ជូនចំពោះគ្រិស្តសាសនិកនៅក្រុងអេភេសូរ
១ ពីខ្ញុំ ប៉ូល សាវ័ក* របស់គ្រិស្ត* យេស៊ូតាមបំណងប្រាថ្នារបស់ព្រះ ជូនចំពោះពួកអ្នកបរិសុទ្ធនិងពួកអ្នកស្មោះត្រង់ដែលជាអ្នកកាន់តាមគ្រិស្តយេស៊ូនៅក្រុងអេភេសូរ៖
២ សូមឲ្យអ្នករាល់គ្នាបានប្រកបដោយគុណដ៏វិសេសលើសលប់និងសេចក្ដីសុខសាន្តពីព្រះ ជាបិតារបស់យើង និងពីលោកម្ចាស់យេស៊ូគ្រិស្ត។
៣ សូមសរសើរព្រះ ជាបិតារបស់លោកយេស៊ូគ្រិស្តដែលជាម្ចាស់របស់យើង ព្រោះនៅស្ថានសួគ៌ លោកបានឲ្យពរសព្វបែបយ៉ាងមកយើងជាអ្នកកាន់តាមគ្រិស្ត តាមរយៈសកម្មពល* របស់លោក ៤ ដូចលោកបានជ្រើសរើសយើងមុនកំណើតពិភពលោកឲ្យរួបរួមជាមួយនឹងគ្រិស្ត ដើម្បីឲ្យយើងបរិសុទ្ធ ហើយឥតសៅហ្មងនៅចំពោះលោក ដោយសេចក្ដីស្រឡាញ់។ ៥ ព្រោះលោកបានជ្រើសរើសយើងទុកជាមុនឲ្យទៅជាកូនរបស់លោកតាមរយៈលោកយេស៊ូគ្រិស្ត តាមដែលលោកពេញចិត្ត និងតាមបំណងប្រាថ្នារបស់លោក ៦ ដើម្បីឲ្យលោកទទួលសេចក្ដីសរសើរដោយសារភាពរុងរឿងនៃគុណដ៏វិសេសលើសលប់ដែលលោកមានលើយើង តាមរយៈបុត្រជាទីស្រឡាញ់របស់លោក។ ៧ ដោយបង់ថ្លៃលោះ នោះបុត្រលោកបានរំដោះយើងតាមរយៈឈាមរបស់ខ្លួន ពោលគឺយើងទទួលការអភ័យទោសចំពោះកំហុសរបស់យើង ដោយសារភាពបរិបូរនៃគុណដ៏វិសេសលើសលប់របស់លោក។
៨ លោកបានធ្វើឲ្យគុណដ៏វិសេសលើសលប់របស់លោកមានជាបរិបូរលើយើង ព្រមទាំងប្រាជ្ញានិងការយល់ដឹងគ្រប់យ៉ាង ៩ ដោយធ្វើឲ្យយើងស្គាល់អាថ៌កំបាំងដ៏ពិសិដ្ឋអំពីបំណងប្រាថ្នារបស់លោក។ អាថ៌កំបាំងនោះគឺអំពីអ្វីដែលលោកពេញចិត្តធ្វើ តាមការតាំងចិត្តរបស់លោក ១០ ដើម្បីរៀបចំរបៀបចាត់ចែងមួយនៅពេលដែលគ្រាកំណត់បានមកដល់ទីបញ្ចប់ ពោលគឺ ដើម្បីបង្រួបបង្រួមអ្វីៗទាំងអស់ម្ដងទៀតក្នុងគ្រិស្ត គឺអ្វីៗនៅស្ថានសួគ៌និងអ្វីៗនៅផែនដី។ គឺក្នុងគ្រិស្តហើយ ដែលអ្វីៗទាំងអស់នឹងត្រូវបង្រួបបង្រួម។ ១១ ហើយយើងបានត្រូវតែងតាំងជាអ្នកទទួលមត៌កដោយរួមគ្នាជាមួយនឹងលោក ដោយយើងបានត្រូវជ្រើសរើសទុកជាមុនស្របតាមគោលបំណងរបស់លោកដែលធ្វើអ្វីៗទាំងអស់តាមបំណងប្រាថ្នារបស់លោកតម្រូវ ១២ ដើម្បីឲ្យសិរីរុងរឿងរបស់លោកបានត្រូវសរសើរតម្កើងតាមរយៈយើង ជាអ្នកដែលបានសង្ឃឹមលើគ្រិស្តមុនគេ។ ១៣ ប៉ុន្តែអ្នករាល់គ្នាក៏បានសង្ឃឹមលើលោកដែរ ក្រោយពីអ្នករាល់គ្នាបានឮបណ្ដាំអំពីសេចក្ដីពិត គឺជាដំណឹងល្អអំពីសេចក្ដីសង្គ្រោះរបស់អ្នករាល់គ្នា។ ក្រោយពីអ្នករាល់គ្នាបានជឿហើយ នោះតាមរយៈលោកដែរ ព្រះបានបិទត្រាមួយលើអ្នករាល់គ្នា ពោលគឺសកម្មពលបរិសុទ្ធដែលលោកបានសន្យាឲ្យ ១៤ ហើយនោះជាការបញ្ចាំចិត្តដែលបញ្ជាក់មត៌ករបស់យើង។ ការបោះត្រានោះគឺដើម្បីរំដោះរាស្ត្ររបស់ព្រះផ្ទាល់ដោយការលោះ ដើម្បីឲ្យសិរីរុងរឿងរបស់លោកបានត្រូវសរសើរតម្កើង។
១៥ ហេតុនេះ តាំងពីខ្ញុំបានឮអំពីជំនឿដែលអ្នករាល់គ្នាមានលើលោកម្ចាស់យេស៊ូនិងចំពោះពួកអ្នកបរិសុទ្ធទាំងឡាយ ខ្ញុំក៏ ១៦ ថ្លែងអំណរគុណឥតឈប់ដោយសារអ្នករាល់គ្នា។ ខ្ញុំនៅតែអធិដ្ឋានអំពីអ្នករាល់គ្នាជានិច្ច ១៧ ដើម្បីឲ្យព្រះដែលជាបិតា ដែលប្រកបទៅដោយសិរីរុងរឿង គឺព្រះរបស់លោកយេស៊ូគ្រិស្តដែលជាម្ចាស់របស់យើង ផ្ដល់ឲ្យអ្នករាល់គ្នាមានប្រាជ្ញានិងការយល់ដឹងអំពីអ្វីដែលលោកបើកបង្ហាញ ក្នុងពេលដែលអ្នកទទួលចំណេះត្រឹមត្រូវអំពីលោក ១៨ លោកបានបំភ្លឺភ្នែក* អ្នករាល់គ្នា ដើម្បីឲ្យស្គាល់សេចក្ដីសង្ឃឹមដែលលោកបានហៅអ្នករាល់គ្នាមកទទួល ហើយឲ្យស្គាល់ទ្រព្យវិសេសក្រៃលែងដែលលោកទុកជាមត៌កសម្រាប់ពួកអ្នកបរិសុទ្ធ ១៩ ហើយឲ្យស្គាល់ឫទ្ធានុភាពខ្លាំងមហិមាដែលលោកបានសម្ដែងចំពោះយើងដែលជាអ្នកជឿ។ នោះបានសឲ្យឃើញក្នុងកិច្ចការដែលបានត្រូវសម្រេចដោយឫទ្ធានុភាពខ្លាំងក្លារបស់លោក ២០ ដែលលោកបានប្រើក្នុងករណីរបស់គ្រិស្ត ពេលដែលលោកប្រោសគ្រិស្តឲ្យរស់ពីស្លាប់ឡើងវិញ ហើយឲ្យអង្គុយនៅខាងស្ដាំលោកនៅស្ថានសួគ៌ ២១ ខ្ពង់ខ្ពស់ជាងគ្រប់រដ្ឋាភិបាល អំណាច ឫទ្ធានុភាព ការគ្រប់គ្រង និងនាមទាំងអស់ មិនគ្រាន់តែនៅបច្ចុប្បន្ននេះ* ប៉ុណ្ណោះទេ តែនៅអនាគតដែរ។ ២២ ព្រះក៏បានដាក់អ្វីៗទាំងអស់ឲ្យចុះចូលក្រោមបាតជើងរបស់លោក ហើយបានតែងតាំងលោកជាប្រមុខនៃអ្វីៗទាំងអស់ដើម្បីក្រុមជំនុំ ២៣ ដែលជារូបកាយរបស់លោក និងដែលបានត្រូវបំពេញដោយសារលោក ហើយគឺលោកដែលបំពេញអ្វីៗទាំងអស់ ក្នុងអ្វីៗទាំងអស់។
២ ម្យ៉ាងទៀត ព្រះបានធ្វើឲ្យអ្នករាល់គ្នាមានជីវិត ទោះបីអ្នករាល់គ្នាធ្លាប់ជាមនុស្សស្លាប់ ដោយសារកំហុសនិងការខុសឆ្គង* របស់អ្នករាល់គ្នាក៏ដោយ។ ២ គឺជាការទាំងនោះដែលអ្នករាល់គ្នាធ្លាប់ប្រព្រឹត្តតាមមនុស្សឯទៀតក្នុងរបៀបរបបពិភពលោកនេះ តាមអ្នកដែលគ្រប់គ្រងលើអំណាចនៃខ្យល់អាកាសដែលជាចិត្តគំនិត* ដែលមានឥទ្ធិពលលើពួកអ្នកមិនស្ដាប់បង្គាប់។ ៣ ពិតមែនតែយើងទាំងអស់គ្នាធ្លាប់ប្រព្រឹត្តតាមសេចក្ដីប៉ងប្រាថ្នានៃរូបកាយរបស់យើង ដោយធ្វើអ្វីៗតាមបំណងប្រាថ្នារបស់រូបកាយ ក៏បានធ្វើតាមគំនិតរបស់យើង ហើយពីកំណើត យើងជាអ្នកគួរនឹងរងកំហឹងរបស់ព្រះ ដូចអ្នកឯទៀតដែរ ៤ ប៉ុន្តែព្រះមានសេចក្ដីមេត្ដាករុណាដ៏បរិបូរ ហើយដោយសារលោកស្រឡាញ់យើងយ៉ាងខ្លាំង ៥ លោកបានធ្វើឲ្យយើងមានជីវិតជាមួយនឹងគ្រិស្ត ទោះបីយើងធ្លាប់ជាមនុស្សស្លាប់ដោយសារកំហុសរបស់យើងក៏ដោយ (អ្នករាល់គ្នាបានត្រូវសង្គ្រោះដោយសារគុណដ៏វិសេសលើសលប់) ៦ ហើយលោកបានធ្វើឲ្យយើងមានជីវិតជាមួយគ្នា ក៏បានឲ្យយើងអង្គុយជាមួយគ្នានៅស្ថានសួគ៌ ក្នុងនាមជាអ្នកកាន់តាមគ្រិស្ត ៧ ដើម្បីនៅថ្ងៃមុខ* លោកនឹងសម្ដែងឲ្យឃើញនូវភាពបរិបូរក្រៃលែងនៃគុណដ៏វិសេសលើសលប់របស់លោក តាមរយៈសេចក្ដីមេត្ដាករុណាដែលលោកបង្ហាញចំពោះយើងជាអ្នកកាន់តាមគ្រិស្តយេស៊ូ។
៨ ដោយសារគុណដ៏វិសេសលើសលប់នេះ អ្នករាល់គ្នាបានត្រូវសង្គ្រោះតាមរយៈជំនឿ ហើយនេះមិនមែនដោយសារអ្នករាល់គ្នាទេ តែជាអំណោយពីព្រះ។ ៩ នោះមិនមែនដោយសារការប្រព្រឹត្តទេ ដើម្បីកុំឲ្យមនុស្សណាម្នាក់មានហេតុអួតអាង។ ១០ ព្រោះយើងជាស្នាដៃរបស់លោក ហើយដោយសារយើងជាអ្នកកាន់តាមគ្រិស្តយេស៊ូ យើងបានត្រូវបង្កើតដើម្បីប្រព្រឹត្តការល្អដែលព្រះបានរៀបចំទុកជាមុនឲ្យយើងធ្វើ។
១១ ដូច្នេះ ចូរចាំមិនភ្លេចថា ពីមុនអ្នករាល់គ្នាមានដើមកំណើត* ជាជនជាតិដទៃ ហើយពួកអ្នកដែលបានទទួលការកាត់ចុងស្បែក* ពីមនុស្ស បានហៅអ្នករាល់គ្នាថា«ពួកអ្នកមិនកាត់ចុងស្បែក»។ ១២ ហើយចូរចាំថា នៅពេលនោះអ្នករាល់គ្នាមិនស្គាល់គ្រិស្តទេ ក៏នៅដាច់ពីរដ្ឋអ៊ីស្រាអែល ហើយមិនមែនជាភាគីនៃកិច្ចព្រមព្រៀងដែលទាក់ទងនឹងសេចក្ដីសន្យា។ អ្នករាល់គ្នាក៏រស់នៅក្នុងពិភពលោកដោយគ្មានសេចក្ដីសង្ឃឹមនិងដោយមិនស្គាល់ព្រះ។ ១៣ ប៉ុន្តែឥឡូវនេះ ព្រោះអ្នករាល់គ្នាជាអ្នកកាន់តាមគ្រិស្ត នោះអ្នកដែលធ្លាប់នៅឆ្ងាយបានចូលមកជិតដោយសារឈាមរបស់គ្រិស្ត។ ១៤ ព្រោះលោកបាននាំឲ្យយើងមានសន្ដិភាព គឺលោកដែលបានធ្វើឲ្យក្រុមទាំងពីរទៅជាក្រុមតែមួយវិញ ក៏បានបំផ្លាញជញ្ជាំងដែលជាខណ្ឌរវាងក្រុមទាំងពីរ ដែលធ្វើឲ្យពួកគេនៅដាច់ពីគ្នា។ ១៥ តាមរយៈរូបកាយ* របស់លោក នោះលោកបានបំបាត់ហេតុដែលនាំឲ្យពួកគេធ្វើជាសត្រូវ ពោលគឺច្បាប់* ដែលជាបញ្ញត្ដិនិងក្រឹត្យផ្សេងៗ ដើម្បីឲ្យលោកធ្វើឲ្យក្រុមទាំងពីរ ដែលជាអ្នកកាន់តាមលោក ទៅជាមនុស្សថ្មីម្នាក់ ហើយធ្វើឲ្យមានសន្ដិភាព ១៦ ហើយដើម្បីឲ្យលោកផ្សះផ្សាក្រុមទាំងពីរជាមួយនឹងព្រះ តាមរយៈបង្គោលទារុណកម្ម* ឲ្យក្រុមទាំងពីរទៅជារូបកាយតែមួយ ពីព្រោះលោកបានរម្ងាប់ការស្អប់គ្នា តាមរយៈលោកផ្ទាល់។ ១៧ ហើយលោកបានមកប្រកាសប្រាប់ដំណឹងល្អអំពីសន្ដិភាពដល់អ្នករាល់គ្នា ទាំងអ្នកនៅឆ្ងាយ ទាំងអ្នកនៅជិត ១៨ ពីព្រោះតាមរយៈលោក នោះពួកយើងដែលជាក្រុមទាំងពីរ មានផ្លូវចូលទៅជិតបិតានៅស្ថានសួគ៌ តាមរយៈសកម្មពលតែមួយ។
១៩ ដូច្នេះ អ្នករាល់គ្នាប្រាកដជាមិនមែនជាជនចម្លែកនិងជាអ្នកស្នាក់នៅទៀតទេ ប៉ុន្តែអ្នករាល់គ្នាជាជនរួមជាតិរបស់ពួកអ្នកបរិសុទ្ធ ហើយជាសមាជិកនៃក្រុមគ្រួសាររបស់ព្រះ ២០ ហើយអ្នករាល់គ្នាបានត្រូវសាងសង់លើគ្រឹះនៃពួកសាវ័កនិងពួកអ្នកប្រកាសទំនាយ ឯថ្មគ្រឹះសំខាន់ជាងគេគឺគ្រិស្តយេស៊ូផ្ទាល់។ ២១ ដោយរួបរួមជាមួយនឹងលោក នោះសំណង់ទាំងមូលកំពុងក្លាយទៅជាវិហារបរិសុទ្ធសម្រាប់ព្រះយេហូវ៉ា ដោយមានផ្នែកនីមួយៗជាប់គ្នាយ៉ាងមាំ។ ២២ ដោយរួបរួមជាមួយនឹងលោក អ្នករាល់គ្នាក៏កំពុងត្រូវសាងសង់ជាមួយគ្នាឲ្យក្លាយទៅជាលំនៅសម្រាប់ឲ្យព្រះអាស្រ័យនៅដោយសកម្មពលរបស់លោក។
៣ ហេតុនេះ ខ្ញុំ ប៉ូល ដែលជាអ្នកទោសដើម្បីគ្រិស្តយេស៊ូ ដើម្បីជាប្រយោជន៍ដល់អ្នករាល់គ្នាដែលជាជនជាតិដទៃ . . . ២ ប្រសិនបើអ្នករាល់គ្នាពិតជាបានឮថា ខ្ញុំបានទទួលភារកិច្ចជួយអ្នករាល់គ្នាឲ្យទទួលប្រយោជន៍ពីគុណដ៏វិសេសលើសលប់របស់ព្រះ ៣ គឺថា អាថ៌កំបាំងដ៏ពិសិដ្ឋបានត្រូវបើកបង្ហាញដល់ខ្ញុំ ដូចខ្ញុំបានសរសេរយ៉ាងខ្លីខាងលើ។ ៤ អាស្រ័យហេតុនេះ ពេលដែលអ្នករាល់គ្នាអានសេចក្ដីនេះ អ្នករាល់គ្នាអាចដឹងថាខ្ញុំមានការយល់ដឹងយ៉ាងណាអំពីអាថ៌កំបាំងដ៏ពិសិដ្ឋអំពីគ្រិស្ត។ ៥ នៅជំនាន់មុនៗ អាថ៌កំបាំងនេះមិនបានត្រូវបើកឲ្យមនុស្សដឹង ដូចបានត្រូវបើកបង្ហាញដល់ពួកសាវ័កបរិសុទ្ធនិងពួកអ្នកប្រកាសទំនាយរបស់ព្រះ តាមរយៈសកម្មពល* របស់លោកទេ។ ៦ អាថ៌កំបាំងនោះគឺថា ជនជាតិដទៃត្រូវធ្វើជាអ្នកទទួលមត៌ករួមគ្នា ហើយជាអវយវៈនៃរូបកាយតែមួយ ក៏មានចំណែកក្នុងសេចក្ដីសន្យារបស់ព្រះជាមួយនឹងយើង ដោយសារពួកគេជាអ្នកកាន់តាមគ្រិស្តយេស៊ូតាមរយៈដំណឹងល្អ។ ៧ ខ្ញុំបានទៅជាអ្នកបម្រើនៃអាថ៌កំបាំងនេះ ដោយសារគុណដ៏វិសេសលើសលប់របស់ព្រះ។ លោកបានឲ្យអំណោយទាននេះដល់ខ្ញុំ ពេលដែលលោកឲ្យឫទ្ធានុភាពរបស់លោកដល់ខ្ញុំ។
៨ គុណដ៏វិសេសលើសលប់នេះបានត្រូវឲ្យដល់ខ្ញុំ ដែលជាអ្នកតូចជាងអ្នកតូចបំផុតក្នុងចំណោមពួកអ្នកបរិសុទ្ធ។ គុណដ៏វិសេសលើសលប់នេះគឺថា ខ្ញុំត្រូវប្រកាសដំណឹងល្អដល់ប្រជាជាតិនានា អំពីទ្រព្យសម្បត្ដិរបស់គ្រិស្តដែលជាទ្រព្យសម្បត្ដិដ៏អស្ចារ្យហួសពីការនឹកស្មាន ៩ ហើយត្រូវធ្វើឲ្យមនុស្សទាំងឡាយយល់អំពីរបៀបដែលអាថ៌កំបាំងដ៏ពិសិដ្ឋត្រូវចាត់ចែង ជាអាថ៌កំបាំងដែលបានត្រូវលាក់ទុកតាំងពីអស់កាលដ៏យូរលង់នៅក្នុងព្រះដែលបានបង្កើតអ្វីៗទាំងអស់។ ១០ ការនេះគឺដើម្បីឲ្យរដ្ឋាភិបាលនិងអាជ្ញាធរទាំងឡាយនៅស្ថានសួគ៌ដឹងឥឡូវនេះអំពីលក្ខណៈដ៏ច្រើនអនេកនៃប្រាជ្ញារបស់ព្រះ តាមរយៈក្រុមជំនុំ ១១ ស្របទៅតាមគោលបំណងដែលមានជានិរន្តរ៍ដែលលោកបានគ្រោងទុកទាក់ទងនឹងគ្រិស្ត គឺលោកយេស៊ូជាម្ចាស់របស់យើង ១២ ដែលដោយសារលោក យើងអាចនិយាយដោយក្លាហាន ហើយតាមរយៈជំនឿរបស់យើងលើលោក យើងមានផ្លូវចូលទៅជិតព្រះដោយមានទំនុកចិត្ត។ ១៣ ដូច្នេះ ខ្ញុំសូមអ្នករាល់គ្នាកុំឈប់តស៊ូព្រោះតែសេចក្ដីវេទនាដែលខ្ញុំមានដើម្បីអ្នករាល់គ្នា ព្រោះនោះនាំឲ្យអ្នករាល់គ្នាទទួលកិត្ដិយស។
១៤ . . . ហេតុនេះ ខ្ញុំលុតជង្គង់អធិដ្ឋានដល់បិតានៅស្ថានសួគ៌ ១៥ ដែលគ្រប់គ្រួសារនៅស្ថានសួគ៌និងនៅផែនដីមាននាមត្រកូលពីលោកមក ១៦ ហើយខ្ញុំសុំលោក ដែលមានសិរីរុងរឿងដ៏បរិបូរ ធ្វើឲ្យអ្នករាល់គ្នាមានកម្លាំងចិត្តខ្លាំងក្លា តាមរយៈសកម្មពលរបស់លោក ១៧ ហើយឲ្យគ្រិស្តអាស្រ័យនៅក្នុងចិត្តអ្នករាល់គ្នាជាមួយនឹងសេចក្ដីស្រឡាញ់ តាមរយៈជំនឿរបស់អ្នក ហើយឲ្យអ្នករាល់គ្នាបានចាក់ឫសនិងតាំងឡើងលើគ្រឹះមាំមួន ១៨ ដើម្បីឲ្យអ្នករាល់គ្នាអាចយល់ច្បាស់ដូចពួកអ្នកបរិសុទ្ធទាំងអស់អំពីទទឹង បណ្ដោយ កម្ពស់ និងជម្រៅនៃសេចក្ដីពិត ១៩ ហើយក្នុងបំណងឲ្យអ្នករាល់គ្នាស្គាល់សេចក្ដីស្រឡាញ់របស់គ្រិស្ត ដែលលើសពីចំណេះដឹង ដើម្បីឲ្យអ្នករាល់គ្នាបានពេញទៅដោយគុណសម្បត្ដិទាំងអស់ដែលព្រះផ្ដល់ឲ្យ។
២០ ចំពោះព្រះដែលអាចធ្វើហួសពីអ្វីៗទាំងអស់ដែលយើងសុំឬគិតឃើញ ដោយឫទ្ធានុភាពរបស់លោកដែលកំពុងមានសកម្មភាពក្នុងយើង ២១ សូមឲ្យលោកទទួលការសរសើរតម្កើងតាមរយៈក្រុមជំនុំ និងតាមរយៈគ្រិស្តយេស៊ូ នៅគ្រប់ជំនាន់ជារៀងរហូតតទៅ។ អាមេន។
៤ ដូច្នេះ ខ្ញុំ ដែលជាអ្នកទោសដើម្បីលោកម្ចាស់ សូមអង្វរអ្នករាល់គ្នាឲ្យប្រព្រឹត្តសមជាអ្នកដែលបានត្រូវហៅ ២ ពោលគឺ ដោយមានចិត្តរាបទាបនិងចិត្តស្លូតបូតជានិច្ច ថែមទាំងមានចិត្តធ្ងន់ ហើយទ្រាំទ្រគ្នាទៅវិញទៅមកដោយសេចក្ដីស្រឡាញ់ ៣ ព្រមទាំងព្យាយាមរក្សាឲ្យមានសាមគ្គីភាពដែលមកពីសកម្មពល* របស់ព្រះ ដោយមានសេចក្ដីសុខសាន្តទុកជាចំណងដែលនាំឲ្យមានឯកភាព។ ៤ មានរូបកាយតែមួយ ហើយសកម្មពលតែមួយ ដូចអ្នករាល់គ្នាបានត្រូវហៅដើម្បីឲ្យមានសេចក្ដីសង្ឃឹមតែមួយ។ ៥ មានលោកម្ចាស់តែមួយ ជំនឿតែមួយ ការជ្រមុជទឹក* តែមួយ ៦ ព្រះតែមួយនិងបិតាតែមួយរបស់មនុស្សទាំងអស់ ហើយលោកនៅលើមនុស្សទាំងអស់ តាមរយៈមនុស្សទាំងអស់ និងក្នុងមនុស្សទាំងអស់។
៧ ឯយើងម្នាក់ៗបានទទួលគុណដ៏វិសេសលើសលប់ ទៅតាមកម្រិតដែលគ្រិស្តបានផ្ដល់អំណោយទាននោះ។ ៨ ដូច្នេះ លោកមានប្រសាសន៍ថា៖ «ពេលដែលលោកឡើងទៅលើ លោកបាននាំយកឈ្លើយសឹកទៅជាមួយ ក៏បានឲ្យអំណោយជាមនុស្ស»។ ៩ តើពាក្យថា«លោកបានឡើងទៅលើ»មានន័យដូចម្ដេច? នោះមានន័យថាលោកក៏បានចុះមកក្រោមដល់ផែនដី។ ១០ លោកដែលបានចុះមកក្រោម គឺជាលោកដែលបានឡើងទៅលើខ្ពស់ជាងស្ថានសួគ៌ទាំងអស់ដែរ ដើម្បីលោកអាចសម្រេចការទាំងអស់បាន។
១១ ហើយលោកបានផ្ដល់អ្នកខ្លះឲ្យធ្វើជាសាវ័ក ខ្លះឲ្យធ្វើជាអ្នកប្រកាសទំនាយ ខ្លះឲ្យធ្វើជាអ្នកផ្សព្វផ្សាយដំណឹងល្អ ខ្លះឲ្យធ្វើជាគង្វាលនិងអ្នកបង្រៀន ១២ ដើម្បីកែតម្រង់ពួកអ្នកបរិសុទ្ធ ដើម្បីបំពេញកិច្ចបម្រើ ដើម្បីធ្វើឲ្យរូបកាយរបស់គ្រិស្តបានមាំមួនឡើង ១៣ រហូតដល់យើងទាំងអស់គ្នាមានឯកភាពក្នុងជំនឿនិងចំណេះត្រឹមត្រូវអំពីបុត្រព្រះ រហូតដល់មានភាពជាបុរសពេញវ័យ ហើយស្មើកម្រិតកម្ពស់របស់គ្រិស្ត ១៤ ដើម្បីកុំឲ្យយើងនៅជាកូនក្មេងទៀត ក៏មិនត្រូវមានគំនិតរេចុះរេឡើងដូចរបស់ដែលយោលតាមរលកសមុទ្រ ឬត្រូវបក់ផាត់ទៅនេះទៅនោះដោយខ្យល់នៃសេចក្ដីបង្រៀនគ្រប់បែបយ៉ាង ដោយស្ដាប់មនុស្សដែលជាអ្នកបោកបញ្ឆោត ហើយប្រើកលល្បិចដើម្បីប្រឌិតរឿងមិនពិត។ ១៥ តែដោយនិយាយសេចក្ដីពិត ចូរឲ្យយើងធំលូតលាស់ឡើងដោយសេចក្ដីស្រឡាញ់ឲ្យពេញវ័យក្នុងគ្រប់ការទាំងអស់នៅក្រោមគ្រិស្តដែលជាប្រមុខ។* ១៦ ដោយសារលោក អវយវៈទាំងអស់នៃរូបកាយក៏លូតលាស់ឡើង ហើយដោយសារអវយវៈនីមួយៗជាប់គ្នាយ៉ាងល្អ និងសហការគ្នាតាមរយៈសន្លាក់ឆ្អឹងផ្សេងៗដែលបំពេញតួនាទីសំខាន់ៗ តាមអ្វីដែលបានត្រូវកំណត់ឲ្យ នោះធ្វើឲ្យរូបកាយទាំងមូលធំលូតលាស់ ដើម្បីពង្រឹងខ្លួនឯងឡើងដោយសេចក្ដីស្រឡាញ់។
១៧ ដូច្នេះ ខ្ញុំសូមប្រាប់អ្នករាល់គ្នាហើយបញ្ជាក់ក្នុងនាមលោកម្ចាស់ថា អ្នករាល់គ្នាត្រូវឈប់ដើរដូចជនជាតិដទៃដែលដើរតាមគំនិតអសារឥតការរបស់ខ្លួន ១៨ ទាំងងងឹតងងល់ ហើយនៅដាច់ពីជីវិតដែលមកពីព្រះ ដោយសារភាពល្ងង់ខ្លៅរបស់ពួកគេ និងដោយសារចិត្តរបស់ពួកគេស្ពឹក។ ១៩ ហើយដោយពួកគេលែងស្គាល់ល្អស្គាល់អាក្រក់ នោះពួកគេបណ្ដោយខ្លួនទៅតាមសីលធម៌ធូររលុង* ដើម្បីធ្វើអំពើស្មោកគ្រោកគ្រប់បែបយ៉ាងដោយចិត្តលោភលន់។
២០ ប៉ុន្តែអ្នកមិនបានរៀនថាគ្រិស្តគឺជាបុគ្គលដូច្នោះទេ ២១ ប្រសិនបើអ្នករាល់គ្នាពិតជាបានឮលោកយេស៊ូ ហើយបានត្រូវបង្រៀនដោយលោក សមស្របតាមសេចក្ដីពិតដែលលោកបានបង្រៀន ២២ ពោលគឺ អ្នករាល់គ្នាត្រូវដោះចេញនូវបុគ្គលិកលក្ខណៈ* ចាស់ ដែលស្របគ្នានឹងការប្រព្រឹត្តរបស់អ្នកពីមុន ហើយដែលកំពុងត្រូវបង្ខូចតាមសេចក្ដីប៉ងប្រាថ្នាដែលបញ្ឆោតចិត្តរបស់អ្នក ២៣ ហើយត្រូវឲ្យឥទ្ធិពលថ្មីកាន់កាប់គំនិតរបស់អ្នករាល់គ្នាវិញ ២៤ ហើយត្រូវពាក់បុគ្គលិកលក្ខណៈថ្មី ដែលបានត្រូវបង្កើតស្របតាមបំណងប្រាថ្នារបស់ព្រះ ដោយសេចក្ដីសុចរិតនិងភក្ដីភាពដ៏ពិតប្រាកដ។
២៥ ម្ល៉ោះហើយ ដោយសារអ្នករាល់គ្នាបានបោះបង់ចោលពាក្យមិនពិតហើយ ចូរម្នាក់ៗនិយាយសេចក្ដីពិតទៅអ្នកជិតខាងខ្លួន ពីព្រោះយើងទាំងអស់គ្នាជាអវយវៈនៃរូបកាយតែមួយ។ ២៦ ពេលដែលអ្នករាល់គ្នាខឹង កុំធ្វើខុស។* កុំទុកកំហឹងរហូតដល់ថ្ងៃលិចឡើយ ២៧ ហើយកុំឲ្យមេកំណាច* មានឱកាស។ ២៨ អ្នកដែលលួចត្រូវឈប់លួចតទៅទៀត តែត្រូវឲ្យអ្នកនោះធ្វើការទៀងត្រង់យ៉ាងនឿយហត់ដោយដៃខ្លួនឯង ដើម្បីឲ្យមានអ្វីចែកដល់អ្នកដែលខ្វះខាត។ ២៩ កុំឲ្យពាក្យអាក្រក់* ណាមួយចេញពីមាត់អ្នករាល់គ្នាឡើយ តែត្រូវពោលពាក្យណាដែលល្អសម្រាប់ពង្រឹងអ្នកឯទៀតតាមកាលៈទេសៈ ដើម្បីផ្ដល់ប្រយោជន៍ដល់អ្នកស្ដាប់។ ៣០ ម្យ៉ាងទៀត កុំធ្វើឲ្យសកម្មពលបរិសុទ្ធរបស់ព្រះ ដែលព្រះបានបិទត្រាលើអ្នករាល់គ្នាសម្រាប់ថ្ងៃលោះ កើតទុក្ខឡើយ។
៣១ ចូរអ្នករាល់គ្នាបោះបង់ចោលគំនុំ កំហឹង ចិត្តក្ដៅក្រហាយ ការស្រែកគំហក និងពាក្យប្រមាថមើលងាយជាមួយនឹងសេចក្ដីអាក្រក់គ្រប់យ៉ាង។ ៣២ ប៉ុន្តែចូរប្រព្រឹត្តដោយសប្បុរសដល់គ្នាទៅវិញទៅមក មានសេចក្ដីអាណិតមេត្ដា ហើយអភ័យទោសឲ្យគ្នាទៅវិញទៅមកដោយគ្មានល័ក្ខខ័ណ្ឌ ដូចព្រះបានអភ័យទោសឲ្យអ្នករាល់គ្នាតាមរយៈគ្រិស្ត ដោយគ្មានល័ក្ខខ័ណ្ឌដែរ។
៥ ដូច្នេះ ចូរយកតម្រាប់តាមព្រះ ក្នុងនាមជាកូនជាទីស្រឡាញ់របស់លោក ២ ចូរបន្តរស់នៅដោយបង្ហាញសេចក្ដីស្រឡាញ់ ដូចគ្រិស្តបានស្រឡាញ់អ្នករាល់គ្នា ហើយបានប្រគល់ខ្លួនលោកដើម្បីអ្នករាល់គ្នា ទុកជាគ្រឿងបូជានិងក្លិនក្រអូបជូនព្រះ។
៣ ក្នុងចំណោមអ្នករាល់គ្នា មិនត្រូវទាំងនិយាយអំពីអំពើប្រាសចាកសីលធម៌ខាងផ្លូវភេទ* អំពើស្មោកគ្រោក ឬការលោភលន់ឡើយ ធ្វើដូច្នេះទើបសមគួរចំពោះពួកអ្នកបរិសុទ្ធ ៤ ក៏មិនត្រូវមានការប្រព្រឹត្តដែលគួរឲ្យខ្មាស ការនិយាយពាក្យផ្ដេសផ្ដាស ការនិយាយកំប្លែងអាសអាភាស ព្រោះការទាំងនេះមិនសមរម្យទេ តែត្រូវអរគុណព្រះវិញ។ ៥ ព្រោះអ្នករាល់គ្នាដឹង ហើយក៏យល់ច្បាស់ថា គ្មានអ្នកណាម្នាក់ដែលជាអ្នកប្រព្រឹត្តអំពើប្រាសចាកសីលធម៌ខាងផ្លូវភេទ មនុស្សស្មោកគ្រោក ឬអ្នកលោភលន់ (ដែលទុកជាការគោរពបូជារូបព្រះ) មានមត៌កក្នុងរាជាណាចក្ររបស់គ្រិស្តនិងរបស់ព្រះឡើយ។
៦ កុំឲ្យអ្នកណាបញ្ឆោតអ្នករាល់គ្នាដោយពាក្យអសារឥតការឡើយ ព្រោះដោយសារការទាំងនោះ កំហឹងរបស់ព្រះនឹងមកលើពួកអ្នកមិនស្ដាប់បង្គាប់។ ៧ ដូច្នេះ កុំរួមចំណែកជាមួយនឹងពួកគេ ៨ ព្រោះអ្នករាល់គ្នាធ្លាប់ជាភាពងងឹត តែឥឡូវជាពន្លឺវិញ ពីព្រោះអ្នករាល់គ្នាជារបស់លោកម្ចាស់។ ចូរបន្តរស់នៅជាកូននៃពន្លឺ ៩ ព្រោះផលនៃពន្លឺមានគុណធម៌ សេចក្ដីសុចរិត និងសេចក្ដីពិតគ្រប់យ៉ាង។ ១០ ចូរពិចារណាជានិច្ចដើម្បីឲ្យដឹងប្រាកដអំពីអ្វីដែលលោកម្ចាស់ពេញចិត្ត ១១ ហើយឈប់រួមចំណែកជាមួយនឹងពួកគេក្នុងការប្រព្រឹត្តដែលមិនកើតផលនិងជាការប្រព្រឹត្តខាងភាពងងឹត តែចូរប្រដៅតម្រង់ពួកគេវិញ ១២ ព្រោះការដែលពួកគេធ្វើដោយសម្ងាត់ សូម្បីតែយកមកនិយាយ ក៏គួរឲ្យខ្មាសទៅហើយ។ ១៣ ឯការទាំងអស់ដែលកំពុងត្រូវលាតត្រដាង ត្រូវសឲ្យឃើញដោយពន្លឺ ព្រោះអ្វីៗទាំងអស់ដែលកំពុងត្រូវសឲ្យឃើញ គឺជាពន្លឺ។ ១៤ ដូច្នេះ មានសេចក្ដីដែលចែងថា៖ «អ្នកដេកលក់អើយ! ចូរភ្ញាក់ឡើង ហើយរស់ពីស្លាប់ឡើងវិញ រួចគ្រិស្តនឹងភ្លឺចាំងមកលើអ្នក»។
១៥ ម្ល៉ោះហើយ ចូរយកចិត្តទុកដាក់ឲ្យដិតដល់ចំពោះការប្រព្រឹត្ត* របស់ខ្លួន កុំឲ្យប្រព្រឹត្តដូចមនុស្សឥតប្រាជ្ញា តែដូចមនុស្សដែលប្រកបដោយប្រាជ្ញាវិញ ១៦ ដោយប្រើគ្រប់ឱកាសឲ្យកើតប្រយោជន៍ច្រើនបំផុត* ព្រោះយើងរស់នៅសម័យដ៏ទុច្ចរិត។ ១៧ ហេតុនេះ កុំធ្វើជាមនុស្សឥតវិចារណញ្ញាណ តែចូរយល់អំពីបំណងប្រាថ្នារបស់ព្រះយេហូវ៉ា។ ១៨ ម្យ៉ាងទៀត កុំស្រវឹងស្រាឡើយ ព្រោះនោះនាំឲ្យប្រព្រឹត្តអំពើអបាយមុខ តែចូរឲ្យបានពេញទៅដោយសកម្មពល* របស់ព្រះជានិច្ច ១៩ និយាយគ្នាដោយបទទំនុកតម្កើង ពាក្យសរសើរព្រះ ចម្រៀងគោរពប្រណិប័តន៍ ហើយច្រៀងនិងលេងភ្លេងបន្ទរតាមជូនព្រះយេហូវ៉ាក្នុងចិត្ត ២០ ក្នុងនាមលោកយេស៊ូគ្រិស្តជាម្ចាស់របស់យើង ដោយអរគុណព្រះដែលជាបិតារបស់យើងចំពោះអ្វីៗទាំងអស់ជានិច្ច។
២១ ចូរចុះចូលនឹងគ្នាទៅវិញទៅមក ដោយកោតខ្លាចគ្រិស្ត។ ២២ ចូរឲ្យប្រពន្ធចុះចូលនឹងប្ដី ដូចចុះចូលនឹងលោកម្ចាស់ ២៣ ពីព្រោះប្ដីជាប្រមុខរបស់ប្រពន្ធ ដូចគ្រិស្តជាប្រមុខនៃក្រុមជំនុំ ជារូបកាយរបស់លោកដែលលោកបានសង្គ្រោះ។ ២៤ តាមពិត ចូរឲ្យប្រពន្ធចុះចូលនឹងប្ដីក្នុងគ្រប់ការទាំងអស់ ដូចក្រុមជំនុំចុះចូលនឹងគ្រិស្ត។ ២៥ ប្ដីទាំងឡាយអើយ ចូរស្រឡាញ់ប្រពន្ធជាដរាប ដូចគ្រិស្តបានស្រឡាញ់ក្រុមជំនុំ ហើយបានប្រគល់ខ្លួនលោកដើម្បីក្រុមជំនុំ ២៦ ដើម្បីលោកអាចញែកក្រុមជំនុំជាបរិសុទ្ធ ធ្វើឲ្យស្អាតដោយសម្អាតជាមួយនឹងទឹកដែលជាបណ្ដាំរបស់ព្រះ ២៧ ដើម្បីលោកអាចនាំក្រុមជំនុំមកនៅចំពោះមុខលោក ដោយមានភាពរុងរឿង ឥតមានប្រឡាក់ ជ្រួញ ឬលក្ខណៈឯទៀតបែបនោះឡើយ តែដើម្បីឲ្យបានបរិសុទ្ធ ឥតសៅហ្មងវិញ។
២៨ យ៉ាងនោះ ប្ដីត្រូវស្រឡាញ់ប្រពន្ធដូចស្រឡាញ់រូបកាយរបស់ខ្លួន។ អ្នកណាដែលស្រឡាញ់ប្រពន្ធរបស់ខ្លួន អ្នកនោះស្រឡាញ់ខ្លួនឯង ២៩ ព្រោះគ្មានអ្នកណាស្អប់រូបកាយ* របស់ខ្លួនទេ តែគេតែងចិញ្ចឹមហើយស្រឡាញ់ថ្នាក់ថ្នម ដូចគ្រិស្តប្រព្រឹត្តនឹងក្រុមជំនុំ ៣០ ពីព្រោះយើងជាអវយវៈនៃរូបកាយរបស់លោក។ ៣១ «ហេតុនេះ បុរសនឹងចាកចេញពីឪពុកនិងម្ដាយខ្លួន ហើយនឹងនៅជាប់ជាមួយនឹងប្រពន្ធរបស់គាត់ រួចពួកគេទាំងពីរនាក់នឹងទៅជាសាច់ឈាមតែមួយ»។ ៣២ អាថ៌កំបាំងដ៏ពិសិដ្ឋនេះអស្ចារ្យណាស់។ ខ្ញុំកំពុងនិយាយអំពីគ្រិស្តនិងក្រុមជំនុំ។ ៣៣ ទោះជាយ៉ាងនោះក៏ដោយ ចូរអ្នករាល់គ្នាម្នាក់ៗស្រឡាញ់ប្រពន្ធរបស់ខ្លួន ដូចស្រឡាញ់ខ្លួនអ្នក ឯប្រពន្ធត្រូវគោរពប្ដីយ៉ាងជ្រាលជ្រៅ។
៦ កូនទាំងឡាយអើយ ចូរស្ដាប់បង្គាប់ឪពុកម្ដាយស្របតាមបំណងប្រាថ្នារបស់លោកម្ចាស់ ព្រោះធ្វើដូច្នេះគឺសុចរិត៖ ២ «ចូរគោរពឪពុកនិងម្ដាយរបស់អ្នក»។ នេះជាបញ្ញត្ដិទីមួយដែលមានសេចក្ដីសន្យាជាប់ជាមួយ៖ ៣ «ដើម្បីឲ្យអ្នកបានប្រកបដោយសេចក្ដីសុខ ហើយមានជីវិតយូរអង្វែងនៅផែនដី»។ ៤ ចំណែកអ្នករាល់គ្នាដែលជាឪពុក កុំធ្វើឲ្យកូនខឹង តែចូរអប់រំកូនទៅតាមការប្រៀនប្រដៅរបស់ព្រះយេហូវ៉ា ហើយបណ្ដុះឲ្យកូនមានគំនិតដូចលោក។
៥ ឯអ្នករាល់គ្នាដែលជាខ្ញុំបម្រើ ចូរស្ដាប់បង្គាប់យ៉ាងស្មោះចំពោះពួកអ្នកដែលជាម្ចាស់របស់អ្នកនៅផែនដី* ដោយកោតខ្លាចញាប់ញ័រ ដូចស្ដាប់បង្គាប់គ្រិស្ត ៦ មិនគ្រាន់តែពេលដែលគេឃើញប៉ុណ្ណោះ ដូចអ្នកដែលចង់ផ្គាប់ចិត្តមនុស្ស ប៉ុន្តែដូចខ្ញុំបម្រើរបស់គ្រិស្ត ដោយធ្វើតាមបំណងប្រាថ្នារបស់ព្រះយ៉ាងស្មោះអស់ពីចិត្ត។ ៧ ចូរធ្វើជាខ្ញុំបម្រើដែលមានចិត្តគំនិតល្អ ដូចកំពុងបម្រើព្រះយេហូវ៉ា មិនមែនបម្រើមនុស្សទេ ៨ ព្រោះអ្នករាល់គ្នាដឹងថា មនុស្សម្នាក់ៗនឹងទទួលរង្វាន់ពីព្រះយេហូវ៉ាចំពោះអំពើល្អណាក៏ដោយដែលគាត់ធ្វើ ទោះបីគាត់ជាខ្ញុំបម្រើ ឬជាអ្នកមានសេរីភាពក្ដី។ ៩ ឯអ្នករាល់គ្នាដែលជាម្ចាស់ ចូរបន្តប្រព្រឹត្តចំពោះខ្ញុំបម្រើដូច្នោះដែរ ដោយឈប់គំរាមកំហែង ព្រោះអ្នករាល់គ្នាដឹងថាម្ចាស់របស់ពួកគេនិងរបស់អ្នករាល់គ្នាស្ថិតនៅស្ថានសួគ៌ ហើយលោកមិនរើសមុខទេ។
១០ ក្រោយបង្អស់ ខ្ញុំសូមដាស់តឿនអ្នករាល់គ្នាឲ្យបន្តទទួលកម្លាំងដោយលោកម្ចាស់និងដោយភាពខ្លាំងក្លានៃឫទ្ធានុភាពរបស់លោក។ ១១ ចូរពាក់គ្រប់គ្រឿងចម្បាំងពីព្រះ ដើម្បីឲ្យអ្នករាល់គ្នាអាចកាន់ជំហរមាំមួននៅចំពោះមុខកលល្បិចទាំងប៉ុន្មានរបស់មេកំណាច* ១២ ពីព្រោះយើងមានការប្រយុទ្ធ មិនមែនប្រយុទ្ធនឹងសាច់ឈាម* ទេ តែប្រយុទ្ធនឹងរដ្ឋាភិបាលទាំងឡាយ ពួកអាជ្ញាធរ ពួកអ្នកគ្រប់គ្រងពិភពលោកងងឹតនេះ ពួកវិញ្ញាណទុច្ចរិតនៅស្ថានសួគ៌។ ១៣ ហេតុនេះ ចូរទទួលយកគ្រប់គ្រឿងចម្បាំងពីព្រះ ដើម្បីឲ្យអ្នករាល់គ្នាអាចទប់ទល់នៅថ្ងៃទុច្ចរិត ហើយអាចកាន់ជំហរមាំមួន បន្ទាប់ពីបានសម្រេចឲ្យបានសព្វគ្រប់នូវការទាំងអស់ដែលបានត្រូវតម្រូវពីអ្នក។
១៤ ដូច្នេះ ចូរកាន់ជំហរមាំមួនដោយយកសេចក្ដីពិតមកក្រវាត់ចង្កេះ ហើយពាក់សេចក្ដីសុចរិតជាអាវការពារដើមទ្រូង ១៥ ថែមទាំងមានចិត្តប្រុងប្រៀបផ្សាយដំណឹងល្អអំពីសេចក្ដីសុខសាន្តទុកជាស្បែកជើង។ ១៦ សំខាន់បំផុត ទទួលយកខែលធំនៃជំនឿ ដែលអ្នកអាចប្រើដើម្បីពន្លត់អស់ទាំងព្រួញឆេះរបស់មេកំណាច។ ១៧ ម្យ៉ាងទៀត ចូរទទួលយកសេចក្ដីសង្គ្រោះទុកជាមួកការពារក្បាល ថែមទាំងយកដាវនៃសកម្មពល* ពោលគឺបណ្ដាំរបស់ព្រះ ១៨ នៅដំណាលគ្នានោះ ចូរបន្តអធិដ្ឋាននៅគ្រប់ឱកាសដោយសកម្មពលរបស់ព្រះ ដោយប្រើសេចក្ដីអធិដ្ឋាននិងការអង្វរសុំគ្រប់យ៉ាង។ ដើម្បីធ្វើដូច្នេះ ចូរចាំយាមជានិច្ចដោយអង្វរព្រះដើម្បីពួកអ្នកបរិសុទ្ធទាំងឡាយ ១៩ និងខ្ញុំដែរ ដើម្បីឲ្យខ្ញុំទទួលសមត្ថភាពនិយាយដោយក្លាហាន ដើម្បីផ្សព្វផ្សាយអំពីអាថ៌កំបាំងដ៏ពិសិដ្ឋនៃដំណឹងល្អ ២០ ជាហេតុដែលខ្ញុំជាទូតជាប់ច្រវាក់។ ហើយចូរអធិដ្ឋានដើម្បីឲ្យខ្ញុំមានចិត្តអង់អាចក្នុងការនិយាយអំពីដំណឹងល្អ ដូចខ្ញុំគួរនិយាយ។
២១ ឥឡូវ ដើម្បីឲ្យអ្នករាល់គ្នាដឹងអំពីស្ថានភាពរបស់ខ្ញុំថា ខ្ញុំកំពុងធ្វើអ្វី នោះទីឃីកុស ដែលជាបងប្រុសនិងជាអ្នកបម្រើដ៏ស្មោះត្រង់ក្នុងលោកម្ចាស់ នឹងប្រាប់អ្នករាល់គ្នាអ្វីៗទាំងអស់។ ២២ ខ្ញុំនឹងចាត់គាត់ឲ្យទៅឯអ្នករាល់គ្នាសម្រាប់ការនោះឯង ដើម្បីឲ្យអ្នករាល់គ្នាមានដំណឹងអំពីយើង ហើយដើម្បីឲ្យគាត់សម្រាលទុក្ខអ្នករាល់គ្នា។
២៣ សូមឲ្យបងប្អូនបានប្រកបដោយសេចក្ដីសុខសាន្តនិងសេចក្ដីស្រឡាញ់ជាមួយនឹងជំនឿពីព្រះដែលជាបិតារបស់យើង និងពីលោកម្ចាស់យេស៊ូគ្រិស្ត។ ២៤ សូមឲ្យគុណដ៏វិសេសលើសលប់ស្ថិតលើអស់អ្នកដែលមានសេចក្ដីស្រឡាញ់ដែលមិនចេះរសាយចំពោះលោកយេស៊ូគ្រិស្តជាម្ចាស់របស់យើង។
[កំណត់សម្គាល់]
ភាសាក្រិច«អាប៉ូស្តូឡូស»។ មានន័យថា«អ្នកដែលត្រូវគេចាត់ឲ្យទៅ»
មើលសេចក្ដីពន្យល់បន្ថែមផ្នែកទី៤
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ន័យត្រង់«ភ្នែកនៃចិត្តរបស់អ្នក»
ឬ«របៀបរបបពិភពលោក»
មើលកំណត់សម្គាល់រ៉ូម ៥:១២
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ឬ«របៀបរបបពិភពលោកនានា»
ន័យត្រង់«ខាងសាច់ឈាម»
មើលកំណត់សម្គាល់លូក ១:៥៩
ន័យត្រង់«សាច់ឈាម»
មើលកំណត់សម្គាល់ម៉ាថ ៥:១៧
មើលសេចក្ដីពន្យល់បន្ថែមផ្នែកទី៥
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ការជ្រមុជទឹកជាពិធីសាសនា
ន័យត្រង់«ក្បាល»
មើលកំណត់សម្គាល់កាឡ ៥:១៩
ន័យត្រង់«មនុស្ស»
មើលកំណត់សម្គាល់រ៉ូម ៥:១២
ភាសាក្រិច «ឌីអាបូឡូស»។ មានន័យថា«អ្នកបង្កាច់បង្ខូច»
ន័យត្រង់«រលួយ»
មើលកំណត់សម្គាល់ម៉ាថ ៥:៣២
ន័យត្រង់«របៀបដែលអ្នកដើរ»
ន័យត្រង់«ទិញពេលវេលា»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ន័យត្រង់«សាច់ឈាម»
ឬ«ជាម្ចាស់ក្នុងន័យខាងសាច់ឈាម»
ភាសាក្រិច«ឌីអាបូឡូស»។ មានន័យថា«អ្នកបង្កាច់បង្ខូច»
សំដៅទៅមនុស្សជាតិ
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ