ជូនចំពោះគ្រិស្តសាសនិកនៅក្រុងភីលីព
១ ពីខ្ញុំ ប៉ូល និងធីម៉ូថេ ជាខ្ញុំបម្រើរបស់គ្រិស្ត* យេស៊ូ ជូនចំពោះពួកអ្នកបរិសុទ្ធទាំងឡាយដែលជាអ្នកកាន់តាមគ្រិស្តយេស៊ូ ព្រមទាំងពួកអ្នកត្រួតពិនិត្យនិងពួកជំនួយការខាងកិច្ចបម្រើនៅក្រុងភីលីព៖
២ សូមឲ្យអ្នករាល់គ្នាបានប្រកបដោយគុណដ៏វិសេសលើសលប់និងសេចក្ដីសុខសាន្តពីព្រះ ជាបិតារបស់យើង និងពីលោកម្ចាស់យេស៊ូគ្រិស្ត។
៣ រាល់ដង ពេលដែលខ្ញុំនឹកឃើញអ្នករាល់គ្នា ខ្ញុំតែងអធិដ្ឋានអរគុណព្រះរបស់ខ្ញុំ ៤ ហើយខ្ញុំតែងអធិដ្ឋានអង្វរអំពីអ្នករាល់គ្នាដោយអំណរ ៥ ដោយសារអ្នករាល់គ្នាបានចូលរួមមួយចំណែកធំក្នុងការជួយឲ្យដំណឹងល្អជឿនទៅមុខ ចាប់តាំងពីថ្ងៃដំបូងដែលអ្នករាល់គ្នាបានឮដំណឹងនោះ រហូតមកដល់ឥឡូវនេះ។ ៦ ព្រោះខ្ញុំជឿជាក់ថា លោកដែលបានផ្ដើមការល្អក្នុងចំណោមអ្នករាល់គ្នា នឹងបង្ហើយការនោះរហូតដល់ថ្ងៃលោកយេស៊ូគ្រិស្ត។ ៧ ជាការត្រឹមត្រូវណាស់ដែលខ្ញុំមានគំនិតបែបនេះអំពីអ្នកទាំងអស់គ្នា ព្រោះអ្នករាល់គ្នានៅក្នុងចិត្តខ្ញុំ ដោយសារអ្នកទាំងអស់គ្នារួមចំណែកជាមួយនឹងខ្ញុំក្នុងគុណដ៏វិសេសលើសលប់ នៅពេលដែលខ្ញុំជាប់ចំណង ព្រមទាំងក្នុងការការពារនិងការធ្វើឲ្យដំណឹងល្អមានការទទួលស្គាល់តាមផ្លូវច្បាប់។
៨ ព្រោះព្រះជាសាក្សីថាខ្ញុំចង់ជួបអ្នករាល់គ្នាខ្លាំងណាស់ ដោយមានមនោសញ្ចេតនាជ្រាលជ្រៅដូចគ្រិស្តយេស៊ូ។ ៩ ហើយខ្ញុំបន្តអធិដ្ឋានសូមឲ្យអ្នករាល់គ្នាមានសេចក្ដីស្រឡាញ់កាន់តែខ្លាំងឡើង ព្រមជាមួយនឹងចំណេះត្រឹមត្រូវនិងសមត្ថភាពវែកញែកដ៏ពេញលេញ ១០ ដើម្បីឲ្យអ្នករាល់គ្នាពិចារណាឲ្យដឹងប្រាកដថាការអ្វីដែលសំខាន់ជាង ដើម្បីកុំឲ្យអ្នករាល់គ្នាមានកំហុស ហើយមិនធ្វើឲ្យអ្នកណាជំពប់ដួល* រហូតដល់ថ្ងៃរបស់គ្រិស្ត ១១ ហើយដើម្បីឲ្យអ្នករាល់គ្នាបានពោរពេញទៅដោយផលដ៏សុចរិត តាមរយៈលោកយេស៊ូគ្រិស្ត ដើម្បីឲ្យព្រះទទួលការលើកតម្កើងនិងសេចក្ដីសរសើរ។
១២ បងប្អូនអើយ ឥឡូវខ្ញុំចង់ឲ្យអ្នករាល់គ្នាដឹងថាអ្វីៗដែលបានកើតឡើងដល់ខ្ញុំ បានជួយធ្វើឲ្យដំណឹងល្អជឿនទៅមុខវិញ ១៣ ម្ល៉ោះហើយ ពួកអង្គរក្សរបស់អធិរាជនិងអ្នកឯទៀតទាំងប៉ុន្មានដឹងជាទូទៅថា ខ្ញុំជាប់ចំណងដោយសារកាន់តាមគ្រិស្ត ១៤ ហើយការដែលខ្ញុំជាប់ចំណងបានធ្វើឲ្យបងប្អូនភាគច្រើនក្នុងកិច្ចបម្រើលោកម្ចាស់មានទំនុកចិត្ត ហើយឥឡូវពួកគាត់មានចិត្តក្លាហានជាងមុន ដើម្បីប្រកាសបណ្ដាំរបស់ព្រះដោយចិត្តអង់អាច។
១៥ ពិតមែនតែអ្នកខ្លះកំពុងផ្សព្វផ្សាយអំពីគ្រិស្តដោយសារមានចិត្តច្រណែនហើយចង់ឈ្នានីស ប៉ុន្តែអ្នកខ្លះទៀតផ្សព្វផ្សាយដោយមានបំណងល្អ ១៦ ពួកគាត់ប្រកាសអំពីគ្រិស្តដោយសារមានសេចក្ដីស្រឡាញ់ ព្រោះពួកគាត់ដឹងថាខ្ញុំបានត្រូវតម្រូវឲ្យនៅទីនេះដើម្បីការពារដំណឹងល្អ ១៧ ប៉ុន្តែពួកអ្នកដែលមានចិត្តច្រណែនហើយខំឈ្នានីស ផ្សព្វផ្សាយដើម្បីធ្វើឲ្យមានទំនាស់ មិនមែនដោយចិត្តបរិសុទ្ធទេ ព្រោះពួកគេចង់ធ្វើឲ្យខ្ញុំមានសេចក្ដីវេទនាកាលដែលជាប់ចំណង។ ១៨ បើដូច្នេះ តើមានលទ្ធផលយ៉ាងណា? ទោះជាយ៉ាងណាក៏ដោយ លទ្ធផលគឺ គ្រិស្តកំពុងត្រូវផ្សព្វផ្សាយ ទោះជាដោយក្លែងបន្លំ ឬដោយសេចក្ដីពិតក្ដី ហើយការនោះធ្វើឲ្យខ្ញុំត្រេកអរ ហើយខ្ញុំនឹងបន្តត្រេកអរ ១៩ ព្រោះខ្ញុំដឹងថាការនោះនឹងនាំឲ្យខ្ញុំទទួលសេចក្ដីសង្គ្រោះតាមរយៈការអធិដ្ឋានអង្វររបស់អ្នករាល់គ្នា ហើយដោយទទួលសកម្មពល* របស់លោកយេស៊ូគ្រិស្ត ២០ ស្របតាមអ្វីដែលខ្ញុំកំពុងទន្ទឹងរង់ចាំយ៉ាងរំភើប ហើយស្របតាមសេចក្ដីសង្ឃឹមរបស់ខ្ញុំថា ខ្ញុំនឹងមិនអៀនខ្មាសសោះ តែខ្ញុំនឹងនិយាយដោយក្លាហានបំផុត ដើម្បីឲ្យគ្រិស្តទទួលការលើកតម្កើងដូចដែលលោកតែងតែទទួលពីមុន តាមរយៈរូបកាយខ្ញុំ ទោះជាខ្ញុំស្លាប់ឬរស់ក្ដី។
២១ ព្រោះក្នុងករណីរបស់ខ្ញុំ បើរស់ ខ្ញុំរស់ដើម្បីគ្រិស្ត ហើយបើស្លាប់ នោះមានផលប្រយោជន៍ដល់ខ្ញុំ។ ២២ ប្រសិនបើខ្ញុំរស់នៅក្នុងរូបកាយនេះតទៅទៀត នោះជាផលនៃកិច្ចការរបស់ខ្ញុំ។ ទោះជាយ៉ាងណាក៏ដោយ ខ្ញុំមិនប្រាប់ថាខ្ញុំជ្រើសរើសមួយណាទេ។ ២៣ ជម្រើសទាំងពីរនោះធ្វើឲ្យខ្ញុំពិបាកជ្រើសរើស។ ប៉ុន្តែអ្វីដែលខ្ញុំប្រាថ្នាចង់បានគឺការរំដោះដើម្បីនៅជាមួយនឹងគ្រិស្ត ពីព្រោះការនេះពិតជាល្អជាងឆ្ងាយណាស់។ ២៤ ក៏ប៉ុន្តែ គឺជាការចាំបាច់ដែលខ្ញុំរស់ជាមនុស្សតទៅទៀត ដើម្បីអ្នករាល់គ្នា។ ២៥ ដូច្នេះ ដោយជឿជាក់លើការនោះ ខ្ញុំនឹងរស់តទៅទៀត ហើយនៅជាមួយនឹងអ្នករាល់គ្នា ដើម្បីឲ្យអ្នករាល់គ្នាជឿនទៅមុខ ហើយឲ្យអ្នករាល់គ្នាប្រកបដោយអំណរដែលមានជាមួយនឹងជំនឿរបស់អ្នករាល់គ្នា ២៦ ដើម្បីឲ្យអ្នករាល់គ្នាត្រេកអរក្រៃលែង ក្នុងនាមជាអ្នកកាន់តាមគ្រិស្ត ដោយសារខ្ញុំនៅជាមួយនឹងអ្នករាល់គ្នាម្ដងទៀត។
២៧ ចូរប្រព្រឹត្តឲ្យសមនឹងដំណឹងល្អអំពីគ្រិស្ត ដើម្បីពេលដែលខ្ញុំទៅជួបអ្នករាល់គ្នា ឬពេលខ្ញុំមិននៅជាមួយនឹងអ្នករាល់គ្នា ខ្ញុំនឹងឮដំណឹងអំពីអ្នករាល់គ្នាថា អ្នករាល់គ្នាកំពុងកាន់ជំហរមាំមួនដោយមានគំនិត* ឯកភាព ហើយរួមចិត្ត* តែមួយ តស៊ូជាមួយគ្នាដើម្បីជំនឿដែលមកពីដំណឹងល្អ ២៨ ដោយមិនខ្លាចអ្នកដែលប្រឆាំងអ្នករាល់គ្នាឡើយ។ ការនោះឯងជាភ័ស្តុតាងថា ពួកគេនឹងត្រូវបំផ្លាញចោល តែគឺជាភ័ស្តុតាងថាអ្នករាល់គ្នានឹងទទួលសេចក្ដីសង្គ្រោះ ហើយសញ្ញាសម្គាល់នេះមកពីព្រះ ២៩ ពីព្រោះអ្នករាល់គ្នាបានទទួលសិទ្ធិពិសេស មិនមែនជាការជឿលើគ្រិស្តតែប៉ុណ្ណោះទេ តែជាការរងទុក្ខដើម្បីលោក។ ៣០ ព្រោះអ្នករាល់គ្នាត្រូវតស៊ូនឹងអ្វីដែលអ្នករាល់គ្នាឃើញខ្ញុំតស៊ូ និងដូចអ្នករាល់គ្នាឮអំពីខ្ញុំថា ខ្ញុំនៅតស៊ូនៅឡើយ។
២ ដូច្នេះ ប្រសិនបើក្នុងចំណោមអ្នករាល់គ្នាមានការលើកទឹកចិត្តដោយសាររួបរួមជាមួយនឹងគ្រិស្ត ការសម្រាលទុក្ខដែលប្រកបដោយសេចក្ដីស្រឡាញ់ ការយកចិត្ត* ទុកដាក់ចំពោះគ្នាទៅវិញទៅមក ហើយមានមនោសញ្ចេតនាដ៏ជ្រាលជ្រៅនិងសេចក្ដីមេត្ដាករុណា ២ នោះចូរធ្វើឲ្យអំណររបស់ខ្ញុំបានពេញលេញ ដោយអ្នករាល់គ្នាមានគំនិតដូចគ្នាទាំងអស់ និងមានសេចក្ដីស្រឡាញ់ដូចគ្នាទាំងអស់ ហើយរួមចិត្តតែមួយ ដោយរក្សាឲ្យមានគំនិតតែមួយ ៣ មិនធ្វើអ្វីក្នុងបំណងទាស់ជាមួយនឹងអ្នកឯទៀតឬលើកខ្លួនហួសប្រមាណ ប៉ុន្តែបន្ទាបខ្លួនដោយចាត់ទុកអ្នកឯទៀតថាប្រសើរជាងខ្លួន ៤ បន្តយកចិត្តទុកដាក់ចំពោះអ្នកឯទៀត មិនត្រូវគិតអំពីរឿងផ្ទាល់ខ្លួនតែប៉ុណ្ណោះទេ។
៥ ចូររក្សាឲ្យមានចិត្តគំនិតបែបនេះជានិច្ច គឺចិត្តគំនិតដូចគ្រិស្តយេស៊ូ។ ៦ ទោះជាលោកធ្លាប់មានសណ្ឋានដូចព្រះ លោកមិនដែលគិតអំពីការដណ្ដើមយកឋានៈរបស់ព្រះ ពោលគឺការតាំងខ្លួនឲ្យស្មើព្រះនោះទេ។ ៧ លោកមិនបានធ្វើដូច្នេះទេ តែលោកបានលះបង់អ្វីៗទាំងអស់ ហើយយកសណ្ឋានជាខ្ញុំបម្រើ រួចក្លាយទៅជាមនុស្សជាតិ។ ៨ មិនត្រឹមតែប៉ុណ្ណោះ ពេលដែលលោកឃើញថាលោកមានភាពជាមនុស្សជាតិ លោកក៏បានបន្ទាបខ្លួន ហើយចុះចូលស្ដាប់បង្គាប់រហូតដល់ត្រូវស្លាប់ គឺស្លាប់លើបង្គោលទារុណកម្ម។* ៩ ដោយហេតុនោះដែរ ព្រះបានលើកតម្កើងលោកឲ្យមានឋានៈខ្ពស់ជាងមុន ក៏បានមេត្ដាឲ្យនាមដល់លោកដែលជានាមប្រសើរជាងនាមឯទៀតទាំងអស់ ១០ ដើម្បីឲ្យអ្នកនៅស្ថានសួគ៌ អ្នកនៅផែនដី និងអ្នកនៅក្រោមដី លុតជង្គង់ដោយសារនាមយេស៊ូ ១១ ហើយដើម្បីឲ្យគ្រប់អណ្ដាតប្រកាសទទួលស្គាល់ជាសាធារណៈថា លោកយេស៊ូគ្រិស្តជាម្ចាស់ ដើម្បីសរសើរតម្កើងព្រះដែលជាបិតា។
១២ ដូច្នេះ អ្នករាល់គ្នាជាទីស្រឡាញ់អើយ ដូចអ្នករាល់គ្នាតែងស្ដាប់បង្គាប់ពីមុន មិនគ្រាន់តែពេលដែលខ្ញុំនៅជាមួយនឹងអ្នករាល់គ្នាប៉ុណ្ណោះទេ តែឥឡូវនេះពេលដែលខ្ញុំមិននៅជាមួយ សូមបន្តធ្វើឲ្យសេចក្ដីសង្គ្រោះរបស់ខ្លួនបានសម្រេច ដោយកោតខ្លាចញាប់ញ័រ ១៣ ព្រោះព្រះគឺជាអ្នកដែលកំពុងមានសកម្មភាពក្នុងអ្នករាល់គ្នាតាមដែលលោកពេញចិត្ត ដើម្បីឲ្យអ្នករាល់គ្នាមានបំណងប្រាថ្នានិងមានការប្រព្រឹត្ត។ ១៤ ចូរបន្តធ្វើអ្វីៗទាំងអស់ដោយមិនត្អូញត្អែរឬឈ្លោះគ្នាឡើយ ១៥ ដើម្បីឲ្យក្លាយទៅជាមនុស្សដែលគ្មានកន្លែងបន្ទោស មានចិត្តបរិសុទ្ធ និងជាកូនព្រះដែលឥតសៅហ្មងក្នុងចំណោមជំនាន់មនុស្សខូចនិងវៀចវេរ។ ក្នុងពិភពលោកនេះ អ្នករាល់គ្នាជាពន្លឺដែលកំពុងភ្លឺ ១៦ កាលដែលអ្នករាល់គ្នាបន្តកាន់ខ្ជាប់នូវបណ្ដាំនៃជីវិត ដើម្បីឲ្យខ្ញុំមានហេតុត្រេកអរនៅថ្ងៃរបស់គ្រិស្ត ព្រោះខ្ញុំមិនបានរត់ឥតប្រយោជន៍ ឬធ្វើការនឿយហត់ឥតប្រយោជន៍ទេ។ ១៧ ទោះជាខ្ញុំប្រគល់ខ្លួនខ្ញុំដូចគ្រឿងបូជាជាស្រាដែលត្រូវច្រួចទៅលើគ្រឿងបូជានិងកិច្ចបម្រើសាធារណៈដែលជំនឿបាននាំឲ្យអ្នករាល់គ្នាបំពេញក៏ដោយ ខ្ញុំនៅតែសប្បាយចិត្ត ហើយក៏ត្រេកអរជាមួយនឹងអ្នករាល់គ្នា។ ១៨ ឥឡូវ ចូរអ្នករាល់គ្នាសប្បាយចិត្ត ហើយត្រេកអរជាមួយនឹងខ្ញុំដូច្នេះដែរ។
១៩ ឯខ្ញុំសង្ឃឹមលើលោកម្ចាស់យេស៊ូថា បន្ដិចទៀត ខ្ញុំអាចចាត់ធីម៉ូថេឲ្យមកឯអ្នករាល់គ្នា ដើម្បីខ្ញុំអាចរីករាយពេលដែលទទួលដំណឹងអំពីអ្នករាល់គ្នា។ ២០ ព្រោះខ្ញុំគ្មានអ្នកណាទៀតដែលមានចិត្តគំនិតដូចគាត់ ដែលពិតជានឹងយកចិត្តទុកដាក់ចំពោះអ្នករាល់គ្នា។ ២១ ព្រោះអ្នកឯទៀតទាំងអស់កំពុងរកអ្វីដែលផ្ដល់ផលប្រយោជន៍សម្រាប់ខ្លួនគេ មិនមែនរកអ្វីដែលជាផលប្រយោជន៍ដល់គ្រិស្តទេ។ ២២ ប៉ុន្តែអ្នករាល់គ្នាដឹងរបៀបដែលគាត់បានសឲ្យឃើញអំពីលក្ខណៈរបស់គាត់ គឺដូចកូនធ្វើការជាមួយនឹងឪពុក គាត់បានរួមធ្វើការជាមួយនឹងខ្ញុំដូចខ្ញុំបម្រើ ក្នុងការធ្វើឲ្យដំណឹងល្អជឿនទៅមុខ។ ២៣ ដូច្នេះ គឺបុរសនេះហើយដែលខ្ញុំសង្ឃឹមថា ខ្ញុំនឹងចាត់ឲ្យមកឯអ្នករាល់គ្នា បន្ទាប់ពីខ្ញុំឃើញថារឿងរបស់ខ្ញុំនឹងទៅជាយ៉ាងណាវិញ។ ២៤ ខ្ញុំជឿជាក់លើលោកម្ចាស់ថា បន្ដិចទៀត ខ្ញុំនឹងមកដែរ។
២៥ ក៏ប៉ុន្តែខ្ញុំគិតថាខ្ញុំត្រូវចាត់អេប៉ាប្រូឌីតឲ្យមកឯអ្នករាល់គ្នាដែរ។ គាត់ជាបងប្រុស ជាអ្នករួមការងារ និងជាអ្នកធ្វើទាហានជាមួយនឹងខ្ញុំ ប៉ុន្តែគាត់ជាអ្នកនាំសារនិងអ្នកបម្រើផ្ទាល់ខ្លួនរបស់អ្នករាល់គ្នា ដែលអ្នករាល់គ្នាបានចាត់ឲ្យបំពេញសេចក្ដីត្រូវការរបស់ខ្ញុំ ២៦ ដោយសារគាត់ចង់ឃើញអ្នករាល់គ្នាខ្លាំងណាស់ ហើយដោយសារគាត់ធ្លាក់ទឹកចិត្តពីព្រោះអ្នករាល់គ្នាបានឮថាគាត់ឈឺ។ ២៧ គាត់បានធ្លាក់ខ្លួនឈឺមែន រហូតដល់ជិតស្លាប់ ប៉ុន្តែព្រះបានមេត្ដាដល់គាត់ តាមពិត លោកមិនគ្រាន់តែបានមេត្ដាដល់គាត់ប៉ុណ្ណោះទេ តែក៏បានមេត្ដាដល់ខ្ញុំដែរ ដើម្បីកុំឲ្យខ្ញុំមានទុក្ខត្រួតពីលើទុក្ខ។ ២៨ ដូច្នេះ ខ្ញុំនឹងចាត់គាត់ឲ្យមកឯអ្នករាល់គ្នាជាប្រញាប់ ដើម្បីឲ្យអ្នករាល់គ្នាត្រេកអរពេលដែលឃើញគាត់ម្ដងទៀត ហើយខ្ញុំអាចរួចពីទុក្ខបន្ដិច។ ២៩ ម្ល៉ោះហើយ ចូរស្វាគមន៍គាត់តាមរបៀបដែលអ្នករាល់គ្នាស្វាគមន៍អស់អ្នកកាន់តាមលោកម្ចាស់ដោយមានអំណរដ៏ពោរពេញ ហើយចូររក្សាឲ្យមានការគោរពដ៏ជ្រាលជ្រៅចំពោះបងប្រុសបែបនោះ ៣០ ពីព្រោះគាត់ជិតបាត់បង់ជីវិតដោយសារកិច្ចការរបស់លោកម្ចាស់ ក៏បានប្រថុយជីវិត* ប្រឈមមុខនឹងគ្រោះថ្នាក់ ដើម្បីផ្ដល់ឲ្យខ្ញុំនូវជំនួយដែលអ្នករាល់គ្នាផ្ដល់មិនបាន។
៣ ក្រោយបង្អស់ បងប្អូនខ្ញុំអើយ ចូរបន្តអរសប្បាយដោយសារលោកម្ចាស់។ ពិតមែនតែខ្ញុំសរសេរសេចក្ដីដដែលទៅកាន់អ្នករាល់គ្នា ប៉ុន្តែនេះមិនធ្វើឲ្យខ្ញុំពិបាកទេ ផ្ទុយទៅវិញ គឺជួយការពារអ្នករាល់គ្នា។
២ ចូរប្រុងប្រយ័ត្ននឹងពួកឆ្កែ ចូរប្រុងប្រយ័ត្ននឹងពួកអ្នកដែលធ្វើឲ្យអន្តរាយ ចូរប្រុងប្រយ័ត្ននឹងពួកអ្នកដែលកាត់សាច់។* ៣ ព្រោះយើងជាអ្នកដែលបានទទួលការកាត់ចុងស្បែក* ពិតប្រាកដ និងកំពុងបំពេញកិច្ចបម្រើពិសិដ្ឋដោយសកម្មពល* របស់ព្រះ ហើយយើងមានមោទនភាពអំពីគ្រិស្ត ក៏មិនជឿជាក់ទៅលើអ្វីៗដែលមកពីមនុស្សឡើយ។ ៤ ប៉ុន្តែបើចង់និយាយអំពីការជឿជាក់លើអ្វីៗដែលមកពីមនុស្ស ខ្ញុំមានហេតុជឿជាក់ច្រើនជាងអ្នកឯទៀត។
បើបុរសណាផ្សេងទៀតនឹកស្មានថាគាត់មានហេតុជឿជាក់លើអ្វីៗដែលមកពីមនុស្ស ខ្ញុំមានហេតុច្រើនជាងគាត់ទៅទៀត៖ ៥ ខ្ញុំបានទទួលការកាត់ចុងស្បែកនៅថ្ងៃទីប្រាំបី បានកើតមកជាជនជាតិអ៊ីស្រាអែលពីកុលសម្ព័ន្ធបេនយ៉ាមីន មានដើមកំណើតជាហេប្រឺ ហើយឪពុកម្ដាយមានដើមកំណើតជាហេប្រឺដែរ។ បើចង់និយាយអំពីច្បាប់ ខ្ញុំជាផារិស៊ី* ៦ បើចង់និយាយអំពីចិត្តខ្នះខ្នែង ខ្ញុំបានបៀតបៀនក្រុមជំនុំ បើចង់និយាយអំពីការធ្វើជាមនុស្សសុចរិតតាមរយៈច្បាប់ ខ្ញុំគ្មានកន្លែងបន្ទោសសោះ។ ៧ ក៏ប៉ុន្តែអ្វីៗដែលធ្លាប់មានប្រយោជន៍ចំពោះខ្ញុំ ខ្ញុំចាត់ទុកថាខាតដោយសារគ្រិស្ត។ ៨ ខ្ញុំចាត់ទុកអ្វីៗទាំងអស់ថាខាត ដោយសារតម្លៃលើសលប់នៃចំណេះអំពីគ្រិស្តយេស៊ូជាម្ចាស់របស់ខ្ញុំ។ ដោយសារលោក ខ្ញុំបានសុខចិត្តខាតបង់អ្វីៗទាំងអស់ ហើយក៏ចាត់ទុកជាសំរាម ដើម្បីខ្ញុំអាចបានគ្រិស្ត ៩ ហើយសឲ្យឃើញថាខ្ញុំរួបរួមជាមួយនឹងលោក ដោយមានភាពសុចរិតដែលមកតាមរយៈជំនឿលើគ្រិស្ត គឺភាពសុចរិតដែលមកពីព្រះដោយមានមូលដ្ឋានលើជំនឿ មិនមែនដោយមានភាពសុចរិតរបស់ខ្លួន ដែលមកពីច្បាប់ទេ។ ១០ ដើម្បីខ្ញុំអាចស្គាល់លោក និងឫទ្ធានុភាពនៃការប្រោសលោកឲ្យរស់ឡើងវិញ ព្រមទាំងរួមចំណែកក្នុងទុក្ខវេទនារបស់លោក ដោយព្រមស្លាប់ដូចលោក ១១ ដើម្បីមើលថាតើខ្ញុំអាចនៅក្នុងចំណោមអ្នកដែលនឹងត្រូវប្រោសឲ្យរស់ពីស្លាប់ឡើងវិញមុនគេ។
១២ មិនមែនមានន័យថាខ្ញុំបានទទួលរង្វាន់ ឬបានត្រូវធ្វើឲ្យទៅជាល្អឥតខ្ចោះហើយនោះទេ ប៉ុន្តែខ្ញុំកំពុងព្យាយាមដើម្បីមើលថាតើខ្ញុំពិតជាអាចចាប់ឲ្យបានអ្វីដែលជាមូលហេតុដែលគ្រិស្តយេស៊ូបានចាប់ខ្ញុំនោះ។ ១៣ បងប្អូនអើយ ខ្ញុំមិនទាន់ចាត់ទុកថាខ្ញុំបានទទួលរង្វាន់នោះហើយទេ។ ប៉ុន្តែមានអ្វីមួយដែលខ្ញុំធ្វើ គឺខ្ញុំកំពុងបំភ្លេចអ្វីៗដែលនៅខាងក្រោយ ហើយកំពុងប្រឹងរត់សំដៅទៅអ្វីៗនៅខាងមុខ ១៤ ខ្ញុំកំពុងរត់ដោយមានគោលដៅទទួលរង្វាន់ ពោលគឺ ព្រះបានហៅឲ្យឡើងទៅស្ថានសួគ៌តាមរយៈគ្រិស្តយេស៊ូ។ ១៥ ដូច្នេះ ចូរយើងដែលមានភាពចាស់ទុំ មានចិត្តគំនិតនេះ ហើយប្រសិនបើអ្នករាល់គ្នាមានគំនិតផ្សេងអំពីអ្វីមួយ ព្រះនឹងបើកបង្ហាញចិត្តគំនិតត្រឹមត្រូវដល់អ្នករាល់គ្នា។ ១៦ ទោះជាយ៉ាងណាក៏ដោយ អ្វីដែលយើងបានធ្វើដើម្បីឲ្យជឿនទៅមុខដល់កម្រិតនេះ ចូរបន្តជឿនទៅមុខដោយធ្វើដូច្នោះតទៅទៀត។
១៧ បងប្អូនអើយ ចូរអ្នកទាំងអស់គ្នាយកតម្រាប់តាមខ្ញុំ ហើយសង្កេតមើលអស់អ្នកដែលកំពុងប្រព្រឹត្តសមស្របតាមគំរូដែលយើងបានទុកឲ្យអ្នករាល់គ្នា។ ១៨ ព្រោះមានមនុស្សជាច្រើនកំពុងប្រព្រឹត្តជាសត្រូវនៃបង្គោលទារុណកម្ម* របស់គ្រិស្ត។ ខ្ញុំធ្លាប់និយាយអំពីអ្នកទាំងនោះជាច្រើនដង តែឥឡូវខ្ញុំនិយាយអំពីពួកគេទាំងស្រក់ទឹកភ្នែក។ ១៩ ចុងបញ្ចប់របស់អ្នកទាំងនោះជាសេចក្ដីហិនវិនាស ហើយព្រះរបស់អ្នកទាំងនោះ ជាក្រពះរបស់ពួកគេ ហើយពួកគេមានមោទនភាពអំពីអ្វីដែលគួរធ្វើឲ្យពួកគេអៀនខ្មាស ហើយពួកគេគិតតែអំពីអ្វីនៅផែនដី។ ២០ ចំណែកយើងវិញ យើងជាពលរដ្ឋស្ថានសួគ៌ ហើយយើងកំពុងទន្ទឹងរង់ចាំអ្នកសង្គ្រោះដែលនៅស្ថាននោះ ពោលគឺលោកម្ចាស់យេស៊ូគ្រិស្ត ២១ ដែលមានឫទ្ធានុភាពដើម្បីធ្វើឲ្យអ្វីៗទាំងអស់នៅក្រោមលោក។ ដោយប្រើឫទ្ធានុភាពនេះ លោកនឹងធ្វើឲ្យរូបកាយឱនថយរបស់យើងមានលក្ខណៈស្របតាមរូបកាយរុងរឿងរបស់លោក។
៤ ដូច្នេះ បងប្អូនជាទីស្រឡាញ់របស់ខ្ញុំ ដែលខ្ញុំចង់ឃើញខ្លាំងណាស់ ដែលជាអំណរ និងជាមកុដរបស់ខ្ញុំ ចូរកាន់ជំហរមាំមួនតាមរបៀបនោះ ក្នុងនាមជាអ្នកកាន់តាមលោកម្ចាស់។
២ ខ្ញុំសូមដាស់តឿនអឺរ៉ូឌានិងស៊ីនទីចឲ្យមានគំនិតស្របគ្នាក្នុងកិច្ចបម្រើលោកម្ចាស់។ ៣ ចំណែកអ្នកវិញ ដែលជាអ្នករួមការងារយ៉ាងស្មោះជាមួយនឹងខ្ញុំ ខ្ញុំក៏សូមអ្នកបន្តជួយស្ត្រីទាំងពីរនេះ ដែលបានរួមជាមួយនឹងខ្ញុំក្នុងការតស៊ូដើម្បីជាប្រយោជន៍ដល់ដំណឹងល្អ ជាមួយនឹងក្លេមេននិងអ្នកឯទៀតទាំងប៉ុន្មានដែលជាអ្នករួមការងារជាមួយនឹងខ្ញុំ និងដែលមានឈ្មោះក្នុងសៀវភៅជីវិត។
៤ ចូរអរសប្បាយដោយសារលោកម្ចាស់ជានិច្ច។ ខ្ញុំសូមនិយាយម្ដងទៀតថា ចូរអរសប្បាយចុះ! ៥ ចូរឲ្យមនុស្សទាំងអស់គ្នាឃើញថាអ្នករាល់គ្នាជាមនុស្សសមហេតុផល។ លោកម្ចាស់នៅជិត។ ៦ កុំខ្វល់ចិត្តអំពីអ្វីឡើយ តែដោយអធិដ្ឋាន អង្វរសុំ ព្រមទាំងថ្លែងអំណរគុណ ចូរជម្រាបព្រះអំពីសំណូមពររបស់អ្នករាល់គ្នា ក្នុងគ្រប់ការទាំងអស់ ៧ ហើយសេចក្ដីសុខសាន្តរបស់ព្រះដែលហួសពីការនឹកស្មាន នឹងការពារចិត្តនិងសមត្ថភាពរិះគិតរបស់អ្នករាល់គ្នា តាមរយៈគ្រិស្តយេស៊ូ។
៨ ក្រោយបង្អស់ បងប្អូនអើយ អ្វីៗដែលពិត អ្វីៗដែលថ្លៃថ្នូរ អ្វីៗដែលសុចរិត អ្វីៗដែលបរិសុទ្ធ អ្វីៗដែលគួរឲ្យស្រឡាញ់ អ្វីៗដែលមានកេរ្ដិ៍ឈ្មោះល្អ អ្វីដែលប្រកបដោយគុណធម៌ និងអ្វីដែលគួរឲ្យសរសើរ ចូរបន្តពិចារណាអ្វីៗទាំងនោះ។ ៩ អ្វីៗដែលអ្នករាល់គ្នាបានរៀន ឃើញ ឮ និងទទួលពីខ្ញុំ ចូរប្រព្រឹត្តតាមសេចក្ដីទាំងនោះ ហើយព្រះនៃសេចក្ដីសុខសាន្តនឹងនៅជាមួយនឹងអ្នករាល់គ្នា។
១០ ខ្ញុំអរសប្បាយយ៉ាងខ្លាំងក្នុងនាមជាអ្នកបម្រើលោកម្ចាស់ ព្រោះនៅទីបំផុតខ្ញុំបានធ្វើឲ្យអ្នករាល់គ្នាចាប់ផ្ដើមគិតអំពីខ្ញុំម្ដងទៀត។ អ្នករាល់គ្នាពិតជាបានគិតអំពីផលប្រយោជន៍របស់ខ្ញុំ តែមិនមានឱកាសបង្ហាញឲ្យឃើញ។ ១១ ខ្ញុំមិនមែននិយាយអំពីការខ្វះខាតទេ ព្រោះខ្ញុំបានរៀនឲ្យចេះស្កប់ចិត្ត ទោះជាខ្ញុំនៅក្នុងកាលៈទេសៈណាក៏ដោយ។ ១២ ខ្ញុំចេះរស់នៅដោយមានតែបន្ដិចបន្តួច ខ្ញុំចេះរស់នៅដោយមានបរិបូរ។ ខ្ញុំបានរៀនអាថ៌កំបាំងអំពីរបៀបស្កប់ចិត្តក្នុងគ្រប់ការទាំងអស់និងនៅគ្រប់កាលៈទេសៈទាំងអស់ ទោះជាឆ្អែត ឬឃ្លានក្ដី ទោះជាមានបរិបូរ ឬខ្វះខាតក្ដី។ ១៣ ខ្ញុំមានកម្លាំងសម្រាប់អ្វីៗទាំងអស់ ដោយសារលោកដែលផ្ដល់កម្លាំងឲ្យខ្ញុំ។
១៤ ទោះជាយ៉ាងនោះក៏ដោយ អ្នករាល់គ្នាបានធ្វើល្អ ដោយរួមចំណែកក្នុងសេចក្ដីវេទនារបស់ខ្ញុំ។ ១៥ តាមការពិត អ្នករាល់គ្នានៅក្រុងភីលីពក៏ដឹងថា នៅពេលដែលចាប់ផ្ដើមប្រកាសដំណឹងល្អ ពេលដែលខ្ញុំចាកចេញពីតំបន់ម៉ាសេដូន គ្មានក្រុមជំនុំណាមួយរួមចំណែកជាមួយនឹងខ្ញុំក្នុងការឲ្យនិងការទទួលឡើយ មានតែអ្នករាល់គ្នាប៉ុណ្ណោះ ១៦ ពីព្រោះសូម្បីតែនៅក្រុងថែស្សាឡូនិចក៏ដោយ អ្នករាល់គ្នាបានផ្ញើជំនួយទៅឲ្យខ្ញុំពីរដង ដើម្បីបំពេញសេចក្ដីត្រូវការរបស់ខ្ញុំ។ ១៧ ខ្ញុំមិនមែនខំស្វែងរកអំណោយពីអ្នករាល់គ្នាទេ ប៉ុន្តែខ្ញុំខំស្វែងរកផលដែលបង្កើនកម្រៃដល់អ្នករាល់គ្នា។ ១៨ ក៏ប៉ុន្តែខ្ញុំមានអ្វីៗទាំងអស់ដែលខ្ញុំត្រូវការ ក៏មានជាបរិបូរ។ ខ្ញុំស្កប់ស្កល់ហើយ ព្រោះឥឡូវខ្ញុំបានទទួលពីអេប៉ាប្រូឌីតនូវអ្វីដែលអ្នករាល់គ្នាបានផ្ញើឲ្យ នោះគឺដូចជាក្លិនក្រអូប ជាគ្រឿងបូជាដែលសមរម្យ និងធ្វើឲ្យព្រះគាប់ចិត្ត។ ១៩ ជាលទ្ធផល ព្រះរបស់ខ្ញុំដែលមានទ្រព្យរុងរឿងនឹងផ្ដល់អ្វីៗទាំងអស់ដែលអ្នករាល់គ្នាត្រូវការ តាមរយៈគ្រិស្តយេស៊ូ។ ២០ សូមឲ្យព្រះដែលជាបិតារបស់យើងប្រកបដោយសិរីរុងរឿងជារៀងរហូតតរៀងទៅ។ អាមេន។
២១ ខ្ញុំសូមផ្ដាំសួរសុខទុក្ខពួកអ្នកបរិសុទ្ធទាំងអស់គ្នាដែលជាអ្នកកាន់តាមគ្រិស្តយេស៊ូ។ បងប្អូនដែលនៅជាមួយនឹងខ្ញុំក៏ផ្ដាំសួរសុខទុក្ខដែរ។ ២២ ពួកអ្នកបរិសុទ្ធទាំងអស់គ្នា ជាពិសេសអស់អ្នកដែលជាអ្នកផ្ទះរបស់សេសារ* សូមផ្ដាំសួរសុខទុក្ខ។
២៣ សូមឲ្យគុណដ៏វិសេសលើសលប់របស់លោកម្ចាស់យេស៊ូគ្រិស្តនៅជាមួយនឹងអ្នករាល់គ្នា ពីព្រោះអ្នករាល់គ្នាមានចិត្តគំនិត* ត្រឹមត្រូវ។
[កំណត់សម្គាល់]
មើលសេចក្ដីពន្យល់បន្ថែមផ្នែកទី៤
មើលកំណត់សម្គាល់ម៉ាថ ៥:២៩
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់ខ១៩
ន័យត្រង់«ព្រលឹងតែមួយ»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលសេចក្ដីពន្យល់បន្ថែមផ្នែកទី៥
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
សំដៅទៅអ្នកដែលកាត់ចុងស្បែក
មើលកំណត់សម្គាល់លូក ១:៥៩
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់ម៉ាថ ៣:៧
មើលសេចក្ដីពន្យល់បន្ថែមផ្នែកទី៥
ន័យត្រង់«អធិរាជ»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ