Kadikalu ka Madivulu “Phala Kubhana Umbangi ku Akwa Jixi Joso”

Mu makwinyi a mivu, athu avulu ene mu sanguluka mu kumona o kadikalu ketu kamadivulu. Kumundu woso, muthu wosowoso umona o kadikalu kanda laleka kwijiya se ka tokala kwa nanyi. O kadikalu ki kya fwama ngó, maji ki bhonzo we kukalakala nako. Nange eye uxikina mu izwelu ya phange Asenata, mukwa Polônia, mwene wambe: “O tumakalu ki twa bhonzo, ka a bhange mu ukexilu wa katunda, maji a fwama. Kwa yudika, ki kima kibhonza, kate mwene mu kwambata.”

Kyebhi o tumakalu a madivulu amateka kwa bhanga? Lelu ene mwa yudika kyebhi?

Ukexilu ki ubhonzo

Mu muvu wa 2001, o Kimbandi Kya Fiyele, kya tumu o jiphange mu ixi ya França kumateka ukexilu wengi wakuboka mu ikoka, ukexilu walungu ni kukalakala ni tumakalu. Ene afikisa maukexilu avulu. Mu kifika, ene asokejeka o tumakalu phala kubhana umbangi ni kubhaka we o madivulu. Mukusuluka o Betele ya ixi ya França ya solo o ukexilu wa tumakalu,o aboki asuluka ni kukalakala ni tumakalu tutu mu mivu yavulu.

O jiphange ku França asangulukile ni ukexilu yu wakuboka. Kumuvu wa 2011, o Kimbadi kya Fiyele, kyatumu we o jiphange atokala mu mbanza ya Nova York, Estados Unidos, phala kuboka mu ikoka ni tumakalu twa madivulu ni bhukaxi ka jimeza. O aboki athembu yoso akalakala ni ukexilu yu wakuboka, a mono kwila kwijila mbote yavulu mu kuboka ni tumakalu. O jiphange jiji abhana jindunge jambote ja kwatekesa kuyudika kyambote o Makalu. O tumakalu twa dyanga exile mwabhanga ni mabaya, kexile mwabhanga ni jimakina. O tumakalu enya anemene, mukonda dya kiki kutuluka ni kubanda maxikata ni tu Makalu, kwabhonzele. Kyenyiki abhange tumakalu engi ka nemene kyavulu, maji ne mwene ni kithembu, ene kabu. O tumakalu ya aubhe a ate malola abhangesa kwila o dikalu ki ditekete. Kiki, ki kyengo ngo, ateku we kididi phala kubhaka madivulu.

O kikalakalu kiki kya kufikisa kukalakala ni tumakalu a madivulu, kya ditundu kyambote! Kumuvu wa 2012, o Kibuka kya Utuminu wehela kwila o jiphange ku mundu woso kumateka kukalakala ni tumakalu amadivulu. Asolo kisangela phala kubhanga makalu avulu, atokalele kwa bhanga ni ima ki yaneme maji ki dyatokalele we kukala ima ki ilaleka kuzanga.

Mu kubhita mivu, mu Makalu asokejekamu dingi tuima. Mu kifika, mu muvu wa 2015, o tumakalu amateka kwiza ni kapa, ixita o mbandu ya dima maji ilondekesa o mbandu ya pholo. Dina, watungu mu ixi ya Geórgia, wazolo kyavulu o kima kiki. Mwene wambe: “Mu kindaliki, o kadikalu dyala ni kapa ye, phala kulanga o madivulu mu kithangana kya mvula.” Mu muvu wa 2017, amateka kubhanga jiphaphela ki jibhonzo kunaminina mu tu makalu, mu madimi avulu. O phange Tomasz mukwa Polónia, wambe: “Kwabhonzele kyavulu kulungulula o jiphaphela jibhana ngolokela. O kubhanga o jiphaphela jiji jinaminina mudya, ndunge yakatunda.” Mu muvu wa 2019, sayi ima yexile mubhanga nayu o tumakalu, ni ukexilu wa kwa bhanga a ulungulula phala o tumakalu kazange ni lusolo.

Kyebhi Kyene Mubhanga o Tumakalu?

O tumakalu ene mwa bhanga ngó ku kisangela mba kididi kimoxi, kyoso kyazubha o kwa bhanga a atumikisa mu ilunga ku mundu woso. Mu izuwa ya lelu, kubhanga kadikalu kamoxi, kubhinga 43 a jidolar, sé o kitadi kya kufuta o muthu wanda kwambata o dikalu ni kufuta ima yengi. Kate lelu, 420 a midi ndenge, amakalu a atumikisa kya mu ilunga ku mundu woso, angastala kya 16 a mazunda a jidolar ndenge.

Phala kukalakala kyambote ni kitadi kisangela o athu, twene mu bhinga phala kubhanga tumakalu avulu phala kitu ganstele kitadi kyavulu. Kiki, ki kyene ngó, kindala, o ilunga itena kubhinga ima ya ubhe phala kulungulula o kima kya zange mu kadikalu.

Kubhana Umbangi ni Kadikalu

Aboki avulu ku mundu woso ene mu sanguluka mu kukalakala ni kadikalu mu ukunji. Mana Martina, mukwa Gana, wambe: “Mu maukexilu oso akuboka utwala nawu, etu tuya kuzwela ni athu. Nga zolo kukalakala ni kadikalu, mukonda o athu ene, ene mu kwiza kuzwela netu. Kate mwene, kyoso o muthu wamubhite ngó bhu kadikalu utena kutambula umbangii, se kumwixana.”

Mu ixi yengi ya Africa, sayi diyala wazukama bhu kadikalu, wakatula mu kadikalu, madivulu mu dimi dye. Mu kubhita semana, mwene wavutuka yu wambe: “Nga tange o madivulu oso. Azwela ima yakatunda. Nganda zwela o ima yiyi kumwiji wami,” phala kubhixila mu dyembu dya diyala didi, kubhinga kwenda 500 ajikilometulu. Mukubhita mbeji jiyadi, mwene wavutuka, anga wambe: “O athu mu dyembu dyami atange o madivulu oso, ene asanguluka kyavulu mu kutanga o madivuulu oso. Ene andala kukituka Jimbangi ja Jihova. Maji ene ala ni ibhwidisu. Mu kifika, ene atendela kwila kyoso o muthu kyala mu mu batizala, mwene watokala kuboba o mukutu we woso mu menya. Maji, mu dyembu dyetu seku ngiji. O kwila twatokala kwiza bhabha phala kudibatizala?” O aboki akwatekesa o dyala didi, kuzwela ni muboki wathembu yoso uzwela o dimi dya diyala didi. Tunde o kithangana kyenyokyo, o dyala didi ene mu mukunda se kufula.

Tu sanguluka kyavulu mu kuboka ni tumakalu “mu ngongo yoso, mu kubhana umbangi ku akwa jixi joso.” (Matesu 24:14) O kitadi kyene mu tunda kwebhi phala kufuta o tumakalu tutu? Mu kaxi ka kitadi ki sangela o athu phala o kikalakalu ku mundu woso, avulu ene musangela o kitadi kya bhukaxi ka donate.jw.org. Twasakidila kyavulu mu ujitu wenyu.