Kyebhi ki Mutena Kubhana Kijingu Kwa Jihova Kyoso ki Muya ni Kuditangesa?

1-2. Kyebhi kya divwa o athu kyoso kyamuditangesa?

O ATHU atena kusanguluka kyavulu kyoso kyaya ni kuditangesa. Se mudyelela mu kuditangesa kwenu o ima yanda bhita kyambote. Kiki kibhita ni makaza avulu.a Phange ya muhatu mu ixi ya Itiyopya, wambe: “Twexile mudikwata ni kwelela we kyavulu. Ngasanguluka mu kusanga muthu ngamuzolo, wangizolo we.”

² Maji sayi phange ya diyala, Alessio watungu mu ixi ya Holanda, wambe: “Ngasangulukile kyavulu mu kwijiya o muhatu wami kyoso ki twexile mu kuditangesa, twadibhanene ni ibhidi yavulu.” Mu milongi yiyi twanda mona se ibhidi yebhi itena kumoneka ni jivelusu jebhi ja Bibidya jitena kutukwatekesa kuditunda kyambote. Twanda mona we se kyebhi o jiphange mu kilunga kyatena kukwatekesa o athu amuditangesa.

MUKONDA DYAHI O JIKIDISTÁ ADITANGESA?

3. Mukonda dyahi o jiphange ene muditangesa? (Jisabhu 20:25)

³ O kuditangesa kithangana kya kusanguluka, kyene kikwatekesa o diyala ni muhatu kubhixila katé mu ukaza. Mu kizuwa kya ukaza, ene abhanga kikutu kwa Jihova kwila anda dizola ni kudixila katé mu ufwilu wâ. Ande dya kubhanga kikutu kyoso-kyoso, twatokala kuxinganeka hanji kyambote. (Tanga Jisabhu 20:25.) Kyene kimoxi ni kikutu kya ukaza. O kuditangesa kukwatekesa o diyala ni muhatu kudijiya kyambote ni kusola ni unjimu. Sayi bhabha asola kukazala, sayi bhabha asola kweha o kuditangesa. Kyoso ene kyeha o kuditangesa, ki kilombolola kwila ate kituxi. Maji o kuditangesa kwakwatekesa kutonginina kwila se anda akazala mba kana.

4. Mukonda dyahi o Jikidistá abhingi kumona o kuditangesa mu ukexilu watokala?

⁴ Mukonda dyahi o Jikidistá amona o kuditangesa mu ukexilu watokala? Mukonda kyoso o akudi kyamona o kuditangesa mu ukexilu watokala, ene kanda ditangesa ni muthu kamesena kukazala-nê. Maji etu enyoso twatokala kumona o maka yá mu ukexilu watokala, ko akudi ngó. Mu kifika, sayi yá afika kwila o athu amuditangesa, atokala kukazala. Kiki kibhangesa o jiphange akudi kudivwa kyebhi? Phange Katidi watungu ku Estados Unidos wambe: “Kyoso o jiphange kyamuditangesa, o jiphange ja mukwâ abanza kwila ene atokala kukazala. Mukonda dya kiki, sayi jiphange asuluka mu kuditangesa né mwene se o ima ki yamukwenda kyambote. Jiphange ja mukwa akudi, kaxikina kukazala. O maka enyá abhekela hele yavulu.”

DIJIYENU KYAMBOTE

5-6. O yó amuditangesa atokala kwijiya ihi yalungu ni muthu wamuditangesa-nê? (1 Phetele 3:4)

⁵ Se mwamuditangesa, ihi yanda mikwatekesa kumona se mwanda kazala mba kana? Dijiyenu kyambote. Nange wejiya kyá ima yalungu ni muthu ande dya kumateka kuditangesa-nê. Kindala utena kwijiya o “muxima” wê. (Tanga 1 Phetele 3:4.) O kwijiya o muxima wa muthu kulombolola kwijiya se o muthu wala ni ukamba wambote ni Jihova, kwijiya o idifwa yê ni ibanzelu yê. Mu kubhita kithangana, eye watokala kutambwijila o ibhwidisu yiyi: ‘O kwila o muthu wanda kala munumi wambote, mba muhatu wambote phal’eme?’ (Jisa. 31:​26, 27, 30; Efe. 5:33; 1 Ti. 5:8) ‘O kwila nganda muzola ni kumuxila kala kyabhindamena mwene? O kwila wanda ngizola ni ku ngixila kala kingabhindamena? O kwila twanda tena kudiloloka?’b (Lom. 3:23) Mu kuditangesa, se mukala ni ibanzelu ki idifu, maji kimwamuzoka, kiki kima kyambote!

⁶ Ima yebhi dingi i wabhingi kwijiya yalungu ni muthu kyoso kimuya ni kuditangesa? Ande dya kuzola kyavulu o muthu, kima kyambote kumwibhwidisa o jimbambe jê mu nzumbi. O kwila twatokala kudizwelesa yalungu ni sawidi, kitadi mba maka abhiti m’ukulu? Kikubhingi kuzwela yoso kudimatekenu dya kuditangesa. (Sokesa ni Nzwá 16:12.) Se umona kwila ki kithangana kya kuzwela hanji yalungu ni maka enyá, mutangele. Mukithangana kyatokala, eye watokala kutangela o maka oso yá ku muthu wamuditangesa-nê, phala mwene n’asole se uxikina kukazala mba kana. Mu kithangana kiki, watokala kumutangela yoso.

7. Kyebhi o phange wamutangesa utena kwijiya o muxima wa muthu wamuditangesa-nê? (Tala we o kaxa “Kyoso Kiwamuditangesa ni Muthu Watungu Dikanga.”) (Tala we o jifoto.)

⁷ Kyebhi ki utena kwijiya kyambote o muxima wa muthu wamuditangesa-nê? O kima kitena kumikwatekesa, o kudibhwidisa mudyenu ni kwivwa kyambote o itambwijilu. Maji kiyadi kyenu mwatokala kuzwela o kidi. (Jisa. 20:5; Tiy. 1:19) Phala mutene kubhanga kiki, bhangenu ima kumoxi kala o kudya kumoxi, kwenda kumoxi bhwaxaxe ka akwenu ni kuboka kumoxi. Mutena we kudijiya kyoso ki mukala kumoxi ni jindandu jenu ni makamba menu. Bhanga ima yanda kukwatekesa kumona se mwene watululuka mba ufutuluka ni lusolo, tonginina we kyebhi mwene kyatalatala o athu. Phange Betu watungu ku Holanda, wazwela kiki yalungu ni kithangana kyoso kya ditangesa ni mana Alise: “Twexile mubhanga o ima yexile mu tukwatekesa kudijiya. Twexile mulamba kumoxi ni kubhanga ikalakalu yengi kumoxi. Mu kubhanga o ikalakalu yiyi, twatena kwijiya o idifwa yetu ni itondalu yetu.”

8. Mu kudilonga kumoxi, mbote yebhi i katula o jiphange amuditangesa?

⁸ Mutena we kudijiya kyambote, mu kudilonga kumoxi milongi ya Bibidya. Se mu kazala, mwanda bhinga kubhanga o ubhezelu ku mwiji, phala Nzambi n’abhange mbandu mu ukaza wenu. (Ndo. 4:12) Kyenyiki, matekenu kyá ni kudilonga kumoxi kyoso ki muya hanji ni kuditangesa. Maji o jiphange amuditangesa kakituka luwa mwiji umoxi, kyenyiki o diyala ki mutwameni hanji wa muhatu. Maji mu kudilonga kumoxi eye umona kwila o muthu wamuditangesa-nê wazolo Jihova. Phange Maniku ni Nzebele, dikaza atungu ku Estados Unidos amono o mbote ijila mu kubhanga kiki. Phange Maniku wambe: “Kyoso kitwamateka kuditangesa, twexile mudilonga milongi izwela yalungu ni kuditangesa, ukaza ni mwiji. Mukonda dya kudilonga o milongi yiyi, twatena kuzwela yalungu ni ima yeji tubhonza kuzwela.”

IMA YENGI I MWATOKALA KUXINGANEKA

9. Mu kusola se anda tangela nanyi yalungu ni kuditangesa, o diyala ni muhatu atokala kubanza mu ihi?

⁹ Nanyi mwanda mutangela kwila mwamuditangesa? Énu mwejiya. Mu kumateka kuditangesa, nange mutena kusola kutangela athu ofele ngó. (Jisa. 17:27) Se mubhanga kiki, athu kanda mibhanga ibhwidisu yavulu yalungu ni kuditangesa kwenu mba se mwanda kazala kizuwa kyebhi. Maji se mukamba kutangela muthu, mwanda disweka phala athu kakijiye. Kiki kilwezu kya dikota. Kyenyiki, kima kyambote kutangela o athu umwejiya kwila anda mikwatekesa mu kumibhana jindunge jambote. (Jisa. 15:22) Mu kifika, mutena kutangela sayi athu ku miji yenu, jiphange jakulu mu nzumbi mba tufunga.

10. Kyebhi o Jikidistá kyatena kubhana kijingu kwa Jihova kyoso kyamuditangesa? (Jisabhu 22:3)

¹⁰ Kyebhi ki mutena kubhana kijingu kwa Jihova kyoso ki muya ni kuditangesa? Kyoso o hanji yenu iya ni kudibandekesa enu mwanda dizola dingi. Ihi itena kumikwatekesa kuzela mu nzumbi? (1 Ko. 6:18) Kanenu kuzwela ima ya ufusa, kukala kumoxi ubheka ni kunwa kyavulu. (Efe. 5:3) O ima yiyi itena kubandekesa o jihanji ja yibha ni ku mifidisa kubhanga o ima yatokala. Dizwelesyenu jinga kwila phala kumona o ima i mwanda bhanga phala kudixila ni kubelesela o itendelesu ya Jihova. (Tanga Jisabhu 22:3.) Talesa yakwatekesa phange Davidi ni Sala atungu mu ixi ya Itiyopya. Ene ambe: “Twakexile mukala kumoxi mu ididi mwexile athu avulu mba mukala kumoxi ni makamba metu. Kitwexile mukala ubheka wetu mu dikalu mba ku bhata. O ima yiyi yatufidisa kudibhala mu mibhetu ya Satanaji.”

11. Mu kubanza kyebhi kyanda dilondekesa o henda mudyâ, ihi yatokala kubanza o jiphange amuditangesa?

¹¹ Kyebhi ki mutena kulondekesa kwila mwadizolo? Mu kubhita kithangana mwanda mesena kudilondekesa kwila mwadizolo. Maji se o jihânji jenu jidibandekesa, nange kimwanda tena kubhanga o ima yatokala. (Miku. 1:2; 2:6) O jihânji jiji jitena kumibhangesa kukamba o kuditumina o jihânji ni kubhanga ima yazembe Jihova. (Jisa. 6:27) Mu kiki, kyoso kimumateka mu kuditangesa, zwelenu kyá yalungu ni itumu ya Jihova, ima i mwanda bhanga ni ima ki mwanda ku ibhanga mu kulondekesa kwila, mwadizolo.c (1 Te. 4:​3-7) Dibhwidisyenu: ‘Ku twatungu, kyebhi o athu kyanda divwa ni ukexilu wetu wa kulondekesa kwila twadizolo? O kwila o ukexilu wetu utena kubandekesa o jihânji jetu?’

12. Se o jiphange amuditangesa akala ni maka, ihi yatokala kubhanga?

¹² Kyebhi kimutena kubatula o maka? Se mukala ni maka, o kwila kiki kilombolola kuma ki mwanda ditunda kyambote se mukazala? Kana, makaza oso akala ni maka. Dikaza dyambote yó abhanga yoso phala kubatula o maka mâ. O ukexilu wa kubatula o maka kindala wanda londekesa se mwanda kala ni ukaza wambote mba kana. Dibhwidise: ‘O kwila o maka metu twabatula ni kutululuka ni kudixila? O kwila tuxikina o itondalu yetu, tubhanga yoso phala ku i eha? O kwila twala polondo phala kuxikina o ndunge ya mukwetu, kubhinga o muloloki ni kuloloka?’ (Efe. 4:​31, 32) Maji se mu kuditangesa, mwa muzoka kyavulu, nange mu ukaza mwanda dikwata we kyavulu. Se umona kwila o mukwenu kafwama phal’eye, o kweha kuditangesa kyene o kima ki mwatokala kubhanga. Kiki kyanda mikwatekesa kiyadi kyenu.d

13. Ihi itena kukwatekesa o jiphange amuditangesa kumona se thembu kuxi anda ditangesa?

¹³ Mwatokala kuditangesa thembu kuxi? Se muthu kaxinganeka kyambote ande dya kusola kima, mwene kanda ditunda kyambote. (Jisa. 21:5) Mu kiki, mwatokala kuditangesa mu kithangana kya soko ni mutene kudijiya kyambote. Maji kimwatokala kuditangesa mu kithangana kyavulu. O Bibidya yamba: “Kudyelela kwa kokoloka, ku sukisa o muxima.” (Jisa. 13:12) Kyoso kyaya ni kuditangesa, kubhonza dingi phala o athu kulenga o jihânji ja kuzeka kumoxi. (1 Ko. 7:9) Mu veji dya kudikwatenena mu kithangana ki mwamuditangesa, dibhwidise: ‘Ihi i ngatokala kwijiya ku muthu, itena kungikwatekesa kumona se nganda kazala-nê mba kana?’

KYEBHI ATHU AKAMUKWA ATENA KUKWATEKESA YO AMUDITANGESA?

14. Mu ukexilu webhi athu akamukwa atena kukwatekesa yo amuditangesa? (Tala we ofoto.)

¹⁴ Se twejiya jiphange amuditangesa kyebhi ki tutena kwa akwatekesa? Tutena kwa exana phala neze mu kudya netu, ku ubhezelu wa mwiji mba kutonoka nawu kumoxi. (Lom. 12:13) Mu ithangana yiyi ene anda tena ku dijiya dingi kyambote. O kwila ene anda bhindamena muthu phala kwenda nawu, kwa ambata ni dikalu, mba kididi phala kudizwelesa ubheka wa? Se kyene, o kwila tutena kwakwatekesa? (Nga. 6:10) Phange Alise, amutumbula kudima ulembalala kyebhi kya divwile mwene ni phange Betu kyoso kya kexile mutunda kumoxi. Mwene wambe: “Twa sangulukile kyavulu kyoso o jiphange kyexile mu tutangela kwila se twabhindamene kididi phala kukala kumoxi, maji ubheka kana.” Se atubhingi phala kutunda ni yo amuditangesa, tumone o kixanu kiki kala ujitu. Dilange, kana kwehela o jiphange amuditangesa kukala ubheka wâ, maji tongolola se kithangana kyebhi eye wabhingi kudisandula bhofele phala ene natene kudizwelesa.—Fil. 2:4.

15. Ihi dingi itena kubhanga o jiphange phala kukwatekesa yo amuditangesa? (Jisabhu 12:18)

¹⁵ Etu tutena kwatekesa we yo amuditangesa mu ima i tuzwela ni mu ima i twakambe kuzwela. Sayi ithangana kota kudixibha. (Tanga Jisabhu 12:18.) Nange tumesena kutangela ku jiphange kwila manu nganji ni mana nganji amuditangesa. Maji nange eéne mwene amesena kutangela o athu. Maji kitwatokala kulongolola mba kuta jimbwembwe mukonda dya kima kyasolo kubhanga ene. (Jisa. 20:19; Lom. 14:10; 1 Te. 4:11) Ki twatokala kuzwela ima mba kwabhanga ibhwidisu ya abhangesa kudivwa kwila twamwajijidika kukazala. Phange Iliza ni mwadi we ambe: “Twexile mu thandanganya kyoso kyexile mu twebhwidisa kyebhi kyanda bhita o ukaza wetu, kima kiluwa twa kizwelele.”

16. Ihi i twatokala kubhanga se o jiphange eha kuditangesa?

¹⁶ Ihi i twanda bhanga se ene kasuluka ni kuditangesa? Kitwatokala kwabhanga ibhwidisu itena kwathandanganyesa, né kutatela umoxi mudyâ. (1 Ph. 4:15) Phange ya muhatu amwixana Lute, wambe: “Ngevu kwila o jiphange exile muzwela ima yavulu kyoso eme ni phange ngexile muditangesa-nê, twadixisa. Kiki kya ngixixima kyavulu.” Kala ki twatumbula ku dimatekenu, se o jiphange asola kweha o kuditangesa kitutokala kubanza kwila ene abhange kyayibha. Ene abhanga kiki, mukonda amona kwila o kweha kuditangesa, kyene o kima kyatokala kubhanga. Maji, kiki kya aluwalesa, kya abhangesa kudivwa ubheka. Mukonda dya kiki tutena kusota ndunge ya kwakwatekesa.—Jisa. 17:17.

17. O jiphange amuditangesa atokala kusuluka mu kubhanga ihi?

¹⁷ Kala kitwamono kyá, o athu amuditangesa adibhana ni ibhidi, maji asanguluka we. Phange Jessica wambe: “Twabhange nguzu yavulu kyoso kitwexile mu ditangesa. Maji, ngasanguluka kyavulu mukonda kwatukwatekesa kudijiya kyambote.” Se mwamuditangesa, sulukenu mu kubhanga nguzu phala mudijiye kyambote. Se mubhanga kiki, mwanda sangulukisa Jihova kyoso kimuya ni kuditangesa ni kusola o ima ni unjimu.