សំបុត្រទីមួយរបស់យ៉ូហាន
១ យើងកំពុងសរសេរមកកាន់អ្នករាល់គ្នា អំពីអ្នកដែលមាននៅកាលពីដើមដំបូង គឺជាអ្នកនាំពាក្យដែលផ្ដល់ជីវិត ជាអ្នកដែលយើងបានឮនិងឃើញផ្ទាល់នឹងភ្នែក ថែមទាំងបានសង្កេតមើលដោយយកចិត្តទុកដាក់ ហើយក៏បានពាល់ដោយដៃយើងផ្ទាល់ផង។ ២ (ជីវិតនេះបានត្រូវសម្ដែងឲ្យឃើញពិតមែន។ យើងបានឃើញ ហើយជាសាក្សីអំពីរឿងនេះ ក៏កំពុងប្រាប់អ្នករាល់គ្នាអំពីជីវិតដែលគ្មានទីបញ្ចប់ ដែលបានមកពីបិតាដែលស្ថិតនៅស្ថានសួគ៌ ហើយដែលបានត្រូវបើកសម្ដែងឲ្យយើងឃើញ)។ ៣ យើងកំពុងប្រាប់អ្នករាល់គ្នាអំពីអ្វីដែលយើងបានឃើញនិងឮ ដើម្បីឲ្យអ្នកអាចរួមចំណែកជាមួយនឹងយើងដែរ។ ដោយធ្វើដូច្នេះ យើងទាំងអស់គ្នាក៏រួមចំណែកជាមួយនឹងលោកយេស៊ូគ្រិស្ត* និងបិតារបស់លោក។ ៤ នេះជាមូលហេតុដែលយើងសរសេររឿងទាំងនេះ គឺដើម្បីឲ្យអំណររបស់យើងទាំងអស់គ្នាបានពេញលេញ។
៥ ម្ល៉ោះហើយ នេះជាបណ្ដាំដែលយើងបានឮពីលោក ហើយកំពុងប្រកាសប្រាប់អ្នករាល់គ្នាថា ព្រះគឺជាពន្លឺ ហើយគ្មានភាពងងឹតនៅក្នុងព្រះឡើយ។ ៦ ប្រសិនបើយើងនិយាយថា«យើងកំពុងរួមចំណែកជាមួយនឹងព្រះ» ប៉ុន្តែយើងនៅតែដើរក្នុងភាពងងឹតតទៅទៀត នោះមានន័យថាយើងជាអ្នកភូតភរ ហើយក៏មិនប្រព្រឹត្តតាមសេចក្ដីពិតដែរ។ ៧ ក៏ប៉ុន្តែ ប្រសិនបើយើងដើរក្នុងពន្លឺ ដូចព្រះនៅក្នុងពន្លឺ នោះយើងកំពុងរួមចំណែកជាមួយគ្នាមែន ហើយឈាមរបស់លោកយេស៊ូជាបុត្ររបស់ព្រះក៏សម្អាតយើងពីភាពខុសឆ្គង* ទាំងអស់។
៨ ប្រសិនបើយើងនិយាយថា«យើងគ្មានភាពខុសឆ្គងទេ» នោះយើងកំពុងបញ្ឆោតខ្លួនហើយ ឯសេចក្ដីពិតក៏មិននៅក្នុងយើងដែរ។ ៩ ក៏ប៉ុន្តែ បើយើងទទួលសារភាពការខុសឆ្គងរបស់យើង នោះព្រះនឹងអភ័យទោសចំពោះការខុសឆ្គងទាំងនោះ ហើយសម្អាតយើងឲ្យអស់លក្ខណៈមិនសុចរិត ពីព្រោះលោកស្មោះត្រង់ ហើយសុចរិត។ ១០ ប្រសិនបើយើងនិយាយថា«យើងមិនធ្លាប់ធ្វើខុស* ទេ» នោះដូចជាយើងចោទថា ព្រះជាអ្នកកុហក។ មិនតែប៉ុណ្ណោះ បណ្ដាំរបស់ព្រះក៏មិននៅក្នុងយើងដែរ។
២ កូនៗអើយ! ខ្ញុំសរសេររឿងទាំងនេះមកអ្នករាល់គ្នា ដើម្បីកុំឲ្យអ្នកធ្វើខុសអ្វីមួយឡើយ។ ក៏ប៉ុន្តែ ប្រសិនបើមានអ្នកណាភ្លាត់ធ្វើខុសអ្វីមួយ នោះលោកយេស៊ូគ្រិស្តដែលនៅជាមួយនឹងបិតាដែលស្ថិតនៅស្ថានសួគ៌ និងជាអ្នកសុចរិត នឹងជួយយើង។ ២ លោកបានធ្វើជាគ្រឿងបូជាសម្រាប់ផ្សះផ្សាចំណងមិត្តភាពរវាងយើងនិងព្រះ ហើយលោះយើងពីការខុសឆ្គង មិនគ្រាន់តែការខុសឆ្គងរបស់យើងប៉ុណ្ណោះទេ តែការខុសឆ្គងរបស់មនុស្សក្នុងពិភពលោកទាំងមូលដែរ។ ៣ បន្ថែមទៅទៀត ប្រសិនបើយើងប្រព្រឹត្តតាមបញ្ញត្ដិរបស់លោកជានិច្ច នោះយើងដឹងថាយើងស្គាល់លោកមែន។ ៤ អ្នកណាដែលនិយាយថា«ខ្ញុំស្គាល់លោកហើយ» តែមិនប្រព្រឹត្តតាមបញ្ញត្ដិរបស់លោក អ្នកនោះជាអ្នកភូតភរ ហើយសេចក្ដីពិតមិននៅក្នុងអ្នកនោះទេ។ ៥ ក៏ប៉ុន្តែ អ្នកណាដែលប្រព្រឹត្តតាមបណ្ដាំរបស់លោក អ្នកនោះពិតជាមានសេចក្ដីស្រឡាញ់ដ៏ពេញលក្ខណៈចំពោះព្រះ។ នេះបង្ហាញឲ្យយើងដឹងថា យើងរួបរួមជាមួយនឹងលោកហើយ។ ៦ អ្នកណាដែលនិយាយថាខ្លួនរួបរួមជាមួយនឹងលោកហើយ អ្នកនោះក៏មានកាតព្វកិច្ចរក្សារបៀបរស់នៅ ដូចលោកយេស៊ូធ្លាប់មានដែរ។*
៧ បងប្អូនជាទីស្រឡាញ់អើយ! ខ្ញុំមិនមែនសរសេរបញ្ញត្ដិថ្មីមកឲ្យអ្នករាល់គ្នាទេ តែគឺជាបញ្ញត្ដិចាស់ដែលអ្នករាល់គ្នាបានទទួលពីដើមដំបូង។ បញ្ញត្ដិចាស់នេះគឺជាបណ្ដាំដែលអ្នកធ្លាប់ឮ។ ៨ ទោះបីជាដូច្នេះក៏ដោយ ខ្ញុំកំពុងសរសេរបញ្ញត្ដិថ្មីមកឲ្យអ្នករាល់គ្នា គឺជាបញ្ញត្ដិដែលលោកបានកាន់តាម ហើយអ្នកក៏បានកាន់តាមដែរ ពីព្រោះភាពងងឹតកំពុងបាត់សូន្យទៅ ហើយពន្លឺដ៏ពិតកំពុងភ្លឺឡើង។
៩ អ្នកណាដែលនិយាយថា ខ្លួននៅក្នុងពន្លឺ តែស្អប់បងប្អូនខ្លួន អ្នកនោះជាអ្នកនៅក្នុងភាពងងឹតរហូតមកដល់ឥឡូវនេះ។ ១០ អ្នកណាដែលស្រឡាញ់បងប្អូនខ្លួន អ្នកនោះស្ថិតនៅក្នុងពន្លឺ ហើយក្នុងករណីរបស់អ្នកនោះ គ្មានហេតុដែលបណ្ដាលឲ្យជំពប់ដួល* ឡើយ។ ១១ ប៉ុន្តែអ្នកណាដែលស្អប់បងប្អូនខ្លួន អ្នកនោះនៅក្នុងភាពងងឹត ហើយកំពុងដើរក្នុងភាពងងឹត។ អ្នកនោះថែមទាំងមិនដឹងថាខ្លួនកំពុងទៅឯណាផង ពីព្រោះភាពងងឹតបានធ្វើឲ្យគាត់មើលមិនឃើញ។
១២ កូនៗអើយ! ខ្ញុំកំពុងសរសេរមកកាន់អ្នករាល់គ្នា ពីព្រោះព្រះបានអភ័យទោសចំពោះការខុសឆ្គងរបស់អ្នក ដើម្បីនាមរបស់លោក។* ១៣ ឪពុកទាំងឡាយអើយ! ខ្ញុំសរសេរទៅកាន់អ្នករាល់គ្នា ពីព្រោះអ្នករាល់គ្នាស្គាល់លោកដែលមាននៅកាលពីដើមដំបូង។ យុវជនទាំងឡាយអើយ! ខ្ញុំសរសេរទៅកាន់អ្នករាល់គ្នា ពីព្រោះអ្នករាល់គ្នាបានឈ្នះមេកំណាច។ កូនទាំងឡាយអើយ! ខ្ញុំសរសេរទៅកាន់អ្នករាល់គ្នា ពីព្រោះអ្នករាល់គ្នាស្គាល់បិតាដែលស្ថិតនៅស្ថានសួគ៌។ ១៤ ឪពុកទាំងឡាយអើយ! ខ្ញុំកំពុងសរសេរទៅកាន់អ្នករាល់គ្នា ពីព្រោះអ្នករាល់គ្នាស្គាល់លោកដែលមាននៅកាលពីដើមដំបូង។ យុវជនទាំងឡាយអើយ! ខ្ញុំកំពុងសរសេរទៅកាន់អ្នករាល់គ្នា ពីព្រោះអ្នករាល់គ្នាមានភាពរឹងមាំ ថែមទាំងបានឈ្នះមេកំណាច ហើយបណ្ដាំរបស់ព្រះក៏នៅជាប់ក្នុងចិត្តរបស់អ្នករាល់គ្នា។
១៥ កុំស្រឡាញ់ពិភពលោកនេះ ឬអ្វីៗក្នុងពិភពលោកនេះឡើយ។ ប្រសិនបើអ្នកណាស្រឡាញ់ពិភពលោកនេះ អ្នកនោះមិនស្រឡាញ់បិតាដែលស្ថិតនៅស្ថានសួគ៌ឡើយ។ ១៦ ពីព្រោះអ្វីៗក្នុងពិភពលោកនេះ ពោលគឺសេចក្ដីប៉ងប្រាថ្នាខុសឆ្គង ការចង់បានអ្វីដែលទាក់ទាញភ្នែក និងការអួតសម្ញែងភាពមានបានរបស់ខ្លួន នោះមិនមែនមកពីបិតាដែលស្ថិតនៅស្ថានសួគ៌ឡើយ តែមកពីពិភពលោកនេះវិញ។ ១៧ ម្យ៉ាងទៀត ពិភពលោកនេះ និងសេចក្ដីប៉ងប្រាថ្នារបស់វា កំពុងឈានទៅរកការសាបសូន្យ ប៉ុន្តែអ្នកណាដែលធ្វើតាមបំណងប្រាថ្នារបស់ព្រះ អ្នកនោះនឹងនៅជាប់ជារៀងរហូតវិញ។
១៨ កូនៗអើយ! នេះគឺជាពេលវេលាចុងក្រោយ ហើយអ្នកបានឮថាសត្រូវរបស់គ្រិស្តនឹងមក។ សូម្បីតែឥឡូវនេះ សត្រូវរបស់គ្រិស្តបានលេចមកជាច្រើន។ ហេតុដូច្នេះយើងដឹងថា នេះជាពេលវេលាចុងក្រោយ។ ១៩ ពួកគេបានចេញពីចំណោមយើងទៅ តែពួកគេមិនមែនជាគ្នាយើងទេ ពីព្រោះបើជាគ្នាយើងមែន នោះពួកគេនឹងនៅជាប់ជាមួយនឹងយើង។ ប៉ុន្តែពួកគេបានចេញពីចំណោមយើងទៅ នេះបង្ហាញឲ្យឃើញច្បាស់ថា មិនមែនអ្នកដែលនៅក្នុងចំណោមយើង ជាគ្នាយើងទាំងអស់ទេ។ ២០ បន្ថែមទៅទៀត ព្រះដ៏បរិសុទ្ធបានរើសតាំងអ្នករាល់គ្នា ហើយអ្នកក៏មានចំណេះ។ ២១ ខ្ញុំសរសេរមកអ្នករាល់គ្នា មិនមែនដោយសារអ្នករាល់គ្នាមិនស្គាល់សេចក្ដីពិតនោះទេ។ តែខ្ញុំសរសេរពីព្រោះអ្នករាល់គ្នាស្គាល់សេចក្ដីពិត ហើយពីព្រោះគ្មានសេចក្ដីភូតភរណាអាចកើតពីសេចក្ដីពិតបានឡើយ។
២២ តើអ្នកណាជាអ្នកកុហក បើមិនមែនអ្នកដែលមិនព្រមទទួលស្គាល់លោកយេស៊ូថាជាគ្រិស្ត? អ្នកណាដែលមិនព្រមទទួលស្គាល់បិតាដែលស្ថិតនៅស្ថានសួគ៌និងបុត្ររបស់លោក អ្នកនោះគឺជាសត្រូវរបស់គ្រិស្ត។ ២៣ អ្នកណាដែលមិនព្រមទទួលស្គាល់បុត្ររបស់ព្រះ អ្នកនោះមិនធ្វើឲ្យបិតាដែលស្ថិតនៅស្ថានសួគ៌ពេញចិត្តឡើយ។ តែអ្នកណាដែលទទួលស្គាល់បុត្ររបស់ព្រះ អ្នកនោះធ្វើឲ្យបិតាដែលស្ថិតនៅស្ថានសួគ៌ពេញចិត្តវិញ។ ២៤ ចំណែកអ្នករាល់គ្នា ចូររក្សានូវអ្វីៗដែលអ្នករាល់គ្នាបានឮពីដើមដំបូងឲ្យនៅជាប់ក្នុងចិត្តចុះ! ប្រសិនបើអ្វីៗដែលអ្នករាល់គ្នាបានឮពីដើមដំបូងនៅជាប់ក្នុងចិត្តនោះ អ្នកនឹងរួបរួមជាមួយនឹងបិតាដែលស្ថិតនៅស្ថានសួគ៌និងបុត្ររបស់លោក។ ២៥ ម្យ៉ាងទៀត នេះជាសេចក្ដីសន្យារបស់លោកថា យើងនឹងរស់ជារៀងរហូត។
២៦ ខ្ញុំសរសេររឿងទាំងនេះអំពីពួកអ្នកដែលខំបំភាន់អ្នករាល់គ្នា។ ២៧ ចំណែកអ្នករាល់គ្នាវិញ ព្រះបានរើសតាំង* អ្នកដោយសកម្មពល* របស់លោក ហើយសកម្មពលនោះនៅក្នុងអ្នក អ្នកក៏មិនត្រូវការអ្នកណាបង្រៀនអ្នកឡើយ។ ប៉ុន្តែការរើសតាំងដាយសកម្មពលរបស់លោកគឺជាសេចក្ដីពិត មិនមែនជាសេចក្ដីភូតភរទេ ហើយកំពុងបង្រៀនអ្នកអំពីអ្វីៗទាំងអស់។ ចូររួបរួមជាមួយនឹងលោកជារៀងរហូតតទៅ ដូចសកម្មពលរបស់លោកបានបង្រៀនអ្នក។ ២៨ ឥឡូវ កូនៗអើយ! ចូររួបរួមជាមួយនឹងលោកជារៀងរហូតតទៅ។ យ៉ាងនោះ យើងអាចនិយាយដោយក្លាហាន ពេលដែលលោកត្រូវសម្ដែងឲ្យឃើញក្នុងអំឡុងវត្តមានរបស់លោក ហើយយើងមិនត្រូវចេញពីមុខលោក ដោយទទួលសេចក្ដីអាម៉ាស់ខ្មាសឡើយ។ ២៩ ប្រសិនបើអ្នករាល់គ្នាដឹងថាលោកសុចរិត អ្នកក៏ដឹងដែរថា អស់អ្នកដែលប្រព្រឹត្តអំពើសុចរិត នោះកើតមកពីលោក។
៣ ចូរគិតពីសេចក្ដីស្រឡាញ់ដ៏ជ្រាលជ្រៅ ដែលបិតានៅស្ថានសួគ៌មានចំពោះយើង ដោយចាត់ទុកយើងជាកូន។ យើងជាកូនព្រះមែន ហើយនេះជាមូលហេតុដែលពិភពលោកនេះមិនស្គាល់យើង ពីព្រោះពួកគេមិនស្គាល់ព្រះ។ ២ បងប្អូនជាទីស្រឡាញ់អើយ! យើងជាកូនព្រះ ប៉ុន្តែព្រះមិនទាន់បង្ហាញឲ្យយើងដឹងថា យើងនឹងទៅជាយ៉ាងណានោះឡើយ។ អ្វីដែលយើងដឹងគឺ យើងនឹងបានដូចព្រះ ពេលដែលព្រះបង្ហាញឲ្យយើងឃើញលោក ពីព្រោះព្រះគឺយ៉ាងណា យើងនឹងឃើញលោកយ៉ាងនោះ។ ៣ ហើយអស់អ្នកណាដែលមានសេចក្ដីសង្ឃឹមនេះដែលមានមូលដ្ឋានលើលោក អ្នកនោះសម្អាតខ្លួនឲ្យបរិសុទ្ធ ដូចលោកបរិសុទ្ធដែរ។
៤ អ្នកណាដែលប្រព្រឹត្ត* អំពើខុសឆ្គង មានន័យថាប្រព្រឹត្តប្រឆាំងច្បាប់។ ដូច្នេះ អំពើខុសឆ្គងគឺជាអំពើប្រឆាំងច្បាប់។ ៥ អ្នកក៏ដឹងដែរថា លោកយេស៊ូបានមកដើម្បីដកយកការខុសឆ្គងរបស់យើងចេញ ហើយលោកគ្មានភាពខុសឆ្គងសោះឡើយ។ ៦ អ្នកណាដែលរួបរួមជាមួយនឹងលោក មិនប្រព្រឹត្តអំពើខុសឆ្គងទេ។ អ្នកណាដែលប្រព្រឹត្តអំពើខុសឆ្គង អ្នកនោះមិនធ្លាប់ឃើញលោកឡើយ ហើយក៏មិនស្គាល់លោកដែរ។ ៧ កូនៗអើយ! កុំឲ្យអ្នកណាបំភាន់អ្នកឡើយ។ អ្នកណាដែលប្រព្រឹត្តអំពើសុចរិត អ្នកនោះក៏សុចរិត ដូចលោកដែរ។ ៨ អ្នកណាដែលប្រព្រឹត្តអំពើខុសឆ្គង អ្នកនោះមកពីមេកំណាច* ពីព្រោះមេកំណាចបានប្រព្រឹត្តអំពើខុសឆ្គងតាំងពីដើមដំបូង។ នេះជាមូលហេតុដែលបុត្ររបស់ព្រះបានមក ពោលគឺដើម្បីបំផ្លាញស្នាដៃរបស់មេកំណាច។
៩ អ្នកណាដែលកើតមកពីព្រះ មិនប្រព្រឹត្តអំពើខុសឆ្គងឡើយ ពីព្រោះពូជរបស់លោកនៅជាប់ក្នុងអ្នកនោះ ហើយអ្នកនោះមិនអាចប្រព្រឹត្តអំពើខុសឆ្គងបានឡើយ ពីព្រោះអ្នកនោះបានកើតមកពីព្រះ។ ១០ យើងអាចសម្គាល់កូនរបស់ព្រះ និងកូនរបស់មេកំណាចបាន ដោយសេចក្ដីនេះឯង គឺអ្នកណាដែលមិនប្រព្រឹត្តអំពើសុចរិត ឬមិនស្រឡាញ់បងប្អូនខ្លួន អ្នកនោះមិនកើតមកពីព្រះទេ។ ១១ ព្រោះថា នេះជាបណ្ដាំដែលអ្នករាល់គ្នាបានឮពីដើមដំបូងថា យើងត្រូវស្រឡាញ់គ្នាទៅវិញទៅមក។ ១២ យើងមិនត្រូវប្រព្រឹត្តដូចកាអ៊ីនដែលកើតមកពីមេកំណាច ហើយបានសម្លាប់ប្អូនខ្លួនយ៉ាងសាហាវនោះឡើយ។ ហេតុអ្វីបានជាគាត់សម្លាប់ប្អូនដូច្នេះ? ពីព្រោះអំពើដែលគាត់ធ្លាប់ធ្វើសុទ្ធតែទុច្ចរិត ប៉ុន្តែអំពើដែលប្អូនរបស់គាត់ធ្លាប់ធ្វើសុទ្ធតែសុចរិត។
១៣ បងប្អូនអើយ! សូមកុំឆ្ងល់ឡើយ ពេលដែលពិភពលោកនេះស្អប់អ្នករាល់គ្នា។ ១៤ ដោយសារយើងស្រឡាញ់បងប្អូន នោះយើងដឹងថា យើងបានឆ្លងផុតពីសេចក្ដីស្លាប់មកកាន់ជីវិតហើយ។ អ្នកណាដែលមិនស្រឡាញ់បងប្អូន អ្នកនោះស្ថិតនៅក្នុងសេចក្ដីស្លាប់នៅឡើយ។ ១៥ អ្នកណាដែលស្អប់បងប្អូនខ្លួន អ្នកនោះជាឃាតករ ហើយអ្នកដឹងថាគ្មានឃាតករណាមានជីវិតរស់នៅជារៀងរហូតស្ថិតនៅក្នុងខ្លួនឡើយ។ ១៦ យើងស្គាល់សេចក្ដីស្រឡាញ់ ដោយសារសេចក្ដីនេះឯង គឺពីព្រោះលោកបានលះបង់ជីវិត* ដើម្បីយើង ម្ល៉ោះហើយយើងក៏មានកាតព្វកិច្ចលះបង់ជីវិតដើម្បីបងប្អូនយើងដែរ។ ១៧ ប្រសិនបើអ្នកណាមានធនធានសម្រាប់ចិញ្ចឹមជីវិត ហើយសង្កេតឃើញបងប្អូនខ្លួនខ្វះខាត តែបែរជាមិនព្រមអាណិតមេត្ដាទៅវិញ តើអ្នកនោះអាចមានសេចក្ដីស្រឡាញ់ចំពោះព្រះដូចម្ដេចបាន? ១៨ កូនៗអើយ! យើងមិនត្រូវស្រឡាញ់តែមាត់ ឬដោយពាក្យសម្ដីប៉ុណ្ណោះទេ ប៉ុន្តែត្រូវស្រឡាញ់ដោយការប្រព្រឹត្ត និងដោយសេចក្ដីពិតវិញ។
១៩ គឺសេចក្ដីនោះឯងដែលឲ្យយើងដឹងថាយើងកើតមកពីសេចក្ដីពិត។ ម្ល៉ោះហើយ នៅចំពោះលោក យើងពង្រឹងទំនុកចិត្តរបស់យើង ២០ ក្នុងរឿងអ្វីក៏ដោយដែលចិត្តរបស់យើងផ្ដន្ទាទោសយើង ពីព្រោះព្រះធំជាងចិត្តរបស់យើង ហើយក៏ជ្រាបគ្រប់ទាំងអស់។ ២១ បងប្អូនជាទីស្រឡាញ់អើយ! បើចិត្តរបស់យើងមិនផ្ដន្ទាទោសយើងទេ នោះយើងអាចនិយាយដោយក្លាហាននៅចំពោះព្រះ ២២ ហើយអ្វីក៏ដោយដែលយើងសុំពីព្រះ យើងនឹងទទួល ពីព្រោះយើងកាន់តាមបញ្ញត្ដិរបស់លោក ថែមទាំងកំពុងធ្វើអ្វីៗដែលលោកពេញចិត្តផង។ ២៣ ឯបញ្ញត្ដិរបស់លោកគឺឲ្យយើងមានជំនឿលើនាមរបស់លោកយេស៊ូគ្រិស្ត ជាបុត្ររបស់លោក ព្រមទាំងស្រឡាញ់គ្នាទៅវិញទៅមក ដូចលោកបានបង្គាប់យើង។ ២៤ ម្យ៉ាងទៀត អ្នកណាដែលកាន់តាមបញ្ញត្ដិរបស់លោក អ្នកនោះរួបរួមជាមួយនឹងលោក ហើយលោកក៏រួបរួមជាមួយនឹងអ្នកនោះដែរ។ ម្ល៉ោះហើយ យើងដឹងថាលោករួបរួមជាមួយនឹងយើងជារៀងរហូតតទៅ ដោយសារសកម្មពល* របស់លោកដែលយើងបានទទួល។
៤ បងប្អូនជាទីស្រឡាញ់អើយ! កុំជឿគ្រប់ទាំងបណ្ដាំ* ដែលហាក់ដូចជាមកពីព្រះឡើយ។ ប៉ុន្តែ ចូរពិសោធមើលថា តើបណ្ដាំនោះមកពីព្រះឬមិនមែន ពីព្រោះក្នុងពិភពលោកនេះ មានអ្នកប្រកាសទំនាយមិនពិតជាច្រើនដែលបានលេចមក។
២ អ្នកអាចសម្គាល់បណ្ដាំដែលមកពីព្រះដោយសេចក្ដីនេះឯង គឺបណ្ដាំណាដែលបញ្ជាក់ថា លោកយេស៊ូគ្រិស្តធ្លាប់បានមកកើតជាមនុស្ស បណ្ដាំនោះមកពីព្រះ។ ៣ ក៏ប៉ុន្តែ បណ្ដាំណាដែលមិនបញ្ជាក់ដូច្នេះអំពីលោកយេស៊ូ បណ្ដាំនោះមិនមែនមកពីព្រះទេ។ ម្យ៉ាងទៀត បណ្ដាំនោះមកពីសត្រូវរបស់គ្រិស្ត និងជាបណ្ដាំដែលអ្នកបានឮថានឹងមកដល់។ ឥឡូវនេះបណ្ដាំនោះនៅក្នុងពិភពលោកហើយ។
៤ កូនៗអើយ! អ្នករាល់គ្នាមកពីព្រះ ហើយអ្នកបានឈ្នះអ្នកទាំងនោះ ពីព្រោះលោកដែលគាំទ្រអ្នករាល់គ្នាគឺធំជាងអ្នកដែលគាំទ្រពិភពលោកនេះ។ ៥ ពួកគេមកពីពិភពលោកនេះ។ ដូច្នេះអ្វីដែលពួកគេនិយាយក៏មកពីពិភពលោកនេះដែរ ហើយពិភពលោកនេះស្ដាប់ពួកគេ។ ៦ យើងមកពីព្រះ។ អ្នកណាដែលមានចំណេះអំពីព្រះ អ្នកនោះស្ដាប់យើង។ អ្នកណាដែលមិនមែនមកពីព្រះ អ្នកនោះមិនស្ដាប់យើងទេ។ គឺយ៉ាងនេះហើយដែលយើងអាចសម្គាល់បណ្ដាំដែលពិតនិងបណ្ដាំបោកបញ្ឆោតបាន។
៧ បងប្អូនជាទីស្រឡាញ់អើយ! យើងត្រូវស្រឡាញ់គ្នាទៅវិញទៅមកជានិច្ច ពីព្រោះសេចក្ដីស្រឡាញ់គឺមកពីព្រះ ហើយអ្នកណាដែលបង្ហាញសេចក្ដីស្រឡាញ់ អ្នកនោះកើតមកពីព្រះ ថែមទាំងមានចំណេះអំពីព្រះ។ ៨ អ្នកណាដែលគ្មានសេចក្ដីស្រឡាញ់ អ្នកនោះមិនស្គាល់ព្រះទេ ពីព្រោះព្រះគឺជាសេចក្ដីស្រឡាញ់។ ៩ សេចក្ដីស្រឡាញ់របស់ព្រះបានត្រូវសម្ដែងចំពោះយើង ពីព្រោះព្រះបានចាត់បុត្រតែមួយ* របស់លោកឲ្យមកក្នុងពិភពលោកនេះ ដើម្បីឲ្យយើងអាចបានជីវិតតាមរយៈបុត្រនោះ។ ១០ សេចក្ដីស្រឡាញ់នៅត្រង់កន្លែងនេះ គឺមិនមែនយើងទេដែលបានស្រឡាញ់ព្រះ តែគឺលោកដែលបានស្រឡាញ់យើង ដោយចាត់បុត្ររបស់លោក ឲ្យធ្វើជាគ្រឿងបូជាសម្រាប់ផ្សះផ្សាចំណងមិត្តភាពរវាងយើងនិងព្រះ។
១១ បងប្អូនជាទីស្រឡាញ់អើយ! ប្រសិនបើព្រះបានស្រឡាញ់យើងយ៉ាងនេះ យើងទាំងអស់គ្នាក៏មានកាតព្វកិច្ចស្រឡាញ់គ្នាទៅវិញទៅមកដែរ។ ១២ គ្មានអ្នកណាធ្លាប់ឃើញព្រះសោះឡើយ។ ប្រសិនបើយើងស្រឡាញ់គ្នាទៅវិញទៅមកជានិច្ច នោះព្រះនៅជាមួយនឹងយើង ហើយសេចក្ដីស្រឡាញ់របស់លោកនៅក្នុងយើងបានពេញលក្ខណៈ។ ១៣ យើងដឹងថាយើងកំពុងរួបរួមជាមួយនឹងលោក ហើយលោករួបរួមជាមួយនឹងយើង ដោយសារសេចក្ដីនេះឯង ពោលគឺលោកបានឲ្យសកម្មពល* របស់លោកមកយើង។ ១៤ បន្ថែមទៅទៀត យើងបានឃើញដោយផ្ទាល់ហើយកំពុងបញ្ជាក់ថា បិតាដែលនៅស្ថានសួគ៌បានចាត់បុត្ររបស់លោកឲ្យមកសង្គ្រោះពិភពលោក។ ១៥ អ្នកណាដែលប្រកាសដោយជំនឿថា លោកយេស៊ូគ្រិស្តជាបុត្រព្រះ អ្នកនោះរួបរួមជាមួយនឹងព្រះ ហើយព្រះក៏រួបរួមជាមួយនឹងអ្នកនោះដែរ។ ១៦ ម្យ៉ាងទៀត យើងបានស្គាល់ ហើយបានជឿសេចក្ដីស្រឡាញ់ដែលព្រះមានចំពោះយើង។
ព្រះគឺជាសេចក្ដីស្រឡាញ់។ អ្នកណាដែលស្ថិតនៅជាប់នឹងសេចក្ដីស្រឡាញ់ អ្នកនោះនៅរួបរួមជាមួយនឹងព្រះ ហើយព្រះនៅរួបរួមជាមួយនឹងអ្នកនោះ។ ១៧ គឺយ៉ាងនេះហើយដែលយើងមានសេចក្ដីស្រឡាញ់ពេញលក្ខណៈ ដើម្បីឲ្យយើងអាចនិយាយដោយក្លាហាននៅថ្ងៃវិនិច្ឆ័យសេចក្ដី ពីព្រោះលោកយេស៊ូគ្រិស្តគឺយ៉ាងណា យើងក៏ដូចលោកយ៉ាងនោះដែរ នៅក្នុងពិភពលោកនេះ។ ១៨ គ្មានការភ័យខ្លាចនៅក្នុងសេចក្ដីស្រឡាញ់ទេ។ ប៉ុន្តែ សេចក្ដីស្រឡាញ់ដែលពេញលក្ខណៈបំបាត់ការភ័យខ្លាច ពីព្រោះការភ័យខ្លាចតែងតែរារាំង។ អ្នកណាដែលភ័យខ្លាច អ្នកនោះមិនទាន់មានសេចក្ដីស្រឡាញ់ដ៏ពេញលក្ខណៈឡើយ។ ១៩ ចំណែកយើងវិញ យើងបង្ហាញសេចក្ដីស្រឡាញ់ ពីព្រោះព្រះបានស្រឡាញ់យើងជាមុន។
២០ បើអ្នកណានិយាយថា«ខ្ញុំស្រឡាញ់ព្រះ» តែស្អប់បងប្អូនខ្លួន អ្នកនោះនិយាយកុហក ព្រោះថាអ្នកណាដែលមិនស្រឡាញ់បងប្អូនដែលខ្លួនមើលឃើញ អ្នកនោះមិនអាចស្រឡាញ់ព្រះដែលខ្លួនមើលមិនឃើញឡើយ។ ២១ នេះជាបញ្ញត្ដិដែលយើងបានទទួលពីលោកគឺថា អ្នកណាដែលស្រឡាញ់ព្រះ ក៏ត្រូវស្រឡាញ់បងប្អូនខ្លួនដែរ។
៥ អ្នកណាដែលជឿថាលោកយេស៊ូជាគ្រិស្ត អ្នកនោះបានកើតមកពីព្រះ ហើយអ្នកណាដែលស្រឡាញ់បិតានៅស្ថានសួគ៌ដែលផ្ដល់កំណើតឲ្យនោះ ក៏ស្រឡាញ់អស់អ្នកដែលកើតមកពីព្រះដែរ។ ២ យើងដឹងថាយើងស្រឡាញ់កូនព្រះ ដោយសេចក្ដីនេះឯង គឺយើងស្រឡាញ់ព្រះ និងកាន់តាមបញ្ញត្ដិរបស់លោក។ ៣ ពីព្រោះការស្រឡាញ់ព្រះ មានន័យថា យើងកាន់តាមបញ្ញត្ដិរបស់លោក ហើយបញ្ញត្ដិរបស់លោកមិនមែនជាបន្ទុកធ្ងន់ទេ។ ៤ ពីព្រោះអ្វីៗដែលកើតមកពីព្រះ សុទ្ធតែឈ្នះពិភពលោកនេះ ហើយជ័យជម្នះលើពិភពលោកនេះ គឺដោយសារជំនឿរបស់យើង។
៥ តើអ្នកណាជាអ្នកដែលបានឈ្នះពិភពលោកនេះ បើមិនមែនជាអ្នកដែលមានជំនឿថា លោកយេស៊ូជាបុត្រព្រះ? ៦ គឺលោកយេស៊ូគ្រិស្តហើយ ដែលបានមកតាមរយៈទឹកនិងឈាម។ មិនគ្រាន់តែទឹកប៉ុណ្ណោះទេ តែដោយទឹកនិងឈាម។ ម្យ៉ាងទៀត សកម្មពល* របស់ព្រះកំពុងតែធ្វើជាសាក្សីអំពីរឿងនោះ ពីព្រោះសកម្មពលរបស់ព្រះជាសេចក្ដីពិត។ ៧ ព្រោះថាមានសាក្សីបី ៨ គឺសកម្មពលរបស់ព្រះ ទឹក និងឈាម ហើយសេចក្ដីបញ្ជាក់នៃសាក្សីទាំងបីនេះគឺស្របគ្នា។
៩ ប្រសិនបើយើងព្រមទទួលស្គាល់សេចក្ដីបញ្ជាក់របស់សាក្សីជាមនុស្ស សេចក្ដីបញ្ជាក់របស់ព្រះមានតម្លៃជាងនោះទៅទៀត ពីព្រោះព្រះធ្វើជាសាក្សីបញ្ជាក់អំពីបុត្ររបស់លោក។ ១០ អ្នកណាដែលមានជំនឿលើបុត្ររបស់ព្រះ អ្នកនោះបានទទួលសេចក្ដីបញ្ជាក់របស់ព្រះដោយផ្ទាល់។ អ្នកណាដែលគ្មានជំនឿលើព្រះ អ្នកនោះហាក់ដូចជាចោទព្រះថាជាអ្នកកុហក ពីព្រោះអ្នកនោះមិនជឿសេចក្ដីបញ្ជាក់របស់ព្រះដែលធ្វើជាសាក្សីអំពីបុត្រលោក។ ១១ អ្វីដែលបានត្រូវបញ្ជាក់គឺថា ព្រះបានផ្ដល់ជីវិតដែលគ្មានទីបញ្ចប់ឲ្យយើង ហើយយើងបានជីវិតនោះ ដោយសារបុត្ររបស់លោក។ ១២ អ្នកណាដែលទទួលស្គាល់បុត្ររបស់ព្រះ អ្នកនោះមានជីវិតរស់នៅជារៀងរហូត តែអ្នកណាដែលមិនព្រមទទួលស្គាល់បុត្ររបស់ព្រះ អ្នកនោះមិនមានជីវិតរស់នៅជារៀងរហូតទេ។
១៣ ខ្ញុំសរសេរសេចក្ដីទាំងនេះ ដើម្បីឲ្យអ្នករាល់គ្នាដែលជឿលើនាមរបស់បុត្រព្រះ ដឹងថាខ្លួនមានជីវិតរស់នៅជារៀងរហូត។ ១៤ ហើយយើងមានទំនុកចិត្តថា អ្វីក៏ដោយដែលយើងអធិដ្ឋានសុំ ដែលសមស្របតាមបំណងប្រាថ្នារបស់ព្រះ នោះព្រះនឹងស្ដាប់យើង។ ១៥ ម្ល៉ោះហើយ បើយើងដឹងថា ព្រះនឹងស្ដាប់នូវអ្វីក៏ដោយដែលយើងសុំ យើងដឹងថាយើងនឹងទទួល ពីព្រោះយើងបានសុំពីលោក។
១៦ ប្រសិនបើអ្នកណាម្នាក់ប្រទះឃើញបងប្អូនខ្លួនធ្វើខុសអ្វីមួយ ដែលមិននាំឲ្យមានទោសដល់ស្លាប់ អ្នកនោះត្រូវអធិដ្ឋានអង្វរព្រះ ហើយព្រះនឹងឲ្យជីវិតដល់បងប្អូននោះ បើពួកគាត់មិនបានធ្វើខុសអ្វីមួយដែលនាំឲ្យមានទោសដល់ស្លាប់ទេ។ មានការខុសឆ្គងមួយដែលនាំឲ្យមានទោសដល់ស្លាប់មែន តែខ្ញុំមិនប្រាប់ឲ្យអធិដ្ឋានដើម្បីអ្នកដែលធ្វើខុសបែបនោះឡើយ។ ១៧ ការទាំងអស់ដែលមិនសុចរិត ជាការខុសឆ្គង។ ទោះជាយ៉ាងនោះក៏ដោយ មានការខុសឆ្គងមួយដែលមិនមានទោសដល់ស្លាប់ឡើយ។
១៨ យើងដឹងថាអ្នកណាដែលកើតមកពីព្រះ អ្នកនោះមិនប្រព្រឹត្ត* អំពើខុសឆ្គងឡើយ ហើយលោកដែលបានកើតមកពីព្រះ* មើលថែរក្សាអ្នកនោះ។ ម្យ៉ាងទៀតមេកំណាចមិនអាចប៉ះពាល់អ្នកនោះឡើយ។ ១៩ យើងដឹងថាយើងមកពីព្រះ តែពិភពលោកទាំងមូលនៅក្រោមអំណាចរបស់មេកំណាច។ ២០ ប៉ុន្តែយើងដឹងថាបុត្រព្រះបានមក ហើយលោកបានធ្វើឲ្យយើងមានសមត្ថភាពយល់ដឹង ដើម្បីឲ្យយើងអាចទទួលចំណេះអំពីព្រះពិត។ បន្ថែមទៅទៀត យើងកំពុងរួបរួមជាមួយនឹងព្រះពិត តាមរយៈលោកយេស៊ូគ្រិស្តជាបុត្ររបស់លោក។ លោកជាព្រះពិត ហើយជាជីវិតដែលគ្មានទីបញ្ចប់។ ២១ កូនៗអើយ! ចូរជៀសចេញពីរូបព្រះ។
[កំណត់សម្គាល់]
មើលសេចក្ដីពន្យល់បន្ថែមផ្នែកទី៤
មើលកំណត់សម្គាល់រ៉ូម ៥:១២
មើលកំណត់សម្គាល់ខ៧
ន័យត្រង់«ដើរជានិច្ចដូចអ្នកនោះបានដើរ»
មើលកំណត់សម្គាល់ម៉ាថ ៥:២៩
សំដៅទៅលោកយេស៊ូ
ន័យត្រង់តាមភាសាក្រិច ពាក្យនេះសំដៅទៅការដាក់ឬចាក់ប្រេងទៅលើ
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
សំដៅទៅការប្រព្រឹត្តជាទម្លាប់
ភាសាក្រិច«ឌីអាបូឡូស»។ មានន័យថា«អ្នកបង្កាច់បង្ខូច»
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ន័យត្រង់«កូនតែមួយដែលព្រះបានបង្កើតដោយផ្ទាល់»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
សំដៅទៅការប្រព្រឹត្តជាទម្លាប់
«លោកដែលបានកើតមកពីព្រះ» គឺលោកយេស៊ូគ្រិស្តបុត្ររបស់ព្រះ ដូចបញ្ជាក់ក្នុង១យ៉ូន ៥:១