សំបុត្រទីមួយរបស់ពេត្រុស
១ ពីខ្ញុំ ពេត្រុស ដែលជាសាវ័ក* របស់លោកយេស៊ូគ្រិស្ត* ជូនចំពោះពួកអ្នកស្នាក់នៅបណ្ដោះអាសន្នដែលនៅបែកខ្ញែកនាតំបន់ប៉ុនតុស ខេត្តកាឡាទី តំបន់កាប៉ាដូគា តំបន់អាស៊ី* និងខេត្តប៊ីធូនា ពោលគឺពួកអ្នកដែលបានត្រូវជ្រើសរើស ២ សមស្របតាមអ្វីដែលព្រះជាបិតាបានជ្រាបទុកជាមុន ហើយដែលជាអ្នកបានត្រូវញែកចេញជាបរិសុទ្ធតាមរយៈសកម្មពល* របស់លោក ដើម្បីឲ្យអ្នករាល់គ្នាស្ដាប់បង្គាប់ ហើយទទួលការប្រោះដោយឈាមរបស់លោកយេស៊ូគ្រិស្ត៖
សូមឲ្យអ្នករាល់គ្នាបានប្រកបដោយគុណដ៏វិសេសលើសលប់កាន់តែបរិបូរឡើង។
៣ សូមសរសើរលោកដែលជាព្រះនិងជាបិតារបស់លោកយេស៊ូគ្រិស្តជាម្ចាស់របស់យើង ព្រោះដោយសេចក្ដីមេត្ដាករុណាដ៏ជ្រាលជ្រៅរបស់លោក លោកបានធ្វើឲ្យយើងកើតជាថ្មី ដើម្បីឲ្យមានសេចក្ដីសង្ឃឹមដែលស្ថិតស្ថេរ តាមរយៈការប្រោសលោកយេស៊ូគ្រិស្តឲ្យរស់ពីស្លាប់ឡើងវិញ ៤ ព្រមទាំងទទួលមត៌កដែលមិនអាចខូចទៅ ដែលឥតសៅហ្មង ហើយដែលស្ថិតស្ថេរជានិរន្តរ៍។ មត៌កនោះបានត្រូវបម្រុងទុកនៅស្ថានសួគ៌សម្រាប់អ្នករាល់គ្នា ៥ ដែលកំពុងទទួលការរក្សាការពារដោយឫទ្ធានុភាពរបស់ព្រះ តាមរយៈជំនឿ ដើម្បីទទួលសេចក្ដីសង្គ្រោះដែលនឹងត្រូវបើកបង្ហាញឲ្យឃើញនៅគ្រាចុងក្រោយ។ ៦ ដោយសារការទាំងនោះ អ្នករាល់គ្នាកំពុងត្រេកអរយ៉ាងខ្លាំង ទោះបីជាអ្នករាល់គ្នាត្រូវតែព្រួយចិត្ត ដោយសារទុក្ខលំបាកផ្សេងៗនៅគ្រាឥឡូវនេះក្ដី ៧ យ៉ាងនេះ ជំនឿរបស់អ្នករាល់គ្នាដែលបានត្រូវសាកល្បង ហើយមានតម្លៃថ្លៃជាងមាសដែលវិនាសទៅ ទោះជាវាបានត្រូវសាកល្បងដោយភ្លើងក៏ដោយ ជាហេតុឲ្យទទួលសេចក្ដីសរសើរ សិរីរុងរឿង និងកិត្ដិយសពេលដែលលោកយេស៊ូគ្រិស្តនឹងត្រូវសម្ដែង។ ៨ ទោះជាអ្នករាល់គ្នាមិនដែលឃើញលោកក៏ដោយ ក៏អ្នករាល់គ្នាស្រឡាញ់លោក។ ទោះជាឥឡូវនេះអ្នករាល់គ្នាមិនឃើញលោកក៏ដោយ ក៏អ្នករាល់គ្នាបង្ហាញជំនឿលើលោក ហើយកំពុងត្រេកអរយ៉ាងខ្លាំង ដោយមានអំណររកពណ៌នាពុំបាន ៩ ពេលដែលអ្នករាល់គ្នាទទួលលទ្ធផលពីជំនឿរបស់អ្នករាល់គ្នា ពោលគឺជីវិតរបស់អ្នករាល់គ្នានឹងត្រូវសង្គ្រោះ។
១០ ពួកអ្នកប្រកាសទំនាយដែលបានប្រកាសអំពីគុណដ៏វិសេសលើលលប់ដែលទុកសម្រាប់អ្នករាល់គ្នា បានព្យាយាមសួរឲ្យដឹង ហើយបានស្រាវជ្រាវយ៉ាងហ្មត់ចត់អំពីសេចក្ដីសង្គ្រោះនោះឯង។ ១១ ពួកគេបានខំស្វែងរកយល់ជានិច្ចថា សកម្មពលដែលស្ថិតក្នុងពួកគេកំពុងសំដៅទៅគ្រាមួយណា ឬគ្រាបែបណាស្តីអំពីគ្រិស្ត។ សកម្មពលនោះបញ្ជាក់ទុកជាមុនអំពីទុក្ខលំបាកដែលគ្រិស្តនឹងត្រូវរង និងសេចក្ដីរុងរឿងដែលនឹងមានបន្ទាប់ពីនោះ។ ១២ សកម្មពលនោះបានបើកបង្ហាញឲ្យពួកគេដឹងថា ការទាំងនោះមិនមែនសម្រាប់ពួកគេនោះទេ តែពួកគេកំពុងបម្រើអ្នករាល់គ្នា ដោយផ្ដល់អ្វីដែលបានត្រូវប្រាប់ដល់អ្នករាល់គ្នាតាមរយៈពួកអ្នកដែលប្រកាសប្រាប់ដំណឹងល្អដល់អ្នករាល់គ្នា ដោយសកម្មពលបរិសុទ្ធដែលបានត្រូវចាត់ពីស្ថានសួគ៌។ បណ្ដាទេវតាប៉ងប្រាថ្នាពិនិត្យមើលការនោះឯង។
១៣ ដូច្នេះ ចូរអ្នករាល់គ្នាប្រុងប្រៀបគំនិត* ដើម្បីធ្វើសកម្មភាព ចូរដឹងខ្លួនក្នុងគ្រប់ការទាំងអស់ ចូរសង្ឃឹមលើគុណដ៏វិសេសលើសលប់ដែលអ្នករាល់គ្នានឹងទទួលពេលដែលលោកយេស៊ូគ្រិស្តនឹងត្រូវសម្ដែង។ ១៤ ក្នុងនាមជាកូនដែលស្ដាប់បង្គាប់ ចូរឈប់បណ្ដោយខ្លួនតាមសេចក្ដីប៉ងប្រាថ្នាដែលអ្នករាល់គ្នាធ្លាប់មានកាលនៅល្ងង់នៅឡើយ ១៥ ប៉ុន្តែចូរក្លាយទៅជាមនុស្សបរិសុទ្ធក្នុងការប្រព្រឹត្តទាំងអស់ ដូចព្រះដ៏បរិសុទ្ធដែលបានហៅអ្នករាល់គ្នា ១៦ ពីព្រោះបទគម្ពីរចែងថា៖ «អ្នករាល់គ្នាត្រូវតែបរិសុទ្ធ ពីព្រោះខ្ញុំបរិសុទ្ធ»។
១៧ ម្យ៉ាងទៀត ប្រសិនបើអ្នករាល់គ្នាកំពុងហៅរកបិតាដែលវិនិច្ឆ័យមនុស្សសមស្របតាមការប្រព្រឹត្តរបស់ពួកគេរៀងខ្លួនដោយឥតលម្អៀង នោះចូរប្រព្រឹត្តដោយកោតខ្លាចក្នុងអំឡុងពេលដែលអ្នករាល់គ្នាស្នាក់នៅជាបណ្ដោះអាសន្ន។ ១៨ ព្រោះអ្នករាល់គ្នាដឹងថា ពេលដែលអ្នករាល់គ្នាទទួលការរំដោះពីការប្រព្រឹត្តឥតប្រយោជន៍របស់ខ្លួន ដែលអ្នករាល់គ្នាបានទទួលពីពួកបុព្វបុរសមក នោះមិនមែនដោយសាររបស់ដែលអាចខូចទៅ ដូចមាសឬប្រាក់នោះទេ។ ១៩ ប៉ុន្តែគឺដោយសារឈាមដ៏ថ្លៃវិសេស ដូចឈាមរបស់ចៀមដែលគ្មានស្នាម គ្មានប្រឡាក់ ពោលគឺឈាមរបស់គ្រិស្ត។ ២០ ពិតមែនតែព្រះបានជ្រើសរើសលោកមុនកំណើតពិភពលោក ប៉ុន្តែលោកបានត្រូវសម្ដែងឲ្យឃើញនៅចុងបញ្ចប់នៃគ្រានេះ ដើម្បីជាប្រយោជន៍ដល់អ្នករាល់គ្នា ២១ ដែលជឿព្រះដោយសារលោក គឺព្រះដែលបានប្រោសលោកឲ្យរស់ពីស្លាប់ឡើងវិញ ហើយបានឲ្យសិរីរុងរឿងដល់លោក ដើម្បីឲ្យអ្នករាល់គ្នាជឿនិងសង្ឃឹមលើព្រះ។
២២ ឥឡូវនេះ អ្នករាល់គ្នាបានសម្អាតខ្លួន* ដោយស្ដាប់បង្គាប់សេចក្ដីពិត ហើយជាលទ្ធផលអ្នករាល់គ្នាស្រឡាញ់គ្នាជាបងប្អូនដោយគ្មានពុតត្បុត នោះចូរស្រឡាញ់គ្នាឲ្យខ្លាំងដោយស្មោះពីចិត្ត។ ២៣ ព្រោះអ្នករាល់គ្នាបានត្រូវធ្វើឲ្យកើតជាថ្មី មិនមែនដោយពូជដែលអាចខូចទៅនោះទេ តែដោយពូជដែលមិនអាចខូច តាមរយៈបណ្ដាំរបស់ព្រះដែលមានជីវិតរស់នៅជានិរន្តរ៍។ ២៤ ព្រោះ«មនុស្សទាំងអស់គឺដូចជាស្មៅ ហើយភាពរុងរឿងទាំងអស់របស់ពួកគេគឺដូចជាផ្កាស្មៅ។ ស្មៅនោះក្រៀមស្វិត ហើយផ្កាក៏រុះរោយទៅ ២៥ ប៉ុន្តែប្រសាសន៍របស់ព្រះយេហូវ៉ាស្ថិតស្ថេរជារៀងរហូត»។ គឺ«ប្រសាសន៍»នេះឯងដែលបានត្រូវប្រកាសប្រាប់ដល់អ្នករាល់គ្នាជាដំណឹងល្អ។
២ ដូច្នេះ ចូរលះចោលអស់ទាំងការអាក្រក់ និងអស់ទាំងការបោកបញ្ឆោត ពុតត្បុត ចិត្តច្រណែន និងការតិះដៀលគ្រប់យ៉ាង ២ ហើយដូចទារកដែលទើបនឹងកើត ចូរបណ្ដុះឲ្យមានការស្រេកឃ្លានចង់បានទឹកដោះសុទ្ធដែលមកពីបណ្ដាំរបស់ព្រះ ដើម្បីឲ្យអ្នករាល់គ្នាធំលូតលាស់ឲ្យបានសេចក្ដីសង្គ្រោះតាមរយៈទឹកដោះនោះ ៣ ព្រោះអ្នករាល់គ្នាបានភ្លក់សេចក្ដីសប្បុរសរបស់លោកម្ចាស់ហើយ។
៤ ដោយអ្នករាល់គ្នាមកឯលោក ដូចមកឯថ្មដែលមានជីវិតរស់នៅ ពិតមែនតែមនុស្សមិនព្រមយក ប៉ុន្តែព្រះជ្រើសរើសហើយចាត់ទុកថាថ្លៃវិសេស ៥ អ្នករាល់គ្នាជាថ្មដែលមានជីវិតរស់នៅដែរ ហើយកំពុងត្រូវសង់ឡើងជាផ្ទះមួយតាមរយៈសកម្មពល* របស់ព្រះ ដើម្បីធ្វើជាពួកសង្ឃបរិសុទ្ធដើម្បីជូនគ្រឿងបូជាដែលព្រះពេញចិត្ត ក្រោមការដឹកនាំនៃសកម្មពលរបស់លោក តាមរយៈលោកយេស៊ូគ្រិស្ត។ ៦ ព្រោះបទគម្ពីរចែងថា៖ «មើល! នៅស៊ីយ៉ូនខ្ញុំនឹងដាក់ថ្មមួយ ជាថ្មគ្រឹះសំខាន់ជាងគេ ជាថ្មដែលបានត្រូវជ្រើសរើស ហើយថ្លៃវិសេស។ អស់អ្នកណាដែលបង្ហាញជំនឿលើថ្មនោះ នឹងមិនខកចិត្តឡើយ»។
៧ ដូច្នេះ គឺអ្នករាល់គ្នាដែលចាត់ទុកថាលោកថ្លៃវិសេស ពីព្រោះអ្នករាល់គ្នាជាអ្នកជឿ ប៉ុន្តែចំពោះអ្នកមិនជឿវិញ «ថ្មនោះឯងដែលអ្នកសាងសង់មិនព្រមយក បានទៅជាថ្មនៅលើគេបំផុតនៅជ្រុងជញ្ជាំង»* ៨ ហើយជា«ថ្មមួយដែលនាំឲ្យជំពប់ជើងដួល និងផ្ទាំងថ្មមួយដែលនាំឲ្យប្រព្រឹត្តល្មើស»។ អ្នកទាំងនោះជំពប់ដួល* ពីព្រោះពួកគេមិនធ្វើតាមបណ្ដាំរបស់ព្រះ។ ពួកគេបានត្រូវកំណត់ឲ្យធ្វើដូច្នេះ។ ៩ ប៉ុន្តែអ្នករាល់គ្នាជា«ពូជសាសន៍ដែលបានត្រូវជ្រើសរើស និងជាសង្ឃដែលមានតំណែងជាស្តេច ក៏ជាជនជាតិបរិសុទ្ធ និងរាស្ត្រដែលជាសម្បត្ដិពិសេស ដើម្បីឲ្យអ្នករាល់គ្នាប្រកាសនៅទីជិតឆ្ងាយអំពីគុណសម្បត្ដិប្រសើរថ្លៃថ្លា»របស់លោកដែលបានហៅអ្នករាល់គ្នាចេញពីសេចក្ដីងងឹតឲ្យចូលក្នុងពន្លឺដ៏អស្ចារ្យរបស់លោក។ ១០ ព្រោះពីមុន អ្នករាល់គ្នាមិនមែនជារាស្ត្ររបស់ព្រះទេ ប៉ុន្តែឥឡូវនេះអ្នករាល់គ្នាជារាស្ត្ររបស់ព្រះ។ ពីមុនអ្នករាល់គ្នាធ្លាប់ជាអ្នកដែលមិនទទួលសេចក្ដីមេត្ដាករុណា ប៉ុន្តែឥឡូវអ្នករាល់គ្នាជាអ្នកដែលបានទទួលសេចក្ដីមេត្ដាករុណាហើយ។
១១ បងប្អូនជាទីស្រឡាញ់អើយ ខ្ញុំសូមបំផុសទឹកចិត្តអ្នករាល់គ្នាដែលជាជនបរទេសនិងអ្នកស្នាក់នៅបណ្ដោះអាសន្នក្នុងពិភពលោកនេះ កុំឲ្យបណ្ដោយខ្លួនតាមសេចក្ដីប៉ងប្រាថ្នានៃរូបកាយ ជាសេចក្ដីប៉ងប្រាថ្នាដែលចេះតែប្រយុទ្ធប្រឆាំងនឹងអ្នករាល់គ្នា។* ១២ ចូរប្រព្រឹត្តល្អប្រសើរជានិច្ចក្នុងចំណោមមនុស្សខាងពិភពលោកនេះ។ យ៉ាងនោះ ទោះជាពួកគេចោទប្រកាន់អ្នករាល់គ្នាថាជាអ្នកប្រព្រឹត្តអាក្រក់ក៏ដោយ ក៏ពួកគេនឹងបែរជាសរសើរព្រះនៅថ្ងៃដែលលោកធ្វើការត្រួតពិនិត្យ ដោយសារពួកគេជាសាក្សីអំពីការប្រព្រឹត្តដ៏ល្អប្រសើររបស់អ្នករាល់គ្នា។
១៣ ដើម្បីលោកម្ចាស់ ចូរចុះចូលនឹងស្ថាប័នទាំងអស់ដែលមនុស្សបានបង្កើត៖ ទោះបីជាចុះចូលនឹងស្តេច ជាអ្នកមានឋានៈខ្ពស់ជាងខ្លួន ១៤ ឬអភិបាលដែលស្តេចចាត់ឲ្យដាក់ទោសមនុស្សដែលប្រព្រឹត្តអាក្រក់ តែឲ្យសរសើរមនុស្សដែលប្រព្រឹត្តល្អ។ ១៥ ព្រោះនេះជាបំណងប្រាថ្នារបស់ព្រះ គឺឲ្យអ្នករាល់គ្នាប្រព្រឹត្តល្អ ដើម្បីឃ្លុំមាត់មនុស្សឥតសមហេតុផលដែលនិយាយបែបល្ងង់ខ្លៅ។ ១៦ ចូររស់នៅជាមនុស្សមានសេរីភាព តែកុំប្រើសេរីភាពរបស់អ្នករាល់គ្នាជាវិធីបិទបាំងអំពើអាក្រក់ឡើយ តែចូរប្រើសេរីភាពនោះឲ្យសមនឹងឋានៈជាខ្ញុំបម្រើរបស់ព្រះ។ ១៧ ចូរគោរពមនុស្សគ្រប់ប្រភេទ ចូរស្រឡាញ់បងប្អូនរួមជំនឿទាំងអស់គ្នា ចូរកោតខ្លាចព្រះ ចូរគោរពស្តេច។
១៨ ចូរឲ្យអ្នកបម្រើក្នុងផ្ទះចុះចូលនឹងម្ចាស់ខ្លួនដោយគោរពកោតខ្លាចទាំងស្រុង មិនគ្រាន់តែចុះចូលនឹងម្ចាស់ដែលមានចិត្តល្អនិងជាមនុស្សសមហេតុផលប៉ុណ្ណោះទេ តែចុះចូលនឹងម្ចាស់ដែលពិបាកផ្គាប់ចិត្តដែរ។ ១៩ ពីព្រោះប្រសិនបើអ្នកណាស៊ូទ្រាំការលំបាកហើយរងទុក្ខដោយអយុត្ដិធម៌ ដើម្បីកុំឲ្យសមត្ថភាពវិនិច្ឆ័យផ្ដន្ទាទោសខ្លួននៅចំពោះមុខព្រះ នោះធ្វើឲ្យលោកពេញចិត្ត។ ២០ ព្រោះប្រសិនបើអ្នករាល់គ្នាធ្វើអំពើខុសឆ្គង ហើយត្រូវគេទះកំផ្លៀង តើមានគុណបំណាច់អ្វីបើអ្នកស៊ូទ្រាំឲ្យគេទះកំផ្លៀងនោះ? ប៉ុន្តែប្រសិនបើអ្នករាល់គ្នាធ្វើអំពើល្អហើយរងទុក្ខ តែអ្នករាល់គ្នាស៊ូទ្រាំ នោះធ្វើឲ្យព្រះពេញចិត្ត។
២១ តាមពិត អ្នករាល់គ្នាបានត្រូវហៅឲ្យមានវិថីជីវិតបែបនេះ ពីព្រោះគ្រិស្តបានរងទុក្ខដើម្បីអ្នករាល់គ្នា ហើយទុកគំរូដើម្បីឲ្យអ្នករាល់គ្នាខំដើរតាមលំអានដានរបស់លោកឲ្យបានដិតដល់។ ២២ លោកមិនដែលប្រព្រឹត្តអំពើខុសឆ្គងសោះ ហើយមិនដែលមានពាក្យបោកបញ្ឆោតចេញពីមាត់លោកឡើយ។ ២៣ ពេលដែលលោកត្រូវគេជេរប្រមាថ លោកមិនបានជេរប្រមាថគេវិញទេ។ ពេលដែលលោករងទុក្ខ នោះលោកមិនបានគំរាមកំហែងគេឡើយ ប៉ុន្តែលោកតែងតែផ្ញើខ្លួនទៅលើព្រះដែលវិនិច្ឆ័យដោយសុចរិតយុត្ដិធម៌។ ២៤ លោកបានផ្ទុកការខុសឆ្គងរបស់យើងក្នុងរូបកាយរបស់លោកលើបង្គោលឈើ ដើម្បីយើងអាចត្រូវរំដោះឲ្យរួចពីការខុសឆ្គង ហើយរស់នៅដើម្បីធ្វើអ្វីដែលសុចរិត។ ហើយ«របួសរបស់លោកបានធ្វើឲ្យអ្នករាល់គ្នាជាសះស្បើយ»។ ២៥ ព្រោះពីមុន អ្នករាល់គ្នាដូចចៀមដែលវង្វេង ប៉ុន្តែឥឡូវអ្នករាល់គ្នាបានត្រឡប់មកឯគង្វាលដែលរក្សាការពារជីវិត* របស់អ្នករាល់គ្នា។*
៣ តាមរបៀបដូចគ្នានោះ ចូរអ្នករាល់គ្នាដែលជាប្រពន្ធចុះចូលនឹងប្ដីខ្លួន ដើម្បីឲ្យប្ដីណាដែលមិនធ្វើតាមបណ្ដាំរបស់ព្រះ ក្លាយទៅជាអ្នកដែលធ្វើតាមវិញ តាមរយៈការប្រព្រឹត្តរបស់អ្នករាល់គ្នាដែលជាប្រពន្ធ ដោយមិនចាំបាច់ឲ្យអ្នករាល់គ្នាបញ្ចេញពាក្យសម្ដីមួយម៉ាត់ឡើយ ២ ពីព្រោះពួកគេឃើញដោយផ្ទាល់ភ្នែកនូវការប្រព្រឹត្តដ៏បរិសុទ្ធរបស់អ្នករាល់គ្នា គួបផ្សំជាមួយនឹងការគោរពដ៏ជ្រាលជ្រៅ។ ៣ ហើយកុំឲ្យសម្រស់របស់អ្នករាល់គ្នាជាសម្រស់សម្បកក្រៅឡើយ ពោលគឺការក្រងសក់ ពាក់គ្រឿងអលង្ការមាស ឬពាក់សម្លៀកបំពាក់ក្រៅ ៤ តែចូរឲ្យសម្រស់របស់អ្នករាល់គ្នាជាអ្វីក្នុងចិត្តវិញ គឺសម្លៀកបំពាក់ដែលមិនអាចខូចទៅបាន ពោលគឺចិត្ត* ស្ងៀមស្ងាត់និងស្លូតបូត ជាអ្វីដែលមានតម្លៃថ្លៃណាស់ចំពោះព្រះ។ ៥ ព្រោះនៅសម័យមុន ពួកស្ត្រីបរិសុទ្ធដែលសង្ឃឹមលើព្រះក៏បានតុបតែងខ្លួនដូច្នេះដែរ ដោយចុះចូលនឹងប្ដីខ្លួន ៦ ដូចសារ៉ាធ្លាប់ស្ដាប់បង្គាប់អាប្រាហាំ ហើយហៅគាត់ថា«ម្ចាស់»។ ហើយអ្នករាល់គ្នាបានក្លាយទៅជាកូនរបស់នាង ឲ្យតែអ្នករាល់គ្នាបន្តធ្វើអំពើល្អ ហើយមិនភ័យខ្លាចចំពោះអ្វីដែលគួរឲ្យរន្ធត់ឡើយ។
៧ តាមរបៀបដូចគ្នាដែរ ចូរអ្នករាល់គ្នាដែលជាប្ដី បន្តរួមរស់ជាមួយនឹងប្រពន្ធដោយស្គាល់ចិត្តនាងច្បាស់ ហើយដោយឲ្យកិត្ដិយសដល់នាងជាភាជនៈខ្សោយជាង ជាស្ត្រីភេទ ពីព្រោះអ្នករាល់គ្នាក៏ជាអ្នកទទួលជីវិតជាមត៌ករួមជាមួយនឹងនាង ដោយសារគុណដ៏វិសេសលើសលប់របស់ព្រះ។ ពុំនោះសោត សេចក្ដីអធិដ្ឋានរបស់អ្នករាល់គ្នានឹងត្រូវរារាំង។
៨ ក្រោយបង្អស់ ចូរអ្នកទាំងអស់គ្នាមានចិត្តគំនិតតែមួយ ចូរកើតទុក្ខជាមួយគ្នា ស្រឡាញ់រាប់អានគ្នាជាបងប្អូន មានចិត្តអាណិតមេត្ដា មានចិត្តរាបទាប ៩ មិនមែនដោយធ្វើអំពើអាក្រក់សងអ្នកដែលធ្វើអំពើអាក្រក់មកលើខ្លួន ឬជេរប្រមាថសងអ្នកដែលជេរប្រមាថខ្លួនឡើយ ប៉ុន្តែផ្ទុយទៅវិញ ចូរឲ្យពរ ពីព្រោះអ្នករាល់គ្នាបានត្រូវហៅឲ្យមានវិថីជីវិតនេះ ដើម្បីឲ្យទទួលពរជាមត៌ក។
១០ ព្រោះ«អ្នកណាដែលស្រឡាញ់ជីវិត ហើយចង់រស់នៅដោយមានសុភមង្គល អ្នកនោះត្រូវទប់អណ្ដាត កុំឲ្យនិយាយអ្វីដែលអាក្រក់ ហើយឃាត់បបូរមាត់ កុំឲ្យពោលពាក្យបោកបញ្ឆោត ១១ តែអ្នកនោះត្រូវជៀសចេញពីអ្វីដែលអាក្រក់ ហើយធ្វើអ្វីដែលល្អវិញ។ អ្នកនោះត្រូវខំប្រឹងឲ្យមានសន្ដិភាពជានិច្ច។ ១២ ព្រោះភ្នែកព្រះយេហូវ៉ាមើលពួកអ្នកសុចរិត ហើយត្រចៀករបស់លោកស្ដាប់ការអង្វររបស់ពួកគេ តែព្រះយេហូវ៉ា* ប្រឆាំងពួកអ្នកដែលប្រព្រឹត្តអំពើអាក្រក់»។
១៣ តើអ្នកណានឹងធ្វើបាបអ្នករាល់គ្នា បើអ្នករាល់គ្នាខ្នះខ្នែងធ្វើអំពើល្អ? ១៤ ប៉ុន្តែទោះជាអ្នករាល់គ្នារងទុក្ខដោយសារសេចក្ដីសុចរិតក៏ដោយ ក៏អ្នករាល់គ្នាមានសុភមង្គលដែរ។ ក៏ប៉ុន្តែកុំខ្លាចអ្វីដែលមនុស្សឯទៀតខ្លាចឡើយ ហើយកុំព្រួយបារម្ភ។ ១៥ ប៉ុន្តែ ចូរទទួលស្គាល់គ្រិស្តជាម្ចាស់ក្នុងចិត្តអ្នករាល់គ្នា ហើយប្រុងប្រៀបជានិច្ចដើម្បីនិយាយការពារសេចក្ដីសង្ឃឹមដែលនៅក្នុងអ្នករាល់គ្នា នៅចំពោះមុខមនុស្សទាំងអស់ដែលទាមទារឲ្យអ្នករាល់គ្នាប្រាប់អំពីមូលហេតុដែលអ្នករាល់គ្នាមានសេចក្ដីសង្ឃឹមនោះ តែចូរធ្វើដូច្នេះដោយចិត្តស្លូតបូតនិងដោយការគោរពដ៏ជ្រាលជ្រៅ។
១៦ កុំធ្វើអ្វីដែលនាំឲ្យសមត្ថភាពវិនិច្ឆ័យផ្ដន្ទាទោសឡើយ យ៉ាងនោះ ទោះជាពួកគេនិយាយប្រឆាំងអ្នករាល់គ្នាក្ដី នោះពួកអ្នកដែលនិយាយអាក្រក់អំពីការល្អដែលអ្នករាល់គ្នាធ្វើក្នុងនាមជាអ្នកកាន់តាមគ្រិស្ត នឹងអៀនខ្មាស។ ១៧ ព្រោះ គឺប្រសើរជាងបើអ្នករាល់គ្នារងទុក្ខដោយសារធ្វើអំពើល្អ (ប្រសិនបើជាបំណងប្រាថ្នារបស់ព្រះ) ជាជាងរងទុក្ខដោយសារធ្វើអំពើអាក្រក់។ ១៨ សូម្បីតែគ្រិស្ត ដែលជាមនុស្សសុចរិត ក៏បានស្លាប់មួយដងជាការស្រេច ដើម្បីមនុស្សមិនសុចរិត ហើយបានរំដោះពួកគេពីការខុសឆ្គង។ លោកបានធ្វើដូច្នោះដើម្បីនាំអ្នករាល់គ្នាទៅឯព្រះ។ ពេលដែលគេសម្លាប់លោក លោកជាមនុស្ស តែលោកបានត្រូវប្រោសឲ្យមានជីវិតរស់ឡើងវិញជាវិញ្ញាណ។* ១៩ ពេលនោះលោកបានទៅផ្សព្វផ្សាយដល់ពួកវិញ្ញាណដែលជាប់ឃុំឃាំង ២០ ជាពួកវិញ្ញាណដែលមិនបានស្ដាប់បង្គាប់ ពេលដែលព្រះកំពុងរង់ចាំដោយអត់ធ្មត់នៅសម័យណូអេ ខណៈដែលគាត់កំពុងសង់ទូកធំ ដែលក្នុងនោះមនុស្សតែប៉ុន្មាននាក់បានត្រូវនាំកាត់ទឹកដោយសុវត្ថិភាព គឺមនុស្ស* ប្រាំបីនាក់។
២១ ព្រឹត្ដិការណ៍នោះជានិមិត្តរូបនៃអ្វីដែលកំពុងសង្គ្រោះអ្នករាល់គ្នាឥឡូវនេះ ពោលគឺការជ្រមុជទឹក (មិនមែនជាការជម្រះរូបកាយឲ្យអស់ភាពកខ្វក់ទេ ប៉ុន្តែជាការសុំព្រះផ្ដល់នូវសមត្ថភាពវិនិច្ឆ័យដែលមិនផ្ដន្ទាទោស) តាមរយៈការប្រោសលោកយេស៊ូគ្រិស្តឲ្យរស់ឡើងវិញ។ ២២ ព្រោះលោកបានទៅស្ថានសួគ៌ ហើយឥឡូវលោកនៅខាងស្ដាំព្រះ ក្រោយមក ទេវតា អំណាច និងអាជ្ញាធរនានាបានត្រូវដាក់ឲ្យនៅក្រោមអំណាចរបស់លោក។
៤ ដូច្នេះ ដោយសារគ្រិស្តបានរងទុក្ខពេលដែលលោកជាមនុស្ស ចូរអ្នករាល់គ្នាប្រុងប្រៀបខ្លួនដោយមានចិត្តគំនិតដូចលោកដែរ ពីព្រោះអ្នកណាដែលបានរងទុក្ខក្នុងសាច់ឈាម អ្នកនោះបានលះចោលការខុសឆ្គងហើយ ២ ក្នុងបំណងរស់នៅដើម្បីធ្វើតាមបំណងប្រាថ្នារបស់ព្រះក្នុងអំឡុងពេលដែលអ្នកនោះមានជីវិតជាមនុស្ស មិនមែនរស់នៅដើម្បីធ្វើតាមសេចក្ដីប៉ងប្រាថ្នារបស់មនុស្សទៀតទេ។ ៣ ព្រោះវេលាដែលអ្នករាល់គ្នាបានចំណាយក្នុងការធ្វើតាមបំណងប្រាថ្នារបស់ពិភពលោកនេះគឺល្មមហើយ ជាវេលាដែលអ្នករាល់គ្នាបានដើរក្នុងផ្លូវសីលធម៌ធូររលុង* តណ្ហាក្រាស់ ការផឹកស្រាច្រើនហួសប្រមាណ ការជប់លៀងសប្បាយឥតបើគិត ការប្រកួតគ្នាផឹកស្រា ហើយការគោរពបូជារូបព្រះខុសច្បាប់។ ៤ ដោយសារអ្នករាល់គ្នាបានឈប់រត់តាមពួកគេទៅននៀលក្នុងភក់ជ្រាំនៃអបាយមុខ នោះពួកគេងឿងឆ្ងល់ ហើយចេះតែនិយាយប្រមាថអ្នករាល់គ្នា។ ៥ ប៉ុន្តែមនុស្សទាំងនោះនឹងទទួលខុសត្រូវនៅចំពោះមុខលោកដែលបានប្រុងប្រៀបវិនិច្ឆ័យមនុស្សរស់និងមនុស្សស្លាប់។ ៦ តាមពិត ហេតុនេះហើយបានជាដំណឹងល្អក៏បានត្រូវប្រកាសប្រាប់ដល់មនុស្សស្លាប់* ដែរ ដើម្បីឲ្យមនុស្សវិនិច្ឆ័យពួកគេតាមសម្បកក្រៅ តែឲ្យព្រះចាត់ទុកពួកគេជាអ្នកដែលមានជីវិតរស់នៅ ក្រោមការដឹកនាំនៃសកម្មពល* របស់លោក។
៧ ប៉ុន្តែទីបញ្ចប់នៃអ្វីៗទាំងអស់គឺជិតដល់ហើយ។ ដូច្នេះ ចូរដឹងខុសត្រូវជានិច្ច ហើយយកចិត្តទុកដាក់យ៉ាងខ្លាំងចំពោះសេចក្ដីអធិដ្ឋាន។ ៨ ជាពិសេស ចូរស្រឡាញ់គ្នាទៅវិញទៅមកឲ្យខ្លាំង ពីព្រោះសេចក្ដីស្រឡាញ់គ្របបាំងការខុសឆ្គងជាច្រើន។ ៩ ចូរទទួលគ្នាទៅវិញទៅមកដោយរាក់ទាក់ ហើយដោយមិនរអ៊ូរទាំ។ ១០ ក្នុងនាមជាអ្នកបម្រើ* ល្អប្រសើរដែលបានទទួលគុណដ៏វិសេសលើសលប់របស់ព្រះដែលបានត្រូវផ្ដល់ឲ្យតាមរបៀបផ្សេងៗ នោះចូរបម្រើគ្នាទៅវិញទៅមកតាមអំណោយដែលអ្នករាល់គ្នាម្នាក់ៗបានទទួល។ ១១ ប្រសិនបើអ្នកណានិយាយ អ្នកនោះត្រូវនិយាយអំពីប្រសាសន៍ដ៏ពិសិដ្ឋរបស់ព្រះ បើអ្នកណាបំពេញកិច្ចបម្រើ អ្នកនោះត្រូវបំពេញកិច្ចបម្រើដោយពឹងផ្អែកលើកម្លាំងដែលព្រះផ្ដល់ឲ្យ ដើម្បីឲ្យព្រះទទួលការលើកតម្កើងក្នុងគ្រប់ការទាំងអស់ តាមរយៈលោកយេស៊ូគ្រិស្ត។ សិរីរុងរឿងនិងកម្លាំងខ្លាំងក្លាជារបស់លោកជារៀងរហូតតទៅ។ អាមេន។
១២ បងប្អូនជាទីស្រឡាញ់អើយ កុំឆ្ងល់អំពីភ្លើងដែលកំពុងឆេះក្នុងចំណោមអ្នករាល់គ្នា ហាក់ដូចជាមានអ្វីចម្លែកកំពុងកើតឡើងដល់អ្នករាល់គ្នាឡើយ ព្រោះភ្លើងនោះកំពុងកើតឡើងដើម្បីល្បងលអ្នករាល់គ្នា។ ១៣ ក៏ប៉ុន្តែ ចូរអរសប្បាយដោយសារអ្នករាល់គ្នារួមចំណែកក្នុងទុក្ខលំបាករបស់គ្រិស្ត ដើម្បីឲ្យអ្នករាល់គ្នាអរសប្បាយ ហើយត្រេកអរឲ្យខ្លាំង ពេលដែលសិរីរុងរឿងរបស់លោកនឹងត្រូវសម្ដែង។ ១៤ ប្រសិនបើគេជេរប្រមាថអ្នករាល់គ្នាដោយសារនាមរបស់គ្រិស្ត នោះអ្នករាល់គ្នាមានសុភមង្គលហើយ ពីព្រោះសកម្មពលដ៏រុងរឿងរបស់ព្រះសណ្ឋិតលើអ្នករាល់គ្នា។
១៥ ក៏ប៉ុន្តែកុំឲ្យអ្នករាល់គ្នាណាម្នាក់រងទុក្ខដោយសារជាឃាតករ ឬជាចោរ ឬជាអ្នកធ្វើអំពើអាក្រក់ ឬជាអ្នកដែលជ្រៀតជ្រែកក្នុងរឿងអ្នកឯទៀត។ ១៦ ប៉ុន្តែប្រសិនបើអ្នកណារងទុក្ខដោយសារជាគ្រិស្តសាសនិក អ្នកនោះមិនត្រូវខ្មាសឡើយ តែត្រូវបន្តលើកតម្កើងព្រះ ក្នុងនាមនោះ។ ១៧ ព្រោះនេះជាពេលកំណត់ឲ្យការវិនិច្ឆ័យចាប់ផ្ដើម ពីផ្ទះរបស់ព្រះ។ ប្រសិនបើការវិនិច្ឆ័យចាប់ផ្ដើមពីយើងមុនគេ តើអ្វីនឹងកើតឡើងដល់ពួកអ្នកដែលមិនស្ដាប់តាមដំណឹងល្អរបស់ព្រះ? ១៨ «ហើយប្រសិនបើមនុស្សសុចរិតនឹងត្រូវសង្គ្រោះទាំងលំបាក ចុះតើមនុស្សទុច្ចរិតនិងអ្នកប្រព្រឹត្តអំពើខុសឆ្គងនឹងទៅជាយ៉ាងណាវិញ?»។ ១៩ ដូច្នេះ ពួកអ្នកដែលកំពុងរងទុក្ខដោយសារធ្វើតាមបំណងប្រាថ្នារបស់ព្រះ ត្រូវបន្តផ្ញើជីវិតនឹងអ្នកបង្កើតដ៏ស្មោះត្រង់នោះ កាលដែលពួកគេកំពុងធ្វើការល្អ។
៥ ដូច្នេះ ខ្ញុំសូមបំផុសទឹកចិត្តបុរសចាស់ទុំទាំងឡាយក្នុងចំណោមអ្នករាល់គ្នា ព្រោះខ្ញុំក៏ជាបុរសចាស់ទុំរួមជាមួយនឹងពួកគេដែរ ក៏ជាសាក្សីអំពីទុក្ខលំបាករបស់គ្រិស្ត និងជាអ្នករួមចំណែកក្នុងសិរីរុងរឿងដែលនឹងត្រូវបើកបង្ហាញ៖ ២ ចូរឃ្វាលហ្វូងចៀមរបស់ព្រះដែលនៅក្រោមការថែទាំរបស់អ្នករាល់គ្នា មិនមែនឃ្វាលដោយបង្ខំចិត្តទេ តែដោយស្ម័គ្រចិត្ត ហើយមិនមែនដោយចង់បានប្រយោជន៍ផ្ទាល់ខ្លួនឡើយ តែដោយស្មោះអស់ពីចិត្ត ៣ ក៏មិនមែនដោយធ្វើជាចៅហ្វាយលើពួកអ្នកដែលជាមត៌ករបស់ព្រះដែរ តែដោយធ្វើជាគំរូដល់ហ្វូងចៀម។ ៤ ហើយពេលដែលមេគង្វាលនឹងត្រូវសម្ដែងឲ្យឃើញ នោះអ្នករាល់គ្នានឹងទទួលមកុដនៃសិរីរុងរឿងដែលមិនអាចសាបសូន្យបានឡើយ។
៥ តាមរបៀបដូចគ្នា ចូរអ្នករាល់គ្នាដែលជាយុវជន ចុះចូលនឹងបុរសចាស់ទុំ។ ប៉ុន្តែចូរអ្នកទាំងអស់គ្នាក្រវាត់ខ្លួនដោយចិត្តរាបទាបក្នុងរបៀបដែលប្រព្រឹត្តចំពោះគ្នាទៅវិញទៅមក ពីព្រោះព្រះប្រឆាំងមនុស្សក្រអឺតក្រទម តែលោកឲ្យគុណដ៏វិសេសលើសលប់ដល់មនុស្សដែលមានចិត្តរាបទាប។
៦ ដូច្នេះ ចូរអ្នករាល់គ្នាបន្ទាបខ្លួនក្រោមដៃដ៏ខ្លាំងក្លារបស់ព្រះ ដើម្បីឲ្យលោកតម្កើងអ្នករាល់គ្នានៅពេលកំណត់ ៧ កាលដែលអ្នករាល់គ្នាផ្ទេរកង្វល់ទាំងអស់ទៅ* ព្រះ ពីព្រោះលោករមែងគិតអំពីអ្នករាល់គ្នា។ ៨ ចូរដឹងខ្លួនជានិច្ច ហើយប្រុងប្រយ័ត្នចុះ។ មេកំណាច* ដែលជាសត្រូវរបស់អ្នករាល់គ្នា ដើរក្រវែលដូចតោដែលកំពុងគ្រហឹមរកលេបត្របាក់អ្នកណាម្នាក់។ ៩ ប៉ុន្តែចូរតតាំងនឹងវា ដោយមានជំនឿមាំមួន ហើយដោយដឹងថាបងប្អូនទាំងអស់របស់អ្នករាល់គ្នាពេញពិភពលោកកំពុងឆ្លងកាត់ទុក្ខលំបាកដូចគ្នាដែរ។ ១០ ក៏ប៉ុន្តែក្រោយពីអ្នករាល់គ្នាបានរងទុក្ខមួយរយៈពេលខ្លី ព្រះដែលផ្ដល់គុណដ៏វិសេសលើសលប់គ្រប់យ៉ាង ដែលបានហៅអ្នករាល់គ្នាទៅឯសិរីរុងរឿងរបស់លោកដែលស្ថិតស្ថេរជានិរន្តរ៍តាមរយៈគ្រិស្ត នឹងបង្គ្រប់ការហ្វឹកហ្វឺនរបស់អ្នករាល់គ្នា។ លោកនឹងធ្វើឲ្យអ្នករាល់គ្នាមាំមួនហើយខ្លាំងក្លាឡើង។ ១១ សូមឲ្យលោកប្រកបដោយកម្លាំងខ្លាំងក្លាជារៀងរហូត។ អាមេន។
១២ ខ្ញុំបានសរសេរទៅកាន់អ្នករាល់គ្នាយ៉ាងខ្លី តាមរយៈស៊ីលវេនុស ដែលខ្ញុំចាត់ទុកជាបងប្រុសស្មោះត្រង់ ដើម្បីលើកទឹកចិត្តអ្នករាល់គ្នា ហើយបញ្ជាក់យ៉ាងស្មោះអស់ពីចិត្តថា នេះហើយជាគុណដ៏វិសេសលើសលប់ដ៏ពិតរបស់ព្រះ។ ចូរកាន់ជំហរមាំមួនក្នុងគុណដ៏វិសេសនេះ។ ១៣ ស្ត្រី* ដែលនៅក្រុងបាប៊ីឡូន ដែលបានត្រូវជ្រើសរើសដូចអ្នករាល់គ្នា ផ្ដាំសួរសុខទុក្ខ ហើយម៉ាកុស ជាកូនរបស់ខ្ញុំ ក៏ផ្ដាំសួរសុខទុក្ខដែរ។ ១៤ ចូរសួរសុខទុក្ខគ្នាទៅវិញទៅមកដោយការថើបដែលប្រកបដោយសេចក្ដីស្រឡាញ់ជាបងប្អូន។
សូមឲ្យអ្នកទាំងអស់គ្នាដែលជាអ្នកកាន់តាមគ្រិស្តប្រកបដោយសេចក្ដីសុខសាន្ត។
[កំណត់សម្គាល់]
ភាសាក្រិច«អាប៉ូស្តូឡូស»។ មានន័យថា«អ្នកដែលត្រូវគេចាត់ឲ្យទៅ»
មើលសេចក្ដីពន្យល់បន្ថែមផ្នែកទី៤
មើលកំណត់សម្គាល់សកម្ម ២:៩
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ន័យត្រង់«ចូរក្រវាត់គំនិតរបស់អ្នករាល់គ្នាឲ្យមាំមួន»
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់ម៉ាថ ២១:៤២
មើលកំណត់សម្គាល់ម៉ាថ ៥:២៩
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
ឬ«លោកដែលជាគង្វាលនិងអ្នកត្រួតពិនិត្យជីវិតរបស់អ្នករាល់គ្នា»
មើលកំណត់សម្គាល់ខ១១
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ឬ«មុខរបស់ព្រះយេហូវ៉ា»
មើលកំណត់សម្គាល់ខ៤
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
មើលកំណត់សម្គាល់កាឡ ៥:១៩
តាមមើលទៅ នេះសំដៅទៅអ្នកដែលប្រៀបដូចជាបានស្លាប់ ដោយសារការខុសឆ្គងរបស់ខ្លួន។ មើលអេភ ២:១
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ឬ«អ្នកចាត់ចែងកិច្ចការផ្ទះ»
ន័យត្រង់«ផ្ទុកកង្វល់ទាំងអស់ទៅលើ»
ភាសាក្រិច«ឌីអាបូឡូស»។ មានន័យថា«អ្នកបង្កាច់បង្ខូច»
«ស្ត្រី»អាចសំដៅទៅក្រុមជំនុំមួយ