Гӧлан

Һәрге әм ԛәдьре мәрьва бьгьрьн у һәстед wан һьлдьнә һʹәсаб, әме бькарьбьн тʹәви wан бь нәрми хәбәрдьн. Иса һәма ӧса жи дькьр. Мәсәлә, чахе әwи әʹлаләтәкә мәзьн дит, кʹижан кӧ гәләк ԛәwат хәрщ кьрьн сәва кӧ wи бьбьһен, әw гәләк ша бу тʹәви wан wәʹдә дәрбаз кә у wана һин кә (Марԛ. 6:34). Һәла һе чахе мәрьва wи рәзил дькьрьн, әwи әwана рәзил нәдькьрьн (1 Пәт. 2:23). Рʹаст ә әм мәрьве хwәйә незик һʹьз дькьн, ле щара әм дькарьн тʹәви wана сәрт хәбәрдьн, чьмки әм wана рʹьнд нас дькьн. У дьбәкә әм дьфькьрьн wәки нәлазьм ә әм фәсал бьн кӧ ча тʹәви wан хәбәрдьн. Ле Иса тʹәви һәвалед хwә тʹӧ щар сәрт хәбәрнәдьда. Мәсәлә, чахе һьнәк жь wан һәвра дькʹәтьнә дәʹwе кӧ жь wан кʹе мәзьн ә, әwи бь нәрми әwана ширәт кьрьн, у әwи мәсәла зарʹа бьчʹук wанрʹа ани, сәва кӧ али wан бькә wәки ньһерʹандьна хwә бьгӧһезьн (Марԛ. 9:33-37). Рʹуспи дькарьн чʹәʹв бьдьнә Иса кӧ бь нәрми йед дьн ширәт кьн (Галт. 6:1). w15 1/12 3:​15, 16

Гәло чьрʹа гәләк фәрз ә кӧ тʹьме нав мәда һʹьзкьрьна бьрати һәбә? Щаба ве пьрсе әw ә, кӧ Йаһоwа жь мә дәʹwа дькә кӧ әм тʹьме һʹьзкьрьна бьрати бьдьнә кʹьфше. Һәрге әм хушк-бьред хwә һʹьз нәкьн, әм нькарьн бежьн кӧ әм Йаһоwа һʹьз дькьн (1 Йуһн. 4:7, 20, 21). Һьн жи, әм һәвдӧрʹа лазьм ьн, у илаһи wәʹде чәтьнайа. Паwлос заньбу кӧ зутьрәке һьнә Мәсиһийед Ибранирʹа, кʹижанарʹа кӧ әwи нәʹмә ньвисибу, wе лазьм бә мал у һәбукед хwә бьһельн. У Иса әʹйан кьр кӧ әw wәʹдә wе чьԛас чәтьн бә (Марԛ. 13:14-18; Луԛа 21:21-23). Ләма илаһи wи чахи Мәсиһийарʹа лазьм бу һʹьзкьрьна һьндава һәвдӧ һе ԛәwи кьн (Ром. 12:9). Тәнгасийа мәзьн зутьрәке wе бе (Марԛ. 13:19; Әйан. 7:1-3). Ләма жи бәс нинә кӧ әм тʹәне тʹәвайи топ бьн. Паwлос ани бира Мәсиһийед Ибрани кӧ чахе әwана тʹоп дьбьн, гәрәке «һʹьзкьрьне у ԛәнщикьрьнеда» һелана бьдьнә һәв (Ибрн. 10:24, 25). w16.01 1:​6-8

Рʹожа Пенщийе Һʹәсабе сала 33-да Оршәлимеда, wәкә 120 мәрьв тʹәвайи тʹоп бун дь отʹаха жорьнда у «дӧа дькьрьн» (Кʹар. Шанд. 1:13-15). Чь кӧ гәрәке бьԛәwьмийа, Йоwеле пʹехәмбәр пешда пʹехәмбәрти кьр (Йоwл. 2:28-32; Кʹар. Шанд. 2:16-21). Ве рʹоже, рʹӧһʹе Хwәдейи Пироз һатә сәр wан Мәсиһийа, кӧ дь отʹаха жорьнда тʹоп бьбун (Кʹар. Шанд. 1:8). Паши ве йәке wана дәстпекьр пʹехәмбәртийе бькьн, демәк шәʹдәтийе бьдьн дәрһәԛа wан тьшта чь кӧ wана дит у бьһист. Паше, Пәтрусе шанди әʹлаләтера кӧ дора wана тʹоп бьбун шьровәкьр, кӧ чь ԛәwьми у фәрзбуна ве йәке чь бу. Әwи әʹлаләтера гьлийед ӧса гот: «Тʹобә кьн у бьра жь wә һәр йәк бь наве Иса Мәсиһ бона бахшандьна гӧна бе ньхӧмандьне у һуне рʹӧһʹе пироз пʹешкʹеш бьстиньн». У wәкә 3 000 мәрьва гьлийе wи ԛәбул кьрьн, һатьнә ньхӧмандьне, у рʹӧһʹе пироз жи стандьн (Кʹар. Шанд. 2:37, 38, 41). w16.01 3:​1-3

Паwлос дь wан рʹезада дайә кьфше кӧ рʹункьри дькарә нәщайиз симбола бьхwә у вәхwә, һәрге һәләԛәтийа хwә тʹәви Йаһоwа хwәй накә (Ибрн. 6:4-6; 10:26-29). Әw ширәт али рʹункьрийа дькә, кӧ бира хwәда хwәй кьн wәки wана һе хәлата хwә нәстандьнә. Әwана гәрәке ԛазанщ кьн «хәлата кӧ Хwәде дь газикьрьна хwә йа әʹзманида бь Мәсиһ Иса пʹешкʹеш дькә» (Фили. 3:13-16). Паwлос Мәсиһийед рʹункьри һелан кьр кӧ әwана «бьжин, чаwа лайиԛи wе газийе йә, кʹижанера [әwана] һатьнә газикьрьне». Ле wана ча карьбу әw йәк бькьра? Паwлос шьровәкьр: «Бь тʹәмамийа мьлуктийе у шкәсти, бь сәбьре һʹьзкьрьнеда ль бәр һәв дахьн. Бьщәдиньн, кӧ йәктийа рʹӧһʹ пе һәвгьредана әʹдьлайийе хwәй кьн» (Әфәс. 4:1-3). Рʹӧһʹе Хwәдейи пироз али хьзмәткʹаред wи дькә кӧ әwана мьлук бьн, нә кӧ бабах бьн (Колс. 3:12). w16.01 4:​5, 6

Бьдә бәр чʹәʹве хwә мәрьве әʹмьрда мәзьн кӧ анщах чʹийева һьлдькʹьшә. Бона wи әw дәм дь жийина wида йа лапә чәтьн ә, ле нә жь бо әʹмьре wийи мәзьн. Бьраһим дьбәкә wәкә 125 сали йә, ле һәла һе ԛәwата wи һәйә. Тʹәви wи гәдәки wәкә 25 сали жи һьлдькʹьшә. Әw кӧрʹе wи Исһаԛ ә, йе кӧ даре шәwате дьбә. Ле дәсте Бьраһимда кʹер ә у тьштед кӧ бона агьрвехьстьне лазьм ә. Чьмки Йаһоwа жь wи һиви кьрийә, кӧ әw кӧрʹе хwә wирʹа бькә ԛӧрбан! (Дәстп. 22:1-8) Wи wәʹдәйи баwәрийа Бьраһим ԛайим һатә щерʹьбандьне. Бьраһим нә кӧ корә-кор гӧрʹа Хwәде кьр, ле әwи бь чʹәʹве баwәрийа хwәйә рʹаст дит, кӧ Йаһоwа тʹӧ щар жь хьзмәткʹаре хwәйи амьн һиви накә тьштәки ӧса, кӧ гәләк wәʹдә зийане бьдә wи. Бьраһим баwәр бу кӧ һәрге әw гӧрʹа Йаһоwа бькә, Хwәде wе wи у кӧрʹе wийи һʹьзкьри кʹәрәм кә. Әw баwәри сәр һʹиме чь бу? Сәр һʹиме занәбун у итʹбарийе бу. w16.02 1:​3, 4

Мәрйәм гәрәке һʹәмлә буйа, зарʹ бьанийа, у әw зарʹ хwәй кьра у мәзьн кьра. Әw зарʹ Кӧрʹе Хwәдейи тайе тʹәне бу! Рʹаст ә һеса те готьн дәрһәԛа wи ԛәдьре мәзьн кӧ Мәрйәме стандийә. Ле wәрә бьфькьрьн гәло Мәрйәм жь бо чь дьбәкә хәмгин дьбу. Мьлйакʹәте Хwәде Щьбрайил готә wе кӧ әw wе һʹәмлә бә, ле бейи һәләԛәтийа тʹәви мер. Щьбрайил Мәрйәмерʹа нәгот кӧ әw мәрьвед хwәйә незикрʹа шьровәкә кӧ чьрʹа әw һʹәмлә йә. Гәло әwана wе чь бьфькьрийана сәр wе? Һьн жи Мәрйәм хәмгин дьбу сәва дәргистийе хwә Усьв. Әwе ча гәрәке избат кьра кӧ рʹаст ә әw һʹәмлә йә, ле wирʹа амьн майә? Һьн жи, әв щабдарикә чьԛас мәзьн бу, кӧ әwе гәрәке мәзьн кьра, хwәй кьра, у һин кьра Кӧрʹе тайе тʹәне йе Һәри Мәзьн! Әм ньзаньн дәрһәԛа һʹәму хәмгинед Мәрйәме чахе Щьбрайил тʹәви wе хәбәрда. Ле әм заньн кӧ әwе чь щурʹәйи щаба хwә дабу, чаwа кӧ жь рʹеза иро те кʹьфше (Луԛа 1:26-37). w16.02 2:​13, 14.

Һушарʹа мерхаси лазьм бу сәва Хwәдерʹа амьн бьминә. Һуша һәвале Даwьди амьн бу. Ле амьнийа wи һатә щерʹьбандьне, чахе кӧрʹе Даwьд Абшалом дьле гәләк Исраелийа кʹьри, у хwәст Оршәлиме алт кә у бьбә пʹадша (2 Сам. 15:13; 16:15). Даwьд жь шәһәр рʹәвийа, у һьнге Һуша пешийа бьжартьне сәкьни. Әwи гәрәке бьжбарта кӧ йан Абшаломрʹа амьн бьминә, йан пәй пʹадша һәрʹә, кʹижан кӧ әʹмьрда мәзьн бу у рʹәви сәва кӧ әʹмьре хwә хьлаз кә. Һуша сафи кьр кӧ рʹункьрийе Хwәдерʹа амьн бьминә, ләма жи әw чу сәр Чʹийайе Зейтʹуне рʹасти Даwьд һат (2 Сам. 15:30). Даwьд готә Һуша кӧ әw вәгәрʹә Оршәлиме у Абшаломрʹа ԛәстика бьдә кʹьфше йанчь һәвале wи йә, у ӧса бькә кӧ ширәта Аһитофәл нәйе сери. Һуша әʹмьре хwә кьрә бьн ԛәзийе, у Йаһоwарʹа амьни избат кьр, у ӧса кьр чаwа Даwьд жь wи хwәст. У чаwа кӧ Даwьд дӧа дькьр, ӧса жи бу, ширәта Аһитофәл нәһатийә сери (2 Сам. 15:31; 17:14). w16.02 4:​15, 16

Ча Мәсиһи, әм жи дькарьн кʹаре бьстиньн жь wан рʹебәрийа кӧ Ԛанунеда Исраелийарʹа һатьнә дайине. Ле чаwа? Әм дькарьн бьфькьрьн Ԛанун сәр һʹиме кʹижан принсипа йә. Рʹаст ә әм бьн ван ԛанунада ниньн, ле йәкә әм дькарьн wан ԛанунада рʹебәрийед керһати бьвиньн, чаwа жийина хwәйә һәррʹожида, ӧса жи хьзмәткьрьна хwәда Йаһоwарʹа. Йаһоwа әw ԛанун Кʹьтеба Пирозда дайә ньвисаре, сәва кӧ әм бькарьбьн жь wан ԛануна һин бьн, пәй принсипед wан һәрʹьн, у рʹази бьн бона wан принсипа кӧ Мәсиһийарʹа һатийә дайине. Дина хwә бьдьне кӧ Иса чь гот: «Wә бьһистийә кӧ һатийә готьне: ‹Зьнийе нәкә›. Ле әз wәрʹа дьбежьм, кʹи бь тәме хьраб жьнәке бьньһерʹә, әwи дьле хwәда иди тʹәви wе зьнекʹари кьр». Демәк, әм гәрәке нә кӧ тʹәне хwә жь бенамусийе хwәй кьн, ле ӧса жи жь фькьр у хwәстьнед бенамуси (Мәт. 5:27, 28). w16.03 4:6, 8

Самуйел нәдьхwәст пʹадша бьдә wан, у ләма Йаһоwа се щара готә Самуйел кӧ гӧрʹа щьмәʹте бькә (1 Сам. 8:7, 9, 22). Рʹаст ә Самуйел рʹази нибу, ле йәкә әwи дәхәси нәкьр у һерс нәкʹәт сәр wи мәрьви, кʹе кӧ wе дәwса wи бьбуйа сәркʹар. Чахе Йаһоwа готә Самуйел wәки Шаwул рʹун кә, әwи хwә әглә нәкьр. Әw һазьр бу гӧрʹа Хwәде бькьра нә кӧ сәва борщдар бу, ле әwи Йаһоwа һʹьз дькьр. Иро гәләк рʹуспийед щерʹьбанди һәнә, кӧ чʹәʹв дьдьнә Самуйел у бь һʹьзкьрьн йед дьн һин дькьн (1 Пәт. 5:2). Әw рʹуспийед ԛәнщ, бь һазьрбуне йед дьн һин дькьн у натьрсьн щабдарийа хwә ниви кьн тʹәви шагьртед хwә. Дәwсе, әwана wана һʹәсаб дькьн ча һәвалԛӧльхкʹаред ԛимәт, йед кӧ wе кʹомәке бьдьн сәва һʹәwщед щьвате (2 Корн. 1:24; Ибрн. 13:16). Әw рʹуспийед һʹәлал, ша дьбьн, чахе әw шагьрт фәрәсәтед хwә дьдьнә хәбате, wәки али щьмәʹта Йаһоwа бькьн (Кʹар. Шанд. 20:35). w15 1/4 1:​16, 17

Азарйа пʹадша «тьште кӧ дь чʹәʹве Хӧданда рʹаст ьн чекьр». Ле Йаһоwа Азарйа бь кʹотибуне щәза кьр (2 Пʹадш. 15:1-5). Чьрʹа? Әwа пʹара ве сәрһатийе мәрʹа гьли накә чьрʹа. Ле тӧ чь дьшьрмиш дьби дәрһәԛа Йаһоwа? Гәло әw йәк тә әʹщьз дькә у тӧ дьшьрмиш дьби кӧ Йаһоwа нәрʹаст бу, wәки Азарйа щәза кьр бейи мәʹна щайиз? Һьлбәт на. Һәрге тӧ Йаһоwа рʹьнд нас дьки, тӧ зани кӧ щәзакьрьна wи тʹьме һәԛ ә. Азарйа пʹадша, ӧса жи нас бу ча пʹадша Узийа (2 Пʹадш. 15:7, 32). Жь ве сәрһатийе пʹара майинда 2 Дирок 26:3-5, 16-21 дьбежә кӧ әwи чь кӧ «дь чʹәʹвед Хӧданда рʹаст ьн кьрьн». Ле дь сәрһатийеда ӧса жи те готьне кӧ паше әw ԛӧрʹә бу, чь кӧ wи бьр бәрбь кʹӧтакьрьне. Әwи пʹадшайи дьхwәст әв йәк бькьра, чь кӧ тʹәне изьна кʹәшиша һәбу бькьн. Һʹәйште йәк кʹәшиша wирʹа дьготьн кӧ әw нәрʹаст ә у дьхwәстьн wи бьдьнә сәкьнандьне. Ле әwи ча хwә да кʹьфше? Әw һаԛас ԛӧрʹә бу кӧ әw сәр wан һерскʹәт! Әw информасийа али мә дькә wәки фәʹм бькьн, чьрʹа Йаһоwа әw пʹадша бь кʹотибуне щәза кьр. w15 1/4 3:​8, 9

Чаwа ве рʹезеда те готьне, Шәйтʹан те навкьрьне ча Мирещьн, кʹижан кӧ те һʹәсабе «Бӧхданбеж». Шәйтʹан бӧхдан авитә Йаһоwа, чахе гот wәки әw дәрәwин ә. Хәбәра «мәʹре бәре» тинә бира мә, кӧ чаwа Шәйтʹан мәʹр да хәбате wәки Һеwайе бьхальфинә. Хәбәра «зийайе мәзьн» жи рʹьнд дьдә кʹьфше кʹе йә Шәйтʹан. Әw берʹәʹм ә, зӧлм ә, у хьраб ә. Әw дьхwазә ԛьрара Йаһоwа бьдә сәкьнандьне wәки нәйе сери, у щьмәʹта Хwәде кʹӧта кә. Әʹйан ә, кӧ Шәйтʹан дькарә зийанәкә мәзьн бьдә беԛьсурийа мә. Ләма жи Кʹьтеба Пироз мәрʹа пешда дьбежә: «Сәрwахт бьн, һʹьшйар бьминьн! Мирещьне нәйаре wә мина шерʹ мьрʹә-мьрʹа wи йә, дьгәрʹә кʹа кʹе һʹуфи хwә кә» (1 Пәт. 5:8). Бешьк, Шәйтʹан гәләк ша дьбә чахе хьзмәткʹаре Хwәде гӧне гьран дькә, чьмки әwе йәке әw дьдә хәбате сәва ԛәрфе хwә Йаһоwа бькә (Мәтʹлк. 27:11). w15 1/5 1:​3, 4, 10

Йаһоwа дьхwазә кӧ әм жь әʹмьр шабуне бьстиньн. Әм әwе йәке заньн,

чьмки Йаһоwа бахче бәдәw да Адәм у Һеwайе, wәки әwана теда бьжин (Дәстп. 2:9). Ле Шәйтʹан дькарә һʹӧкӧм кә сәр хwәстьна мә бь «дәрәwед дәwләтийе» (Мәт. 13:22). Гәләк мәрьв дьшьрмиш дьбьн, кӧ пʹәрʹә у тьштед материали дькарьн wана бәхтәwар кьн у пешда бьвьн. Һәрге әм жи ӧса дьшьрмиш дьбьн, әм дькарьн тьштәки гәләк фәрз ӧнда кьн. Әw һәйә һәләԛәтийа мә тʹәви Йаһоwа. Иса пешда гот: «Тʹӧ кәс нькарә дӧ ахарʹа хӧламтийе бькә, чьмки йан wе һиле wи жь йәки һәрʹә у йе дьне һʹьз бькә, йан жи wе ԛәдьре йәки бьгьрʹә у йе дьне беһʹӧрмәт кә. Һун нькарьн һьн Хwәдерʹа, һьн жи һәбукерʹа хӧламтийе бькьн» (Мәт. 6:24). Һәрге әм һʹәму ԛәwат у wәʹде хwә дьдьн бона тьштед материали, әме нькарьбьн Йаһоwарʹа ԛӧльх бькьн. Шәйтʹан жи һәма әwе йәке бона мә дьхwазә. Wәрә әм изьне нәдьн кӧ пʹәрʹә у тьштед материали кӧ тенә кʹьрʹине, бона мә һе фәрз бьн, нә кӧ һәләԛәтийа мә тʹәви Йаһоwа. Һәрге әм дьхwазьн мьԛабьли Шәйтʹан дәрен у сәркʹәвьн, гәрәке ньһерʹандьна мә рʹаст бә һьндава тьштед материали (1 Тимтʹ. 6:6-10). w15 1/5 2:​12

Һеса нинә wәки әм фәʹм кьн мәрьв чь һʹалида ньн, илаһи һәрге әм хwәха рʹасти wе чәтьнайе нәһатьнә. Мәсәлә, гәләк хушк у бьред мә еше дькʹьшиньн чьмки нәхwәш ьн, йан зийан стандьнә, йан жи кал-пир дьбьн. Һьнәк жи тәйах дькьн бәр депресйайе, йан жи һәртʹьм бәрхwә дькʹәвьн, йан жи бәреда рʹасти зорбәтийе һатьнә. Һьнәк зарʹед хwә тʹәне хwәй дькьн. Малбәта һьнәкада жи нәфәред мале Шәʹдед Йаһоwа ниньн. Проблемед һәр кәси һәнә, у һʹәчʹи зәʹф жь wан проблема нә мина проблемед мәнә. Ле әм ча дькарьн һʹьзкьрьне нишан кьн у али wан хушк у бьра бькьн? Һәр кәсәкирʹа аликʹари бь щурʹәки майин лазьм ә. Демәк, һәрге әм рʹьнд гӧһ бьдьнә wан у бьхәбьтьн кӧ һәстед wан фәʹм кьн, әме һе баш бьзаньбьн кӧ чь щурʹәйи али wан бькьн. Һьн жи әм дькарьн биньнә бира wан кӧ ча Йаһоwа сәр проблемед wан дьньһерʹә. Йан жи әм дькарьн аликʹарийе бь щурʹәки майин бьдьнә wан. Һәрге әм ӧса дькьн, әм чʹәʹв дьдьнә Йаһоwа (Рʹом. 12:15; 1 Пәт. 3:8). w15 1/5 4:​6, 7

Йаһоwа ԛәwат дайә Иса, у ләма жи фәʹмдари йә кӧ Хwәдайе Һьмзор хwәха жи дькарә сәр тʹәбийәте һʹӧкӧм у контрол кә. Мәсәлә, пешийа селаве, Йаһоwа гот: «Һʹәфт рʹожа шунда, әзе 40 рʹожи у 40 шәви баране бьбариньм» (Дәстп. 7:4). Ӧса жи, дь кʹьтеба Дәркʹәтьн 14:21-да әм дьхуньн: «Хӧдан тʹәмамийа шәве бь байе рʹоһлатейи ԛайим бәʹр ажот». Дь кʹьтеба Уньс 1:4-да ньвисар ә: «Хӧдан байәк мәзьн шанд сәр бәʹре, дь бәʹреда баһозәк [фьртонәк] мәзьн чебу у һәма мабу кӧ кʹәшти [гәми] пʹарчә бьбуна». Демәк, дьнйа тʹәзәда жи Йаһоwа wе тʹьме сәр тʹәмамийа тʹәбийәте һʹӧкӧм кә, у әw йәк мә гәләк дьлгәрм дькә. Әме ида тӧ тʹәшԛәле тʹәбийәте нәтьрсьн, чьмки wе «коне Хwәде нава мәрьвада» бә! (Әʹйан. 21:3, 4) Гӧмана мә һәйә кӧ Иса wәʹде Һʹәзарсалийа Пʹадшатийа хwә жи, wе бь ԛәwата Йаһоwа сәр тʹәбийәте һʹӧкӧм кә. w15 1/6 1:​15, 16

Дь Мәтʹәлок сәре 7-да, әм сәрһатийа хортәки щаһьл дьхуньн, йе кӧ еваре бәр мала кʹӧлфәта бенамусрʹа дәрбаз дьбә. Хорт ахьрийеда тʹәви wе кʹӧлфәте бенамусийе дькә. Һәрге әwи фәʹм кьра кӧ әв йәк чьԛас хоф ә, әwи wе хwә жь кʹӧлфәта бенамус дур бьгьрта! (Мәтʹлк. 7:6-27) Чахе әм мина wи хорте щаһьл, фәʹм накьн wәки әw тьшт чьԛас хоф ьн, жь бо wе йәке әм дькарьн сафикьрьнед нәрʹаст бькьн. Мәсәлә, евара һьнә бәрнамед телевизийоне тьштед бенамуси нишан дькьн. Әw йәк дькарә хоф бә у мәрʹа чәтьн бә кӧ әве бәрнаме нәньһерʹьн. Ӧса жи сәва мә дькарә хоф бә әв йәк, чахе әм Интернетеда линкәке дьтькиньн у ньзаньн әw чь линк ә. Йан жи чахе һьнә малпәред дьн дьдьнә хәбате, кʹидәре кӧ дькарьн рекламед бенамуси һәбьн, у линкед порнографи. Дь wан дәрәщада әw тьштед кӧ әм дьвиньн, дькарьн хwәстьнед бенамуси нав мәда пешда биньн, у мә һелан кьн кӧ гӧрʹа Йаһоwа нәкьн. w15 1/6 3:​8, 9

Иса гот: «Дәйнед мә бьбахшинә». Ле щарәкә дьн әwи ӧса гот: «Гӧнед мә бьбахшинә» (Мәт. 6:12; Луԛа 11:4). Әwи ӧса гот, чьмки гӧне мә мина дәйн ә. Дь «Бьрща Ԛәрәwьлийеда» йа сала 1951-да, һатьбу шьровәкьрьне, кӧ чахе әм гӧнә дькьн, әw мина wе йәке йә, кӧ ча әм дьбьнә дәйндаред Йаһоwа. Әм борщдар ьн һʹьзкьрьна хwә һьндава Йаһоwа бьдьнә кʹьфше, бь wе йәке кӧ әм гӧрʹа wи бькьн. Ле чахе әм гӧрʹа Йаһоwа накьн, әм борще хwә наԛәдиньн, у дьбьнә дәйндаре wи. «Бьрща Ԛәрәwьлийеда» һатә готьне кӧ һәрге Йаһоwа бьхwәста, әwи wе һеса бькарьбуйа достийа мә тʹәви хwә бьбьрийа. У ӧса жи ве журналеда һатьбу ньвисаре: «Гӧнә әw һәйә нәһʹьзкьрьн һьндава Йаһоwа» (1 Йуһʹн. 5:3). Әм чьԛас жь Йаһоwа рʹази нә, wәки әwи кӧрʹе хwә кьрә ԛӧрбан, сәва бахшандьна гӧнед мә! Бахшандьна Йаһоwа мәрʹа һәр рʹож лазьм ә. Рʹаст ә Иса wәкә 2 000 сал пешда бу ԛӧрбан, ле йәкә ԛӧрбанбуйина wи иро жи мәрʹа кʹаре тинә. Ләма жи әм тʹьме гәрәке жь Йаһоwа рʹази бьн бона ве пʹешкʹеша ԛимәт. Тʹӧ кәс жь мә, тʹӧ щар wе нькарьбуйа кʹьрʹинәкә ӧса бьда, кʹижан кӧ лазьм ә сәва әм жь гӧнә у мьрьне аза бьн (Зәб. 49:7-9; 1 Пәт. 1:18, 19). w15 1/6 5:​9, 10

Әм ша нә wәʹде даннасинкьрьне бәла кьн әʹдәбйәтед кӧ һʹәwас ьн у али мәрьва дькьн. Ӧса жи, әм техноложийед тʹәзә дьдьнә хәбате, сәва кӧ мьзгинийа хере бәла кьн. Мәсәлә, малпәра jw.org али гәләк мәрьва дькә, сәва кӧ әwана аликʹарийа лазьм бьстиньн. Дь ван һʹәму гӧһастьнада, әм әʹйан дьвиньн хәмкьрьн у һʹьзкьрьна Йаһоwа һьндава мәрьва. Әм ӧса жи дьшекьриньн әw гӧһастьна дәрһәԛа щьвата, жь бо кʹижана кӧ әм дькарьн wәʹдә бьвиньн, кӧ ԛӧльхкьрьна тʹәви малбәте йан жи һинбуна шәхси дәрбаз кьн. Әм ӧса жи рʹази нә сәва гӧһастьнед бәрнамед щьватед мәйи мәзьн. Әw бәрнамә һәр сал һе баш у баш дьбьн! Әм ӧса жи гәләк рʹази нә кӧ гәләк мәкʹтәбед мә һәнә, кʹидәре кӧ әм һин дьбьн у кʹаре дьстиньн. Дь wан һʹәму гӧһастьнада әм әʹйан дьвиньн, кӧ Йаһоwа рʹебәрийа тʹәшкиләта хwә дькә у кӧ әw щьнәта рʹӧһʹани һе бәдәw дькә! w15 1/7 1:​16, 17

Чахе тәрʹа чәтьн ә кӧ тʹәвнәбуйине хwәй ки у пьштгьрийа кәсәки нәки, пьрсе бьдә хwә: «Ве дәрәщеда Иса wе чь бькьра?» Чахе Иса ль сәр әʹрде бу, гәләк шәрʹ-дәʹw һәбун ортʹа мәрьвед жь Щьһустане, Щәлиле у Самәрйайе. Бьфькьрьн сәр һьнә мәсәла. Щьһу у мәрьвед Самәри тʹәви һәв хәбәрнәдьдан (Йуһʹн. 4:9). Ферьси у Садуԛи, жь бо гәләк тьшта һәврʹа дькʹәтьнә дәʹwе (Кʹар. Шанд. 23:6-9). Щьһуйед кӧ Ԛанун заньбун дьфькьрин, кӧ әwана жь мәрьвед кӧ Ԛанун ньзаньбун баштьр ьн (Йуһʹн. 7:49). У гәләка хәрщгьр у Рʹомайи нәфрʹәт дькьрьн (Мәт. 9:11). Ле Иса нәдькʹәтә нава wан шәрʹ-дәʹwа. Рʹаст ә әwи тʹьме рʹастийа дәрһәԛа Йаһоwа хwәй дькьр у ӧса жи заньбу кӧ Исраел щьмәʹта Хwәдейә мәхсус бу, ле йәкә әwи тʹӧ щар шагьртед хwә ӧса һин нәдькьр кӧ әwана жь мәрьвед дьн баштьр ьн (Йуһʹн. 4:22). Дәwса wе йәке, Иса шагьртед хwә һин дькьр, кӧ һʹәму мәрьва һʹьз бькьн. w15 1/7 3:5

Йаһоwа мәрьв ӧса әʹфьрандьнә, кӧ әwана һʹәwщәнә һʹьз кьн, у ӧса жи һʹәwщәнә wана һʹьз кьн. Ле мәрьв дькарә һеса дьлтәнг бә у һʹьзкьрьне һьндава хwә тʹәхмин нәкә жь бо нәхwәшийа, йан проблемед пʹәрава гьредайи, йан жи чахе ԛӧльхкьрьнеда пешдачуйине навинә. Ле һәрге әм дьфькьрьн кӧ Йаһоwа ида мә һʹьз накә, әм гәрәке биньн бира хwә, кӧ әм ԛимәт ьн бона wи у әw тʹәви мә йә, дәсте мәйи рʹасте дьгьрә у али мә дькә. Йаһоwа wе тʹӧ щар мә бир нәкә һәрге әм wирʹа амьн ьн (Иша. 41:13; 49:15). Хушкәкә мә бь наве Брищит, паши мьрьна малхе хwә, дӧ зарʹед хwә тʹәне мәзьн кьр. Әw дьбежә: «Мәзьнкьрьна зарʹа дь ве дьнйа Шәйтʹанда, йәк жь шьхӧле лапи чәтьн ә, илаһи бона wан йед кӧ би нә. Ле әз баwәр ьм кӧ Йаһоwа мьн һʹьз дькә чьмки әз чахе дьлтәнг дьбум у дьгьрийам, әw тʹәви мьн бу у тʹӧ щар нәдьһишт кӧ щерʹьбандьнед мьн жь ԛәwата мьн дәр бьн» (1 Корн. 10:13). w15 1/8 1:​1-3

Һәбаԛуԛ пʹехәмбәр бь сәбьр һивийе бу, кӧ әw пʹехәмбәрти кʹижан әwи дәрһәԛа һьлшандьна Оршәлиме дьгот, бе сери. Пʹехәмбәред дьн жи әв әʹламәти гәләк сала даннасин дькьрьн. Һәбаԛуԛ дьдит, кӧ зӧлми у нәһәԛи һе зедә буйә нә кӧ бәре. Әwи лавайа жь Йаһоwа дькьр сәва кӧ али wи бькә, у пьрс да Йаһоwа: «Йа Хӧдан, һʹәта чь wәхти әзе банги тә бькьм?» Йаһоwа соз да Һәбаԛуԛ: «Әw дәрәнг наминә» (Һәбԛ. 1:1-4). Бьдә бәр чʹәʹве хwә, һәрге Һәбаԛуԛ бьwәстийа, чьмки һивийа хьлазийе бу у ӧса бьгота: «Әз бь сала һивийа һьлшандьна Оршәлиме мә. Wе гәләк wәʹдә бькʹьшинә, һʹәта хьлази бе. Мьнрʹа нәлазьм ә кӧ бәрдәwам кьм даннасин кьм. Йед дьн дькарьн әви шьхӧли бькьн». Ле чь дькарьбу бьԛәwьмийа, һәрге әw ӧса бьфькьрийа? Әwи wе ԛәбулкьрьна Йаһоwа ӧнда кьра. У һәрге әw һазьр нибуйа бона һатьна хьлазийе, әwи дькарьбу әʹмьре хwә ӧнда кьра. w15 1/8 2:​12, 13

Сәва кӧ һәләԛәтийа баш тʹәви Йаһоwа хwәй кьн, әм һәвалед ӧса хwәрʹа нажберьн, йед кӧ тьштед нәрʹаст у хьраб дькьн. Дькʹәвә нава wан, йед кӧ дьбежьн кӧ әwана Йаһоwарʹа ԛӧльх дькьн, ле гӧрʹа wи накьн. Һәрге йед ӧса гӧнед гьран дькьн у гӧне хwә надьнә рʹуйе хwә, әм һәвалтийа хwә тʹәви wан дьԛәтиньн (Рʹом. 16:17, 18). Чахе мәрьв һәвалтийе дькә, әw дьхwазә һәвалед хwә рʹази кә у ӧса бькә кӧ wи ԛәбул кьн. У ләма һәрге әм һәвалтийе дькьн тʹәви wан, йед кӧ гӧрʹа Хwәде накьн, әм дькарьн бькʹәвьнә тʹәльке у тьштед ӧса бькьн чь кӧ әwана дькьн. Мәсәлә, һәрге әм незик һәвалтийе дькьн тʹәви мәрьвед бенамус, әм жи дькарьн бьбьнә мина wан. Әw йәк тʹәви һьнә хушк-бьред мә ԛәwьмийә. У әwед кӧ гӧне хwә нәанин рʹуйе хwә, жь щьвате һатьнә дәрхьстьне (1 Корн. 5:11-13). Һʹәта кӧ әwана гӧне хwә найньнә рʹуйе хwә у пʹошман нәбьн, һʹале wан дькарә ӧса бә, чаwа кӧ Паwлос гот (2 Пәт. 2:20-22). w15 1/8 4:​4-6

Иса бь аԛьлайи һәвалед незик хwәрʹа дьжбарт. Әwи һәвалед ӧса бьжарт, йед кӧ бь амьни пәй wи дьчун у ӧса жи Йаһоwа һʹьз дькьрьн у wирʹа ԛӧльх дькьрьн. Гәло тӧ жи хwәрʹа һәвалед ӧса дьжбери, йед кӧ Йаһоwа бь тʹәмамийа дьле хwә һʹьз дькьн? Чьрʹа әw йәк фәрз ә? Һʹьзкьрьна хушк у бьред мә дькарә али тә бькә, кӧ рʹӧһʹанида бьгьһижи. Һәрге тӧ щаһьл и у дьфькьри, кӧ әʹмьре хwә ча дәрбаз ки, wе бь билани бә кӧ тӧ хwәрʹа һәвалед ӧса бьжбери, йед кӧ гәләк wәхт Йаһоwарʹа ԛӧльх дькьн у щьватеда йәктийе хwәй дькьн. У wәʹде ԛӧльхкьрьне дьбәкә проблемед wан жи һәбунә, у бәр чәтьнайа жи тәйах кьрьнә. Йед ӧса дькарьн али тә бькьн, сәва кӧ жийина лапә баш бьжбери. Чахе тӧ тʹәви wан мәрьва wәʹдә дәрбаз ки, әwана wе бькарьбьн али тә бькьн, кӧ сафикьрьнед рʹаст бьки у чаwа Мәсиһи рʹӧһʹанида мәзьн би (Ибрн. 5:14). w15 1/9 1:​14, 15

Иса бь хәбәрдана хwә у кьред хwә али шагьртед хwә дькьр, кӧ әwана баwәрийа хwә ԛәwи кьн (Марԛ. 11:20-24). Әм жи гәрәке чʹәʹв бьдьнә Иса. Чахе әм ӧса бькьн, әме һьн баwәрийа хwә у һьн жи баwәрийа мәрьвед дьн ԛәwи кьн (Мәтʹлк. 11:25). Тӧ ча дькари али мәрьвед дь територийа хwәда бьки? Чахе тӧ мәрьва Кʹьтеба Пироз һин дьки, дина wан бьдә сәр wан избаткьрьна кӧ Хwәде һәйә, кӧ әw бона мә хәм дькә у кӧ Кʹьтеба Пироз Хәбәра Хwәде йә. Ле ча тӧ дькари али хушк у бьра бьки, сәва кӧ әwана баwәрийа хwә ԛәwи хwәй кьн? Һәрге тә бьһист, кӧ кәсәк сәр мәрьвед щабдар дькә кӧтә-кӧт, ләз нәкʹәвә wи мәрьви сущдар ки. Бь тактики али wи бькә, кӧ әw баwәрийа хwә ԛәwи кә (Щьһуд. 22, 23). Һәрге тӧ мәкʹтәбеда һин дьби у дәрсдаре тә дәрһәԛа евалусийайе хәбәр дьдә, мерхас бә у дәрһәԛа баwәрийа хwә һьндава әʹфьрандьне гьли кә. Чахе тӧ гьли ки, дьбәк тә әʹщебмайи кә реаксийа дәрсдар у йа wан, йед тʹәви тә һин дьбьн. Йаһоwа али мә һәр кәси дькә, кӧ баwәрийа мә ԛәwи бьминә (1 Пәт. 5:10). Рʹаст ә ԛәwат лазьм ә кӧ баwәрийа хwә ԛәwи кьн, ле Йаһоwа wе мә хәлат кә һәрге әм ԛәwате хәрщ кьн сәва wе йәке. w15 1/9 3:​20, 21

Иро Йаһоwа дәрһәԛа хwә, ԛьрара хwә, әʹфринед хwә, у Хәбәра хwә, гәләк тьшт мә һин дькә. Әв дьнйа мәрьва һелан дькә кӧ һинбуне бьстиньн, ле чахе мәрьв хwәндьна бьльнд дьстиньн, гәләк щар дьԛәwьмә әwана һʹьзкьрьна хwә һьндава Хwәде ӧнда дькьн. Ле Йаһоwа дьхwазә wәки әм нә кӧ тʹәне занәбуне бьстиньн, ле әw ӧса жи али мә дькә кӧ әм билан бьн. Әw дьхwазә кӧ чь кӧ әм һин дьбьн бона кʹара хwә бьдьнә хәбате у али мәрьвед дьн жи бькьн (Мәтʹәлок 4:5-7). Мәсәлә, әw дьхwазә кӧ әм мәрьварʹа даннасин кьн кӧ «рʹастийе нас кьн» у али wан бькьн сәва кӧ әwана хьлаз бьн (1 Тимотʹейо 2:4). Әм һʹьзкьрьна хwә Йаһоwарʹа у мәрьварʹа әʹйан дькьн, чахе чьԛас дькарьн мәрьва һин дькьн дәрһәԛа Пʹадшатийа Хwәде у чь кӧ әw wе бона инсанәте бькә (Зәб. 66:16, 17). w15 1/9 5:​10, 11

Wәрә әм бьфькьрьн сәр мәсәла Елйас, у дина хwә бьдьнә сәр пенщ дәрәща, кʹидәре кӧ Елйас баwәрийа хwәйә ԛәwи һьндава Йаһоwа әʹйан кьр. 1) Чахе Елйас готә Пʹадша Аһаб кӧ Йаһоwа wе әʹрде һʹьшк кә, әwи бь баwәри гот: «Бона мафе Хwәдайе Исраел, Хӧдане кӧ зьнди йә, йе әз ль бәр сәкьнимә, һʹәта кӧ готьна мьн һәбә, wе дь ван саланда хӧнав у баран нәкʹәвә!» (1 Пʹадш. 17:1). 2) Елйас баwәр дькьр, кӧ wәʹде ве хәзәбе Йаһоwа wе бона һʹәwщед wи у мәрьвед дьн хәм бькә (1 Пʹадш. 17:4, 5, 13, 14). 3) Елйас ӧса жи баwәр бу, кӧ Йаһоwа дькарә кӧрʹе жьнәбийе сах кә (1 Пʹадш. 17:21). 4) Елйас ӧса жи дӧдьли нәдьбу, кӧ жь Йаһоwа wе агьр бе у ԛӧрбана wи һʹуфи хwә кә (1 Пʹадш. 18:24, 37). 5) Һʹәта кӧ баран бьбарийа, Елйас бь баwәрийа ԛәwи готә Аһаб: «Дәркʹәвә бьхwә у вәхwә; жь бәр кӧ дәнге зедәйийа баране һәйә» (1 Пʹадш. 18:41). Паши ве мәсәла Елйас, әм дькарьн пьрсе бьдьнә хwә: «Гәло баwәрийа мьн жи ӧса ԛәwи йә, чаwа йа Елйас?» w15 1/10 2:​4, 5

Фәрәсәте мә кӧ әм дькарьн зьман бьдьнә хәбате рʹасти жи пʹешкʹеша жь Йаһоwа йә (Зәб. 139:14; Әʹйан. 4:11). Йаһоwа пʹешкʹешәкә дьн жи дайә мә, кʹижан кӧ мә жь һәйwана щӧдә дькә. Йаһоwа мәрьв «дьлԛе хwәда хӧльԛанд». Азайа мәйә бьжартьне һәйә, у әм дькарьн зьман ӧса бьдьнә хәбате, сәва кӧ Йаһоwарʹа хьзмәт кьн у wи рʹумәт кьн (Дәстп. 1:27). Йаһоwа Кʹьтеба Пироз дайә мә у бь ве мәрʹа әʹйан кьрийә, кӧ әм ча wирʹа хьзмәт кьн у ча wи рʹумәт кьн. Кʹьтеба Пироз йа тʹәмам йан пʹарәкә wе, сәр 2 800 зьмана зедәтьр дәстдькʹәвә. Чахе әм сәр Кʹьтеба Пироз дьфькьрьн, әм дәстпедькьн ӧса бьфькьрьн чаwа Йаһоwа (Зәб. 40:5; 92:5; 139:17). У әw фькьред Йаһоwа мә билан дькьн у мә бәрбь жийина һʹәта-һʹәтайе дьбьн (2 Тимтʹ. 3:14-17). Фькьрандьн әw ә, чахе дина хwә дьдьнә сәр тьштәки у кʹур дьшьрмиш дьбьн сәр ве йәке (Зәб. 77:12; Мәтʹлк. 24:1, 2). Чахе әм дьфькьрьн сәр ве йәке кӧ әм чь пеһʹәсийан дәрһәԛа Йаһоwа у Иса, әв йәк кʹарәкә мәзьн мәрʹа тинә (Йуһʹн. 17:3). w15 1/10 4:​2-4

Иса шагьртед хwәрʹа дьгот кӧ әwана мьлук у хwәһʹьз нибьн, у һьн жи әw хwәха ӧса бу (Луԛа 22:27). Шагьртед wи дьдитьн кӧ әw гәләк тьшт ԛӧрбан дькә бона Йаһоwарʹа ԛӧльх кә у али мәрьва бькә. Шагьртед wи жи һин бун кӧ ӧса бькьн. Һун жи дькарьн бь кьре хwә зарʹед хwә һин кьн. Деби кӧ дӧ зарʹед wе һәнә дьбежә: «Мьн тʹӧ щар дәхәси нәдькьр кӧ мере мьн бона йед дьн wәʹдә хәрщ дькә, чьмки әw рʹуспи йә. Мьн заньбу кӧ малбәта мәрʹа һәма ча аликʹарийа мере мьн лазьм бә, әw wе али мә бькә». Чаwа Деби у мере wе Прана, бь кьре хwә дәрс сәва зарʹед хwә һиштьн? Прана дьбежә кӧ зарʹед wи тʹьме һазьр бун у дьхwәстьн кӧ wәʹде щьватед мәзьн аликарийе бьдьн. Әwана бәхтәwар бун, һәвалед баш хwәрʹа дьжбартьн у дьхwәстьн кӧ тʹьме тʹәви хушк у бьра бьн. Ньһа малбәта wанда гьшк ча ԛӧльхкʹаред һәртʹьм хьзмәт дькьн. Де-бавно, һәрге һун мьлук ьн у хwәһʹьз ниньн, бь ве йәке һун зарʹед хwә һин дькьн, кӧ тʹьме һазьр бьн у бьхwазьн али йед дьн бькьн. w15 1/11 1:9

Йаһоwа һʹьзкьрьна хwә бь щурʹә-щурʹә әʹйан кьр. Бьфькьрьн дәрһәԛа мәзьнбун у бәдәwбуна гәрдуна мә. Әw бь милйарда галактика йә, у дь һәр галактикәкеда бь милйарда стәйрк у планет һәнә. Дь галактика мәда, йәк жь стәйрка әw һәйә тәʹв. Бе тәʹв жийин сәр әʹрде wе тʹӧнә буйа. Һʹәму әw әʹфьрин әʹйан дькьн Йаһоwа чаwа Әʹфьрандаре мә, у дьдьнә кʹьфше һӧнӧред wи, мәсәлә ԛәwат, билани, у һʹьзкьрьна wи. Йаһоwа әʹрд чекьр хут бона жийине. Һʹәму тьшт чь кӧ сәр әʹрде йә кʹаре тинә һʹәйwанарʹа у мәрьварʹа. Хwәде бахчеки бәдәw чекьр бона мәрьва, у һьш у бәдәна беԛьсур да wан, сәва кӧ әwана һʹәта-һʹәтайе бьжин (Әʹйан. 4:11). У һе зедә, «йе кӧ хwарьне дьдә һʹәму щанан әw ә, кʹәрәма wи һәр у һәр ә» (Зәб. 136:25, ИМ). w15 1/11 3:​7, 8

Пʹадше мә мәрʹа һащәт дайә, кʹижан кӧ әм дькарьн бьдьнә хәбате сәва кӧ али мәрьва бькьн кӧ мьзгине ԛәбул кьн. Һьнә һащәт кӧ мә да хәбате тʹәне wәʹдәки кьн керһати бун, ле һьнәк жи һʹәта иро жи әм дьдьнә хәбате. Ле әw һʹәму һащәт али мә кьрьнә кӧ бәлакьрьна мьзгинеда пешда һәрʹьн. Сала 1933, мә дәстпекьр бьдьн хәбате бәлге пешанине, һащәт кʹижан кӧ али гәләка кьр кӧ дәстпекьн мьзгине бәла кьн. Әw бәлг бьчʹук бу, у теда ньвисар бу текстәкә һеса у кьн дәрһәԛа мьзгина жь Кʹьтеба Пироз. Бәлге пешанине щурʹә-щурʹә тьштада али мьзгинвана кьр. Мәсәлә, һьнә мьзгинвана гәләк дьхwәстьн мьзгине бәла кьн, ле wана шәрм дькьрьн, у ньзаньбун чь хәбәрдьн wәʹде хьзмәтийе. Һьнә мьзгинванед дьн жи гәләк мерхас бун, у wана чь кӧ заньбун нава чәнд дәԛада гьли дькьрьн хwәйе малерʹа. Ле чь кӧ wана дьгот тʹьме бь тактики нибу. Әw бәлге пешанине али һʹәму мьзгинвана кьр кӧ зәлал у һеса мьзгине дәрбази мәрьва кьн. w15 1/11 5:​3-6

Гәләк рʹез жь Кʹьтеба Пироз дьдьнә кʹьфше, кӧ наве Хwәде фәрз ә у гәрәке наве wи рʹумәт кьн (Дәркʹ. 3:15; Зәб. 83:18; Иша. 42:8; 43:10; Йуһʹн. 17:6, 26; Кʹар. Шанд. 15:14). Йаһоwа рʹебәрийа ньвискʹаред Кʹьтеба Пироз кьр, сәва кӧ әwана наве wи бь һʹәзара щар бьдьнә хәбате (Һәзԛл. 38:23). У ләма чахе wәлгәр наве Хwәде нәньвисин, бь wе йәке әwана ԛәдьре наве Йаһоwа нагьрьн. Иро һе зедә избаткьрьн һәйә сәва ве йәке, кӧ фәрз ә әм наве Йаһоwа бьдьнә хәбате. «Wәлгәрандьна Дьнйа Тʹәзә» йа тʹәзәкьрида сала 2013, наве Хwәде 7 216 щар һатә хәбьтандьне. Демәк жь дәрхьстьна пешийа wе, шәш щара зедә. Пенщ жь wана һатьнә зедәкьрьне, чьмки наве Хwәде һәбу дь кʹьтебед Гӧломәтккьрида йа Бәʹра Мьри, кӧ wан пашwәхтийада һатә дитьне. Әw пенщ щар ньвисар ьн дь ван щийада, 1 Самуйел 2:25; 6:3; 10:26; 23:14, 16-да. Йа шәша дь Һакьмти 19:18-да һатә зедәкьрьне жь бо ве йәке, кӧ манускриптед кәвьн йа Кʹьтеба Пироз һе кур һатьнә леколинкьрьне. w15 1/12 2:​5, 6

Әм ида ньһа гәрәке һʹьзкьрьна хwә һьндава хушк-бьра ԛәwи кьн, чьмки әw йәк wе али мә бькә wәʹде щерʹьбандьн у чәтьнайед ахьрийеда. Һәла һе ньһа жи, пешийа дәстпебуна тәнгасийа мәзьн, һʹьзкьрьна бьрати мәрʹа гәләк лазьм ә. Гәләк жь хушк-бьред мә зийан стандьнә жь бо әʹрдһәжа, селава, фьртона, тсунамийа, у жь бо хәзәбед дьн. Һьнәк жи, тәйах дькьн бәр зерандьна у пәйкʹәтьна (Мәт. 24:6-9). Хенщи wан тьшта, әм гьшк жи һәр рʹож рʹасти проблемед економи тен, демәк пʹәрава гьредайи, чьмки әм дьжин дь ве дьнйа хьрабда (Әʹйан. 6:5, 6). Рʹаст ә проблемед ӧса зедә дьбьн, ле wәрә әм һе зедә бьдьнә кʹьфше һʹьзкьрьна хwә һьндава хушк-бьра. Бәле, «һʹьзкьрьна гәләка wе сар бә», ле һьзкьрьна мәйә бьрати гәрәке тʹьме һәбә (Мәт. 24:12). w16.01 1:​8, 9