្នកទាំងពីរនឹងទៅជាសាច់ឈាមតែមួយ»។ ១៧ ប៉ុន្តែអ្នកណាដែលរួមជាមួយនឹងលោកម្ចាស់ អ្នកនោះរួមចិត្តគំនិត* តែមួយជាមួយនឹងលោក។ ១៨ ចូររត់ចេញពីអំពើប្រាសចាកសីលធម៌ខាងផ្លូវភេទ។ អំពើខុសឆ្គងឯទៀតដែលមនុស្សប្រព្រឹត្តគឺនៅខាងក្រៅរូបកាយ តែអ្នកដែលប្រព្រឹត្តអំពើប្រាសចាកសីលធម៌ខាងផ្លូវភេទ អ្នកនោះកំពុងធ្វើខុស* ចំពោះរូបកាយខ្លួន។ ១៩ ចុះតើមិនដឹងទេឬថា រូបកាយរបស់អ្នករាល់គ្នាជាវិហាររបស់សកម្មពលបរិសុទ្ធដែលស្ថិតនៅក្នុងអ្នករាល់គ្នា ជាអ្វីដែលអ្នករាល់គ្នាបានទទួលពីព្រះ? ម្យ៉ាងទៀត អ្នករាល់គ្នាមិនមែនជាម្ចាស់លើខ្លួនអ្នកទេ ២០ ព្រោះអ្នករាល់គ្នាបានត្រូវទិញក្នុងតម្លៃថ្លៃណាស់។ ដូច្នេះ ចូរសរសើរតម្កើងព្រះក្នុងរូបកាយរបស់អ្នករាល់គ្នា។
៧ ឥឡូវខ្ញុំសូមឆ្លើយនឹងអ្វីៗដែលអ្នករាល់គ្នាបានសរសេរទៅខ្ញុំ។ ប្រសិនបើបុរសម្នាក់មិនពាល់ស្ត្រីណាម្នាក់សោះ នោះជាការល្អប្រសើរ ២ ក៏ប៉ុន្តែដោយសារ មានអំពើប្រាសចាកសីលធម៌ខាងផ្លូវភេទកើតឡើងជារឿយៗ ចូរឲ្យបុរសម្នាក់ៗ មានប្រពន្ធរៀងៗខ្លួន ហើយស្ត្រីម្នាក់ៗមានប្ដីរៀងៗខ្លួនចុះ។ ៣ ប្ដីត្រូវបំពេញករណីយកិច្ចរបស់ខ្លួនចំពោះប្រពន្ធ* តែប្រពន្ធក៏ត្រូវបំពេញករណីយកិច្ចចំពោះប្ដីនាងដែរ។ ៤ ប្រពន្ធមិនមែនជាម្ចាស់លើរូបកាយរបស់ខ្លួនទេ តែគឺជាប្ដីវិញ។ ដូចគ្នាដែរ ប្ដីមិនមែនជាម្ចាស់លើរូបកាយរបស់ខ្លួនឡើយ តែគឺជាប្រពន្ធវិញ។ ៥ កុំបង្អត់គ្នាឡើយ លើកលែងតែបានព្រមព្រៀងគ្នា ហើយសម្រាប់តែមួយរយៈពេលប៉ុណ្ណោះ ដើម្បីឲ្យអ្នករាល់គ្នាអាចទុកពេលសម្រាប់អធិដ្ឋាន រួចមកអាចរួមគ្នាម្ដងទៀត កុំឲ្យសាថាន* បន្តល្បួងអ្នករាល់គ្នា ដោយសារអ្នករាល់គ្នាទប់ចិត្តមិនបាន។ ៦ ក៏ប៉ុន្តែខ្ញុំនិយាយដូច្នេះ ដើម្បីបើកសិទ្ធិឲ្យអ្នករាល់គ្នា មិនមែនជាការបង្គាប់ទេ។ ៧ តែខ្ញុំចង់ឲ្យបុរសទាំងអស់ដូចខ្ញុំដែរ។ ទោះជាយ៉ាងនោះក៏ដោយ មនុស្សម្នាក់ៗបានទទួលអំណោយរៀងៗខ្លួនពីព្រះ ម្នាក់បានយ៉ាងនេះ ម្នាក់ទៀតបានយ៉ាងនោះ។
៨ ឥឡូវខ្ញុំសូមប្រាប់អ្នកដែលគ្មានគូអាពាហ៍ពិពាហ៍ និងស្ត្រីមេម៉ាយថា ជាការល្អប្រសិនបើអ្នករាល់គ្នានៅដូចខ្ញុំ។ ៩ ប៉ុន្តែប្រសិនបើពួកគាត់ទប់ចិត្តមិនបាន ចូររៀបការទៅចុះ ព្រោះបើរៀបការ នោះគឺប្រសើរជាងមានតណ្ហារោលរាល។
១០ ចំពោះអ្នកដែលបានរៀបការហើយ ខ្ញុំសូមណែនាំ តាមពិត មិនមែនខ្ញុំទេ គឺជាលោកម្ចាស់ទេដែលណែនាំថា ប្រពន្ធមិនគួរចុះចោលប្ដីឡើយ។ ១១ ប៉ុន្តែប្រសិនបើនាងចុះចោលប្ដីមែន នាងមិនត្រូវរៀបការទៀតឡើយ ឬមួយក៏នាងត្រូវរកជានឹងប្ដីវិញ។ ឯប្ដីមិនគួរចុះចោលប្រពន្ធឡើយ។
១២ ប៉ុន្តែចំពោះអ្នកឯទៀត មិនមែនលោកម្ចាស់ប្រាប់ទេ តែខ្ញុំសូមប្រាប់ថា៖ ប្រសិនបើបងប្រុសណាម្នាក់មានប្រពន្ធដែលមិនមែនជាអ្នកជឿ ហើយនាងយល់ព្រមរួមរស់ជាមួយនឹងគាត់ បងប្រុសនោះមិនត្រូវចុះចោលនាងឡើយ ១៣ ហើយស្ត្រីណាមានប្ដី ដែលមិនមែនជាអ្នកជឿ តែគាត់យល់ព្រមរួមរស់ជាមួយនឹងនាង នោះនាងមិនត្រូវចុះចោលប្ដីឡើយ។ ១៤ ព្រោះប្ដីដែលមិនមែនជាអ្នកជឿបានត្រូវចាត់ទុកជាបរិសុទ្ធដោយសារប្រពន្ធ ឯប្រពន្ធដែលមិនមែនជាអ្នកជឿបានត្រូវចាត់ទុកជាបរិសុទ្ធដោយសារប្ដី បើមិនដូច្នេះ កូនរបស់អ្នករាល់គ្នានឹងត្រូវចាត់ទុកជាស្មោកគ្រោក តែឥឡូវកូនរបស់អ្នករាល់គ្នាគឺបរិសុទ្ធ។ ១៥ ប៉ុន្តែប្រសិនបើគូដែលមិនមែនជាអ្នកជឿចុះចោល ឲ្យអ្នកនោះទៅចុះ។ ក្នុងករណីនេះ បងប្រុសឬបងស្រីនោះគ្មានកាតព្វកិច្ចចំពោះអ្នកនោះទេ តែព្រះបានផ្ដល់សេចក្ដីសុខសាន្តឲ្យអ្នករាល់គ្នា។ ១៦ ព្រោះប្រពន្ធអើយ នាងប្រហែលជានឹងសង្គ្រោះប្ដីក៏មិនដឹង ឬប្ដីអើយ អ្នកប្រហែលជានឹងសង្គ្រោះប្រពន្ធក៏មិនដឹង។
១៧ ចូរម្នាក់ៗរក្សាសភាពរបស់ខ្លួន ឲ្យដូចចំណែកដែលព្រះយេហូវ៉ាបានផ្ដល់ឲ្យពេលដែលលោកបានហៅ។ ខ្ញុំបង្គាប់ក្រុមជំនុំទាំងឡាយឲ្យធ្វើដូច្នេះ ១៨ តើមានបុរសណាដែលបានត្រូវហៅក្រោយពីបានទទួលការកាត់ចុងស្បែក* ហើយឬ? បុរសនោះមិនត្រូវធ្វើឲ្យមានចុងស្បែកម្ដងទៀតទេ។ តើមានបុរសណាដែលបានត្រូវហៅដោយមិនទាន់ទទួលការកាត់ចុងស្បែក? បុរសនោះមិនត្រូវទទួលការកាត់ចុងស្បែកទេ។ ១៩ ការកាត់ចុងស្បែកគ្មានន័យទេ ឯការដែលមិនទទួលការកាត់ចុងស្បែកក៏គ្មានន័យដែរ តែការគោរពតាមបញ្ញត្ដិរបស់ព្រះទើបមានន័យ។ ២០ ចូរគ្រប់គ្នារក្សាសភាពដែលខ្លួនមានពេលដែលបានត្រូវហៅ។ ២១ តើអ្នកបានត្រូវហៅពេលដែលនៅជាខ្ញុំបម្រើឬ? កុំខ្វល់ចិត្តពីរឿងនោះឡើយ តែបើអ្នកអាចមានសេរីភាពបាន ចូរឆក់យកឱកាសនោះ។ ២២ ព្រោះក្នុងលោកម្ចាស់ អ្នកណាដែលបានត្រូវហៅពេលដែលនៅជាខ្ញុំបម្រើ អ្នកនោះទទួលសេរីភាព ហើយទៅជារបស់លោកម្ចាស់។ ដូចគ្នាដែរ អ្នកណាដែលបានត្រូវហៅពេលដែលមានសេរីភាព អ្នកនោះជាខ្ញុំបម្រើរបស់គ្រិស្ត។ ២៣ អ្នករាល់គ្នាបានត្រូវទិញក្នុងតម្លៃថ្លៃណាស់។ ចូរឈប់ធ្វើជាខ្ញុំបម្រើរបស់មនុស្ស។ ២៤ បងប្អូនអើយ ចូរគ្រប់គ្នារក្សាសភាពដែលខ្លួនមានពេលដែលបានត្រូវហៅ ព្រមទាំងរក្សាចំណងមិត្តភាពជាមួយនឹងព្រះ។
២៥ ចំពោះអ្នកដែលនៅលីវ* ខ្ញុំគ្មានបទបញ្ជាណាមួយពីលោកម្ចាស់ទេ ប៉ុន្តែខ្ញុំសូមជូនយោបល់របស់ខ្ញុំ ក្នុងនាមជាអ្នកដែលស្មោះត្រង់ ដោយសារបានទទួលសេចក្ដីមេត្ដាករុណាពីលោកម្ចាស់។ ២៦ ដូច្នេះ ដោយសារយើងកំពុងនៅក្នុងគ្រាលំបាក ខ្ញុំគិតថាជាការល្អប្រសើរ ប្រសិនបើបុរសរក្សាសភាពដែលខ្លួនមានឥឡូវនេះ។ ២៧ តើអ្នកមានប្រពន្ធហើយឬ? ចូរឈប់រកវិធីដោះខ្លួនចេញពីនាង។ តើអ្នកគ្មានប្រពន្ធឬ? ចូរឈប់រកប្រពន្ធ។ ២៨ ប៉ុន្តែប្រសិនបើអ្នករៀបការ នោះមិនមែនជាការខុសឆ្គង* ទេ។ ហើយប្រសិនបើអ្នកដែលនៅលីវ* រៀបការ នោះក៏មិនមែនជាការខុសឆ្គងដែរ។ ប៉ុន្តែអ្នកដែលរៀបការនឹងមានការលំបាកផ្សេងៗក្នុងជីវិត។* តែខ្ញុំកំពុងជួយអ្នករាល់គ្នាឲ្យរួចពីការលំបាកនោះ។
២៩ ម្យ៉ាងទៀត បងប្អូនអើយ ខ្ញុំសូមប្រាប់ថា នៅសល់ពេលវេលាតែបន្ដិចទេ។ ចាប់ពីពេលនេះទៅ អ្នកដែលមានប្រពន្ធត្រូវដូចជាអ្នកគ្មានប្រពន្ធវិញ ៣០ ហើយអ្នកដែលយំត្រូវដូចជាអ្នកដែលមិនយំ ឯអ្នកដែលត្រេកអរត្រូវដូចជាអ្នកដែលមិនត្រេកអរ ហើយអ្នកដែលទិញត្រូវដូចជាអ្នកដែលគ្មានអ្វីសោះ ៣១ ឯអ្នកដែលប្រើអ្វីៗពីពិភពលោកត្រូវដូចជាអ្នកដែលមិនប្រើប្រាស់ពេញលេញ ព្រោះស្ថានភាពពិភពលោកកំពុងប្រែប្រួល។ ៣២ ខ្ញុំចង់ឲ្យអ្នករាល់គ្នារួចពីកង្វល់។ បុរសដែលមិនរៀបការខ្វល់ខ្វាយអំពីការអ្វីដែលទាក់ទងនឹងកិច្ចបម្រើលោកម្ចាស់ ពោលគឺរបៀបដែលគាត់អាចធ្វើឲ្យលោកម្ចាស់ពេញចិត្ត។ ៣៣ ប៉ុន្តែបុរសដែលរៀបការហើយ ខ្វល់ខ្វាយអំពីអ្វីៗដែលទាក់ទងនឹងពិភពលោកនេះ ពោលគឺរបៀបដែលគាត់អាចធ្វើឲ្យប្រពន្ធពេញចិត្ត ៣៤ ហើយគាត់បានត្រូវបែងចែកជាពីរ។ ម្យ៉ាងទៀត ស្ត្រីដែលមិនរៀបការឬស្ត្រីក្រមុំខ្វល់ខ្វាយអំពីការអ្វីដែលទាក់ទងនឹងកិច្ចបម្រើលោកម្ចាស់ ដើម្បីឲ្យនាងបរិសុទ្ធទាំងចិត្ត* ទាំងកាយ។ ក៏ប៉ុន្តែស្ត្រីដែលរៀបការហើយ ខ្វល់ខ្វាយអំពីអ្វីៗដែលទាក់ទងនឹងពិភពលោកនេះ ពោលគឺរបៀបដែលនាងអាចធ្វើឲ្យប្ដីពេញចិត្ត។ ៣៥ ប៉ុន្តែខ្ញុំនិយាយដូចនេះដើម្បីជាប្រយោជន៍ដល់អ្នករាល់គ្នា មិនមែនដើម្បីឲ្យជាប់ចំណងទេ តែដើម្បីជំរុញចិត្តឲ្យធ្វើអ្វីដែលសមរម្យ ហើយអ្វីដែលផ្ដល់លទ្ធភាពឲ្យបម្រើលោកម្ចាស់ជានិច្ចដោយគ្មានអ្វីបំបែរអារម្មណ៍។
៣៦ ប៉ុន្តែប្រសិនបើមានអ្នកណាម្នាក់គិតថាការប្រព្រឹត្តរបស់ខ្លួនគឺមិនសមរម្យព្រោះនៅលីវ* ហើយបើអ្នកនោះមិនក្មេងពេក អ្នកនោះត្រូវធ្វើដូចតទៅនេះ៖ ចូរឲ្យអ្នកនោះរៀបការទៅ បើចង់រៀបការ។ នោះមិនមែនជាការខុសឆ្គងទេ។ ៣៧ ប៉ុន្តែប្រសិនបើអ្នកណាបានតាំងចិត្តរឹងមាំ ក៏មិនត្រូវការធ្វើដូច្នោះ តែអាចគ្រប់គ្រងចិត្តខ្លួនឯង ហើយបានសម្រេចចិត្តថានឹងនៅលីវ* គាត់នឹងសម្រេចការបានល្អ។ ៣៨ ដូច្នេះ អ្នកណាដែលរៀបការ អ្នកនោះក៏សម្រេចការបានល្អដែរ តែអ្នកណាដែលមិនរៀបការ អ្នកនោះនឹងសម្រេចការបានល្អជាង។
៣៩ ប្រពន្ធត្រូវនៅជាប់នឹងប្ដី ដរាបណាប្ដីនៅរស់។ ប៉ុន្តែប្រសិនបើប្ដីរបស់នាងដេកលក់ក្នុងសេចក្ដីស្លាប់ នោះនាងមានសេរីភាពអាចរៀបការជាមួយនឹងអ្នកណាក៏បាន ឲ្យតែអ្នកនោះជាអ្នកកាន់តាមលោកម្ចាស់។ ៤០ ប៉ុន្តែតាមយោបល់ខ្ញុំ នាងនឹងមានសុភមង្គលច្រើនជាង ប្រសិនបើនាងមិនរៀបការម្ដងទៀត។ ខ្ញុំគិតថា ខ្ញុំប្រាកដជាមានសកម្មពល* របស់ព្រះដែរ។
៨ ឥឡូវខ្ញុំសូមនិយាយអំពីអាហារដែលគេសែនរូបព្រះ៖ យើងដឹងថា យើងទាំងអស់គ្នាមានចំណេះ។ ចំណេះធ្វើឲ្យក្រអឺតក្រអោង រីឯសេចក្ដីស្រឡាញ់វិញ នោះធ្វើឲ្យមាំមួនឡើង។ ២ ប្រសិនបើអ្នកណាគិតថាខ្លួនចេះដឹងអំពីរឿងណាមួយ អ្នកនោះមិនទាន់ចេះដឹងអំពីរឿងនោះតាមដែលគួរចេះដឹងនោះទេ។ ៣ ក៏ប៉ុន្តែប្រសិនបើអ្នកណាស្រឡាញ់ព្រះ នោះព្រះស្គាល់អ្នកនោះ។
៤ ឥឡូវខ្ញុំសូមនិយាយអំពីការបរិភោគអាហារដែលគេសែនរូបព្រះ។ យើងដឹងថារូបព្រះមិនមែនជាអ្វីសោះ ហើយយើងក៏ដឹងថាមានព្រះតែមួយប៉ុណ្ណោះ។ ៥ ព្រោះទោះជាមានអ្នកនៅស្ថានសួគ៌ឬនៅផែនដីដែលគេហៅថា«ព្រះ» ដូចជាមាន«ព្រះ»ជាច្រើននិង«ម្ចាស់»ជាច្រើនក៏ដោយ ៦ ក៏ចំពោះយើងមានព្រះតែមួយទេ គឺជាបិតានៅស្ថានសួគ៌។ អ្វីៗទាំងអស់កើតមកពីលោក ហើយយើងរស់ដើម្បីលោក។ មានម្ចាស់តែមួយ គឺលោកយេស៊ូគ្រិស្ត។ អ្វីៗទាំងអស់កើតមកដោយសារលោក ហើយយើងក៏រស់ដោយសារលោកដែរ។
៧ ទោះជាយ៉ាងនោះក៏ដោយ មិនមែនមនុស្សទាំងអស់មានចំណេះនេះទេ តែរហូតដល់ឥឡូវនេះ អ្នកខ្លះនៅតែគិតអំពីរូបព្រះ ហើយពេលដែលអ្នកទាំងនោះបរិភោគអាហារ ពួកគេចាត់ទុកអាហារនោះថាជាសំណែន រួចដោយសារពួកគេមានសមត្ថភាពវិនិច្ឆ័យខ្សោយ នោះពួកគេក៏មានចិត្តសៅហ្មង។ ៨ ប៉ុន្តែអាហារនឹងមិនធ្វើឲ្យព្រះពេញចិត្តយើងទេ។ ប្រសិនបើយើងមិនបរិភោគ យើងមិនខាតអ្វីទេ ហើយប្រសិនបើយើងបរិភោគ យើងក៏គ្មានគុណបំណាច់អ្វីដែរ។ ៩ ប៉ុន្តែចូរប្រយ័ត្នជានិច្ច កុំឲ្យសិទ្ធិរបស់អ្នករាល់គ្នាទៅជាហេតុនាំឲ្យអ្នកដែលខ្សោយជំពប់ដួល។* ១០ ព្រោះប្រសិនបើមានអ្នកណាឃើញអ្នកដែលជាអ្នកមានចំណេះកំពុងអង្គុយបរិភោគនៅវិហារនៃរូបព្រះ នោះសមត្ថភាពវិនិច្ឆ័យរបស់អ្នកដែលខ្សោយនឹងនាំឲ្យគាត់ហ៊ានបរិភោគអាហារដែលគេពិតជាសែនរូបព្រះ មែនទេ? ១១ បើដូច្នេះ អ្នកកំពុងធ្វើឲ្យអ្នកដែលខ្សោយអន្តរាយ ដោយសារចំណេះរបស់អ្នក ហើយពួកគេគឺជាបងប្អូនរបស់អ្នកដែលគ្រិស្តបានស្លាប់ជំនួស។ ១២ ប៉ុន្តែពេលដែលអ្នករាល់គ្នាធ្វើខុស* ចំពោះបងប្អូនរបស់អ្នក ហើយបង្ខូចសមត្ថភាពដ៏ខ្សោយរបស់ពួកគាត់ក្នុងការវិនិច្ឆ័យ នោះអ្នកកំពុងធ្វើខុសចំពោះគ្រិស្ត។ ១៣ ដូច្នេះ ប្រសិនបើអាហារធ្វើឲ្យបងប្អូនរបស់ខ្ញុំជំពប់ដួល ខ្ញុំនឹងមិនបរិភោគសាច់ទៀតឡើយ ដើម្បីកុំឲ្យបងប្អូនរបស់ខ្ញុំជំពប់ដួល។
៩ ខ្ញុំមានសេរីភាព មែនទេ? ខ្ញុំជាសាវ័ក មែនទេ? ខ្ញុំបានឃើញលោកយេស៊ូជាម្ចាស់របស់យើង មែនទេ? អ្នករាល់គ្នាជាផលនៃការដែលខ្ញុំបានធ្វើក្នុងលោកម្ចាស់ មែនទេ? ២ ប្រសិនបើចំពោះអ្នកឯទៀត ខ្ញុំមិនមែនជាសាវ័ក នោះខ្ញុំប្រាកដជាសាវ័កចំពោះអ្នករាល់គ្នា ព្រោះអ្នករាល់គ្នាជាត្រាដែលបញ្ជាក់ថាខ្ញុំជាសាវ័ករបស់លោកម្ចាស់។
៣ ចំពោះអ្នកដែលវិនិច្ឆ័យខ្ញុំ ខ្ញុំសូមនិយាយការពារខ្លួនដូចតទៅនេះ៖ ៤ យើងមានសិទ្ធិផឹកនិងបរិភោគ មែនទេ? ៥ យើងមានសិទ្ធិរៀបការជាមួយនឹងអ្នកជឿហើយនាំទៅជាមួយ ដូចសាវ័កឯទៀត ដូចបងប្អូនរបស់លោកម្ចាស់ និងកេផាសដែរ មែនទេ? ៦ ឬតើមានតែខ្ញុំនឹងបាណាបាសប៉ុណ្ណោះដែលមិនមានសិទ្ធិឈប់ធ្វើការចិញ្ចឹមជីវិត? ៧ តើអ្នកណាធ្វើជាទាហានតែចាយប្រាក់ខ្លួនឯង? តើអ្នកណាដាំចម្ការទំពាំងបាយជូរ តែមិនបរិភោគផល? ឬតើអ្នកណាឃ្វាលហ្វូងសត្វ តែមិនទទួលចំណែកពីទឹកដោះសត្វនោះ?
៨ តើខ្ញុំកំពុងនិយាយដោយផ្អែកលើខ្នាតតម្រារបស់មនុស្សឬ? ច្បាប់* ក៏ចែងដូច្នេះដែរ មែនទេ? ៩ ព្រោះច្បាប់ម៉ូសេចែងថា៖ «អ្នកមិនត្រូវឃ្លុំមាត់គោឈ្មោលពេលដែលវាបញ្ជាន់ស្រូវ»។ តើព្រះកំពុងយកចិត្តទុកដាក់នឹងសត្វគោឬ? ១០ ឬមួយដើម្បីប្រយោជន៍យើងវិញដែលលោកចែងដូច្នេះ? តាមពិតគឺដើម្បីប្រយោជន៍យើងដែលសេចក្ដីនោះបានត្រូវសរសេរ ព្រោះអ្នកដែលភ្ជួរដី គួរភ្ជួរដោយចិត្តសង្ឃឹម ហើយអ្នកដែលបញ្ជាន់ស្រូវ គួរបញ្ជាន់ដោយសង្ឃឹមថាខ្លួននឹងបានទទួលចំណែក។
១១ ប្រសិនបើយើងបានសាបព្រោះអ្វីៗពីព្រះ* ដល់អ្នករាល់គ្នា តើមានអ្វីអស្ចារ្យ ប្រសិនបើយើងទទួលផលពីអ្នករាល់គ្នា ជាអ្វីៗសម្រាប់ចិញ្ចឹមជីវិត? ១២ ប្រសិនបើបុរសឯទៀតប្រើសិទ្ធិនេះចំពោះអ្នករាល់គ្នា យើងមានសិទ្ធិលើសជាងនោះទៅទៀត មែនទេ? ទោះជាយ៉ាងនោះក៏ដោយ យើងមិនបានប្រើសិទ្ធិនេះទេ តែយើងកំពុងទទួលបន្ទុកទាំងស្រុង ដើម្បីមិនដាក់ឧបសគ្គចំពោះការផ្សាយដំណឹងល្អអំពីគ្រិស្ត។ ១៣ តើអ្នករាល់គ្នាមិនដឹងទេថា ពួកបុរសដែលបំពេញកិច្ចការដ៏ពិសិដ្ឋបរិភោគអាហារពីវិហារ ហើយពួកអ្នកដែលបម្រើជានិច្ចនៅទីបូជាក៏ទទួលចំណែកជាមួយនឹងទីបូជានោះដែរ? ១៤ ដូចគ្នាដែរ លោកម្ចាស់បានបង្គាប់ថា អ្នកដែលប្រកាសដំណឹងល្អ ត្រូវរស់នៅដោយសារដំណឹងល្អដែរ។
១៥ ប៉ុន្តែខ្ញុំមិនបានប្រើការរៀបចំទាំងនេះឡើយ សូម្បីតែមួយក៏ដោយ។ ខ្ញុំមិនបានសរសេរសេចក្ដីនេះដើម្បីចាប់ផ្ដើមប្រើការរៀបចំទាំងនេះឡើយ ព្រោះខ្ញុំស៊ូស្លាប់ល្អជាង! គ្មានអ្នកណានឹងធ្វើឲ្យហេតុដែលខ្ញុំអួតអាងទៅជាអសារឥតការទេ! ១៦ ឥឡូវ ប្រសិនបើខ្ញុំប្រកាសដំណឹងល្អ នោះមិនមែនជាហេតុឲ្យខ្ញុំអួតអាងឡើយ ព្រោះខ្ញុំត្រូវតែប្រកាសដំណឹងល្អ។ តាមពិត ប្រសិនបើខ្ញុំមិនប្រកាសដំណឹងល្អ ខ្ញុំត្រូវវេទនាណាស់! ១៧ ប្រសិនបើខ្ញុំធ្វើដូច្នេះស្ម័គ្រពីចិត្ត ខ្ញុំបានរង្វាន់។ ប៉ុន្តែប្រសិនបើខ្ញុំធ្វើដោយមិនស្ម័គ្រពីចិត្ត ខ្ញុំនៅមានភារកិច្ចដែលបានត្រូវផ្ញើនឹងខ្ញុំ។ ១៨ ដូច្នេះ តើរង្វាន់របស់ខ្ញុំជាអ្វី? គឺពេលដែលខ្ញុំប្រកាសដំណឹងល្អ ខ្ញុំអាចផ្ដល់ដំណឹងល្អដោយមិនយកថ្លៃ ដើម្បីកុំឲ្យខ្ញុំប្រើសិទ្ធិដែលខ្ញុំមានក្នុងការប្រកាសដំណឹងល្អឲ្យបានពេញលេញ។
១៩ ព្រោះទោះជាខ្ញុំគ្មានកាតព្វកិច្ចចំពោះអ្នកណាក៏ដោយ ខ្ញុំបានធ្វើឲ្យខ្លួនទៅជាខ្ញុំបម្រើរបស់មនុស្សទាំងអស់ ដើម្បីឲ្យខ្ញុំបានមនុស្សច្រើនបំផុត។ ២០ ដូច្នេះ ចំពោះជនជាតិយូដា ខ្ញុំបានធ្វើដូចជនជាតិយូដា ដើម្បីខ្ញុំអាចបានជនជាតិយូដា។ ចំពោះអ្នកដែលនៅក្រោមច្បាប់ ខ្ញុំបានធ្វើដូចអ្នកនៅក្រោមច្បាប់ ទោះជាខ្ញុំមិននៅក្រោមច្បាប់ក៏ដោយ ដើម្បីខ្ញុំអាចបានអ្នកដែលនៅក្រោមច្បាប់។ ២១ ចំពោះអ្នកដែលមិននៅក្រោមច្បាប់ ខ្ញុំបានធ្វើដូចអ្នកដែលមិននៅក្រោមច្បាប់ ដើម្បីខ្ញុំអាចបានអ្នកដែលមិននៅក្រោមច្បាប់ ទោះជានៅចំពោះព្រះខ្ញុំមិនមែនជាអ្នកដែលមិននៅក្រោមច្បាប់ក៏ដោយ តែជាអ្នកនៅក្រោមច្បាប់ចំពោះគ្រិស្ត។ ២២ ចំពោះអ្នកដែលខ្សោយ ខ្ញុំបានធ្វើដូចអ្នកដែលខ្សោយ ដើម្បីខ្ញុំអាចបានអ្នកដែលខ្សោយ។ ខ្ញុំបានធ្វើដូចមនុស្សគ្រប់ប្រភេទ ដើម្បីខ្ញុំអាចសង្គ្រោះពួកគេខ្លះតាមគ្រប់មធ្យោបាយទាំងអស់។ ២៣ ប៉ុន្តែខ្ញុំធ្វើអ្វីៗទាំងអស់ដើម្បីដំណឹងល្អ ដើម្បីឲ្យខ្ញុំអាចប្រាប់ដល់អ្នកឯទៀត។
២៤ តើអ្នករាល់គ្នាមិនដឹងទេថា អ្នកដែលរត់ប្រណាំង រត់ទាំងអស់គ្នា ប៉ុន្តែមានតែម្នាក់ប៉ុណ្ណោះទទួលរង្វាន់? ចូររត់យ៉ាងណាឲ្យបានរង្វាន់។ ២៥ ម្យ៉ាងទៀត បុរសទាំងអស់ដែលចូលរួមក្នុងការប្រកួតខំទប់ចិត្តក្នុងរឿងទាំងអស់។ ឯពួកគេធ្វើដូច្នេះ ដើម្បីបានមកុដដែលនឹងខូចទៅ តែយើងធ្វើដូច្នេះដើម្បីបានមកុដដែលមិនអាចខូចទេ។ ២៦ ហេតុនេះ របៀបដែលខ្ញុំកំពុងរត់ មិនមែនដូចជារត់ដោយគ្មានគោលដៅទេ។ របៀបដែលខ្ញុំដាល់ មិនដូចជាដាល់ខ្យល់ឡើយ ២៧ ប៉ុន្តែខ្ញុំវាយដំរូបកាយរបស់ខ្ញុំ ហើយបង្ខំឲ្យចុះចូលដូចខ្ញុំបម្រើ ដើម្បីកុំឲ្យខ្ញុំទៅជាមនុស្សដែលព្រះលែងពេញចិត្តដោយសារហេតុណាមួយ ក្រោយពីខ្ញុំបានផ្សព្វផ្សាយដល់អ្នកឯទៀត។
១០ ឥឡូវ បងប្អូនអើយ ខ្ញុំមិនចង់ឲ្យអ្នករាល់គ្នានៅល្ងង់អំពីការដែលបុព្វបុរសរបស់យើងបាននៅក្រោមពពក ហើយបានដើរកាត់សមុទ្រ ២ ហើយពួកគេទាំងអស់គ្នាបានទទួលការជ្រមុជទឹក* ជាអ្នកកាន់តាមម៉ូសេ ពេលដែលពួកគេនៅក្រោមពពកនោះ ហើយដើរកាត់សមុទ្រ។ ៣ ពួកគេទាំងអស់គ្នាបានពិសាអាហារដែលព្រះផ្ដល់ឲ្យ* ៤ ហើយពួកគេទាំងអស់គ្នាបានពិសាទឹកដែលព្រះផ្ដល់ឲ្យ។ ព្រោះពួកគេធ្លាប់ពិសាទឹកពីផ្ទាំងថ្មដែលហាក់ដូចជាទៅតាមពួកគេ គឺផ្ទាំងថ្មដែលមកពីព្រះ ហើយផ្ទាំងថ្មនោះជាតំណាងគ្រិស្ត។ ៥ ទោះជាយ៉ាងនោះក៏ដោយ ពួកគេភាគច្រើនមិនបានទទួលការពេញចិត្តពីព្រះទេ ព្រោះពួកគេបានត្រូវសម្លាប់នៅតំបន់ស្ងាត់ជ្រងំ។
៦ ឥឡូវ ការទាំងនេះជាគំរូសម្រាប់យើង កុំឲ្យយើងទៅជាមនុស្សដែលប្រាថ្នាចង់បានអ្វីៗដ៏អាក្រក់ ដូចពួកគេប្រាថ្នាចង់បានឡើយ។ ៧ ហើយក៏កុំឲ្យយើងទៅជាអ្នកគោរពបូជារូបព្រះ ដូចពួកគេ ដូចបទគម្ពីរចែងថា៖ «បណ្ដាជនបានអង្គុយស៊ីផឹក រួចក្រោកឡើងនាំគ្នាអរសប្បាយ»។ ៨ ក៏កុំឲ្យយើងប្រព្រឹត្តអំពើប្រាសចាកសីលធម៌ខាងផ្លូវភេទ* ដូចពួកគេខ្លះបានធ្វើអំពើប្រាសចាកសីលធម៌ខាងផ្លូវភេទ រួចស្លាប់អស់ពីរម៉ឺនបីពាន់នាក់ក្នុងមួយថ្ងៃ។ ៩ ក៏កុំឲ្យយើងល្បងលនឹងព្រះយេហូវ៉ា ដូចពួកគេខ្លះបានល្បងលនឹងលោក រួចវិនាសជីវិតដោយសត្វពស់។ ១០ ក៏កុំឲ្យយើងរអ៊ូរទាំ ដូចពួកគេខ្លះបានរអ៊ូរទាំ រួចវិនាសជីវិតដោយអ្នកពិឃាត។ ១១ ការទាំងនេះបានកើតឡើងដល់ពួកគេទុកជាគំរូ ក៏បានត្រូវកត់ទុកជាការព្រមានដល់យើងដែលរស់នៅគ្រាចុងបញ្ចប់នៃសម័យនេះ។*
១២ ដូច្នេះ ចូរឲ្យអ្នកដែលគិតថាខ្លួនឈរ ប្រយ័ត្នក្រែងលោដួល។ ១៣ គ្មានសេចក្ដីល្បួងណាកើតមានដល់អ្នករាល់គ្នាដែលមនុស្សឯទៀតមិនធ្លាប់ជួបនោះឡើយ។ ប៉ុន្តែព្រះគឺស្មោះត្រង់ ហើយលោកនឹងមិនឲ្យអ្នករាល់គ្នារងការល្បួងហួសពីសមត្ថភាពស៊ូទ្រាំរបស់អ្នករាល់គ្នាឡើយ តែលោកក៏នឹងរៀបចំផ្លូវចេញ ដើម្បីឲ្យអ្នករាល់គ្នាអាចស៊ូទ្រាំនៅពេលជួបប្រទះសេចក្ដីល្បួងនោះ។
១៤ ដូច្នេះ មិត្តជាទីស្រឡាញ់អើយ ចូររត់ចេញពីការគោរពបូជារូបព្រះ។ ១៥ ខ្ញុំនិយាយជាមួយនឹងអ្នករាល់គ្នា ដូចនិយាយជាមួយនឹងអ្នកដែលមានសមត្ថភាពវែកញែក។ ចូរពិចារណាសម្ដីខ្ញុំដោយខ្លួនឯងចុះ។ ១៦ ពែងនៃអំណរគុណ ដែលជាហេតុយើងអរគុណព្រះ* នោះជាតំណាងនៃការរួមចំណែកក្នុងឈាមរបស់គ្រិស្ត មែនទេ? នំប៉័ងមួយដុំដែលយើងកាច់នោះ ជាតំណាងនៃការរួមចំណែកក្នុងរូបកាយរបស់គ្រិស្ត មែនទេ? ១៧ ដោយសារមាននំប៉័ងតែមួយដុំ នោះយើងជារូបកាយតែមួយ ពីព្រោះយើងបរិភោគពីនំប៉័ងមួយដុំនោះ ទោះជាយើងមានគ្នាច្រើនក៏ដោយ។
១៨ សូមមើលជនជាតិអ៊ីស្រាអែល៖ អ្នកដែលបរិភោគគ្រឿងបូជាទទួលចំណែកជាមួយនឹងទីបូជាដែរ មែនទេ? ១៩ ចុះតើខ្ញុំត្រូវនិយាយយ៉ាងណាវិញ? ថាអ្វីដែលគេសែនរូបព្រះនិងរូបព្រះគឺសំខាន់ឬ? ២០ ទេ! ប៉ុន្តែខ្ញុំប្រាប់ថា អ្វីៗដែលប្រជាជាតិនានាសែន ពួកគេសែនពួកវិញ្ញាណកំណាច* មិនមែនបូជាដល់ព្រះទេ ហើយខ្ញុំមិនចង់ឲ្យអ្នករាល់គ្នារួមចំណែកជាមួយនឹងពួកវិញ្ញាណកំណាចឡើយ។ ២១ អ្នករាល់គ្នាមិនអាចផឹកពីពែងរបស់ព្រះយេហូវ៉ាផងនិងពីពែងរបស់ពួកវិញ្ញាណកំណាចផងបានទេ។ អ្នករាល់គ្នាមិនអាចបរិភោគពី«តុរបស់ព្រះយេហូវ៉ា»ផងនិងពីតុរបស់ពួកវិញ្ញាណកំណាចផងបានឡើយ។ ២២ ឬ«តើយើងកំពុងធ្វើឲ្យព្រះយេហូវ៉ាទាស់ចិត្ត?»* យើងមិនមែនខ្លាំងជាងលោកទេ មែនទេ?
២៣ មានច្បាប់ឲ្យធ្វើអ្វីៗទាំងអស់ ប៉ុន្តែអ្វីៗទាំងអស់មិនមែនសុទ្ធតែមានប្រយោជន៍ទេ។ មានច្បាប់ឲ្យធ្វើអ្វីៗទាំងអស់ ប៉ុន្តែអ្វីៗទាំងអស់មិនមែនសុទ្ធតែលើកទឹកចិត្តឡើយ។ ២៤ ចូរឲ្យគ្រប់គ្នាសុខចិត្តលះបង់ប្រយោជន៍ខ្លួន ដើម្បីប្រយោជន៍អ្នកឯទៀត។
២៥ ចូរបរិភោគអ្វីៗទាំងអស់ដែលគេលក់នៅផ្សារសាច់ ហើយកុំឲ្យសមត្ថភាពវិនិច្ឆ័យរបស់អ្នករាល់គ្នាជំរុញឲ្យសួរ ២៦ ព្រោះ«ផែនដីនិងអ្វីៗពេញផែនដីទាំងមូលជារបស់ព្រះយេហូវ៉ា»។ ២៧ ប្រសិនបើអ្នកដែលមិនជឿអញ្ជើញអ្នកទៅបរិភោគអាហារ ហើយអ្នករាល់គ្នាចង់ទៅ ចូរបរិភោគអ្វីទាំងអស់ដែលអ្នកនោះជូន ហើយកុំឲ្យសមត្ថភាពវិនិច្ឆ័យរបស់អ្នករាល់គ្នាជំរុញឲ្យសួរ។ ២៨ ប៉ុន្តែប្រសិនបើអ្នកណាប្រាប់អ្នករាល់គ្នាថា៖ «នេះជារបស់គេសែន» កុំបរិភោគដោយគិតដល់អ្នកដែលបានប្រាប់ដូច្នេះ ហើយដោយគិតដល់សមត្ថភាពវិនិច្ឆ័យ។ ២៩ ខ្ញុំមិនមែនពោលសំដៅទៅ«សមត្ថភាពវិនិច្ឆ័យ»របស់អ្នកទេ តែរបស់អ្នកដែលប្រាប់។ ព្រោះតើចាំបាច់ធ្វើឲ្យសមត្ថភាពវិនិច្ឆ័យរបស់អ្នកដទៃវិនិច្ឆ័យសេរីភាពរបស់ខ្ញុំធ្វើអ្វី? ៣០ ប្រសិនបើខ្ញុំបរិភោគដោយអរគុណព្រះ ហេតុអ្វីគេគួរនិយាយប្រមាថខ្ញុំអំពីអ្វីដែលខ្ញុំបានអរគុណព្រះហើយ?
៣១ ដូច្នេះ ទោះជាអ្នកផឹក បរិភោគ ឬធ្វើអ្វីទៀតក៏ដោយ ចូរធ្វើអ្វីៗទាំងអស់ដើម្បីឲ្យព្រះទទួលការសរសើរតម្កើង។ ៣២ កុំបង្កហេតុឲ្យជនជាតិយូដា ជនជាតិក្រិច និងក្រុមជំនុំរបស់ព្រះជំពប់ដួល ៣៣ ដូចខ្ញុំបំពេញចិត្តមនុស្សទាំងឡាយក្នុងគ្រប់ការទាំងអស់ ដោយលះបង់ប្រយោជន៍ខ្លួន ជាប្រយោជន៍ដល់មនុស្សជាច្រើន ដើម្បីឲ្យពួកគេបានសេចក្ដីសង្គ្រោះ។
១១ ចូរយកតម្រាប់តាមខ្ញុំ ដូចខ្ញុំយកតម្រាប់តាមគ្រិស្ត។
២ ខ្ញុំសូមសរសើរអ្នករាល់គ្នា ពីព្រោះអ្នករាល់គ្នាគិតអំពីខ្ញុំជានិច្ច ហើយកំពុងប្រកាន់ខ្ជាប់តាមសេចក្ដីដែលខ្ញុំបានពាំនាំមកប្រាប់។ ៣ ប៉ុន្តែខ្ញុំចង់ឲ្យអ្នករាល់គ្នាដឹងថា ប្រមុខរបស់បុរសទាំងឡាយគឺគ្រិស្ត ឯប្រមុខរបស់ស្ត្រីទាំងឡាយគឺបុរស ឯប្រមុខរបស់គ្រិស្តគឺព្រះ។ ៤ បុរសណាដែលអធិដ្ឋានឬប្រកាសទំនាយដោយពាក់អ្វីលើក្បាល ធ្វើឲ្យក្បាល* ខ្លួនអាប់ឱនកិត្ដិយស ៥ ប៉ុន្តែស្ត្រីណាដែលអធិដ្ឋានឬប្រកាសទំនាយដោយមិនពាក់អ្វីលើក្បាល ធ្វើឲ្យក្បាល* ខ្លួនអាប់ឱនកិត្ដិយស ព្រោះបើធ្វើដូច្នេះ នាងគឺដូចជាស្ត្រីដែលត្រូវគេកោរសក់។* ៦ ព្រោះប្រសិនបើស្ត្រីណាមិនពាក់អ្វីលើក្បាល នោះនាងត្រូវកាត់សក់ឲ្យខ្លី។ ប៉ុន្តែប្រសិនបើស្ត្រីនឹងអាប់ឱនកិត្ដិយសបើកាត់សក់ឲ្យខ្លីឬកោរសក់ នោះនាងត្រូវពាក់អ្វីលើក្បាល។
៧ ព្រោះបុរសមិនគួរពាក់អ្វីលើក្បាលទេ ដោយសារបុរសជារូបនៃព្រះ និងនាំឲ្យព្រះទទួលកិត្ដិយស តែស្ត្រីនាំឲ្យបុរសទទួលកិត្ដិយស។ ៨ ព្រោះបុរសមិនមកពីស្ត្រីទេ តែស្ត្រីមកពីបុរស ៩ ម្យ៉ាងទៀត ព្រះមិនបានបង្កើតបុរសសម្រាប់ស្ត្រីទេ តែលោកបានបង្កើតស្ត្រីសម្រាប់បុរស។ ១០ គឺហេតុនេះហើយ ស្ត្រីត្រូវមានអ្វីលើក្បាលដែលបញ្ជាក់ពីការចុះចូល ហើយដោយសារបណ្ដាទេវតា។
១១ ម្យ៉ាងវិញទៀត ក្នុងចំណោមអ្នកកាន់តាមលោកម្ចាស់ មិនមានស្ត្រីដោយគ្មានបុរស ហើយមិនមានបុរសដោយគ្មានស្ត្រីឡើយ។ ១២ ព្រោះដូចស្ត្រីមកពីបុរស បុរសកើតចេញពីស្ត្រី តែអ្វីៗទាំងអស់មកពីព្រះ។ ១៣ សូមពិចារណាដោយខ្លួនអ្នកចុះ៖ តើជាការសមរម្យទេ ប្រសិនបើស្ត្រីអធិដ្ឋានដល់ព្រះដោយមិនពាក់អ្វីលើក្បាល? ១៤ តើធម្មជាតិមិនបង្ហាញទេថា បុរសត្រូវអាប់ឱនកិត្ដិយសប្រសិនបើមានសក់វែង ១៥ ប៉ុន្តែប្រសិនបើស្ត្រីមានសក់វែង នោះជាកិត្ដិយសនាង? ពីព្រោះនាងបានសក់ជំនួសរបស់លម្អក្បាល។ ១៦ ក៏ប៉ុន្តែប្រសិនបើមានអ្នកណាដែលមើលទៅដូចជាចង់តវ៉ាដើម្បីធ្វើតាមទម្លាប់ណាផ្សេងទៀត យើងគ្មានទម្លាប់ណាផ្សេងទៀតទេ ហើយក្រុមជំនុំទាំងឡាយរបស់ព្រះក៏គ្មានដែរ។
១៧ ប៉ុន្តែ ពេលដែលខ្ញុំឲ្យការណែនាំនេះ ខ្ញុំមិនសរសើរអ្នករាល់គ្នាទេ ពីព្រោះកាលដែលអ្នករាល់គ្នាជួបជុំគ្នានៅកន្លែងមួយ នោះមិនផ្ដល់ប្រយោជន៍ឲ្យអ្នករាល់គ្នាឡើយ តែនាំឲ្យបង់ប្រយោជន៍វិញ។ ១៨ ព្រោះទីមួយ ខ្ញុំបានឮថាមានការបែកបាក់ក្នុងចំណោមអ្នករាល់គ្នា ពេលដែលជួបជុំជាក្រុមជំនុំ ហើយខ្ញុំជឿខ្លះដែរ។ ១៩ ព្រោះប្រាកដជានឹងមាននិកាយផ្សេងៗក្នុងចំណោមអ្នករាល់គ្នា ប៉ុន្តែយ៉ាងនេះអ្នកដែលព្រះពេញចិត្តនឹងត្រូវបង្ហាញឲ្យឃើញក្នុងចំណោមអ្នករាល់គ្នា។
២០ ដូច្នេះ ពេលដែលជួបជុំគ្នានៅកន្លែងមួយ អ្នករាល់គ្នាមិនអាចបរិភោគនៅពិធីអាហារល្ងាចរបស់លោកម្ចាស់ឲ្យបានត្រឹមត្រូវទេ។ ២១ ព្រោះពេលដល់ម៉ោងបរិភោគអាហារល្ងាចរបស់លោកម្ចាស់ អ្នករាល់គ្នាបានបរិភោគអាហារល្ងាចផ្ទាល់ខ្លួនហើយ។ ហេតុនេះ អ្នកខ្លះឃ្លាន ឯអ្នកខ្លះទៀតស្រវឹងស្រា។ ២២ អ្នករាល់គ្នាប្រាកដជាអាចផឹកនិងបរិភោគនៅផ្ទះរបស់ខ្លួន មែនទេ? ឬក៏អ្នករាល់គ្នាមើលងាយក្រុមជំនុំរបស់ព្រះ ហើយធ្វើឲ្យអ្នកដែលគ្មានអ្វីសោះអៀនខ្មាស? តើខ្ញុំត្រូវនិយាយអ្វីទៅអ្នករាល់គ្នា? តើខ្ញុំត្រូវសរសើរអ្នករាល់គ្នាឬ? ក្នុងរឿងនេះ ខ្ញុំមិនសរសើរអ្នករាល់គ្នាទេ។
២៣ ព្រោះសេចក្ដីដែលខ្ញុំបានទទួលពីលោកម្ចាស់ ខ្ញុំបានបង្រៀនអ្នករាល់គ្នា គឺថា នៅយប់ដែលលោកម្ចាស់យេស៊ូត្រូវគេក្បត់ លោកបានយកនំប៉័ងមួយដុំ ២៤ អរគុណព្រះ រួចកាច់នំប៉័ងនោះ ហើយមានប្រសាសន៍ថា៖ «នេះជាតំណាងរូបកាយរបស់ខ្ញុំដែលនឹងត្រូវប្រគល់ឲ្យ ដើម្បីអ្នករាល់គ្នា។ ចូរបន្តធ្វើដូច្នេះ ដើម្បីរំលឹកពីខ្ញុំ»។ ២៥ បន្ទាប់ពីបានពិសាអាហារល្ងាចហើយ លោកក៏យកពែងនោះធ្វើបែបដូច្នោះដែរ ដោយមានប្រសាសន៍ថា៖ «ពែងនេះជាតំណាងកិច្ចព្រមព្រៀងថ្មីដែលមានមូលដ្ឋានលើឈាមរបស់ខ្ញុំ។ រាល់ដងដែលអ្នករាល់គ្នាផឹកពីពែងនេះ ចូរបន្តធ្វើដូច្នេះ ដើម្បីរំលឹកពីខ្ញុំ»។ ២៦ ព្រោះរាល់ដងដែលអ្នករាល់គ្នាបរិភោគនំប៉័ងនោះ និងផឹកពីពែងនោះ អ្នករាល់គ្នាកំពុងប្រកាសមរណភាពរបស់លោកម្ចាស់រហូតដល់លោកមកដល់។
២៧ ដូច្នេះ អ្នកណាដែលបរិភោគនំប៉័ង ឬផឹកពីពែងរបស់លោកម្ចាស់ដោយខ្លួនមិនសមនឹងទទួល អ្នកនោះនឹងមានទោសចំពោះរូបកាយនិងឈាមរបស់លោកម្ចាស់។ ២៨ ចូរឲ្យអ្នកនោះគិតពិចារណាឲ្យបានដិតដល់ ដើម្បីដឹងថាខ្លួនសមឬមិនសមនឹងទទួល រួចសឹមបរិភោគនំប៉័ងនោះនិងផឹកពីពែងនោះចុះ។ ២៩ ព្រោះអ្នកណាដែលផឹកនិងបរិភោគដោយមិនទទួលស្គាល់សារៈសំខាន់នៃរូបកាយ អ្នកនោះផឹកនិងបរិភោគនាំឲ្យខ្លួនទទួលការវិនិច្ឆ័យ។ ៣០ ហេតុនោះហើយបានជាមានអ្នកខ្សោយនិងអ្នកឈឺជាច្រើននាក់ក្នុងចំណោមអ្នករាល់គ្នា ហើយជាច្រើននាក់ទៀតបានដេកលក់ទៅក្នុងសេចក្ដីស្លាប់។ ៣១ ប៉ុន្តែប្រសិនបើយើងពិចារណាឲ្យដឹងខ្លួនថាយើងជាមនុស្សបែបណា នោះយើងនឹងមិនទទួលការវិនិច្ឆ័យឡើយ។ ៣២ ក៏ប៉ុន្តែនៅពេលដែលយើងទទួលការវិនិច្ឆ័យ ព្រះយេហូវ៉ាប្រដៅយើង ដើម្បីកុំឲ្យយើងទទួលការផ្ដន្ទាទោសជាមួយនឹងពិភពលោក។ ៣៣ ដូច្នេះ បងប្អូនខ្ញុំអើយ នៅពេលដែលអ្នករាល់គ្នាជួបជុំគ្នាដើម្បីបរិភោគអាហារនេះ ចូរចាំគ្នា។ ៣៤ ប្រសិនបើមានអ្នកណាឃ្លាន អ្នកនោះត្រូវបរិភោគនៅផ្ទះ ដើម្បីកុំឲ្យអ្នករាល់គ្នាទទួលការវិនិច្ឆ័យ ពេលដែលជួបជុំគ្នា។ ប៉ុន្តែរឿងទាំងប៉ុន្មានទៀត ខ្ញុំនឹងដោះស្រាយពេលដែលខ្ញុំមក។
១២ ឥឡូវ បងប្អូនអើយ ខ្ញុំមិនចង់ឲ្យអ្នករាល់គ្នានៅល្ងង់អំពីអំណោយផ្សេងៗដែលសកម្មពល* របស់ព្រះផ្ដល់ឲ្យទេ។ ២ អ្នករាល់គ្នាដឹងថា កាលដែលនៅជាជនជាតិដទៃ* នៅឡើយ អ្នករាល់គ្នាបានត្រូវគេនាំទៅដោយវិធីផ្សេងៗដើម្បីគោរពបូជារូបព្រះឥតសំឡេងទាំងនោះ។ ៣ ដូច្នេះ ខ្ញុំចង់ឲ្យអ្នករាល់គ្នាដឹងថា ក្រោមឥទ្ធិពលនៃសកម្មពលរបស់ព្រះ គ្មានអ្នកណាពោលថា៖ «លោកយេស៊ូត្រូវបណ្ដាសា!»ទេ ហើយបើមិននៅក្រោមឥទ្ធិពលនៃសកម្មពលបរិសុទ្ធ គ្មានអ្នកណាអាចពោលថា៖ «លោកយេស៊ូជាម្ចាស់»បានឡើយ។
៤ ឯអំណោយ នោះផ្សេងៗពីគ្នា ប៉ុន្តែសកម្មពលមានតែមួយទេ ៥ ហើយកិច្ចបម្រើមានផ្សេងៗពីគ្នា ប៉ុន្តែមានម្ចាស់តែមួយទេ ៦ ឯសកម្មភាពមានផ្សេងៗពីគ្នា ប៉ុន្តែគឺជាព្រះតែមួយដែលធ្វើសកម្មភាពទាំងអស់ក្នុងមនុស្សគ្រប់គ្នា។ ៧ តែសកម្មពលរបស់ព្រះបានត្រូវបង្ហាញឲ្យឃើញតាមរយៈមនុស្សម្នាក់ៗ ដើម្បីផ្ដល់ផលប្រយោជន៍។ ៨ ជាឧទាហរណ៍ តាមរយៈសកម្មពលរបស់ព្រះ មនុស្សម្នាក់ទទួលអំណោយជាការនិយាយដោយប្រាជ្ញា ហើយដោយសារសកម្មពលដដែលនោះ ម្នាក់ទៀតទទួលអំណោយជាការនិយាយដោយចំណេះ ៩ ម្នាក់ទៀតមានជំនឿដោយសារសកម្មពលដដែលនោះ ម្នាក់ទៀតទទួលអំណោយជាសមត្ថភាពធ្វើឲ្យគេជាសះស្បើយដោយសារសកម្មពលតែមួយនោះ ១០ តែម្នាក់ទៀតអាចធ្វើការដែលប្រកបដោយឫទ្ធានុភាព ម្នាក់ទៀតអាចប្រកាសទំនាយ ម្នាក់ទៀតទទួលអំណោយជាសមត្ថភាពសម្គាល់បណ្ដាំ* ម្នាក់ទៀតនិយាយភាសាផ្សេងៗ ហើយម្នាក់ទៀតអាចបកប្រែភាសាផ្សេង។ ១១ ប៉ុន្តែសកម្មពលតែមួយធ្វើសកម្មភាពទាំងនេះ ដោយចែកអំណោយឲ្យម្នាក់ៗ តាមបំណងប្រាថ្នារបស់សកម្មពលនោះ។
១២ ព្រោះរូបកាយគឺតែមួយ តែមានអវយវៈជាច្រើន ហើយអវយវៈនៃរូបកាយនោះ រួមគ្នាជារូបកាយតែមួយ ទោះជាមានអវយវៈជាច្រើនក៏ដោយ។ គ្រិស្តក៏ដូច្នេះដែរ។ ១៣ ព្រោះយើងទាំងអស់គ្នាពិតជាបានទទួលការជ្រមុជដើម្បីទៅជារូបកាយតែមួយដោយសកម្មពលតែមួយ ទោះជាជនជាតិយូដា ឬជនជាតិក្រិច ទោះជាខ្ញុំបម្រើ ឬជាអ្នកមានសេរីភាពក៏ដោយ ហើយយើងទាំងអស់គ្នាបានត្រូវឲ្យផឹកពីសកម្មពលតែមួយ។
១៤ ព្រោះរូបកាយមិនមែនមានអវយវៈតែមួយទេ តែមានអវយវៈជាច្រើន។ ១៥ ប្រសិនបើជើងនិយាយថា៖ «ខ្ញុំមិនមែនជាផ្នែកនៃរូបកាយទេ ព្រោះខ្ញុំមិនមែនជាដៃ» នេះមិនមានន័យថាជើងមិនមែនជាផ្នែកនៃរូបកាយទេ។ ១៦ ហើយប្រសិនបើត្រចៀកនិយាយថា៖ «ខ្ញុំមិនមែនជាផ្នែកនៃរូបកាយទេ ព្រោះខ្ញុំមិនមែនជាភ្នែក» នេះមិនមានន័យថាត្រចៀកមិនមែនជាផ្នែកនៃរូបកាយទេ។ ១៧ ប្រសិនបើរូបកាយទាំងមូលជាភ្នែក តើនឹងឮសំឡេងតាមណាវិញ? ប្រសិនបើរូបកាយទាំងមូលសម្រាប់ឮសំឡេង តើនឹងដឹងក្លិនតាមណាវិញ? ១៨ ប៉ុន្តែព្រះបានកំណត់អវយវៈនីមួយៗនៅលើរូបកាយ តាមដែលលោកពេញចិត្ត។
១៩ ប្រសិនបើទាំងអស់សុទ្ធតែជាអវយវៈតែមួយ តើរូបកាយនៅឯណា? ២០ ប៉ុន្តែមានអវយវៈជាច្រើន តែរួមគ្នាជារូបកាយតែមួយ។ ២១ ភ្នែកមិនអាចនិយាយទៅដៃថា៖ «ខ្ញុំមិនត្រូវការអ្នកទេ» ហើយក្បាលក៏មិនអាចនិយាយទៅជើងថា៖ «ខ្ញុំមិនត្រូវការអ្នកទេ»។ ២២ ប៉ុន្តែផ្ទុយទៅវិញ អវយវៈណានៃរូបកាយដែលមើលទៅដូចជាខ្សោយជាង អវយវៈទាំងនោះគឺចាំបាច់ ២៣ ហើយផ្នែកណានៃរូបកាយដែលយើងចាត់ទុកថាមិនសូវមានកិត្ដិយស ផ្នែកទាំងនោះយើងធ្វើឲ្យមានកិត្ដិយសជាងគេ។ ហេតុនោះ ផ្នែកណាដែលមិនសមសួន ផ្នែកនោះមានភាពសមសួនជាងគេ ២៤ រីឯផ្នែកណាដែលសមសួនហើយ ផ្នែកនោះមិនត្រូវការអ្វីសោះ។ ទោះជាយ៉ាងនោះក៏ដោយ ព្រះបានផ្គុំរូបកាយ ដោយធ្វើឲ្យផ្នែកណាដែលខ្វះកិត្ដិយស ទៅជាមានកិត្ដិយសជាងគេ ២៥ ដើម្បីកុំឲ្យរូបកាយមានការបែកបាក់គ្នា តែដើម្បីឲ្យអវយវៈនីមួយៗយកចិត្តទុកដាក់ចំពោះគ្នាទៅវិញទៅមក។ ២៦ ហើយប្រសិនបើអវយវៈមួយរងទុក្ខ អវយវៈទាំងប៉ុន្មានទៀតក៏រងទុក្ខជាមួយដែរ ឬបើអវយវៈមួយទទួលកិត្ដិយស អវយវៈទាំងប៉ុន្មានទៀតក៏អរសប្បាយជាមួយដែរ។
២៧ ឥឡូវ អ្នកទាំងអស់គ្នារួមជារូបកាយនៃគ្រិស្ត ហើយម្នាក់ៗជាអវយវៈ។ ២៨ ហើយព្រះបានកំណត់សមាជិកម្នាក់ៗក្នុងក្រុមជំនុំ ទីមួយ ជាពួកសាវ័ក ទីពីរ ជាពួកអ្នកប្រកាសទំនាយ ទីបី ជាពួកអ្នកបង្រៀន បន្ទាប់មក ជាពួកអ្នកដែលធ្វើការដែលប្រកបដោយឫទ្ធានុភាព ជាបន្តបន្ទាប់ មានពួកអ្នកដែលទទួលអំណោយជាសមត្ថភាពធ្វើឲ្យគេជាសះស្បើយ ពួកអ្នកដែលបំពេញកិច្ចការផ្ដល់ជំនួយ ពួកអ្នកដែលមានសមត្ថភាពដឹកនាំ ពួកអ្នកដែលអាចនិយាយភាសាផ្សេងៗ។ ២៩ មិនមែនទាំងអស់គ្នាជាសាវ័កទេ មែនទេ? មិនមែនទាំងអស់គ្នាជាអ្នកប្រកាសទំនាយទេ មែនទេ? មិនមែនទាំងអស់គ្នាជាអ្នកបង្រៀនទេ មែនទេ? មិនមែនទាំងអស់គ្នាធ្វើការដែលប្រកបដោយឫទ្ធានុភាពទេ មែនទេ? ៣០ មិនមែនទាំងអស់គ្នាបានទទួលអំណោយជាសមត្ថភាពធ្វើឲ្យគេជាសះស្បើយទេ មែនទេ? មិនមែនទាំងអស់គ្នានិយាយភាសាផ្សេងៗទេ មែនទេ? មិនមែនទាំងអស់គ្នាជាអ្នកបកប្រែទេ មែនទេ? ៣១ ប៉ុន្តែចូរបន្តខំប្រឹងឲ្យបានអំណោយដ៏ឧត្តមជាង។ តែខ្ញុំបង្ហាញផ្លូវដ៏ប្រសើរលើសលប់ដល់អ្នករាល់គ្នា។
១៣ ប្រសិនបើខ្ញុំនិយាយភាសាមនុស្សនិងភាសាទេវតា តែគ្មានសេចក្ដីស្រឡាញ់ នោះខ្ញុំគឺដូចជាលង់ហិនដែលលាន់ឮខ្ទរខ្ទារ ឬឆាបដែលទង្គិចគ្នា។ ២ ម្យ៉ាងទៀត ប្រសិនបើខ្ញុំបានអំណោយជាសមត្ថភាពប្រកាសទំនាយ ហើយស្គាល់អាថ៌កំបាំងពិសិដ្ឋទាំងឡាយនិងចំណេះទាំងអស់ ហើយបើខ្ញុំមានជំនឿខ្លាំងដល់ម្ល៉េះ បានជាខ្ញុំអាចធ្វើឲ្យភ្នំរើចេញបាន តែខ្ញុំគ្មានសេចក្ដីស្រឡាញ់ នោះខ្ញុំមិនជាអ្វីសោះឡើយ។ ៣ ប្រសិនបើខ្ញុំឲ្យទ្រព្យទាំងអស់របស់ខ្ញុំ ដើម្បីផ្ដល់អាហារឲ្យអ្នកដទៃ ហើយប្រសិនបើខ្ញុំប្រគល់រូបកាយខ្ញុំជាគ្រឿងបូជាដើម្បីខ្ញុំអាចអួតអាង តែខ្ញុំគ្មានសេចក្ដីស្រឡាញ់ នោះខ្ញុំមិនទទួលប្រយោជន៍អ្វីសោះឡើយ។
៤ សេចក្ដីស្រឡាញ់មានចិត្តធ្ងន់ហើយក៏សប្បុរស។ សេចក្ដីស្រឡាញ់មិនចេះច្រណែន* មិនចេះនិយាយអួតអាង មិនចេះក្រអឺតក្រអោង ៥ មិនប្រព្រឹត្តឥតសមរម្យ មិនរកប្រយោជន៍ផ្ទាល់ខ្លួន មិនឆាប់ខឹង។ សេចក្ដីស្រឡាញ់មិនចាំទុកក្នុងចិត្តនូវអ្វីដែលគេធ្វើឲ្យយើងឈឺចិត្ត។ ៦ សេចក្ដីស្រឡាញ់មិនអរសប្បាយអំពីអ្វីដែលមិនសុចរិតឡើយ តែអរសប្បាយអំពីសេចក្ដីពិត។ ៧ សេចក្ដីស្រឡាញ់អត់ធន់នឹងអ្វីៗទាំងអស់ ជឿអ្វីៗទាំងអស់ សង្ឃឹមលើអ្វីៗទាំងអស់ ស៊ូទ្រាំនឹងអ្វីៗទាំងអស់។
៨ សេចក្ដីស្រឡាញ់មិនចេះសាបសូន្យ* ឡើយ។ ប៉ុន្តែទោះជាបានទទួលអំណោយជាសមត្ថភាពប្រកាសទំនាយ និយាយភាសាផ្សេងៗ ឬទទួលចំណេះក៏ដោយ ក៏អ្វីៗទាំងនោះនឹងត្រូវធ្វើឲ្យសូន្យទៅ។ ៩ ព្រោះចំណេះរបស់យើងគឺមិនទាន់សព្វគ្រប់ ហើយទំនាយដែលយើងប្រកាសក៏មិនទាន់សព្វគ្រប់ដែរ ១០ ប៉ុន្តែកាលណាយើងមានចំណេះសព្វគ្រប់ ហើយប្រកាសទំនាយសព្វគ្រប់ នោះចំណេះដែលមិនទាន់សព្វគ្រប់និងទំនាយដែលមិនទាន់សព្វគ្រប់នឹងត្រូវធ្វើឲ្យសូន្យទៅ។ ១១ កាលដែលខ្ញុំនៅជាទារក ខ្ញុំនិយាយដូចទារក គិតដូចទារក និងវែកញែកដូចទារក តែឥឡូវខ្ញុំជាបុរសពេញវ័យ ដូច្នេះខ្ញុំបានបំបាត់លក្ខណៈដែលដូចទារក។ ១២ ព្រោះនៅគ្រាឥឡូវនេះ យើងមើលឃើញស្រពិលៗដូចមើលក្នុងដែកឆ្លុះមុខ ប៉ុន្តែនៅពេលនោះយើងនឹងឃើញច្បាស់។* នៅគ្រាឥឡូវនេះ ខ្ញុំមិនទាន់ដឹងសព្វគ្រប់ទេ ប៉ុន្តែនៅពេលនោះខ្ញុំនឹងដឹងច្បាស់ ដូចព្រះស្គាល់ខ្ញុំច្បាស់ដែរ។ ១៣ ក៏ប៉ុន្តែឥឡូវនេះ មានបីយ៉ាងដែលនៅគង់វង្ស គឺជំនឿ សេចក្ដីសង្ឃឹម និងសេចក្ដីស្រឡាញ់ តែក្នុងចំណោមទាំងបីយ៉ាងនេះ សេចក្ដីស្រឡាញ់គឺឧត្តុង្គឧត្តមជាងគេ។
១៤ ចូរខំឲ្យអស់ពីសមត្ថភាពដើម្បីបង្ហាញសេចក្ដីស្រឡាញ់ តែបន្តខំប្រឹងឲ្យបានអំណោយពីសកម្មពល* របស់ព្រះផងដែរ ជាពិសេសអំណោយជាសមត្ថភាពប្រកាសទំនាយ។ ២ ព្រោះអ្នកណាដែលទទួលអំណោយជាការនិយាយភាសាផ្សេង អ្នកនោះនិយាយទៅព្រះ មិនមែននិយាយទៅមនុស្សទេ ពីព្រោះគ្មានអ្នកណាស្ដាប់បាន ទោះជាអ្នកនោះនិយាយអំពីអាថ៌កំបាំងដ៏ពិសិដ្ឋដោយសារសកម្មពលរបស់ព្រះក៏ដោយ។ ៣ ក៏ប៉ុន្តែអ្នកដែលប្រកាសទំនាយពង្រឹងកម្លាំងចិត្ត លើកទឹកចិត្ត និងសម្រាលទុក្ខមនុស្សដោយសម្ដីរបស់គាត់។ ៤ អ្នកដែលនិយាយភាសាផ្សេងពង្រឹងកម្លាំងចិត្តខ្លួនឯង តែអ្នកដែលប្រកាសទំនាយពង្រឹងកម្លាំងចិត្តក្រុមជំនុំ។ ៥ ខ្ញុំចង់ឲ្យអ្នកទាំងអស់គ្នានិយាយភាសាផ្សេងៗ តែខ្ញុំចង់ឲ្យអ្នករាល់គ្នាប្រកាសទំនាយជាង។ អ្នកដែលប្រកាសទំនាយគឺឧត្តមជាងអ្នកដែលនិយាយភាសាផ្សេងៗ ព្រោះប្រសិនបើមិនបកប្រែ អ្នកដែលនិយាយភាសាផ្សេងៗមិនអាចពង្រឹងកម្លាំងចិត្តក្រុមជំនុំបានទេ។ ៦ ក៏ប៉ុន្តែ បងប្អូនអើយ ប្រសិនបើឥឡូវនេះខ្ញុំមកឯអ្នករាល់គ្នាដោយនិយាយភាសាផ្សេងៗ តើនឹងមានប្រយោជន៍អ្វីដល់អ្នករាល់គ្នា ប្រសិនបើខ្ញុំមិននិយាយទៅអ្នករាល់គ្នាដោយការបើកបង្ហាញ ដោយចំណេះ ដោយទំនាយ ឬដោយសេចក្ដីបង្រៀននោះ?
៧ ដូចគ្នាដែរ របស់គ្មានជីវិតចេះបញ្ចេញសូរសំឡេង ទោះជាខ្លុយឬពិណក៏ដោយ។ ប៉ុន្តែប្រសិនបើគេមិនប្ដូរសូរឲ្យខ្ពស់ទាប តើអាចដឹងដោយដូចម្ដេចថា គេកំពុងផ្លុំខ្លុយឬដេញពិណបទអ្វី? ៨ ព្រោះប្រសិនបើត្រែបញ្ចេញសូរសំឡេងឥតច្បាស់ តើអ្នកណានឹងត្រៀមខ្លួនទៅច្បាំង? ៩ ដូចគ្នាដែរ ប្រសិនបើអ្នករាល់គ្នាមិននិយាយសម្ដីដែលគេស្រួលយល់ តើធ្វើដូចម្ដេចឲ្យគេដឹងថាអ្នករាល់គ្នាកំពុងនិយាយអ្វី? នោះមានន័យថាអ្នករាល់គ្នាកំពុងនិយាយឥតប្រយោជន៍។ ១០ ប្រហែលជាមានសូរស័ព្ទជាច្រើនក្នុងពិភពលោក តែសូរស័ព្ទទាំងអស់សុទ្ធតែមានអត្ថន័យ។ ១១ ដូច្នេះ ប្រសិនបើខ្ញុំមិនយល់អត្ថន័យនៃសូរស័ព្ទនោះ អ្នកដែលនិយាយនឹងចាត់ទុកខ្ញុំជាជនបរទេស ហើយខ្ញុំនឹងចាត់ទុកអ្នកដែលនិយាយជាជនបរទេស។ ១២ អ្នករាល់គ្នាក៏ដូច្នេះដែរ។ ដោយសារអ្នករាល់គ្នាប៉ងប្រាថ្នាយ៉ាងខ្លាំងឲ្យបានអំណោយពីសកម្មពលរបស់ព្រះ ចូរខំឲ្យបានអំណោយជាបរិបូរដើម្បីពង្រឹងកម្លាំងចិត្តក្រុមជំនុំ។
១៣ ម្ល៉ោះហើយ ចូរឲ្យអ្នកដែលនិយាយភាសាផ្សេង អធិដ្ឋានសុំឲ្យមានសមត្ថភាពបកប្រែ។ ១៤ ព្រោះបើខ្ញុំអធិដ្ឋានដោយនិយាយភាសាផ្សេង ខ្ញុំអធិដ្ឋានដោយសារអំណោយនៃសកម្មពលរបស់ព្រះ ប៉ុន្តែក្នុងគំនិត ខ្ញុំមិនយល់ទេ។ ១៥ ចុះតើខ្ញុំត្រូវធ្វើយ៉ាងណា? ខ្ញុំនឹងអធិដ្ឋានដោយអំណោយនៃសកម្មពលរបស់ព្រះ តែខ្ញុំក៏នឹងអធិដ្ឋានដោយគំនិតរបស់ខ្ញុំដែរ។ ខ្ញុំនឹងច្រៀងចម្រៀងសរសើរតម្កើងដោយសកម្មពលរបស់ព្រះ តែខ្ញុំក៏នឹងច្រៀងដោយគំនិតរបស់ខ្ញុំដែរ។ ១៦ បើមិនដូច្នេះ ពេលដែលអ្នកសរសើរព្រះដោយអំណោយនៃសកម្មពលរបស់លោក តើមនុស្សធម្មតាអាចនិយាយថា«អាមេន»ដូចម្ដេចបាន ពេលដែលអ្នកអរគុណព្រះ? ពីព្រោះអ្នកនោះមិនដឹងថាអ្នកកំពុងនិយាយអ្វីទេ។ ១៧ ពិតមែនតែអ្នកអរគុណព្រះយ៉ាងល្អ ប៉ុន្តែមនុស្សម្នាក់ទៀតមិនទទួលការលើកទឹកចិត្តទេ។ ១៨ ខ្ញុំសូមអរគុណព្រះ ដោយសារខ្ញុំនិយាយភាសាច្រើនជាងអ្នកទាំងអស់គ្នា។ ១៩ ទោះជាយ៉ាងនោះក៏ដោយ ក្នុងក្រុមជំនុំ ខ្ញុំសុខចិត្តនិយាយប្រាំម៉ាត់ដោយគំនិតរបស់ខ្ញុំ ដើម្បីខ្ញុំអាចបង្រៀនអ្នកឯទៀត ជាជាងនិយាយភាសាផ្សេងមួយម៉ឺនម៉ាត់។
២០ បងប្អូនអើយ កុំទៅជាអ្នកដែលមានសមត្ថភាពយល់ដឹងដូចកូនក្មេង ប៉ុន្តែអ្នករាល់គ្នាត្រូវធ្វើជាទារកចំពោះសេចក្ដីអាក្រក់ តែចំពោះសមត្ថភាពយល់ដឹង ត្រូវធ្វើជាមនុស្សពេញវ័យវិញ។ ២១ ច្បាប់ចែងថា៖ «ព្រះយេហូវ៉ាមានប្រសាសន៍ថា៖ ‹ខ្ញុំនឹងនិយាយទៅកាន់បណ្ដាជននេះ ដោយអណ្ដាតរបស់ជនបរទេស និងដោយបបូរមាត់របស់ជនចម្លែក ហើយសូម្បីតែពេលនោះក៏ដោយ ក៏ពួកគេនឹងមិនស្ដាប់តាមខ្ញុំដែរ›»។ ២២ ដូច្នេះ អំណោយជាការនិយាយភាសាផ្សេងៗជាសញ្ញាសម្គាល់សម្រាប់អ្នកមិនជឿ មិនមែនសម្រាប់អ្នកជឿទេ រីឯការប្រកាសទំនាយ នោះគឺសម្រាប់អ្នកជឿ មិនមែនសម្រាប់អ្នកមិនជឿឡើយ។ ២៣ ម្ល៉ោះហើយ ប្រសិនបើក្រុមជំនុំទាំងមូលជួបជុំគ្នានៅកន្លែងមួយ ហើយទាំងអស់គ្នានិយាយភាសាផ្សេងៗ រួចមានមនុស្សធម្មតាឬអ្នកមិនជឿចូលមក ពួកគេនឹងនិយាយថាអ្នករាល់គ្នាឆ្កួតហើយ មែនទេ? ២៤ ក៏ប៉ុន្តែប្រសិនបើអ្នករាល់គ្នាកំពុងប្រកាសទំនាយ ហើយអ្នកមិនជឿឬមនុស្សធម្មតាម្នាក់ចូលមក សម្ដីរបស់អ្នករាល់គ្នាប្រដៅតម្រង់អ្នកនោះ ហើយក៏ជំរុញឲ្យគាត់គិតពិចារណាឲ្យបានដិតដល់អំពីខ្លួនឯង ២៥ រឿងសម្ងាត់ក្នុងចិត្តគាត់នឹងត្រូវបង្ហាញឲ្យឃើញ រួចគាត់នឹងក្រាបក្បាលគោរពព្រះ ដោយប្រកាសថា៖ «ព្រះនៅក្នុងចំណោមអ្នករាល់គ្នាមែន»។
២៦ បងប្អូនអើយ បើដូច្នេះ តើត្រូវធ្វើយ៉ាងណាវិញ? ពេលដែលអ្នករាល់គ្នាជួបជុំគ្នា ម្នាក់មានទំនុកតម្កើង ម្នាក់បង្រៀន ម្នាក់រៀបរាប់ពីការបើកបង្ហាញ ម្នាក់និយាយភាសាផ្សេង ម្នាក់ទៀតបកប្រែ។ ចូរធ្វើអ្វីៗទាំងអស់ដើម្បីពង្រឹងកម្លាំងចិត្តគ្នាទៅវិញទៅមក។ ២៧ ម្យ៉ាងទៀត បើមានអ្នកណានិយាយភាសាផ្សេង ត្រូវមានតែពីរនាក់ប៉ុណ្ណោះ ឬច្រើនបំផុតបីនាក់ ហើយពួកគាត់ត្រូវប្ដូរវេនគ្នា។ ត្រូវមានអ្នកបកប្រែដែរ។ ២៨ ប៉ុន្តែប្រសិនបើគ្មានអ្នកបកប្រែ ចូរឲ្យពួកគាត់នៅស្ងៀមក្នុងក្រុមជំនុំ ហើយនិយាយម្នាក់ឯង និងនិយាយទៅព្រះ។ ២៩ ម្យ៉ាងទៀត ចូរឲ្យអ្នកប្រកាសទំនាយពីរឬបីនាក់និយាយ ហើយអ្នកឯទៀតត្រូវពិចារណាឲ្យយល់អត្ថន័យ។ ៣០ ប៉ុន្តែប្រសិនបើម្នាក់ទៀតទទួលការបើកបង្ហាញកាលដែលកំពុងអង្គុយនៅទីនោះ ចូរឲ្យអ្នកដែលកំពុងនិយាយនៅស្ងៀមវិញ។ ៣១ ព្រោះអ្នកទាំងអស់គ្នាអាចប្រកាសទំនាយ ម្នាក់ម្ដងៗ ដើម្បីឲ្យទាំងអស់គ្នាអាចរៀនបាននិងទទួលការលើកទឹកចិត្ត។ ៣២ ពួកអ្នកប្រកាសទំនាយត្រូវតែគ្រប់គ្រងអំណោយដែលពួកគាត់បានទទួលពីសកម្មពលរបស់ព្រះ។ ៣៣ ព្រោះព្រះមិនមែនជាព្រះនៃការខ្វះសណ្ដាប់ធ្នាប់ទេ តែជាព្រះនៃសេចក្ដីសុខសាន្ត។
ដូចក្នុងក្រុមជំនុំទាំងអស់របស់ពួកអ្នកបរិសុទ្ធ ៣៤ ចូរឲ្យពួកស្ត្រីនៅស្ងៀមក្នុងក្រុមជំនុំ ព្រោះពួកគាត់គ្មានច្បាប់និយាយឡើយ តែពួកគាត់ត្រូវចេះចុះចូល ដូចចែងក្នុងច្បាប់។ ៣៥ ប្រសិនបើពួកគាត់ចង់រៀនអ្វីមួយ ចូរឲ្យពួកគាត់សួរប្ដីពេលនៅផ្ទះវិញ ព្រោះបើស្ត្រីនិយាយទៅក្រុមជំនុំ នោះជារឿងអាប់ឱនកិត្ដិយស។
៣៦ ចុះតើប្រសាសន៍របស់ព្រះបានផ្ដើមចេញពីអ្នករាល់គ្នាឬ? ឬក៏ប្រសាសន៍របស់ព្រះបានឮដល់អ្នករាល់គ្នាតែប៉ុណ្ណោះ?
៣៧ ប្រសិនបើមានអ្នកណាគិតថាខ្លួនជាអ្នកប្រកាសទំនាយ ឬបានទទួលអំណោយនៃសកម្មពលរបស់ព្រះ ចូរឲ្យអ្នកនោះទទួលស្គាល់អ្វីដែលខ្ញុំបានសរសេរមកអ្នករាល់គ្នា ពីព្រោះសេចក្ដីនោះជាបញ្ញត្ដិរបស់លោកម្ចាស់។ ៣៨ ប៉ុន្តែបើមានអ្នកណាល្ងង់ ចូរឲ្យអ្នកនោះនៅល្ងង់ចុះ។ ៣៩ ដូច្នេះ បងប្អូនអើយ ចូរបន្តខំឲ្យបានអំណោយជាការប្រកាសទំនាយ តែត្រូវអនុញ្ញាតឲ្យនិយាយភាសាផ្សេងៗដែរ។ ៤០ ប៉ុន្តែចូរឲ្យអ្វីៗទាំងអស់ប្រព្រឹត្តទៅយ៉ាងត្រឹមត្រូវ និងដោយរបៀបរៀបរយ។
១៥ ឥឡូវ បងប្អូនអើយ ខ្ញុំចង់រំលឹកអំពីដំណឹងល្អដែលខ្ញុំបានប្រកាសប្រាប់ដល់អ្នករាល់គ្នា ដែលអ្នករាល់គ្នាព្រមទទួល ហើយកំពុងកាន់តាមនៅឡើយ។ ២ អ្នករាល់គ្នាកំពុងទទួលសេចក្ដីសង្គ្រោះតាមរយៈដំណឹងល្អដែលបានឮពីខ្ញុំ ប្រសិនបើនៅប្រកាន់ខ្ជាប់តាម។ បើមិនដូច្នេះ អ្នករាល់គ្នាបានជឿជាឥតប្រយោជន៍។
៣ ព្រោះខ្ញុំបានប្រាប់អ្នករាល់គ្នានូវសេចក្ដីដ៏សំខាន់បំផុត ជាសេចក្ដីដែលខ្ញុំក៏បានទទួលដែរ គឺថា គ្រិស្តបានទទួលមរណភាពដើម្បីលោះយើងពីភាពខុសឆ្គង* ស្របទៅតាមបទគម្ពីរ ៤ ហើយថាលោកត្រូវគេបញ្ចុះ រួចបានត្រូវប្រោសឲ្យរស់ឡើងវិញនៅថ្ងៃទីបី ស្របទៅតាមបទគម្ពីរ ៥ ហើយថាលោកបានលេចមកជួបកេផាស រួចសាវ័កទាំងដប់ពីរនាក់។ ៦ បន្ទាប់មក លោកលេចមកជួបបងប្អូនជាងប្រាំរយនាក់នៅពេលតែមួយ។ បងប្អូនភាគច្រើនពីចំណោមបងប្អូនទាំងនោះ នៅរស់រហូតដល់សព្វថ្ងៃនេះ តែពួកគាត់ខ្លះបានដេកលក់ក្នុងសេចក្ដីស្លាប់ហើយ។ ៧ ក្រោយមកទៀត លោកលេចមកជួបយ៉ាកុប រួចសាវ័កទាំងអស់ ៨ តែក្រោយបង្អស់ លោកលេចមកជួបខ្ញុំ ដែលប្រៀបដូចជាកូនកើតមុនពេលកំណត់។
៩ ព្រោះក្នុងចំណោមពួកសាវ័ក ខ្ញុំជាអ្នកតូចជាងគេ ក៏មិនសមនឹងហៅថាសាវ័កដែរ ពីព្រោះខ្ញុំបានបៀតបៀនក្រុមជំនុំរបស់ព្រះ។ ១០ ប៉ុន្តែដោយសារគុណដ៏វិសេសលើសលប់របស់ព្រះ ខ្ញុំមានមុខងារនេះ។ ហើយគុណដ៏វិសេសលើសលប់ដែលលោកមានចំពោះខ្ញុំ មិនបានទៅជាអសារឥតការទេ ព្រោះខ្ញុំបានធ្វើការនឿយហត់ជាងពួកគាត់ទាំងអស់ក្នុងកិច្ចបម្រើ។ ក៏ប៉ុន្តែមិនមែនខ្ញុំទេ តែជាគុណដ៏វិសេសលើសលប់ដែលព្រះមានចំពោះខ្ញុំ។ ១១ ប៉ុន្តែទោះជាខ្ញុំឬពួកគាត់ក៏ដោយ យើងបានផ្សព្វផ្សាយតាមរបៀបនេះ ដូច្នេះអ្នករាល់គ្នាបានជឿ។
១២ ឥឡូវ ប្រសិនបើយើងកំពុងផ្សព្វផ្សាយថាគ្រិស្តបានត្រូវប្រោសឲ្យរស់ពីស្លាប់ឡើងវិញ ហេតុអ្វីបានជាអ្នករាល់គ្នាខ្លះនិយាយថាមនុស្សស្លាប់នឹងមិនត្រូវប្រោសឲ្យរស់ឡើងវិញ? ១៣ ប្រសិនបើមនុស្សស្លាប់នឹងមិនត្រូវប្រោសឲ្យរស់ឡើងវិញមែន នោះគ្រិស្តក៏មិនបានត្រូវប្រោសឲ្យរស់ឡើងវិញដែរ។ ១៤ ប៉ុន្តែប្រសិនបើគ្រិស្តមិនបានត្រូវប្រោសឲ្យរស់ឡើងវិញ នោះការផ្សព្វផ្សាយរបស់យើងគ្មានប្រយោជន៍សោះ ហើយជំនឿរបស់យើងក៏គ្មានប្រយោជន៍ដែរ។ ១៥ មិនត្រឹមតែប៉ុណ្ណោះទេ ប៉ុន្តែយើងក៏បានធ្វើជាសាក្សីក្លែងក្លាយអំពីព្រះដែរ ពីព្រោះយើងបានផ្ដល់សក្ខីភាពមិនពិតអំពីព្រះថា លោកបានប្រោសគ្រិស្តឲ្យរស់ឡើងវិញ ប៉ុន្តែលោកមិនបានប្រោសគ្រិស្តឲ្យរស់ឡើងវិញទេ ប្រសិនបើមនុស្សស្លាប់នឹងមិនត្រូវប្រោសឲ្យរស់ឡើងវិញ។ ១៦ ព្រោះប្រសិនបើមនុស្សស្លាប់នឹងមិនត្រូវប្រោសឲ្យរស់ឡើងវិញ គ្រិស្តក៏មិនបានត្រូវប្រោសឲ្យរស់ឡើងវិញដែរ។ ១៧ ម្យ៉ាងទៀត ប្រសិនបើគ្រិស្តមិនបានត្រូវប្រោសឲ្យរស់ឡើងវិញ ជំនឿរបស់អ្នករាល់គ្នាគឺឥតប្រយោជន៍ទទេ ហើយការខុសឆ្គងរបស់អ្នករាល់គ្នាមិនបានត្រូវអភ័យទោសឲ្យឡើយ។ ១៨ ឯពួកអ្នកដែលបានដេកលក់ក្នុងសេចក្ដីស្លាប់ក្នុងគ្រិស្តបានវិនាសសាបសូន្យដែរ។ ១៩ ប្រសិនបើយើងបានសង្ឃឹមលើគ្រិស្តក្នុងជីវិតនេះប៉ុណ្ណោះ យើងជាមនុស្សគួរឲ្យអាណិតជាងគេ។
២០ ក៏ប៉ុន្តែគ្រិស្តបានត្រូវប្រោសឲ្យរស់ពីស្លាប់ឡើងវិញមែន ជាផលដំបូងពីចំណោមពួកអ្នកដែលបានដេកលក់ក្នុងសេចក្ដីស្លាប់។ ២១ ព្រោះសេចក្ដីស្លាប់គឺតាមរយៈបុរសម្នាក់ ដូច្នេះ ការប្រោសឲ្យរស់ពីស្លាប់ឡើងវិញក៏តាមរយៈបុរសម្នាក់ដែរ។ ២២ ព្រោះដូចទាំងអស់គ្នាកំពុងស្លាប់ក្នុងអាដាម នោះទាំងអស់គ្នានឹងត្រូវធ្វើឲ្យមានជីវិតឡើងវិញក្នុងគ្រិស្ត។ ២៣ ប៉ុន្តែម្នាក់ៗត្រូវធ្វើឲ្យមានជីវិតឡើងវិញ តាមលំដាប់របស់ខ្លួនគឺ គ្រិស្តជាផលដំបូង បន្ទាប់មក ក្នុងអំឡុងវត្តមានរបស់គ្រិស្ត ពួកអ្នកដែលជារបស់លោកនឹងត្រូវធ្វើឲ្យមានជីវិតឡើងវិញ។ ២៤ បន្ទាប់ពីនោះ គឺជាទីបញ្ចប់ ពេលដែលលោកប្រគល់រាជាណាចក្រជូនព្រះជាបិតារបស់លោក ក្រោយពីលោកបានបំផ្លាញការគ្រប់គ្រង អំណាច និងឫទ្ធានុភាពទាំងអស់ឲ្យសាបសូន្យ។ ២៥ ព្រោះលោកត្រូវគ្រប់គ្រងជាស្តេច រហូតដល់ព្រះដាក់សត្រូវទាំងអស់នៅក្រោមបាតជើងលោក។ ២៦ សត្រូវចុងក្រោយដែលនឹងត្រូវបំផ្លាញឲ្យសាបសូន្យគឺសេចក្ដីស្លាប់។ ២៧ ព្រោះព្រះបាន«ដាក់អ្វីៗទាំងអស់ឲ្យចុះចូលនៅក្រោមបាតជើងរបស់លោក»។ ប៉ុន្តែពេលដែលគាត់ចែងថា‹អ្វីៗទាំងអស់បានត្រូវធ្វើឲ្យចុះចូល› គឺជាក់ស្តែងហើយថា នេះមិនរួមបញ្ចូលព្រះដែលបានធ្វើឲ្យអ្វីៗទាំងអស់ចុះចូលចំពោះលោកទេ។ ២៨ ប៉ុន្តែក្រោយពីព្រះបានធ្វើឲ្យអ្វីៗទាំងអស់ចុះចូលចំពោះបុត្ររបស់លោក បុត្រនោះនឹងចុះចូលចំពោះព្រះដែលបានធ្វើឲ្យអ្វីៗទាំងអស់ចុះចូលចំពោះបុត្រនោះ ដើម្បីឲ្យព្រះធ្វើជាអ្វីៗទាំងអស់ដល់មនុស្សទាំងអស់។
២៩ ពុំនោះ តើពួកគេបានប្រយោជន៍អ្វីដោយទទួលការជ្រមុជដើម្បីទៅជាមនុស្សស្លាប់? ប្រសិនបើមនុស្សស្លាប់នឹងមិនត្រូវប្រោសឲ្យរស់ឡើងវិញសោះ ហេតុអ្វីពួកគេទទួលការជ្រមុជដើម្បីទៅជាមនុស្សស្លាប់? ៣០ ហេតុអ្វីក៏យើងប្រថុយនឹងគ្រោះថ្នាក់គ្រប់ពេលវេលាដូច្នេះ? ៣១ បងប្អូនអើយ ការដែលខ្ញុំប្រឈមមុខនឹងសេចក្ដីស្លាប់ជារៀងរាល់ថ្ងៃ នោះជារឿងពិតដូចអំណរដែលខ្ញុំមានក្នុងគ្រិស្តយេស៊ូជាម្ចាស់របស់យើង ដោយសារអ្នករាល់គ្នា។ ៣២ ប្រសិនបើខ្ញុំបានតយុទ្ធជាមួយនឹងសត្វសាហាវនៅក្រុងអេភេសូរ ដូចអ្នកឯទៀត តើមានប្រយោជន៍អ្វីដល់ខ្ញុំ? ប្រសិនបើមនុស្សស្លាប់នឹងមិនត្រូវប្រោសឲ្យរស់ឡើងវិញ «ចូរឲ្យយើងស៊ីផឹកទៅ ព្រោះស្អែកយើងត្រូវស្លាប់»។ ៣៣ កុំឲ្យអ្នកណាបំភាន់អ្នកឡើយ។ ការសេពគប់អាក្រក់បង្ខូចការប្រព្រឹត្តល្អ។ ៣៤ ចូរភ្ញាក់ខ្លួនដោយប្រព្រឹត្តអំពើសុចរិត ហើយកុំប្រព្រឹត្តខុសឡើយ ព្រោះមានអ្នកខ្លះគ្មានចំណេះអំពីព្រះ។ ខ្ញុំនិយាយដូច្នេះ ដើម្បីធ្វើឲ្យអ្នករាល់គ្នាអៀនខ្មាស។
៣៥ ទោះជាយ៉ាងនោះក៏ដោយ គេនឹងនិយាយថា៖ «តើមនុស្សស្លាប់នឹងត្រូវប្រោសឲ្យរស់ឡើងវិញយ៉ាងដូចម្ដេច? តើពួកគេនឹងមានរូបកាយបែបណា?»។ ៣៦ មនុស្សឥតវិចារណញ្ញាណ! អ្វីដែលអ្នកសាបព្រោះមានជីវិតឡើងវិញ លុះត្រាតែវាងាប់សិន ៣៧ ហើយអ្វីដែលអ្នកសាបព្រោះ នោះមិនមានរូបរាងដូចដើមដែលនឹងដុះនោះទេ តែជាគ្រាប់ទទេ ប្រហែលជាគ្រាប់ស្រូវសាលីឬគ្រាប់ពូជផ្សេងទៀត ៣៨ ប៉ុន្តែព្រះធ្វើឲ្យមានរូបរាងតាមដែលលោកពេញចិត្ត ក៏ឲ្យរូបរាងដល់គ្រាប់នីមួយៗតាមពូជវា។ ៣៩ សាច់ទាំងអស់មិនមែនដូចគ្នាទេ តែមនុស្សជាតិមានសាច់ម្យ៉ាង សត្វស្រុកមានសាច់ម្យ៉ាងទៀត សត្វស្លាបមានសាច់ម្យ៉ាង ហើយត្រីមានសាច់ម្យ៉ាងទៀត។ ៤០ ហើយមានរូបកាយសម្រាប់ស្ថានសួគ៌ និងមានរូបកាយសម្រាប់ផែនដី តែសិរីរុងរឿងរបស់រូបកាយសម្រាប់ស្ថានសួគ៌គឺម្យ៉ាង ហើយសិរីរុងរឿងរបស់រូបកាយសម្រាប់ផែនដីគឺម្យ៉ាងទៀត។ ៤១ រស្មីរុងរឿងរបស់ថ្ងៃគឺម្យ៉ាង ឯរស្មីរុងរឿងរបស់ខែគឺម្យ៉ាងទៀត ហើយរស្មីរុងរឿងរបស់ផ្កាយគឺម្យ៉ាងទៀត តាមពិតផ្កាយនានាមានរស្មីរុងរឿងផ្សេងៗពីគ្នា។
៤២ ការប្រោសមនុស្សស្លាប់ឲ្យរស់ឡើងវិញក៏ដូច្នេះដែរ។ រូបកាយដែលបានត្រូវសាបព្រោះអាចខូចទៅ តែរូបកាយដែលនឹងត្រូវប្រោសឲ្យរស់ឡើងវិញមិនអាចខូចទៅបានទេ។ ៤៣ រូបកាយបានត្រូវសាបព្រោះដោយអាប់ឱនកិត្ដិយស តែនឹងត្រូវប្រោសឲ្យរស់ឡើងវិញដោយមានសិរីរុងរឿង។ រូបកាយបានត្រូវសាបព្រោះដោយមានភាពទន់ខ្សោយ តែនឹងត្រូវប្រោសឲ្យរស់ឡើងវិញដោយមានឫទ្ធានុភាព។ ៤៤ រូបកាយបានត្រូវសាបព្រោះជាសាច់ឈាម តែនឹងត្រូវប្រោសឲ្យរស់ឡើងវិញជាវិញ្ញាណ។* ប្រសិនបើមានរូបកាយសាច់ឈាម ក៏មានរូបកាយវិញ្ញាណដែរ។ ៤៥ បទគម្ពីរចែងដូច្នេះថា៖ «អាដាម បុរសទីមួយបានទៅជាព្រលឹង* មានជីវិត»។ ឯអាដាមចុងក្រោយបានទៅជាវិញ្ញាណដែលផ្ដល់ជីវិត។ ៤៦ ទោះជាយ៉ាងនោះក៏ដោយ រូបកាយដំបូងមិនមែនជាវិញ្ញាណទេ តែជាសាច់ឈាម ប៉ុន្តែក្រោយមកមានរូបកាយជាវិញ្ញាណ។ ៤៧ បុរសទីមួយមកពីផែនដី ហើយបានត្រូវធ្វើពីធូលីដី ឯបុរសទីពីរមកពីស្ថានសួគ៌។ ៤៨ បុរសដែលបានត្រូវធ្វើពីធូលីដីមានលក្ខណៈយ៉ាងណា ពួកអ្នកដែលបានត្រូវធ្វើពីធូលីដីក៏មានលក្ខណៈយ៉ាងនោះដែរ ហើយបុរសដែលបានទៅស្ថានសួគ៌មានលក្ខណៈយ៉ាងណា ពួកអ្នកដែលនៅស្ថានសួគ៌ក៏មានលក្ខណៈយ៉ាងនោះដែរ។ ៤៩ ហើយដូចយើងមានរូបដូចរូបរបស់អ្នកដែលបានត្រូវធ្វើពីធូលីដី នោះយើងក៏នឹងមានរូបដូចរូបរបស់អ្នកដែលបានមកពីស្ថានសួគ៌ដែរ។
៥០ ក៏ប៉ុន្តែខ្ញុំសូមប្រាប់បងប្អូនថា មនុស្សដែលមានរូបកាយជាសាច់ឈាមមិនអាចទទួលរាជាណាចក្ររបស់ព្រះជាមត៌កឡើយ ហើយអ្វីដែលអាចខូចទៅ មិនអាចទទួលអ្វីដែលមិនអាចខូចជាមត៌កបានទេ។ ៥១ មើល! ខ្ញុំប្រាប់អាថ៌កំបាំងដ៏ពិសិដ្ឋមួយដល់អ្នករាល់គ្នា៖ មិនមែនយើងទាំងអស់គ្នានឹងដេកលក់ក្នុងសេចក្ដីស្លាប់ទេ តែយើងទាំងអស់គ្នានឹងត្រូវផ្លាស់ប្រែ ៥២ ក្នុងមួយរំពេច គឺក្នុងមួយប៉ប្រិចភ្នែក ក្នុងអំឡុងពេលដែលត្រែចុងក្រោយបន្លឺឡើង។ ព្រោះត្រែនឹងបន្លឺឡើង រួចមនុស្សស្លាប់នឹងត្រូវប្រោសឲ្យរស់ឡើងវិញដោយមិនអាចខូចបានឡើយ ហើយយើងនឹងត្រូវផ្លាស់ប្រែ។ ៥៣ ព្រោះអ្នកដែលអាចខូចរលួយត្រូវទៅជាអ្នកដែលមិនអាចខូចរលួយ ហើយអ្នកដែលអាចស្លាប់ត្រូវទៅជាអមតៈ។ ៥៤ ប៉ុន្តែពេលអ្នកដែលអាចខូចរលួយ ទៅជាអ្នកដែលមិនអាចខូចរលួយ ហើយអ្នកដែលអាចស្លាប់ ទៅជាអមតៈ នោះអ្វីដែលបទគម្ពីរចែងនឹងបានសម្រេច គឺថា៖ «សេចក្ដីស្លាប់បានត្រូវលេបបាត់ជារៀងរហូត»។ ៥៥ «សេចក្ដីស្លាប់អើយ តើជ័យជម្នះរបស់អ្នកនៅឯណា? សេចក្ដីស្លាប់អើយ តើទ្រនិចរបស់អ្នកនៅឯណា?»។ ៥៦ ទ្រនិចដែលបណ្ដាលឲ្យស្លាប់ជាភាពខុសឆ្គង តែច្បាប់* ផ្ដល់អំណាចឲ្យភាពខុសឆ្គង។ ៥៧ ក៏ប៉ុន្តែសូមអរគុណព្រះ ព្រោះលោកផ្ដល់ជ័យជម្នះឲ្យយើងតាមរយៈលោកយេស៊ូគ្រិស្តជាម្ចាស់របស់យើង!
៥៨ ដូច្នេះ បងប្អូនជាទីស្រឡាញ់អើយ ចូរពង្រឹងជំហរឲ្យមាំមួនឡើង ដោយមិនឲ្យរង្គោះរង្គើឡើយ ហើយចូរជាប់រវល់ក្នុងកិច្ចការដ៏ច្រើនរបស់លោកម្ចាស់ ដោយដឹងថាការដែលអ្នករាល់គ្នាខំប្រឹងធ្វើទាំងនឿយហត់ក្នុងលោកម្ចាស់ នោះមិនមែនឥតប្រយោជន៍ទេ។
១៦ ឥឡូវខ្ញុំសូមនិយាយអំពីការប្រមូលវិភាគទានសម្រាប់ពួកអ្នកបរិសុទ្ធ។ សូមធ្វើដូចដែលខ្ញុំបានណែនាំក្រុមជំនុំទាំងប៉ុន្មាននៅខេត្តកាឡាទី។ ២ រាល់ថ្ងៃដំបូងនៃសប្ដាហ៍ ចូរឲ្យអ្នករាល់គ្នាម្នាក់ៗទុករបស់ទ្រព្យខ្លះដោយឡែក តាមដែលខ្លួនមាន ដើម្បីកុំឲ្យចាប់ផ្ដើមប្រមូលវិភាគទាននៅពេលដែលខ្ញុំមកដល់។ ៣ ប៉ុន្តែពេលខ្ញុំមកដល់ នោះបុរសណាដែលអ្នករាល់គ្នាសរសេរសំបុត្រថាក្រុមជំនុំបានអនុម័ត ខ្ញុំនឹងចាត់បុរសទាំងនោះឲ្យយកអំណោយដ៏សប្បុរសរបស់អ្នករាល់គ្នាទៅក្រុងយេរូសាឡិម។ ៤ ក៏ប៉ុន្តែប្រសិនបើខ្ញុំទៅគឺសមជាង នោះពួកគាត់នឹងទៅទីនោះជាមួយនឹងខ្ញុំ។
៥ ប៉ុន្តែខ្ញុំនឹងមកឯអ្នករាល់គ្នាក្រោយពីខ្ញុំធ្វើដំណើរកាត់តំបន់ម៉ាសេដូន ព្រោះខ្ញុំនឹងធ្វើដំណើរកាត់តំបន់ម៉ាសេដូន ៦ ហើយប្រហែលជាខ្ញុំនឹងនៅជាមួយនឹងអ្នករាល់គ្នាមួយរយៈ ឬក៏ស្នាក់នៅទីនោះរហូតដល់ផុតរដូវត្រជាក់ ដើម្បីក្រោយមកអ្នករាល់គ្នាអាចជូនដំណើរខ្ញុំមួយកំណាត់ផ្លូវទៅកន្លែងដែលខ្ញុំបម្រុងនឹងទៅ។ ៧ ព្រោះខ្ញុំមិនចង់ជួបអ្នករាល់គ្នា ដោយគ្រាន់តែឆៀងចូលមួយភ្លែតនោះទេ ព្រោះខ្ញុំសង្ឃឹមថាអាចនៅជាមួយនឹងអ្នករាល់គ្នាយូរបន្ដិច ប្រសិនបើព្រះយេហូវ៉ាអនុញ្ញាត។ ៨ ប៉ុន្តែខ្ញុំនឹងនៅក្រុងអេភេសូររហូតដល់បុណ្យថ្ងៃទីហាសិប ៩ ព្រោះមានទ្វារបើកចំហយ៉ាងធំសម្រាប់ឲ្យខ្ញុំបំពេញកិច្ចបម្រើ ប៉ុន្តែមានអ្នកប្រឆាំងជាច្រើន។
១០ ក៏ប៉ុន្តែប្រសិនបើធីម៉ូថេមកដល់ កុំធ្វើឲ្យគាត់ភ័យខ្លាចក្នុងចំណោមអ្នករាល់គ្នាឡើយ ព្រោះគាត់បំពេញកិច្ចការរបស់ព្រះយេហូវ៉ា ដូចខ្ញុំដែរ។ ១១ ដូច្នេះ កុំឲ្យអ្នកណាមើលងាយគាត់។ ចូរជូនដំណើរគាត់មួយកំណាត់ផ្លូវដោយសុវត្ថិភាព ដើម្បីគាត់អាចមកឯខ្ញុំ ព្រោះខ្ញុំកំពុងរង់ចាំគាត់ជាមួយនឹងបងប្អូន។
១២ ចំណែកអាប៉ូឡុស បងប្រុសរបស់យើង ខ្ញុំបានសូមគាត់ម្ដងហើយម្ដងទៀតឲ្យមកឯអ្នករាល់គ្នាជាមួយនឹងបងប្អូន ក៏ប៉ុន្តែគាត់មិនចង់មកឥឡូវនេះសោះ តែគាត់នឹងមកពេលដែលគាត់មានឱកាស។
១៣ ចូរដឹងខ្លួនជានិច្ច ចូរកាន់ជំហរមាំមួនក្នុងជំនឿ ចូរប្រព្រឹត្តឲ្យដូចបុរស ចូរមានកម្លាំងខ្លាំងក្លាឡើង។ ១៤ ចូរអ្នករាល់គ្នាធ្វើអ្វីៗទាំងអស់ដោយសេចក្ដីស្រឡាញ់។
១៥ បងប្អូនអើយ ឥឡូវខ្ញុំសូមបំផុសទឹកចិត្តអ្នករាល់គ្នា៖ អ្នករាល់គ្នាដឹងថាពួកអ្នកផ្ទះរបស់ស្ទេផាណាសជាផលដំបូងនៅខេត្តអាខេយ៉ា ហើយពួកគាត់ប្រុងប្រៀបខ្លួនជានិច្ចដើម្បីបម្រើពួកអ្នកបរិសុទ្ធ។ ១៦ ចូរឲ្យអ្នករាល់គ្នាបន្តចុះចូលចំពោះមនុស្សបែបនោះ និងចំពោះអស់អ្នកដែលរួមសហការនិងអស់អ្នកដែលខំប្រឹងធ្វើការយ៉ាងនឿយហត់។ ១៧ ប៉ុន្តែខ្ញុំអរសប្បាយដោយសារស្ទេផាណាស ភ័រទូណាតុស និងអាខេកុសមានវត្តមាន ពីព្រោះការដែលពួកគាត់មក នោះជំនួសអ្នករាល់គ្នាដែលមិននៅទីនេះ ១៨ ដោយសារពួកគាត់បានធ្វើឲ្យខ្ញុំនិងអ្នករាល់គ្នាមានកម្លាំងចិត្ត* ឡើងវិញ។ ដូច្នេះ ចូរទទួលស្គាល់តម្លៃបុរសបែបនោះ។
១៩ ក្រុមជំនុំទាំងឡាយនៅតំបន់អាស៊ី* ផ្ដាំសួរសុខទុក្ខ។ អាគីឡានិងព្រីស្កា ព្រមទាំងក្រុមជំនុំដែលជួបជុំគ្នានៅផ្ទះរបស់ពួកគាត់ផ្ដាំសួរសុខទុក្ខអ្នករាល់គ្នាយ៉ាងស្មោះអស់ពីចិត្ត ក្នុងនាមជាអ្នកកាន់តាមលោកម្ចាស់។ ២០ បងប្អូនទាំងឡាយផ្ដាំសួរសុខទុក្ខអ្នករាល់គ្នា។ ចូរសួរសុខទុក្ខគ្នាទៅវិញទៅមក ដោយការថើបដែលប្រកបទៅដោយសេចក្ដីស្រឡាញ់ជាបងប្អូន។
២១ ខ្ញុំ ប៉ូល សរសេរពាក្យសួរសុខទុក្ខនេះដោយដៃខ្ញុំផ្ទាល់។
២២ ប្រសិនបើអ្នកណាគ្មានសេចក្ដីស្រឡាញ់ចំពោះលោកម្ចាស់ សូមឲ្យអ្នកនោះត្រូវបណ្ដាសា។ ឱលោកម្ចាស់អើយ! សូមអញ្ជើញមក! ២៣ សូមគុណដ៏វិសេសលើសលប់របស់លោកយេស៊ូជាម្ចាស់របស់យើងនៅជាមួយនឹងអ្នករាល់គ្នា។ ២៤ សូមឲ្យសេចក្ដីស្រឡាញ់របស់ខ្ញុំនៅជាមួយនឹងអ្នកទាំងអស់គ្នាដែលជាអ្នកកាន់តាមគ្រិស្តយេស៊ូ។
[កំណត់សម្គាល់]
ភាសាក្រិច«អាប៉ូស្តូឡូស»។ មានន័យថា«អ្នកដែលត្រូវគេចាត់ឲ្យទៅ»
មើលសេចក្ដីពន្យល់បន្ថែមផ្នែកទី៤
ឬ«បោះដែកគោលភ្ជាប់នឹងបង្គោលឈើ»។ មើលសេចក្ដីពន្យល់បន្ថែមផ្នែកទី៥
ការជ្រមុជទឹកជាពិធីសាសនា
មើលសេចក្ដីពន្យល់បន្ថែមផ្នែកទី៥
មើលកំណត់សម្គាល់ម៉ាថ ២:៤
ឬ«បោះដែកគោលភ្ជាប់នឹងបង្គោលឈើ»។ មើលសេចក្ដីពន្យល់បន្ថែមផ្នែកទី៥
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ន័យត្រង់«ភ្នូម៉ារបស់បុគ្គលម្នាក់នោះ»។ មើលសេចក្ដីពន្យល់បន្ថែមផ្នែកទី៦ខ
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ឬ«អ្នកបម្រើ» «ជំនួយការ»
ឬអាណាព្យាបាល។ សំដៅទៅអ្នកដែលថែរក្សាឬការពារកូនក្មេង
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់ម៉ាថ ៥:៣២
ឬ«ជនជាតិដទៃដែលមិនកាន់សាសនាគ្រិស្ត»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ភាសាក្រិច«សាថាណាស»។ មានន័យថា«អ្នកប្រឆាំង»ឬ«សត្រូវ»
ន័យត្រង់«ដើម្បីបំផ្លាញសាច់ឈាម»
មើលកំណត់សម្គាល់រ៉ូម ៥:១២
មើលកំណត់សម្គាល់ម៉ាថ ៥:៣២
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់ខ១១
មើលកំណត់សម្គាល់រ៉ូម ៥:១២
សំដៅទៅការបំពេញសេចក្ដីត្រូវការខាងផ្លូវភេទ
ភាសាក្រិច«សាថាណាស»។ មានន័យថា«អ្នកប្រឆាំង»ឬ«សត្រូវ»
មើលកំណត់សម្គាល់លូក ១:៥៩
ន័យត្រង់«អ្នកដែលមិនធ្លាប់រួមដំណេក»
មើលកំណត់សម្គាល់រ៉ូម ៥:១២
មើលកំណត់សម្គាល់ខ២៥
ន័យត្រង់«សេចក្ដីវេទនាក្នុងសាច់ឈាមខ្លួន»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់ខ២៥
មើលកំណត់សម្គាល់ខ២៥
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់ម៉ាថ ៥:២៩
មើលកំណត់សម្គាល់រ៉ូម ៥:១២
មើលកំណត់សម្គាល់ម៉ាថ ៥:១៧
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ការជ្រមុជទឹកជាពិធីសាសនា
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់ម៉ាថ ៥:៣២
ឬ«របៀបរបបពិភពលោក»
ន័យត្រង់«ពែងនៃពរ ដែលយើងឲ្យពរ»
ភាសាក្រិច«ដាយម៉ូនីអន»។ សំដៅទៅពួកទេវតាអាក្រក់
សំដៅទៅការធ្វើឲ្យព្រះយេហូវ៉ាទាស់ចិត្តដោយមិនគោរពប្រណិប័តន៍លោកផ្ដាច់មុខ
ឬ«ប្រមុខ»
ឬ«ប្រមុខ»
ជាទោសដែលទទួលដោយសារបានធ្វើអំពើប្រាសចាកសីលធម៌ខាងផ្លូវភេទ
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
សំដៅទៅអ្នកមិនជឿ
មើលកំណត់សម្គាល់ខ១
ឬ«សេចក្ដីស្រឡាញ់មិនចេះប្រច័ណ្ឌ»
ឬ«មិនដែលបរាជ័យ»
ន័យត្រង់«ទល់មុខគ្នា»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់រ៉ូម ៥:១២
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
មើលកំណត់សម្គាល់ម៉ាថ ៥:១៧
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់សកម្ម ២:៩