របៀបរស់នៅជាគ្រិស្តសាសនិក
តើយើងអាចរៀនអ្វីពីបងប្អូនរួមជំនឿដែលបានបម្រើព្រះយេហូវ៉ាអស់ជាច្រើនឆ្នាំ?
ក្នុងក្រុមជំនុំរបស់យើង យើងមានបងប្អូនប្រុសស្រីដែលបានបម្រើព្រះយេហូវ៉ាអស់ជាច្រើនឆ្នាំ។ យើងអាចរៀនពីរបៀបដែលពួកគាត់បានពឹងទៅលើព្រះយេហូវ៉ា។ យើងអាចសួរពួកគាត់អំពីប្រវត្តិរបស់អង្គការព្រះយេហូវ៉ា ហើយអំពីការពិបាកដែលពួកគាត់បានជួបនិងយកឈ្នះដោយសារមានជំនួយពីព្រះយេហូវ៉ា។ យើងក៏ប្រហែលអាចអញ្ជើញបងប្អូនទាំងនេះណាម្នាក់ឲ្យចូលរួមក្នុងការគោរពប្រណិប័តន៍ជាក្រុមគ្រួសារ ហើយសុំឲ្យគាត់ប្រាប់យើងអំពីបទពិសោធន៍ខ្លះៗ។
បើបងប្អូនជាអ្នកដែលបានបម្រើព្រះអស់ជាច្រើនឆ្នាំមកហើយ សូមសុខចិត្តប្រាប់គ្រិស្តសាសនិកដែលក្មេងជាងអំពីរបៀបដែលព្រះយេហូវ៉ាបានជួយអ្នក។ យ៉ាកុបនិងយ៉ូសែបបានប្រាប់កូនចៅអំពីបទពិសោធន៍របស់ខ្លួន។ (លោ. ៤៨:២១, ២២; ៥០:២៤, ២៥) ច្រើនឆ្នាំក្រោយមក ព្រះយេហូវ៉ាចង់ឲ្យមេគ្រួសារបង្រៀនកូនៗអំពីការអស្ចារ្យរបស់លោក។ (ចោ. ៤:៩, ១០; ទំនុក. ៧៨:៤-៧) នៅសព្វថ្ងៃនេះ ឪពុកម្ដាយនិងអ្នកឯទៀតក្នុងក្រុមជំនុំអាចប្រាប់ប្អូនៗវ័យក្មេងអំពីការអស្ចារ្យដែលពួកគាត់បានឃើញព្រះយេហូវ៉ាបានសម្រេចតាមរយៈអង្គការរបស់លោក។
សូមទស្សនាវីដេអូចូររក្សាសាមគ្គីភាពពេលនៅក្រោមការដាក់បម្រាម រួចមកឆ្លើយសំណួរដូចតទៅនេះ៖
តើការិយាល័យសាខាអូទ្រីសបានជួយបងប្អូនរួមជំនឿនៅប្រទេសខ្លះដែលគេដាក់បម្រាមយ៉ាងដូចម្ដេច?
តើបងប្អូននៅប្រទេសទាំងនេះបានធ្វើអ្វីដើម្បីរក្សាឲ្យមានជំនឿរឹងមាំ?
ហេតុអ្វីបានជាអ្នកផ្សព្វផ្សាយជាច្រើននាក់នៅប្រទេសរ៉ូម៉ានីបានបែកចេញពីអង្គការរបស់ព្រះយេហូវ៉ា ហើយតើពួកគេបានត្រឡប់មកវិញយ៉ាងដូចម្ដេច?
តើបទពិសោធន៍ទាំងនេះបានពង្រឹងជំនឿរបស់អ្នកយ៉ាងដូចម្ដេច?
ចូររៀនអ្វីដ៏អស្ចារ្យពីបងប្អូនដែលបានបម្រើព្រះយេហូវ៉ាអស់ជាច្រើនឆ្នាំ ហើយនេះនឹងពង្រឹងជំនឿរបស់អ្នកទៅលើលោក!