ជូនចំពោះគ្រិស្តសាសនិកនៅក្រុងកូឡុស
១ ពីខ្ញុំ ប៉ូល ដែលជាសាវ័ក* របស់គ្រិស្ត* យេស៊ូតាមបំណងប្រាថ្នារបស់ព្រះ ព្រមទាំងធីម៉ូថេជាប្អូនប្រុសរបស់យើង ២ ជូនចំពោះពួកអ្នកបរិសុទ្ធនិងបងប្អូនស្មោះត្រង់ទាំងឡាយដែលជាអ្នកកាន់តាមគ្រិស្តនៅក្រុងកូឡុស៖
សូមឲ្យអ្នករាល់គ្នាបានប្រកបដោយគុណដ៏វិសេសលើសលប់និងសេចក្ដីសុខសាន្តពីព្រះជាបិតារបស់យើង។
៣ នៅពេលដែលយើងអធិដ្ឋានឲ្យអ្នករាល់គ្នា យើងតែងតែអរគុណព្រះជាបិតារបស់លោកយេស៊ូគ្រិស្តជាម្ចាស់របស់យើង ៤ ពីព្រោះយើងបានឮអំពីជំនឿដែលអ្នករាល់គ្នាមានក្នុងគ្រិស្តយេស៊ូ និងសេចក្ដីស្រឡាញ់របស់អ្នករាល់គ្នាចំពោះពួកអ្នកបរិសុទ្ធទាំងអស់ ៥ ដោយសារមានសេចក្ដីសង្ឃឹមឲ្យបានអ្វីដែលបានត្រូវបម្រុងទុកឲ្យអ្នករាល់គ្នានៅស្ថានសួគ៌។ អ្នករាល់គ្នាបានឮអំពីសេចក្ដីសង្ឃឹមនេះតាមរយៈការប្រកាសអំពីសេចក្ដីពិត ពោលគឺដំណឹងល្អ ៦ ដែលបានមក ហើយនៅក្នុងចំណោមអ្នករាល់គ្នា ក៏ដុះដាលបង្កើតផលពេញពិភពលោក ដូចដែលកំពុងដុះដាលបង្កើតផលក្នុងចំណោមអ្នករាល់គ្នាដែរ ចាប់តាំងពីថ្ងៃដែលអ្នករាល់គ្នាបានឮ និងបានស្គាល់ច្បាស់នូវការពិតអំពីគុណដ៏វិសេសលើសលប់របស់ព្រះ។ ៧ នោះជាអ្វីដែលអ្នករាល់គ្នាបានរៀនពីអេប៉ាប្រាសជាទីស្រឡាញ់របស់យើង ដែលជាខ្ញុំបម្រើជាមួយនឹងយើង។ គាត់ជាអ្នកបម្រើគ្រិស្តយ៉ាងស្មោះត្រង់ដើម្បីជាប្រយោជន៍ដល់យើង ៨ និងដែលរៀបរាប់ប្រាប់យើងអំពីសេចក្ដីស្រឡាញ់ដែលអ្នករាល់គ្នាបានបណ្ដុះឲ្យមានដោយជំនួយពីសកម្មពល* របស់ព្រះ។
៩ ហេតុនេះ ចាប់តាំងពីថ្ងៃដែលយើងឮរឿងនោះ យើងបានអធិដ្ឋានឥតឈប់ឲ្យអ្នករាល់គ្នា ដោយសូមឲ្យអ្នករាល់គ្នាបានពោរពេញទៅដោយចំណេះត្រឹមត្រូវអំពីបំណងប្រាថ្នារបស់លោក ដោយមានប្រាជ្ញាសព្វគ្រប់និងការយល់ដឹងដែលសកម្មពលរបស់លោកផ្ដល់ឲ្យ ១០ យ៉ាងនោះ អ្នករាល់គ្នានឹងប្រព្រឹត្តសមនឹងព្រះយេហូវ៉ា ដើម្បីធ្វើឲ្យលោកពេញចិត្តទាំងស្រុង។ ដំណាលគ្នានោះ អ្នករាល់គ្នានឹងបន្តបង្កើតផលក្នុងគ្រប់ការល្អទាំងអស់ ព្រមទាំងមានចំណេះត្រឹមត្រូវអំពីព្រះកាន់តែច្រើនឡើងៗ ១១ ដោយទទួលកម្លាំងខ្លាំងក្លា ដោយសារឫទ្ធានុភាពរុងរឿងរបស់លោក ដើម្បីឲ្យអ្នករាល់គ្នាស៊ូទ្រាំនឹងការទាំងអស់ ហើយមានចិត្តធ្ងន់ដោយអំណរ ១២ ដោយអរគុណបិតានៅស្ថានសួគ៌ដែលបានធ្វើឲ្យអ្នករាល់គ្នាមានលក្ខណៈសម្បត្ដិគ្រប់គ្រាន់ ដើម្បីមានចំណែកក្នុងមត៌ករបស់ពួកអ្នកបរិសុទ្ធដែលនៅក្នុងពន្លឺ។
១៣ លោកបានសង្គ្រោះយើងពីអំណាចនៃភាពងងឹត ហើយផ្លាស់យើងទៅនៅក្នុងរាជាណាចក្រនៃបុត្រជាទីស្រឡាញ់របស់លោក ១៤ ដោយសារលោក យើងបានត្រូវលោះ ហើយនេះមានន័យថាការខុសឆ្គង* របស់យើងបានត្រូវអភ័យទោស។ ១៥ លោកនិងព្រះដែលយើងមើលមិនឃើញ មានលក្ខណៈដូចគ្នាទាំងស្រុង។ លោកក៏ជាបុត្រច្បងក្នុងចំណោមអ្វីៗទាំងអស់ដែលព្រះបានបង្កើត ១៦ ពីព្រោះអ្វីៗឯទៀតទាំងអស់នៅស្ថានសួគ៌និងនៅផែនដីបានត្រូវបង្កើតមកតាមរយៈលោក គឺអ្វីដែលមនុស្សមើលឃើញនិងអ្វីដែលមនុស្សមើលមិនឃើញ ទោះជាបល្ល័ង្ក ការគ្រប់គ្រង រដ្ឋាភិបាល ឬអាជ្ញាធរក្ដី។ អ្វីៗឯទៀតទាំងអស់បានត្រូវបង្កើតតាមរយៈលោក និងសម្រាប់លោក។ ១៧ ម្យ៉ាងទៀត មានលោកមុនអ្វីៗឯទៀតទាំងអស់ ហើយតាមរយៈលោក អ្វីៗឯទៀតទាំងអស់បានត្រូវបង្កើតមក ១៨ ហើយលោកជាក្បាលនៃរូបកាយ ពោលគឺជាប្រមុខនៃក្រុមជំនុំ។ លោកជាទីចាប់ផ្ដើមនៃអ្វីៗទាំងអស់ ជាបុត្រច្បងនិងជាអ្នកដែលបានរស់ពីស្លាប់ឡើងវិញមុនគេ ដើម្បីឲ្យលោកអាចធ្វើជាអ្នកមុនគេក្នុងគ្រប់ការទាំងអស់ ១៩ ព្រោះព្រះពេញចិត្តឲ្យអ្វីៗនៅក្នុងខ្លួនលោកបានពេញខ្នាត ២០ ហើយតាមរយៈបុត្ររបស់លោក ព្រះផ្សះផ្សាអ្វីៗឯទៀតទាំងអស់ឲ្យជានឹងលោកឡើងវិញ ទោះជាអ្វីនៅផែនដី ឬនៅស្ថានសួគ៌ក្ដី ដោយធ្វើឲ្យមានសន្ដិភាពតាមរយៈឈាមរបស់គ្រិស្តដែលបានត្រូវបង្ហូរលើបង្គោលទារុណកម្ម។*
២១ អ្នករាល់គ្នាដែលធ្លាប់នៅដាច់ឆ្ងាយពីព្រះនិងជាសត្រូវ ព្រោះមានគំនិតលម្អៀងទៅរកអំពើទុច្ចរិត ២២ ឥឡូវជាអ្នកដែលលោកបានផ្សះផ្សាឲ្យជានឹងលោកឡើងវិញ តាមរយៈរូបកាយសាច់ឈាមរបស់លោកដែលបានស្លាប់ ដើម្បីអាចនាំអ្នករាល់គ្នាមកឲ្យនៅចំពោះមុខលោក ដោយបរិសុទ្ធ ឥតសៅហ្មង និងគ្មានកន្លែងចាប់កំហុសបាន ២៣ ឲ្យតែអ្នករាល់គ្នាបន្តកាន់តាមជំនឿ ហើយត្រូវតាំងឡើងមាំមួនលើគ្រឹះ ដោយមិនឲ្យអ្នកណាធ្វើឲ្យចាកចេញពីសេចក្ដីសង្ឃឹមដែលមានមូលដ្ឋានលើដំណឹងល្អដែលអ្នករាល់គ្នាបានឮ ហើយដែលបានត្រូវប្រកាសក្នុងចំណោមមនុស្សទាំងអស់នៅក្រោមមេឃ។ ខ្ញុំ ប៉ូល បានទៅជាអ្នកបម្រើនៃដំណឹងល្អនេះ។
២៤ ឥឡូវខ្ញុំអរសប្បាយនឹងអ្វីដែលខ្ញុំរងទុក្ខដើម្បីអ្នករាល់គ្នា ហើយខ្ញុំចាត់ទុកថាខ្ញុំមិនទាន់រងទុក្ខពេញកម្រិតក្នុងនាមជាអវយវៈនៃរូបកាយរបស់គ្រិស្ត ពោលគឺក្រុមជំនុំ។ ២៥ ខ្ញុំបានក្លាយទៅជាអ្នកបម្រើនៃក្រុមជំនុំនេះ ស្របតាមភារកិច្ចដែលព្រះបានផ្ញើទុកនឹងខ្ញុំ ដើម្បីឲ្យខ្ញុំប្រកាសបណ្ដាំរបស់ព្រះឲ្យបានសព្វគ្រប់ ដើម្បីជាប្រយោជន៍ដល់អ្នករាល់គ្នា ២៦ គឺប្រកាសអាថ៌កំបាំងដ៏ពិសិដ្ឋដែលបានត្រូវលាក់ពីរបៀបរបបពិភពលោកមុនៗ និងជំនាន់មុនៗ។ ប៉ុន្តែឥឡូវនេះអាថ៌កំបាំងពិសិដ្ឋនោះបានត្រូវបើកបង្ហាញដល់ពួកអ្នកបរិសុទ្ធរបស់លោក ២៧ ដែលលោកពេញចិត្តធ្វើឲ្យដឹងអំពីទ្រព្យរុងរឿងនៃអាថ៌កំបាំងដ៏ពិសិដ្ឋនេះ ក្នុងចំណោមជនជាតិនានា។ អាថ៌កំបាំងពិសិដ្ឋនេះ គឺគ្រិស្តកំពុងរួបរួមជាមួយនឹងអ្នករាល់គ្នា ដែលមានន័យថាអ្នករាល់គ្នាមានសេចក្ដីសង្ឃឹមរួមចំណែកក្នុងសិរីរុងរឿងរបស់លោក។ ២៨ យើងប្រកាសផ្សាយអំពីលោក ដោយដាស់តឿននិងបង្រៀនមនុស្សគ្រប់រូបដោយប្រាជ្ញាសព្វគ្រប់ ដើម្បីយើងអាចនាំមនុស្សគ្រប់រូបឲ្យនៅចំពោះមុខព្រះ ដោយមានភាពចាស់ទុំជាអ្នកកាន់តាមគ្រិស្ត។ ២៩ ដើម្បីធ្វើដូច្នេះ ខ្ញុំកំពុងធ្វើការយ៉ាងនឿយហត់ ខំប្រឹងព្យាយាមដោយឫទ្ធានុភាពរបស់លោកដែលកំពុងមានសកម្មភាពក្នុងខ្ញុំ។
២ ព្រោះខ្ញុំចង់ឲ្យអ្នករាល់គ្នាដឹងថាខ្ញុំកំពុងតស៊ូយ៉ាងខ្លាំង ដើម្បីអ្នករាល់គ្នា និងអ្នកដែលនៅក្រុងឡៅឌីសេ ព្រមទាំងអស់អ្នកដែលមិនទាន់ឃើញមុខខ្ញុំ ២ ដើម្បីឲ្យពួកគាត់ទទួលការសម្រាលទុក្ខ និងដើម្បីឲ្យពួកគាត់មានសាមគ្គីភាពប្រកបដោយសេចក្ដីស្រឡាញ់។ យ៉ាងនោះ ពួកគាត់នឹងមានទ្រព្យសម្បត្ដិបរិបូរ ពោលគឺការយល់ដឹងដ៏ច្បាស់និងពិតប្រាកដ ហើយនឹងមានចំណេះត្រឹមត្រូវអំពីអាថ៌កំបាំងដ៏ពិសិដ្ឋរបស់ព្រះ គឺគ្រិស្ត។ ៣ គ្រប់ទាំងប្រាជ្ញានិងចំណេះដែលថ្លៃវិសេសបានត្រូវលាក់ទុកក្នុងលោក។ ៤ ខ្ញុំនិយាយដូច្នេះ ដើម្បីកុំឲ្យអ្នកណាបោកបញ្ឆោតអ្នករាល់គ្នាដោយការវែកញែកដែលស្ដាប់ទៅដូចជាគួរឲ្យជឿ។ ៥ ព្រោះទោះជាខ្លួនខ្ញុំមិននៅទីនោះក៏ដោយ ក៏ចិត្ត* ខ្ញុំនៅជាមួយនឹងអ្នករាល់គ្នា ដោយអរសប្បាយនិងដោយមើលឃើញសណ្ដាប់ធ្នាប់ល្អរបស់អ្នករាល់គ្នា និងជំនឿរឹងមាំដែលអ្នករាល់គ្នាមានលើគ្រិស្ត។
៦ ដូច្នេះ តាមរបៀបដែលអ្នករាល់គ្នាបានទទួលលោកម្ចាស់គ្រិស្តយេស៊ូហើយ ចូរបន្តដើរដោយរួបរួមជាមួយនឹងលោក។ ៧ ចូរចាក់ឫស និងទទួលការពង្រឹងក្នុងលោក ថែមទាំងតាំងខ្លួនឲ្យមាំមួនឡើងក្នុងជំនឿ ដូចដែលអ្នករាល់គ្នាបានរៀន ហើយពេលដែលអរគុណព្រះ ចូរឲ្យអ្នករាល់គ្នាបានពោរពេញទៅដោយជំនឿ។
៨ ចូរប្រយ័ត្ន ក្រែងលោមានអ្នកណាចាប់យកអ្នករាល់គ្នាធ្វើជាចំណី តាមរយៈទស្សនវិជ្ជានិងការបោកបញ្ឆោតអសារឥតការ ដែលមានមូលដ្ឋានលើទំនៀមទម្លាប់របស់មនុស្ស និងបឋមសេចក្ដីរបស់ពិភពលោកនេះ មិនមែនមានមូលដ្ឋានលើគ្រិស្តឡើយ ៩ ព្រោះគុណសម្បត្ដិរបស់ព្រះនៅក្នុងលោកបានពេញខ្នាត។ ១០ ដូច្នេះ អ្នករាល់គ្នាមានអ្វីៗសព្វគ្រប់ ដោយសារលោកដែលជាប្រមុខនៃរដ្ឋាភិបាលនិងអំណាចគ្រប់គ្រងទាំងឡាយ។ ១១ ដោយសារអ្នករាល់គ្នាមានទំនាក់ទំនងជាមួយនឹងលោក នោះអ្នករាល់គ្នាបានទទួលការកាត់ចុងស្បែក មិនមែនដោយដៃមនុស្សទេ តែដោយបោះបង់ចោលរូបកាយសាច់ឈាមដែលប្រកបដោយភាពខុសឆ្គង ព្រោះនោះជារបៀបដែលអ្នកបម្រើនៃគ្រិស្តត្រូវទទួលការកាត់ចុងស្បែក ១២ ព្រោះអ្នករាល់គ្នាបានត្រូវកប់ជាមួយនឹងលោក ដោយទទួលការជ្រមុជដូចលោក ហើយដោយសារទំនាក់ទំនងរបស់អ្នករាល់គ្នាជាមួយនឹងលោក អ្នករាល់គ្នាក៏បានត្រូវប្រោសឲ្យរស់ឡើងវិញជាមួយគ្នា តាមរយៈជំនឿរបស់អ្នករាល់គ្នាលើអ្វីដែលបានត្រូវសម្រេចដោយឫទ្ធានុភាពរបស់ព្រះ ដែលបានប្រោសលោកឲ្យរស់ពីស្លាប់ឡើងវិញ។
១៣ ម្យ៉ាងទៀត ទោះបីអ្នករាល់គ្នាធ្លាប់ជាមនុស្សស្លាប់ដោយសារកំហុសរបស់អ្នករាល់គ្នាហើយមិនទាន់ទទួលការកាត់ចុងស្បែកក៏ដោយ ព្រះបានធ្វើឲ្យអ្នករាល់គ្នាមានជីវិតរស់ឡើងវិញជាមួយនឹងលោក។ ព្រះបានមេត្ដាអភ័យទោសចំពោះកំហុសទាំងអស់របស់យើង ១៤ ក៏បានលុបឯកសារសរសេរដោយដៃ គឺជាឯកសារដែលមានបទបញ្ញត្ដិនិងប្រឆាំងយើង។ លោកបានដកឯកសារនោះចេញដោយយកទៅបោះដែកគោលភ្ជាប់នឹងបង្គោលទារុណកម្ម។* ១៥ លោកបានឈ្នះរដ្ឋាភិបាលនិងអំណាចគ្រប់គ្រងទាំងឡាយ រួចដាក់តាំងអ្នកទាំងនោះជាសាធារណៈឲ្យមនុស្សឃើញថា ពួកគេបានចាញ់ ក៏បាននាំពួកគេទៅក្នុងការហែក្បួនអបអរជ័យជម្នះតាមរយៈបង្គោលទារុណកម្ម។
១៦ ដូច្នេះ កុំឲ្យអ្នកណាវិនិច្ឆ័យអ្នករាល់គ្នាអំពីការផឹកឬបរិភោគ អំពីការធ្វើបុណ្យណាមួយ អំពីពិធីចូលខែថ្មី ឬអំពីការកាន់ថ្ងៃឈប់សម្រាក* ឡើយ ១៧ ព្រោះការទាំងនោះគ្រាន់តែជាស្រមោលនៃអ្វីៗដែលនឹងមក ប៉ុន្តែរូបពិតគឺជាគ្រិស្ត។ ១៨ កុំឲ្យអ្នកណាធ្វើឲ្យអ្នករាល់គ្នាខកខានមិនបានទទួលរង្វាន់ឡើយ គឺពួកអ្នកដែលចូលចិត្តធ្វើពុតជាបន្ទាបខ្លួនហើយចូលចិត្តគោរពប្រណិប័តន៍ពួកទេវតា* ក៏«កាន់ជំហរលើ»អ្វីដែលគាត់បានមើលឃើញ ហើយអ្នកនោះក្រអឺតក្រអោងដោយគ្មានហេតុត្រឹមត្រូវ ដោយសារមានរបៀបគិតគូរដូចមនុស្សជាតិដែលមានភាពខុសឆ្គង ១៩ តែអ្នកនោះមិនកាន់តាមលោកដែលជាក្បាល* ឡើយ គឺលោកដែលធ្វើឲ្យរូបកាយទាំងមូលធំលូតលាស់ជានិច្ចតាមតែព្រះឲ្យលូតលាស់ ដោយមានគ្រប់អវយវៈទទួលការចិញ្ចឹម ហើយក៏ជាប់គ្នាយ៉ាងល្អដោយសារសរសៃនិងសន្លាក់ឆ្អឹងផ្សេងៗ។
២០ ប្រសិនបើអ្នករាល់គ្នាបានស្លាប់ជាមួយនឹងគ្រិស្តឲ្យរួចពីបឋមសេចក្ដីនៃពិភពលោកនេះ ហេតុអ្វីបានជាអ្នករាល់គ្នារស់នៅដូចជារួមចំណែកក្នុងពិភពលោកនៅឡើយ ដោយចុះចូលស្ដាប់តាមបញ្ញត្ដិថា៖ ២១ «កុំយក កុំភ្លក់ កុំពាល់»? ២២ ព្រោះរបស់ទាំងនោះនឹងត្រូវបំផ្លាញពេលដែលប្រើប្រាស់អស់ទៅ ហើយបទបញ្ញត្ដិទាំងនោះជាសេចក្ដីបង្គាប់និងសេចក្ដីបង្រៀនរបស់មនុស្ស។ ២៣ ការទាំងនោះមើលទៅដូចជាបង្ហាញពីប្រាជ្ញា ពេលដែលគេគោរពប្រណិប័តន៍តាមរបៀបដែលគេបង្កើតដោយខ្លួនឯង និងធ្វើពុតជាបន្ទាបខ្លួន ហើយប្រព្រឹត្តតឹងតែងហួសហេតុចំពោះខ្លួនឯង ប៉ុន្តែការទាំងនោះគ្មានប្រយោជន៍សោះក្នុងការតយុទ្ធនិងសេចក្ដីប៉ងប្រាថ្នានៃរូបកាយដែលប្រកបទៅដោយភាពខុសឆ្គង។
៣ ក៏ប៉ុន្តែប្រសិនបើអ្នកបានត្រូវប្រោសឲ្យរស់ឡើងវិញជាមួយនឹងគ្រិស្ត ចូរបន្តស្វែងរកអ្វីដែលនៅស្ថានលើ ជាកន្លែងដែលគ្រិស្តអង្គុយនៅខាងស្ដាំព្រះ។ ២ ចូរផ្ចង់ចិត្តទៅលើអ្វីដែលនៅស្ថានលើ មិនមែនទៅលើអ្វីនៅផែនដីឡើយ។ ៣ ព្រោះអ្នករាល់គ្នាបានស្លាប់ ហើយជីវិតរបស់អ្នករាល់គ្នាបានត្រូវលាក់ទុកជាមួយនឹងគ្រិស្ត ស្របតាមបំណងប្រាថ្នារបស់ព្រះ។ ៤ កាលគ្រិស្តដែលជាជីវិតរបស់យើងត្រូវសម្ដែងឲ្យឃើញ នោះអ្នករាល់គ្នាក៏នឹងត្រូវសម្ដែងឲ្យឃើញជាមួយនឹងលោកដែរ ដោយមានសិរីរុងរឿង។
៥ ដូច្នេះ ចូររម្ងាប់ភាពទោរទន់ដែលមាននៅក្នុងអវយវៈរូបកាយ* របស់អ្នករាល់គ្នា គឺភាពទោរទន់ទៅរកអំពើប្រាសចាកសីលធម៌ខាងផ្លូវភេទ* អំពើស្មោកគ្រោក តម្រេក សេចក្ដីប៉ងប្រាថ្នាអាក្រក់ និងការច្រណែនចង់បានរបស់អ្នកដទៃ ដែលទុកដូចជាការគោរពបូជារូបព្រះ។ ៦ ដោយសារការទាំងនោះ កំហឹងរបស់ព្រះនឹងមក។ ៧ អ្នករាល់គ្នាក៏ធ្លាប់ប្រព្រឹត្តអំពើទាំងនោះជាទម្លាប់ដែរ។ ៨ ប៉ុន្តែឥឡូវ ចូរអ្នករាល់គ្នាលះចោលការទាំងអស់នោះទាំងស្រុង គឺកំហឹង អំពើអាក្រក់ និងពាក្យប្រមាថមើលងាយ ហើយពាក្យអាសអាភាសមិនត្រូវចេញពីមាត់អ្នករាល់គ្នាឡើយ។ ៩ កុំកុហកគ្នាឡើយ។ ចូរដោះចេញនូវបុគ្គលិកលក្ខណៈចាស់និងការប្រព្រឹត្តរបស់វា ១០ រួចបំពាក់ខ្លួនដោយបុគ្គលិកលក្ខណៈថ្មី ដែលកំពុងត្រូវកែប្រែឲ្យថ្មីឡើងតាមរយៈចំណេះត្រឹមត្រូវ ស្របតាមលក្ខណៈរបស់លោកដែលបានបង្កើតបុគ្គលិកលក្ខណៈថ្មីនោះ ១១ ដែលគ្មានជនជាតិក្រិច ឬជនជាតិយូដា គ្មានការកាត់ចុងស្បែក* ឬមិនកាត់ចុងស្បែក គ្មានជនបរទេស ជនជាតិស៊ិទា ខ្ញុំបម្រើ ឬអ្នកមានសេរីភាពឡើយ ប៉ុន្តែគ្រិស្តគឺជាអ្វីៗទាំងអស់ ហើយនៅក្នុងអ្វីៗទាំងអស់។
១២ ម្ល៉ោះហើយ ក្នុងនាមជាអ្នកដែលព្រះបានជ្រើសរើស ជាអ្នកបរិសុទ្ធនិងជាទីស្រឡាញ់ ចូរបំពាក់ខ្លួនដោយសេចក្ដីមេត្ដាករុណាដ៏ជ្រាលជ្រៅបំផុត សេចក្ដីសប្បុរស ចិត្តរាបទាប ចិត្តស្លូតបូត និងចិត្តធ្ងន់។ ១៣ ចូរទ្រាំទ្រគ្នាទៅវិញទៅមក ហើយអភ័យទោសឲ្យគ្នាទៅវិញទៅមកដោយគ្មានល័ក្ខខ័ណ្ឌ បើអ្នកណាមានហេតុត្អូញត្អែរអំពីអ្នកណាម្នាក់។ ព្រះយេហូវ៉ាបានអភ័យទោសឲ្យអ្នករាល់គ្នាដោយគ្មានល័ក្ខខ័ណ្ឌ ម្ល៉ោះហើយ ចូរអ្នករាល់គ្នាធ្វើដូច្នោះដែរ។ ១៤ ប៉ុន្តែក្រៅពីការទាំងនេះ ចូរបំពាក់ខ្លួនដោយសេចក្ដីស្រឡាញ់ ព្រោះនោះជាចំណងដែលធ្វើឲ្យមានសាមគ្គីភាពល្អឥតខ្ចោះ។
១៥ ម្យ៉ាងទៀត ចូរឲ្យសេចក្ដីសុខសាន្តរបស់គ្រិស្តគ្រប់គ្រងចិត្តអ្នករាល់គ្នា ព្រោះតាមការពិត អ្នករាល់គ្នាបានត្រូវហៅដើម្បីមានសេចក្ដីសុខសាន្តបែបនេះ ដើម្បីធ្វើជារូបកាយតែមួយ។ ហើយចូរបង្ហាញអំណរគុណ។ ១៦ ចូរឲ្យបណ្ដាំរបស់គ្រិស្តស្ថិតនៅក្នុងអ្នករាល់គ្នាជាបរិបូរ ដោយប្រាជ្ញាសព្វគ្រប់។ ចូរបន្តបង្រៀននិងដាស់តឿនគ្នាទៅវិញទៅមក ដោយទំនុកតម្កើង ពាក្យសរសើរព្រះ ចម្រៀងគោរពប្រណិប័តន៍ដ៏ពីរោះ ហើយដោយច្រៀងជូនព្រះយេហូវ៉ាក្នុងចិត្ត។ ១៧ ហើយទោះជាអ្នករាល់គ្នាធ្វើឬនិយាយអ្វីក៏ដោយ ចូរធ្វើអ្វីៗទាំងអស់ក្នុងនាមលោកម្ចាស់យេស៊ូ ដោយអរគុណព្រះជាបិតាតាមរយៈលោក។
១៨ ប្រពន្ធទាំងឡាយអើយ ចូរចុះចូលនឹងប្ដី ព្រោះធ្វើបែបនេះគឺសមរម្យសម្រាប់អ្នកកាន់តាមលោកម្ចាស់។ ១៩ ប្ដីទាំងឡាយអើយ ចូរស្រឡាញ់ប្រពន្ធជានិច្ច ហើយកុំក្រេវក្រោធនឹងនាង។ ២០ កូនរាល់គ្នាអើយ ចូរស្ដាប់បង្គាប់ឪពុកម្ដាយក្នុងគ្រប់ការទាំងអស់ ព្រោះធ្វើដូច្នេះនាំឲ្យលោកម្ចាស់ពេញចិត្ត។ ២១ ឪពុករាល់គ្នាអើយ កុំធ្វើឲ្យកូនខឹង ព្រោះធ្វើដូច្នេះនាំឲ្យកូនធ្លាក់ទឹកចិត្ត។ ២២ ខ្ញុំបម្រើទាំងឡាយអើយ ចូរស្ដាប់បង្គាប់ពួកអ្នកដែលជាម្ចាស់របស់អ្នករាល់គ្នានៅផែនដី មិនគ្រាន់តែពេលដែលពួកគេឃើញប៉ុណ្ណោះ ដូចអ្នកដែលចង់ផ្គាប់ចិត្តមនុស្ស ប៉ុន្តែដោយចិត្តស្មោះ និងដោយកោតខ្លាចព្រះយេហូវ៉ា។ ២៣ ទោះជាអ្នករាល់គ្នាធ្វើអ្វីក៏ដោយ ចូរធ្វើអស់ពីកម្លាំងកាយកម្លាំងចិត្ត ទុកដូចជាធ្វើដើម្បីព្រះយេហូវ៉ា មិនមែនដើម្បីមនុស្សទេ ២៤ ព្រោះអ្នករាល់គ្នាដឹងថា អ្នករាល់គ្នានឹងទទួលមត៌កពីព្រះយេហូវ៉ាជារង្វាន់។ ចូរខំប្រឹងធ្វើការដូចជាខ្ញុំបម្រើដើម្បីលោកម្ចាស់ គឺគ្រិស្ត។ ២៥ អ្នកណាដែលធ្វើខុសពិតជានឹងទទួលផលតាមកំហុសរបស់អ្នកនោះ ព្រោះព្រះមិនចេះលម្អៀងទេ។
៤ ម្ចាស់ទាំងឡាយអើយ ចូរបន្តប្រព្រឹត្តទៅលើខ្ញុំបម្រើរបស់អ្នករាល់គ្នាដោយសុចរិតយុត្ដិធម៌ ដោយដឹងថាអ្នករាល់គ្នាក៏មានម្ចាស់នៅស្ថានសួគ៌ដែរ។
២ ចូរតស៊ូក្នុងការអធិដ្ឋាន ដោយមិនដេកលក់ក្នុងការនោះ ហើយចូរមានអំណរគុណ ៣ ព្រមទាំងអធិដ្ឋានឲ្យយើងផងដែរ ដោយសូមព្រះបើកទ្វារមួយឲ្យយើងប្រកាសបណ្ដាំរបស់លោកនិងប្រាប់អាថ៌កំបាំងដ៏ពិសិដ្ឋអំពីគ្រិស្ត អាថ៌កំបាំងនោះជាមូលហេតុដែលខ្ញុំជាប់ចំណង។ ៤ យ៉ាងនេះ ខ្ញុំនឹងអាចបកស្រាយសេចក្ដីនោះ ដូចខ្ញុំគួរនិយាយ។
៥ ចូរបន្តប្រព្រឹត្តទៅលើអ្នកក្រៅដោយប្រាជ្ញា ហើយដោយប្រើគ្រប់ឱកាសឲ្យកើតប្រយោជន៍ច្រើនបំផុត។* ៦ ចូរឲ្យសម្ដីរបស់អ្នករាល់គ្នាប្រកបដោយភាពសប្បុរស ប្រៀបដូចជាបានត្រូវបង់អំបិល។ ធ្វើដូច្នេះ អ្នកនឹងដឹងថាគួរឆ្លើយដូចម្ដេចចំពោះមនុស្សម្នាក់ៗ។
៧ ទីឃីកុស ជាបងប្រុសជាទីស្រឡាញ់និងអ្នកបម្រើស្មោះត្រង់របស់ខ្ញុំ ហើយជាខ្ញុំបម្រើរបស់លោកម្ចាស់ជាមួយនឹងខ្ញុំ នឹងប្រាប់អ្នករាល់គ្នាអំពីរឿងទាំងអស់របស់ខ្ញុំ។ ៨ ខ្ញុំនឹងចាត់គាត់ឲ្យមកឯអ្នករាល់គ្នាសម្រាប់ការនោះឯង គឺដើម្បីឲ្យអ្នករាល់គ្នាមានដំណឹងអំពីយើង ហើយដើម្បីឲ្យគាត់សម្រាលទុក្ខអ្នករាល់គ្នា ៩ ខ្ញុំនឹងចាត់អូណេស៊ីមឲ្យមកដែរ គាត់ជាបងប្រុសស្មោះត្រង់និងជាទីស្រឡាញ់របស់ខ្ញុំ ដែលមកពីចំណោមអ្នករាល់គ្នា។ ពួកគាត់នឹងប្រាប់អ្នករាល់គ្នាអំពីការទាំងអស់ដែលបានកើតឡើងនៅទីនេះ។
១០ អារីស្ដាក ដែលជាអ្នកជាប់គុកជាមួយនឹងខ្ញុំផ្ដាំសួរសុខទុក្ខអ្នករាល់គ្នា ហើយម៉ាកុស ប្អូនជីដូនមួយរបស់បាណាបាសក៏ផ្ដាំសួរសុខទុក្ខដែរ (អ្នករាល់គ្នាបានត្រូវបង្គាប់ឲ្យទទួលស្វាគមន៍គាត់ ប្រសិនបើគាត់មកឯអ្នករាល់គ្នា) ១១ ហើយយេស៊ូដែលហៅថាយូស្ទុសផ្ដាំសួរសុខទុក្ខអ្នករាល់គ្នា។ អ្នកទាំងនោះមកពីចំណោមពួកអ្នកដែលបានទទួលការកាត់ចុងស្បែក។* មានតែពួកគាត់ប៉ុណ្ណោះដែលរួមការងារជាមួយនឹងខ្ញុំដើម្បីរាជាណាចក្ររបស់ព្រះ ហើយពួកគាត់បានក្លាយទៅជាជំនួយរបស់ខ្ញុំនិងអ្នកពង្រឹងកម្លាំងខ្ញុំ។ ១២ អេប៉ាប្រាស ដែលមកពីចំណោមអ្នករាល់គ្នា និងជាខ្ញុំបម្រើរបស់គ្រិស្តយេស៊ូផ្ដាំសួរសុខទុក្ខអ្នករាល់គ្នា ហើយគាត់តែងតែខំប្រឹងព្យាយាមអធិដ្ឋានដើម្បីអ្នករាល់គ្នា ដើម្បីនៅទីបំផុត អ្នករាល់គ្នានឹងកាន់ជំហរដោយមានគ្រប់លក្ខណៈសម្បត្ដិ និងដោយមានជំនឿរឹងមាំខាងបំណងប្រាថ្នាទាំងមូលរបស់ព្រះ។ ១៣ ខ្ញុំជាសាក្សីថា គាត់ខំប្រឹងខ្លាំងណាស់ដើម្បីអ្នករាល់គ្នា ពួកអ្នកនៅក្រុងឡៅឌីសេ និងពួកអ្នកនៅក្រុងហេរ៉ាពើលិស។
១៤ លូកា គ្រូពេទ្យជាទីស្រឡាញ់ព្រមទាំងដេម៉ាសផ្ដាំសួរសុខទុក្ខអ្នករាល់គ្នា។ ១៥ ខ្ញុំសូមផ្ដាំសួរសុខទុក្ខបងប្អូននៅក្រុងឡៅឌីសេ ហើយផ្ដាំសួរសុខទុក្ខនីមផានិងក្រុមជំនុំដែលប្រជុំគ្នានៅផ្ទះរបស់នាង។ ១៦ ក្រោយពីអ្នករាល់គ្នាអានសំបុត្រនេះហើយ ចូរចាត់ចែងឲ្យក្រុមជំនុំនៅក្រុងឡៅឌីសេអានដែរ ហើយចូរអ្នករាល់គ្នាអានសំបុត្រពីក្រុងឡៅឌីសេផងដែរ។ ១៧ ម្យ៉ាងទៀត ចូរប្រាប់អាឃីប៉ុសថា៖ «ចូរយកចិត្តទុកដាក់បំពេញកិច្ចបម្រើឲ្យបានត្រឹមត្រូវ ជាកិច្ចបម្រើដែលអ្នកបានទទួលក្នុងនាមជាអ្នកកាន់តាមលោកម្ចាស់»។
១៨ ខ្ញុំ ប៉ូល សរសេរពាក្យសួរសុខទុក្ខនេះដោយដៃខ្ញុំផ្ទាល់។ សូមចាំកុំឲ្យភ្លេចអំពីការដែលខ្ញុំជាប់ចំណង។ សូមឲ្យគុណដ៏វិសេសលើសលប់នៅជាមួយនឹងអ្នករាល់គ្នា។
[កំណត់សម្គាល់]
ភាសាក្រិច«អាប៉ូស្តូឡូស»។ មានន័យថា«អ្នកដែលត្រូវគេចាត់ឲ្យទៅ»
មើលសេចក្ដីពន្យល់បន្ថែមផ្នែកទី៤
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់រ៉ូម ៥:១២
មើលសេចក្ដីពន្យល់បន្ថែមផ្នែកទី៥
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលសេចក្ដីពន្យល់បន្ថែមផ្នែកទី៥
មើលកំណត់សម្គាល់ម៉ាថ ១២:១
ឬ«របៀបគោរពប្រណិប័តន៍ដូចពួកទេវតា»
ឬ«ប្រមុខ»
ន័យត្រង់«អវយវៈនៃរូបកាយរបស់អ្នកដែលធ្វើពីដី»
មើលកំណត់សម្គាល់ម៉ាថ ៥:៣២
មើលកំណត់សម្គាល់លូក ១:៥៩
ន័យត្រង់«ទិញពេលវេលា»
មើលកំណត់សម្គាល់លូក ១:៥៩