Kanake

Jihova wabesowala Jikdistá ja dyanga kyoso kyexile mu ditunda kyambote mu kudibhana ni izukutisu. Ene exile mwazukutisa, sayi bhabha mu ithangana kayifikile. Tala yabhiti ni poxolo Phawulu ni Balanabe kyoso kyexile muboka mu mbanza ya Listra. Kudimatekenu o athu atambulula kyambote, mukonda evu o ima ya atangela. Maji kupholo dyakwenda mu kizuwa kyenyokyo mwene, o jinguma “afunyisa o mundu,” kyenyiki amoxi ku athu yo evwile o njimbu abuba Phawulu ni matadi amuxisa bhwenyobho phala na fwe. (Ika. 14:19) Maji ne kiki, Phawulu ni Balanabe asuluka ni kuboka mu ididi yamukwa. Ihi yabhiti? Ene ‘abhange maxibulu avulu,’ ku mbandu yamukwa o izwelu yâ ni phangu yâ, ya swinisa o jiphange mu izuwa yenyoyo. (Ika. 14:​21, 22) Phawulu ni Balanabe sumbala ni izukutisu keha o kuboka, mukonda dya kiki akwatekesa athu avulu. Kyene kimoxi we, se tukamba kubhwila mukubhanga o kikalakalu kyatubhana Jihova twanda tambula mabesá. w23.04 16-17 §13-14

Sobha Davidi wexile ni jinguma javulu ku mwenyu we, maji mwene wasoto o kikwatekesu kya Jihova bhukaxi ka musambu. Sobha Davidi, kexile ni phata kwila Jihova wexile mu tambwijila o misambu ye. Eye we utena kukala ni kidyelelu kiki O Bibidya itudyelelesa kwila Jihova utena kutubhana unjimu ni nguzu itwabhindamena phala kukolokota fiyele. Mwene utena kubhangesa kwila o jiphange jetu mu nzumbi ni yo kene mu mubheza a tukwatekesa. Sayi bhabha Jihova kanda tambwijila o misambu yetu mu ukexilu utwamesenene, maji tutena kudyelela kwila mwene wanda itambwijila. Mwene wanda tubhana o ima itwabhindamena mukithangana kyatokala. Kyenyiki suluka mu kusamba ni kixikanu, ni kudyelela kwila Jihova wanda kulanga kindala. O ku hádya, mwene wandabhana o ima yabhindamena o athu oso mu ngongo. —Jisá. 145:16. w23.05 8 §4; 13 §17-18

Kima kyambote kudikwatenena mu mabesá ejila mu kukumbidila o jimbambe jetu. O kwila eye waxinganeka kya mu mbote ya kukumbidila o jimbambe je? Mu kifika, se o mbambe ye yalungu ni kutanga o Bibidya, xinganeka kyebhi o mbambe yiyi yanda kolesa o ukamba we ni Jihova. (Jisá. 145:​18, 19) Se o mbambe ye yalungu ni kukala ni kidifwa mu nzumbi, xinganeka mu mbote yanda bhekela o kidifwa kiki mu ukamba we ni akwenu. (Kol. 3:14) Soneka o mabesá oso uwanda tena kukala nawu kyoso kiwanda kumbidila o mbambe ye. Mu izuwa kupholo enda ni kutala o ima i wasoneka. Kyenyiki bhita kithangana ni yó na kuswinise. (Jisa. 13:20) Mu kidi, etwenyoso sayi ithangana ki twene mukala ni vondadi yakubhanga o ima. O kwila kiki kilombolola kwila ki twandatena kukumbidila o jimbambe jetu? Kana. Etu we tutena kukumbidila o jimbambe jetu ji twaxindi ne mwene se ki twala ni vondadi yavulu. Kidi kwila kiki kitena kubhonza, maji se ukumbidila o mbambe i waxindi, wanda sanguluka. w23.05 27-28 §5-8

O kwijiya kwila twatokala kuxikina o ibhidi ijila mu ima itusola, kitena kutukwatekesa kufisala o ituxi yetu, ni kubhanga yoso phala ki tukivutukile dingi. Kubhanga kiki, kitena kutukwatekesa kusuluka mu kwenda mu njila ya mwenyu. Se wasolo mu ukexilu wayibha maji wadyela, ihi i utena o kubhanga? Xikina kwila ki utena kulungulula o ima yabhiti kya. Kana kudibotesa kithangana ni nguzu mu kujimbulula o kima kiwabhange mba kutatela akwenu. Mu veji dya kiki, xikina kwila walweza, anga dikwatenene mu ima i utena kubhanga kindala. Se wamuditatela mukonda dya kima kiwabhange, londekesa o kulenduka, samba kwa Jihova, xikina o kitondalu kye, mubhinge n’akuloloka. (Jisá. 25:11; 51:​3, 4) Bhinga we muloloki ku athu uwaluwalesa, sota o kikwatekesu kya tufunga, se kwabhingi. (Tiy. 5:​14, 15) Dilonge ni itondalu ye, bhanga yoso phala ku ivutukile dingi. Se kyene ki ubhanga, ijiyakyu kwila Jihova wanda kulondekesa henda ni ku kukwatekesa.—Jisá. 103:​8-13. w23.08 28-29 §8-9

Joyada wakwatesa sobha Jowaji kukala muthu wambote. (2 Jis. 12: 2) Mukonda dya kiki mu unzangala we, Jowaji wamesenene kusangulukisa Jihova. Maji kyoso Joyada kyafu, Jowaji exile mu mufwinyisa kwala o ilamba kexile mubheza Jihova. (2 Mal. 24: 4, 17, 18) Kiki kyaluwalesa kyavulu Jihova, maji wasuluka mu kwa ‘atumikisa jipolofeta, phala kwenda ni ku a vutwila kwa mwene . . . , maji ene aditunu kubhana matwi.’ Ene kate mwene ka mesenene kwivwa Zakadiya, mona a sekaji’a Jowaji, Jozabate wexile polofeta ni mukunji wa Jihova. Mu kidi Jowaji watumina kujibha Zakadiya. (2 Mal. 22:11; 24: 19-22.) Jowaji kexile mulondekesa o woma wa kidi kwa Jihova. Jihova wambele kiki: “oso-phe a ngi tènde, a kà jingunuka katé kya sebhuluka mwene.” (1 Sam. 2:30) Sumbala Jowaji wexile ni “kifuxi kyonene kya masoladi” amutolola ku kifuxi kyofele kya akwa Sidya, ya “amukwamene kyavulu.” (2 Mal. 24:​24, 25). Jowaji amujibha kwala o jiselevende je, mukonda dya kujibha Zakadiya. w23.06 18- 19 §16- 17

Poxolo Phawulu wakexile mu mbanza ya Efezu mu kuboka ni kulonga o njimbu yambote. (Ika. 19:​1, 8-10; 20:​20, 21) Mwene wazolele kyavulu o jiphange jê, wamesenene kwakwatekesa, kukolokota mu ufiyele wâ kwa Jihova. O akwa Efezu axikinine ku ilongesu ya makutu ni mu ima yawanga ande dya kwa sonekena kwa poxolo Phawulu. O athu mu Efezu exile mubhanga undumbu ni ufusa wavulu, kexile ni jisonyi ja kubhanga o ima yiyi. O athu kyoso kyexile muya mutala o jijoko, exile muzwela jindaka javulu, katé mwene mu jifesa ja jingeleja jâ. (Efe. 5:3) Athu avulu ku Efezu ‘axixidile kyá, kexile dingi ni jisonyi ja kima.’ O izwelu yiyi mu dimi dya Ngeleku ilombolola kuma ‘ene kexile dingi mu kwivwa ndolo.’ (Efe. 4:​17-19) Ande dya kwijiya o itumu ya Jihova, o kitongolwelu kyâ ki kyexile mwatangela se o yabhange yexile yambote mba kana. Kyenyiki-phe, Phawulu wa ambela kwila, o ilunji yâ yexile mwavundu, “mukonda dya kukola kwa mixima yâ ni mukonda dya kudituna o kwijiya Nzambi.” Sayi akwa Efezu, sumbala kexile jinga mwavundu. w24.03 20 §2, 4; 21 §5-6

Phala kusidivila kala mufundixi mu Izalayele Ngidyone wabhingile kukala ni nguzu yavulu mu xitu. Kyoso akwa Midiyana kya lenge bhukaxi ka usuku, Ngidiyone wayi ni ku akaya tunde ku honga ya Jizelele kate ku ngiji ya Njolodá. (Afun. 7:22) O kwila Ngidiyone wasukila bhu ngiji ya Njolodá? Kana! Sumbala ni kubhwila, mwene ni 300 ja masoladi me, asuluka mu kukaya o jinguma. Mukusukaku ene atena kukwata akwa Midiyana ya a atolola. (Afun. 8:​4-12) Ngidiyone wadyelele kwila, Jihova weji mubhana nguzu, kyene mwene phe kyabhiti. (Afun. 6:​14, 34) Sayi kizuwa Ngidiyone ni masoladi me, akaye sobha jiyadi ja akwa Midiyana. O jisobha jenyojo, nange exile mukwendela mu jikamelu, maji Ngidiyone ni kifuxi kye exile mukwendela bhoxi. (Afun. 8:​12, 21) Ni kikwatekesu kya Jihova, ene atena kukwata o jisobha, ya atolola o ita. Kyene kimoxi we, o tufunga atena kudyelela kwa Jihova, yo “kene kuzônda, kene kubhwila.” Mwene wanda kwabhana o nguzu yabhindamena. —Iza. 40:​28, 29, w23.06 6 §14, 16

Etu tutena kukala ni muxima watenena ne mwene ni ibhidi itudibhana nayu ku mwenyu. Mu kiki dyelela ngo kwa Jihova. Tala kyebhi Balake waditundu kyambote mu kudyelela ku itendelesu ya Jihova. Mu kithangana kyenyokyo o mundu wa Izalayele kexile polondo phala kulwa ita. Ene kate mwene kexile ni mauta. Ne kiki Jihova watangela Balake phala kuya kulwa ita ni Xixela kabhitangu ka masoladi akwa Kanana ni kifuxi kye, exile ni mauta avulu. (Afun. 5:8) O polofeta ya muhatu Debola watangela Balake phala kukulumuka bhu kididi bhwa kambe milundu, phala kudisanga ni Xixela ni 900 a makalu me a ita. Ki kyejibhonza phala akwa Kanana kulwa ita bhu kididi bhwa kambe o milundu mukonda dya makalu, maji ne kiki Balake wabelesela. Kyoso o masoladi exile mu kulumuka ku Mulundu wa Tabola, Jihova watumikisa mvula yadikota. O makalu a Xixela anaminina mu malowa, mu kiki Jihova wabhangesa Balake kutolola o ita. (Afun. 4:​1-7, 10, 13-16) Jihova wanda tukwatekesa we kuditunda kyambote se tudyelela kwa mwene ni kukayela o itendelesu yene mutubhana bhu kaxi ka kilunga kye. w23.07 19 §17-18

Se twamesena kukala ni mwenyu wa kalelaku, twabhingi kukala ni mwanyu. Kala o jiselevende ja Jihova m’ukulu, twabhingi kukingila ni mwanyu o kikumbidilu kya ikanenu ya Nzambi. (Jih. 6:​11, 12) O Bibidya isokesa o mwenyu wetu ni wa kidimakaji. (Tiy. 5:​7, 8) O kidimakaji ubhanga nguzu yavulu phala kukuna ni kutekela o jimbutu, maji mwene kejiya kyambote se janda kula thembu kuxi. Kyenyiki, mwene wabhingi kukingila ni mwanyu, mu kudyelela kwila mu kithangana kyatokala wanda bhongolola o idima. Kyene kimoxi n’etu, twabhingi kusuluka mu kubhanga o ikalakalu yetu mu nzumbi, ne mwene se ‘ki twejiya o kizuwa kyanda kwiza o Ngana yetu.’ (Mat. 24:42) Etu tu kingila ni mwanyu, mu kudyelela kwila, mu kithangana kyatokala, Jihova wanda kumbidila o ikanenu yoso yabhange. Se tukamba o mwanyu, tutena kubhwila mu kukingila ni kudisondolola kwa Jihova bhofele bhofele. Tutena kumateka kudikwatenena mu ima itufika kwila itena ku tusangulukisa kindala. Maji se tukala ni mwanyu, twandatena kukolokota kate ku dizubhilu ni kubhuluka. —Mik. 7:7. w23.08 22 §7

Mu kusokesa o kikanenu kya Daniyele 2:​41-43, ni yamukwa yala mu divulu dya Daniyele ni Dijingunwinu, tumona kwila o inama ilombolola o unguvulu wa Anglo-Americana, o utuminu wa beta o kutena mu ixi lelu. Yalungu ni unguvulu yu, Daniyele wambe kwila “o utuminu wa kèla o ku mbandu kuku waswina, o ku mbandu kuku wabotomoka.” Mukonda dyahi wabotomoka? Mukonda o athu mu jixi mwala o utuminu yu, ene muzozesa o kutena kwa kutumina ni nguzu kala ya felu. Twadilongo ima yambote yalungu ni kiteka kya jimbulula Daniyele. Tutena kudilonga ima yavulu bengebenge yalungu ni inama ya kiteka kiki. Kyadyanga o Utuminu wa Anglo-Americana wene mulondekesa kwila wala ni kutena. Mu kifika, ene alondekesa o kutena kwa mukutolola o Ita Yadyanga ni Yakayadi yabhiti ku mundu woso. Maji phe, o utuminu wenyu ene mu uzozesa, ni kwila andasuluka mu kubhanga kiki, mukonda o athu atokala mu jixi ja utuminu wenyu ene mudilungulukila mudya ni kudikwata we ni jinguvulu. Kayadi, o unguvulu wa Anglo-Americana wene wandasukinaku ande dya Utuminu wa Nzambi kubhwika o mautuminu moso a ngongo. w23.08 10-11 §12-13

Sayi ithangana, Davidi wexile muluwala mukonda dya ibhidi ni ima yavulu yayibha yexile mubhita nayu. (Jisá. 18:​4-5) Maji ne kiki, o henda ya Jihova ni ukexilu wexile mu mulanga yexile mu muximbakatesa. Jihova wexile mu kwendesa o dikamba dye dya tohokele ni kumunyohesa mu ididi yambote. Mukonda dya kiki Davidi watenene dingi kukala ni nguzu ni kusuluka mu kusidivila Jihova ni kisangusangu. (Jisá. 18:​28-32) Lelu we kyene kimoxi, twene mudibhana ni ibhidi yavulu yabhonzo. Maji mukonda dya henda ya Jihova, twala hanji ni mwenyu, ‘ki twajimi o mbutu kana.’ (Kud. 3:22; Kol. 1:11) Mu veji javulu o mwenyu wa Davidi wexile mu ilwezu, yu wexile we ni jinguma javulu exile indanda. Maji, o henda ya Jihova yamubhangesa kudivwa kwila exile mu mulanga. Davidi wexile mudivwa kwila Jihova wexile ne ithangana yoso. O kiki, kyamutululukisa. Kyenyiki, mwene wembi: “[Jihova] wa ngikudila ku ima yoso ingikwatesa woma.” (Jisá. 34:4) Sumbala sayi ithangana wexile ni woma wavulu, mwene watenene kutolola o woma we, mukonda wejidile kwila Jihova wamuzolele. w24.01 30 §15-17

Dilonge ni ima yayibha yabhange Jowaji. Kyoso o Mukunji Wadikota Joyada kyafu, Jowaji wamateka kudilunga ni athu ayibha. (2 Mal. 24:​17, 18) Mwene wasolo kukayela o itendelesu ya ilamba ya Judá, a kambele kuzola Jihova. Nange eye uxikina kwila Jowaji katokalele kubhanga ukamba ni athu enya. Muveji dya kiki ka londekesa unjimu, yu wasolo kubhana matwi ku itendelesu ya makamba me. Kyoso o mona a sekaji’e, Zakadiya, kyafikisa kumukwatekesa kweha o njila yayibha, Jowaji watumina kumujibha. (2 Mal. 24:​20, 21; Mat. 23:35) Kiki kyexile kima kyayibha kinene! Jowaji wamateka kyambote, maji mukusuluka walungulukila o kidi yu wakituka kijibhanganga. Mukusukaku amujibha ku jiselevende je. (2 Mal. 24:​22-25) Mwene kejidibhana ni ibhidi yoso yiyi, se wasulukile mu kubhana matwi kwa Jihova ni kwa yo amuzolele! w23.09 9 §6

Jezú wejidile kwila, o poxolo Phetele wejitena kusuluka mu kukala fiyele. Kyenyiki ni henda yoso Jezú watangela Phetele: ‘Kana kukala ni woma.’ O izwelu yiyi yalungulula o mwenyu wa Phetele, yene yalondekesa kwila Jezú wamudyelele. Ithangana kupholo, Phetele ni phang’ye Mandele a xisa o kikalakalu kya kutamba, ya adibundu ni Jezú mu ukunji. Jihova wa abesowala kyavulu. (Mál. 1:16) Phetele wamono ima yavulu ya katunda mu kukayela Kidistu. Mwene wamono Jezú kusaka jihaxi, kukaya madimonyo, kate mwene ni kufukununa athu. (Mat. 8:​14-17; Mál. 5:​37, 41, 42) Phetele wamono we kisumwa kya Jezú kala Sobha ya Utuminu wa Nzambi. Se phata mwene nuka wadijimbi o ima yamono mu kizuwa kyenyokyo. (Mál. 9:​1-8; 2 Ph. 1:​16-18) Phetele wamono ima yavulu keji tena ku imona se kexile dixibulu dya Jezú. Ni kidi kyoso, Phetele wasangulukile kyavulu mu kutolola o ixinganeku yoyo yayibha, ni kutambula mabesá avulu a Jihova! w23.09 21 §4-5

Mu mukanda we wadyanga, poxolo Phetele watumbula o izwelu ‘kudizola ni kufulujuka kwoso.’ O henda kala yiyi, itukwatekesa kuloloka kana ngo ituxi yofele, maji “nzungule dya ituxi.” (1 Ph. 4:8) Nange Phetele wadilembalele yadilongele ni Jezú mivu kudima, yalungu ni kuloloka. Mu kithangana kyoso Phetele kya zwela kwila o phange watokala uloloka mukwa “sambwadi dya jiveji,” mwene wafikile kwila wexile mubhanga mbote. Maji Jezú walongo kwa Phetele —ni etwenyoso —kuloloka kate “makwinyi a sambwadi ni sambwadi dya jiveji,” kifwa ithangana yoso. (Mat. 18:21) Se kyene mukubhonza kukumbidila o kitendelesu kiki, kana kuluwala! Etwenyoso sayi ithangana kyene mutubhonza kuloloka. O kyabeta kota o kubhanga yoso i utena phala kuloloka phang’ye ni kukala ku paze ni mwene. w23.09 29 §12

Mu mala dya mbiji, Jona wadyela yu waxikinine kwila Jihova weji kwivwa o musambu we. ni kwila Jihova weji mukwatekesa. Jihova wabhulula Jona. Kupholo dya kwenda mwene wexile polondo phala kukumbidila o kikalakalu kyamutendelesele o kubhanga. (Jona 2:10–3:4) O kwila wadibhanene kya ni kibhidi kyabhonzo, kate ki watenene kutangela Jihova kyebhi kiwexile mudivwa? O kwila sayi kizuwa watohokele kyavulu, anga ki watenene kudilonga? Lembalala kwila, Jihova utendela o maka me ni kuyuka kwoso. Kyenyiki, ne mwene se uzwela ngo ima yofele mu musambu we, utena kudyelela kwila Jihova wandakubhana iwabhindamena. (Efe. 3:20) Se kyamukubhonza kutanga ni kudilonga mukonda wakate, wa tohoka, mba wa luwala, utena kwivwa o kitangelu kya Bibidya mba kya madivulu m’etu kyongalavale. Utena we kusanga kikwatekesu mu kwivwa o mimbu yetu mba kutala vidyu mu sayte jw.org. Kyoso ki usamba anga usota o kitambwijilu mu Bibidya ni mu madivulu m’etu, kyedi kala wamwixana Jihova phala kukuswinisa. Kyene phe mwene kyanda bhanga. w23.10 13 §6; 14 §9

O ukexilu wa kubheza wa Jijudé. O balaka ni jitembulu ja tungile mu Jeluzaleme, moxi dya, jadifwanganene kyavulu. Moxi dya, mwexile mbandu jiyadi—“O Kididi Kikôla” ni “Kididi Kikôla Kinene”—kwexile we kulutina bhu kaxi phala kuwanuna o ididi iyadi yieniyi. (Jih. 9:​2-5; Mak. 26:​31-33) Moxi dya Kididi Kikôla mwexile kandeya ka ulu, kalatódyu ka wasu wadizumba, meza, ni jimbolo j’obhakwile Nzambi. O ‘akunji a undile’ ene ngo atokalele kubokona mu Kididi Kikôla phala kubhanga o kikalakalu kya abhele Nzambi. (Dya. 3:​3, 7, 10) Mu Kididi Kikôla Kinene mwexile o alaka ya kikutu yobhange ni ulu, yexile mulombolola kwila Jihova bhene bhwexile. (Mak. 25:​21, 22) Mwene ngo amubhele o ufolo wa kujikula o kulutina ni kubokona mu Kididi Kikôla, lumoxi ku muvu, mu kizuwa kya kubhana o sata phala o muloloki wa ituxi. (Iji. 16:​2, 17) Mivu yoso, mwene wexile mu bokonamu ni manyinga a ibhaku, phala kubhinga o muloloki wa ituxi ye ni ya kifuxi kyoso. Kupholo dya kwenda, Jihova walondekesa kyambote ihi yexile mulombolola o jimbandu jiyadi jiji ja balaka. —Jih. 9:​6, 7. w23.10 27 §12

Mu veji javulu o Mak’a Nzambi azwela yalungu ni kitumu kya ‘kudizola mudyetu.’ (Nzw. 15:12 Lom. 13:8; 1 Te. 4:9; 1 Ph. 1:22; 1 Nz. 4:11) Maji o henda kidifwa kyala kumuxima wetu, ki kwala phe muthu utena kumona moxi dya muxima wetu. Kyenyiki kyebhi akwetu kyanda kwijiya kwila etu twazolo? Bhukaxi ka izwelu ni ibhangelu yetu. Kwala maukexilu avulu ututena kulondekesa ku jiphange jetu kwila twa azolo. Maukexilu amoxi enya: “Mu kuzwela ditangedyenu o kidi muthu ni mukwâ.” (Zak. 8:16) “Sotenu kukala ni paze mudyenu.” (Mál. 9:50) “Dyangenu kuxila akwenu.” (Lom. 12:10) “Di tambululyenu mudyenu.” (Lom. 15:7) “Kolokotenu mu. . . kudiloloka mudyenu.” (Kol. 3:13) “Kolokotenu mu kwambata o imbamba yaneme ya akwenu.” (Nga. 6:2) ‘Sulukenu mu kudikonda o malamba mudyenu.’ (1 Te. 4:18) “Sulukenu. . . mu kudiswinisa mudyenu.” (1 Te. 5:11) “Disambelyenu mudyenu.”—Tiy. 5:16. w23.11 9 §7-8

Izuwa yoso etu twabhingi kusola ima ku mwenyu wetu, kwala ima yabhonzo yamukwá ya bhebhuluka. O kima ki tubhangesa kusola kyambote, o kukala ni kixikanu kyakolo. Mu kifika, Izuwa yoso etu tusola ima yalungu ni ukamba, itonokenu, kudilonga, ukaza, twana ni salu. Kima kyambote kudibhwidisa o kwila o ima ngisola ilondekesa kuma o mundu yu ki wanda nangenena, ni kwila o mundu wa ubhe wanda bhixila? Inga ngisola kubhanga o ima kala ki bhanga o athu, abanza kwila kitutena kukala ni mwenyu wakalelaku? (Mat. 6:​19, 20; Luk. 12:​16-21) Se tu kolesa o kixikanu kyetu kya kwila o mundu wa ubhe wa zukama kya, twanda tena kusola kyambote o ima ku mwenyu wetu. Twabhindamena we kukala ni ixikanu kyakolo phala kudibhana kyambote ni ibhidi. Nange tutena kudibhana ni izukutisu, uhaxi ki wivu milongo, mba kibhidi kya mukwa ki tuluwalesa. Kudimatekenu nange tu banza kwila twanda tena kudibhana kyambote ni kibhidi kiki. Maji se o kibhidi kinangenena mu ithangana kala kyene mubhita mu ithangana yavulu, twanda bhinga kukala ni kixikanu kyakolo, phala kukolokota ni kusuluka kubheza Jihova ni kisangusangu. —1 Ph. 1:​6, 7.w23.04 27 §4-5

Jihova wamesena kwila kyoso kitusamba kwa mwene, tubhanga o mbandu yetu. Mu kifika, nange phange ya diyala wamesena kwila amubhana kithangana ku salu, phala atene kuya mu kyonge kyadikota. Bhenyobho usamba kwa Jihova phala kumukwatekesa. Nange kyebhi Jihova kyeji tambwijila o musambu yu? Mwene nange utena kubhana o kuswina kwabhindamena o phange phala kuzwela ni xefe ye. Maji phe, o phang’yetu wandabhinga hanji kubhixila kwala o xefe ni kuzwela ne. Mwene nange wandabhinga kuzwela ni xefe mu veji javulu. Mwene kate nange wandabhinga kuzwela ni koleka yengi phala kumubhingana mu izuwa ya kyonge kyadikota, o kyoso kyandavutuka n’amubhingana we. Se kwabhingi, nange o phange utena kudibhakula phala kukalakala mu ji ola javulu, sé kumufutaju.Jihova wamesena kwila tusuluka mu kusamba yalungu ni ibhidi yetu. Jezú walondekesa kwila, sayi ima itubhinga kanda tubhana nayu mu kithangana kyenyokyo. (Luk. 11:9) Kyenyiki, kana kubhwila! Samba ni muxima woso, mu veji javulu. (Luk. 18:​1-7) Kyoso kitusuluka mu kusamba yalungu ni kima kimoxi, tulondekesa kwa Jihova kwila, twamesena kyavulu o kima kyenyokyo. Tulondekesa we kwila twadyelela mu kutena kwe kwa kutukwatekesa. w23.11 22 §10-11

Jihova wakanene kwa kamba dye Mbalahamu kwila o ifuxi yoso mu ngongo eji tambula mabesá bhukaxi ka mbutu yé. (Dim. 15:5; 22:18) Kuma Mbalahamu wexile ni kixikanu kya kolo kwa Nzambi, mwene kexile ni phata kwila o kikanenu kya Nzambi kyeji dikumbidila. Maji ne kiki, kyoso Mbalahamu kyexile ni 100 ya mivu, o muhatu we ni 90 a mivu, o dikaza didi dya fiyele ka vwalele luwa mona. (Dim. 21:​1-7) Ne kiki, o Bibidya yamba: “Bhukaxi ka kidyelelu kyê, Mbalahamu walondekesa kixikanu kwila weji kala tata ya ifuxi yavulu, kala kya kanene Nzambi.” (Lom. 4:18) Eye wejiya kwila o kidyelelu kya Mbalahamu kyadikumbidila. Mwene wakituka tata ya Izake, o mona exile mu mukingila mu mivu yavulu. Mukonda dyahi Mbalahamu wadyelele kwila Jihova wejikumbidila o kikanenu kye? Kuma Mbalahamu wejidile kyambote Jihova, mwene “waxikinine ni kidi kyoso kwila, Nzambi weji kumbidila o kima kya kanena.” (Lom. 4:21) Jihova wasanguluka ni Mbalahamu, yu wamwixana muthu wayuka mukonda dya kixikanu kye. —Tiy. 2:23. w23.12 8 §1-2

O munzangala wala ni kidifwa kiki, ubhanga nguzu phala kukumbidila o ikalakalu ye yoso. Tala o phangu yayuka ya Jezú. Mwene nuka waxisa o ikalakalu ye kudima. Muveji dya kiki, mwene wakumbidila o ikalakalu yoso yamubhanene Jihova ne mwene se kyamubhonzele ku ibhanga. Mwene wazolele o athu,bengebenge o maxibulu me. Mukonda dya kiki, mu vondadi ye wabhana o mwenyu bhu kididi kya. (Nzwá 13:1) Mu kukayela o phangu ya Jezú, bhanga nguzu phala kukumbidila kabasa kikalakalu kyakubhana. Se k’wejiya kyebhi ki utena kubhanga o kikalakalu, londekesa kulenduka mu kubhinga kikwatekesu ku jiphange ja mala ja kulu mu nzumbi. Kana kusanguluka mu kukalakala ngo bhofele. (Lom. 12:11) Muveji dya kiki, se ubhanga o kikalakalu phala ‘Jihova kana phala o athu,’ wandasota kukibhanga kyambote ni kuzubha yoso yakutendelesa. (Kol. 3:23) Kidi kwila eye k’u muthu wayuka, kyenyiki londekesa o kulenduka mu kuxikina o itondalu ye. —Jisa. 11:2. w23.12 26 §8

Kisangusangu kya dikota kudibatizala ni kubhanga mbandu ku mwiji wa Jihova. Ujitu wadikota kukala ni ukamba wambote ni Jihova. Sé phata etu tu xikina mu izwelu ya mukwa jisálamu Davidi kyoso kyambe: “U zediwa muthu woso eye [Jihova] wa mu solo, anga u mu bhixidisa kokwé, phala n’a tunge mu kithâdi kyé.”(Jisá. 65:4) Jihova kehela muthu woso-woso kubhanga mbandu ku mwiji wé., Jihova ubheka o athu alondekesa kwila a mesena kukala ni ukamba wambote ni mwene. (Tiy. 4:8) Kyoso ki udibhakula kwa Jihova anga akubatizala, eye utena kudyelela kwila kyoso kyanda kubatizala, mwene wanda ‘ku kulundulwila dibesá, di ku soka anga di subhuka, di bhinga ki di kala ni nzôngo yê mu ku kubhekela jimbote.’(Mal. 3:10; Jel. 17: 8) Kidi kwila o batizu dimatekenu ngo. Eye wanda mesena kubhanga yoso i utena phala kukumbidila o kikanenu ki wabhange kwa Jihova ne mwene mu kudibhana ni jitendasa ni ibhidi ilola o kixikanu kyé. (Ndo. 5:​4, 5) Kuma u dixibulu dya Jezú, wanda bhanga yoso i utena phala kukayela o phangu ni itumu ya Jezú. —Mat. 28:​19, 20; 1 Ph. 2:21. w24.03 8 §1-3

Maji phe, se kiyadi kyenu ki mwawabhela kubhita kithangana kumoxi? Kyenyiki ihi imutena kubhanga? Xinganeka mu kifika kya tubhya. Twene ki twanda wama ni kudibandekesa mu kingoho. Maji kwabhingi kusuluka mu kubandekesa bhu jihwinyi jamakota. Kala kibhita ni tubhya tuya ni kudibandekesa bhofele bhofele, mukonda dyahi enu ki mumateka mu kukatula tuyithangana twofele kukizuwa phala kukala kumoxi? Sotenu kubhanga ima imwawabhela kiyadi kyenu. (Tiy. 3:18) Bhofele bhofele enu mwanda tena kumona kwila o henda yenu yamudibandekesa dingi. O kudixila kwala ni valolo yavulu mu ukaza. Tutena kukusokesa ni phete. Se mu kandeya ki mwala phete, kene kandajima ni lusolo. Kyene kimoxi we, mu ukaza se ki mwala kudixila, o henda yandazoza ni lusoslo. Maji kyoso o dikaza kyabhanga nguzu phala kudixila, o henda ya, ki izoza kana. Nange eye uxinganeka kwila wamuxila kaza dye, maji o kwila mwene we udivwa kwila eye wamumuxila? w23.05 22 §9; 24 §14-15

O Bibidya ilondekesa kwila, sayi ithangana, o jiselevende ja fiyele ja Jihova exile ni woma, ni aluwalele mukonda dya jinguma ni ibhidi yamukwa. (Jisá. 18:4; 55:​1, 5) Kyene kimoxi we, atena kutuzukutisa ku xikola, ku salu, mba ku jinguvulu. Kate mwene tutena kukala ni woma wa kufwa mukonda dya uhaxi. Mu ithangana yiyi, nange tutena kudivwa kala mon’a ndenge amubwazeka. Kyebhi Jihova kyatukwatekesa kyoso kitubhita mu ima yiyi? Mwene utuswinisa kyavulu, utukonda we o malamba. Mu kiki phe, bhita kithangana kyasoko ni Jihova —mu kusamba ni kutanga o Mak’a me. (Jisá. 77:​1, 12-14) Se ukala ni kifwa kiki, o kima kyadyanga kiwanda bhanga kyoso kikumoneka maka, o kulengela kwa Tat’e ya dyulu. Tangela Jihova ihi ya mukukwatesa o woma ni ihi ya mu kuthandanganyesa. Mu kusuluka, ehela Jihova kuzwela n’eye ni kukuswinisa bhukaxi ka Bibidya. —Jisá. 119:28. w24.01 24-25 §14-16

Se ukala ni vondadi ya kukumbidila o mbambe iwaxindi, wanda bhanga yoso phala utene ku ikumbidila. O vondadi itwamutumbula bhabha, yalungu ni kubhanga nguzu mba kumesena kyavulu kukumbidila o mbambe. Se tukala ni vondadi yavulu ki kyandabhonza kukumbidila o jimbambe jetu. Ihi i utena kubhanga phala kubhandekesa o vondadi ye? Bhinga dingi vondadi bhukaxi ka musambu. Bhukaxi ka nzumbi ye ikola, Jihova utena ku kukwatekesa kukala dingi ni vondadi ya kukumbidila o jimbambe ji waxindi. Sayi ithangana tutena kuxinda mbambe mukonda twejiya kwila kiki kyene o kima kyatokala; ki kyayibha kubhanga kiki. Maji nange ki twala ni vondadi ya kukumbidila o mbambe itwaxindi. Xinganeka mu yoso yabhange kya Jihova phala eye. (Jisá. 143:5) O poxolo Phawulu wexile mu xinganeka mu ngalasa mba mu mbote yoso yexile mu mubhangela Jihova, kiki kyamubhangesa kukalakela Jihova ni nguzu yoso. (1 Ko. 15:​9, 10; 1 Ti. 1:​12-14) Kyene kimoxi we, se usuluka mu kuxinganeka mu ima yoso yene mubhanga Jihova phala eye, wandakala ni vondadi yavulu ya kukumbidila o mbambe i waxindi. —Jisá. 116:12. w23.05 27 §3-5

Etu tu sangulukisa Tata yetu ya dyulu kyoso ki tuximana o dijina dye. (Jisá. 119:108) O kwila kiki kilombolola kwila, o Nzambi Muteni a Yoso, wedi kala o athu akwa ituxi, amesena kwila akwa a aximana mukonda abhindamena ku a swinisa? Kana. Kyoso ki tuximana o tata yetu ya dyulu, tukwatekesa kulondekesa kwila, o ima yazwela Satanaji yalungu n’etu, makutu. Satanaji wambe kwila, seku muthu wanda tena kuzokela o dijina dya Nzambi ni ufiyele woso. Seku muthu wanda suluka mu kukala fiyele kwa Nzambi se udibhana ni ibhidi. Mwene wambe we kwila tweji bhukumukina Nzambi se tumona kwila, mu kubhanga kiki, tweji katula-ku mbote. (Jobe 1:​9-11; 2:4) Maji Jobe walondekesa ni ufiyele woso kwila, Satanaji mukwa makutu. O kwila eye we wanda kala fiyele kwa Nzambi? Kala muthu mudyetu wala ni ujitu wakuzokela o dijina dya Tat’etu ni ku musangulukisa mu kumusidivila ni ufiyele woso. (Jisa. 27:11) Ujitu wadikota kubhanga kiki! w24.02 8-9 §3-5

Mukubhita o izuwa ya Mozé ni Jozuwe, mivu ku pholo, Jihova wasolo afundixi phala kwendesa o mundu wé. Ku pholo dya kwenda, mu izuwa ya jisobha, Jihova wasolo jipolofeta phala kwendesa o mundu we. O jisobha ja fiyele, exile mu kayela o itendelesu ya jipolofeta. Mu kifika, Sobha Davidi, ni kulenduka kwoso waxikina kyoso kyamubazela kwa polofeta Natane. (2 Sam. 12:​7, 13; 1 Mal. 17:​3, 4) Sobha Jozafate wakayela o itendelesu ya mubhana polofeta Jehaziyele, anga waswinisa o mundu wa Judá ‘kuxikina ku jipolofeta ja Nzambi.’ (2 Mal. 20:​14, 15) Kyoso kya dibhana ni maka a bhonzo, Sobha Ezekiya wabhingi kikwatekesu kwa polofeta Izaya. (Iza. 37:​1-6) Kyoso o jisobha kyexile mukayela o itendelesu ya Jihova, mwene wexile mu a besowala ni kulanga o kifuxi kyoso. (2 Mal. 20:​29, 30; 32:22) Athu oso atokalele kumona kwila Jihova wexile mukwendesa o mundu wé bhukaxi ka jipolofeta.—Jel. 35:​12-15 w24.02 21 §8

Satanaji wamesena kwila twenda ni athu atufidisa kubelesela o itumu ya Jihova. Maji twabhingi kudilanga, akwa Efezu m’ukulu ndenge mukonda mu izuwa yetu twene mubhita kithangana ni athu pholo ni pholo ni mu internete. Twatokala kudituna o ibanzelu kya mundu, kya kwila kima kyawabha kuta undumbu. Maji twejiya kwila kibanzelu kiki ki kyakidi. (Efe. 4:​19, 20) Mukonda dya kiki, kima kyambote kudibhwidisa: ‘O kwila ngidituna kubhanga ukamba ni jikoleka ja salu, ja xikola, mba athu engi kene mubelesela o itumu ya Jihova? O kwila ngene muzokela o itumu ya Jihova, né mwene se athu amba kuma yene yaneme kyavulu?’ Kala kyamba 2 Timote 2:​20-22, twabhingi we kusola kyambote o makamba metu mu kilunga. Twejiya kwila sayi athu kanda tukwatekesa kusuluka fiyele kwa Jihova.w24.03 22-23 §11-12

O kwila eye waxinganekene kya se Jihova wadifu kyebhi? Sumbala kitutena kumona Jihova, maji o Bibidya imujimbulula mu maukexilu avulu. O Bibidya itumbula Jihova kala “dikumbi, ngubu” ni “túbhya tubwikisa.” (Jisá. 84:11; Jih. 12:29) Mu kisumwa kyamono Ezekiyele, mwene wajimbulula Jihova kala, tadi dya safidya, fwelu ya mubhenya ni hongolo ya mubhenya we. (Ize. 1:​26-28) Kuma kitutena kumona Jihova, nange kutubhonza kuxikina kwila mwene watuzolo. Amoxi a banza kwila Jihova nuka wanda kwazola mukonda dya ima yayibha yabhiti ku myenyu ya. Jihova utendela kyambote kyebhi kitudivwa, wejiya we se mukonda dyahi kitubhonza kumuzukama. Phala kutukwatekesa, mwene watujimbulula o idifwa ye yambote mu Bibidya.O kizwelu kijimbulula Jihova mu ukexilu wa beta kota, o henda. O Bibidiya yamba kwila “Nzambi henda.” (1 Nz. 4:8) Ima yoso Jihova u ibhanga mukonda dya henda. O henda ya Nzambi yadikota, mwene u ilondekesa kana ngo ku athu amuzolo maji kate mwene ni kwa yo kamuzolo. —Mat. 5:​44, 45. w24.01 26 §1-3

Jihova wa solele Mozé phala kwendesa o kifuxi kya Izalayele n’atunde ku ixi ya Ijitu. Mwene wa abhana philadi ya dituta mu mwanya, ni philadi ya túbhya mu usuku. (Mak. 13:21) Mozé wakayela o philadi. Yene ya mwendesa mwene ni kifuxi kya Izalayele kate ku Kalunga ka Kusuka. Maji bhenyobho, o akwa Ijitu akayela ku dima dya akwa Izalayele. Kyenyiki, akwa Izalayele exile ni woma wavulu mukonda afikile kwila eji ku a jibha ku akwa Ijitu. Maji mwene kalwezele, kana. Mukonda Jihova mwene wa tendelesele Mozé phala kuya bhu kididi kyenyokyo. (Mak. 14:2) Nzambi wa abhulula mu ukexilu wa katunda ka ufikile. (Mak. 14:​26-28) Mu 40 a mivu, Mozé wasuluka mu kukayela o philadi ya dituta phala kwendesa o mundu wa Nzambi mu kikangalakata. (Mak. 33:​7, 9, 10) Jihova wexile muzwela ni Mozé tunde bhu philadi ya dituta, mwene yu wexile mutangela o mundu o ima yoso yexile muzwela Jihova. Kwexile ima yavulu yejibhangesa akwa Izalayele kuxikina kwila Jihova wexile mwa endesa bhukaxi ka Mozé. w24.02 21 §4-5