Mukanda Wadyanga wa Nzwá
4 Enu jiphange jami jakazola, ki muxikine mu maka* oso amoneka kala atundu kwa Nzambi. Maji tongololenu kyambote o maka,* phala mwijiye se atundu mwene kwa Nzambi mba kana, mukonda sayi jipolofeta javulu ja makutu, ja dimwange mu ngongo.
2 Kiki kyene kimutena kwijiya se o maka atundu kwa Nzambi: O maka oso alondekesa kwila Jezú Kidistu weza mu mukutu wa xitu, maka yó atundu kwa Nzambi. 3 Maka oso ka londekesa kwila Jezú weza mu mukutu wa xitu, katundu kwa Nzambi. Yá ene o maka a kidistu yamakutu, yó umwevu kwila weji moneka. Kindala mwene wala kyá mu ngongo.
4 Twana twami, enu mwatokala kwa Nzambi. Énu mwatolola o jipolofeta ja makutu, mukonda o yó wala kumoxi ni enu wabetakota, o wala kumoxi ni mundu ndenge. 5 Ene atokala ku mundu, mukonda dya kiki azwela o ima ya mundu, o mundu anga wa evwa. 6 Maji etu twatokala kwa Nzambi. Woso wejiya Nzambi u twívwa, woso katokala kwa Nzambi ka twívu. Kiki kyene ki tu kwatekesa kwijiya se o maka a kidi mwene, mba a makutu.
7 Jiphange jami jakazola, tu kolokotyenu mu kudizola, mukonda o henda itunda kwa Nzambi. Woso uzola, mwene mon’â Nzambi, wejiya we Nzambi. 8 Woso kazolo, kejiya Nzambi, mukonda Nzambi henda. 9 Nzambi wa tulondekesa o henda yê mu ukexilu yú: Mwene watumikisa Mon’ê umoxi-élele mu ngongo, phala bhukaxi ka mwene tutene kutambula o mwenyu wakalelaku. 10 O henda ya Nzambi, yenyiyi: K’etu twazolo Nzambi, maji mwéne watuzolo, yu watumikisa Mon’ê kala sata yatokala* phala ku tu kúla ku ituxi.
11 Jiphange jami jakazola, se kyenyiki kyatuzolo Nzambi, etu we twatokala tudizola mudyetu. 12 Sé-ku muthu wa mwene kyá Nzambi. Se tu kolokota mu kudizola mudyetu, Nzambi ukala jinga n’etu, o henda yê kokwetu yanda tenena. 13 Mukonda dya kiki, twejiya kwila twala kumoxi ni Nzambi, mwene we wala kumoxi n’etu, mukonda watubhana o nzumbi yê. 14 Etu twamono, kindala twa mubhana we umbangi wa kwila, o Tata watumikisa Mon’ê kala Mubhuludi wa mundu. 15 Woso uxikana kwila Jezú Mon’â Nzambi, Nzambi ukala jinga kumoxi ni mwene, o mwene ukala we kumoxi ni Nzambi. 16 Etu twejiya kwila Nzambi watuzolo, tuxikina mu henda yiyi.
Nzambi henda, woso unangenena mu henda, ukala kumoxi ni Nzambi, o Nzambi ukala we kumoxi ni mwene. 17 Kyenyiki, o henda yê yatenena moxi dyetu, phala mu kizuwa kya kufundisa tutene kuzwela ni kidi kyoso.* Mukonda kala kyala mwene, kyene we kitwala etu mu ngongo mumu. 18 Woso wala ni henda yatenena, kalé ni wôma, o henda yatenena ibhwisa* o wôma, mukonda o wôma u tuzozesa. Woso wala ni wôma, kala ni henda yatenena. 19 Etu tuzola, mukonda Nzambi mwéne wa dyangela kutuzola.
20 Muthu woso wamba kwila: “Ngazolo Nzambi,” maji wazembe phang’yê, muthu yú mukwa makutu. Mukonda woso kazolo phang’yê wene mu mumona, katena kuzola Nzambi kene mu mumona. 21 Etu twatambula kwa mwene o kitumu kiki: Woso wazolo Nzambi watokala we uzola phang’yê.