O Kwila Jihova Wanda Tambwijila o Misambu Yami?

1-2. Mukonda dyahi tutena kudivwa kwila Jihova ka mutambwijila o misambu yetu?

MU DIVULU dya Jisálamu 37:​4, o Bibidya yamba: “Ngalasa yé itunde mu kudituma ni Jihova; mwene ukubhana kiwasolo mu muxima.” Kiki kikanenu kya katunda! Maji o kwila twatokala kukingila kuma Jihova utubhana ni lusolo o ima yoso itumubhinga? Mukonda dyahi kima kyambote kubhanga o kibhwidisu kiki? Xinganeka mu ifika yakayela. Phange ya muhatu dikudi, usamba phala n’amwixane phala kubhanga o Xikola ya Akunji a Utuminu. Maji kubhita mivu yavulu, ne kiki ka mwixana luwa. Phange yadiyala, munzangala, ubhinga kwa Jihova phala kumubhangesa kudisanza ku uhaxi wabhonzo, phala atene kusidivila ni kuswina kwoso mu kilunga. Maji o uhaxi ki ubhiti. Jitata asamba phala o twana twa asuluke mu kusidivila Jihova. Maji ene asolo kweha kumusidivila.

² Nange eye we wabhingi kima kwa Jihova mu musambu, maji ka kubhana nakyu. Mukonda dya kiki, nange ubanza kwila Jihova wene mutambwijila o misambu ya akwenu, maji o misambu ye kana. Mba phe nange uxinganeka kwila ka kutambwijila mukonda wabhange kima kyayibha. Kiki kyene kyadivwile phange ya muhatu amwixana Zefab. Mwene ni mwadi we asambe kwa Jihova yalungu ni vondadi yawu ya kusidivila ku Betele. Mwene wambe: “Eme ngaxikinine kwila ki kweji laleka phala kutwixana ku Betele.” Maji mu kubhita mivu yavulu, ene ka exanene hanji. Phange Zefa wambe dingi: “Ngaluwalele kyavulu, nga thandanganyele we. Ngexile mudibhwidisa se kima kyahi kingabhangele kyaluwalesa Jihova. Eme ngasambele kyavulu yalungu ni kuya ku Betele. Mukonda dyahi mwene ka tambwijila o misambu yami?”

3. Ihi itwandamona mu milongi yiyi?

³ Sayi ithangana, nange tutena kudibhwidisa se Jihova wamukwivwa mwene o misambu yetu. Kate mwene sayi jiselevende ja fiyele ja Nzambi m’ukulu, adivwile we kiki. (Jobe 30:20; Jisá. 22:2; Haba. 1:2) Ihi itena ku kuxikinisa kwila Jihova wanda tambwijila o misambu ye? (Jisá. 65:2) Phala kutukwatekesa kutambwijila o kibhwidisu kiki, twanda mona o jipondo jiji ja kayela: (1) Ihi itutena kukingila kwa Jihova? (2) Jihova wamesena kwila tubhanga ihi? (3) Mukonda dyahi nange twatokala kulungulula o ima itubhinga mu misambu?

IHI ITUTENA KUKINGILA KWA JIHOVA?

4. Kala kyosoneke mu divulu dya Jelemiya 29:​12, Jihova wakanena kubhanga ihi?

⁴ Jihova wakanena kwivwa o misambu yetu. (Tanga Jelemiya 29:12.) O Nzambi yetu ya henda wazolo o abhezi’e afiyele, kyenyiki mwene wandakwivwa jinga o misambu ya. (Jisá. 10:17; 37:28) Maji kiki, ki kilombolola kwila mwene wandatubhana yoso itumubhinga. Nange sayi ima itubhinga mu musambu, ki twanda itambula ande dya kubhixila o mundu wa ubhe.

5. Ihi itonginina Jihova kyoso kyevwa o misambu yetu? Jimbulula.

⁵ Jihova utonginina se o ima itumubhinga yalungu ni vondadi ye. (Iza. 55:​8, 9) Kima kimoxi kyalungu ni vondadi ye, kya kwila o ixi izala ni athu amubelesela ni muxima woso anga amuxikina kala Nguvulu ya. Maji Satanaji wamba kwila o athu anda ditunda dingi kyambote se aditumina mudya. (Dim. 3:​1-5) Phala kulondekesa kwila Dyabhu mukwa makutu, Jihova wene mukwehela o athu kuditumina mudya. Kyenyiki, ibhidi yavulu itwene mudibhana nayu lelu, yene mumoneka mukonda dya unguvulu wa athu. (Ndo. 8:9) Etu twejiya kwila Jihova kandakatula o ibhidi yoso mu kithangana kiki. Se mwene wabhangele kiki, amoxi ejitena kubanza kwila o athu amuditunda kyambote mu kuditumina, ni kwila atena kuzubha o maka oso mu ngongo.

6. Mukonda dyahi twabhingi kudyelela kwila Jihova ithangana yoso ubhanga o ima ni henda ni kuyuka?

⁶ Jihova utena kutambwijila misambu yadifwangana mu maukexilu kadifu. Mu kifika, kyoso Sobha Ezekiya kya katele kyavulu, mwene wadyondo kwa Jihova phala kumukwatekesa kudisanza. Mu kusuluka, Jihova wamusake. (2 Jis. 20:​1-6) Ku mbandu yamukwa, kyoso poxolo Pahwulu kyadyondele kwa Jihova phala kumukatula o kibhidi kyedile kala “minya mu xitu,” nange uhaxi wexile nawu, Jihova ka mukatulakyu kana. (2 Ko. 12:​7-9) Tala we o phangu ya jipoxolo Tiyaku ni Phetele. Sobha Helode wamesenene kwa ajibha kiyadi kya. O kilunga kyasambela Phetele, nange ni Tiyaku we. Maji phe, Tiyaku amujibha, Phetele amubhulula kwala o anju. (Ika. 12:​1-11) Nange tudibhwidisa, ‘Mukonda dyahi Jihova wabhulula Phetele maji Tiyaku kana?’ O Bibidya ki izwela se mukonda dyahi.c Maji tutena kudyelela ni kidi kyoso kwila, Jihova ubhanga jinga o ima ni kuyuka kwoso. (Mate. 32:4) Twejiya we kwila kikale Phetele mba Tiyaku, a azolele kyavulu kwa Jihova. (Dij. 21:14) Sayi ithangana Jihova nange kanda tambwijila o misambu yetu mu ukexilu utwexile mukingila. Maji kuma twadyelela kwila Jihova ubhanga jinga yoso ni henda ni kuyuka, etu ki tudikalanganza mukonda dya ukexilu usola mwene phala kutambwijila o misambu yetu.—Jobe 33:13.

7. Ihi itusota kudituna o kubhanga, ni mukonda dyahi?

⁷ Etu tubhanga yoso phala ki tusokese o ibhidi yetu ni ya akwetu. Mu kifika, nange tubhinga kima kwa Jihova mu musambu, maji ka tubhanakyu. Ku pholo dyakwenda, twivwa kwila sayi phange wabhingi we o kima kitwabhingi, anga tumona kala Jihova watambwijila o musambu we. Sayi phange yamuhatu amwixana Ana wadibhanene ni maka enya. Mwene wasambele phala mwadi we na disanze ku uhaxi wa cancer. Mu kithangana kyenyokyo kwexile we jiphange jiyadi ja ahatu abetele kota mu kukuka mwadi we ndenge, exile we ni uhaxi wa cancer. Ni kuswina kwoso phange Ana wa sambe phala mwadi we Matesu ni jiphange jiyadi jexile mukata. O jiphange jiyadi jiji adisanze, maji mwadi we Matesu wafu. Kudimatekenu phange Ana wexile mudibhwidisa se o jiphange jiyadi jiji adisanzele mwene ni kikwatekesu kya Jihova. Se kyene, mukonda dyahi Jihova ka tambwijila o musambu we phala mwadi we na disanze? Mu kidi, etu ki twejiya kyebhi o jiphange jiyadi jiji adisanze. Maji o kima kitwejiya ngo kya kwila, Jihova wanda zubha o hadi yetu yoso, ni wala ni hanji yavulu ya kufukununa o makamba me afu kya.—Jobe 14:15.

8. (a) Kala kilondekesa Izaya 43:​2, Jihova utukwatekesa kyebhi? (b) Kyebhi o musambu utena kutukwatekesa kyoso kitwamudibhana ni ibhidi yabhonzo? (Tala o vidyu, O misambu Itukwatekesa Kukolokota mu Ithangana Yabhonzo.)

⁸ Jihova wandatukwatekesa ithangana yoso. Kala Tata yetu ya henda, Jihova ka mesena kwila tutala hadi. (Iza. 63:9) Ne kiki, mwene kene mufidisa o ibhidi yetu yoso, itutena kusokesa ni jingiji mba mulengu wa tubhya. (Tanga Izaya 43:2.) Maji mwene wakanena kutukwatekesa kudibhana nayu. Ku mbandu yamukwa, kabasa kibhidi kitudibhana nakyu kindala, Jihova wandabhanga jinga yoso phala kutukwatekesa, ni tusuluke mu kumusidivila. Mwene we utubhana o nzumbi ye ikola phala kutukwatekesa kukolokota. (Luk. 11:13; Fil. 4:13) Mukonda dya kiki, tutena kudyelela kwila mwene wandatubhana jinga yoso itwabhindamena phala kukolokota, ni kusuluka mu kumukala fiyele.d

JIHOVA WAMESENA KWILA TUBHANGA IHI?

9. Kala kizwela Tiyaku 1:​6, 7, mukonda dyahi twabhingi kudyelela kwila Jihova wandatukwatekesa?

⁹ Jihova ukinga kwila tumudyelela. (Jih. 11:6) Sayi ithangana nange tudivwa kwila o ibhidi yetu yabhonzo kyavulu, ki twandatena kudibhana nayu. Kate nange tutena kumateka kudibhwidisa se Jihova wandatukwatekesa mwene. Maji o Bibidya itudyelelesa kwila mu nguzu ya Nzambi, tutena ‘kutuka imbaka.’ (Jisá. 18:29) Kyenyiki, muveji dya kukala ni jiphata, twatokala kusamba ni kixikanu kyoso, mu kudyelela kwila Jihova wandatambwijila o misambu yetu.—Tanga Tiyaku 1:​6, 7.

10. Bhana phangu yalungu ni nguzu itwatokala kubhanga kyoso kituzubha kubhinga kikwatekesu kwa Jihova mu musambu.

¹⁰ Jihova wamesena kwila kyoso kitusamba kwa mwene, tubhanga o mbandu yetu. Mu kifika, nange phange ya diyala wamesena kwila amubhana kithangana ku salu, phala atene kuya mu kyonge kyadikota. Bhenyobho usamba kwa Jihova phala kumukwatekesa. Nange kyebhi Jihova kyeji tambwijila o musambu yu? Mwene nange utena kubhana o kuswina kwabhindamena o phange phala kuzwela ni xefe ye. Maji phe, o phang’yetu wandabhinga hanji kubhixila kwala o xefe ni kuzwela ne. Mwene nange wandabhinga kuzwela ni xefe mu veji javulu. Mwene kate nange wandabhinga kuzwela ni koleka yengi phala kumubhingana mu izuwa ya kyonge kyadikota, o kyoso kyandavutuka n’amubhingana we. Se kwabhingi, nange o phange utena kudibhakula phala kukalakala mu ji ola javulu, sé kumufutaju.

11. Mukonda dyahi twatokala kusamba mu veji javulu yalungu ni ibhidi yetu?

¹¹ Jihova wamesena kwila tusuluka mu kusamba yalungu ni ibhidi yetu. (1 Te. 5:17) Jezú walondekesa kwila, sayi ima itubhinga kanda tubhana nayu mu kithangana kyenyokyo. (Luk. 11:9) Kyenyiki, kana kubhwila! Samba ni muxima woso, mu veji javulu. (Luk. 18:​1-7) Kyoso kitusuluka mu kusamba yalungu ni kima kimoxi, tulondekesa kwa Jihova kwila, twamesena kyavulu o kima kyenyokyo. Tulondekesa we kwila twadyelela mu kutena kwe kwa kutukwatekesa.

MUKONDA DYAHI NANGE TWATOKALA KULUNGULULA O IMA ITUBHINGA MU MISAMBU?

12. (a) Yalungu ni ima itubhinga, kibhwidisu kyebhi kitwatokala kudibhanga, ni mukonda dyahi? (b) Kyebhi kitutena kulondekesa kwila twamuxila Jihova mu misambu yetu? (Tala o kaxa “O Kwila Ima Ingibhinga Ilondekesa kwila Ngamuxila Jihova?”)

¹² Se twabhingi kima mu musambu maji katubhana kyu, tutena kudibhanga ibhwidisu itatu. Kyadyanga, ‘O kwila ngabhingi o kima kyatokala?’ Mu ithangana yavulu, twene mufika kwila twejiya kyebhi o kima kya betakota phala etu. Maji nange o ima itubhinga mu musambu, ki yene ya betakota phala etu. Se twamusamba yalungu ni maka utwamudibhana nawu, nange kwala ukexilu wabeta dingi kota wa ku abatula, o utwamubhinga mu musambu wetu ndenge. Sayi ima itubhinga mu musambu nange ki yalungu ni vondadi ya Jihova. (1 Nz. 5:14) Mu kifika, xinganeka mu maka a jitata jitwatumbula ku dimatekenu dya milongi yiyi. Ene abhingi kwa Jihova phala abhangese kwila o twana twa asuluke mu kumusidivila. O kima kyabhingi o jitata jiji, kyedi kala kyafwama mwene. Maji phe, Jihova kene mujijidika muthu phala kumusidivila. Mwene wamesena kwila etwenyoso, kate ni twana twetu, tusola kumubheza mu vondadi yetu. (Mate. 10:​12, 13; 30:​19, 20) Kyenyiki, muveji dya kusamba kwa Jihova phala abhangese kwila o twana twa asuluke mu kumusidivila, o jitata ejibhinga phala Mwene kwakwatekesa kubhixidisa o kidi kya Bibidya ku mixima ya twana, n’atene kumuzola ni kukala makamba Me.—Jisa. 22:6; Efe. 6:4.

13. Kala kilondekesa o divulu dya Jihebelewu 4:​16, mu kithangana kyebhi Jihova kyanda tukwatekesa? Jimbulula.

¹³ O kibhwidisu kya kayadi kyenyiki: ‘O kwila kiki kyene o kithangana kya Jihova kungitambwijila?’ Nange tudivwa kwila twabhindamena o kitambwijilu kya misambu yetu ni lusolo. Maji Jihova wejiya kyebhi o kithangana kyatokala phala kutukwatekesa. (Tanga Jihebelewu 4:16.) Kyoso ki tukamba kutambula ni lusolo o kima kitwabhingi mu musambu, nange tubanza kwila Jihova ‘Waditunu’ kututambwijila. Maji mu kidi, nange mwene wamututangela kwila ‘Kindala kana hanji.’ Mu kifika, xinganeka dingi mu phangu ya phange ya diyala munzangala, wasambe kwa Jihova phala kumusaka. Se Jihova wabhangele madiwanu phala kumusaka, Satanaji wejitena kuzwela kwila, o phange wamusuluka ngo mu kusidivila Jihova mukonda dya kumusaka. (Jobe 1:​9-11; 2:4) Ku mbandu yamukwa, Jihova waxindi kya o kithangana kyandazubha o mauhaxi moso. (Iza. 33:24; Dij. 21:​3, 4) Kate kibhixila o kithangana kyenyokyo, ki tutokala kukingila kutusaka bhukaxi ka madiwanu. Kyenyiki, o phang’yetu wejibhinga kwa Jihova n’amubhana nguzu ni kutululuka kwa muxima phala kukolokota mu kudibhana ni uhaxi, n’asuluke mu kubheza Nzambi ni ufiyele woso.—Jisá. 29:11.

14. Ihi iwadilongo ku musoso wa phange Zefa?

¹⁴ Xinganeka dingi mu phangu ya phange Zefa, wasambele yalungu ni kusidivila ku Betele. Mu kubhita mivu itanu, mwene watendela kwila, Jihova watambwijile o misambu ye, maji mu ukexilu wengi. Mwene wambe: “Mu mivu yoso yiyi yexile mubhita, Jihova wangilongo ima yavulu, yu wangikwatekesa kukituka Kidistá yambote. O kidyelelu kyami kwa mwene kyabhingile kukola. Ngabhingile kukala ni kifwa kya kudilonga o Bibidya ni kuswina kwoso. Ngabhingile we kudilonga kwila ngitena kusanguluka mu kusidivila Jihova, kabasa kididi kungikala.” Kupholo dya kwenda, phange Zefa ni mwadi we a asolo phala kusidivila mu kikalakalu kya kukunda o ilunga. Mu kuxinganeka mu ima yabhiti, phange Zefa wambe: “Jihova watambwijila o misambu yami, sumbala ka kibhange mu ukexilu ungexile mukinga. Kwabhiti kithangana phala kutendela kwila o kitambwijilu kyangibhana Jihova ujitu wadikota. Ngasakidila kyavulu mu kutena kumona o mbote ni henda ya Jihova.”

15. Mukonda dyahi sayi ithangana kota se tutumbula ima yavulu muveji dya kubhinga ngo o kima kitwamesena? (Tala we o jifoto.)

¹⁵ O kibhwidisu kyakatatu kyenyiki: ‘O kwila ngatokala kubhinga kima kyengi?’ Mu kusamba, kima kyambote kubhinga sé kubhana jihonda. Maji sayi bhabha, nange kota se tutumbula ima yavulu muveji dya kubhinga ngo o kima kitwamesena. O kubhanga kiki kutena kutukwatekesa kumona ihi yamesena Jihova phala etu. Xinganeka mu phangu ya phange yamuhatu, dikudi, wexile musamba phala kubhanga o Xikola ya Akunji a Utuminu. Mwene wamesenene kubhanga kiki, phala kuya musidivila mu kididi mwabhindamena dingi aboki. Kyenyiki kyoso kyayi ni kusamba phala kumwixana n’abhange o xikola, mwene wejitena we kubhinga kwa Jihova phala kumukwatekesa kumona maukexilu amukwa a kusanzumuna o ukunji we. (Ika. 16:​9, 10) Kyoso kyejizubha kusamba yalungu ni maka enya, mwene wejitena kuzwela ni kafunga ka ilunga, phala kwijiya se kwala kilunga bhwazukama kyabhindamena aboki a thembu yoso. Mba phe, wejitumikisa mukanda ku filiyale phala kwa ebhwidisa se kididi kyebhi kyabhindamena dingi aboki.e

16. Kima kyahi kitutena kudyelela ni kidi kyoso?

¹⁶ Kala kitwadilongo, tutena kudyelela kwila Jihova wandatambwijila o misambu yetu mu ukexilu wa henda ni kuyuka. (Jisá. 4:3; Iza. 30:18) Sayi ithangana nange ka tutambwijila kala kitwexile mu kinga. Maji Jihova nuka wandakamba kwivwa o misambu yetu. Mwene watuzolo kyavulu. Nuka wandatuxisa. (Jisá. 9:10) Kyenyiki, tusulukyenu ‘mu kumudyelela jinga,’ mu kulundulula o mixima yetu kwa mwene mu musambu.—Jisá. 62:8.