ជូនចំពោះគ្រិស្តសាសនិកជនជាតិហេប្រឺ
១ នៅអតីតកាល ព្រះដែលធ្លាប់មានប្រសាសន៍ទៅពួកបុព្វបុរសរបស់យើងជាច្រើនលើក និងតាមរបៀបជាច្រើន តាមរយៈពួកអ្នកប្រកាសទំនាយ ២ បានមានប្រសាសន៍មកយើងនៅចុងបញ្ចប់នៃគ្រានេះ តាមរយៈបុត្ររបស់លោក ដែលលោកបានតែងតាំងឲ្យទទួលអ្វីៗទាំងអស់ជាមត៌ក ហើយតាមរយៈបុត្រនោះលោកបានបង្កើតរបៀបរបប* នានា។ ៣ លោកបង្ហាញឲ្យឃើញសិរីរុងរឿងរបស់ព្រះយ៉ាងល្អឥតខ្ចោះ ហើយក៏ដូចព្រះទាំងស្រុង។ លោកទ្រទ្រង់អ្វីៗទាំងអស់ដោយប្រសាសន៍របស់លោកដែលប្រកបដោយឫទ្ធានុភាព ហើយលោកបានអង្គុយនៅខាងស្ដាំនៃព្រះដ៏ឧត្តុង្គឧត្តមនៅស្ថានសួគ៌ បន្ទាប់ពីបានជម្រះយើងឲ្យបរិសុទ្ធពីការខុសឆ្គង* របស់យើង។ ៤ ដូច្នេះ លោកបានទៅជាខ្ពង់ខ្ពស់ជាងបណ្ដាទេវតា ពីព្រោះលោកបានទទួលនាមដ៏ប្រសើរជាងនាមរបស់ពួកគេជាមត៌ក។
៥ ជាឧទាហរណ៍ តើព្រះធ្លាប់មានប្រសាសន៍នឹងទេវតាទេឬថា៖ «អ្នកជាបុត្ររបស់ខ្ញុំ ហើយថ្ងៃនេះ ខ្ញុំបានក្លាយទៅជាបិតារបស់អ្នក» ឬ«ខ្ញុំនឹងក្លាយទៅជាបិតារបស់គាត់ ហើយគាត់នឹងក្លាយទៅជាបុត្ររបស់ខ្ញុំ»? ៦ ប៉ុន្តែពេលដែលព្រះចាត់បុត្រច្បងរបស់លោកឲ្យចូលក្នុងពិភពលោក* ម្ដងទៀត លោកមានប្រសាសន៍ថា៖ «ហើយចូរឲ្យទេវតាទាំងអស់របស់ព្រះលំឱនកាយគោរពលោក»។
៧ ម្យ៉ាងទៀត លោកមានប្រសាសន៍អំពីបណ្ដាទេវតាថា៖ «ហើយលោកធ្វើឲ្យទេវតារបស់លោកទៅជាវិញ្ញាណ* ក៏ធ្វើឲ្យពួកអ្នកបម្រើ* របស់លោកទៅជាអណ្ដាតភ្លើង»។ ៨ ប៉ុន្តែលោកមានប្រសាសន៍អំពីបុត្រនោះថា៖ «ព្រះជាបល្ល័ង្ករបស់អ្នកជារៀងរហូតតទៅ ហើយដំបងរាជ្យនៃរាជាណាចក្ររបស់អ្នក ជាដំបងរាជ្យនៃសេចក្ដីទៀងត្រង់។ ៩ អ្នកបានស្រឡាញ់សេចក្ដីសុចរិត ហើយបានស្អប់ការប្រឆាំងច្បាប់។ ហេតុនេះហើយបានជាព្រះ ដែលជាព្រះរបស់អ្នក បានរើសតាំងអ្នកដោយចាក់ប្រេងនៃអំណរច្រើនជាងស្តេចឯទៀត»។* ១០ ហើយ«លោកម្ចាស់អើយ នៅដើមដំបូងលោកបានដាក់គ្រឹះនៃផែនដី ហើយមេឃជាស្នាដៃរបស់លោក។ ១១ មេឃនិងផែនដីនឹងបាត់សូន្យទៅ ប៉ុន្តែលោកនឹងនៅជារៀងរហូត។ មេឃនិងផែនដីនឹងចាស់ទៅដូចសម្លៀកបំពាក់ក្រៅ ១២ លោកនឹងមូរអ្វីៗទាំងអស់នោះដូចសំពត់ដណ្ដប់ ហើយអ្វីៗទាំងអស់នោះនឹងត្រូវផ្លាស់ដូចជាសម្លៀកបំពាក់ក្រៅ ប៉ុន្តែលោកនៅដដែល ហើយអាយុជីវិតរបស់លោកនឹងមិនដែលអស់ឡើយ»។
១៣ ប៉ុន្តែតើព្រះធ្លាប់មានប្រសាសន៍នឹងទេវតាណាមួយឬទេថា៖ «ចូរអង្គុយនៅខាងស្ដាំខ្ញុំ រហូតដល់ខ្ញុំដាក់ពួកសត្រូវរបស់អ្នកជាកំណល់កល់ជើងអ្នក»? ១៤ ទេវតាទាំងឡាយជាវិញ្ញាណដែលបំពេញកិច្ចបម្រើសាធារណៈ ហើយបានត្រូវចាត់ឲ្យបម្រើជាប្រយោជន៍ដល់អស់អ្នកដែលនឹងទទួលសេចក្ដីសង្គ្រោះជាមត៌ក មែនទេ?
២ ហេតុនេះ យើងត្រូវតែយកចិត្តទុកដាក់ឲ្យបានច្រើនជាងធម្មតាចំពោះអ្វីដែលយើងបានឮ ដើម្បីកុំឲ្យយើងរសាត់ចេញពីជំនឿ។ ២ ព្រោះប្រសិនបើពាក្យដែលបានត្រូវផ្ដាំតាមរយៈពួកទេវតាគឺរឹងមាំ ហើយគ្រប់បទរំលងនិងការប្រព្រឹត្តដោយមិនស្ដាប់បង្គាប់បានទទួលសំណងជាទោសស្របតាមយុត្ដិធម៌ ៣ តើយើងអាចគេចផុតពីទោសយ៉ាងដូចម្ដេច ប្រសិនបើយើងមិនអើពើចំពោះសេចក្ដីសង្គ្រោះដ៏អស្ចារ្យបែបនេះ? លោកម្ចាស់របស់យើងជាអ្នកមានប្រសាសន៍មុនគេអំពីសេចក្ដីសង្គ្រោះនោះ ហើយពួកអ្នកដែលបានឮពីលោកបានបញ្ជាក់ឲ្យយើងដឹងថាការនោះគឺពិតមែន ៤ ពេលដែលព្រះបានចូលរួមធ្វើជាសាក្សីដោយធ្វើសញ្ញាសម្គាល់ព្រមទាំងការអស្ចារ្យនិងការដែលប្រកបដោយឫទ្ធានុភាព ហើយដោយចែកចាយសកម្មពល* បរិសុទ្ធតាមបំណងប្រាថ្នារបស់លោក។
៥ ព្រោះពិភពលោក* ដែលនឹងមាននៅថ្ងៃមុខ ហើយដែលយើងកំពុងរៀបរាប់ លោកមិនបានដាក់ឲ្យចុះចូលនឹងពួកទេវតាទេ។ ៦ ប៉ុន្តែសាក្សីម្នាក់បានសរសេរថា៖ «តើមនុស្សជាអ្វីបានជាលោកនឹកនាដល់គាត់ជានិច្ច? ហើយតើកូនមនុស្សជាអ្វីបានជាលោកថែរក្សាគាត់? ៧ លោកបានធ្វើឲ្យគាត់តូចទាបជាងបណ្ដាទេវតាបន្ដិច ក៏បានប្រគល់សិរីរុងរឿងនិងកិត្ដិយសដល់គាត់ជាមកុដ ហើយលោកបានតែងតាំងគាត់ឲ្យមើលការខុសត្រូវលើស្នាដៃរបស់លោក។ ៨ លោកបានដាក់អ្វីៗទាំងអស់ឲ្យចុះចូលនៅក្រោមបាតជើងគាត់»។ ព្រោះពេលដែលព្រះដាក់អ្វីៗទាំងអស់ឲ្យចុះចូលនឹងបុត្រលោក គ្មានអ្វីដែលមិនចុះចូលនឹងបុត្រលោកឡើយ។ ក៏ប៉ុន្តែឥឡូវនេះយើងមិនទាន់ឃើញអ្វីៗទាំងអស់ចុះចូលនឹងបុត្រលោកទេ ៩ ប៉ុន្តែយើងឃើញលោកយេស៊ូ ដែលបានត្រូវធ្វើឲ្យតូចទាបជាងបណ្ដាទេវតាបន្ដិច ក៏បានទទួលសិរីរុងរឿងនិងកិត្ដិយសជាមត៌ក ពីព្រោះលោកបានរងការឈឺចាប់រហូតដល់ស្លាប់ ដើម្បីលោកអាចឆ្លងកាត់សេចក្ដីស្លាប់ជាប្រយោជន៍ដល់មនុស្សគ្រប់រូប ដោយសារគុណដ៏វិសេសលើសលប់របស់ព្រះ។
១០ អ្វីៗទាំងអស់គឺមាននៅដើម្បីព្រះ ហើយអ្វីៗទាំងអស់មាននៅដោយសារព្រះ។ ដូច្នេះ ក្នុងការធ្វើឲ្យកូនជាច្រើនមានសិរីរុងរឿង នោះជាការសមរម្យដែលលោកធ្វើឲ្យមេដឹកនាំដែលផ្ដល់សេចក្ដីសង្គ្រោះដល់ពួកគេ ទៅជាល្អឥតខ្ចោះដោយទទួលរងទុក្ខលំបាក។ ១១ ព្រោះទាំងលោកដែលធ្វើឲ្យបរិសុទ្ធ ទាំងពួកអ្នកដែលទៅជាបរិសុទ្ធ មានបិតាតែមួយ ហេតុនេះ លោកហៅពួកគាត់ថា«បងប្អូន»ដោយមិនអៀនខ្មាស ១២ ដូចលោកមានប្រសាសន៍ថា៖ «ខ្ញុំនឹងប្រកាសប្រាប់នាមលោកដល់បងប្អូនរបស់ខ្ញុំ។ នៅកណ្ដាលក្រុមជំនុំ ខ្ញុំនឹងសរសើរលោកដោយច្រៀងចម្រៀង»។ ១៣ លោកក៏មានប្រសាសន៍ថា៖ «ខ្ញុំនឹងទុកចិត្តលើលោក» ហើយ«មើល! ខ្ញុំនិងកូនតូចៗដែលព្រះយេហូវ៉ាបានប្រគល់ឲ្យខ្ញុំ»។
១៤ ដូច្នេះ ដោយសារ«កូនតូចៗ»ជាសាច់ឈាម នោះលោកក៏បានក្លាយទៅជាសាច់ឈាមដែរ ដើម្បីតាមរយៈសេចក្ដីស្លាប់របស់លោក លោកអាចបំផ្លាញចោលអ្នកដែលមានសមត្ថភាពបណ្ដាលឲ្យស្លាប់ ពោលគឺមេកំណាច* ១៥ ហើយដើម្បីរំដោះអស់អ្នកដែលជាខ្ញុំបម្រើអស់មួយជីវិតដោយសារខ្លាចសេចក្ដីស្លាប់។ ១៦ ព្រោះតាមពិតលោកមិនមែនជួយពួកទេវតាទេ តែលោកកំពុងជួយពូជពង្សរបស់អាប្រាហាំ។ ១៧ ដូច្នេះ លោកត្រូវក្លាយទៅជាដូច«បងប្អូន»របស់លោកទាំងស្រុង ដើម្បីលោកអាចក្លាយទៅជាសម្ដេចសង្ឃដែលស្មោះត្រង់ហើយមានសេចក្ដីមេត្ដាករុណាក្នុងកិច្ចបម្រើព្រះ ដើម្បីជូនគ្រឿងបូជាសម្រាប់ផ្សះផ្សាចំណងមិត្តភាពរវាងមនុស្សនិងព្រះ ហើយលោះមនុស្សពីការខុសឆ្គងរបស់ពួកគេ។ ១៨ ដោយសារលោកបានរងទុក្ខពេលដែលទទួលការល្បងល នោះលោកក៏អាចចូលមកជួយពួកអ្នកដែលកំពុងទទួលការល្បងលដែរ។
៣ ដូច្នេះ បងប្អូនបរិសុទ្ធ ដែលរួមចំណែកជាមួយនឹងអ្នកដែលត្រូវហៅឲ្យឡើងទៅស្ថានសួគ៌ ចូរពិចារណាអំពីសាវ័ក* និងសម្ដេចសង្ឃដែលយើងប្រកាសទទួលស្គាល់ ពោលគឺ លោកយេស៊ូ។ ២ លោកស្មោះត្រង់ចំពោះព្រះដែលបានតែងតាំងលោកឲ្យមានតួនាទីទាំងនោះ ដូចម៉ូសេបានស្មោះត្រង់ចំពោះព្រះពេលដែលគាត់បម្រើក្នុងផ្ទះទាំងមូលរបស់លោក។ ៣ ពីព្រោះលោកបានត្រូវចាត់ទុកថាសមនឹងទទួលកិត្ដិយសច្រើនជាងម៉ូសេ ដោយសារអ្នកដែលសង់ផ្ទះ មានកិត្ដិយសច្រើនជាងផ្ទះដែលអ្នកនោះសង់។ ៤ ពិតមែនតែផ្ទះទាំងអស់មានអ្នកសង់ ប៉ុន្តែអ្នកដែលបានសង់អ្វីៗទាំងអស់គឺព្រះ។ ៥ ហើយ ម៉ូសេបានស្មោះត្រង់ក្នុងផ្ទះទាំងមូលរបស់ព្រះ ក្នុងឋានៈជាអ្នកបម្រើ។ កិច្ចបម្រើរបស់គាត់ជាសក្ខីភាពអំពីអ្វីដែលនឹងត្រូវបើកបង្ហាញនៅពេលក្រោយ។ ៦ ប៉ុន្តែគ្រិស្ត* បានស្មោះត្រង់ក្នុងការត្រួតលើផ្ទះរបស់ព្រះ ក្នុងឋានៈជាបុត្រ។ យើងជាផ្ទះរបស់លោក ប្រសិនបើយើងតាំងចិត្តមោះមុតក្នុងការនិយាយដោយក្លាហាន និងក្នុងការអួតពីសេចក្ដីសង្ឃឹមរបស់យើង រហូតដល់ទីបញ្ចប់។
៧ ហេតុនេះ សកម្មពល* បរិសុទ្ធចែងថា៖ «ថ្ងៃនេះ ប្រសិនបើអ្នករាល់គ្នាស្ដាប់តាមសំឡេងរបស់លោក ៨ កុំក្លាយទៅជាមនុស្សរឹងចចេស ដូចគ្រាដែលបុព្វបុរសរបស់អ្នករាល់គ្នាបានធ្វើឲ្យខ្ញុំក្រេវក្រោធ នៅថ្ងៃដែលបានល្បងលខ្ញុំនៅតំបន់ស្ងាត់ជ្រងំ ៩ ទោះជាពួកគេបានឃើញការដែលខ្ញុំបានធ្វើនៅតំបន់ស្ងាត់ជ្រងំអស់សែសិបឆ្នាំក៏ដោយ ក៏ពួកគេបានល្បងលខ្ញុំ។ ១០ ហេតុនេះ ខ្ញុំបានជិនឆ្អន់នឹងមនុស្សជំនាន់នេះ ហើយបាននិយាយថា៖ ‹ចិត្តរបស់ពួកគេតែងតែបែរចេញពីខ្ញុំ ហើយពួកគេមិនស្គាល់ផ្លូវរបស់ខ្ញុំទេ›។ ១១ ដូច្នេះ ខ្ញុំបានស្បថទាំងកំហឹងថា៖ ‹ខ្ញុំនឹងមិនឲ្យពួកគេចូលក្នុងការសម្រាករបស់ខ្ញុំទេ›»។
១២ បងប្អូនអើយ ចូរប្រុងប្រយ័ត្ន ក្រែងលោអ្នករាល់គ្នាណាម្នាក់មានចិត្តទុច្ចរិតដែលគ្មានជំនឿ ដោយសារថយចេញពីព្រះដែលមានជីវិតរស់នៅ ១៣ ប៉ុន្តែចូរបំផុសទឹកចិត្តគ្នាទៅវិញទៅមកជារៀងរាល់ថ្ងៃ ដរាបណាដែលអាចហៅថា«ថ្ងៃនេះ» ក្រែងលោអ្នករាល់គ្នាណាម្នាក់ក្លាយទៅជាមនុស្សរឹងចចេសដោយសារការល្បួងនៃភាពខុសឆ្គង។ ១៤ យើងពិតជាក្លាយទៅជាអ្នករួមចំណែកជាមួយនឹងគ្រិស្ត លុះត្រាតែយើងកាន់ខ្ជាប់តាមទំនុកចិត្តដែលយើងមាននៅដើមដំបូង រហូតដល់ទីបញ្ចប់ ១៥ ពេលដែលបទគម្ពីរចែងថា៖ «ថ្ងៃនេះ ប្រសិនបើអ្នករាល់គ្នាស្ដាប់តាមសំឡេងរបស់លោក កុំក្លាយទៅជាមនុស្សរឹងចចេស ដូចគ្រាដែលបុព្វបុរសរបស់អ្នករាល់គ្នាបានធ្វើឲ្យខ្ញុំក្រេវក្រោធ»។
១៦ ព្រោះតើពួកអ្នកដែលបានឮ ប៉ុន្តែនៅតែធ្វើឲ្យព្រះក្រេវក្រោធនោះជាអ្នកណា? គឺអស់អ្នកដែលបានចេញពីស្រុកអេស៊ីបក្រោមការដឹកនាំរបស់ម៉ូសេ មែនទេ? ១៧ ម្យ៉ាងទៀត តើព្រះបានជិនឆ្អន់នឹងអ្នកណាអស់សែសិបឆ្នាំ? គឺពួកអ្នកដែលបានធ្វើខុស ហើយបានស្លាប់ចោលឆ្អឹងនៅតំបន់ស្ងាត់ជ្រងំ មែនទេ? ១៨ ប៉ុន្តែតើលោកបានស្បថនឹងអ្នកណាថា លោកនឹងមិនឲ្យពួកគេចូលក្នុងការសម្រាករបស់លោក? គឺពួកអ្នកដែលបានប្រព្រឹត្តដោយមិនស្ដាប់បង្គាប់ មែនទេ? ១៩ ដូច្នេះ យើងឃើញថាពួកគេមិនអាចចូលបាន ដោយសារពួកគេគ្មានជំនឿ។
៤ ដូច្នេះ ដោយសារនៅមានសេចក្ដីសន្យាដែលថា រាស្ត្ររបស់ព្រះនឹងចូលក្នុងការសម្រាករបស់លោក ចូរយើងប្រុងប្រយ័ត្ន ក្រែងលោនៅពេលណាមួយ អ្នករាល់គ្នាណាម្នាក់នឹងត្រូវចាត់ទុកថាមិនសមនឹងសេចក្ដីសន្យានោះ។ ២ ព្រោះយើងបានឮដំណឹងល្អ ដូចពួកបុព្វបុរសរបស់យើងបានឮដែរ ប៉ុន្តែបណ្ដាំដែលពួកគាត់បានឮ មិនមានប្រយោជន៍ដល់ពួកគាត់ឡើយ ពីព្រោះពួកគាត់មិនមានជំនឿដូចពួកអ្នកដែលបានស្ដាប់តាម។ ៣ យើងដែលបង្ហាញជំនឿ បានចូលក្នុងការសម្រាកនោះ។ ព្រោះទោះជាការរបស់លោកបានចប់រួចរាល់អស់ហើយតាំងពីកំណើតពិភពលោកក៏ដោយ ក៏លោកបានមានប្រសាសន៍ថា៖ «ដូច្នេះ ខ្ញុំបានស្បថទាំងកំហឹងថា៖ ‹ខ្ញុំនឹងមិនឲ្យពួកគេចូលក្នុងការសម្រាករបស់ខ្ញុំទេ›»។ ៤ ព្រោះនៅបទគម្ពីរមួយលោកមានប្រសាសន៍អំពីថ្ងៃទីប្រាំពីរថា៖ «ហើយព្រះបានសម្រាកពីការទាំងអស់របស់លោកនៅថ្ងៃទីប្រាំពីរ» ៥ ហើយលោកក៏មានប្រសាសន៍តទៅទៀតថា៖ «ខ្ញុំនឹងមិនឲ្យពួកគេចូលក្នុងការសម្រាករបស់ខ្ញុំទេ»។
៦ ដូច្នេះ ដោយសារនៅមានអ្នកខ្លះដែលនឹងចូលទៅ ហើយពួកអ្នកដែលបានឮដំណឹងល្អនៅដើមដំបូងមិនបានចូលទៅ ពីព្រោះពួកគេមិនស្ដាប់បង្គាប់ ៧ នោះលោកក៏កំណត់ថ្ងៃមួយទៀត ដោយមានប្រសាសន៍ក្រោយមួយរយៈពេលយូរក្នុងបទទំនុកតម្កើងរបស់ដាវីឌថា៖ «ថ្ងៃនេះ» ដូចដែលបានរៀបរាប់ខាងលើថា៖ «ថ្ងៃនេះ ប្រសិនបើអ្នករាល់គ្នាស្ដាប់តាមសំឡេងរបស់លោក កុំក្លាយទៅជាមនុស្សរឹងចចេស»។ ៨ ព្រោះប្រសិនបើយ៉ូស្វេបាននាំពួកគេទៅកន្លែងសម្រាក នោះក្រោយមកព្រះមិនបានមានប្រសាសន៍អំពីថ្ងៃមួយផ្សេងទៀតទេ។ ៩ ដូច្នេះ នៅមានថ្ងៃឈប់សម្រាកសម្រាប់រាស្ត្ររបស់ព្រះ។ ១០ ព្រោះអ្នកណាដែលបានចូលក្នុងការសម្រាករបស់ព្រះហើយ អ្នកនោះបានសម្រាកពីការរបស់ខ្លួន ដូចព្រះក៏បានសម្រាកពីការរបស់លោកដែរ។
១១ ហេតុនេះ ចូរយើងខំអស់ពីសមត្ថភាពដើម្បីចូលក្នុងការសម្រាកនោះ ដើម្បីកុំឲ្យអ្នកណាម្នាក់ធ្លាក់ខ្លួន រួចដើរតាមគន្លងរបស់ពួកអ្នកដែលមិនបានស្ដាប់បង្គាប់។ ១២ ព្រោះបណ្ដាំរបស់ព្រះគឺមានជីវិតរស់នៅ ហើយមានឫទ្ធានុភាព ក៏មុតជាងដាវដែលមានមុខពីរ ហើយទម្លុះរហូតដល់ញែកលក្ខណៈខាងក្រៅ* ចេញពីធាតុពិត* និងសន្លាក់ឆ្អឹងចេញពីខួរឆ្អឹង ក៏អាចបង្ហាញឲ្យឃើញគំនិតនិងបំណងចិត្ត។ ១៣ ហើយក្នុងចំណោមអ្វីៗទាំងអស់ដែលបានត្រូវបង្កើតមក គ្មានអ្វីសោះដែលលោកមិនអាចមើលឃើញនោះឡើយ តែអ្វីៗទាំងអស់នៅចំហនិងមិនកំបាំងពីភ្នែករបស់លោក ជាអ្នកដែលយើងត្រូវជម្រាបអំពីការដែលយើងបានធ្វើ។
១៤ ដូច្នេះ ដោយឃើញថាយើងមានសម្ដេចសង្ឃឧត្តុង្គឧត្តមដែលបានឡើងទៅស្ថានសួគ៌ ពោលគឺ លោកយេស៊ូដែលជាបុត្រព្រះ នោះចូរយើងតាំងចិត្តមោះមុតក្នុងការប្រកាសទទួលស្គាល់លោក។ ១៥ ព្រោះសម្ដេចសង្ឃរបស់យើងមិនមែនជាអ្នកដែលមិនអាចយល់ភាពទន់ខ្សោយរបស់យើងនោះទេ តែគឺជាអ្នកដែលបានត្រូវល្បងលគ្រប់ជំពូកដូចយើងដែរ ប៉ុន្តែគ្មានភាពខុសឆ្គងឡើយ។ ១៦ ហេតុនេះ ចូរយើងចូលទៅនិយាយដោយក្លាហាននៅមុខបល្ល័ង្កនៃគុណដ៏វិសេសលើសលប់ ដើម្បីយើងអាចទទួលសេចក្ដីមេត្ដាករុណានិងគុណដ៏វិសេសលើសលប់នៅពេលដែលយើងត្រូវការជំនួយ។
៥ ព្រោះសម្ដេចសង្ឃម្នាក់ៗដែលបានត្រូវជ្រើសរើសពីចំណោមមនុស្ស គាត់ទទួលការតែងតាំងដើម្បីបំពេញកិច្ចបម្រើរបស់ព្រះជាប្រយោជន៍ដល់មនុស្ស ដើម្បីជូនជំនូននិងគ្រឿងបូជាសម្រាប់ការខុសឆ្គង។ ២ គាត់អាចប្រព្រឹត្តដោយសេចក្ដីមេត្ដាករុណាចំពោះពួកអ្នកដែលល្ងង់ហើយធ្វើខុស ពីព្រោះរូបគាត់ផ្ទាល់ក៏មានភាពទន់ខ្សោយដែរ ៣ ហេតុនេះហើយបានជាគាត់ត្រូវជូនគ្រឿងបូជាដោយសារការខុសឆ្គងរបស់ខ្លួន និងរបស់បណ្ដាជនដែរ។
៤ ម្យ៉ាងទៀត គ្មានមនុស្សណាម្នាក់តែងតាំងខ្លួនឲ្យមានកិត្ដិយសនេះទេ ទាល់តែព្រះតែងតាំងអ្នកនោះ ដូចលោកបានតែងតាំងអេរ៉ុន។ ៥ ដូចគ្នាដែរ គ្រិស្តមិនបានតម្កើងខ្លួនឲ្យមានឋានៈជាសម្ដេចសង្ឃទេ ប៉ុន្តែលោកបានត្រូវតម្កើងដោយព្រះដែលបានមានប្រសាសន៍អំពីគ្រិស្តថា៖ «អ្នកជាបុត្ររបស់ខ្ញុំ ហើយថ្ងៃនេះ ខ្ញុំបានក្លាយទៅជាបិតារបស់អ្នក»។ ៦ ដូចលោកមានប្រសាសន៍នៅបទគម្ពីរមួយផ្សេងទៀតថា៖ «អ្នកជាសង្ឃជារៀងរហូត តាមរបៀបដូចម៉េលគីសេដិក»។
៧ ពេលដែលគ្រិស្តជាមនុស្ស លោកបានធ្វើសំណូមពរនិងអង្វរដល់អ្នកដែលមានសមត្ថភាពសង្គ្រោះឲ្យរួចពីសេចក្ដីស្លាប់ ដោយទឹកភ្នែកនិងបន្លឺសំឡេងយ៉ាងខ្លាំង ហើយសំណូមពររបស់លោកបានត្រូវទទួល ដោយសារលោកកោតខ្លាចព្រះ។ ៨ ទោះបីលោកជាបុត្រក៏ដោយ ក៏លោកបានរៀនឲ្យចេះស្ដាប់បង្គាប់ដោយសារអ្វីដែលលោកបានរងទុក្ខ ៩ ក្រោយពីលោកបានក្លាយទៅជាល្អឥតខ្ចោះហើយ នោះលោកផ្ដល់លទ្ធភាពឲ្យទទួលសេចក្ដីសង្គ្រោះដែលគ្មានទីបញ្ចប់ដល់អស់អ្នកដែលស្ដាប់បង្គាប់លោក ១០ ពីព្រោះព្រះបានជ្រើសរើសលោកឲ្យធ្វើជាសម្ដេចសង្ឃតាមរបៀបដូចម៉េលគីសេដិក។
១១ យើងមានអ្វីជាច្រើនដែលត្រូវនិយាយអំពីលោក ប៉ុន្តែការនោះគឺពិបាកពន្យល់ ពីព្រោះអ្នករាល់គ្នាបានក្លាយទៅជាមនុស្សក្រនឹងយល់។* ១២ ព្រោះតាមពិត បើគិតអំពីគ្រានេះ អ្នករាល់គ្នាគួរធ្វើជាអ្នកបង្រៀនគេ ក៏ប៉ុន្តែ អ្នករាល់គ្នាត្រូវការឲ្យគេបង្រៀនអ្នករាល់គ្នាម្ដងទៀតអំពីបឋមសេចក្ដីនៃប្រសាសន៍ដ៏ពិសិដ្ឋរបស់ព្រះ ហើយអ្នករាល់គ្នាបានក្លាយទៅជាអ្នកដែលត្រូវការទឹកដោះ មិនមែនអាហាររឹងទេ។ ១៣ ព្រោះអស់អ្នកណាដែលទទួលទានទឹកដោះមិនស្គាល់បណ្ដាំនៃសេចក្ដីសុចរិតទេ ពីព្រោះអ្នកនោះជាទារក។ ១៤ ប៉ុន្តែអាហាររឹងគឺសម្រាប់មនុស្សពេញវ័យ* ដែលបានប្រើប្រាស់សមត្ថភាពយល់ដឹង ហើយហេតុនេះសមត្ថភាពនោះបានត្រូវបង្វឹកបង្ហាត់ដើម្បីសម្គាល់អ្វីដែលខុសនិងអ្វីដែលត្រូវ។
៦ ឥឡូវ យើងបានរៀនសេចក្ដីបង្រៀនជាមូលដ្ឋានអំពីគ្រិស្តហើយ ដូច្នេះ ចូរយើងខំប្រឹងឈានទៅរកភាពចាស់ទុំ ហើយកុំឲ្យយើងដាក់គ្រឹះម្ដងទៀត ដោយរៀនអំពីការប្រែចិត្តពីការប្រព្រឹត្តដែលឥតប្រយោជន៍ និងជំនឿទៅលើព្រះ ២ ព្រមទាំងសេចក្ដីបង្រៀនអំពីការជ្រមុជទឹក ការដាក់ដៃលើ ការប្រោសមនុស្សស្លាប់ឲ្យរស់ឡើងវិញ និងការវិនិច្ឆ័យសេចក្ដីដែលនៅជាប់ជារៀងរហូត។ ៣ ហើយយើងនឹងឈានទៅរកភាពចាស់ទុំមែន ប្រសិនបើព្រះអនុញ្ញាត។
៤ ព្រោះអ្នកដែលព្រះបានបំភ្លឺមួយដងជាការស្រេច ហើយដែលបានភ្លក់អំណោយទានពីស្ថានសួគ៌ ក៏បានទទួលសកម្មពល* បរិសុទ្ធ ៥ ថែមទាំងភ្លក់បណ្ដាំល្អប្រសើររបស់ព្រះនិងលទ្ធផលពីឫទ្ធានុភាពដែលនឹងត្រូវសម្ដែងក្នុងរបៀបរបបពិភពលោកដែលនឹងមកដល់ ៦ តែបានដួលនោះ ពួកគេមិនអាចត្រូវធ្វើឲ្យភ្ញាក់ដឹងខ្លួនដើម្បីប្រែចិត្តបានទេ ពីព្រោះពួកគេព្យួរ* បុត្រព្រះសាជាថ្មីដោយខ្លួនគេ ហើយធ្វើឲ្យលោកអាប់ឱនកិត្ដិយសនៅមុខមនុស្សទូទៅ។ ៧ ជាឧទាហរណ៍ ដីណាដែលទទួលទឹកភ្លៀងដែលធ្លាក់មកជារឿយៗហើយធ្វើឲ្យដុះរុក្ខជាតិល្អសម្រាប់អ្នកដែលដាំដុះ ដីនោះទទួលពរពីព្រះ។ ៨ ប៉ុន្តែប្រសិនបើដីនោះធ្វើឲ្យដុះដើមបន្លាទៅវិញ នោះវាត្រូវគេបោះបង់ចោល ហើយនឹងត្រូវបណ្ដាសា។ នៅទីបំផុតវាត្រូវគេដុតចោល។
៩ ប៉ុន្តែអ្នករាល់គ្នាជាទីស្រឡាញ់អើយ ទោះជាយើងនិយាយដូច្នោះក៏ដោយ ក៏យើងជឿជាក់ថា ករណីអ្នករាល់គ្នាគឺប្រសើរជាងពួកអ្នកដែលបានដួល ហើយអ្នករាល់គ្នាមានអ្វីដែលនាំទៅដល់សេចក្ដីសង្គ្រោះ។ ១០ ព្រោះព្រះមិនប្រព្រឹត្តដោយអយុត្ដិធម៌នោះទេ ដោយបំភ្លេចការដែលអ្នករាល់គ្នាបានធ្វើ និងសេចក្ដីស្រឡាញ់ដែលអ្នករាល់គ្នាបានបង្ហាញចំពោះនាមរបស់លោក ដោយអ្នករាល់គ្នាបានបម្រើពួកអ្នកបរិសុទ្ធ ហើយនៅតែបម្រើពួកគាត់។ ១១ ប៉ុន្តែយើងចង់ឲ្យអ្នករាល់គ្នាបង្ហាញចិត្តឧស្សាហ៍ដូចកាលពីដើម ដើម្បីឲ្យអ្នករាល់គ្នាមានសេចក្ដីសង្ឃឹមយ៉ាងពិតប្រាកដរហូតដល់ទីបញ្ចប់ ១២ ដើម្បីកុំឲ្យអ្នករាល់គ្នាក្លាយទៅជាមនុស្សខ្ជិលឡើយ តែចូរយកតម្រាប់តាមពួកអ្នកដែលបានទទួលសេចក្ដីសន្យាជាមត៌កដោយសារជំនឿនិងចិត្តអត់ធ្មត់។
១៣ ព្រោះពេលដែលព្រះសន្យាជាមួយនឹងអាប្រាហាំ នោះលោកធានាសេចក្ដីសន្យារបស់លោកដោយអាង* ជីវិតខ្លួនលោក ព្រោះគ្មានអ្នកណាធំជាងដែលលោកអាចអាងដើម្បីធានាសេចក្ដីសន្យានោះឡើយ។ ១៤ លោកបានមានប្រសាសន៍ថា៖ «ខ្ញុំប្រាកដជានឹងឲ្យពរដល់អ្នក ហើយខ្ញុំប្រាកដជានឹងធ្វើឲ្យអ្នកចម្រើនឡើង»។ ១៥ ដូច្នេះ ក្រោយពីអាប្រាហាំបានបង្ហាញចិត្តអត់ធ្មត់ គាត់ក៏ទទួលសេចក្ដីសន្យានោះ។ ១៦ ព្រោះមនុស្សស្បថដោយអាងអ្នកដែលធំជាង ហើយសម្បថរបស់ពួកគេបញ្ចប់គ្រប់ជម្លោះ ពីព្រោះសម្បថនោះជាការធានារ៉ាប់រងតាមច្បាប់ចំពោះពួកគេ។ ១៧ តាមរបៀបនោះដែរ ពេលដែលព្រះមានគោលបំណងបង្ហាញដល់ពួកអ្នកដែលនឹងទទួលសេចក្ដីសន្យាជាមត៌ក ឲ្យឃើញកាន់តែច្បាស់ថាសេចក្ដីសម្រេចរបស់លោកមិនអាចប្រែប្រួល នោះលោកបានបន្ថែមសម្បថជាមួយនឹងសេចក្ដីសន្យានោះ ១៨ ដើម្បីតាមរយៈការទាំងពីរនេះដែលពុំអាចប្រែប្រួលហើយដែលបង្ហាញថាព្រះមិនអាចកុហកបាន នោះយើងជាអ្នកដែលបានរត់ទៅទីជ្រកកោន អាចទទួលការលើកទឹកចិត្តយ៉ាងខ្លាំង ឲ្យឈោងចាប់សេចក្ដីសង្ឃឹមដែលបានត្រូវដាក់មុខយើង។ ១៩ សេចក្ដីសង្ឃឹមនេះជាយុថ្កាសម្រាប់ជីវិតយើង ក៏រឹងមាំនិងពិតប្រាកដ ហើយសេចក្ដីសង្ឃឹមនេះនាំយើងចូលហួសពីវាំងនន ២០ ជាកន្លែងដែលអ្នកបើកផ្លូវបានចូលដើម្បីជាប្រយោជន៍ដល់យើង គឺលោកយេស៊ូ ដែលបានក្លាយទៅជាសម្ដេចសង្ឃតាមរបៀបដូចម៉េលគីសេដិកជារៀងរហូត។
៧ ព្រោះម៉េលគីសេដិក ស្តេចក្រុងសាឡិម និងជាសង្ឃរបស់ព្រះដ៏ខ្ពង់ខ្ពស់បំផុត ដែលបានជួបអាប្រាហាំហើយឲ្យពរដល់គាត់ពេលដែលអាប្រាហាំត្រឡប់មកវិញ ក្រោយពីបានវាយឈ្នះស្តេចមួយចំនួន ២ ហើយដែលអាប្រាហាំបានឲ្យមួយភាគដប់នៃអ្វីៗទាំងអស់ គាត់គឺជា«ស្តេចនៃសេចក្ដីសុចរិត» (បើបកប្រែឈ្មោះរបស់គាត់) ព្រមទាំងជាស្តេចនៃក្រុងសាឡិម ឬ«ស្តេចនៃសន្ដិភាព»។ ៣ ស្តេចនោះគ្មានឪពុក គ្មានម្ដាយ គ្មានពង្សាវតារ ហើយក៏គ្មានថ្ងៃកើតឬថ្ងៃស្លាប់ តែបានត្រូវធ្វើឲ្យដូចបុត្រព្រះ ហេតុនេះគាត់គឺជាសង្ឃជានិរន្តរ៍។
៤ ដូច្នេះ តើអ្នករាល់គ្នាឃើញឬទេ? បុរសនេះគឺឧត្តុង្គឧត្តមណាស់ចំពោះអាប្រាហាំ ជាមេគ្រួសារដែលបានឲ្យគាត់មួយភាគដប់នៃរបស់ល្អបំផុតដែលរឹបអូសបាន។ ៥ ពិតមែន បុរសពីចំណោមកូន* លេវី ដែលមានតំណែងជាសង្ឃ បានត្រូវបង្គាប់តាមច្បាប់* ឲ្យប្រមូលមួយភាគដប់ពីបណ្ដាជន គឺពីបងប្អូនរបស់ពួកគេ ទោះបីបងប្អូនទាំងនោះជាពូជពង្សរបស់អាប្រាហាំក៏ដោយ ៦ ប៉ុន្តែបុរសដែលមិនមែនមកពីវង្សត្រកូលលេវី បានយកមួយភាគដប់ពីអាប្រាហាំ ហើយបានឲ្យពរដល់គាត់ដែលជាអ្នកទទួលសេចក្ដីសន្យា។ ៧ មនុស្សទាំងអស់យល់ស្របថា អ្នកតូចទទួលពរពីអ្នកដែលធំជាង។ ៨ ក្នុងករណីមួយ បុរសដែលរមែងស្លាប់ជាអ្នកទទួលមួយភាគដប់ ឯករណីមួយទៀត គឺជាអ្នកដែលបទគម្ពីរបញ្ជាក់ថានៅរស់។ ៩ ហើយខ្ញុំសូមប្រាប់ថា សូម្បីតែលេវី ដែលទទួលមួយភាគដប់ ក៏បានឲ្យមួយភាគដប់ដែរ តាមរយៈអាប្រាហាំ ១០ ព្រោះគាត់នៅក្នុងអាប្រាហាំនៅឡើយ* ពេលដែលម៉េលគីសេដិកជួបអាប្រាហាំ។
១១ ដូច្នេះ ប្រសិនបើភាពល្អឥតខ្ចោះមកតាមរយៈសង្ឃពីកុលសម្ព័ន្ធលេវី (ព្រោះថាជាផ្នែកមួយនៃច្បាប់ដែលបណ្ដាជនបានទទួល) តើចាំបាច់មានសង្ឃម្នាក់ទៀតមក ដែលត្រូវហៅថាសង្ឃតាមរបៀបដូចម៉េលគីសេដិក មិនមែនហៅថាសង្ឃតាមរបៀបដូចអេរ៉ុនធ្វើអ្វី? ១២ ព្រោះច្បាប់ចាំបាច់ត្រូវផ្លាស់ប្ដូរ ដោយសាររបៀបរៀបចំជាសង្ឃបានត្រូវផ្លាស់ប្ដូរ។ ១៣ ព្រោះបុរសដែលបានត្រូវពិពណ៌នាដូច្នេះ ធ្លាប់ជាសមាជិកកុលសម្ព័ន្ធមួយផ្សេងទៀត ដែលមិនធ្លាប់មានសមាជិកបំពេញកិច្ចបម្រើនៅទីបូជាទេ។ ១៤ ព្រោះប្រាកដហើយថា លោកម្ចាស់របស់យើងបានកើតមកពីកុលសម្ព័ន្ធយូដា ដែលម៉ូសេមិនបានប្រាប់ថានឹងមានសង្ឃចេញមកពីកុលសម្ព័ន្ធនោះទេ។
១៥ អ្វីដែលប្រាកដជាងនោះទៅទៀតគឺថា មានសង្ឃម្នាក់ទៀតស្រដៀងនឹងម៉េលគីសេដិក។ ១៦ លោកបានក្លាយទៅជាសង្ឃ មិនមែនដោយសារលោកមានពង្សាវតារដែលច្បាប់កំណត់ឲ្យនោះទេ ប៉ុន្តែដោយសារឫទ្ធានុភាពដែលធ្វើឲ្យលោកមានជីវិតដែលមិនអាចត្រូវបំផ្លាញបានឡើយ ១៧ ព្រោះបទគម្ពីរមួយបញ្ជាក់ថា៖ «អ្នកជាសង្ឃជារៀងរហូត តាមរបៀបដូចម៉េលគីសេដិក»។
១៨ ដូច្នេះ ប្រាកដហើយថា បញ្ញត្ដិមុនបានត្រូវធ្វើឲ្យទៅជាមោឃ ព្រោះវាខ្សោយនិងគ្មានប្រសិទ្ធភាព។ ១៩ ព្រោះច្បាប់មិនបានធ្វើឲ្យអ្វីក្លាយទៅជាល្អឥតខ្ចោះទេ ប៉ុន្តែសេចក្ដីសង្ឃឹមប្រសើរជាងនោះដែលព្រះផ្ដល់ឲ្យ បានធ្វើឲ្យក្លាយទៅជាល្អឥតខ្ចោះ ហើយតាមរយៈសេចក្ដីសង្ឃឹមនោះ យើងកំពុងចូលទៅជិតព្រះ។ ២០ ព្រោះមិនមែនដោយគ្មានសម្បថទេ ២១ (ពិតមែនតែមានបុរសខ្លះដែលបានក្លាយទៅជាសង្ឃដោយគ្មានសម្បថ ប៉ុន្តែមានម្នាក់ដែលបានក្លាយទៅជាសង្ឃដោយមានសម្បថពីលោកដែលមានប្រសាសន៍អំពីអ្នកនោះថា៖ «ព្រះយេហូវ៉ាបានស្បថ (ហើយលោកនឹងមិនស្ដាយក្រោយឡើយ) ‹អ្នកជាសង្ឃជារៀងរហូត›») ២២ ហេតុនោះ លោកយេស៊ូបានក្លាយទៅជាអ្នកធានាកិច្ចព្រមព្រៀងដែលប្រសើរជាងនោះ។ ២៣ ម្យ៉ាងទៀត មនុស្សជាច្រើនត្រូវធ្វើជាសង្ឃតៗគ្នា ព្រោះពួកគេរមែងស្លាប់ ហើយមិនអាចកាន់តំណែងជានិរន្តរ៍បាន។ ២៤ ប៉ុន្តែដោយសារលោករស់ជារៀងរហូត នោះលោកកាន់តំណែងជាសង្ឃដោយមិនត្រូវការអ្នកណាបន្តតំណែងឡើយ។ ២៥ ហេតុនេះ លោកអាចសង្គ្រោះយ៉ាងពេញលេញអ្នកដែលចូលទៅជិតព្រះតាមរយៈលោក ពីព្រោះលោកមានជីវិតរស់នៅជារៀងរហូតដើម្បីអង្វរជំនួសពួកគេ។
២៦ ព្រោះសម្ដេចសង្ឃបែបនេះគឺសមនឹងយើង ពោលគឺសម្ដេចសង្ឃដែលមានភក្ដីភាព គ្មានកលល្បិច ឥតសៅហ្មង ខុសប្លែកពីមនុស្សដែលប្រព្រឹត្តអំពើខុសឆ្គង ហើយបានទៅជាខ្ពង់ខ្ពស់ជាងមេឃ។ ២៧ លោកមិនចាំបាច់ជូនគ្រឿងបូជារៀងរាល់ថ្ងៃសម្រាប់ការខុសឆ្គងរបស់លោកនិងរបស់បណ្ដាជនដូចសម្ដេចសង្ឃឯទៀតនោះទេ (ព្រោះលោកបានធ្វើដូច្នេះដោយប្រគល់ខ្លួនមួយដងជាការស្រេច) ២៨ ព្រោះច្បាប់តែងតាំងបុរសដែលមានភាពទន់ខ្សោយឲ្យធ្វើជាសម្ដេចសង្ឃ ប៉ុន្តែសម្បថដែលមកក្រោយច្បាប់តែងតាំងបុត្រមួយ ដែលបានត្រូវធ្វើឲ្យល្អឥតខ្ចោះជារៀងរហូត។
៨ ឥឡូវ ចំណុចសំខាន់នៃអ្វីៗដែលយើងកំពុងរៀបរាប់គឺ យើងមានសម្ដេចសង្ឃបែបនេះ ដែលបានអង្គុយនៅខាងស្ដាំនៃបល្ល័ង្កព្រះដ៏ឧត្តុង្គឧត្តមនៅស្ថានសួគ៌ ២ ជាអ្នកបម្រើដែលបំពេញការងារក្នុងកន្លែងបរិសុទ្ធនៃត្រសាលដ៏ពិត ជាត្រសាលដែលព្រះយេហូវ៉ាបានដំឡើង មិនមែនមនុស្សទេ។ ៣ ព្រោះសម្ដេចសង្ឃម្នាក់ៗទទួលការតែងតាំងដើម្បីជូនជំនូនព្រមទាំងគ្រឿងបូជា។ ហេតុនេះ លោកក៏ត្រូវមានអ្វីជូនដែរ។ ៤ ប្រសិនបើលោកនៅផែនដី លោកមិនមែនជាសង្ឃទេ ពីព្រោះតាមច្បាប់មានសង្ឃឯទៀតដែលជូនគ្រឿងបូជា ៥ ប៉ុន្តែបុរសទាំងនោះបំពេញកិច្ចបម្រើពិសិដ្ឋដែលគ្រាន់តែជានិមិត្តរូបនិងជាស្រមោលនៃអ្វីៗនៅស្ថានសួគ៌ ដូចពេលដែលម៉ូសេបម្រុងនឹងធ្វើត្រសាល គាត់បានទទួលបង្គាប់ពីព្រះថា៖ «ចូរធ្វើអ្វីៗទាំងអស់ឲ្យដូចគំរូដែលបានត្រូវបង្ហាញឲ្យអ្នកឃើញនៅលើភ្នំ»។ ៦ ប៉ុន្តែឥឡូវលោកយេស៊ូបានទទួលកិច្ចបម្រើសាធារណៈដែលប្រសើរជាង ហេតុនេះលោកជាអ្នកសម្រុះសម្រួលក្នុងកិច្ចព្រមព្រៀងដែលប្រសើរជាងកិច្ចព្រមព្រៀងមុន ហើយដែលបានត្រូវធ្វើឲ្យមានសុពលភាពតាមច្បាប់ដោយមានមូលដ្ឋានលើសេចក្ដីសន្យាដែលប្រសើរជាងសេចក្ដីសន្យាមុន។
៧ ព្រោះប្រសិនបើកិច្ចព្រមព្រៀងដំបូងបានពេញលក្ខណៈ* នោះមិនចាំបាច់មានកិច្ចព្រមព្រៀងមួយផ្សេងទៀតទេ ៨ ព្រោះព្រះបន្ទោសបណ្ដាជន ពេលដែលលោកមានប្រសាសន៍ថា៖ «ព្រះយេហូវ៉ាមានប្រសាសន៍ថា៖ ‹មើល! នឹងមានគ្រាមកដល់ ដែលនៅពេលនោះខ្ញុំនឹងធ្វើកិច្ចព្រមព្រៀងថ្មីជាមួយនឹងពួកអ្នកផ្ទះអ៊ីស្រាអែលនិងជាមួយនឹងពួកអ្នកផ្ទះយូដា ៩ មិនមែនដូចកិច្ចព្រមព្រៀងដែលខ្ញុំបានធ្វើជាមួយនឹងបុព្វបុរសរបស់អ្នករាល់គ្នា នៅថ្ងៃដែលខ្ញុំចាប់ដៃពួកគេហើយនាំចេញពីស្រុកអេស៊ីបមកនោះទេ។ ព្រោះពួកគេមិនបានធ្វើតាមកិច្ចព្រមព្រៀងរបស់ខ្ញុំ ហេតុនេះ ខ្ញុំក៏ឈប់យកចិត្តទុកដាក់នឹងពួកគេ› ព្រះយេហូវ៉ាមានប្រសាសន៍ដូច្នេះ»។
១០ «ព្រះយេហូវ៉ាមានប្រសាសន៍ថា៖ ‹ព្រោះនេះជាកិច្ចព្រមព្រៀងដែលខ្ញុំនឹងធ្វើជាមួយនឹងពួកអ្នកផ្ទះអ៊ីស្រាអែលក្រោយពីគ្រានោះ។ ខ្ញុំនឹងដាក់ច្បាប់របស់ខ្ញុំនៅក្នុងគំនិតរបស់ពួកគេ ក៏នឹងសរសេរច្បាប់ទាំងនោះក្នុងចិត្តរបស់ពួកគេ។ ហើយខ្ញុំនឹងក្លាយទៅជាព្រះរបស់ពួកគេ ឯពួកគេនឹងក្លាយទៅជារាស្ត្ររបស់ខ្ញុំ។
១១ «‹ហើយពួកគេម្នាក់ៗនឹងមិនបង្រៀនជនរួមជាតិឬបងប្អូនរបស់ពួកគេឡើយថា៖ «ចូរស្គាល់ព្រះយេហូវ៉ា!» ព្រោះពួកគេទាំងអស់គ្នានឹងស្គាល់ខ្ញុំ ចាប់ពីអ្នកតូចជាងគេ រហូតដល់អ្នកធំជាងគេបំផុត។ ១២ ព្រោះខ្ញុំនឹងអភ័យទោសចំពោះអំពើមិនសុចរិតរបស់ពួកគេ ហើយខ្ញុំនឹងមិននឹកនាដល់ការខុសឆ្គងរបស់ពួកគេទៀតឡើយ›»។
១៣ ពេលដែលលោកមានប្រសាសន៍ថា«កិច្ចព្រមព្រៀងថ្មី» នោះលោកធ្វើឲ្យកិច្ចព្រមព្រៀងដំបូងទៅជាមោឃវិញ។ ឥឡូវ អ្វីដែលបានត្រូវធ្វើឲ្យទៅជាមោឃហើយដែលកំពុងប្រែជាចាស់ទៅ គឺជិតបាត់សូន្យហើយ។
៩ ឯកិច្ចព្រមព្រៀងមុន ធ្លាប់មានបទបញ្ជាអំពីការបំពេញកិច្ចបម្រើពិសិដ្ឋហើយធ្លាប់មានកន្លែងបរិសុទ្ធនាផែនដីនេះ។ ២ ព្រោះបន្ទប់ទីមួយបានត្រូវរៀបចំ ដោយមានជើងចង្កៀង ព្រមទាំងតុ និងនំប៉័ងដែលត្រូវដាក់តាំងជាគ្រឿងបូជា។ ឯបន្ទប់នោះបានត្រូវហៅថា«កន្លែងបរិសុទ្ធ»។ ៣ ប៉ុន្តែខាងក្រោយវាំងននទីពីរ មានបន្ទប់ដែលត្រូវហៅថា«កន្លែងបរិសុទ្ធបំផុត»។ ៤ បន្ទប់នេះមានប្រដាប់ធ្វើពីមាសសម្រាប់ដុតគ្រឿងក្រអូប ព្រមទាំងហឹបស្រោបមាស ជាហឹបនៃកិច្ចព្រមព្រៀង ក្នុងហឹបនោះមាននំម៉ាណាក្នុងក្រឡមាសមួយ ថែមទាំងដំបងរបស់អេរ៉ុនដែលបែកពន្លក ហើយក៏មានបន្ទះថ្មដែលមានកិច្ចព្រមព្រៀង។ ៥ ប៉ុន្តែនៅលើហឹបនោះមានរូបចេរូប៊ីន* ពីរដ៏រុងរឿងដែលចោលស្រមោលលើគម្រប* នៃហឹបនោះ តែយើងមិនត្រូវរៀបរាប់យ៉ាងល្អិតល្អន់អំពីរឿងទាំងនេះនៅពេលនេះទេ។
៦ ក្រោយពីរបស់ទាំងនោះបានត្រូវរៀបចំតាមរបៀបនេះហើយ ពួកសង្ឃរមែងចូលក្នុងបន្ទប់ទីមួយនៃត្រសាលដើម្បីបំពេញកិច្ចបម្រើពិសិដ្ឋ។ ៧ ប៉ុន្តែមានតែសម្ដេចសង្ឃប៉ុណ្ណោះដែលចូលក្នុងបន្ទប់ទីពីរ គាត់ចូលមួយដងក្នុងមួយឆ្នាំ ហើយគាត់ត្រូវយកឈាមទៅជាមួយ។ គាត់បូជាឈាមនោះសម្រាប់ការខុសឆ្គងរបស់គាត់ ព្រមទាំងការខុសឆ្គងដែលបណ្ដាជនបានប្រព្រឹត្តដោយមិនដឹងខ្លួន។ ៨ ដូច្នេះ សកម្មពល* បរិសុទ្ធបញ្ជាក់យ៉ាងច្បាស់ថា កាលដែលនៅមានត្រសាលដំបូង ផ្លូវចូលកន្លែងបរិសុទ្ធ* មិនទាន់ត្រូវបើកនៅឡើយ។ ៩ ត្រសាលនោះឯងជានិមិត្តរូប* ដែលទាក់ទងនឹងពេលកំណត់ដែលបានមកដល់ ហើយរហូតដល់ពេលនេះ នៅតែមានការជូនជំនូននិងគ្រឿងបូជា។ ក៏ប៉ុន្តែរបស់ទាំងនោះមិនអាចធ្វើឲ្យសមត្ថភាពវិនិច្ឆ័យរបស់បុរសដែលបំពេញកិច្ចបម្រើពិសិដ្ឋនោះឈប់ផ្ដន្ទាទោសខ្លួនគាត់ទាំងស្រុងនោះឡើយ ១០ ប៉ុន្តែជំនូននិងគ្រឿងបូជាទាំងនោះទាក់ទងនឹងអាហារ ភេសជ្ជៈ និងការជ្រមុជទឹកផ្សេងៗ* តែប៉ុណ្ណោះ។ ការទាំងនោះជាតម្រូវការនៃច្បាប់ដែលទាក់ទងនឹងរូបកាយ ហើយការទាំងនោះបានត្រូវតម្រូវរហូតដល់ពេលកំណត់សម្រាប់ការកែលម្អ។
១១ ក៏ប៉ុន្តែពេលដែលគ្រិស្តបានមកក្នុងឋានៈជាសម្ដេចសង្ឃដែលផ្ដល់ពរទាំងប៉ុន្មានដែលយើងបានទទួលហើយ ដោយចូលក្នុងត្រសាលដ៏រឹតតែឧត្តុង្គឧត្តមនិងល្អឥតខ្ចោះជាង ជាត្រសាលដែលដៃមនុស្សមិនបានធ្វើ គឺថា មិនមែនជាអ្វីដែលបានត្រូវបង្កើតឡើងក្នុងពិភពលោកនេះ ១២ លោកមិនបានចូលដោយយកឈាមពពែនិងគោស្ទាវទេ ប៉ុន្តែលោកបានយកឈាមរបស់លោកផ្ទាល់ចូលក្នុងកន្លែងបរិសុទ្ធមួយដងជាការស្រេច ហើយបានទទួលយកសេចក្ដីសង្គ្រោះដែលគ្មានទីបញ្ចប់ដើម្បីជាប្រយោជន៍ដល់យើង។ ១៣ ព្រោះប្រសិនបើការប្រោះឈាមពពែ ឈាមគោស្ទាវ និងផេះគោញីទៅលើអ្នកដែលស្មោកគ្រោកជម្រះសាច់ឈាមរបស់ពួកគេឲ្យទៅជាស្អាតបរិសុទ្ធទៅហើយ ១៤ នោះឈាមរបស់គ្រិស្ត ដែលបានប្រគល់ខ្លួនលោកដែលឥតខ្ចោះទៅព្រះ ក្រោមការដឹកនាំនៃសកម្មពលដែលស្ថិតស្ថេរជារៀងរហូត ប្រាកដជានឹងជម្រះសមត្ថភាពវិនិច្ឆ័យរបស់យើងឲ្យស្អាតពីការប្រព្រឹត្តដ៏ឥតប្រយោជន៍ ដើម្បីឲ្យយើងបំពេញកិច្ចបម្រើពិសិដ្ឋជូនព្រះដែលមានជីវិតរស់នៅ។
១៥ ហេតុនេះហើយបានជាលោកជាអ្នកសម្រុះសម្រួលក្នុងកិច្ចព្រមព្រៀងថ្មី។ លោកបានទទួលតំណែងនេះដើម្បីអ្នកដែលបានត្រូវហៅអាចទទួលសេចក្ដីសន្យាអំពីមត៌កដែលស្ថិតស្ថេរជារៀងរហូត។ ការទាំងអស់នេះអាចកើតឡើងបានដោយសារមរណភាពរបស់លោក ដែលបានលោះពួកគេពីការរំលងរបស់ពួកគេនៅក្រោមកិច្ចព្រមព្រៀងមុន។ ១៦ ព្រោះពេលណាមានកិច្ចព្រមព្រៀងជាមួយនឹងព្រះ មនុស្សដែលធ្វើកិច្ចព្រមព្រៀងនោះត្រូវតែស្លាប់។ ១៧ ព្រោះកិច្ចព្រមព្រៀងគ្មានសុពលភាពទេ ដរាបណាមនុស្សដែលធ្វើកិច្ចព្រមព្រៀងនោះនៅរស់ ដោយសារសុពលភាពនៃកិច្ចព្រមព្រៀងមានមូលដ្ឋានលើសេចក្ដីស្លាប់។ ១៨ ហេតុនេះ កិច្ចព្រមព្រៀងមុនក៏មិនបានចាប់ផ្ដើមមានសុពលភាពដោយគ្មានឈាមដែរ។ ១៩ ព្រោះក្រោយពីម៉ូសេបានប្រាប់បញ្ញត្ដិទាំងអស់ក្នុងច្បាប់ដល់បណ្ដាជន នោះគាត់យកឈាមគោស្ទាវ ឈាមពពែ ព្រមទាំងទឹក រោមចៀមពណ៌ក្រហមឆ្អៅ និងដើមហ៊ីសុប មកប្រោះលើសៀវភៅកិច្ចព្រមព្រៀងព្រមទាំងបណ្ដាជន ២០ ដោយនិយាយថា៖ «នេះជាឈាមនៃកិច្ចព្រមព្រៀងដែលព្រះបានបង្គាប់ឲ្យអ្នករាល់គ្នាធ្វើតាម»។ ២១ រួចគាត់យកឈាមនោះ មកប្រោះលើត្រសាលនិងប្រដាប់ប្រដាទាំងអស់សម្រាប់កិច្ចបម្រើសាធារណៈ។ ២២ ពិតមែនហើយ តាមច្បាប់ ស្ទើរតែគ្រប់របស់ទាំងអស់ត្រូវសម្អាតដោយឈាម ហើយបើគ្មានការច្រួចឈាមទេ នោះគ្មានការអភ័យទោសចំពោះការខុសឆ្គងឡើយ។
២៣ ដូច្នេះ គឺចាំបាច់ឲ្យសម្អាតរបស់ដែលជានិមិត្តរូបនៃអ្វីៗនៅស្ថានសួគ៌ដោយឈាមរបស់សត្វដែលជាគ្រឿងបូជា ប៉ុន្តែអ្វីៗនៅស្ថានសួគ៌ត្រូវសម្អាតដោយគ្រឿងបូជាដែលប្រសើរជាងសត្វ។ ២៤ ព្រោះគ្រិស្តមិនបានចូលក្នុងកន្លែងបរិសុទ្ធដែលធ្វើដោយដៃមនុស្ស ហើយដែលយកគំរូតាមអ្វីដែលពិតប្រាកដនោះទេ ប៉ុន្តែលោកបានចូលក្នុងស្ថានសួគ៌តែម្ដង ដើម្បីបង្ហាញខ្លួននៅចំពោះមុខព្រះផ្ទាល់ ដើម្បីយើង។ ២៥ លោកក៏មិនបានចូលដើម្បីប្រគល់ខ្លួនជាច្រើនដង ដូចសម្ដេចសង្ឃដែលចូលក្នុងកន្លែងបរិសុទ្ធរៀងរាល់ឆ្នាំដោយយកឈាមដែលមិនមែនជាឈាមរបស់ខ្លួន។ ២៦ ពុំនោះ លោកត្រូវរងទុក្ខជាច្រើនដងតាំងពីកំណើតពិភពលោក។ ប៉ុន្តែលោកបានមកមួយដងជាការស្រេចនៅគ្រាចុងបញ្ចប់នៃរបៀបរបបនានា ដើម្បីបំបាត់ភាពខុសឆ្គងដោយប្រគល់ខ្លួនជាគ្រឿងបូជា។ ២៧ ហើយដូចមនុស្សបានត្រូវកំណត់ឲ្យស្លាប់មួយដងជាការស្រេច តែក្រោយពីនោះមានការវិនិច្ឆ័យសេចក្ដី ២៨ នោះគ្រិស្តបានប្រគល់ខ្លួនលោកមួយដងជាការស្រេចដែរ ដើម្បីទទួលយកការខុសឆ្គងរបស់មនុស្សជាច្រើន ហើយពេលដែលលោកលេចមកជាលើកទីពីរ លោកមិនទទួលយកភាពខុសឆ្គងទេ តែលោកលេចមកឲ្យពួកអ្នកដែលកំពុងស្វះស្វែងរកលោកដើម្បីទទួលសេចក្ដីសង្គ្រោះ ឃើញលោក។
១០ ព្រោះថា ច្បាប់ជាស្រមោលនៃពរដែលនឹងមកដល់ ប៉ុន្តែមិនមែនជារូបពិតនោះទេ ហេតុនេះហើយបានជាមនុស្សមិនអាចធ្វើឲ្យអ្នកដែលចូលទៅជិតព្រះ មានភាពល្អឥតខ្ចោះដោយគ្រឿងបូជាដដែលៗដែលពួកគេបូជារៀងរាល់ឆ្នាំនោះឡើយ។ ២ បើមិនដូច្នោះ ពួកគេនឹងឈប់ជូនគ្រឿងបូជា មែនទេ? ព្រោះអ្នកដែលនាំគ្រឿងបូជាមក* ហើយដែលទទួលការសម្អាតមួយដងជាការស្រេច ពួកគេនឹងលែងដឹង* ពីការខុសឆ្គងរបស់ខ្លួនទៀត។ ៣ ក៏ប៉ុន្តែគ្រឿងបូជាទាំងនេះរំលឹកអំពីការខុសឆ្គងជារៀងរាល់ឆ្នាំ ៤ ព្រោះឈាមគោឈ្មោលនិងឈាមពពែមិនអាចដកការខុសឆ្គងចេញបានឡើយ។
៥ ដូច្នេះ ពេលដែលគ្រិស្តមកក្នុងពិភពលោក លោកមានប្រសាសន៍ទៅព្រះថា៖ «‹លោកមិនចង់បានគ្រឿងបូជានិងជំនូនទេ តែលោកបានរៀបចំរូបកាយមួយឲ្យខ្ញុំ។ ៦ លោកមិនបានពេញចិត្តនឹងសត្វដុតជាគ្រឿងបូជា* និងគ្រឿងបូជាសម្រាប់ការខុសឆ្គងឡើយ›។ ៧ ហើយខ្ញុំ* ក៏និយាយថា៖ ‹ឱព្រះអើយ មើល! ខ្ញុំមក (បទគម្ពីរចែងអំពីខ្ញុំ)* ដើម្បីធ្វើតាមបំណងប្រាថ្នារបស់លោក›»។ ៨ ក្រោយពីលោកមានប្រសាសន៍ថា៖ «លោកមិនចង់បាន ក៏មិនបានពេញចិត្តនឹងគ្រឿងបូជា ជំនូន សត្វដុតជាគ្រឿងបូជា និងគ្រឿងបូជាសម្រាប់ការខុសឆ្គង» (គ្រឿងបូជាដែលច្បាប់តម្រូវឲ្យជូន) ៩ នោះលោកមានប្រសាសន៍ថា៖ «មើល! ខ្ញុំមកដើម្បីធ្វើតាមបំណងប្រាថ្នារបស់លោក»។ លោកបំបាត់ចោលរបៀបរៀបចំចាស់ ដើម្បីលោកអាចស្ថាបនារបៀបរៀបចំថ្មី។ ១០ ដោយសារ«បំណងប្រាថ្នា»នោះ យើងបានត្រូវញែកចេញជាបរិសុទ្ធដោយការប្រគល់រូបកាយរបស់លោកយេស៊ូគ្រិស្ត មួយដងជាការស្រេច។
១១ ម្យ៉ាងទៀត សង្ឃម្នាក់ៗចូលទៅឈរនៅកន្លែងរបស់ខ្លួនជារៀងរាល់ថ្ងៃ ដើម្បីបំពេញកិច្ចបម្រើសាធារណៈ ហើយជូនគ្រឿងបូជាដដែលៗជាច្រើនដង ព្រោះគ្រឿងបូជាទាំងនោះមិនអាចដកការខុសឆ្គងចេញទាំងស្រុងបានឡើយ។ ១២ ប៉ុន្តែដោយសារការខុសឆ្គង លោកបានជូនគ្រឿងបូជាតែមួយដែលមានប្រសិទ្ធភាពជារៀងរហូត រួចបានអង្គុយនៅខាងស្ដាំព្រះ ១៣ ចាប់ពីពេលនោះ លោករង់ចាំរហូតដល់ពួកសត្រូវរបស់លោកបានត្រូវដាក់ជាកំណល់កល់ជើងលោក។ ១៤ ព្រោះអ្នកដែលត្រូវញែកជាបរិសុទ្ធ លោកបានធ្វើឲ្យក្លាយទៅជាល្អឥតខ្ចោះជានិរន្តរ៍ ដោយជូនគ្រឿងបូជាតែមួយ។ ១៥ ម្យ៉ាងទៀត សកម្មពល* បរិសុទ្ធធ្វើជាសាក្សីបញ្ជាក់ឲ្យយើងដឹង។ មុនបង្អស់ សកម្មពលចែងថា៖ ១៦ «ព្រះយេហូវ៉ាមានប្រសាសន៍ថា៖ ‹នេះជាកិច្ចព្រមព្រៀងដែលខ្ញុំនឹងធ្វើជាមួយនឹងពួកគេក្រោយពីគ្រានោះ។ ខ្ញុំនឹងដាក់ច្បាប់របស់ខ្ញុំនៅក្នុងចិត្តរបស់ពួកគេ ក៏នឹងសរសេរសេចក្ដីនោះក្នុងគំនិតរបស់ពួកគេ›»។ ១៧ បន្ទាប់មកសកម្មពលចែងថា៖ «ហើយខ្ញុំនឹងមិននឹកនាដល់ការប្រឆាំងច្បាប់និងការខុសឆ្គងរបស់ពួកគេទៀតឡើយ»។ ១៨ ពេលដែលការខុសឆ្គងទាំងនោះបានត្រូវអភ័យទោស នោះលែងត្រូវការគ្រឿងបូជាសម្រាប់ការខុសឆ្គងទៀតហើយ។
១៩ ដូច្នេះ បងប្អូនអើយ ដោយឃើញថាយើងមានចិត្តក្លាហានដើម្បីចូលតាមផ្លូវទៅឯកន្លែងបរិសុទ្ធដោយសារឈាមរបស់លោកយេស៊ូ ២០ ជាផ្លូវថ្មីដែលនាំទៅឯជីវិត ហើយជាផ្លូវដែលលោកបានបើកឲ្យយើងចូលតាមវាំងនន ពោលគឺសាច់ឈាមរបស់លោក ២១ ហើយដោយឃើញថាយើងមានសម្ដេចសង្ឃឧត្តុង្គឧត្តមដែលត្រួតលើពួកអ្នកផ្ទះរបស់ព្រះ ២២ ចូរយើងចូលទៅជិតព្រះដោយមានចិត្តស្មោះនិងមានទំនុកចិត្តទាំងស្រុងដែលមកពីជំនឿ ហើយដោយមានចិត្តដែលបានត្រូវសម្អាត* ពីសមត្ថភាពវិនិច្ឆ័យដែលសៅហ្មង និងរូបកាយដែលបានត្រូវលាងសម្អាតដោយទឹកស្អាត ២៣ ចូរយើងខំប្រឹងព្យាយាមឥតឈប់ក្នុងការប្រកាសប្រាប់សេចក្ដីសង្ឃឹមរបស់យើងដល់មនុស្សទាំងអស់ដោយមិនរួញរា ពីព្រោះលោកដែលបានសន្យាគឺស្មោះត្រង់។ ២៤ ហើយចូរយើងគិតអំពីគ្នាទៅវិញទៅមក ដើម្បីបំផុសទឹកចិត្តឲ្យមានសេចក្ដីស្រឡាញ់និងការប្រព្រឹត្តដែលល្អប្រសើរ ២៥ មិនមែនដោយគេចវេះពីការប្រជុំគ្នា ដូចអ្នកខ្លះមានទម្លាប់គេចវេះនោះទេ ប៉ុន្តែដោយលើកទឹកចិត្តគ្នាទៅវិញទៅមក ហើយធ្វើដូច្នេះកាន់តែខ្លាំងឡើងពេលដែលអ្នករាល់គ្នាឃើញថ្ងៃនោះកាន់តែខិតចូលមកដល់។
២៦ ព្រោះប្រសិនបើយើងប្រព្រឹត្តអំពើខុសឆ្គងដោយចេតនាក្រោយពីយើងបានទទួលចំណេះត្រឹមត្រូវអំពីសេចក្ដីពិតហើយ នោះគ្មានគ្រឿងបូជាណាដែលអាចត្រូវជូនសម្រាប់ការខុសឆ្គងរបស់យើងឡើយ ២៧ មានតែរង់ចាំការវិនិច្ឆ័យទោសដោយភ័យខ្លាច ហើយមានសេចក្ដីក្រោធខ្លាំងក្រៃលែងដែលនឹងបំផ្លាញពួកអ្នកប្រឆាំង។ ២៨ អ្នកណាដែលមិនអើពើចំពោះច្បាប់ម៉ូសេ ហើយមានសាក្សីពីរឬបីនាក់អំពីការនោះ អ្នកនោះត្រូវសម្លាប់ចោលដោយឥតត្រាប្រណី។ ២៩ ដូច្នេះ អ្នកដែលបានជាន់ឈ្លីបុត្រព្រះ ហើយចាត់ទុកឈាមនៃកិច្ចព្រមព្រៀងដែលបានញែកអ្នកនោះចេញជាបរិសុទ្ធថាជារបស់ធម្មតា ក៏បានប្រមាថមើលងាយយ៉ាងខ្លាំងចំពោះសកម្មពលនៃគុណដ៏វិសេសលើសលប់ តើអ្នករាល់គ្នាគិតថាអ្នកនោះនឹងត្រូវចាត់ទុកថាសមនឹងទទួលទោសធ្ងន់ប៉ុណ្ណា? ៣០ ព្រោះយើងស្គាល់លោកដែលមានប្រសាសន៍ថា៖ «ការសងសឹកជារបស់ខ្ញុំ ខ្ញុំនឹងសងគេ» ហើយក៏មានប្រសាសន៍ថា៖ «ព្រះយេហូវ៉ានឹងវិនិច្ឆ័យរាស្ត្ររបស់លោក»។ ៣១ ការធ្លាក់ចូលក្នុងកណ្ដាប់ដៃព្រះដែលមានជីវិតរស់នៅ ជាអ្វីដែលគួរឲ្យរន្ធត់ណាស់។
៣២ ក៏ប៉ុន្តែចូរចាំពីគ្រាមុនជានិច្ច នៅគ្រានោះ ក្រោយពីអ្នករាល់គ្នាបានត្រូវបំភ្លឺ នោះអ្នករាល់គ្នាបានស៊ូទ្រាំក្នុងការតយុទ្ធដ៏ធំដោយរងទុក្ខលំបាកផ្សេងៗ ៣៣ ពេលខ្លះអ្នករាល់គ្នាត្រូវគេធ្វើបាបនិងជេរប្រមាថជាសាធារណៈ ដូចជានៅក្នុងសង្វៀន ពេលខ្លះទៀត អ្នករាល់គ្នាបានរួមទុក្ខជាមួយនឹងអ្នកដែលកំពុងជួបប្រទះទុក្ខលំបាកបែបនេះ។ ៣៤ ព្រោះអ្នករាល់គ្នាបានបង្ហាញចិត្តអាណិតអាសូរចំពោះអ្នកដែលជាប់គុក ក៏បានទ្រាំដោយអំណរពេលដែលគេរឹបអូសទ្រព្យសម្បត្ដិរបស់អ្នករាល់គ្នា ដោយដឹងថាអ្នករាល់គ្នាមានទ្រព្យដែលប្រសើរជាង ហើយជាទ្រព្យដែលស្ថិតស្ថេរ។
៣៥ ដូច្នេះ កុំឈប់និយាយដោយក្លាហានឡើយ ព្រោះការនោះត្រូវទទួលរង្វាន់យ៉ាងធំ។ ៣៦ ព្រោះអ្នករាល់គ្នាត្រូវចេះស៊ូទ្រាំ ដើម្បីឲ្យអ្នករាល់គ្នាទទួលតាមសេចក្ដីសន្យា ក្រោយពីបានធ្វើតាមបំណងប្រាថ្នារបស់ព្រះ។ ៣៧ ព្រោះនៅតែ«បន្ដិចទៀត» ហើយ«ឯលោកដែលត្រូវមក នឹងមកដល់ ហើយមិនបង្អែបង្អង់ឡើយ»។ ៣៨ «ប៉ុន្តែអ្នកបម្រើសុចរិតរបស់ខ្ញុំនឹងរស់ដោយសារជំនឿ» ហើយ«ប្រសិនបើគាត់រាថយ ខ្ញុំ* មិនពេញចិត្តនឹងគាត់ទេ»។ ៣៩ ក៏ប៉ុន្តែយើងមិនមែនជាមនុស្សដែលរាថយឲ្យត្រូវបំផ្លាញនោះទេ តែយើងជាមនុស្សដែលមានជំនឿដើម្បីរក្សាជីវិត។*
១១ ជំនឿគឺជាការទុកចិត្តដោយមានទីសំអាងមាំមួនថា អ្វីៗនឹងកើតឡើងដូចសង្ឃឹម ហើយជាការឃើញភ័ស្តុតាងដែលនាំឲ្យជឿជាក់ថា អ្វីដែលភ្នែកមើលមិនឃើញពិតជាមានមែន។ ២ ព្រោះដោយមានជំនឿនេះ មនុស្សនៅសម័យបុរាណបានទទួលការបញ្ជាក់ថាព្រះពេញចិត្តនឹងពួកគេ។
៣ ដោយសារជំនឿ យើងយល់ឃើញថាអ្វីៗក្នុងសកលលោក* បានត្រូវរៀបចំឡើងដោយប្រសាសន៍របស់ព្រះ ហេតុនេះ អ្វីដែលយើងមើលឃើញបានកើតចេញពីអ្វីដែលយើងមើលមិនឃើញ។
៤ ដោយសារជំនឿ អេបិលបានជូនគ្រឿងបូជាដែលមានតម្លៃខ្ពស់ជាងគ្រឿងបូជារបស់កាអ៊ីន ហើយដោយសារជំនឿនោះ គាត់បានទទួលការបញ្ជាក់ថាគាត់ជាមនុស្សសុចរិត ព្រោះព្រះបានបញ្ជាក់អំពីជំនូននោះឲ្យឃើញថាលោកព្រមទទួល ហើយទោះជាអេបិលបានស្លាប់ហើយក៏ដោយ ក៏គាត់និយាយនៅឡើយ តាមរយៈជំនឿរបស់គាត់។
៥ ដោយសារជំនឿ អេណុកបានត្រូវយកចេញ ដើម្បីកុំឲ្យជួបសេចក្ដីស្លាប់ ហើយគេមិនអាចរកគាត់ឃើញឡើយ ពីព្រោះព្រះបានយកគាត់ចេញហើយ ព្រោះមុនពេលដែលគាត់ត្រូវយកចេញ គាត់ទទួលការបញ្ជាក់ថា គាត់បានធ្វើឲ្យព្រះពេញចិត្ត។ ៦ ម្យ៉ាងទៀត បើគ្មានជំនឿ មិនអាចធ្វើឲ្យព្រះពេញចិត្តបានឡើយ ព្រោះអ្នកដែលចូលទៅជិតព្រះ ត្រូវតែជឿថាមានព្រះ ហើយជឿថាលោកឲ្យរង្វាន់ដល់អ្នកដែលខំស្វែងរកលោកអស់ពីចិត្ត។
៧ ដោយសារជំនឿ ពេលណូអេទទួលការព្រមានពីព្រះស្តីអំពីការដែលគាត់មិនទាន់ឃើញនៅឡើយ នោះគាត់បង្ហាញការកោតខ្លាចចំពោះព្រះ ហើយសង់ទូកធំដើម្បីសង្គ្រោះពួកអ្នកផ្ទះរបស់គាត់ ហើយតាមរយៈជំនឿនេះ គាត់បានផ្ដន្ទាទោសពិភពលោក ក៏ទទួលបានសេចក្ដីសុចរិតដែលមកពីជំនឿ។
៨ ដោយសារជំនឿ ពេលដែលអាប្រាហាំបានត្រូវហៅ នោះគាត់ស្ដាប់បង្គាប់ដោយចេញទៅកន្លែងដែលគាត់ត្រូវទទួលជាមត៌ក ហើយគាត់ទៅ ទោះជាមិនបានដឹងថាគាត់ទៅកន្លែងណាក្ដី។ ៩ ដោយសារជំនឿ គាត់ស្នាក់នៅជាជនបរទេសក្នុងស្រុកសន្យា ដូចកំពុងស្នាក់នៅប្រទេសផ្សេង ក៏បានរស់នៅក្នុងត្រសាលជាមួយនឹងអ៊ីសាកនិងយ៉ាកុប ជាអ្នកទទួលសេចក្ដីសន្យាដដែលនោះជាមត៌ករួមជាមួយនឹងគាត់។ ១០ ព្រោះគាត់រង់ចាំក្រុងដែលមានគ្រឹះដ៏ពិត ជាក្រុងដែលមានព្រះជាអ្នកសង់និងជាអ្នកបង្កើត។
១១ ក៏ដោយសារជំនឿដែរ សារ៉ាបានទទួលសមត្ថភាពឲ្យមានផ្ទៃពោះបង្កើតកូន* ពេលដែលនាងហួសអាយុនឹងបង្កើតកូនទៅហើយ ពីព្រោះនាងចាត់ទុកថាលោកដែលបានសន្យាការនោះគឺស្មោះត្រង់។ ១២ ដូច្នេះ ពីបុរសតែម្នាក់ដែលប្រៀបដូចជាស្លាប់ មានកូនកើតមកដែលមានចំនួនច្រើនដូចផ្កាយនៅលើមេឃ ហើយដែលរាប់ពុំអស់ដូចខ្សាច់នៅឆ្នេរសមុទ្រ។
១៣ អ្នកទាំងអស់នោះបានស្លាប់ដោយមានជំនឿ ទោះជាពួកគេមិនបានទទួលអ្វីដែលបានត្រូវសន្យាក៏ដោយ ក៏ពួកគេបានឃើញការនោះពីចម្ងាយ ហើយបានរីករាយនឹងការនោះ ថែមទាំងបានប្រកាសដោយចំហថា ពួកគេជាជនបរទេសនិងជាអ្នកស្នាក់នៅបណ្ដោះអាសន្នក្នុងស្រុក។ ១៤ ព្រោះមនុស្សដែលនិយាយដូច្នោះ បញ្ជាក់ថាពួកគេកំពុងស្វែងរកយ៉ាងអស់ពីចិត្តនូវកន្លែងដែលនឹងក្លាយទៅជារបស់ខ្លួន។ ១៥ ទោះជាយ៉ាងនោះក៏ដោយ ប្រសិនបើពួកគេបាននឹកនាដល់កន្លែងដែលពួកគេចាកចេញនោះ ពួកគេនឹងមានឱកាសត្រឡប់ទៅវិញ។ ១៦ ប៉ុន្តែតាមការពិត ពួកគេកំពុងខំប្រឹងដើម្បីទទួលកន្លែងដែលប្រសើរជាង ជាកន្លែងរបស់ស្ថានសួគ៌។ ដូច្នេះ ព្រះមិនអៀនខ្មាសដោយត្រូវគេហៅរកជាព្រះរបស់ពួកគេទេ ព្រោះថា លោកបានរៀបចំក្រុងមួយឲ្យពួកគេ។
១៧ ដោយសារជំនឿ ពេលដែលអាប្រាហាំបានត្រូវពិសោធ គាត់បង្ហាញជំនឿរបស់គាត់ដោយបម្រុងនឹងបូជាអ៊ីសាក គឺបុរសដែលបានទទួលសេចក្ដីសន្យាដោយអំណរ បានប៉ុនប៉ងបូជាកូនប្រុសតែមួយរបស់គាត់ ១៨ ទោះជាគាត់បានត្រូវប្រាប់ថា៖ «អ្នកដែលនឹងត្រូវហៅថា‹ពូជរបស់អ្នក› នឹងកើតពីអ៊ីសាក»។ ១៩ ប៉ុន្តែគាត់យល់ឃើញថា ព្រះអាចប្រោសឲ្យអ៊ីសាករស់ឡើងវិញ សូម្បីតែស្លាប់ទៅហើយក្ដី ហើយគាត់បានទទួលអ៊ីសាកពីសេចក្ដីស្លាប់ក្នុងន័យធៀបមែន។
២០ ក៏ដោយសារជំនឿដែរ អ៊ីសាកបានឲ្យពរដល់យ៉ាកុបនិងអេសាវស្តីអំពីអ្វីៗនៅថ្ងៃមុខ។
២១ ដោយសារជំនឿ ពេលដែលយ៉ាកុបជិតស្លាប់ គាត់ឲ្យពរដល់កូនប្រុសម្នាក់ៗរបស់យ៉ូសែប រួចលំឱនកាយគោរពព្រះដោយច្រត់លើដំបងរបស់គាត់។
២២ ដោយសារជំនឿ ពេលដែលយ៉ូសែបជិតស្លាប់ គាត់និយាយអំពីការចាកចេញ* របស់ពួកកូនអ៊ីស្រាអែល ហើយគាត់ឲ្យបង្គាប់ដល់ពួកគេស្តីអំពីឆ្អឹងរបស់គាត់។
២៣ ដោយសារជំនឿ ឪពុកម្ដាយរបស់ម៉ូសេបានលាក់គាត់អស់បីខែ ពីព្រោះពួកគាត់ឃើញថាកូនតូចនោះស្អាតណាស់ ហើយពួកគាត់មិនខ្លាចបង្គាប់របស់ស្តេចទេ។ ២៤ ដោយសារជំនឿ ពេលដែលម៉ូសេធំពេញវ័យហើយ គាត់មិនព្រមឲ្យគេហៅគាត់ថាជាកូនរបស់កូនស្រីផារ៉ូឡើយ ២៥ ដោយសម្រេចចិត្តឲ្យគេធ្វើបាបគាត់ជាមួយនឹងរាស្ត្ររបស់ព្រះ ជាជាងសប្បាយមួយរយៈពេលខ្លីនឹងអំពើខុសឆ្គង ២៦ ពីព្រោះគាត់ចាត់ទុកការរងការជេរប្រមាថក្នុងនាមជាគ្រិស្ត* ថាជាទ្រព្យវិសេសជាងទ្រព្យទាំងអស់ក្នុងស្រុកអេស៊ីប ព្រោះគាត់សម្លឹងចំទៅរង្វាន់។ ២៧ ដោយសារជំនឿ គាត់ចេញពីស្រុកអេស៊ីប ប៉ុន្តែមិនមែនដោយខ្លាចសេចក្ដីក្រោធរបស់ស្តេចទេ ព្រោះគាត់បន្តស៊ូទ្រាំយ៉ាងអត់ធ្មត់ ហាក់ដូចជាមើលឃើញលោកដែលមនុស្សមើលពុំឃើញ។ ២៨ ដោយសារជំនឿ គាត់បានធ្វើបុណ្យរំលងហើយប្រោះឈាម ដើម្បីកុំឲ្យអ្នកពិឃាតប៉ះពាល់កូនច្បងរបស់ពួកគាត់។
២៩ ដោយសារជំនឿ ពួកគេបានដើរកាត់សមុទ្រក្រហមដូចដើរលើដីគោក ប៉ុន្តែពេលដែលជនជាតិអេស៊ីបខំចេញទៅដើរកាត់ នោះទឹកសមុទ្របានលេបពួកគេបាត់។
៣០ ដោយសារជំនឿ កំពែងក្រុងយេរីខូបានរលំ បន្ទាប់ពីជនជាតិអ៊ីស្រាអែលបានដើរជុំវិញកំពែងនោះអស់ប្រាំពីរថ្ងៃ។ ៣១ ដោយសារជំនឿ រ៉ាហាបដែលជាស្រីពេស្យាមិនបានវិនាសជីវិតជាមួយនឹងពួកអ្នកដែលមិនស្ដាប់បង្គាប់ឡើយ ពីព្រោះពេលដែលពួកអ្នកស៊ើបការណ៍មក នាងបានទទួលពួកគេដោយមេត្រី។
៣២ តើគួរនិយាយអ្វីទៀត? ព្រោះគ្មានពេលគ្រប់គ្រាន់ឲ្យខ្ញុំរៀបរាប់អំពីគេឌាន បារ៉ាក់ សាំសុន យែបថា ដាវីឌ ព្រមទាំងសាំយូអែល និងពួកអ្នកប្រកាសទំនាយឯទៀត ៣៣ ដែលតាមរយៈជំនឿ បានច្បាំងឈ្នះរាជាណាចក្រផ្សេងៗ បានធ្វើឲ្យមានសេចក្ដីសុចរិត បានទទួលសេចក្ដីសន្យា បានបិទមាត់តោ ៣៤ បានទប់កម្ដៅភ្លើង បានរួចពីមុខដាវ ធ្លាប់ខ្សោយតែបានត្រូវធ្វើឲ្យមានកម្លាំងខ្លាំងក្លា បានក្លាយទៅជាអ្នកច្បាំងអង់អាចក្នុងសង្គ្រាម បានបំបាក់ទ័ពបរទេស។ ៣៥ ស្ត្រីខ្លះដែលមានពួកអ្នកជាទីស្រឡាញ់ស្លាប់ទៅ បានទទួលពួកគេមកវិញ តាមរយៈការប្រោសឲ្យរស់ឡើងវិញ ប៉ុន្តែបុរសឯទៀតត្រូវគេធ្វើទារុណកម្មដោយសារពួកគេមិនព្រមផ្ដល់អ្វីដើម្បីឲ្យរួចខ្លួនទេ ដើម្បីពួកគេអាចទទួលការប្រោសឲ្យរស់ឡើងវិញដែលប្រសើរជាង។ ៣៦ អ្នកឯទៀតបានត្រូវល្បងលដោយការសើចចំអកមើលងាយ ហើយដោយត្រូវគេវាយនឹងរំពាត់ខ្សែតី មិនត្រឹមតែប៉ុណ្ណោះ ត្រូវគេដាក់ច្រវាក់ និងត្រូវជាប់គុក។ ៣៧ ពួកគេបានត្រូវគេគប់ដុំថ្មសម្លាប់ ត្រូវគេល្បងល និងត្រូវគេអារបណ្ដាច់ខ្លួន។ ពួកគេបានត្រូវគេធ្វើឃាតដោយដាវ បានស្លៀករោមចៀមនិងរោមពពែ ក៏បានខ្វះខាត រងទុក្ខលំបាក និងត្រូវគេធ្វើបាប ៣៨ ហើយពិភពលោកមិនសមនឹងពួកគេឡើយ។ ពួកគេបានរស់នៅក្នុងរអាង តំបន់ស្ងាត់ជ្រងំ ភ្នំ និងរូងនៃផែនដី។
៣៩ ទោះជាយ៉ាងនោះក៏ដោយ អ្នកទាំងអស់នោះមិនបានទទួលអ្វីដែលបានត្រូវសន្យា ថ្វីបើពួកគេបានទទួលការបញ្ជាក់ដោយសារជំនឿរបស់ពួកគេក៏ដោយ ៤០ ព្រោះព្រះមានគំនិតផ្ដល់អ្វីដែលប្រសើរជាងនោះដល់យើង ដើម្បីកុំឲ្យពួកគេក្លាយទៅជាល្អឥតខ្ចោះដោយគ្មានយើង។
១២ ដូច្នេះ ដោយសារមានសាក្សីមួយក្រុមធំ* យ៉ាងនេះនៅជុំវិញយើង ចូរយើងចោលអ្វីៗគ្រប់យ៉ាងដែលធ្ងន់ និងការខុសឆ្គងដែលទាក់យើងយ៉ាងងាយនោះ ហើយរត់ដោយស៊ូទ្រាំក្នុងទីប្រណាំងដែលបានត្រូវកំណត់ឲ្យយើង ២ ពេលដែលយើងសម្លឹងមើលទៅលោកយេស៊ូ ជាមេដឹកនាំដែលធ្វើឲ្យយើងមានជំនឿហើយធ្វើឲ្យជំនឿរបស់យើងបានពេញលក្ខណៈ។ ដោយសារអំណរដែលនៅខាងមុខលោក លោកបានស៊ូទ្រាំលើបង្គោលទារុណកម្ម* ក៏បានមើលងាយចំពោះសេចក្ដីអាម៉ាស់ខ្មាស ហើយឥឡូវបានអង្គុយនៅខាងស្ដាំបល្ល័ង្កនៃព្រះ។ ៣ ចូរពិចារណាឲ្យបានដិតដល់អំពីលោកដែលបានស៊ូទ្រាំនឹងសម្ដីប្រឆាំងជាច្រើនពីពួកអ្នកប្រព្រឹត្តអំពើខុសឆ្គង ដែលផ្ដន្ទាទោសខ្លួនគេដោយសម្ដីនោះ។ ធ្វើដូច្នេះ អ្នករាល់គ្នានឹងមិនល្វើយនិងអស់កម្លាំងចិត្ត។
៤ ក្នុងការតស៊ូនឹងការខុសឆ្គងនោះ អ្នករាល់គ្នាមិនទាន់តស៊ូរហូតដល់ហូរឈាមទេ ៥ ម្យ៉ាងទៀត អ្នករាល់គ្នាបានភ្លេចទាំងស្រុងនូវពាក្យបំផុសទឹកចិត្តដែលនិយាយទៅកាន់អ្នករាល់គ្នាដូចជាឪពុកនិយាយទៅកូនថា៖ «កូនអើយ កុំមើលងាយការប្រដៅពីព្រះយេហូវ៉ាឡើយ ហើយកុំអស់កម្លាំងចិត្តពេលដែលលោកកែតម្រង់អ្នក ៦ ព្រោះព្រះយេហូវ៉ាប្រដៅអស់អ្នកដែលលោកស្រឡាញ់ តាមការពិត អស់អ្នកដែលលោកទទួលជាកូន លោកវាយនឹងរំពាត់»។*
៧ អ្នករាល់គ្នាកំពុងស៊ូទ្រាំដែលទុកជាការប្រដៅ។ ព្រះកំពុងប្រព្រឹត្តនឹងអ្នករាល់គ្នាដូចកូន។ ព្រោះតើមានកូនណាដែលឪពុកមិនប្រដៅឬទេ? ៨ ក៏ប៉ុន្តែប្រសិនបើអ្នករាល់គ្នាមិនទទួលការប្រដៅដែលទាំងអស់គ្នាបានទទួល នោះអ្នករាល់គ្នាជាកូនឥតស្របច្បាប់ មិនមែនជាកូនពិតទេ។ ៩ ម្យ៉ាងទៀត យើងមានឪពុកជាសាច់ឈាមដូចយើង ដែលធ្លាប់ប្រដៅយើង ហើយយើងបានគោរពពួកគាត់។ ទម្រាំតែបិតាដែលផ្ដល់កំណើតឲ្យយើងដោយសកម្មពល* យើងក៏ត្រូវចុះចូលនឹងលោកជាងនោះទៅទៀត ដើម្បីទទួលជីវិត មែនទេ? ១០ ព្រោះអស់មួយរយៈពេលខ្លី ពួកគាត់ធ្លាប់ប្រដៅយើងតាមតែពួកគាត់គិតថាល្អ ប៉ុន្តែលោកប្រដៅយើងជាប្រយោជន៍ដល់យើង ដើម្បីឲ្យយើងរួមចំណែកក្នុងសេចក្ដីបរិសុទ្ធរបស់លោក។ ១១ ពិតមែនតែគ្មានការប្រដៅណាដែលធ្វើឲ្យមានអំណរ ខណៈដែលទទួលការប្រដៅនោះ តែធ្វើឲ្យកើតទុក្ខវិញ ប៉ុន្តែក្រោយមក អ្នកដែលបានត្រូវអប់រំដោយការប្រដៅនោះនឹងទទួលផលដែលធ្វើឲ្យមានសេចក្ដីសុខសាន្ត ពោលគឺរបៀបរស់នៅដ៏សុចរិត។
១២ ដូច្នេះ ចូរធ្វើឲ្យអ្នកដែលស្រយុតដៃនិងអ្នកដែលទន់ជង្គង់មាំមួនឡើង ១៣ ហើយចូរបន្តធ្វើផ្លូវត្រង់សម្រាប់ជើងអ្នករាល់គ្នា ដើម្បីកុំឲ្យអវយវៈដែលរបួសនោះភ្លាត់ឆ្អឹង តែដើម្បីឲ្យជាឡើងវិញ។ ១៤ ចូរខំប្រឹងឲ្យមានសន្ដិភាពជាមួយនឹងមនុស្សទាំងអស់ ហើយខំប្រឹងឲ្យមានសេចក្ដីបរិសុទ្ធ ព្រោះអ្នកណាដែលគ្មានសេចក្ដីបរិសុទ្ធ អ្នកនោះនឹងមិនឃើញលោកម្ចាស់ទេ ១៥ ដោយប្រុងប្រយ័ត្នកុំឲ្យអ្នកណាបាត់បង់គុណដ៏វិសេសលើសលប់របស់ព្រះ ដើម្បីកុំឲ្យឫសពោរពេញទៅដោយពិសពុលដុះឡើងបង្កើតបញ្ហា ព្រមទាំងធ្វើឲ្យមនុស្សជាច្រើនសៅហ្មង ១៦ ហើយដើម្បីកុំឲ្យមានអ្នកណាប្រព្រឹត្តអំពើប្រាសចាកសីលធម៌ខាងផ្លូវភេទ ឬអ្នកណាដែលមិនឲ្យតម្លៃទៅលើអ្វីដែលពិសិដ្ឋ ដូចអេសាវដែលបានប្រគល់សិទ្ធិជាកូនច្បងដើម្បីប្ដូរយកអាហារតែមួយពេល។ ១៧ ពីព្រោះអ្នករាល់គ្នាដឹងថា ក្រោយមក ពេលដែលគាត់ចង់ទទួលពរនោះជាមត៌ក គាត់បានត្រូវបដិសេធ ព្រោះថា ទោះជាគាត់ស្រក់ទឹកភ្នែក ហើយខំប្រឹងអស់ពីចិត្តដើម្បីធ្វើឲ្យឪពុកដូរគំនិតក៏ដោយ ការនោះមិនបានសម្រេចទេ។
១៨ ព្រោះអ្នករាល់គ្នាមិនបានចូលទៅជិតភ្នំមួយដែលអ្នករាល់គ្នាអាចពាល់បាន ហើយដែលបានត្រូវធ្វើឲ្យមានភ្លើងឆេះ ថែមទាំងមានពពកខ្មៅ ភាពងងឹតសូន្យសុង និងព្យុះនៅជុំវិញ ១៩ សូរត្រែបន្លឺឡើង និងមានសំឡេងមួយបន្លឺទៅកាន់ពួកគេ ជាសំឡេងដែលបណ្ដាជនបានឮរួចអង្វរសូមកុំឲ្យមានប្រសាសន៍ទៅកាន់ពួកគេទៀត។ ២០ ព្រោះពួកគេខ្លាចបញ្ញត្ដិដែលថា៖ «ហើយប្រសិនបើមានសត្វណាប៉ះភ្នំនេះ ត្រូវគប់ដុំថ្មសម្លាប់សត្វនោះចោល»។ ២១ ម្យ៉ាងទៀត ការសម្ដែងនោះគួរឲ្យខ្លាចដល់ម្ល៉េះបានជាម៉ូសេនិយាយថា៖ «ខ្ញុំភ័យខ្លាច ក៏កំពុងញ័ររន្ធត់ផង»។ ២២ ប៉ុន្តែអ្នករាល់គ្នាបានចូលទៅជិតភ្នំស៊ីយ៉ូន ក្រុងរបស់ព្រះដែលមានជីវិតរស់នៅ និងក្រុងយេរូសាឡិមនាស្ថានសួគ៌ ព្រមទាំងទេវតាជាច្រើនអនេក ២៣ ដែលនៅជុំគ្នា និងក្រុមជំនុំរបស់បុត្រច្បងដែលមានឈ្មោះកត់ទុកនៅស្ថានសួគ៌ ព្រមទាំងព្រះដែលជាចៅក្រមរបស់មនុស្សទាំងអស់ និងមនុស្សសុចរិតដែលបានកើតពីសកម្មពល ហើយដែលបានត្រូវធ្វើឲ្យល្អឥតខ្ចោះ ២៤ និងលោកយេស៊ូជាអ្នកសម្រុះសម្រួលកិច្ចព្រមព្រៀងថ្មីមួយ ព្រមទាំងឈាមដែលលោកបានប្រោះមកលើយើង ជាឈាមដែលនិយាយប្រសើរជាងឈាមរបស់អេបិល។
២៥ ចូរប្រយ័ត្ន កុំឲ្យអ្នករាល់គ្នារកលេសមិនស្ដាប់បង្គាប់លោកដែលកំពុងមានប្រសាសន៍ឡើយ។ ព្រោះប្រសិនបើអស់អ្នកដែលបានរកលេសមិនស្ដាប់បង្គាប់អ្នកដែលប្រាប់សេចក្ដីព្រមានរបស់ព្រះនៅផែនដីមិនអាចគេចពីទោសនៅពេលនោះ ទម្រាំតែយើងវិញ យើងច្បាស់ជាមិនអាចគេចពីទោសបានឡើយ ប្រសិនបើយើងបែរចេញពីលោកដែលមានប្រសាសន៍ចេញពីស្ថានសួគ៌។ ២៦ នៅពេលនោះ សំឡេងរបស់លោកបានធ្វើឲ្យផែនដីរញ្ជួយ ប៉ុន្តែឥឡូវលោកបានសន្យាថា៖ «ខ្ញុំនឹងធ្វើឲ្យផែនដីនិងមេឃរញ្ជួយម្ដងទៀត»។ ២៧ ពាក្យថា«ម្ដងទៀត» បញ្ជាក់ថាអ្វីដែលនឹងត្រូវធ្វើឲ្យរញ្ជួយហើយដកចេញ ជាអ្វីដែលបានត្រូវបង្កើត ដើម្បីឲ្យអ្វីដែលនឹងមិនត្រូវធ្វើឲ្យរញ្ជួយនៅស្ថិតស្ថេរ។ ២៨ ដូច្នេះ ដោយឃើញថាយើងនឹងទទួលរាជាណាចក្រដែលមិនអាចត្រូវធ្វើឲ្យរញ្ជួយឡើយ ចូរយើងបន្តទទួលគុណដ៏វិសេសលើសលប់ជានិច្ច ដែលតាមរយៈគុណដ៏វិសេសលើសលប់នោះ យើងអាចបំពេញកិច្ចបម្រើពិសិដ្ឋជូនព្រះតាមរបៀបដែលលោកពេញចិត្ត ដោយកោតខ្លាចនិងមានចិត្តស្ញែង។ ២៩ ព្រោះព្រះរបស់យើងក៏ជាភ្លើងដែលបំផ្លិចបំផ្លាញដែរ។
១៣ ចូរបន្តស្រឡាញ់គ្នាជាបងប្អូន។ ២ កុំភ្លេចទទួលអ្នកឯទៀតដោយរាក់ទាក់ ព្រោះដោយបង្ហាញទឹកចិត្តបែបនេះអ្នកខ្លះបានទទួលទេវតាដោយមិនដឹងខ្លួន។ ៣ ចូរចាំជានិច្ចអំពីពួកអ្នកដែលជាប់ចំណង ហាក់ដូចជាអ្នកជាប់ចំណងជាមួយនឹងពួកគេដែរ និងចាំជានិច្ចអំពីពួកអ្នកដែលកំពុងត្រូវគេធ្វើបាប ព្រោះថា អ្នករាល់គ្នានៅក្នុងរូបកាយសាច់ឈាមនៅឡើយ។ ៤ ចូរឲ្យមនុស្សទាំងអស់គ្នាចាត់ទុកអាពាហ៍ពិពាហ៍ជាអ្វីដែលមានតម្លៃ ហើយឲ្យការរួមរស់ជាប្ដីប្រពន្ធត្រូវឥតសៅហ្មង ព្រោះព្រះនឹងវិនិច្ឆ័យទោសអ្នកដែលប្រព្រឹត្តអំពើប្រាសចាកសីលធម៌និងអ្នកផិតក្បត់។ ៥ ចូរមានរបៀបរស់នៅដែលប្រាសចាកការស្រឡាញ់ប្រាក់ ហើយចូរស្កប់ចិត្តនឹងអ្វីដែលអ្នករាល់គ្នាមាន។ ព្រោះលោកបានមានប្រសាសន៍ថា៖ «ខ្ញុំប្រាកដជាមិនចាកចេញពីអ្នកឡើយ ក៏ប្រាកដជាមិនបោះបង់ចោលអ្នកដែរ»។ ៦ ដើម្បីឲ្យយើងមានចិត្តពោរពេញទៅដោយសេចក្ដីក្លាហាន ហើយនិយាយថា៖ «ព្រះយេហូវ៉ាជាអ្នកជួយខ្ញុំ ខ្ញុំនឹងមិនខ្លាចឡើយ។ តើមនុស្សអាចធ្វើអ្វីដល់ខ្ញុំ?»។
៧ ចូរចាំអំពីពួកអ្នកដែលកំពុងនាំមុខអ្នករាល់គ្នា ជាអ្នកដែលបានប្រាប់បណ្ដាំរបស់ព្រះដល់អ្នករាល់គ្នា ហើយពេលដែលសង្កេតមើលលទ្ធផលពីការប្រព្រឹត្តរបស់ពួកគាត់ ចូរយកតម្រាប់តាមជំនឿរបស់ពួកគាត់។
៨ លោកយេស៊ូគ្រិស្តគឺនៅដដែល ម្សិលមិញ ថ្ងៃនេះ និងជារៀងរហូតតទៅ។
៩ កុំឲ្យសេចក្ដីបង្រៀនផ្សេងៗដែលចម្លែកបង្វែរអ្នករាល់គ្នាឡើយ ព្រោះជាការល្អប្រសើរ ប្រសិនបើកម្លាំងចិត្តបានត្រូវពង្រឹងដោយគុណដ៏វិសេសលើសលប់ មិនមែនដោយម្ហូបអាហារទេ ឯពួកអ្នកដែលផ្ដោតអារម្មណ៍ទៅលើរបស់នោះ មិនបានទទួលប្រយោជន៍អ្វីសោះ។
១០ យើងមានទីបូជាមួយ តែមនុស្សដែលបំពេញកិច្ចបម្រើពិសិដ្ឋនៅត្រសាលគ្មានសិទ្ធិបរិភោគគ្រឿងបូជាពីទីបូជានោះទេ។ ១១ ព្រោះខ្មោចសត្វដែលសម្ដេចសង្ឃបានយកឈាមចូលក្នុងកន្លែងបរិសុទ្ធសម្រាប់ភាពខុសឆ្គងនោះ ត្រូវដុតចោលខាងក្រៅជំរំ។ ១២ ដូចគ្នាដែរ លោកយេស៊ូបានរងទុក្ខខាងក្រៅទ្វារក្រុង ដើម្បីធ្វើឲ្យបណ្ដាជនបរិសុទ្ធតាមរយៈឈាមរបស់លោកផ្ទាល់។ ១៣ ដូច្នេះ ចូរយើងទៅឯលោកនៅខាងក្រៅជំរំ ដោយរងការជេរប្រមាថដែលលោកបានរង ១៤ ព្រោះយើងមិនមានក្រុងមួយដែលស្ថិតស្ថេរគង់វង្សទេ តែយើងកំពុងទន្ទឹងរង់ចាំយ៉ាងរំភើបនូវក្រុងដែលនឹងមាននៅថ្ងៃមុខ។ ១៥ ដូច្នេះ ចូរយើងជូនព្រះនូវសេចក្ដីសរសើរជាគ្រឿងបូជាជានិច្ច ពោលគឺ ផលនៃបបូរមាត់ ដែលប្រកាសប្រាប់នាមរបស់លោកដល់អ្នកឯទៀត ហើយចូរយើងធ្វើដូច្នេះតាមរយៈលោកយេស៊ូ។ ១៦ ម្យ៉ាងទៀត កុំភ្លេចធ្វើការល្អ ហើយចែករំលែកដល់អ្នកឯទៀត ព្រោះព្រះពេញចិត្តនឹងគ្រឿងបូជាបែបនេះ។
១៧ ចូរស្ដាប់បង្គាប់ហើយចុះចូលនឹងពួកអ្នកដែលនាំមុខអ្នករាល់គ្នា ព្រោះពួកគេកំពុងថែរក្សាអ្នករាល់គ្នា ហើយទទួលខុសត្រូវអំពីរបៀបដែលពួកគេបានធ្វើការនោះ។ ដូច្នេះ ពួកគេអាចធ្វើការនេះដោយមានអំណរ មិនមែនដោយដកដង្ហើមធំទេ ព្រោះបើដូច្នេះនឹងនាំឲ្យអ្នករាល់គ្នាបង់ប្រយោជន៍វិញ។
១៨ ចូរបន្តអធិដ្ឋានឲ្យយើង ព្រោះយើងជឿជាក់ថាចិត្តរបស់យើងនឹងវិនិច្ឆ័យយើងថាគ្មានទោស ព្រោះយើងចង់ធ្វើការទាំងអស់ដោយទៀងត្រង់។ ១៩ ប៉ុន្តែជាពិសេសខ្ញុំសូមបំផុសទឹកចិត្តអ្នករាល់គ្នាឲ្យធ្វើដូច្នេះ ដើម្បីខ្ញុំអាចឆាប់មកឯអ្នករាល់គ្នា។
២០ ឯព្រះនៃសេចក្ដីសុខសាន្ត ដែលបានប្រោសគង្វាលចៀមឧត្តុង្គឧត្តមឲ្យរស់ពីស្លាប់ឡើងវិញ ដោយឈាមនៃកិច្ចព្រមព្រៀងដែលមានសុពលភាពជានិរន្តរ៍ ពោលគឺលោកយេស៊ូជាម្ចាស់របស់យើង ២១ សូមឲ្យលោកផ្ដល់អ្វីៗល្អគ្រប់យ៉ាងដើម្បីឲ្យអ្នករាល់គ្នាធ្វើតាមបំណងប្រាថ្នារបស់លោក ហើយក្នុងយើង សូមឲ្យលោកធ្វើការអ្វីដែលលោកពេញចិត្តតាមរយៈលោកយេស៊ូគ្រិស្ត។ សូមឲ្យលោកមានសិរីរុងរឿងជារៀងរហូតតទៅ។ អាមេន។
២២ បងប្អូនអើយ ឥឡូវខ្ញុំសូមអ្នករាល់គ្នាទទួលសម្ដីលើកទឹកចិត្តនេះ ព្រោះខ្ញុំបានសរសេរសំបុត្រមួយយ៉ាងខ្លីទៅកាន់អ្នករាល់គ្នា។ ២៣ សូមកត់សម្គាល់ថា ធីម៉ូថេ ជាប្អូនប្រុសរបស់យើងបានត្រូវដោះលែង ហើយប្រសិនបើគាត់មកឯអ្នករាល់គ្នាឆាប់ៗ យើងនឹងមកជាមួយគ្នាដើម្បីជួបអ្នករាល់គ្នា។
២៤ សូមផ្ដាំសួរសុខទុក្ខអស់អ្នកដែលនាំមុខអ្នករាល់គ្នា និងពួកអ្នកបរិសុទ្ធទាំងអស់។ អស់អ្នកនៅស្រុកអ៊ីតាលីសូមផ្ដាំសួរសុខទុក្ខដែរ។
២៥ សូមឲ្យអ្នករាល់គ្នាបានប្រកបដោយគុណដ៏វិសេសលើសលប់។
[កំណត់សម្គាល់]
ឬ«អ្វីៗក្នុងសកលលោក»
មើលកំណត់សម្គាល់រ៉ូម ៥:១២
ន័យត្រង់«ទីអាស្រ័យនៅផែនដី»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ឬ«អ្នកបម្រើសាធារណៈ»
សំដៅទៅស្តេចឯទៀតក្នុងតំណនៃវង្សត្រកូលដាវីឌ
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ឬ«គ្រប់ទីអាស្រ័យនៅផែនដី»
ភាសាក្រិច«ឌីអាបូឡូស»។ មានន័យថា«អ្នកបង្កាច់បង្ខូច»
ភាសាក្រិច«អាប៉ូស្តូឡូស»។ មានន័យថា«អ្នកដែលត្រូវគេចាត់ឲ្យទៅ»
មើលសេចក្ដីពន្យល់បន្ថែមផ្នែកទី៤
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ន័យត្រង់«ធ្ងន់ត្រចៀក»
ឬ«មានភាពចាស់ទុំ»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ន័យត្រង់«បោះដែកគោលភ្ជាប់នឹងបង្គោលឈើ»។ មើលសេចក្ដីពន្យល់បន្ថែមផ្នែកទី៥
ន័យត្រង់«ស្បថ»
មើលកំណត់សម្គាល់ម៉ាថ ១:១
មើលកំណត់សម្គាល់ម៉ាថ ៥:១៧
មានន័យថាគាត់មិនទាន់កើតមកពីពូជពង្សអាប្រាហាំ
ន័យត្រង់«គ្មានកំហុស»
ទេវតាពីរដែលមានឋានៈខ្ពង់ខ្ពស់
ពាក្យភាសាក្រិចដែលបកប្រែនៅទីនេះថា«គម្រប» ក៏អាចសំដៅទៅគ្រឿងបូជាដែលផ្សះផ្សាចំណងមិត្តភាពជាមួយនឹងព្រះ
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
តាមមើលទៅ នេះសំដៅទៅកន្លែងបរិសុទ្ធនៅស្ថានសួគ៌
ឬ«ការប្រៀបប្រដូច»
ការលាងសម្អាតមនុស្សនិងរបស់របរផ្សេងៗតាមតម្រូវការច្បាប់ម៉ូសេ
ឬ«បំពេញកិច្ចបម្រើពិសិដ្ឋ»
ឬ«សមត្ថភាពវិនិច្ឆ័យរបស់គេនឹងលែងផ្ដន្ទាទោសពួកគេអំពីការខុសឆ្គងរបស់ខ្លួនទៀត»
គ្រឿងបូជានេះបានត្រូវដុតទាំងមូល
ឬ«គ្រិស្ត»
ន័យត្រង់«រមូរនៃសៀវភៅ»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ន័យត្រង់«ប្រោះ»។ សំដៅទៅការយកឈាមរបស់គ្រិស្តមកប្រោះ
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
ឬ«របៀបរបបនានា»
ន័យត្រង់«ពូជ»
ពាក្យភាសាក្រិចដែលប្រើក្នុងខនេះមានឫសគល់ដូចឈ្មោះភាសាក្រិចសម្រាប់សៀវភៅនិក្ខមនំ
មើលសេចក្ដីពន្យល់បន្ថែមផ្នែកទី៤
ន័យត្រង់«ពួកសាក្សីដូចជាពពកមួយយ៉ាងធំ»
មើលសេចក្ដីពន្យល់បន្ថែមផ្នែកទី៥
ន័យត្រង់«លោកវាយនឹងរំពាត់ខ្សែតី»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ