“ A Kuzolo Kyavulu”

1-2. Ihi itena kutukwatekesa kuxikina kwila twala ni valolo yavulu bhu pholo ya Jihova?

JIHOVA wazolo kyavulu o jiselevende jê. Maji amoxi mudya kaxikina kwila Jihova wa azolo. Nange a atalatalele kyayibha, mukonda dya kiki amona kwila kala ni valolo. O kwila kyene we ki wamudivwa? Ihi itena ku kukwatekesa kumona kwila eye wala ni valolo yavulu bhu pholo ya Jihova?

² Kima kimoxi kitena ku kukwatekesa o kuxinganeka mu misoso ya Bibidya ilondekesa kyebhi Jihova kyamesena kuma o athu a amona kyebhi ni kyebhi kyatokala kwatalatala. Mone Jezú, wexile mutalatala o athu ni kuxila kwoso. Mu kubhanga kiki, mwene walondekesa kwila o yo ene mudimona kuma kala ni valolo, mukidi phala mwene ni Tat’ê ene ala ni valolo yavulu. (Nzw. 5:19; Jih. 1:3) Mu milongi, yiyi twanda mona: (1) kyebhi Jezú kya kwatekesa o athu kuxikina kwila ala ni valolo bhu pholo ya Jihova, (2) kyebhi kitutena kuxikina kwila twala ni valolo yavulu bhu pholo ya Jihova.—Aje. 2:7.

KYEBHI JEZÚ KYAKWATEKESA O ATHU KUXIKINA KWILA ENE EXILE NI VALOLO?

3. Kyebhi Jezú kyatalatala o athu kyoso kyexile mu Ngalileya?

³ Kyoso Jezú kyexile mu boka mu Ngalileya, athu avulu exile mu muzukama phala ku mwivwa ni kwasaka. Jezú wamono kwila ene “akexile mwa tatesa ni kwa lundujula kála jimbudi ja kambe mubhidi.” (Mat. 9:36; tanga o nota de estudo.) O atwameni a jingeleja kexile mubhana valolo ku athu. Kate mwene exile mwa exana kuma “ka axikina kwa Nzambi.” (Nzw. 7:​47-49; nota de estudo) Maji Jezú wexile mwatalatala ni henda ni kuxila kwoso, wexile we mukatula kithangana phala kwalonga ni kwasaka. (Mat. 9:35) Kubandu yengi, phala kukwatekesa dingi o athu, Jezú wa tendelesa o jipoxolo je phala kuboka ni kwila wabhana kutena phala ‘kusaka o jihaxi.’—Mat. 10:​5-8.

4. Ihi itwadilongo mu ukexilu wa Jezú kutalatala o athu exile mwamona kuma kala ni valolo?

⁴ Mukonda dya kutalatala o athu ni henda ni kuxila kwoso, Jezú walondekesa kwila phala mwene ni Tate o athu ene mwamona kuma kala ni valolo, mu kidi ala ni valolo yavulu. Se wene musidivila Jihova maji wene mudimona kwila kiwale ni valolo, xinganeka kyebhi Jezú kyatalatala o athu yo amesenene kudilonga ni mwene maji exile mwamona kuma kexile ni valolo. Kubhanga kiki kwanda kukukwatekesa kumona o valolo i wala nayu bhu pholo ya Jihova.

5. Ihi itwejiya yalungu ni muhatu wadisangele ni Jezú mu Ngalileya?

⁵ Jezú kexile ngo mulonga o athu maji wexile we muswa muthu ni muthu. Mu kifika, kyoso kyexile mu boka mu Ngalileya, mwene wasange ku muhatu wakatele kibhubhe kya manyinga mu kwinyi ni kiyadi kya mivu. (Mál. 5:25) Kala kizwela o kijila o muthu ukala ni uhaxi yu ukasana katemwene o muthu woso woso u mukwata u kasana we. Mu kiki mwene katokalele kudilunga ni athu amukwa, nange mwene wexile mubhita ithangana yavulu ubheka we. Ku mbandu yengi, mwene kexile mutena kuya mubheza Jihova kumoxi ni athu amukwa ku dilombe ni ku fesa ya pasu. (Iji. 15:​19, 25) Mukidi, o muhatu yu wexile mutala hadi yavulu.—Mál. 5:26.

6. Ihi yabhange o muhatu phala kudisanza?

⁶ O muhatu yu wa tandanganyele kyavulu wamesenene kwila Jezú umusaka. Maji mwene kamubhingi. Mukonda dyahi? Nange mwene wexile ni jisonyi mukonda dya uhaxi we. Nange mwene wexile ni woma wa kwila Jezú weji mukaya, kuma mwene wa kasana katokalele kukala bhukaxi ka mundu. Mukiki, mwene wa kwata ku kizwatu kya Jezú ni kidyelelu kya kwila mwene weji disanza. (Mál. 5:​27, 28) Mwene wabhangele kyambote kukala ni kixikanu kya kolo. Mwene wadisanze mu haxi we! Mu kusuluka, Jezú webhwidisa se nayi wakwatele ku kizwatu ye, o muhatu watange o kidi kyoso. Ihi yabhange Jezú?

7. Kyebhi Jezú kyatalatala o muhatu wexile mutala hadi yavulu? (Máluku 5:34)

⁷ Jezú wa mutalatala ni henda ni kuxila kwoso. Jezú wamono kwila mwene wexile mu “teketa ni wôma.” (Mál. 5:33) Mu kumona kyebhi kyexile mudivwa ni kwila wexile mu kithangana kyabhonzo, mwene wa mutalatala ni henda, yu wamuswinisa. Mwene wamwixana “mon’ami”. O kizwelu kiki kikilondekesa ngo kuxila maji kilondekesa we henda. (Tanga Máluku 5:34.) O nota de estudo mu kizwelu “mon’ami” mu Bíblia de estudo dyamba: “Yiyi yene ngo o veji ya Jezú kwixana muhatu kwila ‘mon’ami.’ Nange mwene wabhange kiki mukonda o muhatu wexile ni jisonyi ni kwila wexile ‘muteketa ni woma.’” Xinganeka o kusanguluka kwa muhatu yu! Se Jezú kamu talatalele ni henda, mwene keji sanguluka ne mwene se wamusakele weji suluka ni kuditatela. Jezú kamesenene ngo kumusaka ku uhaxi we. Mwene wamesenene kwila o muhatu udimona kuma wala ni valolo, mona wakazola wa Tatetu wa dyulu.

8. Ibhidi yebhi yadibhana nayu phangyetu watungu mu ixi ya Brazil?

⁸ Lelo we jiselevende javulu ja Jihova ene mutandanganya kyavulu mukonda dya mauhaxi avulu a abhangesa kudivwa kwila kala ni valolo. Tala o phangu ya mana Madiyaa muboki wa thembu yoso mu ixi ya Brazil. Mukonda dya uhaxi mwene amuvwala sé inama sé lukwaku lwa kyasu. Mwene wajimbulula: “O jikoleka jami mu xikola exile mu ngitalatala kyayibha ni ku ngilokalala mukonda dya unema wami. Sayi ithangana kate mwene o jindandu jami kexile mu ngibhana valolo.”

9. Ihi yakwatekesa mana Madiya kumona kwila mwene wala ni valolo yavulu ku pholo ya Jihova?

⁹ Ihi yakwatekesa mana Madiya? Kyoso kyakituka mbangi ya Jihova, o jiphange mu kilunga amuswinisa, ya amukwatekesa kumona kwila mwene wala ni valolo yavulu ku pholo ya Jihova. Mwene wambe: “Jiphange javulu angikwatekesa! Ngisakidila kyavulu Jihova mu kungibhana mwiji mu nzumbi.” O jiphange jiji jakwatekesa mana Madiya kumona kwila mwene wala ni valolo yavulu ku pholo ya Nzambi.

10. Kibhidi kyebhi kyexile mudibhana nakyu Madiya dya Manda, ni kyebhi kyexile mu divwa? (Tala we o jifoto.)

¹⁰ Tala kyebhi Jezú kya kwatekesa muthu wengi, Madiya dya Manda. Mwene wexile ni sambwadi dya madimonyo! (Luk. 8:2) Nange mwene wexile mubhanga o ima mu ukexilu wayibha mukonda exile mu mufunyisa ku madimonyo, mukonda dya kiki o athu exile mudisandula kwa mwene. Mu kithangana kiki kya bhonzo ku mwenyu we, nange mwene wexile mubanza kwila kexile ni valolo. Nange Jezú wakaye o madimonyo exile mu mutalesa hadi, anga mwene wakituka mukayedi wa fiyele wa Jezú. Mu ukexilu webhi dingi Jezú wa kwatekesa Madiya dya Manda?

11. Kyebhi Jezú kya londekesa kwa Madiya dya Manda kwila mwene wexile ni valolo yavulu bhu pholo ya Nzambi?(Tala we o jifoto.)

¹¹ Jezú wabhingi we kwa Madiya dya Manda phala ku muxinjikila mu kuboka.b Mukubhanga kiki, mwene wasuluka mukwivwa Jezú kyoso kyayi ni kulonga o athu engi. Mwene o muthu wa dyangele kumona Jezú kyoso kya mufukunwine, mwene we o muthu wa dyangele kuzwela ni Jezú. Jezú wamubhingi we phala kuya muzwela ni jipoxolo je kwila amufukununa. Mu kubhanga kiki Jezú walondekesa kwa Madiya dya Manda kwila mwene wala ni valolo yavulu bhu pholo ya Nzambi!—Nzw. 20:​11-18.

12. Ihi yabhangesa mana Lidya kubanza kwila nuka eji muzola?

¹² Kala Madiya dya Manda, athu avulu lelo kene mwabhana valolo. Phange ya muhatu a mwixana Lidya, watungu mu ixi ya Espanha wambe kwila, manya wamesenene kumujibha kyoso kyexile hanji mu mala. Mana Lidya ulembalala kwila kate mwene kyoso kyexile kabwetele manya kexile mu mulanga, yu wexile mu musebhulula. Mwene wambe: “O kima kingamesenene dingi ku mwenyu wami o kukala bhukaxi ka athu angizolo. Eme ngafikile kwila nuka eji ngizola mukonda mametu wexile mungitangela kwila kingala ni valolo.”

13. Ihi yakwatekesa mana Lidya kumona kwila mwene wala ni valolo yavulu bhu pholo ya Jihova?

¹³ Kyoso mana Lidya kyamateka kudilonga o Bibidya o ima ku mwenyu we yalunguluka. O kusamba kwa Jihova, kutanga o Bibidya, o izwelu ni ibhangelu ya jiphange yamukwatekesa kumona kwila mwene wexile ni valolo yavulu bhu pholo ya Jihova. Mwene wambe: “Mwadi wami wene mungitangela jinga kwila wangizolo kyavulu. Wene we mutumbula o idifwa yami yambote. O makamba metu ene we mubhanga kiki.” Kala mana Lidya, nange mu kilunga kye mwala we phange wabhindamena kikwatekesu phala kumona o valolo yala nayo mwene bhu pholo ya Jihova. O kwila utena kuxinganeka ku muthu umoxi?

KYEBHI KITUTENA KUDIMONA KALA KYATUMONA JIHOVA?

14. Kyebhi o divulu dya 1 Samuwele 16:7 ditukwatekesa ku dimona kala kyatumona Jihova? (Tanga we o kaxa “Mukonda dyahi o jiselevende ja Jihova ala ni valolo yavulu phala mwene?”)

¹⁴ Lembalala kwila Jihova ka tumona kala kyatumona o athu. (Tanga 1 Samuwele 16:7.) Phala o athu ku mundu, o muthu wala ni valolo yo wafwama o pholo, wala ni kitadi kyavulu, mba wadilongo kyavulu. Maji kikyene kibanza Jihova. (Iza. 55:​8, 9) Mu veji dya kudimona kala kyamesena o athu ku mundu yu, twatokala kudimona kala kyatumona Jihova. O Bibidya izwela yalungu ni athu mu ukulu sayi ithangana exile mu dimona kala kexile ni valolo, mu kifika, Elija, Nowemi ni Ana. Mukutanga yalungu ni ene tala o henda yexile nayu Jihova kwa ene. Eye we utena kusoneka o ima yabhiti ku mwenyu we ilondekesa kwila Jihova wa kuzolo ni kwila ukubhana valolo yavulu. Ku mbandu yengi eye utena kutokwesa mu madivulu metu milongi ilondekesa kwila Jihova wakuzolo.c

15. Mukonda dyahi Jihova wazolele kyavulu Daniyele? (Daniyele 9:23)

¹⁵ Xikina kwila o ufiyele we kwa Jihova wene ukubhangesa kukala ni valolo bhu pholo ye. Sayi kizuwa polofeta Daniyele, nange kyoso kyexile ni 90 a mivu, ‘watohokele kyavulu’ ni kwila waluwalele. (Dan. 9:​20, 21) Kyebhi Jihova kya muswinisa? Mwene watumikisa o anju Ngabidiyele phala ku lembalesa Daniyele kwila a ‘muzolele kyavulu’ ni kwila o misambu ye yotambwijile. (Tanga Daniyele 9:23.) Mukonda dyahi Jihova wazolele kyavulu Daniyele? Mukonda dya henda ye ni ufiyele we kwa mwene. (Ize. 14:14) Jihova watumina kusoneka o ima yiyi phala ku tuswinisa. (Lom. 15:4) Mwene we, wene mukwivwa o misambu ye ni kwila mwene ubhana valolo mu ikalakalu i wene mubhanga ni ufiyele woso.—Mik. 6:​8, nota; Jih. 6:10.

16. Ihi itena ku kukwatekesa kumona Jihova kala Tata ya henda?

¹⁶ Tala Jihova kala Tat’ê wakuzolo. Mwene wamesena ku kukwatekesa, kamesena kusanga o itondalu ye. (Jisá. 130:3; Mat. 7:11; Luk. 12:​6, 7) O kuxinganeka kiki, kwene mukwatekesa athu avulu adimona kala kala ni valolo. Mu kifika tala yabhiti ni phange ya muhatu watungu mu ixi ya Espanha amwixana, Ngalaxi, wexile mudivwa kala kalé ni valolo mukonda dya uzwelelu yayibha wa mwadi wê. Mwene wambe: “Kyoso ki ngexile mudivwa kala ki ngexile ni valolo, eme ngexile mu xinganeka kala Jihova wangikwata ku makwê, wexile mungilondekesa henda ni ku ngilanga.” (Jisá. 28:9) Mana Laurinda, watungu mu ixi ya África do Sul, mwene wene mudilembalala mu izwelu ye yiyi: “Se Jihova mu henda yê wangibheka mu kilunga kyê, wangilange mu mivu yoso yiyi yu wa ngisolo phala kulonga akwetu, se phata kiki kilondekesa kwila Jihova ungimona kwila ngala ni valolo.”—Hoz. 11:4.

17. Kyebhi ki utena kudyelela kwila Jihova wakuxikina? (Jisálamu 5:12) (Tala we o foto.)

¹⁷ Dyelela kwila Jihova wakuxikina. (Tanga Jisálamu 5:12.) Davidi wasokesa o ukexilu wa Jihova kutuxikina kala “ngubu” ilanga o athu ayuka. O kudyelela kwila Jihova watuxikina itukwatekesa kyoso kitukala ni ixinganeku yayibha. Kyebhi ki utena kwijiya kwila Jihova wakuxikina? Kala kitwamono kya, tutena kukala ni kidyelelu kiki mukutanga o Bibidya, mukonda kwene kutusanga o ibanzelu ya Jihova yalungu netu. Ku mbandu ya mukwa mwene utena kukulembalesa kwila eye wala ni valolo ku mesu mê bhu kaxi ka tufunga, makamba ni athu akamukwa. Maji ihi i utena kubhanga se akutangela izwelu ya henda?

18. Mukonda dyahi watokala kuxikina kyoso akwenu kyakuximana?

¹⁸ Xikina kyoso akwenu kyakuximana. Lembalala kwila nange Jihova wasolo o athu ya phala ku kukwatekesa kutendela kwila mwene wakuxikina. Mana Ngalaxi twamutumbula kudima wambe: “Bhofele-bhofele ngamu xikina kyoso o athu kya ngiximana ni henda yoso. Sayi ithangana o kubhanga kiki kyene mungibhonza, maji ngejiya kwila kyene kyandala Jihova kwila ngikibhanga.” O tufunga ni henda yoso akwatekesa mana Ngalaxi kumona kwila Jihova wamuxikina. Kindala mwene wamu sidivila kala muboki wathembu yoso, wamukwatekesa we o ikalakalu ya Betele kubhata dyê.

19. Mukonda dyahi utena kudyelela kwila eye wala ni valolo ku mesu a Jihova?

¹⁹ Jezú ni henda yoso utulembalesa kwila etu enyoso twala ni valolo yavulu ku pholo ya Tat’etu ya dyulu. (Luk. 12:24) Kyenyiki ki watokala kudijimba kwila eye wala ni valolo yavulu ku pholo ya Jihova! Twamesena we kukwatekesa o athu kumona kwila ala ni valolo ku mesu a Jihova!