សំបុត្រទីពីររបស់ពេត្រុស
១ ពីខ្ញុំ ស៊ីម៉ូនពេត្រុស ដែលជាខ្ញុំបម្រើនិងជាសាវ័ក* របស់លោកយេស៊ូគ្រិស្ត* ជូនចំពោះពួកអ្នកដែលបានទទួលជំនឿដែលមានកិត្ដិយសស្មើនឹងជំនឿរបស់យើង ដោយសារសេចក្ដីសុចរិតនៃព្រះរបស់យើង និងលោកយេស៊ូដែលជាអ្នកសង្គ្រោះ៖
២ សូមឲ្យអ្នករាល់គ្នាបានប្រកបដោយគុណដ៏វិសេសលើសលប់កាន់តែបរិបូរឡើង តាមរយៈចំណេះត្រឹមត្រូវអំពីព្រះ និងអំពីលោកយេស៊ូដែលជាម្ចាស់របស់យើង ៣ ពីព្រោះអ្វីៗទាំងអស់ដែលទាក់ទងនឹងជីវិតនិងភក្ដីភាពចំពោះព្រះ បានត្រូវផ្ដល់ឲ្យយើងជាអំណោយ ដោយសារឫទ្ធានុភាពរបស់ព្រះ តាមរយៈចំណេះត្រឹមត្រូវអំពីលោកដែលបានហៅយើងដោយសិរីរុងរឿងនិងគុណធម៌។ ៤ តាមរយៈការទាំងនោះ លោកបានឲ្យសេចក្ដីសន្យាថ្លៃវិសេសនិងអស្ចារ្យក្រៃលែងជាអំណោយ ដើម្បីឲ្យអ្នករាល់គ្នាទៅជាវិញ្ញាណ* ដូចព្រះ ដោយបានរួចផុតពីសេចក្ដីខូចអាក្រក់ដែលផ្ដើមចេញពីតណ្ហាដែលមានក្នុងពិភពលោក។
៥ ហេតុនេះ ចូរអ្នករាល់គ្នាតបស្នងសងគុណលោក ដោយខំប្រឹងយ៉ាងស្មោះអស់ពីចិត្តដើម្បីបន្ថែមគុណធម៌ទៅលើជំនឿរបស់អ្នករាល់គ្នា បន្ថែមចំណេះទៅលើគុណធម៌របស់អ្នករាល់គ្នា ៦ បន្ថែមការទប់ចិត្តទៅលើចំណេះរបស់អ្នករាល់គ្នា បន្ថែមការស៊ូទ្រាំទៅលើការទប់ចិត្ត បន្ថែមភក្ដីភាពចំពោះព្រះទៅលើការស៊ូទ្រាំ ៧ បន្ថែមការរាប់អានគ្នាជាបងប្អូនទៅលើភក្ដីភាពចំពោះព្រះ បន្ថែមសេចក្ដីស្រឡាញ់ទៅលើការរាប់អានគ្នាជាបងប្អូន។ ៨ ព្រោះប្រសិនបើអ្នករាល់គ្នាមានលក្ខណៈទាំងនោះជាបរិបូរ លក្ខណៈទាំងនោះនឹងការពារមិនឲ្យអ្នករាល់គ្នាក្លាយទៅជាអសកម្មទេ ឬឥតផលក្នុងរបៀបដែលអ្នករាល់គ្នាប្រើចំណេះត្រឹមត្រូវអំពីលោកយេស៊ូគ្រិស្តដែលជាម្ចាស់របស់យើង។
៩ ព្រោះប្រសិនបើអ្នកណាគ្មានលក្ខណៈទាំងនោះ អ្នកនោះងងឹតភ្នែក ហើយកំពុងបិទភ្នែកមិនឲ្យឃើញពន្លឺ ក៏បានភ្លេចការខុសឆ្គងរបស់ខ្លួនពីអតីតកាលដែលបានត្រូវសម្អាតហើយ។ ១០ ដូច្នេះ បងប្អូនអើយ ចូរព្យាយាមអស់ពីសមត្ថភាពដើម្បីធ្វើឲ្យប្រាកដថា អ្នករាល់គ្នាស្មោះត្រង់ជានិច្ច ដើម្បីរក្សាខ្លួនឲ្យនៅក្នុងចំណោមពួកអ្នកដែលព្រះបានហៅនិងជ្រើសរើស ពីព្រោះប្រសិនបើអ្នករាល់គ្នាធ្វើការទាំងនេះជានិច្ច នោះអ្នករាល់គ្នានឹងមិនដួលឡើយ។ ១១ តាមពិត ដោយធ្វើដូច្នេះ អ្នករាល់គ្នានឹងទទួលពរដ៏វិសេស គឺអ្នករាល់គ្នានឹងទទួលការអនុញ្ញាតឲ្យចូលក្នុងរាជាណាចក្រដែលស្ថិតស្ថេរជានិរន្តរ៍របស់លោកយេស៊ូគ្រិស្ត ដែលជាអ្នកសង្គ្រោះនិងជាម្ចាស់របស់យើង។
១២ ហេតុនេះហើយបានជាខ្ញុំប្រុងប្រៀបរំលឹកអ្នករាល់គ្នាអំពីការទាំងនេះជានិច្ច ទោះជាអ្នករាល់គ្នាដឹងការទាំងនេះ ហើយក៏បានតាំងខ្លួនមាំមួនក្នុងសេចក្ដីពិតដែលអ្នករាល់គ្នាស្គាល់។ ១៣ ប៉ុន្តែខ្ញុំគិតថាជាការត្រឹមត្រូវដែលខ្ញុំដាស់តឿនអ្នករាល់គ្នាដោយការរំលឹក ដរាបណាដែលខ្ញុំនៅក្នុងត្រសាល* នេះ ១៤ ដោយដឹងថា មិនយូរទៀតខ្ញុំត្រូវលះចោលត្រសាលនេះ ដូចលោកយេស៊ូគ្រិស្តជាម្ចាស់របស់យើងធ្លាប់មានប្រសាសន៍ប្រាប់ខ្ញុំ។ ១៥ ដូច្នេះ ខ្ញុំនឹងខំប្រឹងអស់ពីសមត្ថភាព។ យ៉ាងនោះ ក្រោយពីខ្ញុំបានចាកចេញហើយ អ្នករាល់គ្នាអាចរំលឹកគ្នាអំពីការទាំងនេះគ្រប់ពេលវេលា។
១៦ យើងមិនបានធ្វើឲ្យអ្នករាល់គ្នាដឹងអំពីឫទ្ធានុភាពនិងវត្តមានរបស់លោកយេស៊ូគ្រិស្តជាម្ចាស់របស់យើង ដោយផ្អែកលើរឿងមិនពិតដែលមនុស្សបានប្រឌិតឡើងយ៉ាងប៉ិនប្រសប់នោះទេ ប៉ុន្តែគឺដោយសារយើងជាសាក្សីផ្ទាល់ភ្នែកអំពីភាពរុងរឿងរបស់លោក។ ១៧ ព្រោះលោកបានទទួលកិត្ដិយសនិងសិរីរុងរឿងពីព្រះដែលជាបិតា ពេលដែលមានសំឡេងបន្លឺពីរស្មីរុងរឿងមកកាន់លោកថា៖ «នេះជាបុត្រជាទីស្រឡាញ់របស់ខ្ញុំ ដែលខ្ញុំពេញចិត្ត»។ ១៨ ពាក្យសម្ដីនេះយើងបានឮបន្លឺពីលើមេឃមក កាលដែលយើងនៅភ្នំបរិសុទ្ធជាមួយនឹងលោក។
១៩ ហេតុនេះ ទំនុកចិត្តរបស់យើងទៅលើទំនាយបានត្រូវពង្រឹងថែមទៀត ហើយជាការល្អដែលអ្នករាល់គ្នាកំពុងផ្ដោតអារម្មណ៍ទៅលើទំនាយនោះ ដូចចង្កៀងមួយដែលភ្លឺនៅកន្លែងងងឹតក្នុងចិត្តអ្នករាល់គ្នា រហូតដល់ព្រឹកព្រលឹម ហើយផ្កាយព្រឹករះឡើង។ ២០ ព្រោះអ្នករាល់គ្នាដឹងមុនថា គ្មានទំនាយណាមួយក្នុងបទគម្ពីរដែលផ្ដើមចេញពីការបកស្រាយផ្ទាល់ខ្លួនរបស់អ្នកណាម្នាក់ទេ។ ២១ ព្រោះទំនាយមិនដែលកើតចេញពីបំណងប្រាថ្នារបស់មនុស្សទេ តែមនុស្សបាននិយាយអ្វីដែលមកពីព្រះ ដោយមានសកម្មពល* បរិសុទ្ធដឹកនាំពួកគេ។
២ ក៏ប៉ុន្តែពួកអ្នកប្រកាសទំនាយមិនពិតក៏បានលេចមកក្នុងចំណោមបណ្ដាជន ដូចគ្រូក្លែងក្លាយនឹងលេចមកក្នុងចំណោមអ្នករាល់គ្នាដែរ។ អ្នកទាំងនោះនឹងលួចបង្កើតនិកាយដែលនាំឲ្យអន្តរាយ ក៏នឹងបោះបង់ចោលម្ចាស់ដែលបានទិញពួកគេមក ហើយយ៉ាងនេះពួកគេនាំឲ្យខ្លួនទទួលសេចក្ដីហិនវិនាសយ៉ាងឆាប់រហ័ស។ ២ ម្យ៉ាងទៀត មនុស្សជាច្រើននឹងប្រព្រឹត្តដោយមានសីលធម៌ធូររលុង* តាមពួកគេដែរ ហើយដោយសារអ្នកទាំងនោះ មាគ៌ានៃសេចក្ដីពិតនឹងត្រូវគេនិយាយប្រមាថ។ ៣ ពួកគេក៏នឹងប្រើពាក្យបោកបញ្ឆោតដើម្បីជញ្ជក់យកផលប្រយោជន៍ពីអ្នករាល់គ្នាដោយមានចិត្តលោភ។* តែទោសដែលបានត្រូវកំណត់ពីសម័យបុរាណសម្រាប់ពួកគេនឹងមកដោយឥតបង្អែបង្អង់ឡើយ ហើយសេចក្ដីហិនវិនាសរបស់ពួកគេនឹងមកជាក់ជាពុំខាន។
៤ ព្រះប្រាកដជាមិនបានស្ទាក់ស្ទើរក្នុងការដាក់ទណ្ឌកម្មពួកទេវតាដែលបានធ្វើអំពើខុសឆ្គងទេ តែផ្ទុយទៅវិញ លោកដាក់ពួកគេក្នុងរណ្ដៅដែលមានភាពងងឹតសូន្យសុង ដើម្បីទទួលការវិនិច្ឆ័យទោស ដោយបោះពួកគេទៅក្នុងឋាឋារ៉ុស។* ៥ លោកក៏មិនបានស្ទាក់ស្ទើរក្នុងការដាក់ទណ្ឌកម្មពិភពលោកនៅសម័យបុរាណដែរ លោកធ្វើឲ្យទឹកជន់លិចពិភពលោកនៃមនុស្សទុច្ចរិតទាំងនោះ តែបានការពារណូអេ ដែលជាអ្នកផ្សព្វផ្សាយអំពីសេចក្ដីសុចរិត និងមនុស្សប្រាំពីរនាក់ទៀត។ ៦ ម្យ៉ាងទៀត លោកផ្ដន្ទាទោសក្រុងសូដុមនិងក្រុងកូម៉ូរ៉ាដោយបំផ្លាញក្រុងទាំងនោះឲ្យទៅជាផេះ ក៏បានទុកគំរូពីអ្វីដែលនឹងកើតឡើងដល់មនុស្សទុច្ចរិតនៅថ្ងៃមុខ ៧ ហើយលោកសង្គ្រោះឡុតជាមនុស្សសុចរិត ដែលបានកើតទុក្ខយ៉ាងខ្លាំងដោយសារពួកអ្នកបំពានច្បាប់ដែលបណ្ដែតបណ្ដោយខ្លួនទៅតាមសីលធម៌ធូររលុង។ ៨ ព្រោះបុរសសុចរិតនោះឈឺចាប់យ៉ាងខ្លាំងជារៀងរាល់ថ្ងៃ ដោយសារអ្វីដែលគាត់ឃើញនិងឮ កាលដែលរស់នៅក្នុងចំណោមពួកគេ ហើយដោយសារការប្រព្រឹត្តរបស់ពួកអ្នកប្រឆាំងច្បាប់។ ៩ អាស្រ័យហេតុនោះ ព្រះយេហូវ៉ាចេះសង្គ្រោះមនុស្សដែលមានភក្ដីភាពចំពោះលោកឲ្យរួចពីទុក្ខលំបាក តែទុកមនុស្សមិនសុចរិតដោយឡែកដើម្បីឲ្យទទួលសេចក្ដីហិនវិនាសនៅថ្ងៃវិនិច្ឆ័យទោស ១០ ជាពិសេសពួកអ្នកដែលរួមដំណេកជាមួយនឹងអ្នកឯទៀតដើម្បីធ្វើឲ្យពួកគេមិនស្អាតបរិសុទ្ធ។ ពួកគេក៏មើលងាយអ្នកដែលមានអំណាចលើពួកគេដែរ។
អ្នកទាំងនោះជាមនុស្សហ៊ាន និងប្រកាន់តែគំនិតខ្លួន ហើយមិនកោតខ្លាចញាប់ញ័រចំពោះពួកអ្នកដែលព្រះបានផ្ដល់កិត្ដិយសឲ្យ តែពួកគេនិយាយប្រមាថអ្នកទាំងនោះវិញ ១១ រីឯពួកទេវតា ទោះជាមានសមត្ថភាពនិងកម្លាំងខ្លាំងជាងក៏ដោយ ក៏មិនចោទប្រកាន់ពួកគេដោយប្រើពាក្យប្រមាថឡើយ ដោយសារគោរពព្រះយេហូវ៉ា។ ១២ តែបុរសទាំងនេះ និយាយប្រមាថអ្វីដែលពួកគេមិនស្គាល់។ ពួកគេនឹងទទួលសេចក្ដីហិនវិនាសក្នុងផ្លូវទុច្ចរិតរបស់ខ្លួន ដូចសត្វឥតវិចារណញ្ញាណដែលកើតមកដើម្បីឲ្យគេចាប់ រួចបំផ្លាញចោល ១៣ ដោយធ្វើឲ្យខ្លួនអន្តរាយទុកជារង្វាន់ពីអំពើខុសឆ្គង។
ពួកគេពេញចិត្តនឹងការរស់នៅយ៉ាងសម្បូណ៌សប្បាយ នៅពេលថ្ងៃ។ ពួកគេប្រៀបដូចជាស្នាមប្រឡាក់ ហើយត្រេកត្រអាលនឹងសេចក្ដីបង្រៀនបោកបញ្ឆោតរបស់ខ្លួន កាលដែលពួកគេជប់លៀងសំណេះសំណាលជាមួយនឹងអ្នករាល់គ្នា។ ១៤ ពួកគេមានភ្នែកពោរពេញទៅដោយការផិតក្បត់ ហើយមិនអាចឈប់ប្រព្រឹត្តអំពើខុសឆ្គងឡើយ។ ពួកគេទាក់ទាញចិត្តពួកអ្នក* ដែលមិនមាំមួន។ ចិត្តរបស់ពួកគេបានត្រូវបង្ហាត់ខាងសេចក្ដីលោភ។* ពួកគេជាកូនដែលត្រូវបណ្ដាសា។ ១៥ ពួកគេបានបោះបង់ចោលផ្លូវត្រង់ ហើយបានត្រូវបំភាន់។ ពួកគេដើរតាមគន្លងរបស់បាឡាម ជាកូនបេអ័រ ដែលបានស្រឡាញ់រង្វាន់ដែលមកពីអំពើខុសឆ្គង ១៦ ប៉ុន្តែគាត់បានត្រូវប្រដៅតម្រង់ដោយសារគាត់រំលោភច្បាប់។ សត្វអូសទាញដែលមិនចេះនិយាយ បាននិយាយដោយសំឡេងមនុស្សដើម្បីឃាត់អ្នកប្រកាសទំនាយមិនឲ្យធ្វើអំពើឆ្កួត។
១៧ អ្នកទាំងនោះគឺដូចជារន្ធទឹកស្ងួត ហើយដូចជាអ័ព្ទដែលត្រូវបក់ផាត់ដោយព្យុះសង្ឃរា។ ភាពងងឹតសូន្យបានត្រូវបម្រុងទុកសម្រាប់ពួកគេ។ ១៨ ពួកគេនិយាយអួតឥតប្រយោជន៍ ហើយតាមរយៈសេចក្ដីប៉ងប្រាថ្នាខុសឆ្គងនិងសីលធម៌ធូររលុង ពួកគេទាក់ទាញចិត្តពួកអ្នកដែលទើបតែគេចរួចពីមនុស្សដែលធ្វើខុស។ ១៩ ពួកគេសន្យាថានឹងធ្វើឲ្យអ្នកទាំងនោះមានសេរីភាព តែពួកគេជាខ្ញុំបម្រើនៃសេចក្ដីខូចអាក្រក់។ ព្រោះបុគ្គលណាម្នាក់ក្លាយទៅជាខ្ញុំបម្រើរបស់អ្នកដែលមានអំណាចលើខ្លួន។ ២០ ប្រសិនបើពួកគេបានរួចពីភក់ជ្រាំនៃអំពើខុសឆ្គងក្នុងពិភពលោកនេះ តាមរយៈចំណេះត្រឹមត្រូវអំពីលោកយេស៊ូគ្រិស្តដែលជាម្ចាស់និងជាអ្នកសង្គ្រោះ តែបែរជាជាប់ជំពាក់នឹងការទាំងនេះម្ដងទៀត ហើយការទាំងនេះចាប់ផ្ដើមមានអំណាចលើអ្នកនោះ ស្ថានភាពចុងក្រោយរបស់ពួកគេគឺអាក្រក់ជាងស្ថានភាពដំបូង។ ២១ ព្រោះប្រសិនបើពួកគេមិនបានស្គាល់ច្បាស់នូវផ្លូវនៃសេចក្ដីសុចរិត នោះប្រសើរជាងបានស្គាល់ច្បាស់ រួចបែរចេញពីបញ្ញត្ដិបរិសុទ្ធដែលពួកគេបានទទួល។ ២២ ពួកគេបានធ្វើអ្វីដែលសុភាសិតដ៏ពិតនោះចែងថា៖ «ឆ្កែបានត្រឡប់ទៅឯកម្អួតរបស់វា ហើយជ្រូកដែលគេបានលាងសម្អាតបានត្រឡប់ទៅននៀលក្នុងភក់»។
៣ បងប្អូនជាទីស្រឡាញ់អើយ នេះជាសំបុត្រទីពីរដែលខ្ញុំសរសេរទៅកាន់អ្នករាល់គ្នា ហើយក្នុងសំបុត្រនេះ ដូចក្នុងសំបុត្រទីមួយរបស់ខ្ញុំ ខ្ញុំកំពុងជំរុញសមត្ថភាពរិះគិតច្បាស់លាស់របស់អ្នករាល់គ្នាដោយការរំលឹក ២ ដើម្បីឲ្យអ្នករាល់គ្នានឹកឃើញអ្វីដែលពួកអ្នកប្រកាសទំនាយបរិសុទ្ធបានប្រាប់ ហើយនឹកឃើញបញ្ញត្ដិដែលលោកជាម្ចាស់និងជាអ្នកសង្គ្រោះបានឲ្យតាមរយៈបណ្ដាសាវ័កនៃអ្នករាល់គ្នា។ ៣ ព្រោះអ្នករាល់គ្នាដឹងជាមុនថា នៅគ្រាចុងក្រោយបង្អស់នឹងមានពួកអ្នកចំអក ដែលបណ្ដែតបណ្ដោយទៅតាមសេចក្ដីប៉ងប្រាថ្នារបស់ខ្លួន មកចំអក ៤ ហើយនិយាយថា៖ «លោកសន្យាថានឹងមក* តែតើលោកនៅឯណា? ចាប់ពីថ្ងៃដែលពួកបុព្វបុរសរបស់យើងដេកលក់ក្នុងសេចក្ដីស្លាប់ អ្វីៗទាំងអស់នៅដដែល តាំងពីពេលចាប់ផ្ដើមបង្កើតពិភពលោកមក»។
៥ ព្រោះពួកគេចង់បំភ្លេចការពិតដូចតទៅនេះថា ដោយសារប្រសាសន៍របស់ព្រះ នោះកើតមានមេឃនៅសម័យបុរាណ និងមានផែនដីដែលរឹងផុសឡើងពីទឹក ក៏នៅកណ្ដាលទឹក ៦ ហើយដោយការទាំងនោះ ពិភពលោកនៅសម័យនោះបានត្រូវបំផ្លាញចោល ពេលដែលមានទឹកជំនន់។ ៧ ក៏ប៉ុន្តែ ដោយសារប្រសាសន៍ដដែលនោះ មេឃនិងផែនដីដែលមានឥឡូវនេះបានត្រូវទុកដោយឡែកសម្រាប់ឲ្យភ្លើងឆេះ ហើយបានត្រូវទុកសម្រាប់ថ្ងៃវិនិច្ឆ័យទោសមនុស្សទុច្ចរិតហើយបំផ្លាញពួកគេចោល។
៨ ក៏ប៉ុន្តែបងប្អូនជាទីស្រឡាញ់អើយ កុំភ្លេចការពិតដូចតទៅនេះថា ចំពោះព្រះយេហូវ៉ា មួយថ្ងៃគឺស្មើមួយពាន់ឆ្នាំ ហើយមួយពាន់ឆ្នាំគឺស្មើមួយថ្ងៃ។ ៩ ព្រះយេហូវ៉ាមិនយឺតក្នុងការធ្វើតាមសេចក្ដីសន្យារបស់លោក ដូចមនុស្សខ្លះគិតថាយឺតនោះទេ ប៉ុន្តែលោកអត់ធ្មត់នឹងយើង ពីព្រោះលោកមិនចង់ឲ្យអ្នកណាត្រូវបំផ្លាញចោលឡើយ តែចង់ឲ្យមនុស្សទាំងអស់មានឱកាសប្រែចិត្ត។ ១០ ទោះជាយ៉ាងនោះក៏ដោយ ថ្ងៃរបស់ព្រះយេហូវ៉ានឹងមកដូចជាចោរ ហើយនៅពេលនោះមេឃនិងបាត់ទៅយ៉ាងលឿនដោយសំឡេងលាន់ឮរំពង ប៉ុន្តែធាតុនានានឹងក្ដៅក្រៃលែងហើយនឹងរលាយសាបសូន្យទៅ ឯផែនដីនិងអ្វីៗនៅលើផែនដីនឹងត្រូវរកឃើញ។*
១១ ដូច្នេះ ដោយសារការទាំងអស់នោះនឹងត្រូវរំលាយសាបសូន្យទៅ ចូរពិចារណាថា អ្នករាល់គ្នាគួរជាមនុស្សប្រភេទណា។ អ្នករាល់គ្នាគួរជាមនុស្សដែលមានការប្រព្រឹត្តបរិសុទ្ធ ហើយធ្វើការអ្វីដែលបង្ហាញពីភក្ដីភាពចំពោះព្រះ ១២ ដោយទន្ទឹងហើយចាំជាប់ជានិច្ចនូវការមកដល់នៃថ្ងៃ* របស់ព្រះយេហូវ៉ា។ តាមរយៈថ្ងៃនោះ មេឃនឹងត្រូវភ្លើងឆេះរលាយសាបសូន្យ ឯធាតុនានានឹងក្ដៅក្រៃលែងហើយរលាយបាត់ទៅ! ១៣ ប៉ុន្តែយើងកំពុងទន្ទឹងរង់ចាំមេឃថ្មីនិងផែនដីថ្មី ស្របតាមសេចក្ដីសន្យារបស់លោក ហើយទីនោះ សេចក្ដីសុចរិតនឹងស្ថិតស្ថេរជាដរាប។
១៤ ដូច្នេះ បងប្អូនទីស្រឡាញ់អើយ ដោយសារអ្នករាល់គ្នាកំពុងទន្ទឹងការទាំងនេះ ចូរខំអស់ពីសមត្ថភាព ដើម្បីនៅទីបំផុតលោកនឹងឃើញថា អ្នករាល់គ្នាគឺឥតស្នាមប្រឡាក់ ស្អាតស្អំ ហើយមានសន្ដិភាព។ ១៥ ម្យ៉ាងទៀត ចូរចាត់ទុកចិត្តអត់ធ្មត់របស់លោកម្ចាស់យើងថាជាសេចក្ដីសង្គ្រោះ ដូចប៉ូល បងប្រុសជាទីស្រឡាញ់របស់យើងបានសរសេរទៅកាន់អ្នករាល់គ្នាស្របតាមប្រាជ្ញាដែលគាត់បានទទួល។ ១៦ តាមពិត គាត់និយាយអំពីការទាំងនេះក្នុងសំបុត្រទាំងអស់របស់គាត់។ ក៏ប៉ុន្តែក្នុងសំបុត្រទាំងនោះមានសេចក្ដីខ្លះដែលពិបាកយល់ ហើយពួកអ្នកដែលមិនបានទទួលការបង្រៀន និងពួកអ្នកដែលមិនមាំមួន បង្ខុសអត្ថន័យនៃសេចក្ដីនោះ ដូចពួកគេបង្ខុសអត្ថន័យនៃបទគម្ពីរទាំងប៉ុន្មានទៀត ហើយនាំឲ្យខ្លួនទទួលសេចក្ដីហិនវិនាស។
១៧ ដូច្នេះ បងប្អូនជាទីស្រឡាញ់អើយ ដោយសារអ្នករាល់គ្នាដឹងអំពីការទាំងនេះជាមុន ចូរប្រុងប្រយ័ត្ន ដើម្បីកុំឲ្យពួកអ្នកបំពានច្បាប់ទាំងនោះ នាំអ្នករាល់គ្នាចេញទៅដោយការបោកបញ្ឆោតរបស់ពួកគេ ហើយធ្វើឲ្យអ្នករាល់គ្នាបាត់បង់ភាពមាំមួន។ ១៨ ផ្ទុយទៅវិញ ចូរបន្តទទួលគុណដ៏វិសេសលើសលប់និងចំណេះពីលោកយេស៊ូគ្រិស្ត ដែលជាម្ចាស់និងជាអ្នកសង្គ្រោះរបស់យើង។ សូមឲ្យលោកប្រកបដោយសិរីរុងរឿងឥឡូវនេះ និងជារៀងរហូតតទៅ។
[កំណត់សម្គាល់]
ភាសាក្រិច«អាប៉ូស្តូឡូស»។ មានន័យថា«អ្នកដែលត្រូវគេចាត់ឲ្យទៅ»
មើលសេចក្ដីពន្យល់បន្ថែមផ្នែកទី៤
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ឬ«រូបកាយនៅផែនដី»
មើលកំណត់សម្គាល់ខ៤
មើលកំណត់សម្គាល់កាឡ ៥:១៩
ឬ«ច្រណែនចង់បានរបស់អ្នកដទៃ»
ឋាឋារ៉ុសសំដៅទៅស្ថានភាពដ៏ទាបថោកដែលប្រៀបដូចជាគុកដែលព្រះដាក់ពួកទេវតាមិនស្ដាប់បង្គាប់នៅសម័យណូអេ
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
មើលកំណត់សម្គាល់ខ៣
ន័យត្រង់«វត្តមាន»
ក្នុងន័យថាភ្លើងនឹងរត់ទៅរក
ន័យត្រង់«វត្តមាននៃថ្ងៃ»