Milongi Phala o Yônge, Ukexilu wa Ukidistá ni Ukunji Wetu
© 2025 Watch Tower Bible and Tract Society of Pennsylvania
7-13 YA KAVWA
O VALOLO YA MAK’Â NZAMBI JISABHU 21
Itendelesu Yambote Phala Kukala ni Ukaza Wasanguluka
Kyebhi ki Utena Kusanga Muthu Wambote Phala Kukazala-Nê?
7 Xinganeka kwila wamono muthu wafwama o pholo. O kwila wanda mutangela kyá kuma wamuwabhela? O Bibidya yamba kwila o muthu wadimuka udyanga hanji kwijiya o maka, anga ubhanga o ima. (Tanga Jisabhu 13:16.) Mukonda dya kiki, kima kyambote kudyanga hanji kwijiya o muthu, kyene ngó ki umutangela kwila wamuwabhela. Phange ya diyala amwixana Betu watungu mu ixi ya Holanda wambe: “O jihanji jimoneka ni lusolo, maji jibhwa we ni lusolo. Mu kiki se utonginina kyambote o muthu ni kumwijiya, kiwanda mateka kutangesa mukonda ngó dya jihânji.” Kyoso ki wandaya ni kutonginina o muthu, nange wanda mona kwila kafwama phala kukazala n’eye.
8 Kyebhi ki wanda tonginina o muthu sé mwene ku kijiya? Mu yônge ni mu ithangana ya kutonoka, eye utena kwijiya o idifwa ya muthu, o ukexilu wê ni kumumona se wakulu mu nzumbi. Ananyi o makamba mê? Wawabhela kuzwela yalungu ni ihi? (Luk. 6:45) O kwila o jimbambe jê mwene, ja difu ni j’eye? Utena we kuzwela ni tufunga twa kilunga kyê mba kuzwela ni jiphange jakulu mu nzumbi amwijiya kyambote. (Jisa. 20:18) Utena kwibhwidisa yalungu ni idifwa yê ni ukexilu wê. (Lute 2:11) Kyoso ki uya ni kumutonginina, kana kumubhangesa kudivwa kyayibha. Kikubhingi ola joso kubhanga ibhwidisu yalungu ni mwene.
9 Kwabhingi kubhita thembu kuxi mu kutonginina o muthu ande dya kumutangela kwila ngakuzolo? Se umutangela sé kukingila o kithangana kyasoko, mwene wanda banza kwila eye u mukwa kulalama. (Jisa. 29:20) Maji se ukingila we kyavulu, benge-benge se o muthu wamono kyá kwila wamwandala, mwene wanda mona kwila eye u mukwa kisuka. (Ndo. 11:4) Ande dya kuzwela ni mwene, kubanze kwila mwene watokala ku kuxikina. Maji watokala kwijiya kwila eye wala kyá polondo phala kukazala ni kwila mwene wanda kala diyala dyambote mba muhatu wambote phal’eye.
10 Ihi i wanda bhanga se umona kwila sayi muthu wakwandala? Se kiwamuwabhela, londekesa kiki bhukaxi ka ibhangelu yé. Ki kima kyambote kubhangesa o muthu kubanza kwila wamuzolo, mbé ki kyene.—1 Ko. 10:24; Efe. 4:25.
11 Sayi jixi o jitata mba o adyakime éne asola se nanyi wanda kazala ni ndandu yâ. Mu jixi ja mukwá, o jindandu mba makamba asota muthu utena kukazala ni ndandu mba dikamba dyâ, maji o athu amwasotela o dikaza éne atokala kusola. Se wamusotela muhatu mba diyala kwa mukwenu, kya dyanga watokala kwijiya se mukwenu wandala diyala mba muhatu wa kifwa kyahi. Se umona kwila sayi muthu wanda kala diyala dyambote mba muhatu wambote phala ndandu yé mba kamba dyé, ijiya kyambote o muthu, o idifwa yê, ni kyabeta-kota se mwene wazolo Jihova. O ukamba ni Jihova, wene wabeta dingi kota, o kitadi ni kudilonga kyavulu, ndenge. Maji lembalala kwila o jiphange éne anda sola se anda kazala mba kana, ni yo wamusotela-nê.—Nga. 6:5.
Kana Kubanza Kwila Wabetakota Akwenu Ndenge
3 Jihova wabhange o ukaza phala kukala fixi isangulukisa kikale o diyala kikale o muhatu. Maji seku muthu wayuka. Kyenyiki, mu ukaza mutena kumoneka maka. Mukidi, Phawulu wambe kwila oso eji kazala eji dibhana ni maka ku mwenyu. (1 Kol. 7:28) Amoxi amono kwila ene mudikwata ithangana yoso ni kazola kê. Kiki kyabhangesa kuxinganeka kwila, se kyabhanene weji sola muthu wengi. Se o kixinganeku kyamundu yu kifwinisa o ixinganeku yâ, mu kithangana ni mbandu ene anda xinganeka kwila o dilengelu dya maka ya, o kubatula o ukaza. Ene andadixinganeka ngó ombote yâ, andamona kwila phala kusanguluka abhingi kubatula o ukaza.
4 Twatokala kulenga o kixinganeku kya kwila, o ukaza wetu kitondalu. Kala kilonga o Bibidya, kwala ngó kima kimoxi kibhangesa o muthu kubatula o ukaza wê. O kima kiki o undumbu. (Mat. 5:32) Kyenyikiphe, kyoso ki tudibhana ni maka muxitu kala kyasoneka poxolo Phawulu, kitwamesena kwehela o ukumbu kutubhangesa kuxinganeka: ‘O kwila o ukaza yu wamungisangulukisa mwene kala kingamesena? O kwila kazola kami wangizolo mwene kala kyangitokala? O kwila ngeji sanguluka dingi se ngakazalele ni muthu wengi?’ Tala kwila mu ibhwidisu yiyi o muthu udixinganeka ngó mwene. O unjimu wa mundu yu wandakuswinisa kukayela o muxima we ni kubhanga yoso phala o kusanguluka kwê, nemwene kiki se kibhangesa kubatula o ukaza. O Bibidya yamba: ‘Kanenu kusota ngó o mbote yenu, maji musota we o mbote ya akwenu.’ (Fil. 2:4) Jihova wamesena kwila ukolokota mukulanga o ukaza wê muveji dyakusota ku ubatula. (Mat. 19:6) Mwene wamesena kwila udyanga kuxinganeka kwamwene muveji dya kuxinganeka kokwé.
5 O munumi ni muhatu atokala kuditalatala ni henda ni kudixila. (Tanga Efezu 5:33.) O Bibidya ituswinisa kulunga o mesu metu mukubhana, mu veji dya kutambula. (Ika. 20:35) Kidifwa kyebhi kikwatekesa o makaza kulondekesa henda ni kudixila? O kidifwa kiki o kulenduka. O munumi ni muhatu walenduka, kanda sota ngó ombote ya, kana, maji anda sota “o mbote ya akwâ.”—1 Kol. 10:24.
w06 9/15 28 §13
“Sanguluka Jinga ni Muhatu’é wa Tundu-nê mu Undenge.”
13 Abha se mwala ni maka mu ukaza wenu mukonda dya ukexilu umwene muditalatala mudyenu? Kubhinga nguzu phala kubatula o maka. Mu kifika, nange enu mwamateka kudizwelesa se henda. (Jisabhu 12:18) Kala kitwamono mu milongi yatundumu, o kukamba kudizwelesa ni henda kutena kubhekela maka avulu. Kwala sabhu mu Bibidya yamba kiki: “Sembele kutunga ku ubheka mu tutu mwa kambe athu, ki ngʼindi kukala ni muhatu mukwa kuhoya uthathamana kyavulu.” (Jisabhu 21:19) Muhatu, se kyene kyala o ima mu ukaza we, dibhwidise: ‘O kwila o ukexilu wami ubhonzesa mwadi wami kumesena kungizukama?’ O Bibidya itendelesa o anumi: “Kolokotenu kuzola ahatu enu, kanenu kwa kwatela njinda” (Kolose 3:19) Se eye u diyala, dibhwidise: ‘O kwila ngi muthu wabhonzo ngi kamba kusuwa akwa, nange o ukexilu wami yu ubhangesa o muhatu wami kumesena kusota muthu wengi umutendela, umubhana matwi?’ Kidi kwila, o kuta undumbu kituxi kyadikota. Maji kiki kitena kubhita. Mukonda dya kiki o makaza atokala kudizwela se hele phala kubatula o maka oso amoneka mu ukaza.
Tokwesa Omilongi ya Bibidya
w05 1/15 17 §9
Yoso Yotange Yalungu ni Utuminu wa Nzambi Idikumbidila
9 Lelu Jezu ki mon’a muhatu dingi wendela ku thandu dya kamona ka jumendu, maji mwene Sobha wala ni kutena. Mwene amutumbula kala ‘yó wa sambela ku kabalu’ —mu Bibidya o kabalu kitena kulombolola ita. (Jisabhu 21:31) O divulu dya Dijingunwinu 6:2 dyamba “ngimona kabalu kazele. O yó wa sambela-ku wakwata mufula. Mwene a mubhana kitundu, anga utunda mu kutolola o jinguma jê ni kuzubha o ita.” Ku mbandu yamukwa o mukwa jisalamu sobha Davidi wambe kiki yalungu ni Jezu: “Jihova u ku tumikisa o mbasá yé ya nguzu tunde ku Ziyone, wixi: Enda ni kutumina o jinguma jé”—Jisálamu 110:2
14-20 YA KAVWA
O VALOLO YA MAK’Â NZAMBI JISABHU 22
Itendelesu Yambote Phala Kusasa o Twana
O Kwila o Twana Twê Twandasidivila Nzambi Kyoso Kyandakula?
7 O makaza amesena kuvwala twana atokala kudibhwidisa: ‘O kwila twalenduka twazolo Jihova ni Maka mê? O kwila Jihova watusolo phala kulanga o mona utwamesena kuvwala?’(Jisá. 127:3, 4) Se wala kyá ni mona, dibhwidise: ‘O kwila ngamulonga mon’ami kukala mukalakadi waswína?’ (Ndo. 3:12, 13) ‘O kwila ngamubhanga yoso ingitena phala kulanga mon’ami ku ima yayibha ya mundu yú wa Satanaji?’ (Jisá. 22:3) Eye kutena kulanga mon’ê mu ibhidi yoso yandadibhana nayu, Seku muthu utena kubhanga kiki. Maji bhofelebhofele, eye utena kumupelepalala ni henda yoso phala o ibhidi yandadibhana nayu kumwenyu ni kumulonga kyebhi kyatena kukayela o itendelesu ya Bibidya. (Tanga Jisabhu 2:1-6.) Mukifika, sekukala muthu ku mwiji udituna kubheza Jihova, eye watokala kukwatekesa mon’ê bhukaxi ka Mak’â Nzambi kwila kima kyambote kusuluka ni ufiyele wetu kwa Jihova. (Jisá. 31:23) Semufunda ndandu, londekesa kwa mon’ê jivelusu ja Bibidya, jitena kumukwatekesa kudibhana ni kuluwala ni kusanga kutululuka.—2 Kol. 1:3, 4; 2 Tim. 3:16.
Jitata—Longenu o Twana Twenu Kuzola Jihova
17 Mateka kulonga o twana twê mu undenge. Kota se o jitata ji mateka kulonga o twana twâ mu undenge. (Jisa. 22:6) Tala ya bhitile ni Timote, wa kalakala kumoxi ni poxolo Phawulu mu sidivisu ya kukunda o ilunga. Unise manya Timote ni Lowe avo ya Timote, a mu longo “tundé undenge.”—2 Tim. 1:5; 3:15.
18 Sayi dikaza dya mukwá, ku ixi ya Costa do Marfim, a ditundu kyambote mu kusasa twana tu samanu. Jean-Claude ni Peace akwatekesa o twana twâ kuzola ni kusidivila Jihova. Ihi ya akwatekesa kuditunda kyambote? Ene a kayela o phangu ya Unise ni Lowe. Ene ambe: “Twa tula o Mak’â Nzambi ku muxima wa twana twetu, tundé undenge wâ, kyoso kyexile hanji ku mele.”—Mate. 6:6, 7.
19 Ihi ilombolola “kuta ku muxima” wa mona o Mak’â Jihova? Phala “kuta ku muxima” kilombolola “kulonga ni kulembalesa o milongi bhu kaxi ka kubhitulula mu veji javulu.” Phala kubhanga kiki, o jitata ja bhingi kubhita ithangana ni twana twâ. Sayi bhabha o jitata jitena kuluwala, mukonda a bhingi kubhitulula mu veji javulu o itendelesu imoxi ku twana. Maji o jitata, ja tokala kumona o ukexilu wa kubhitulula o milongi, kala kithangana phala kukwatekesa o twana n’a tendela ni kukumbidila o Mak’â Nzambi
Longa Mon’ê Kusidivila Jihova
6 Kuma ua zolo o tuana tuê, eie uejiia kuila, ua tokala ku a bazela. Saí bhabha, ku bhinga ngó kua jimbuluila kiambote se mukonda diahi o kima kia mu bhanga, kima kiambote mba kia iibha. Maji ihi i tuamba se ene ka xikina kubelesela? (Jisabhu 22:15) Kaiela o phangu ia Jezú. Ni muanhu uoso, kolokota ku a bazela mu ku a endesa, ku a longa, ni ku a kuatekesa kuiudika o ima ia bhengalala. Ni henda ioso, sota ku a bazela mu kithangana ni bhu kididi kia tokala. Phange Elaine, ua tokala ku ixi ia África do Sul, u lembalala o ukexilu ua kexile ku mu bazela ku jitata jê. Ithangana ioso, ene akexile ku mu tangela o ima ia tokalele kubhanga. Se a mu tangela kuila, a-nda mu bhana kaxtiku mukonda dia kuxibhaka, ene a kumbidila o izuelu iâ. Muéne uambe: “Maji ene nuka a ngi bazele sé ku ngi jimbuluila o kima kia a bhangesa ku ngi bazela.” Mukonda dia kiki, ithangana ioso muéne uejidile kuila, o jitata jê ja mu zolele.
Tokwesa Omilongi ya Bibidya
Sanguluka ni Maujitu u Wala-Nawu
11 Kyene kimoxi we, tutena kusanguluka dingi kyoso kitubhanga yoso itutena mukikalakalu kyatubhana. Eye watokala “u jijila” mukubhanga o kikalakalu kya kuboka ni kukalakala ni kilunga. (Ika. 18:5; Jihe. 10:24, 25) Mukuya muyônge dipelepalale kyambote phala kubhana itambwijilu iswinisa ni kukumbidila o jimbandu ji utambula. Bhana valolo mujimbandu ji utambula mukyônge kyakaxi kasemana. Se a kubhana kikalakalu mukilunga, sota kubhixila mu ola yatokala, londekesa kwila eye umuthu wakukudyelela. Kana kubanza kwila o kikalakalu kyakubhana kyamuzanga ngó o kithangana kyé. Sota kubandekesa o mauhete mé mukikalakalu kiwatambula. (Jisa. 22:29) Kyoso ki ubhanga nguzu mu kikalakalu kyé kwa Jihova, o kusanguluka kwé kwandadibandekesa, o ukamba wé ni mwene wandadibandekesa we. (Gal. 6:4) Mukiki, eye kiwandaluwala kyoso akwenu kyandatambula o ujitu uwamesenene.—Loma 12:15; Nga. 5:26.
21-27 YA KAVWA
O VALOLO YA MAK’Â NZAMBI JISABHU 23
Itendelesu Yambote Yalungu ni Uhôlwa
Ihi Yamba o Bibidya ya Lungu ni Kunwa Uhôlwa
2. Kitendelesu kyebhi kibhana o Bibidya kwa yó asola o kunwa?
Jihova wazembe o kunwa kyavulu. Né mwene se o muthu wamunwa umoneka kala kakodiwe. (Ngalásya 5:21) O Bibidya yamba: “Ku kale mu kisangela kya jihólwa ja vinyu.” (Jisabhu 23:20) Mukiki, se tusola kunuwa, kitutokala kunwa kyavulu, né mwene se twala ubheka wetu. Kunwa kyavulu, kutena kubhangesa o muthu kuzwela se kuxinganeka, kuzwela mba kubhanga ima ki itokala. Kutena we kubhangesa o muthu kukata. Kitumesena kwila, o ima yiyi ibhita netu, se kitwamutena kunwa bhofele, twatokala kweha o kunwa o uhôlwa.
Kayela o Ibanzelu ya Nzambi Yalungu ni Uholwa
Maji etu tu Jikisistá twala ni itendelesu ya unjimu ya Mubhangi wetu. Mu kifika, mwene utudimuna yalungu ni ibhidi ijila mu kunwa uholwa wavulu. Nange twatange kya o izwelu itusanga mu divulu dya Jisabhu 23:29-35 yalungu ni muthu ukodiwa, ni ibhidi ijila mu kubhanga kiki. Phange Daniyele, kafunga ku ixi ya Europa, udilembalala kyebhi kyexile o mwenyu we ande dya kudilonga yalungu ni Jihova ni kukayela o itendelesu ye. Mwene wambe: Eme ngexile munwa uholwa wavulu; kiki kyangibhangesa kubatula kyayibha o maka ku mwenyu wami. Mukonda dya kiki ngabhiti mu jiphaxi javulu, kate kindala ngiluwala hanji kyoso kingixinganeka mu maka enya.”.
Tokwesa Omilongi ya Bibidya
w04 11/1 31 §2
Atangi Amadivulu Metu Ebhula
Mu kifika o muthu se wanete kitena kulombolola kwila mwene udya kyavulu, maji kiki kikyene kibhita ni athu oso. Sayi ya aneta kyavulu mukonda ala ni uhaxi. Akamukwa aneta mukonda ku mwiji wa athu oso anete. Twatokala we kulembalala kwila kwala athu anete ni athu abhele, yu wene kya o ukexilu wa; maji o kudya kyavulu kifwa kyala-nakyu amoxi. O kuneta kulombolola “kukala ni jibanya javulu mu mukutu”, maji o kudya kyavulu kulombolola kukala ni lwimbi mba hanji yavulu ya kudya. Mukiki kitutena kuzwela kwila muthu udya kyavulu mukonda dya kuneta kwê, maji mu ukexilu wê wakutala o kudya. Sayi bhabha amoxi kanete kana akamukwa abhele mwene, maji adya kyavulu. Mukiki kala ixi mba dyembu dyala ni ukexilu we wakutala o kuneta mba o kubhela.
28 YA KAVWA– 3 YA KAKWINYI
O VALOLO YA MAK’Â NZAMBI JISABHU 24
Kala Polondo Phala Kudibhana ni Ibhidi
“Swinenu, mu Kolokote”
15 Dilonge ni kuxinganeka mu Mak’a Nzambi. Se o muxi wala ni jindanji ja difikidila kyambote mu mavu, wene ukola dingi. Kyene we kimoxi, se tukolesa o kixikanu kyetu bhukaxi ka Mak’a Nzambi, twanda tena kukolokota. Kyoso kitudilonga ni kuxinganeka, o kixikanu kyetu kikola dingi anga tudyelela kwila o ukexilu wa Jihova wakubhanga o ima wene wabetakota. (Kol. 2:6, 7) Xinganeka kyebhi o itendelesu ni kilangidilu kya Jihova kya kwatekesa o jiselevende je m’ukulu. Mu kifika, Izekiyele watonginina kyambote kyoso o anju kyexile mu zonga o tembulu bhukaxi ka kisumwa. O kisumwa kya swinisa Izekiyele, kya tulongo madisá ambote alungu ni kudikwatenena ku itumu ya Jihova ya ubhezelu wa kidi. (Ize. 40:1-4; 43:10-12) Etu we tukatula mbote kyoso kitukatula kithangana phala kudilonga ni kuxinganeka mu ima ya zongo ya Maka’a Nzambi.
Kyebhi Kitutena Kusanguluka ne Mwene ni Ibhidi
17 O kibhidi: Kyoso ki tuluwala. O Mak’â Nzambi azwela: “Bhu kizuwa kya phaxi, se ubeleketa, kwabhu, ni nguzu yé itola.” (Jisa. 24:10) Okizwelu mu Hebalayiku “kubeleketa,” kitena kulombolola “kukamba kuswina.” Se ukamba kuswina mba kukolokota, ki wanda tena we kusanguluka.
18 Ihi iwatokala kubhanga? Bhinga okuswina kwa Jihova, phala utene kukolokota. Twabhingi kuswina phala kudibhana ni ibhidi. (Tiya. 5:11) Bhabha okizwelu “kukolokota” kyatumbula Tiyaku, kwalungu ni muthu wemana bhu kididi kyê. Kiki kitena kutubhangesa kuxinganeka disoladi dyaswina, wemana bhukididi kyê muveji dya kulenga ojinguma jamukwiza.
19 Yalungu ni kuswina ni kukolokota, poxolo Phawulu watuxila phangu yambote. Sayi ithangana mwene wadivwile we kwila wexile muzoza, maji watenene kukolokota mukonda wadyelele kwa Jihova, yó watenene ku mubhana o nguzu yabhindamene. (2 Kol. 12:8-10; Fil. 4:13) Kala Phawulu, etu we tutena kukala ni kixikanu kyakolo ni kukolokota, se tuxikina ni kulenduka kwoso kwila twabhindamena okikwatekesu kya Jihova.—Tiya. 4:10.
Atangi Amadivulu Metu Ebhula
Jisabhu 24:16, yamba: “Omuthu wayuka, né wadibhale lusambwadi, ubalumuka.” Okwila ovelesu yiyi yamutumbula muthu uta kituxi veji javulu anga Nzambi umuloloka?
Kana ngana! Kikyene kyamulombolola ovelusu yiyi. Muvelusu yiyi, okizwelu kudibhala, kilombolola kudibhana ni maka muveji javulu; okizwelu kubalumuka, kilombolola kusunga dingi onguzu.
Kyenyikiphe, okizwelu “kudibhala” mudivulu dya Jisabhu 24:16, kikilombolola kuta kituxi, kana. Maji kilombolola kukolokota mu ibhidi mba muhadi némwene muveji javulu. Maji kumundu yú wayibha omuthu wambote utena kudibhana ni maka ni ibhidi yamukwa. Ene atena kwazukutisa mu jinguvulu. Maji ene adyelela kwila Nzambi wandakwabhana nguzu, wandakwatekesa kudibhana ni ibhidi yosoyoso ibhita kumyenyu yâ. Ojiselevende ja Jihova enemuditunda kyambote. Kyenyiki dibhwidise Kiki kibhita mukonda dyahi? Mukonda twadyelela kwila “Jihova ubalumuna oso adibhale, hé ubhetula oso azeka bhoxi.”—Jisá. 41:1-3; 145:14-19.
Tokwesa Omilongi ya Bibidya
w09 10/15 12
Atangi Amadivulu Metu Ebhula
Mu ukulu o diyala se wamesena ‘kutunga dibhata’, mba kukazala, watokalele kudibhwidisa: ‘O kwila nganda tena kulanga ni kudikila o mwiji wami?’ Ande dya kukazala, o diyala watokalele kukala ni dibhya dyê. Kyenyiki, yalungu ni velusu yiyi sayi Bibidya yamba: “Kana kutunga dibhata, mba kukala ni mwiji ande dya dibhya dyê kukala polondo phala kubhongolola o idima ni umone kwila wanda tena kudikila o dibhata.” O kwila o velusu yiyi yatutokala hanji etu mu izuwa yiyi?
Xe, yatutokala mwene. O diyala wandala kukazala watokala kudisokejeka kyambote phala kukala mutwameni wa mwiji. Se wasungu kya mu kitala ni mu nguzu wabhingi kukala ni salu. Maji o diyala katokala ngo kudikwatenena mu kudikila o ibhindamu ya mwiji wê mu xitu. O maka Nzambi yamba kwila se o diyala ukamba kudikila o ibhindamu ya mwiji we mu xitu ni mu nzumbi “mwene wabetakota mukukala muthu wayibha, o yó akambe o kixikanu ndenge”. (1 Timote 5:8) Mukiki, mu kudisokejeka phala o ukaza, o munzangala wa diyala watokala kudibhwidisa: ‘O kwila ngala polondo phala kudikila mu xitu o ibhindamu ya mwiji wami? Ngala polondo phala kudikila mu nzumbi o ibhindamu ya mwiji wami? Nganda tena kulonga jinga o Bibidya ku muhatu wami ni ku twana twami?’ O Mak’a Nzambi itendelesa mu veji javulu kwila o diyala wabhingi kukumbidila o kikalakalu kiki. —Mate. 6:6-8; Efe. 6:4
Kyenyiki, o muzangala wadiyala wandala kukazala watokala kuxinganeka kyambote mu kitendelesu kyala mu divulu dya Jisabhu 24:27. Kyene kimoxi we, o munzangala wa muhatu watokala kudibhwidisa se wala kya polondo phala kulanga dibhata ni kukala mama. Minzangala akazala kindala nange anda sota kudibhanga ibhwidisu kala yiyi se amuxinganeka kukala ni twana. (Luk. 14:28) Kukayela o itendelesu yiyi itunda ku Mak’a Nzambi kukwatekesa o mundu wa Nzambi phala kadibhane ni ibhidi yavulu, kukwatekesa we kukala ni mwiji wazediwa.
4-10 YA KAKWINYI
O VALOLO YA MAK’Â NZAMBI JISABHU 25
Itendelesu ya Bibidya Itukwatekesa Kuzwela mu Ukexilu Wambote
Sota Kuzuela ni Akuenu mu Ukexilu Uambote
6 Mukonda diahi kima kiambote kusola o kithangana kia tokala phala kuzuela? O divulu dia Jisabhu 25:11, di zuela: “Mukonda kima se u ki zuela bhu thembu iê ia tokala, kila kala jimasá ja ulu bhu mabandeja ma phalata.” O jimasá ja ulu ja uabha kiavulu, maji jene ji beta kota mu kuuabha, se a ji ta bhu mabandeja ma phalata. Kiene kimoxi ué, nange etu tuala ni njimbu iambote phala kutangela muthu. Maji, se tu sola o kithangana kia fuama phala kuzuela, tu tena kukuatekesa kiavulu o muthu iú. Kiebhi ki tu tena kubhanga kiki?
7 Se tu kamba kusola o kithangana kia tokala phala kuzuela, nange o athu ka-nda tuívua, mba kuxikina o ima i tua-nda zuela. (Tanga Jisabhu 15:23.) Mu kifika, ku mbeji ia Katanu ka muvu ua 2011, o itungutu ni kalemba, ia buika jimbanza javulu mu ixi ia Japão. Kua fu 15.000 ja athu ndenge. Sumbala Jimbangi ja Jihova javulu a fundu uâ miji ni makamba, ene a mesenene kukuatekesa o athu a bhitile ué ni maka enhá, mu ku a tudila o njimbu ia Bibidia. Maji ene ejidile kuila, athu avulu exile ji Budista, ni kuila, kejidile o kidi kia Bibidia. Maji mu veji dia ku a tudila o njimbu ia lungu ni difukunukinu mu kithangana kieniókio, o jiphange a solo ku a tangela se mukonda diahi, o ima ia iibha i bhita ué ni athu ambote.
Sota Kuzuela ni Akuenu mu Ukexilu Uambote
15 O ukexilu uetu ua kuzuela ni akuetu uala ni valolo ia dikota, kála o ima i tua-nda zuela. O athu a uabhele kuivuidila Jezú, mukonda muéne ua kexile mu zuela ni ‘ngalasa.’ (Luka 4:22) Se tu zuela mu ukexilu uambote, nange o athu a-nda tuívua mba kuxikina o ima i tu zuela. (Jisabhu 25:15) Tua-nda zuela ni akuetu mu ukexilu uambote, se tu a xila, mba tu londekesa kuila, tua mesena o mbote iâ. Kiki kiene kia bhangele Jezú. Mu kifika, kioso kia monene kuila o athu akexile mu bhanga nguzu phala ku muívua, muéne ua sangulukile. Mu kiki, ua bhiti nau kithangana phala ku a longa. (Marku 6:34) Né muéne kioso kia mu xingi, muéne ka vutuila ndaka.—1 Phetele 2:23.
16 Sumbala tua zolo o muiji uetu ni makamba metu, nange tu zuela ima ia bhangesa ku divua kia iibha, mukonda tua ejiia kiambote. Nange tu banza kuila, ki tu bhingi kuthandanganha ni ukexilu ua kuzuela nau. Maji Jezú ua zuela ni makamba mê mu ukexilu uambote. Kioso kia kexile mu zoka se nanhi uexile o dikota mudiâ, muéne ua a bazela ni henda, anga u a tela kifika kia mon’a ndenge, phala ku a kuatekesa kulungulula o ibanzelu iâ. (Marku 9:33-37) O tufunga a tena kukaiela o phangu ia Jezú, mu kubazela akuâ mu ukexilu uambote.—Ngalásia 6:1.
Tu di Swinisyenu Mudyetu, “Kota-kota Dingi kyoso ki tu Mona o kizuwa Kya Jihova kí Zukama”
10 Ko tufunga ngó a tokala kukolokotesa akwa. Phawlu wa tendelesa Jikidistá joso kwila, “o kuzwela kwenu kukale kwa kukwatekesa akwenu kukula mu kuxikana ni a mone kyoso kya bhindamena, phala kuzwela kwenu ku bhange mbote kwa” akwenu. (Efezo 4:29) Kala muthu mudyetu, wa tokala kuxinganeka o ibhindamu ya akwa, phala kumona kyebhi ki tu tena ku a kwatekesa. Phawlu wa sonekena o Jikidistá akwa Jihebelew, wixi: “zangulenu maku menu ma botomoka, mu swinise we o inama yenu ya bhwila. Endenu mu jinjila ja kuyuka, phala o kinama kya haxi ki ki sokomoke, inda-xi, k’iluke.” (Jihebelew 12:12, 13) Etu ene oso tu tena ku di kolokotesa ni kudiswinisa mudyetu mu ima i tu zwela né mwene se tu minzangala.
Tokwesa Omilongi ya Bibidya
Londekesa Kuswina Mukukala u Muthu Wabatama
3 O yo abatama, athu aswina ka azoza kana. Kubhinga nguzu phala kutululuka mu kudibhana ni kibhidi kyabhonzo. O kubatama kidifwa kibhanga mbandu ku “ibundu ya nzumbi.” (Nga. 5:22, 23) O kizwelu mu dimi dya Ngeleku kyolungulule “kubatama,” sayi ithangana exile mu kitumbula phala kuzwela yalungu ni kabalu ka temene, maji akalongele kutululuka ni kubelesela. Sumbala o kabalu kindala, kalenduka, katululuka, maji o nguzu ye wala nayu hanji. Abha etu, kyebhi ki tutena kukala tu athu abatama, anga tukala hanji ni nguzu mba kuswina? Ki tutena kubhanga kiki mu nguzu yetu. Twabhingi kusamba mukubhinga o nzumbi ikola ya Nzambi phala kutukwatekesa kukala ni kidifwa kiki. Kwala jiphangu javulu jilondekesa kwila tutena kubhanga kiki. Jiphange javulu asuluka mu kulondekesa o kubatama kyoso kyexile mwalokalala. Kiki kyabhana umbangi wambote kwa yo ki Jimbangi ja Jihova. (Tanga 2 Timote 2:24, 25.) Ihi i utena kubhanga phala o kubatama kikale o kidifwa kye kikubhana nguzu?
11-17 YA KAKWINYI
O VALOLO YA MAK’Â NZAMBI JISABHU 26
Kala Dikanga Dya “yó Atobho”
it-2 729 §6
Nvula
Ithangana. Mu ixi yakanena mwexile ithangana iyadi yabetele-kota, o ithangana ya nvula ni ya kixibhu. (Tala Jis 32:4; Mik 2:11.) Tunde mukaxaxi ka mbeji ya kasamanu ndu mu kaxaxi ka mbeji kamusasadi ki kwexile munoka kyavulu. Ki kwexile munoka kyavulu mu kithangana kiki kya kubhongolola o idima. O divulu dya Jisabhu 26:1 dilondekesa kwila o nvula ki yafwama bhu thembu ya kubhongolola. (Tala 1Sa 12:17-19.) Mu kithangana kya nvula, o nvula ki yene munoka izuwa yoso, sayi izuwa inoka yamukwa ki inoka. Kuma mu kithangana kiki mubhusa kyavulu, se o muthu ukala mu nvula mwene wanda kwivwa mbambi yavulu. (Ej 10:9, 13) Mukiki kima kyambote kukala mu kididi kyakondama.—Iz 4:6; 25:4; 32:2; Job 24:8
w87 10/1 19 §12
O Kibazelu Kibheka Mbote ku Muthu
12 Phala Amoxi sayi bhabha kubhinga mwene kwabazela ni nguzu, kala kizwela o divulu dya Jisabhu 26:3: “Xikote yatokala ku monde mba kabalu, o mukolo mu mazulu watokala ku jumendu, o mbangala-phe yatokala ku makunda ma athu oso akamba kilunji.” Sayi ithangana, Jihova wehela o mundu we ku abhinjika ni kutala hadi mukonda dya ima yayibha yabhange ene: “Mukonda a kitukila o Maka ma Nzambi, suke-ku kya alongo kilunji, ngwawâ ku mu ívwa. Kyene kya bhekela o ku a tolola muxima ni ubhika; o kya di bhukana, a dibale, u akudila a mu tokoka. Bhenyobho a dikola kwa Jihova mu lamba dyâ, mwene hé u akudila mu kubhondalala kwâ.” (Jisálamu 107:11-13) Amoxi mu kutobha kwâ akolesa o mixima yâ anga o kibazelu adituna-kyu: “O muthu wila: Lelu a mu bazela, mungu, a mu bazela, sè kweha o njila yê, maji ukolesa o muxima wê, hinu u tukumuka a mu jimi o mbutu, sè ngó bhwa bhulakela.”—Jisabhu 29:1
it-2 191 §4
Muthu Utenguna, Kutenguna
Kilombwelelu kya sabhu. O Sobha Solomá wambe: “Woso u tumikisa jinjimbu mu kanu dia kyôwa, wa mu di batula o inama [kiki kyeji mubhangesa kutenguna], wa mu bhwita kilwezu”. Kyenyiki, se usola kubhana salu ku kyôwa kyadifwangana wamudikwamesa eye mwene, mukonda o muthu yu wanda zanga ngo o jimbote jé-eye. Wenji wé wanda dibota. —Ji 26:6.
Tokwesa Omilongi ya Bibidya
Minzangala, Suínisie-nu o Kixikanu Kienu
16 Lembalala kuila, etu ki tu mesena kuzoka ni athu. Tua mesena kuila, ene a uabhela kuzuela n’etu, ni kudilonga o Bibidia. Mu kiki, ni kuxila kuoso, bhanga ibhuidisu iambote, sota kuívua ni henda. Kioso ki u tangela muthu ia lungu ni kixikanu kié, sota kuxila o muthu, benge-benge se muéne muadiakimi kiá. Se u xila akuenu, ene nange a-nda kuxila ué. Ene a-nda diuana kiavulu mu kumona kuila, eie uene mu xinganeka mu ima i uene mu dilonga, sumbala u munzangala hanji. Maji, se muéne ua mesena ngó kuzoka, mba ku kuxonguena, eie ku bhingi ku mu tambuijila.—Jisabhu 26:4.
18-24 YA KAKWINYI
O VALOLO YA MAK’Â NZAMBI JISABHU 27
O Makamba a Kidi Atena Kutukwatekesa Kyebhi?
Jihova u Bhana Valolo ku Jiselevende Jê ja Lenduka
12 O muthu wa lenduka, u sakidila woso weza ku mu bazela. Tala o kifika kiki: Xinganeka kwila, éye wala mu kyônge mu kilunga. Wa zwela kyá ni athu avulu. Maji kumoneka muthu, u kwambata kuhota, anga u kwambela kwila, sayi kalanda kaxitu ka kunaminina ku mazu. Sé phata weji kala ni jisonyi. Maji weji sakidila kyavulu o phange wa ku tangela kwila, ku mazu kwa naminina kama. Mu kidi, weji mesena kwila, eji kulondekesa-kyu ku dimatekenu dya kyônge! Kyene we kimoxi. Twa tokala kusakidila o phange u tu bhana o kibazelu ki twa bhindamena, sé wôma. Twa tokala ku mu tala kala dikamba, mu veji dya ku mu tala kala nguma yetu.—Tanga Jisabhu 27:5, 6; Nga. 4:16.
it-2 491 §3
Muzukami wa Dyembu
O divulu dya Jisabhu ditutendelesa kudyelela ku vizinyu yetu ni kwila kima kyambote kumusota mu kithangana kya malamba: “Kumbi di ku kwata ngongo, kamba dyê ku mu landuke, ni kamba dya tatʼenu ku mu xe, wixi kale ngiya mʼonzo ya phangʼyami, mukonda: Kota o dikamba dya ku kala bhwa zukama, kwindi o phange yala dikanga.” (Ji 27:10) Mu velusu yiyi, o mukwa Jisabhu wamesenene kuzwela kwila o dikamba dya mwiji ki tu mulanduke, tu mubhana valolo, tumusota muku mubhinga kikwatekesu mu veji dya kusota ndandu, bhenge-bhenge se o ndandu wala dikanga, mukonda nange o ndandu yú mu kidi kanda mesena kutukwatekesa mba kanda tena kutukwatekesa mu kithangana ki twabhindamena.
Minzangala—Mwamesena Kwila o Mwenyu Wenu Ukala Kyebhi?
7 Kima kimoxi kitutena kudilonga ku ima yayibha yabhange Jowaji, ya kwila, twabhingi kubhanga ukamba ni athu atuswinisa kubhanga ima yambote —makamba azolo Jihova, amesena kumusangulukisa. O makamba metu atena kukala athu a itala ki idifu. Lembalala kwila Jowaji wexile munzangala hanji, maji o kamba dye Joyada wexile mwadyakime kya. Yalungu ni makamba me, dibhwidise: ‘O kwila ene angikwatekesa kukolesa o kixikanu kyami kwa Jihova? Ene angiswinisa kubelesela o itumu ya Bibidya? Ene azwela yalungu ni Jihova ni ilongesu ya Bibidya? Ene axila o itumu ya Nzambi? Ene angitangela ngo o ima ingawabhela kwivwa, inga alondekesa we kuswina mu kungibhana itendelesu se kwabhingi?’ (Jisa. 27:5, 6, 17) Mu kidi, se o makamba me kazolo Jihova, eye ki wa abhindamena. Maji se wala ni makamba azolo Jihova, dikwatenene ku makamba enya—mukonda ene anda kukwatekesa ithangana yoso!—Jisa. 13:20.
Tokwesa Omilongi ya Bibidya
Eie u Tena ku di Tulula, né Muene mu Ithangana ia Bhonzo
11 O athu a tena kumona ue se tu akua ku di tulula mba kana, kioso kia tu ximana kiavulu. Estere a mu ximanene kiavulu. Muene uexile bhu kaxi ka ahatu a iukile dingi, a tungile ku utuminu ua Pélesa. Muene ua bhiti muvu ua muvimba kumoxi ni ahatu a mukuá akexile mu a talatala ni maji a katunda, phala kusola-bhu muthu umoxi, n’a kale o muhatu ua sobha. O sobha ua solo Estere, phala kukala nvuale. Maji o fuma, ki i mu bhangesa kulungulula o ukexilu uê. Estere kexile mu suua ngó o ibhindamu iê. Muene ua suluka ni kulondekesa o ukexilu ua ku di tulula, o henda, ni kuxila.—Estere 2:9, 12, 15, 17.
12 Se tu kala ni ukexilu ua ku di tulula, tua-nda zuata ni kubhanga ima ilondekesa kuila tu di xila, ni kuila, tu xila akuetu. Mu veji dia ku di zangeleka mba ku bhangesa akuetu ku di uana, tua tokala kukala ni “kutululuka kua muxima.” (Tanga 1 Phetele 3:3, 4; Jelemiia 9:23, 24) O ima i tu bhanga ni ima i tu zuela, ia-nda londekesa se kiebhi ki tu di mona. Mu kifika, nange tu tena kubhangesa akuetu ku banza kuila, tu athu a katunda, mukonda dia ima i tu bhanga, ima i tuejiia, mba athu u tuejiia. Mba nange tu bhangesa akuetu kubanza kuila, tua bhange kima kia katunda mu nguzu ietu, sumbala akuetu a tu kuatekesa. Maji xinganeka mu phangu ia Jezú. Hinu muene ua bhangesa o athu ku di uana mukonda dia unjimu uê. Mu veji dia kiki, Jezú ua kexile mu tumbula o Mak’â Nzambi. Muene ka mesenene kuila, o athu a mu ximana. Muene ua mesenene kuila, o athu a ximana Jihova.—Nzuá 8:28.
25-31 YA KAKWINYI
O VALOLO YA MAK’Â NZAMBI JISABHU 28
O Muthu Wayibha Kadifu ni Muthu Wayuka
w93 5/15 26 §2
Wamukayela Jihova ni ufiyele woso?
“O athu oso a yuka-phe, adifikidila kala hoji ya munzangala.” (Jisabhu 28:1) Ene axikana, adyelela mu Mak’a Nzambi, ya abhanga yoso yatena mu sidivisu yá kwa Jihova ni kuswina kwoso, ne mwene se kiki kilombolola kukala mu kilwezu.
it-2 1139 §3
Kutetuluka
O yó akamba kusota Nzambi. O muthu ubhanga ima yayibha, wakambe kusuwa Nzambi ni kumusota mu kusola o ima ku mwenyu wê. (Job 34:27) O muthu yu wehela o muxima kumunganala umubhangesa kukamba kutetuluka kyambote o ima. (Jis 36:1-4) Sumbala uzwela kwila wa mubheza Nzambi, maji mwene ubhana dingi valolo ku ixinganeku ya athu o ya Nzambi ndenge. (Iz 29:13, 14) Phala mwene o wendelu we wayibha ki maka! o kukala kiki kwadifu ngo ni “kutonoka” (Ji 10:23), o kiki kimubhangesa kukala kyôwa, kukamba kilunji ni kubanza kwila kuma Nzambi muthu mu nzumbi mwene katena kumona o ima yayibha yamubhanga mwene, mu kufika kwila Nzambi katena kutetuluka o ima. (Jis 94:4-10; Iz 29:15, 16; Je 10:21) Mu kidi, bhukaxi ka ibhangelu yé o muthu ubhanga ima yayibha uzwela kiki: “Kana-ku Nzambi” (Jis 14:1-3) ni kwila ‘ukamba kusuwa Nzambi. Kuma mwene udituna kukayela o itumu ya Nzambi katena kutungula se o kiki kyawabha mba kyayibha, katena kutetuluka kyambote o ima, kyenyiki mu kithangana kya kusola usola kyayibha.—Ji 28:5.
it-1 1211 §4
Ufiyele
O muthu katena kukala fiyele mu nguzu yê kana, maji mu kukala ni kixikanu ni kidyelelu kwa Jihova ni mu kutena kwa kubhulula kwala-naku Jihova. (Jis 25:21) Jihova ukanena kukala “ngubu” ni “mbonge”, mu kulangidila o njila ya yó amukala fiyele. (Ji 2:6-8; 10:29; Jis 41:12) O muthu wafiyele kuma wamesena kumuxikina kwala Jihova ubhanga yoso phala kukayela o jinjila ja Jihova, o kiki kimukwatekesa kukala ni mwenyu wambote. (Jis 26:1-3; Ji 11:5; 28:18) Sumbala o muthu wayuka utena kutala hadi mukonda dya ibhangelu ya Diyabhu kala kyambe Jobe, ni kufwa kumoxi ni athu ayibha, Jihova utudyelelesa kwila mwene wejiya o ima yamubhita ni athu amukala fiyele. Jihova ukanena we kwila o undundu wa athu yâ yanda nangenena ni kwila kuhádya ene anda tambula ima yambote. (Job 9:20-22; Jis 37:18, 19, 37; 84:11; Ji 28:10) Kala kyabhiti ni Jobe o kukala muthu wayuka kwene o kima kibhangesa o muthu kakala ni valolo ni kumuxila, kana o umvwana wê. (Ji 19:1; 28:6) O ana ala ni ujitu wakukala ni Tata mba Mama wala fiyele, tutena kuzwela kwila ene azediwa (Ji 20:7), mukonda a axila undundu wakatunda ku jitata jâ, ni phangu ya yambote ni luxilu lutambula ene ku athu.
Tokwesa Omilongi ya Bibidya
O Kwila Wejiya Mwene Yoso ya Bhiti?
14 Twa mono kwila ki tena kubhonza kusanga o maka a kidi. O kibhidi kyamukwá o ku kala tu akwa ituxi. Nange twa mu sidivila kyá Jihova thembu yavulu, twa londekesa unjimu mu ukexilu yú. Akwetu nange a tu xila mukonda twala ni uhete wa ku banza mu ukexilu wambote. O kwila phala eye kibhonza? O kwila o uhete u tena ku kubhekela maka?
15 Kyene mwene. Tu tena kumateka kudyelala kyavulu mu ibanzelu yetu. Nange twehela o muxima ni ixinganeku yetu kwendesa o mwenyu wetu. Etu nange tu mateka kuxikina kwila, twejiya kyambote o maka, ne mwene se ki twejiya yoso ya bhiti. Kuxinganweka kiki, kilwezu kya dikota! O Bibidya i tu dimuna kwila ki twa tokala kudyelela kyavulu mu kilunji ni mu kwijwiya kwetu.—Jisabhu 3:5, 6; 28:26.