ជូនចំពោះទីតុស
១ ពីខ្ញុំ ប៉ូល ដែលជាខ្ញុំបម្រើរបស់ព្រះនិងជាសាវ័ក* របស់លោកយេស៊ូគ្រិស្ត* ស្របតាមជំនឿរបស់ពួកអ្នកដែលព្រះបានជ្រើសរើស និងស្របតាមចំណេះត្រឹមត្រូវអំពីសេចក្ដីពិតដែលសមស្របនឹងភក្ដីភាពចំពោះព្រះ ២ ដែលមានមូលដ្ឋានលើសេចក្ដីសង្ឃឹមឲ្យបានជីវិតគ្មានទីបញ្ចប់ ជាអ្វីដែលព្រះដែលមិនអាចកុហក បានសន្យាតាំងពីយូរយារណាស់មកហើយ ៣ តែនៅពេលកំណត់របស់លោក លោកបានបើកបង្ហាញបណ្ដាំរបស់លោកតាមរយៈកិច្ចផ្សព្វផ្សាយដែលបានត្រូវផ្ញើទុកនឹងខ្ញុំ នៅក្រោមបង្គាប់របស់ព្រះ ជាអ្នកសង្គ្រោះយើង។ ៤ ខ្ញុំសរសេរសំបុត្រនេះទៅកាន់ទីតុស ជាកូនពិតប្រាកដដែលរួមជំនឿជាមួយនឹងខ្ញុំ៖
សូមឲ្យអ្នកបានប្រកបដោយគុណដ៏វិសេសលើសលប់ និងសេចក្ដីសុខសាន្តពីព្រះដែលជាបិតា និងពីគ្រិស្តយេស៊ូជាអ្នកសង្គ្រោះយើង។
៥ ហេតុនេះហើយបានជាខ្ញុំទុកអ្នកនៅកោះក្រេត គឺដើម្បីឲ្យអ្នកកែតម្រង់អ្វីដែលខុស ហើយតែងតាំងបុរសចាស់ទុំនៅក្រុងនីមួយៗ ដូចខ្ញុំបានបង្គាប់ ៦ ប្រសិនបើមានបុរសណាម្នាក់គ្មានកន្លែងចាប់កំហុសបាន មានប្រពន្ធតែមួយ មានកូនជាអ្នកជឿដែលមិនត្រូវគេចោទប្រកាន់ថាជាអ្នកប្រព្រឹត្តអំពើអបាយមុខហើយមិនមែនជាកូនពិបាកគ្រប់គ្រង ៧ ព្រោះក្នុងនាមជាអ្នកចាត់ចែងដែលព្រះបានតែងតាំង នោះអ្នកត្រួតពិនិត្យត្រូវគ្មានកន្លែងចាប់កំហុសបាន មិនប្រកាន់តែគំនិតខ្លួន មិនឆាប់ខឹង មិនមែនជាអ្នកប្រមឹកស្រា មិនមែនជាអ្នកវាយតប់ មិនស្វះស្វែងរកវិធីឲ្យបានប្រយោជន៍ផ្ទាល់ខ្លួន ៨ ប៉ុន្តែចេះទទួលអ្នកឯទៀតដោយរាក់ទាក់ ស្រឡាញ់សេចក្ដីល្អ ដឹងខុសត្រូវ ជាមនុស្សសុចរិត មានភក្ដីភាព ចេះទប់ចិត្ត ៩ កាន់ខ្ជាប់តាមបណ្ដាំដ៏គួរឲ្យទុកចិត្ត ក្នុងរបៀបដែលគាត់បង្រៀន ដើម្បីគាត់អាចបំផុសទឹកចិត្តអ្នកឯទៀតតាមរយៈសេចក្ដីបង្រៀនដែលមានប្រយោជន៍* ហើយកែតម្រង់អ្នកដែលនិយាយប្រឆាំងសេចក្ដីបង្រៀននោះ។
១០ ព្រោះមានបុរសជាច្រើនគឺជាមនុស្សពិបាកគ្រប់គ្រង និយាយឥតប្រយោជន៍ និងបោកបញ្ឆោតគំនិតអ្នកឯទៀត ជាពិសេសបុរសទាំងនោះដែលកាន់ខ្ជាប់តាមការកាត់ចុងស្បែក។* ១១ គឺត្រូវចាំបាច់បំបិទមាត់បុរសទាំងនោះ ព្រោះពួកគេចេះតែបំផ្លាញជំនឿបងប្អូនទាំងគ្រួសារៗ ដោយបង្រៀនសេចក្ដីដែលមិនគួរបង្រៀនដើម្បីទទួលផលប្រយោជន៍តាមរបៀបមិនទៀងត្រង់។ ១២ មានអ្នកប្រកាសទំនាយម្នាក់* ជាជនរួមជាតិរបស់ពួកគេនិយាយថា៖ «អ្នកកោះក្រេតសុទ្ធតែជាអ្នកភូតភរ ជាសត្វព្រៃដ៏សាហាវ និងជាអ្នកល្មោភស៊ីដែលឥតធ្វើការអ្វីសោះ»។
១៣ សក្ខីភាពនេះជាការពិត។ ហេតុនេះ ចូរបន្តប្រដៅតម្រង់ពួកគេយ៉ាងម៉ឺងម៉ាត់ ដើម្បីពួកគេអាចមានជំនឿមាំមួន* ១៤ ដោយមិនស្ដាប់រឿងព្រេងរបស់ជនជាតិយូដាឬបញ្ញត្ដិរបស់មនុស្សដែលបែរចេញពីសេចក្ដីពិត។ ១៥ អ្វីៗទាំងអស់គឺស្អាតបរិសុទ្ធចំពោះមនុស្សដែលស្អាតបរិសុទ្ធ ក៏ប៉ុន្តែចំពោះមនុស្សដែលមិនស្អាតបរិសុទ្ធនិងគ្មានជំនឿ គ្មានអ្វីស្អាតបរិសុទ្ធទេ ទោះទាំងគំនិតទាំងសមត្ថភាពវិនិច្ឆ័យរបស់ពួកគេគឺសៅហ្មង។ ១៦ ពួកគេប្រកាសជាសាធារណៈថា ពួកគេស្គាល់ព្រះ ក៏ប៉ុន្តែការប្រព្រឹត្តរបស់ពួកគេបង្ហាញថាពួកគេមិនទទួលស្គាល់ព្រះទេ ពីព្រោះពួកគេជាមនុស្សគួរឲ្យស្អប់ខ្ពើម មិនស្ដាប់បង្គាប់ និងមិនសមនឹងការល្អណាមួយសោះ។
២ ចំណែកអ្នកវិញ ចូរបន្តនិយាយអ្វីដែលស្របតាមសេចក្ដីបង្រៀនដែលមានប្រយោជន៍។* ២ បុរសវ័យចាស់ត្រូវចេះប្រមាណខ្លួន ត្រូវមានចិត្តគំនិតនឹងធឹង ដឹងខុសត្រូវ មាំមួន* ក្នុងជំនឿ ក្នុងសេចក្ដីស្រឡាញ់ និងក្នុងការស៊ូទ្រាំ។ ៣ ដូចគ្នាដែរ ស្ត្រីវ័យចាស់ត្រូវប្រព្រឹត្តឲ្យសមជាមនុស្សបរិសុទ្ធ មិននិយាយបង្កាច់បង្ខូច ហើយមិនញៀនស្រា តែជាអ្នកបង្រៀនអំពីអ្វីដែលល្អ ៤ ដើម្បីពួកគាត់អាចធ្វើឲ្យស្ត្រីវ័យក្មេងភ្ញាក់ខ្លួន ហើយស្រឡាញ់ប្ដី ស្រឡាញ់កូន ៥ ដឹងខុសត្រូវ បរិសុទ្ធ ល្អ ឧស្សាហ៍ធ្វើកិច្ចការផ្ទះ ចុះចូលចំពោះប្ដីខ្លួន ដើម្បីកុំឲ្យអ្នកណានិយាយប្រមាថបណ្ដាំរបស់ព្រះ។
៦ ដូចគ្នាដែរ ចូរបន្តបំផុសទឹកចិត្តបុរសវ័យក្មេងឲ្យដឹងខុសត្រូវ ៧ ដោយរូបអ្នកធ្វើជាគំរូក្នុងការប្រព្រឹត្តល្អគ្រប់ការទាំងអស់ ហើយបង្រៀនដោយទៀងត្រង់ មានចិត្តគំនិតនឹងធឹង ៨ ហើយពោលតែសម្ដីល្អ ដែលមិនអាចត្រូវផ្ដន្ទាទោស ដើម្បីធ្វើឲ្យអ្នកដែលប្រឆាំងអៀនខ្មាស ដោយសារអ្នកនោះមិនអាចនិយាយអាក្រក់អំពីយើងបាន ៩ ពួកខ្ញុំបម្រើត្រូវចុះចូលចំពោះម្ចាស់ខ្លួនក្នុងគ្រប់ការទាំងអស់ ថែមទាំងធ្វើឲ្យពួកគាត់ពេញចិត្តយ៉ាងខ្លាំង ក៏មិនត្រូវតមាត់ ១០ មិនត្រូវលួច តែត្រូវស្មោះត្រង់ជាទីបំផុត ដើម្បីធ្វើឲ្យសេចក្ដីបង្រៀនរបស់ព្រះដែលជាអ្នកសង្គ្រោះយើងមានលម្អក្នុងគ្រប់ការទាំងអស់។
១១ ព្រោះគុណដ៏វិសេសលើសលប់របស់ព្រះដែលនាំឲ្យមនុស្សគ្រប់ប្រភេទទទួលសេចក្ដីសង្គ្រោះ នោះបានត្រូវសឲ្យឃើញ ១២ ក៏បានណែនាំយើងឲ្យបដិសេធចំពោះអ្វីៗទាំងអស់ដែលខុសពីបំណងប្រាថ្នារបស់ព្រះ ហើយឲ្យបដិសេធសេចក្ដីប៉ងប្រាថ្នារបស់ពិភពលោកនេះ រួចរស់នៅដោយដឹងខុសត្រូវ ដោយមានសេចក្ដីសុចរិត និងដោយមានភក្ដីភាពចំពោះព្រះ ក្នុងរបៀបរបបពិភពលោកនេះ ១៣ កាលដែលយើងរង់ចាំអ្វីដ៏គួរឲ្យសប្បាយដែលយើងសង្ឃឹមថានឹងបាន ហើយរង់ចាំការលេចមកដ៏រុងរឿងរបស់ព្រះដ៏ឧត្តុង្គឧត្តមនិងគ្រិស្តយេស៊ូជាអ្នកសង្គ្រោះយើង ១៤ គឺលោកដែលបានប្រគល់ខ្លួនដើម្បីរំដោះយើងឲ្យរួចពីការប្រឆាំងច្បាប់គ្រប់យ៉ាង ហើយសម្អាតយើងដើម្បីឲ្យធ្វើជារាស្ត្ររបស់លោកតែមួយប៉ុណ្ណោះ គឺរាស្ត្រដែលខ្នះខ្នែងធ្វើការដ៏ល្អប្រសើរ។
១៥ ចូរបន្តនិយាយការទាំងនេះ បំផុសទឹកចិត្ត ហើយកែតម្រង់ ដោយប្រើអំណាចរបស់អ្នកយ៉ាងពេញលេញ។ កុំឲ្យអ្នកណាមើលងាយអ្នកឡើយ។
៣ ចូរបន្តរំលឹកពួកគេឲ្យចុះចូលស្ដាប់បង្គាប់រដ្ឋាភិបាលនិងពួកអាជ្ញាធរជាអ្នកគ្រប់គ្រង ហើយប្រុងប្រៀបធ្វើការល្អគ្រប់យ៉ាង ២ មិនត្រូវនិយាយអាក្រក់អំពីអ្នកណា មិនត្រូវធ្វើជាមនុស្សដែលចូលចិត្តឈ្លោះប្រកែក តែត្រូវធ្វើជាមនុស្សសមហេតុផល ហើយបង្ហាញចិត្តស្លូតបូតយ៉ាងពេញលេញចំពោះមនុស្សទាំងអស់។ ៣ ព្រោះពីមុន យើងក៏ធ្លាប់ជាមនុស្សឥតវិចារណញ្ញាណ ជាមនុស្សដែលមិនស្ដាប់បង្គាប់ ត្រូវគេបំភាន់ ក៏ធ្លាប់ជាខ្ញុំបម្រើនៃសេចក្ដីប៉ងប្រាថ្នាផ្សេងៗនិងការសប្បាយឥតបើគិត ហើយបានប្រព្រឹត្តអំពើអាក្រក់ ឈ្នានីស ថែមទាំងជាមនុស្សគួរឲ្យស្អប់ខ្ពើម ហើយធ្លាប់ស្អប់គ្នា។
៤ ក៏ប៉ុន្តែ ពេលដែលសេចក្ដីសប្បុរសនិងសេចក្ដីស្រឡាញ់ដែលព្រះ ជាអ្នកសង្គ្រោះយើងមានចំពោះមនុស្ស បានត្រូវសឲ្យឃើញ ៥ មិនមែនដោយសារការសុចរិតដែលយើងបានប្រព្រឹត្តទេ តែដោយសារសេចក្ដីមេត្ដាករុណារបស់លោក នោះលោកបានសង្គ្រោះយើង ដោយលាងសម្អាតឲ្យមានជីវិតឡើងវិញ ហើយបានបង្កើតយើងជាថ្មីតាមរយៈសកម្មពល* បរិសុទ្ធ។ ៦ លោកបានចាក់សកម្មពលនេះជាបរិបូរមកលើយើង តាមរយៈលោកយេស៊ូគ្រិស្តជាអ្នកសង្គ្រោះយើង ៧ ដើម្បីឲ្យយើងក្លាយទៅជាអ្នកទទួលមត៌កសមស្របតាមសេចក្ដីសង្ឃឹមឲ្យបានជីវិតដែលគ្មានទីបញ្ចប់ ក្រោយពីយើងបានត្រូវប្រកាសថាជាមនុស្សសុចរិតដោយគុណដ៏វិសេសលើសលប់របស់លោក។
៨ ពាក្យនេះគឺជាពាក្យពិត ហើយខ្ញុំចង់ឲ្យអ្នកនិយាយយ៉ាងម៉ឺងម៉ាត់អំពីការទាំងនេះជានិច្ច ដើម្បីឲ្យពួកអ្នកដែលជឿព្រះ ផ្ដោតអារម្មណ៍ទៅលើការប្រព្រឹត្តល្អប្រសើរជានិច្ច។ ការទាំងនេះគឺល្អប្រសើរ ហើយមានប្រយោជន៍ចំពោះមនុស្ស។
៩ ប៉ុន្តែ ចូរបដិសេធសំណួរផ្ដេសផ្ដាស ជៀសវាងការស្រាវជ្រាវអំពីពង្សាវតារ ការទាស់ទែងគ្នា ការឈ្លោះប្រកែកគ្នាអំពីច្បាប់* ព្រោះការទាំងនោះគ្មានប្រយោជន៍ ហើយឥតខ្លឹមសារទេ។ ១០ រីឯបុរសណាដែលផ្សាយសេចក្ដីបង្រៀនមិនពិត ចូរឈប់សេពគប់អ្នកនោះ បន្ទាប់ពីបានដាស់តឿនអ្នកនោះពីរដង ១១ ដោយដឹងថាបុរសបែបនោះបានបែរចេញពីផ្លូវ ហើយកំពុងធ្វើខុស* ថែមទាំងផ្ដន្ទាទោសខ្លួនគេផង។
១២ ពេលដែលខ្ញុំចាត់អាតេម៉ាស ឬទីឃីកុសឲ្យមកឯអ្នក ចូរខំអស់ពីសមត្ថភាពដើម្បីមកឯខ្ញុំនៅក្រុងនីកូពើលិស ព្រោះខ្ញុំបានសម្រេចចិត្តស្នាក់នៅទីនោះក្នុងអំឡុងរដូវត្រជាក់។ ១៣ ចូរយកចិត្តទុកដាក់ក្នុងការផ្គត់ផ្គង់អាប៉ូឡុស និងសេណាស ជាអ្នកចេះច្បាប់ស្ទាត់ ដើម្បីកុំឲ្យពួកគាត់ខ្វះអ្វីឡើយពេលធ្វើដំណើរ។ ១៤ តែត្រូវឲ្យពួកយើងរៀនរក្សាការប្រព្រឹត្តឲ្យល្អប្រសើរជានិច្ច ដើម្បីបំពេញសេចក្ដីត្រូវការជាបន្ទាន់របស់ពួកគាត់ ដើម្បីឲ្យពួកគាត់បង្កើតផលក្នុងកិច្ចបម្រើ។
១៥ អស់អ្នកដែលនៅជាមួយនឹងខ្ញុំ ផ្ដាំសួរសុខទុក្ខ។ សូមសួរសុខទុក្ខពួកអ្នករួមជំនឿដែលស្រឡាញ់យើង។
សូមឲ្យអ្នកទាំងអស់គ្នាប្រកបដោយគុណដ៏វិសេសលើសលប់។
[កំណត់សម្គាល់]
ភាសាក្រិច«អាប៉ូស្តូឡូស»។ មានន័យថា«អ្នកដែលត្រូវគេចាត់ឲ្យទៅ»
មើលសេចក្ដីពន្យល់បន្ថែមផ្នែកទី៤
ន័យត្រង់«ធ្វើឲ្យមានសុខភាពល្អ»
មើលកំណត់សម្គាល់លូក ១:៥៩
គឺអេពីមែនីដេស ជាកវីមួយរូបនាសតវត្សរ៍ទី៦មុនគ.ស.នៅកោះក្រេត
ន័យត្រង់«សុខភាពល្អ»
ន័យត្រង់«ធ្វើឲ្យមានសុខភាពល្អ»
ន័យត្រង់«សុខភាពល្អ»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់ម៉ាថ ៥:១៧
មើលកំណត់សម្គាល់រ៉ូម ៥:១២