Сьбат

Һәрге тӧ Шеʹде Йаһоwайи ньхӧманди йи, тьштәки тәйи гәләк ԛимәт һәйә. Һәләԛәтийа тәйә шәхси тʹәви Йаһоwа һәйә. Ле дьнйа Шәйтʹан һʹӧщӧми сәр wе һәләԛәтийе дькә, у һьн жи жь бо нәкʹамьлбуна мә әw һәләԛәти дькарә сьст бә. Ләма жи, әм тʹьме гәрәке һәләԛәтийа хwә тʹәви Йаһоwа чьԛас дькарьн ԛәwи хwәй кьн. Гәло Йаһоwа бона тә реали йә? Тӧ тʹәхмин дьки кӧ әw Досте тә йә? Тӧ дьхwази wәки һәләԛәтийа тә тʹәви wи һе ԛәwи бә? Рʹеза ве рʹоже, Аԛуб 4:8, дьбежә кӧ чь тӧ гәрәке бьки. Һәләԛәтийа тә тʹәви Йаһоwа, һьн тәва гьредайи йә һьн жи Хwәдева. Һәрге тӧ гаве бавежи wәки незики Йаһоwа би, wе әw жи гаве бавежә wәки незики тә бә. Әwе йәке тӧ чьԛас һе зедә бьки, wе һаԛас Хwәде бона тә һе реали бә. Һәләԛәтийа тә тʹәви Йаһоwа wе ӧса незик бә, кӧ тӧ сәр хwә тʹәхмин ки wе йәке, чь кӧ Иса тʹәхмин кьр чахе әwи гот: «Йе кӧ әз шандьмә, рʹасти йә. Әз wи нас дькьм» (Йуһʹн. 7:28, 29, ИМ). w15 1/4 3:​1, 2

Бьфькьрә сәр чәтьнайикә дьн. Дьбәкә кәсәк жь малбәта тә жь щьвате һатийә дәрхьстьне. Тӧ жь Кʹьтеба Пироз рʹьнд зани, кӧ гәрәке чаwа бьн һьндава мәрьвед жь щьвате һатийә дәрхьстьне (1 Корн. 5:11; 2 Йуһʹн. 10). Ле чьмки тӧ әwи мәрьви һʹьз дьки, тӧ дьбәк тʹәхмин ки кӧ зәʹф чәтьн ә йан жи нькари әwе тʹәмийа жь Кʹьтеба Пироз бьԛәдини. Гәло тӧ баwәр дьки wәки Баве тәйи ль әʹзмана дькарә ԛәwате бьдә тә, кӧ бь амьни гӧрʹа wи бьки? Гәло тӧйе сәр ве дәрәще ӧса бьньһерʹи, кӧ әw мәщал ә wәки тʹәви Йаһоwа незик би? Сафикьрьна Адәм мәрʹа дьбә дәрс wәки әм гәрәке Йаһоwа һе зедә һʹьз бькьн нә кӧ кәсәки дьн (Мәт. 22:37, 38). У һәрге һʹьзкьрьна мә һьндава Йаһоwа ԛәwи йә, wи чахи әм дькарьн бь щурʹе лапи баш али мәрьвед хwәйи незик бькьн, фьрԛи тʹӧнә әwана Йаһоwарʹа ԛӧльх дькьн йан на. Һәрге жи тӧ бәрхwәдькʹәви сәва нәфәре хwәйи кӧ жь щьвате һатийә дәрхьстьне, Йаһоwарʹа дӧа бькә у гьли кә һʹәму тьшти чь кӧ дьле тәда һәйә (Фили. 4:6, 7). w15 1/4 4:​14, 16

Чахе әм кьре кәсәкирʹа ша дьбьн у чахе нав мәда һьнәки ԛӧрʹәбун һәйә, әв бь тʹәбийәти йә. Нә лазьм ә кӧ жь бо малбәта хwә, култура хwә, йан жи жь бо щийе кӧ әм мәзьн бунә шәрм кьн (Кʹар. Шанд. 21:39). Ле һәйә щурʹәк ԛӧрʹәбун кӧ дькарә һәләԛәтийе хьраб кә, илаһи һәләԛәтийа мә тʹәви Йаһоwа. Ԛӧрʹәбуна wи щурʹәйи, дькарә бьбә мәʹнийа бәрхwәкʹәтьне чахе ширәта дьдьнә мә. Әw һәла дькарә нәһелә жи кӧ әм ширәте һьлдьн, дәwса кӧ бь мьлукти ԛәбул кьн (Зәб. 141:5). Ԛӧрʹәбуна wи щурʹәйи әw ә, чахе мәрьв дәрһәԛа хwә дьһа зәʹф дьшьрмиш дьбә, йан жи чахе мәрьв хwә сәр йед дьнрʹа дьгьрә у баwәр дькә кӧ әw һе баш ә нә кӧ йед дьн, ле гәләк щар әw йәк нә ӧса нә. Йаһоwа мәрьве ԛӧрʹә у бабах нәфрʹәт дькә (Һәзԛл. 33:28; Амс. 6:8). Ле гәләк дьле Шәйтʹан хwәш те, чахе мәрьв бь пәсндайина хwә чʹәʹв дьдьнә ԛӧрʹәбуна wи. Бьдә бәр чʹәʹве хwә кӧ Шәйтʹан чьԛас ша дьбу чахе Нәмруд, Фьрәwьн у Абшалом ԛӧрʹәбуна нәбаш нишан кьрьн, бь пәсндайина хwә! (Дәстп. 10:8, 9; Дәрк. 5:1, 2; 2 Сам. 15:4-6) w15 1/1 2:​5, 6

Иса чахе сәр әʹрде бу, тʹьме дәрһәԛа һʹәwщед мәрьва хәм дькьр, чьмки әwи бь кʹамьли чʹәʹв дьда Баве хwә (1 Корн. 1:24). Иса әв йәк дькьр, нә кӧ сәва ԛәwата хwә нишан кә, ле әw бь рʹастийе жи дәрһәԛа мәрьва дьфькьри. Wәрен шеwьр кьн Мәтта 14:14-21. Әʹлаләт жь шәһәр ньга пәй Иса чу (Мәт. 14:13). Еваре, шагьрт бәрхwәдькʹәтьн чьмки мәрьв дьwәстийан у бьрʹчи дьбун. Ләма жи wана жь Иса пьрсин кӧ әʹлаләте бьшинә, сәва кӧ әwана бона хwә хwарьне бькʹьрʹьн. Ле Иса чь кьр? Бь пенщ нана у дӧ мәʹсийа, Иса wәкә 5 000 мер тʹер кьр, ӧса жи жьн у зарʹ. Иса гәләк хwарьн да wан, ләма жи «һʹәмуйа жи хwар тʹер бун». Wана жь wе хwарьне гәрәке ԛәwат бьстандана, wәки вәгәрʹийана малед хwә, чьмки рʹийа wан дьреж бу (Луԛа 9:10-17). Бьдә һʹәсабе хwә, шагьрта паши хwарьне донздәһ сәлә һурькед бәрмайи тʹоп кьрьн. w15 1/6 1:​8, 9

Әм дьжин дьнйакә ӧсада, кӧ бь бенамусийе тʹьжә йә. Ле Йаһоwа дькарә али мә бькә сәва әм ӧса бьжин, кӧ дьле wи хwәш бен. Сәва кӧ дьле Йаһоwа хwәш бен, әм гәрәке хwә дур хwәй кьн жь wан һʹәму тьшта, чь кӧ әw нәфрʹәт дькә. Чьмки әм гӧнәкʹар ьн, ләма жи әм дькарьн бькʹәвьнә тʹәлька бенамусийе, чаwа мәʹсийе кӧ дькʹәвә тʹәлька мәʹсигьртьне. Һәрге фькьред нәщайиз тенә һʹьше мә, әм гәрәке перʹа-перʹа жь сәре хwә дәрхьн. Йан на, хwәстьнед бенамуси дькарьн ӧса кʹур бьн, кӧ ахьрийе әм гӧнә бькьн. Кʹьтеба Пироз жи, әwе йәке рʹьнд әʹйан дькә: «Дьлһавьжи кәле хwә дьстинә, гӧнә же дьфьрькә» (Аԛуб 1:14, 15). Дьлһәвьжийед нәрʹаст дькарьн дьле мәда пешда бен у мәзьн бьн. Ләма жи әм гәрәке мьԛати хwә бьн, һәла дьлһавьжийед мә чьда ньн. Чахе әм дьлһавьжийе, демәк хwәстьнед нәрʹаст жь хwә дур дьхьн, бь wе йәке әм хwә жь бенамусийе у бәред хьраб хwә хwәй дькьн (Галт. 5:16). w15 6/15 3:1-3

Wәкә 6000 сал пешда, ль сәр әʹрде әʹмьре Хwәде бу, демәк ԛьрара wи. Ләма жи чахе әwи сәр әʹрде һʹәму кьрьнед хwә дит, гот кӧ «әw гәләки ԛәнщ бун» (Дәстп. 1:31, ПКʹМ). Паше, Шәйтʹан мьԛабьли Хwәде дәркʹәт, у һьнгеда гәләк мәрьв ԛьрара Хwәде наԛәдиньн. Ле иро wәкә һʹәйшт милйон мәрьв Йаһоwарʹа ԛӧльх дькьн. Әwана дӧа дькьн wәки ԛьрара Хwәде бә ль сәр әʹрде, у һьн жи әwана ԛьрара wи дьԛәдиньн. Әwана дьле Хwәде ша дькьн у бь хирәт дәрһәԛа Пʹадшатийа wи мәрьварʹа гьли дькьн. Һʹәта кӧ Хwәде дьжмьнед хwә сәр әʹрде кʹӧта нәкә, әме бәрдәwан кьн дӧа бькьн wәки ԛьрара wи бә. Паше чахе ԛьрара wи бә сәр әʹрде, әʹрд wе бьбә щьнәт у бь милиарада мәрьв wе жь мьрьне рʹабьн (Йуһʹн. 5:28, 29). Бьдьнә бәр чʹәʹве хwә кӧ wе чьԛас wәʹдәки хwәш бә, чахе әм рʹасти мәрьвед хwәйи сахбуйи бен! w15 1/6 4:​15, 17

Әм гәләк щар хәбәрдьдьн дәрһәԛа щьнәта рʹӧһʹани. Ле чь те һʹәсабе щьнәта рʹӧһʹани? Щьнәта рʹӧһʹани әw әʹдьлайи йә, кʹижан кӧ Хwәде дьдә щьмәʹта хwә. Демәк, щьнәта рʹӧһʹани у пʹарьстгәһа рʹӧһʹани йәк ниньн. Чьмки пʹарьстгәһа рʹӧһʹани әw ә, чь кӧ Хwәде саз кьр бона һʹәбандьна рʹаст. Ле щьнәта рʹӧһʹани әʹйан кʹьфш дькә wан мәрьва, кʹижана кӧ Хwәде ԛәбул дькә у пʹарьстгәһа wида ԛӧльх дькә (Малх. 3:18). Әм чьԛас ша нә чьмки заньн кӧ жь сала 1919 Йаһоwа изьн да мәрьвед нәԛәданди, wәки әwана щьнәта рʹӧһʹани баш кьн, пешда бьвьн у ԛәwи кьн. Ле тӧ пьштгьрийа wи шьхӧли дьки? Тӧ дьшекьрини әwи ԛәдьри, кӧ дькари тʹәви Йаһоwа шьхӧлкʹарийе бьки, сәва кӧ wи сәр әʹрде рʹумәт ки? w15 1/7 1:​10, 11

Гог wе пәй щьмәʹта Хwәде кʹәвә, чахе рʹункьрийед кӧ манә һе сәр әʹрде бьн. Ле щьмәʹта Хwәде wе чь бькә? Әwана wе гӧһ бьдьнә ве тʹәмийе: «Йе кӧ дь wи шәрʹида щәнге бькә нә һун ьн; . . . рʹез гьредьн у бьсәкьньн, тʹәви хwә хьлазийа Хӧдан бьвиньн; нәтьрсьн у нәкʹәвьн безарийе» (2 Дир. 20:17). Чахе Гог пәйкʹәтьне дәстпекә, һʹәму рʹункьри сәр әʹрде wе һьлкʹьшнә ль әʹзмен. Ле гәло ль әʹзмен wе чь бьԛәwьмә чахе Гог пәй мә кʹәвә? Әʹйанти 17:14 дьбежә, кӧ дьжмьнед щьмәʹта Хwәде wе «тʹәви Бәрх шәрʹ бькьн, ле Бәрх тʹәви йед газикьри, бьжарти у амьна wе ль сәр wан бькарьбә». Демәк, Иса у 144 000 рʹункьри wе щьмәʹта Хwәде сәр әʹрде хьлаз кьн. w15 1/7 2:​16

Йаһоwа хwәха мә тʹәглиф дькә сәр щьвате, у әw рʹебәрийе дьдә кӧ кʹьнщхwәкьрьна мә у рʹабун-рʹуньштандьна мә щьватеда чаwа бә. Ләма жи әм гәрәке ве йәкеда фәсал бьн. Рʹаст ә Йаһоwа дьхwазә кӧ әм у йед тʹәглифкьри дь Ода Щьватада хwә баш тʹәхмин кьн. Ле әм нахwазьн кӧ һьндава щьватед хwә беԛәдьрийе бьдьнә кʹьфше. Ләма жи әм сәр щьвата, бь маԛули кʹьнща хwә дькьн у әм нахwазьн кӧ щьватеда нәʹмәка бьньвисьн, хәбәрдьн, йан жи бьхwьн у вәхwьн. Де-бав жи гәрәке зарʹед хwә һин кьн кӧ Ода Щьвата щийе рʹәве у листька нинә. Чахе Иса дь пʹарьстгәһа Хwәдеда дит, кӧ чаwа мәрьв арш-верше дькьн, әw гәләк һерс кʹәт у бәри wан да (Йуһʹн. 2:13-17). Дь Одед Щьватед мәда әм Йаһоwарʹа ԛӧльх дькьн у дәрһәԛа wи педьһʹәсьн. Ләма жи wе нәрʹаст бә, кӧ щьватеда тьштед арш-вершева гьредайи бькьн (Бәрамбәр кьн Нәһәмийа 13:7, 8). w15 1/7 4:​7, 8

Кʹьтеба Пироз дьбежә кӧ мәрьв «рʹожед ахьрийеда» wе һе зӧлм у хьраб бьн (2 Тимтʹ. 3:13; Мәт. 24:21; Әʹйан. 12:12). Бәле, ньһа һʹале дьнйайе хьраб ә, ле әм заньн кӧ әw wе бәрдәwам бә һе хьраб бә. Дьбәк һьнәк дьфькьрьн кӧ пешийа «тәнгасийа мәзьн», һʹәму wәлатада wе шәрʹ һәбьн у гәләк мәрьв wе нәхwәш бьн, у жь бьрчибуне бьмьрьн (Әʹйан. 7:14). Ле һәрге рʹаст ӧса бә, wи чахи һәр кәсирʹа wе әʹйан бә, кӧ пʹехәмбәртийа жь Кʹьтеба Пироз те сери. У һәла һе wан мәрьварʹа жи wе әʹйан бә, йед кӧ нәдьхwәстьн бьзаньбьн кӧ Кʹьтеба Пироз чь дьбежә. Биньн бира хwә, кӧ Иса гот wәки рʹожед ахьрийеда, wе гәләк мәрьв гӧһ нәдьнә wан нишана. Әwана wе бь жийина һәр рʹожи бьжин у чахе рʹожа Йаһоwа бе, әwана wе гәләк әʹщебмайи бьминьн (Мәт. 24:37-39). Әʹйан ә, әм гәрәке һивийе нибьн кӧ пешийа «тәнгасийа мәзьн» һʹале дьнйайе wе ӧса хьраб бә, кӧ мәрьв баwәр кьн wәки хьлази незик ә (Луԛа 17:20; 2 Пәт. 3:3, 4). w15 1/8 2:​6, 7

Гәло чахе әм wәʹде хwә хәрщ дькьн сәва кӧ һазьр бьн бона жийина дьнйа тʹәзәда, әм иро жийина баш ӧнда дькьн? На! Ԛӧльхкьрьн Йаһоwарʹа әw жийинәкә лапә баш ә. Әм Йаһоwарʹа ԛӧльх накьн сәва ве йәке, чьмки кәсәк зоре дьдә мә, йан тʹәне бона wе йәке кӧ жь тәнгасийа мәзьн хьлаз бьн. Чахе һәләԛәтийа мә тʹәви Йаһоwа рʹьнд ә, жийина мә йа лапә баш ә у әм бәхтәwар ьн. Нета Йаһоwа һәма әw бу, кӧ әм ӧса бьжин. Хwәде, кӧ мә һʹьз дькә у рʹебәрийе дьдә мә әw йәк жийина мәда йа лапә баш ә, нә кӧ тьштәки дьн (Зәб. 63:1). Һәр кәс жь мә дькарә тʹәхмин кә wе шабуне, кʹижан кӧ әм дьстиньн жь ԛӧльхкьрьна хwәйә бь дьл у щан. Һьнәкед кӧ гәләк сала Йаһоwарʹа ԛӧльх кьрьнә, дькарьн бежьн кӧ ԛӧльхкьрьн Йаһоwарʹа, жийинәкә лапә баш ә (Зәб. 1:1-3; Иша. 58:13, 14). w15 1/8 3:​16

Баwәри дькарә али мә жи бькә, кӧ тьштед ӧса бькьн, кӧ дькарә нәбуйи бә (Мәт. 21:21, 22). Жь мә һьнәка ньһерʹандьн у рʹабун-рʹуньштандьна хwә ӧса гӧһастьнә, wәки мәрьвед кӧ бәре әм нас дькьрьн, ньһа нькарьн мә нас кьн. Мә гӧһастьнед ӧса кьрийә, чьмки әм Йаһоwа һʹьз дькьн, у чьмки әwи али мә кьрийә, кӧ әм wан гӧһастьна бькьн (Колс. 3:5-10). Баwәрийе әм һелан кьрьн, кӧ әм хwә тʹәсмили Йаһоwа кьн у бьбьнә достед wи. Ле беаликʹарийа Йаһоwа, мәйе тʹӧ щар нькарьбуйа әw йәк бькьра. Баwәри мә ԛәwи дькә. Мәсәлә, әw али мә дькә, кӧ мьԛабьли дьжмьне мәйи ԛәwи Мире-щьн дәрен (Әфәс. 6:16). Ӧса жи, чахе әм итʹбарийа хwә Йаһоwа тиньн ида нә лазьм ә, кӧ әм гәләк дьлтәнг бьн, чахе проблемед мә һәнә. Йаһоwа соз дьдә, кӧ чь кӧ мәрʹа лазьм ә wе бьдә мә, һәрге әм баwәрийа хwә wи биньн у Пʹадшатийа wи дайньн щийе пешьн (Мәт. 6:30-34). У һе зедә, жь бо баwәрийа мә, Йаһоwа wе әʹмьре һʹәта-һʹәтайе бьдә мә (Йуһʹн. 3:16). w15 1/9 3:​4, 5

Гәло Йаһоwа ча мәрʹа әʹйан кьр, кӧ «әwи пешда әм һʹьз кьрьн»? Кʹьтеба Пироз мәрʹа дьбежә: «Гава әмә һе гӧнәкʹар бун, Мәсиһ бона мә мьр» (Рʹом. 5:8). Һʹьзкьрьн һʹӧнӧрәки Йаһоwайи сәрәкә йә. Ләма жи әм дькарьн фәʹм кьн, кӧ чьрʹа Иса гот кӧ тʹәмийа лапә фәрз әw ә: «Хӧдан Хwәдейе хwә һʹьз бькә, бь тʹәмамийа дьле хwә, бь тʹәмамийа щанийа хwә, бь тʹәмамийа һʹьше хwә у бь тʹәмамийа ԛәwата хwә» (Марԛ. 12:30). Йаһоwа дьхwазә кӧ әм «бь тʹәмамийа дьле хwә» wи һʹьз кьн. Wе дьле Йаһоwа бешә, һәрге әм кәсәки йан тьштәки, жь wи зәʹфтьр һʹьз бькьн. Ле һʹьзкьрьна мә һьндава wи гәрәке тʹәне бь һәстед емосиали нибә. Чьмки Йаһоwа жь мә һивийе йә кӧ әм wи һʹьз кьн «бь тʹәмамийа һʹьше хwә» у «бь тʹәмамийа ԛәwата хwә». Әw йәк те һʹәсабе, кӧ һʹьзкьрьна мә һьндава wи те кʹьфше жь ве йәке, кӧ әм чаwа дьфькьрьн у чь дькьн (Мих. 6:8). w15 1/9 5:​1-3

Щара әм дьбәкә навиньн дәсте Йаһоwа жийина хwәда. Ле гәло чьрʹа? Чахе проблемед мә гәләк ьн, әм дьбәкә бир кьн кӧ Йаһоwа чаwа бәре али мә дькьр. Әw йәк тʹәви Елйас ԛәwьми. Елйас мәрьвәки мерхас бу, ле чахе Изабел жьн-пʹадша дьхwәст wи бькӧжә, тьрс кʹәтә дьле wи. Дәмәке әwи бир кьр кӧ чаwа Йаһоwа бәре али wи дькьр. Кʹьтеба Пироз дьбежә кӧ Елйас һәла һе дьхwәст бьмьра жи (1 Падшати 19:1-4). Әwи жь кʹидәре дькарьбу аликʹари у мерхаси бьстанда? Wирʹа лазьм бу гӧмана хwә бьдә сәр Йаһоwа (1 Падш. 19:14-18). Ибо һаԛас зʹәф хәмгин дьбу дәрһәԛа тәнгасийед хwә, кӧ әwи дәрәща хwә ӧса нә дьдит, чаwа кӧ Йаһоwа дьдит (Иб. 42:3-6). Щара дьбәкә жь бо проблемед мә, мәрʹа жи чәтьн ә дәсте Хwәде бьвиньн. Ле чь дькарә али мә бькә кӧ бьвиньн дәсте Хwәде? Әм гәрәке бьфькьрьн сәр ве йәке, кӧ Кʹьтеба Пироз чь дьбежә дәрһәԛа проблемед мә. Паше Йаһоwа wе бона мә һе реали бә. w15 1/10 1:​15, 16

Иса нәдьһишт тʹӧ тьшт wи әглә кә бона хьзмәтийе. Мәсәлә, пешийа кӧ әwи дәстпекьра мьзгине бәла кә, әʹлаләт жь Кʹәфәрнаһуме незики Иса бу, сәва кӧ тʹәви wи wәʹдә дәрбаз кьн дь шәһәре хwәда. Ле әwи чь кьр? Әwи дина хwә да сәр шьхӧле хwә. Әwи гот: «Гәрәке әз бажаред дьнда жи Мьзгинийа Пʹадшатийа Хwәде бьдьм, чьмки әз бона wе йәке һатьмә шандьне» (Луԛа 4:42-44). Иса дь щийед дурда мьзгин бәла дькьр, у чьԛас дькарьбу гәләк мәрьв һин дькьрьн. Рʹаст ә Иса беԛьсур бу, ле йәкә әw дьwәстийа у wирʹа лазьм бу һеса бә, чьмки әw гәләк гьран дьхәбьти (Луԛа 8:23; Йуһʹн. 4:6). Паше чахе Иса дәрсәкә фәрз дьда шагьртед хwә, мерәки әw да сәкьнандьне у гот: «Дәрсдар, бежә бьре мьн, бьра миратʹа баве мьн мьнрʹа пʹарәвәкә». Ле Иса нәдьхwәст кӧ проблема wийә шәхси сафи кә, у әwи һинкьрьна шагьртед хwә паш нәхьст (Луԛа 12:13-15). w15 1/10 3:​10, 11

Һʹьзкьрьн нә кӧ тʹәне һӧнӧрәк жь һӧнӧред Хwәде баш ә, ле әw һӧнӧре wийи сәрәкә йә. Нә кӧ тʹәне һʹьзкьрьна wи һәйә, ле әw хwәха һʹьзкьрьн ә. Йаһоwа чь жи дькә, һʹәму тьшти жь һʹьзкьрьне дькә. Әм чьԛас жь Йаһоwа рʹази нә, кӧ әwи жь һʹьзкьрьне тʹәмамийа гәрдуне у һʹәму бинбәр чекьр! Йаһоwа һьндава әфьринед хwә ԛәнщ ә у бь һʹьзкьрьн ә. Гӧмана мә һәйә, кӧ ԛьрара wи бона инсанәте wе бь щурʹе лапи баш бе сери, чьмки әw мә һʹьз дькә. Ахьрийа ве йәке wе бәхтәwарийа реали бә, бона wан йед кӧ гӧра wи дькьн. Мәсәлә, Йаһоwа жь бо һʹьзкьрьне, «рʹожәк кʹьфш кьрийә, кʹижанеда wе диwана дьне рʹаст бь дәсте мәрьвәки бькә, йе кӧ әwи кʹьфш кьрийә», демәк, Иса Мәсиһ (Кʹар. Шанд. 17:31). Әм баwәр ьн кӧ әw диwан әʹсә wе бьбә. У әв бона мәрьвед гӧһдар те һʹәсабе ахьрийа пʹьр баш, кʹижан кӧ wе һʹәта-һʹәтайе бә. w15 1/11 3:​1, 2

Ньһерʹандьна мәрьва щурʹә-щурʹә нә сәр мьзгина кӧ әм бәла дькьн. Һьнәк мәрьв гӧһ дьдьнә мә, ле һьнәк жи мьзгина мә нәфрʹәт дькьн. Фьрԛи тʹӧнә мәрьв ча дьньһерʹьн сәр мьзгина мә, йәкә әм пәй тʹәмийа Кʹьтеба Пироз дьчьн. Чахе әм баwәрийа хwә хwәй дькьн, әм дьхwазьн әwе йәке бь ԛәдьр у мьлуктийе бькьн, чьмки әм һәвале хwә һʹьз дькьн (1 Пәт. 3:15). Һәла һе чахе мәрьв сәр мә һерс дькʹәвьн у мьзгина мә ԛәбул накьн жи, әм дьдьнә кʹьфше кӧ һәвале хwә һʹьз дькьн у чʹәʹв дьдьнә Иса. Чахе Иса «дьһатә рәзилкьрьне, жь бәрва кәс рәзил нәдькьр, гава щәфа дькʹьшанд, гәф ль кʹәсәки нәдьхwар». Ле Иса һʹәму тьшт һивийа Хwәдева дьһишт (1 Пәт. 2:23). Әм гәрәке тʹьме мьлуктийе бьдьнә кʹьфше, у әве ширәте бьдьнә хәбате: «Жь бәр хьрабийева хьрабийе нәкьн, йан жь бәр беһӧрмәткьрьнева беһӧрмәткьрьне, ле жь бәр ванва дӧа-дьрозга ль wан бькьн» (1 Пәт. 3:8, 9). w15 1/11 4:​17, 18

Иса шагьртед хwәрʹа гәләк щар дьгот, кӧ әw wана һʹьз дькә (Йуһʹн. 15:9). Әwи ӧса жи гәләк wәʹдә тʹәви wан дәрбаз дькьр (Марԛ. 6:31, 32; Йуһʹн. 2:2; 21:12, 13). Ӧса жи һун тʹьме зарʹед хwәрʹа бежьн кӧ wана һʹьз дькьн, у кӧ әwана чьԛас wәрʹа ԛимәт ьн (Мәтʹлк. 4:3). Самуйел кӧ ль Австралйайе дьжи, гьли дькә: «Чахе әз бьчʹук бум, Баве мьн һәр евар мьнрʹа кʹьтеба ‹Сәрһатийед Кʹьтеба Пироз› дьхwәнд. Әwи щаба пьрсед мьн дьда, әз һʹәмез дькьрьм у пачʹ дькьрьм кӧ хwәш рʹазем. Паше чахе әз пеһʹәсийам кӧ Баве мьн малбәтәкә ӧсада мәзьн буйә, кʹидәре кӧ һʹәмезкьрьн у пачʹкьрьн тʹәбийәти нибуйә, әз гәләк әʹщебмайи мам! Ле йәкә, әwи тʹьме дьхwәст һʹьзкьрьна хwә мьнрʹа бьдә кʹьфше. Ахьрийе, һәләԛәтийа мьн у wи гәләк ԛайим бу, у мьн хwә рʹьһʹәт тʹәхмин дькьр у мьн заньбу кӧ әз темә хwәйкьрьне». Де Бавно, али зарʹед хwә бькьн, кӧ әwана жи хwә ӧса тʹәхмин кьн, у тʹьме wанарʹа бежьн кӧ һун wана һʹьз дькьн. Wана һʹәмез кьн у пачʹ кьн. Wәʹдә тʹәви wана дәрбаз кьн, тʹәви wан хәбәрдьн, хwарьне бьхwьн, у бьлизьн. w15 1/11 1:​3, 4

Сала 1919-да, кʹомәкә бьчʹук йа леколинкʹаред Кʹьтеба Пироз, һатә кʹьфшкьрьне чаwа «хӧламе амьн у сәрwахт». Wи чахи, хӧламе амьн тʹәви щьмәʹта Хwәде дьһа зәʹф сәр зьмане Инглизи хәбәрдьда. Ле wана ӧса кьр, кӧ иро әʹдәбйәтед мәйә сәр һʹиме Кʹьтеба Пироз, сәр 700 зьмана зедәтьр һәнә. Әʹйан ә кӧ щьмәʹта Хwәдерʹа лазьм бу wәлгәрандьна Кʹьтеба Пироз, кʹижан кӧ рʹаст у һеса буйа бона фәʹмкьрьне. Ләма Комитейа Wәлгәрандьна Кʹьтеба Пироз йа Дьнйа Тʹәзә саз бу, у бьред жь ве комитейе жь сала 1950 һʹәта 1960 шәш пʹаред Кʹьтеба Пироз дәрхьстьн. Пʹара пешийе һатә дәрхьстьне сәр щьвата мәзьн 2 Тʹәбахе сала 1950. Хwәстьна Бьре Нор әw бу кӧ «Wәлгәрандьна Дьнйа Тʹәзә» али милйона мәрьва бькә кӧ Йаһоwа нас кьн. w15 12/15 1:15, 17

Чь дькарә али мә бькә wәки әм бьзаньбьн кӧ чь бежьн? Әм дькарьн жь Кʹьтеба Пироз у жь әʹдәбйәтед мә һин бьн, кӧ әм диса ча дькарьн фькьред хwә дәрбази мәрьва кьн. Әм дькарьн леколин бькьн у фәʹм бькьн wан гьлийа кʹижан кӧ мә фәʹм нәдькьр. Әм ӧса жи дькарьн дәрһәԛа Иса леколин бькьн, сәва кӧ пебьһʹәсьн ча хәбәр дьн кӧ али йед дьнена бькьн. Иса дәрбера заньбу кӧ чь бежә, чьмки Йаһоwа wи һин кьр кӧ чаwа бь готьне бьбә «аликʹаре зьламе wәстийайи» (Иша. 50:4). Ӧса жи фәрз ә бьфькьрьн, кӧ чаwа гьлийед мә wе сәр йед дьн һʹӧкӧм бьн (Аԛуб 1:19). Әм дькарьн жь хwә бьпьрсьн: «Һәрге әз ӧса бежьм, әw мәрьв wе мьн рʹаст фәʹм бькә кӧ әз чь дьхwазьм wирʹа бежьм? Әwе ча хwә тʹәхмин кә?» w15 1/12 3:​12

Иса тʹәми да Мәсиһийед Щьһустанеда у илаһи әwед кӧ Оршәлимеда дьжитьн, кӧ чахе әwана ордийа дора Оршәлиме бьвиньн, гәрәке дәрберʹа бьрʹәвьн (Луԛа 21:21-24). Ида 28 сал дәрбаз бу, чахе Иса әw йәк пʹехәмбәрти кьр. Wи wәʹдәйи Мәсиһийед Щьһу кӧ дь Исраеледа дьжитьн, ида рʹасти гәләк пәйкʹәтьна у зерандьна һатьбун у амьн мабун (Ибрн. 10:32-34). Ле йәкә Паwлос заньбу кӧ зутьрәке әwана wе рʹасти чәтьнайикә мәзьн бен, кʹижанида кӧ баwәрийа wан wе бе щерʹьбандьне (Мәт. 24:20, 21; Ибрн. 12:4). У ләма әwи дьхwәст кӧ әwана һазьр бьн бона чәтьнайед кӧ wе рʹасти wан бен. Wанрʹа илаһи ньһа лазьм бу сәбьркьрьн у баwәрийа ӧса ԛәwи, кӧ әʹмьре хwә хьлаз кьн (Ибрн. 10:36-39). Ләма Паwлос бь рʹебәрийа рʹӧһʹе Хwәде һелан бу кӧ wан хушк-бьред дәлалрʹа бьньвисә, сәва кӧ wана ԛәwи кә. Әw нәʹмә ньһа нас ә чаwа кʹьтеба Ибрани. w16.01 1:​1, 2

Бәле, әме нькарьбьн һежайи һʹьзкьрьна Хwәде бьн, һәрге әм хушк-бьре хwә һʹьз нәкьн (1 Йуһн. 3:16). Ле ча әм дькарьн һʹьзкьрьна хwә wанарʹа бьдьнә кʹьфше? Бьфькьрьн дәрһәԛа мәсәла Иса. Иса wәʹде хьзмәткьрьна хwә сәр әʹрде, дина хwә дьда ль сәр илаһи мәрьвед бәләнгаз. Әwи мәрьвед тʹопал, кәр, кор у лал ԛәнщ дькьрьн (Мәт. 11:4, 5). Мәрьвед «ньфьр ле» бәр чʹәʹве сәрwеред религийа Щьһуйа рәш бун, ле бона Иса шабунәкә мәзьн бу кӧ мәрьвед рʹӧһʹанида бьрчи тʹер кә (Йуһʹн. 7:49). Иса мәрьвед бәләнгаз һʹьз дькьр у бь дьл у щан дьхәбьти кӧ бәрдәстийе wанарʹа бькә (Мәт. 20:28). Тӧ дькари wәдә бьвини сәва кӧ дина хwә бьди сәр хушк-бьред дь щьвата хwәда? Бәшьк, тӧйе бьвини кӧ чаwа хушк-бьра жь һʹьзкьрьна тә кʹаре бьстиньн. Дьбәкә һәнә хушк-бьред әʹмьрда мәзьн, кʹижанара кӧ аликʹари лазьм ә. Әм гәрәке изьне бьдьн, кӧ һʹьзкьрьна Хwәде али мә бькә, сәва кӧ һʹьзкьрьна ӧса һьндава хушк-бьра бьдьнә кʹьфше. w16.01 2:​12-​14

Гәло лазьм ә кӧ пәзед дьн бьзаньбьн наве һʹәму рʹункьрийа? Һәрге кьн бежьн, на. Чьмки һәрге жи кәсәк һатә рʹункьрьне, әw найе һʹәсабе кӧ әw wе сәд сәләфи хәлата хwә бьстинә, чьмки әw гәрәке һʹәта хьлазийе амьнийа хwә избат кә. Шәйтʹан әwе йәке занә, у ләма «пʹехәмбәред дәрәw» дьдә хәбате кӧ «бькарьбьн бьжартийед Хwәде жи бьхальфиньн» (Мәт. 24:24). Мәсиһийед рʹункьри сәд сәләфи нькарьн баwәр бьн кӧ әwана wе хәлата хwә бьстиньн, һʹәта кӧ Йаһоwа мора хьлазийе нәдә сәр wан. Йаһоwа wе йан пешийа мьрьна wан йан пешийа дәстпебуна «тәнгасийа мәзьн» мора хьлазийе бьдә сәр wан (Әʹйан. 2:10; 7:3, 14). Демәк әм нькарьн сәд сәләфи сәр кәсәки бежьн кӧ әw дькʹәвә нава 144 000 һәзара. w16.01 4:​2, 3

Бәлакьрьна мьзгине гьредайи йә тʹәви ԛьрара Хwәде бона инсанәте. Ԛьрара wи әw бу кӧ мәрьв әʹрде тьжә кьн у тӧ щар нәмьрьн. Рʹаст ә Адәм гӧнә кьр, ле йәкә ԛьрара Хwәде нәһатә гӧһастьне. Хwәде ӧса кьр кӧ әм жь гӧнә у мьрьне аза бьн. Сәва кӧ ԛьрара Хwәде бе сәри, Иса һатә сәр әʹрде у әʹмьре хwә бона мәрьвед гӧһдар да. Ле мәрьвед гӧһдар гәрәке фәʹм бькьн кӧ Хwәде жь wана чь дәwа дькә. Ләма жи Иса мәрьв ӧса жи һин дькьрьн, кӧ Хwәде чь жь wан дәʹwа дькә, у тәми да кӧ шагьрте wи жи әве йәке бькьн. Гава әм али мәрьва дькьн незики Хwәде бьн, әм шьхӧлкʹарийе дькьн кӧ ԛьрара wи бе сери, демәк кӧ мәрьв хьлаз бьн жь гӧнә у мьрьне. Бь wе йәке әм ӧса жи нишан дькьн һʹьзкьрьна хwә һьндава wан у Йаһоwа, кижан кӧ «дьхwазә һәму мәрьв хьлаз бьн у растийе нас кьн» (1 Тимт. 2:4). w16.01 5:​15, 16

Кӧрʹе Аһаз, Һьзԛийа һеса дькарьбу бьбә мина баве хwә, кӧ зӧлм у һерс бә, у мьԛабьли Хwәде бә. Әw мәрьвед кӧ зарʹотийа wан нә ӧса хьраб бу, «дьле хwәда жь Хӧданрʹа һерс» бунә йан сәр тʹәшкиләта wи (Мәтʹлк. 19:3). У һьнәк дьфькьрьн кӧ чьмки зарʹотийа wан хьраб бу, ләма әwана бь жийина хьраб дьжин, у дьбәкә чʹәʹв дьдьнә де-баве хwә у шашийед wан дькьн (Һәзԛл. 18:2, 3). Ле гәло әw йәк рʹаст ә? Мәсәла Һьзԛийа сәр ве пьрсе әʹйан щабе дьдә: Әw йәк нәрʹаст ә! Тӧ мәʹни тʹӧнә кӧ мәрьв сәр Йаһоwа һерс бә. Чьмки зӧлми кӧ ве дьнйа хьрабда һәйә, нә жь Йаһоwа йә (Иб. 34:10). Рʹаст ә де-бав дькарьн йан хьраб йан баш һʹӧкӧм бьн сәр зарʹед хwә (Мәтлк. 22:6; Колс. 3:21). Ле ве йәкева гьредайи нинә кӧ ахьрийеда зарʹ wе йәки ча бә. Чьмки Йаһоwа пʹешкʹешәкә ԛимәт дайә мә, әw һәйә азабуна бьжартьне, демәк әм дькарьн хwәха сафи кьн кӧ әме чь бькьн у йәки ча бьн (Ԛан. Дщр. 30:19). w16.02 2:​8-​10

Чахе Шаwул дьхwәст Даwьд бькӧжә, Абнәр пьшта Шаwул гьрт. Абнәр жи заньбу кӧ Хwәде Даwьд бьжартийә сәва кӧ бьбә пʹадше Исраеле (1 Сам. 26:1-5). Паши мьрьна Шаwул Абнәр дькарьбу мьлукти бьда кьфше, у пьштгьрийа Даwьд бькьра, нә кӧ йа кӧрʹе Шаwул Иш-бошет. Ӧса әwи wе амьнийа хwә Хwәдерʹа избат кьра. Паше, чахе әwи тʹәви щарийа Шаwул бенамуси кьр, бь ве йәке әwи дьбәкә хwәст кӧ дәwса Шаwул бьбә пʹадша (2 Сам. 2:8-​10; 3:6-11). Кӧрʹе Даwьд, Абшалом Хwәдерʹа амьн нибу, чьмки мьлук нибу. Абшалом дьхwәст бьбә пʹадша, ләма «бона хwә әрәбәк у һәспан у бона кӧ ль пешийа wи баз бьдьн пенщи зьлам» ԛазанщ кьр (2 Сам. 15:1). Әwи щьмәʹт бәрбь хwә дькьшанд кӧ wирʹа амьн бьминьн. Әwи жи заньбу кӧ Йаһоwа Даwьд бьжартийә чаwа пʹадше Исраеле, ле йәкә мина Абнәр дьхwәст Даwьд бькӧжә (2 Сам. 15:13, 14; 17:1-4). Мәсәла Абнәр у Абшалом әʹйан дькьн, кӧ һәрге мәрьв нәмьлук ә у һе зедә һӧкӧмәтийе дьхwазә, әw дькарә Хwәдерʹа нәамьн бә. Бәле, тʹӧ кәс жь мә нахwазә мина Абнәр у Абшалом хwәһʹьз бә у нетед нәрʹаст бьдә пешийа хwә. w16.02 4:9-11

Һәрге тӧ баwәрийа хwәда ԛәwи йи, фәʹмдари йә кӧ тӧйе әwе йәке пе кьред хwә бьди кʹьфше. Сәва кӧ «кьред пироз» тʹьме бьки, тӧ гәрәке фькьред хwәда у намусийеда тʹәмьз би (2 Пәт. 3:11). Ве йәкеда дәрһәԛа хwә тӧ чь дькари бежи? Мәсәлә, бьфькьрә сәр шәш мәһед пашwәхтийе. Тә ча дайә кʹьфше кӧ тӧ һин буйи рʹастийе у хьрабийе жь һәв дәрхи? (Ибрн. 5:14). Тӧ дькари дәрәщед ӧса бини бира хwә, чахе тӧ нәкʹәти бәр байе щерʹьбандьнәке, йан жи бәр байе щаһьлед дьн? Рʹабун-рʹуньштьна тәйә мәкʹтәбеда әʹйан дькә баwәрийа тә? Тӧ Йаһоwарʹа амьн дьмини, йан дьхwази бьби мина һәвалед хwәйә дәрсхане, чьмки нахwази кӧ әwана ԛәрфа тә бькьн? (1 Пәт. 4:3, 4). Бәле, әм гьшк жи гӧнәкʹар ьн. У һәла һе әwед кӧ гәләк сал Йаһоwарʹа хьзмәт дькьн, дькарьн щара шәрм кьн бәр һʹәмуйа бежьн дәрһәԛа баwәрийа хwә. Ле йәкә, мәрьве кӧ хwә тʹәсмили Йаһоwа кьрийә, wе фьрнаԛ бә кӧ наве Хwәде сәр wи йә, у әwе йәке wе пе кьред хwә бьдә кʹьфше. w16.03 2:​10, 11

Йаһоwа тʹьме тʹәмийед конкрет, йан рʹебәри дьда мәрьва. Мәсәлә, бахче Әдәнеда, Йаһоwа тʹәмийед зәлал да мәрьва, кʹижан кӧ дькарьбун әwана хwәй кьрана, сәва кӧ бьжин һʹәта-һʹәтайе бәхтәwарийеда (Дәстп. 2:15-17). Һәрге Адәм у Һеwайе гӧһ бьдана тʹәмийед Хwәде, wана wе хwә жь ахьрийа хьраб хwәй кьрана. Демәк wана wе бь жийина зор-щәфа нәжитана у нәмьрана. Ле дәwса кӧ гӧра Хwәде бькьрана, Һеwайе гӧһ да ширәта һәйwанәке, демәк мәʹр. Адәм жи, гӧһ да Һеwайе. Бь ве йәке wан һәрда жи пьшта хwә данә рʹебәрийа Баве хwәйи һʹьзкьри. Ле йазьх, сәва шашийа wана, һʹәму инсанәт кʹәтә сәр рʹийа мьрьне. Иро Йаһоwа кʹеләка щьмәʹта хwә йә, сәва кӧ wана бәрбь жийина һʹәта-һʹәтайе бьвә. Һьн жи, әw wана жь ԛәзийа хwәй дькә. Әw мина шьванәки һʹьзкьри йә, йе кӧ рʹебәрийе кәрийе хwә дькә, у wана хwәй дькә кӧ нәкʹәвьнә сәр рʹейед бь ԛәзийа w16.03 4:​2, 3.