ជូនចំពោះភីលេម៉ូន
១ ពីខ្ញុំ ប៉ូល ជាអ្នកទោសដើម្បីគ្រិស្ត* យេស៊ូ និងពីធីម៉ូថេ ជាប្អូនប្រុសរបស់យើង ជូនចំពោះភីលេម៉ូនជាទីស្រឡាញ់និងជាអ្នករួមការងារជាមួយនឹងយើង ២ ហើយជូនចំពោះអាប់ភា ជាបងស្រីរបស់យើង អាឃីប៉ុសដែលជាអ្នកធ្វើទាហានជាមួយនឹងយើង និងចំពោះក្រុមជំនុំដែលជួបជុំនៅផ្ទះរបស់អ្នក៖
៣ សូមឲ្យអ្នករាល់គ្នាបានប្រកបដោយគុណដ៏វិសេសលើសលប់ និងសេចក្ដីសុខសាន្តពីព្រះដែលជាបិតា និងពីលោកម្ចាស់យេស៊ូគ្រិស្ត។
៤ ខ្ញុំអរគុណព្រះរបស់ខ្ញុំជានិច្ច ពេលដែលខ្ញុំអធិដ្ឋានអំពីអ្នក ៥ ព្រោះយើងតែងតែឮអំពីជំនឿនិងសេចក្ដីស្រឡាញ់ដែលអ្នកមានចំពោះលោកម្ចាស់យេស៊ូ និងចំពោះពួកអ្នកបរិសុទ្ធទាំងអស់ ៦ ដើម្បីឲ្យជំនឿដែលអ្នកបង្ហាញមានសកម្មភាព ពីព្រោះអ្នកទទួលស្គាល់ថា យើងបានទទួលអ្វីៗដ៏ល្អជាច្រើនដោយសារមានសាមគ្គីភាពជាមួយនឹងគ្រិស្ត។ ៧ ព្រោះខ្ញុំបានទទួលការសម្រាលទុក្ខនិងអំណរជាច្រើនដោយសារសេចក្ដីស្រឡាញ់របស់អ្នក ពីព្រោះប្អូនប្រុសអើយ តាមរយៈអ្នក ពួកអ្នកបរិសុទ្ធមានអារម្មណ៍កក់ក្ដៅក្នុងចិត្តឡើងវិញ។
៨ ហេតុនេះ ក្នុងនាមជាសាវ័ក* របស់គ្រិស្ត ទោះជាខ្ញុំមានសេរីភាពពេញលេញដើម្បីបង្គាប់អ្នកឲ្យធ្វើអ្វីដែលត្រឹមត្រូវក៏ដោយ ៩ ក៏ខ្ញុំកំពុងបំផុសទឹកចិត្តអ្នកដោយផ្អែកលើសេចក្ដីស្រឡាញ់ ដោយហេតុថាខ្ញុំ ប៉ូល ជាមនុស្សវ័យចាស់ ហើយឥឡូវជាអ្នកទោសដើម្បីគ្រិស្តយេស៊ូ ១០ ខ្ញុំកំពុងបំផុសទឹកចិត្តអ្នកស្តីអំពីកូនរបស់ខ្ញុំ ពោលគឺ អូណេស៊ីម។ ពេលដែលខ្ញុំជាប់ចំណង ខ្ញុំបានក្លាយទៅជាឪពុករបស់គាត់។ ១១ ពីមុន គាត់គ្មានប្រយោជន៍ចំពោះអ្នកសោះ តែឥឡូវគាត់មានប្រយោជន៍ចំពោះអ្នកនិងខ្ញុំដែរ។ ១២ ខ្ញុំចាត់គាត់ ដែលជាដួងចិត្តរបស់ខ្ញុំ ឲ្យមកឯអ្នកវិញ។
១៣ ខ្ញុំចង់ទុកគាត់ឲ្យនៅជាមួយនឹងខ្ញុំ ដើម្បីគាត់អាចបន្តបម្រើខ្ញុំជំនួសអ្នក ពេលដែលខ្ញុំនៅជាប់ចំណងដើម្បីដំណឹងល្អ។ ១៤ ប៉ុន្តែ បើគ្មានការយល់ព្រមពីអ្នក ខ្ញុំមិនចង់ធ្វើអ្វីឡើយ ដើម្បីឲ្យអ្នកធ្វើការដ៏ល្អនោះស្ម័គ្រពីចិត្ត មិនមែនដោយមានការបង្ខំទេ។ ១៥ ប្រហែលនេះជាមូលហេតុដែលគាត់បានចាកចេញមួយរយៈពេល គឺដើម្បីឲ្យអ្នកបានគាត់មកវិញជារៀងរហូត ១៦ មិនមែនក្នុងឋានៈជាខ្ញុំបម្រើទៀតទេ តែលើសពីនោះទៅទៀតគឺទទួលគាត់ជាបងប្អូនជាទីស្រឡាញ់ ជាពិសេសគាត់គឺជាទីស្រឡាញ់របស់ខ្ញុំ ប៉ុន្តែគាត់គឺជាទីស្រឡាញ់ច្រើនជាងនោះទៅទៀតចំពោះអ្នក ជាខ្ញុំបម្រើនិងជាបងប្អូនក្នុងលោកម្ចាស់។ ១៧ ដូច្នេះ ប្រសិនបើអ្នកចាត់ទុកខ្ញុំជាអ្នករួមចំណែក សូមទទួលគាត់ដោយចិត្តសប្បុរស ដូចជាទទួលខ្ញុំដែរ។ ១៨ ម្យ៉ាងទៀត ប្រសិនបើគាត់បានធ្វើខុសនឹងអ្នកក្នុងរឿងណាមួយឬជំពាក់អ្នកអ្វីមួយ ខ្ញុំសូមទទួលខុសត្រូវ។ ១៩ ខ្ញុំ ប៉ូល សរសេរសេចក្ដីនេះដោយដៃខ្ញុំផ្ទាល់៖ ខ្ញុំនឹងសងអ្នកវិញ ហើយខ្ញុំមិនចាំបាច់ប្រាប់អ្នកទេថា អ្នកជំពាក់ខ្ញុំទាំងជីវិតអ្នកទៀត ២០ ប្អូនប្រុសអើយ ដោយសារយើងទាំងពីរនាក់ជាអ្នកកាន់តាមលោកម្ចាស់៖ សូមឲ្យខ្ញុំទទួលផលប្រយោជន៍ពីអ្នក ដោយសូមអ្នកធ្វើឲ្យខ្ញុំមានអារម្មណ៍កក់ក្ដៅឡើងវិញក្នុងនាមជាអ្នកកាន់តាមគ្រិស្ត។
២១ ខ្ញុំមានទំនុកចិត្តថាអ្នកនឹងធ្វើតាមមិនខាន ហេតុនេះ ខ្ញុំសរសេរទៅកាន់អ្នក ដោយដឹងថាអ្នកនឹងធ្វើលើសពីអ្វីដែលខ្ញុំប្រាប់ទៅទៀត។ ២២ ប៉ុន្តែព្រមជាមួយនឹងការនោះ សូមរៀបចំកន្លែងមួយឲ្យខ្ញុំស្នាក់នៅ ព្រោះខ្ញុំសង្ឃឹមថា ខ្ញុំនឹងត្រូវរំដោះឲ្យមានសេរីភាពដោយសារសេចក្ដីអធិដ្ឋានរបស់អ្នករាល់គ្នា ដើម្បីជាប្រយោជន៍ដល់អ្នករាល់គ្នា។
២៣ អេប៉ាប្រាសដែលជាអ្នកជាប់គុកជាមួយនឹងខ្ញុំដោយសារគ្រិស្តយេស៊ូ សូមផ្ដាំសួរសុខទុក្ខ ២៤ ហើយម៉ាកុស អារីស្ដាក ដេម៉ាស និងលូកា ដែលជាអ្នករួមការងារជាមួយនឹងខ្ញុំក៏ផ្ដាំសួរសុខទុក្ខដែរ។
២៥ សូមឲ្យគុណដ៏វិសេសលើសលប់របស់លោកម្ចាស់យេស៊ូគ្រិស្តនៅជាមួយនឹងអ្នករាល់គ្នា ពីព្រោះអ្នករាល់គ្នាមានចិត្តគំនិត* ត្រឹមត្រូវ។
[កំណត់សម្គាល់]
មើលសេចក្ដីពន្យល់បន្ថែមផ្នែកទី៤
ភាសាក្រិច«អាប៉ូស្តូឡូស»។ មានន័យថា«អ្នកដែលត្រូវគេចាត់ឲ្យទៅ»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ