សំបុត្ររបស់យ៉ាកុប
១ ពីខ្ញុំ យ៉ាកុប ដែលជាអ្នកបម្រើរបស់ព្រះនិងរបស់លោកម្ចាស់យេស៊ូគ្រិស្ត* ជូនចំពោះកុលសម្ព័ន្ធទាំងដប់ពីរដែលបែកខ្ញែកគ្នាទៅកន្លែងផ្សេងៗ៖
ជម្រាបសួរ!
២ បងប្អូនខ្ញុំអើយ ពេលដែលជួបនឹងទុក្ខលំបាកផ្សេងៗ ចូរចាត់ទុកការនោះជាអំណរសុទ្ធសាធ ៣ ព្រោះអ្នករាល់គ្នាដឹងថា ការសាកល្បងជំនឿរបស់អ្នករាល់គ្នាយ៉ាងនេះ ធ្វើឲ្យចេះស៊ូទ្រាំ។ ៤ ក៏ប៉ុន្តែ ចូរឲ្យការស៊ូទ្រាំសម្រេចគោលបំណងរបស់វា ដើម្បីឲ្យអ្នករាល់គ្នាបានពេញលក្ខណៈ គ្មានគុណវិបត្ដិ ហើយឥតខ្វះគុណសម្បត្ដិណាមួយសោះឡើយ។
៥ ដូច្នេះ ប្រសិនបើក្នុងចំណោមអ្នករាល់គ្នា មានអ្នកណាម្នាក់ខ្វះប្រាជ្ញា ចូរឲ្យអ្នកនោះសុំព្រះម្ដងហើយម្ដងទៀតចុះ ព្រោះលោកឲ្យដោយចិត្តទូលាយដល់មនុស្សទាំងអស់ ហើយលោកមិនស្តីបន្ទោសឡើយ។ ធ្វើដូច្នេះ អ្នកនោះនឹងទទួលប្រាជ្ញាមែន។ ៦ ប៉ុន្តែចូរឲ្យអ្នកនោះបន្តសុំដោយមានជំនឿ ហើយដោយមិនសង្ស័យសោះ ព្រោះអ្នកដែលសង្ស័យគឺដូចរលកសមុទ្រដែលរំពើកចុះឡើងទៅតាមខ្យល់។ ៧ តាមពិត អ្នកនោះមិនគួរគិតថាខ្លួននឹងទទួលអ្វីពីព្រះយេហូវ៉ាឡើយ ៨ អ្នកនោះមានចិត្តពីរ ហើយក៏មិននឹងនរក្នុងគ្រប់ការទាំងអស់។
៩ ប៉ុន្តែចូរឲ្យបងប្អូនក្រីក្របានរីករាយដោយសារបានត្រូវលើកតម្កើង ១០ ហើយចូរឲ្យអ្នកមានបានរីករាយដោយសារបានត្រូវបន្ទាប ពីព្រោះអ្នកមាននឹងរោយទៅដូចផ្កានៅឯវាល។ ១១ ព្រោះថ្ងៃរះឡើងមានកម្ដៅក្ដៅក្រៃលែង ធ្វើឲ្យរុក្ខជាតិស្លោក ផ្កាវាក៏ជ្រុះ ហើយលម្អនៃរុក្ខជាតិនោះក៏បាត់សូន្យទៅ។ ដូចគ្នាដែរ របៀបរស់នៅរបស់អ្នកមាននឹងឱនថយហើយបាត់សូន្យទៅ។
១២ អ្នកណាដែលបន្តស៊ូទ្រាំនឹងទុក្ខលំបាក អ្នកនោះមានសុភមង្គល ពីព្រោះពេលដែលព្រះពេញចិត្តនឹងអ្នកនោះ អ្នកនោះនឹងទទួលមកុដជីវិត ដែលព្រះយេហូវ៉ាបានសន្យាឲ្យដល់ពួកអ្នកដែលរក្សាសេចក្ដីស្រឡាញ់ចំពោះលោក។ ១៣ ពេលដែលជួបទុក្ខលំបាក កុំឲ្យអ្នកណានិយាយថា៖ «ព្រះកំពុងល្បងលខ្ញុំ»។ ព្រោះគ្មានអ្នកណាអាចល្បងលព្រះដោយសេចក្ដីអាក្រក់ឡើយ ហើយព្រះក៏មិនល្បងលអ្នកណាដោយសេចក្ដីអាក្រក់ដែរ។ ១៤ ប៉ុន្តែមនុស្សទាំងអស់ត្រូវល្បងលដោយសេចក្ដីប៉ងប្រាថ្នារបស់ខ្លួនទាក់ទាញនិងល្បួងលួងលោម។ ១៥ រួចមក ពេលដែលសេចក្ដីប៉ងប្រាថ្នានោះចាប់មានគភ៌ នោះក៏សម្រាលចេញជាអំពើខុសឆ្គង* កាលណាអំពើខុសឆ្គងបានសម្រេចហើយ នោះនាំឲ្យស្លាប់។
១៦ បងប្អូនជាទីស្រឡាញ់អើយ កុំភាន់ច្រឡំឡើយ។ ១៧ ព្រោះគ្រប់ទាំងរបស់ល្អនិងអំណោយដ៏ល្អឥតខ្ចោះ សុទ្ធតែមកពីស្ថានលើ ព្រោះរបស់ទាំងនោះមកពីបិតានៃពន្លឺនានានៅលើមេឃ ហើយលោកមិនប្រែប្រួលដូចស្រមោលឡើយ។ ១៨ ដោយសារជាបំណងប្រាថ្នារបស់លោក នោះលោកបាននាំយើងមកដោយបណ្ដាំនៃសេចក្ដីពិត។ លោកធ្វើដូច្នេះ ដើម្បីឲ្យយើងធ្វើជាផលដំបូងនៃអ្វីដែលលោកបង្កើត។
១៩ បងប្អូនជាទីស្រឡាញ់អើយ ចូរដឹងថា មនុស្សម្នាក់ៗត្រូវរហ័សស្ដាប់ មិនរហ័សនិយាយ មិនរហ័សខឹង ២០ ព្រោះកំហឹងរបស់មនុស្សមិននាំឲ្យបានសេចក្ដីសុចរិតរបស់ព្រះទេ។ ២១ ដូច្នេះ ចូរលះចោលអ្វីៗទាំងអស់ដែលកខ្វក់ និងអ្វីដែលអសារឥតការ ពោលគឺសេចក្ដីអាក្រក់ ហើយចូរទទួលដោយចិត្តស្លូតបូតនូវការដាំបណ្ដាំរបស់ព្រះក្នុងអ្នករាល់គ្នា ជាបណ្ដាំដែលអាចសង្គ្រោះជីវិត* របស់អ្នករាល់គ្នា។
២២ ក៏ប៉ុន្តែ ចូរអ្នករាល់គ្នាក្លាយទៅជាអ្នកដែលប្រព្រឹត្តតាមបណ្ដាំរបស់ព្រះ មិនគ្រាន់តែជាអ្នកដែលឮបណ្ដាំរបស់ព្រះ ដោយបញ្ឆោតខ្លួនតាមការវែកញែកខុសនោះទេ។ ២៣ ព្រោះប្រសិនបើអ្នកណាជាអ្នកដែលឮបណ្ដាំរបស់ព្រះ តែមិនមែនជាអ្នកប្រព្រឹត្តតាមបណ្ដាំនោះ អ្នកនោះគឺដូចជាមនុស្សម្នាក់ដែលឆ្លុះមុខ* ក្នុងកញ្ចក់។ ២៤ ព្រោះគាត់ឆ្លុះមុខខ្លួនឯង រួចចេញទៅភ្លេចភ្លាមថា ខ្លួនគាត់ជាមនុស្សបែបណា។ ២៥ ប៉ុន្តែអ្នកដែលពិនិត្យមើលច្បាប់ល្អឥតខ្ចោះដែលនាំឲ្យមានសេរីភាព ហើយព្យាយាមធ្វើនោះជានិច្ច អ្នកនោះនឹងមានសុភមង្គលក្នុងការនោះ ពីព្រោះអ្នកនោះបានក្លាយទៅជាអ្នកដែលធ្វើការនោះ មិនមែនជាអ្នកដែលឮរួចភ្លេចទៅវិញទេ។
២៦ ប្រសិនបើអ្នកណាចាត់ទុកខ្លួនជាអ្នកគោរពប្រណិប័តន៍តាមរបៀបត្រឹមត្រូវ តែមិនទប់អណ្ដាតខ្លួន ប៉ុន្តែចេះតែបញ្ឆោតចិត្តខ្លួន នោះរបៀបដែលអ្នកនោះគោរពប្រណិប័តន៍គឺគ្មានប្រយោជន៍ទេ។ ២៧ តាមទស្សនៈរបស់លោកដែលជាព្រះនិងជាបិតារបស់យើង របៀបគោរពប្រណិប័តន៍ដែលស្អាតស្អំនិងឥតសៅហ្មងនោះគឺ៖ ថែរក្សាកូនកំព្រានិងស្ត្រីមេម៉ាយដែលកំពុងរងទុក្ខវេទនា ហើយរក្សាខ្លួនមិនឲ្យប្រឡូកប្រឡាក់នឹងពិភពលោកនេះ។
២ បងប្អូនខ្ញុំអើយ តើអ្នករាល់គ្នាកំពុងបង្ហាញជំនឿទៅលើលោកយេស៊ូគ្រិស្តជាម្ចាស់របស់យើង ដែលជាសិរីរុងរឿងរបស់យើង ហើយប្រព្រឹត្តទៅលើអ្នកឯទៀតដោយរើសមុខនៅដំណាលគ្នាឬ? ២ ព្រោះប្រសិនបើមានបុរសម្នាក់ចូលមកពេលដែលអ្នករាល់គ្នាប្រជុំ ហើយបុរសនោះពាក់ចិញ្ចៀនមាសនិងសម្លៀកបំពាក់ល្អប្រណីត រួចមានបុរសក្រីក្រម្នាក់ដែលមានសម្លៀកបំពាក់កខ្វក់ចូលមកដែរ ៣ តែអ្នករាល់គ្នាមើលទៅអ្នកដែលមានសម្លៀកបំពាក់ល្អប្រណីតដោយពេញចិត្ត ហើយនិយាយថា៖ «សូមអង្គុយកន្លែងល្អនេះ» រួចអ្នកនិយាយទៅអ្នកក្រីក្រនោះថា៖ «ចូរឈរតទៅទៀត»ឬ«ចូរអង្គុយទីនោះ នៅជិតកំណល់កល់ជើងខ្ញុំ» ៤ នោះអ្នករាល់គ្នាបែងចែកវណ្ណៈ ហើយបានក្លាយទៅជាចៅក្រមដែលកាត់ក្ដីដោយទុច្ចរិត មែនទេ?
៥ បងប្អូនជាទីស្រឡាញ់របស់ខ្ញុំអើយ សូមស្ដាប់។ ព្រះបានជ្រើសរើសអ្នកក្រក្នុងពិភពលោកនេះ ដើម្បីឲ្យធ្វើជាអ្នកមានខាងជំនឿ ហើយទទួលរាជាណាចក្រជាមត៌ក ជាអ្វីដែលលោកបានសន្យាដល់ពួកអ្នកដែលស្រឡាញ់លោក មែនទេ? ៦ ក៏ប៉ុន្តែអ្នករាល់គ្នាបានធ្វើឲ្យអ្នកក្រអាប់ឱនកិត្ដិយស។ ពួកអ្នកមានជិះជាន់អ្នករាល់គ្នា ហើយអូសអ្នករាល់គ្នាទៅតុលាការ មែនទេ? ៧ ពួកគេប្រមាថនាមល្អប្រសើរដែលអ្នករាល់គ្នាជាតំណាង មែនទេ? ៨ ឥឡូវ ប្រសិនបើអ្នករាល់គ្នាព្យាយាមប្រព្រឹត្តតាមច្បាប់របស់ស្តេចស្របតាមបទគម្ពីរដែលថា៖ «អ្នកត្រូវស្រឡាញ់អ្នកជិតខាងដូចស្រឡាញ់ខ្លួនអ្នក» នោះអ្នករាល់គ្នាកំពុងប្រព្រឹត្តល្អមែន។ ៩ ប៉ុន្តែប្រសិនបើអ្នករាល់គ្នាចេះតែរើសមុខ នោះអ្នករាល់គ្នាកំពុងប្រព្រឹត្តអំពើខុសឆ្គងហើយ ព្រោះច្បាប់នេះសឲ្យឃើញថាអ្នករាល់គ្នាជាអ្នករំលងច្បាប់។
១០ ព្រោះអ្នកណាដែលធ្វើតាមច្បាប់* ទាំងមូល តែបានល្មើសប្រការណាមួយ អ្នកនោះបានល្មើសច្បាប់ទាំងមូលហើយ។ ១១ ព្រោះលោកដែលមានប្រសាសន៍ថា៖ «អ្នកមិនត្រូវធ្វើឃាតកម្មឲ្យសោះ» ក៏បានមានប្រសាសន៍ដែរថា៖ «អ្នកមិនត្រូវផិតក្បត់ឲ្យសោះ»។ ឥឡូវ ប្រសិនបើអ្នករាល់គ្នាមិនផិតក្បត់ តែធ្វើឃាតកម្ម នោះអ្នករាល់គ្នាបានក្លាយទៅជាអ្នករំលងច្បាប់ហើយ។ ១២ ចូរបន្តនិយាយនិងប្រព្រឹត្តដូចអ្នកដែលនឹងត្រូវវិនិច្ឆ័យដោយផ្អែកលើច្បាប់របស់មនុស្សដែលមានសេរីភាព។ ១៣ ព្រោះអ្នកណាដែលមិនបង្ហាញសេចក្ដីមេត្ដាករុណា អ្នកនោះក៏នឹងត្រូវវិនិច្ឆ័យដោយគ្មានសេចក្ដីមេត្ដាករុណាដែរ។ សេចក្ដីមេត្ដាករុណាឈ្នះការវិនិច្ឆ័យ។
១៤ បងប្អូនខ្ញុំអើយ ប្រសិនបើអ្នកណាម្នាក់និយាយថាខ្លួនមានជំនឿ តែអ្នកនោះគ្មានការប្រព្រឹត្ត តើមានប្រយោជន៍អ្វី? ជំនឿរបស់អ្នកនោះមិនអាចសង្គ្រោះអ្នកនោះបានឡើយ មែនទេ? ១៥ ប្រសិនបើបងប្រុសឬបងស្រីណាម្នាក់គ្មានសម្លៀកបំពាក់ ឬអាហារគ្រប់គ្រាន់សម្រាប់ថ្ងៃនេះ ១៦ តែអ្នករាល់គ្នាណាម្នាក់និយាយទៅអ្នកនោះថា៖ «សូមអញ្ជើញទៅឲ្យបានសេចក្ដីសុខ ហើយសូមឲ្យខ្លួនប្រាណបានកក់ក្ដៅ និងឆ្អែតស្កប់ស្កល់ចុះ» ប៉ុន្តែអ្នករាល់គ្នាមិនឲ្យអ្វីដែលពួកគាត់ត្រូវការសម្រាប់រូបកាយ តើមានប្រយោជន៍អ្វី? ១៧ ដូចគ្នាដែរ ប្រសិនបើជំនឿគ្មានការប្រព្រឹត្ត ជំនឿនោះគឺស្លាប់ហើយ។
១៨ ទោះជាយ៉ាងនោះក៏ដោយ នឹងមានអ្នកណាម្នាក់និយាយថា៖ «អ្នកមានជំនឿ ហើយខ្ញុំមានការប្រព្រឹត្ត។ ចូរបង្ហាញជំនឿរបស់អ្នកឲ្យខ្ញុំឃើញដោយគ្មានការប្រព្រឹត្ត ហើយខ្ញុំនឹងបង្ហាញជំនឿរបស់ខ្ញុំឲ្យអ្នកឃើញ តាមរយៈការប្រព្រឹត្តរបស់ខ្ញុំ»។ ១៩ តើអ្នកជឿថាមានព្រះតែមួយឬ? នោះល្អហើយ។ តែពួកវិញ្ញាណកំណាច* ក៏ជឿហើយញ័ររន្ធត់។ ២០ មនុស្សគំនិតរាក់កំភែលអើយ តើអ្នកចង់ដឹងទេឬថា ជំនឿដែលគ្មានការប្រព្រឹត្ត នោះមិនបង្កើតផលឡើយ? ២១ អាប្រាហាំដែលជាឪពុករបស់យើង បានត្រូវប្រកាសថាជាមនុស្សសុចរិតដោយសារការប្រព្រឹត្ត បន្ទាប់ពីគាត់បានបូជាអ៊ីសាកជាកូនលើទីបូជា មែនទេ? ២២ អ្នករាល់គ្នាឃើញថា ជំនឿរបស់គាត់បានសហការជាមួយនឹងការប្រព្រឹត្តរបស់គាត់ ហើយជំនឿរបស់គាត់បានត្រូវធ្វើឲ្យល្អឥតខ្ចោះដោយសារការប្រព្រឹត្តរបស់គាត់ ២៣ ហើយបទគម្ពីរបានត្រូវសម្រេចដែលថា៖ «អាប្រាហាំបានជឿព្រះយេហូវ៉ា ហើយគាត់បានត្រូវចាត់ទុកថាជាមនុស្សសុចរិត» ហើយគាត់បានត្រូវហៅថា«សម្លាញ់របស់ព្រះយេហូវ៉ា»។
២៤ អ្នកឃើញថាមនុស្សម្នាក់នឹងត្រូវប្រកាសថាជាមនុស្សសុចរិតដោយសារការប្រព្រឹត្ត មិនគ្រាន់តែដោយសារជំនឿប៉ុណ្ណោះទេ។ ២៥ ដូចគ្នាដែរ រ៉ាហាបដែលជាស្រីពេស្យា បានត្រូវប្រកាសថាជាមនុស្សសុចរិតដោយសារការប្រព្រឹត្ត បន្ទាប់ពីនាងបានទទួលអ្នកនាំសារយ៉ាងរាក់ទាក់ រួចបានឲ្យពួកគេចេញទៅតាមផ្លូវផ្សេង មែនទេ? ២៦ ពិតមែនហើយ ជំនឿដែលគ្មានការប្រព្រឹត្តគឺស្លាប់ហើយ ដូចរូបកាយដែលគ្មានកម្លាំងជីវិត* ក៏ស្លាប់ដែរ។
៣ បងប្អូនខ្ញុំអើយ មិនគួរឲ្យអ្នករាល់គ្នាជាច្រើននាក់ធ្វើជាអ្នកបង្រៀនឡើយ ពីព្រោះអ្នករាល់គ្នាដឹងថាយើងនឹងទទួលការវិនិច្ឆ័យដ៏ម៉ឺងម៉ាត់ជាង។ ២ ព្រោះយើងទាំងអស់គ្នាជំពប់ដួល* ជាញឹកញយ។ ប្រសិនបើអ្នកណាមិនដែលជំពប់ដួលខាងពាក្យសម្ដី អ្នកនោះជាមនុស្សល្អឥតខ្ចោះ ហើយអាចកាន់កាប់រូបកាយទាំងមូលរបស់ខ្លួន។ ៣ ប្រសិនបើយើងដាក់បង្ហៀរនៅមាត់សេះដើម្បីធ្វើឲ្យវាស្ដាប់បង្គាប់យើង នោះយើងក៏កាន់កាប់រូបកាយទាំងមូលរបស់វាដែរ។ ៤ មើល! សំពៅក៏ដូច្នេះដែរ វាជារបស់ធំណាស់ ហើយក៏ត្រូវរុញច្រានដោយខ្យល់ដែលបក់បោកយ៉ាងខ្លាំង ប៉ុន្តែអ្នកបើកសំពៅធ្វើឲ្យវាទៅកន្លែងណាក៏បានតាមចិត្តគាត់ចង់ ដោយប្រើចង្កូតតូចមួយ។
៥ ដូចគ្នាដែរ អណ្ដាតជាសរីរាង្គដ៏តូចមួយ តែវាអួតខ្លាំងណាស់។ មើល! គ្រាន់តែអណ្ដាតភ្លើងដ៏តូចមួយធ្វើឲ្យព្រៃធំឆេះ! ៦ ឯអណ្ដាតជាភ្លើង។ អណ្ដាតជាសរីរាង្គរូបកាយយើង ដែលពេញទៅដោយភាពមិនសុចរិត ព្រោះវាធ្វើឲ្យរូបកាយទាំងមូលប្រឡាក់ ហើយអាចបំផ្លាញជីវិតរបស់មនុស្ស ហើយដូចជ្រលងភ្នំហ៊ីណុំ* វានាំឲ្យវិនាស។ ៧ ព្រោះសត្វព្រៃ សត្វស្លាប សត្វលូនវារ និងសត្វសមុទ្រគ្រប់ពូជអាចផ្សាំងបាន ក៏បានត្រូវមនុស្សជាតិផ្សាំងហើយដែរ។ ៨ តែអណ្ដាតវិញ គ្មានមនុស្សណាម្នាក់អាចផ្សាំងបានទេ។ វាជារបស់មួយដែលធ្វើឲ្យអន្តរាយ ក៏ពោរពេញទៅដោយពិសពុលដែលនាំឲ្យស្លាប់។ ៩ យើងប្រើអណ្ដាតដើម្បីសរសើរព្រះយេហូវ៉ា ដែលជាបិតារបស់យើង តែយើងក៏ប្រើអណ្ដាតដើម្បីដាក់បណ្ដាសាមនុស្សជាតិដែលកើតមក«មានភាពដូចព្រះ»។ ១០ មានសេចក្ដីសរសើរនិងបណ្ដាសាចេញពីមាត់តែមួយ។
បងប្អូនខ្ញុំអើយ មិនគួរឲ្យការនោះកើតឡើងដូច្នេះតទៅទៀតទេ។ ១១ ទឹកភ្លាវនិងទឹកសាបមិនផុសចេញពីរន្ធទឹកតែមួយទេ មែនទេ? ១២ បងប្អូនខ្ញុំអើយ ដើមល្វាតូចមិនអាចបង្កើតផលជាផ្លែអូលីវទេ ហើយវល្លិទំពាំងបាយជូរក៏មិនអាចបង្កើតផលជាផ្លែល្វាតូចដែរ មែនទេ? ហើយទឹកប្រៃនិងទឹកសាបក៏មិនអាចផុសចេញពីរន្ធទឹកតែមួយបានដែរ។
១៣ ក្នុងចំណោមអ្នករាល់គ្នា តើអ្នកណាមានប្រាជ្ញានិងការយល់ដឹង? អ្នកនោះត្រូវមានការប្រព្រឹត្តដ៏ល្អប្រសើរដែលបង្ហាញថាគាត់ធ្វើអ្វីៗទាំងអស់ដោយចិត្តស្លូតបូតដែលមកពីប្រាជ្ញា។ ១៤ ប៉ុន្តែប្រសិនបើអ្នករាល់គ្នាមានចិត្តច្រណែនជូរចត់និងមានចិត្តចង់បង្កទំនាស់ នោះកុំអួតអាងហើយកុហកទាស់នឹងសេចក្ដីពិត។ ១៥ ការនោះមិនមែនជាប្រាជ្ញាដែលមកពីស្ថានលើទេ តែជាប្រាជ្ញាដែលមកពីពិភពលោកនេះ ក៏ដូចតិរច្ឆាន និងដូចពួកវិញ្ញាណកំណាច។ ១៦ ព្រោះកន្លែងណាមានចិត្តច្រណែននិងចិត្តចង់បង្កទំនាស់ កន្លែងនោះមានភាពច្របូកច្របល់ ហើយមានអំពើអាក្រក់គ្រប់យ៉ាង។
១៧ ប៉ុន្តែប្រាជ្ញាពីស្ថានលើវិញ ដំបូងបង្អស់គឺបរិសុទ្ធ រួចធ្វើឲ្យមានសន្ដិភាព សមហេតុផល រង់ចាំធ្វើតាមបង្គាប់ ពោរពេញទៅដោយសេចក្ដីមេត្ដាករុណានិងផលល្អ មិនលម្អៀង* ហើយគ្មានពុតត្បុត។ ១៨ ម្យ៉ាងទៀត សេចក្ដីសុចរិតជាផលដែលត្រូវសាបព្រោះក្នុងស្ថានភាពដែលមានសន្ដិភាព ដើម្បីជាប្រយោជន៍ដល់ពួកអ្នកដែលធ្វើឲ្យមានសន្ដិភាព។
៤ តើអ្វីបណ្ដាលឲ្យឈ្លោះប្រកែកនិងកើតមានវិវាទក្នុងចំណោមអ្នករាល់គ្នា? ការទាំងនោះបណ្ដាលមកពីអ្នករាល់គ្នាមានតណ្ហាដែលមិនចេះឆ្អែតឆ្អន់ ជាតណ្ហាដែលកំពុងប្រយុទ្ធក្នុងរូបកាយអ្នករាល់គ្នា មែនទេ? ២ អ្នករាល់គ្នាចង់បាន តែមិនបានទទួលទេ។ អ្នករាល់គ្នាចេះតែសម្លាប់និងប៉ងប្រាថ្នាចង់បានរបស់អ្នកឯទៀត តែមិនអាចទទួលបានទេ។ អ្នករាល់គ្នាចេះតែកើតវិវាទនឹងគ្នា ហើយឈ្លោះប្រកែកគ្នា។ អ្នករាល់គ្នាមិនបានទទួលដោយសារមិនបានសុំ។ ៣ ពេលដែលអ្នករាល់គ្នាសុំ នោះមិនបានទទួលទេ ពីព្រោះអ្នករាល់គ្នាសុំដោយមានបំណងអាក្រក់ ពោលគឺ ចង់សុំអ្វីដែលចម្អែតតណ្ហារបស់អ្នករាល់គ្នា។
៤ មនុស្សផិតក្បត់អើយ តើអ្នករាល់គ្នាមិនដឹងទេឬថា ការធ្វើជាមិត្តរបស់ពិភពលោកនេះ មានន័យថាធ្វើជាសត្រូវរបស់ព្រះ? ដូច្នេះ អ្នកណាដែលចង់ធ្វើជាមិត្តរបស់ពិភពលោកនេះ អ្នកនោះតាំងខ្លួនជាសត្រូវរបស់ព្រះហើយ។ ៥ ឬតើអ្នករាល់គ្នាគិតថាបទគម្ពីរចែងឥតប្រយោជន៍ថា៖ «ដោយសារយើងមានភាពទោរទន់ទៅរកការច្រណែន នោះយើងតែងតែប៉ងប្រាថ្នាចង់បានអ្វីផ្សេងៗ»? ៦ ក៏ប៉ុន្តែគុណដ៏វិសេសលើសលប់ដែលព្រះផ្ដល់ឲ្យ គឺខ្លាំងជាង។ ដូច្នេះ បទគម្ពីរចែងថា៖ «ព្រះប្រឆាំងមនុស្សក្រអឺតក្រទម តែលោកផ្ដល់គុណដ៏វិសេសលើសលប់ដល់មនុស្សដែលមានចិត្តរាបទាប»។
៧ ហេតុនេះ ចូរចុះចូលនឹងព្រះ តែចូរតស៊ូនឹងមេកំណាច* រួចវានឹងរត់ចេញពីអ្នករាល់គ្នា។ ៨ ចូរចូលទៅជិតព្រះ ហើយលោកនឹងចូលមកជិតអ្នករាល់គ្នាដែរ។ ពួកអ្នកប្រព្រឹត្តអំពើខុសឆ្គងអើយ ចូរសម្អាតដៃអ្នករាល់គ្នា ហើយពួកអ្នកដែលមានចិត្តពីរអើយ ចូរសម្អាតចិត្តអ្នករាល់គ្នា។ ៩ ចូរកើតទុក្ខ ហើយយំសោកចុះ។ ចូរឲ្យសំណើចរបស់អ្នករាល់គ្នាក្លាយទៅជាការយំសោក ហើយអំណរក្លាយទៅជាការព្រួយចិត្តវិញ។ ១០ ចូរបន្ទាបខ្លួននៅចំពោះមុខព្រះយេហូវ៉ាចុះ ហើយលោកនឹងតម្កើងអ្នករាល់គ្នា។
១១ បងប្អូនអើយ ឈប់និយាយអាក្រក់ពីគ្នាទៅវិញទៅមក។ អ្នកណាដែលនិយាយអាក្រក់អំពីបងប្អូនឬវិនិច្ឆ័យបងប្អូន អ្នកនោះនិយាយអាក្រក់អំពីច្បាប់ ហើយវិនិច្ឆ័យច្បាប់។ ឥឡូវ ប្រសិនបើអ្នកវិនិច្ឆ័យច្បាប់ អ្នកមិនមែនជាអ្នកប្រព្រឹត្តតាមច្បាប់ទេ តែជាចៅក្រមវិញ។ ១២ លោកដែលបង្កើតច្បាប់និងជាចៅក្រមមានតែមួយទេ គឺលោកដែលអាចសង្គ្រោះនិងអាចបំផ្លាញ។ ប៉ុន្តែអ្នកវិញ តើអ្នកជាអ្នកណាបានជាវិនិច្ឆ័យអ្នកជិតខាងរបស់ខ្លួន?
១៣ ឯអ្នករាល់គ្នាដែលនិយាយថា៖ «ថ្ងៃនេះឬថ្ងៃស្អែក យើងនឹងទៅក្រុងនេះឬក្រុងនោះ រួចស្នាក់នៅទីនោះមួយឆ្នាំ ហើយរកស៊ីបានចំណេញ» សូមគិតទៅមើល ១៤ អ្នករាល់គ្នាមិនដឹងថាជីវិតរបស់អ្នករាល់គ្នានឹងទៅជាយ៉ាងណាទេនៅថ្ងៃស្អែក។ ព្រោះអ្នករាល់គ្នាជាអ័ព្ទដែលនៅតែមួយរយៈពេលខ្លី រួចបាត់ទៅ។ ១៥ ផ្ទុយទៅវិញ អ្នករាល់គ្នាគួរនិយាយថា៖ «ប្រសិនបើជាបំណងប្រាថ្នារបស់ព្រះយេហូវ៉ា យើងនឹងរស់ ហើយធ្វើការនេះឬការនោះ»។ ១៦ ប៉ុន្តែឥឡូវនេះអ្នករាល់គ្នាមានមោទនភាពដោយសារការអួតអាងរបស់អ្នករាល់គ្នា។ មោទនភាពទាំងអស់បែបនេះគឺទុច្ចរិត។ ១៧ ដូច្នេះ ប្រសិនបើអ្នកណាចេះធ្វើអ្វីដែលត្រឹមត្រូវ តែបែរជាមិនធ្វើទៅវិញ នោះជាការខុសឆ្គងហើយ។
៥ ឯអ្នករាល់គ្នាជាអ្នកមាន ចូរស្រែកយំដោយសារទុក្ខលំបាកដែលនឹងកើតឡើងដល់អ្នករាល់គ្នា។ ២ ទ្រព្យរបស់អ្នករាល់គ្នាបានរលួយហើយ សត្វល្អិតបានស៊ីបំផ្លាញសម្លៀកបំពាក់ក្រៅរបស់អ្នករាល់គ្នា។ ៣ មាសនិងប្រាក់របស់អ្នករាល់គ្នាបានត្រូវច្រែះស៊ីធ្លុះអស់ហើយ ឯច្រែះនោះនឹងធ្វើជាសាក្សីប្រឆាំងអ្នករាល់គ្នា ហើយនឹងស៊ីសាច់អ្នករាល់គ្នា។ អ្វីដែលអ្នករាល់គ្នាបានប្រមូលទុកសម្រាប់គ្រាចុងក្រោយបង្អស់ គឺជាអ្វីដែលដូចភ្លើង។ ៤ មើល! ប្រាក់ឈ្នួលដែលអ្នកមិនបើកឲ្យកម្មករដែលបានប្រមូលផលពីស្រែចម្ការរបស់អ្នករាល់គ្នា ចេះតែស្រែកឡើង ហើយព្រះយេហូវ៉ានៃបណ្ដាកងទ័ពស្ថានសួគ៌បានឮពួកអ្នកច្រូតកាត់ស្រែកសុំជំនួយ។ ៥ អ្នករាល់គ្នាបានរស់នៅផែនដីយ៉ាងសម្បូណ៌សប្បាយ ហើយបានបណ្ដែតបណ្ដោយទៅតាមតណ្ហារបស់ខ្លួន។ ចិត្តរបស់អ្នករាល់គ្នាគឺប្រៀបដូចជាសត្វដែលគេបំប៉នឲ្យធំធាត់ រហូតដល់ថ្ងៃគេសម្លាប់។ ៦ អ្នករាល់គ្នាបានផ្ដន្ទាទោសនិងធ្វើឃាតអ្នកសុចរិត។ អ្នកនោះកំពុងប្រឆាំងអ្នករាល់គ្នា មែនទេ?
៧ ដូច្នេះ បងប្អូនអើយ ចូរមានចិត្តអត់ធ្មត់រហូតដល់លោកម្ចាស់មានវត្តមាន។ មើល! កសិករមានចិត្តអត់ធ្មត់កាលដែលរង់ចាំភោគផលវិសេសពីផែនដី រហូតដល់រដូវភ្លៀងដើមឆ្នាំនិងរដូវភ្លៀងចុងឆ្នាំមកដល់។* ៨ ចូរអ្នករាល់គ្នាមានចិត្តអត់ធ្មត់ដែរ ហើយតាំងចិត្តរឹងមាំ ពីព្រោះគ្រានៃវត្តមានរបស់លោកម្ចាស់គឺជិតដល់ហើយ។
៩ បងប្អូនអើយ កុំថ្ងូរដាក់គ្នាទៅវិញទៅមកឡើយ ដើម្បីកុំឲ្យអ្នករាល់គ្នាទទួលការវិនិច្ឆ័យ។ មើល! ចៅក្រមកំពុងឈរនៅមាត់ទ្វារហើយ។ ១០ បងប្អូនអើយ ចូរទុកពួកអ្នកប្រកាសទំនាយដែលបាននិយាយតាងនាមព្រះយេហូវ៉ា ជាគំរូពីការរងសេចក្ដីអាក្រក់និងការបង្ហាញចិត្តអត់ធ្មត់។ ១១ មើល! យើងចាត់ទុកពួកអ្នកដែលបានស៊ូទ្រាំថាជាអ្នកមានសុភមង្គល។ អ្នករាល់គ្នាធ្លាប់ឮអំពីការស៊ូទ្រាំរបស់យ៉ូប ក៏ដឹងអំពីពរដែលព្រះយេហូវ៉ាបានផ្ដល់ឲ្យ ហើយតាមរយៈការនោះអ្នកឃើញថាព្រះយេហូវ៉ាមានមនោសញ្ចេតនាដ៏ជ្រាលជ្រៅ ហើយក៏ពេញទៅដោយសេចក្ដីមេត្ដាករុណា។
១២ តែបងប្អូនខ្ញុំអើយ ជាពិសេស ឈប់ស្បថ ទោះជាស្បថដោយយកស្ថានសួគ៌ ផែនដី ឬអ្វីផ្សេងទៀតជាសាក្សីក្ដី។ ប៉ុន្តែចូររក្សាសម្ដី បើថា«មែន» គឺមែន បើថា«ទេ» គឺទេ ដើម្បីកុំឲ្យអ្នករាល់គ្នាទទួលការវិនិច្ឆ័យ។
១៣ ក្នុងចំណោមអ្នករាល់គ្នា តើមានអ្នកណាកំពុងរងនូវសេចក្ដីអាក្រក់ទេ? ចូរឲ្យអ្នកនោះបន្តអធិដ្ឋាន។ តើអ្នកណាមានអារម្មណ៍ល្អទេ? ចូរឲ្យអ្នកនោះច្រៀងទំនុកតម្កើង។ ១៤ តើមានអ្នកណាឈឺក្នុងចំណោមអ្នករាល់គ្នាទេ? ចូរឲ្យអ្នកនោះហៅបុរសចាស់ទុំក្នុងក្រុមជំនុំមក ហើយឲ្យពួកគាត់អធិដ្ឋានឲ្យអ្នកនោះ ដោយលាបប្រេងក្នុងនាមព្រះយេហូវ៉ា។ ១៥ រួចសេចក្ដីអធិដ្ឋានដែលបានត្រូវពោលដោយជំនឿនឹងធ្វើឲ្យអ្នកដែលមិនស្រួលខ្លួនបានជាសះស្បើយ ហើយព្រះយេហូវ៉ានឹងធ្វើឲ្យអ្នកនោះមានសុខភាពល្អឡើងវិញ។ ម្យ៉ាងទៀត ប្រសិនបើអ្នកនោះបានប្រព្រឹត្តអំពើខុសឆ្គង អ្នកនោះនឹងទទួលការអភ័យទោស។
១៦ ដូច្នេះ ចូរសារភាពការខុសឆ្គងរបស់ខ្លួនដោយចំហចំពោះគ្នាទៅវិញទៅមក ហើយអធិដ្ឋានឲ្យគ្នាទៅវិញទៅមក ដើម្បីឲ្យអ្នករាល់គ្នាបានជាសះស្បើយ។ សេចក្ដីអធិដ្ឋានអង្វររបស់មនុស្សសុចរិតមានប្រសិទ្ធភាពខ្លាំងណាស់ ពេលដែលសេចក្ដីអធិដ្ឋាននោះទទួលចម្លើយ។ ១៧ អេលីយ៉ាចេះមានអារម្មណ៍ដូចយើងដែរ តែគាត់អធិដ្ឋានអស់ពីចិត្តសូមកុំឲ្យភ្លៀងធ្លាក់មក រួចគ្មានភ្លៀងធ្លាក់មកលើស្រុកនោះអស់បីឆ្នាំប្រាំមួយខែ។ ១៨ ហើយគាត់អធិដ្ឋានម្ដងទៀត មេឃក៏បង្អុរភ្លៀងមក ហើយដីបង្កើតភោគផល។
១៩ បងប្អូនខ្ញុំអើយ ប្រសិនបើអ្នករាល់គ្នាណាម្នាក់ត្រូវបង្វែរចេញពីសេចក្ដីពិត ហើយអ្នកណាម្នាក់ទៀតជួយនាំអ្នកនោះមកវិញ ២០ ចូរដឹងថា អ្នកណាដែលជួយនាំអ្នកប្រព្រឹត្តអំពើខុសឆ្គងមកពីផ្លូវអាក្រក់វិញ អ្នកនោះនឹងសង្គ្រោះជីវិត* អ្នកប្រព្រឹត្តអំពើខុសឆ្គងឲ្យរួចពីសេចក្ដីស្លាប់ ហើយគ្របបាំងអំពើខុសឆ្គងជាច្រើន។
[កំណត់សម្គាល់]
មើលសេចក្ដីពន្យល់បន្ថែមផ្នែកទី៤
មើលកំណត់សម្គាល់រ៉ូម ៥:១២
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
ន័យត្រង់«មុខរបស់គាត់ពីកំណើត»
មើលកំណត់សម្គាល់ម៉ាថ ៥:១៧
ភាសាក្រិច«ដាយម៉ូនីអន»។ សំដៅទៅពួកទេវតាអាក្រក់
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់ម៉ាថ ៥:២៩
ភាសាក្រិច«ហ្គេហេណា»។ សំដៅទៅកន្លែងដុតសំរាមខាងក្រៅក្រុងយេរូសាឡិម។ មើលសេចក្ដីពន្យល់បន្ថែមផ្នែកទី៨
ឬ«មិនរើសមុខ»
ភាសាក្រិច«ឌីអាបូឡូស»។ មានន័យថា«អ្នកបង្កាច់បង្ខូច»
រដូវភ្លៀងដើមឆ្នាំចាប់ផ្ដើមពាក់កណ្ដាលខែតុលា។ រដូវភ្លៀងចុងឆ្នាំចាប់ផ្ដើមពាក់កណ្ដាលខែមេសា។ មើលសេចក្ដីពន្យល់បន្ថែមផ្នែកទី១១
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក