Илон

Бьраһим пешийа кӧ жь хӧламед хwә бьԛәтийа, wанрʹа гот: «Һун кʹәрева ль вьр бьминьн, әз у кӧрʹьква һʹәта дәра һан һәрʹьн, һʹәбандьна хwә бькьн у диса ль сәр wәда вәгәрʹьн» (Дәстп. 22:5). Бь ве йәкә Бьраһим чь дьхwәст бьгота? Гәло Бьраһим хӧламед хwә дьхапанд чахе дьгот, кӧ әме сәр wәда вәгәрʹьн, нә ахьр әwи кӧрʹе хwә дьбьр кӧ бькә ԛӧрбан? На. Кʹьтеба Пироз дьбежә кӧ Бьраһим дәрһәԛа чь дьфькьри (Ибрн. 11:19). Кʹьтеба Пирозда те готьне кӧ «Бьраһим дьле хwәда дьгот, кӧ Хwәде дькарә Исһаԛ жь мьрьне жи рʹакә». Бәле, Бьраһим баwәр дькьр кӧ Хwәде дькарә мьри сах кә. Әwи заньбу кӧ әw у Сәра әʹмьрда гәләк мәзьн бун, ле Йаһоwа бь ԛәwата хwә ӧса кьр кӧ wирʹа кӧрʹ һатә буйине (Ибрн. 11:11, 12, 18). Бьраһим фәʹм дькьр кӧ бона Йаһоwа тьштәки чәтьн тʹӧнә. Әw баwәр бу кӧ wе рʹоже чь жи бьԛәwьмә, йәкә кӧрʹе wийи һʹьзкьри wе сах бә, чьмки ӧса һʹәму созед Йаһоwа wе бьһатана сери. Ләма Бьраһим һатә навкьрьне «баве һʹәму баwәрмәндед»! (Рʹом. 4:11) w16.02 1:​3, 13

Йаһоwа Шаwул бьжарт кӧ бьбә пʹадша. Чахе Шаwул ида гӧрʹа Хwәде нәдькьр, Йаһоwа әw инкʹар кьр (1 Сам. 15:17-23). Ле йәкә Йаһоwа дәрбера wи жь тʹәхт дур нәхьст. Ле щьмәʹт дьһатә щерʹьбандьне, кӧ һәла wе Хwәдерʹа амьн бьминьн йан на, чьмки пʹадша кӧ сәр «тʹәхта Хӧдан» рʹуньшти йә, жь рʹийа рʹаст дәркʹәт (1 Дир. 29:23). Ле кӧрʹе Шаwул, Йонатʹан Йаһоwарʹа амьн ма. Әм жи дькарьн мина Йонатʹан амьнийа хwә Йаһоwарʹа избат кьн. Мәсәлә, ԛәдьре wан бьгьрьн һӧкӧмәтийа кʹижана кӧ һәйә, һәла һе һәрге жи әм дьфькьрьн кӧ әwана һежайи ве йәке ниньн. Чьмки Хwәде әwе йәке жь мә дәʹwа дькә. Мәсәлә һәрге кәсәк дәwләтеда мәрьвәки хьраб ә, йәкә әм ԛәдьре һӧкӧмәтийа wи дьгьрьн, чьмки әм гәрәке гӧрʹа wанда бьн (Рʹом. 13:1, 2). Бь рʹастийе, һәр кәс жь мә дькарә амьнийа хwә бь wе йәке Йаһоwарʹа избат кә, кӧ ԛәдьре wан бьгьрә кʹижанарʹа Йаһоwа һӧкӧмәти дайә (1 Корн. 11:3; Ибрн. 13:17). w16.02 3:​5, 6, 8

Кʹьтеба Пирозда те готьне кӧ щьмәʹта Хwәде, демәк йед щаһьл жи, wе бь рʹәзәдьли бьхwазьн wирʹа хьзмәт кьн (Зәб. 110:3). Ләма әwе кӧ дьхwазә бе ньхӧмандьне гәрәке баwәр бә, кӧ әw хwәстьна wийә шәхси йә. Чьмки дьбәкә тӧ нава рʹастийеда һати мәзьнкьрьне, ләма лазьм ә хwә кʹур бьщерʹьбини, һәла әw хwәстьна тә йә кӧ бейи ньхӧмандьне. Нава салада дьбәкә тә дитийә кӧ гәләк мәрьв һатьнә ньхӧмандьне, у нава wанда дьбәкә һәвал йан хушк-бьред тәйи һәлал бун. Һәрге ӧса йә, тӧ гәрәке фәсал би. Тӧ гәрәке бьфькьри, гәло тӧ дьхwази бейи ньхӧмандьн сәва ве йәке, чьмки щаһьлед дьн wи әʹмьрида тенә ньхӧмандьн. Тӧ ча дькари баwәр би кӧ сәр ньхӧмандьне ӧса дьньһерʹи ча Йаһоwа дьньһерʹә? Wәʹдә хwәрʹа бьвинә кӧ бьсәкьни у бьфькьри дәрһәԛа ве йәке, кӧ чьрʹа ньхӧмандьн ӧса фәрз ә. w16.03 1:​11, 12

Чаwа әндәмед щьвата Мәсиһити, әм ча дькарьн һе пешда һәрʹьн у әве тʹәглифе бәла кьн? Әме бькарьбьн пешда һәрʹьн, һәрге йәктийе хwәй кьн у щьватеда һәвкʹарийе бькьн (Әфәс. 4:16). Сәва кӧ чьԛас дькарьн гәләкарʹа мьзгине бәла кьн, әм гәрәке пешда хwә һазьр кьн бона хьзмәткьрьне. Ве йәкеда али мә дькьн рʹебәрийед кӧ әм щьвата хwәда дьстиньн. Паши щьвата даннасинкьрьне, әм дьчьнә хьзмәткьрьне у мәрьварʹа гьли дькьн дәрһәԛа мьзгина Падшатийе. Әм ӧса жи wанрʹа бәла дькьн әʹдәбйәтед сәр һʹиме Кʹьтеба Пироз. Щара рʹебәрийе дьдьнә мә кӧ кампанйед хьзмәткьрьнеда кʹар бькьн. Чахе һун кʹар дькьн wан кампанйада, бь ве йәке һун йәктийеда ньн тʹәви милйона хушк у бьра, йед кӧ әве мьзгине бәла дькьн. Һьн жи, һун һәвкʹарийе дькьн тʹәви мьлйакʹәта, йед кӧ али щьмәʹта Хwәде дькьн бәлакьрьна мьзгинеда (Әʹйан. 14:6). w16.03 3:​4, 5

Щьмәʹта Исраелрʹа лазьм бун рʹебәрийед тʹәзә, у Хwәде wанрʹа бь Муса Ԛанун да. Wәʹдә дәрбаз бу, щьвата Мәсиһирʹа рʹебәри һатә дайине кӧ пе «ԛануна Мәсиһ» бьжитана. Ӧса жи бона жийина дьнйа тʹәзәда, әме рʹебәрийед тʹәзә бьстиньн. Кʹьтеба Пироз мәрʹа әʹйан дькә кӧ дьнйа тʹәзәда «кʹьтеб» wе вәбьн, бь кʹижана әме рʹебәрийед тʹәзә бьстиньн. У һʹәму мәрьв, ӧса жи йед кӧ wе сах бьн, wе әwан кʹьтеба һин бьн, у бькарьбьн пебьһʹәсьн кӧ ԛьрара Хwәде һьндава wан чь йә. Бь wан кʹьтеба дьбәкә әме һе зәʹф пебьһʹәсьн дәрһәԛа Йаһоwа у фькьред wи. Ӧса жи, әме һе рʹьнд Кʹьтеба Пироз фәʹм кьн. Хенщи ве йәке, щьнәтеда һʹәмушк wе һьндава һәвдӧда бь һʹьзкьрьн у бь ԛәдьр бьн (Иша. 26:9). Һәла бьдьнә бәр чʹәʹве хwә, чахе бьн рʹебәрийа Пʹадша Иса Мәсиһда, әме чьԛас гәләк тьшт пебьһʹәсьн, у һьн жи йед дьн һин кьн! Һәрге әм пәй wан рʹебәрийа һәрʹьн кӧ wан «кʹьтебада» ньвисар ьн, у ӧса жи wәʹде щерʹьбандьна хьлазийе Йаһоwарʹа амьн бьминьн, әw wе әʹсә наве мә «кʹьтеба жийинеда» бьньвисә. Демәк әме әʹмьре һʹәта-һʹәтайе бьстиньн. Жь ве четьр чь дькарә һәбә. w16.03 4:​19, 20

Рʹуспийед щерʹьбанди дьбежьн, кӧ фәрз ә бьра бенә һинкьрьне чахе һе щаһьл ьн. Рʹуспи дькарә һьнә шьхӧл бьдә, анәгори сале wан. Һәрге бьра щаһьлтийа хwәда тенә һинкьрьне, әw йәк дькарә али wан бькә. Ле ча? Чахе әwана мәзьн бьн жи, wе һʹьш-аԛьле хwә бьдьнә сәр нетед хwә, һәла һе щерʹьбандьнада жи (Зәб. 71:17). Сәва кӧ шагьрт һелан кьн ԛӧльх бькә, рʹуспи гәрәке нә кӧ тʹәне жерʹа бежә чь бькә, ле һе зедә. Ӧса жи, рʹуспи гәрәке шьровәкә, wәки чьрʹа фәрз ә әwи шьхӧли бькьн. Wи щурʹәйи, рʹуспи wе чʹәʹв бьдьн Иса. Мамостайе Лапи Мәзьн, демәк Иса, готә шагьртед хwә wәки әwана даннасин кьн. Ле бәре әʹwльн, әwи wанрʹа шьровәкьр кӧ чьрʹа әwана гәрәке гӧрʹа wи бькьн. Әwи гот: «Һʹәму һʹӧкӧме әʹрд у әʹзмен мьнрʹа һатә дайине. Ньһа һәрʹьн һʹәму мьләта һин кьн у wана бь наве Бав, Кӧрʹ у рʹӧһʹе пироз бьньхӧминьн» (Мәт. 28:18, 19). w15 1/4 2:​5, 6

Бона мәсиһийе дь ԛьрʹна йәкеда Рʹомеда, әw wәʹдәки хоф бу. Рʹомайи бь зӧлми пәй Мәсиһийа дькʹәтьн у шәрʹ авитьнә мәсиһийа. Wан wәʹде гәләк чәтьнда, Паwлосе шанди кʹәтә кәле. Дьбәк әw дьшьрмиш дьбу кӧ гәло бьред wийә Мәсиһи wе бенә һәwара wи, чьмки һатә бира wи кӧ бәре тʹӧ кәси али wи нәкьр (2 Тимтʹ. 4:16). Ле әwи баwәр дькьр, wәки Йаһоwа wе ԛәwате бьдә wи, чь кӧ wирʹа лазьм ә сәва тәйах кә wе дәрәщеда ӧса жи дәрәщед ахьрийейә чәтьнда. Әwи ӧса ԛайим баwәр дькьр, кӧ ньвиси: «Хӧдан wе мьн жь һәр кьред хьраб хьлаз кә» (2 Тимтʹ. 4:18). Паwлос һин бьбу кӧ чахе бьред wи нькарьбун али wи бькьрана, әwи дькарьбу итʹбарийа хwә Йаһоwа у Иса бинә, wәки wе али wи бькьн. Wе йәкеда әw тʹӧ щар дӧдьли нәдьбу. w15 1/4 4:​1-3

Чахе Иса һатә буйине, Шәйтʹан заньбу wәки әw зарʹок wе мәзьн бә у бьбә Мәсиһийе создайи. Гәло Шәйтʹан дьшьрмиш дьбу wәки кӧштьна зарʹе зӧлми йә? На. Ԛә тʹалаша wи жи нинә, кӧ чь рʹаст ә у чь нәрʹаст ә. Әwи дәрберʹа дәстпекьр бьхәбьтә, wәки зарʹа бьчʹук, демәк Иса бькӧжә. Ле чаwа? Чахе пʹадша Һеродәс жь стәйрнаса бьһист wәки «пʹадше» Щьһуйа һатә буйине, әw гәләк һерскʹәт у хwаст зарʹок бькӧжә (Мәт. 2:1-3, 13). Ләма, әwи фәрман да wәки ль Бәйтʹләһме у дор-бәре wе һʹәму зарʹед кӧрʹин, йед дӧ сали у жь wан бьчʹуктьр, бькӧжьн (Мәт. 2:13-18). Иса жь ве кӧштьна зӧлми хьлаз бу. Ле әw йәк дәрһәԛа дьжмьне мә Шәйтʹан чь әʹйан дькә? Шәйтʹан әʹмьре мәрьва ԛимәт накә. Һәла һе дәрһәԛа зарʹа жи тʹалаша wи нинә (1 Пәт. 5:8). Әw рʹасти жи «шер» ә кӧ мьрʹә-мьрʹа wи йә. Тʹӧ щар бир нәкьн, wәки әw йәки ча зӧлм ә! w15 1/5 1:​10, 12, 13

Йаһоwа пʹешкʹешәкә гәләк баш дайә мә. Әw һәйә әw фәрәсәт, кӧ әм дькарьн wан тьшта бьдьн бәр чʹәʹве хwә чь кӧ мә нәдитийә. Әw фәрәсәт али мә дькә wәки һивийа тьштед баш бьн ахьрийеда, у ӧса жи пешда сафикьрьна бькьн у жь проблема бьрʹәвьн. Йаһоwа ахьрийе занә, у әw мәрʹа гьли дькә дәрһәԛа һьнә тьштед кӧ ахьрийе wе бьԛәwьмьн. Рʹаст ә әм нькарьн wан тьшта бьвиньн, ле әм дькарьн бьдьнә бәр чʹәʹве хwә у баwәр кьн, кӧ әwана wе әʹсә бьԛәwьмьн (2 Кор. 4:18). Дийа Самуйел, Һаннайе, тʹьме дьшьрмиш дьбу дәрһәԛа wе рʹоже, чахе кӧрʹе хwә бинә ль кон, wәки тʹәви кʹәшиша ԛӧльх бькә. Әwе нә кӧ дьда бәр чʹәʹве хwә тьштәки кӧ wе нәԛәwьмә, әwе сафи кьрьбу кӧ wе ӧса жи бькә. Һаннайе чахе әв рʹож дьда бәр чʹәʹве хwә, ԛәwат дьстанд, wәки созе хwәйи кӧ дабу Йаһоwа, хwәй кә (1 Сам. 1:22). Һәрге әм созед Йаһоwа дьдьнә бәр чʹәʹве хwә, демәк әм сәр wан тьшта дьфькьрьн, кʹижан кӧ wе әʹсә бьԛәwьмьн (2 Пәт. 1:19-21). Бешьк дькарьн бежьн кӧ гәләк хьзмәткʹаред Йаһоwайә бәре жи, дьданә бәр чʹәʹве хwә чь кӧ Хwәде соз дабу wан. w15 1/5 3:​1-3

Кʹьтеба Пироз мәрʹа дьбежә, кӧ әм гәрәке дина хwә бьдьнә wе йәке, кӧ ча дьле Йаһоwа ша кьн, нә кӧ дьшьрмиш бьн кӧ ча дәwләти бьн. Иса гот wәки мәрьве кӧ хwәрʹа хьзне тʹоп дькә, ле Хwәде данайнә щийе пешийе әʹмьре хwәда, әw мәрьв беаԛьл ә. Әw мәрьв «дь чʹәʹве Хwәдеда нә дәwләмәнд ә» (Луԛа 12:16-21, ИМ). Чахе әм «хьзне хwәрʹа ль әʹзмен» тʹоп дькьн, бь кьред дьле Йаһоwа хwәш те, әw гәләк ша дьбә, у әм жи бәхтәwар ьн (Мәт. 6:20; Мәтʹлк. 27:11). Демәк, һәләԛәтийа баш тʹәви Йаһоwа һе гәләк ԛимәт ә, нә кӧ тьштәки дьн. Һәрге әм дьхwазьн ве дьнеда дәwләти бьн, wе гәләк хәмед мә һәбьн (Мәт. 6:19). Иса гот, кӧ wанарʹа wе чәтьн бә, йед кӧ тʹьме дәрһәԛа пʹәра хәм дькьн, Пʹадшатийа Хwәде дайньн щийе пешьн әʹмьре хwәда (Мәт. 13:18, 19, 22). w15 1/5 4:​15, 16

Бь ԛәwата Хwәде Иса дькарьбу гәләк кʹәрәмәтед мәзьн бькә. Әwи нә кӧ тʹәне кʹоти ԛәнщ дькьр, ле диса щурʹә-щурʹә нәхwәши. Рʹожа иройин гәләк һʹәким, сәва кӧ нәхwәша ԛәнщ кьн, органед мәрьве майин дькьнә дәwса органед мәрьве нәхwәш. Ле ԛәwата Иса дьгьһиште, кӧ хут орган йан щийе нәхwәш ԛәнщ кә. Һьн жи әwи дәрберʹа мәрьв ԛәнщ дькьрьн у һәла һе йед кӧ жь wи дур бун жи (Йуһʹн. 4:46-54). Әw йәк мәрʹа чь әʹйан дькә? Әw әʹйан дькә, кӧ ԛәwат у хwәстьна Иса һәйә, wәки һʹәму нәхwәшийа кʹӧта кә. У чахе әм педьһʹәсьн кӧ Иса һьндава мәрьва чаwа бу, әw йәк гӧмане дьдә мә, wәки дьнйа тʹәзәда әw wе али кʹәсиб у һесирʹа бькә (Зәб. 72:13). Wи чахи Иса wе һʹәму нәхwәша ԛәнщ кә, чьмки әw бь рʹастийе дьхwазә әwе йәке бькә. w15 1/6 2:6

Гәләк мәрьв әзбәри заньн дӧа, кʹижан ньвисар ә Мәтта 6:9-13-да. Чахе әм даннасин дькьн, әм хәбәред жь ви дӧайи дьдьнә хәбате. Мәсәлә, әм мәрьва һин дькьн кӧ Пʹадшати әw һәйә сәрwертийа Хwәдейә реали, кʹижан кӧ wе ахьрийеда әʹрде бькә щьнәт. Әм ӧса жи, жь wи дӧайи дьдьнә хәбате әwан гьлийа «наве тә пироз бә», wәки мәрьварʹа әʹйан кьн кӧ наве Хwәде һәйә, у кӧ әw нав бона мә гәрәке пироз бә (Мәт. 6:9). Гәләк мәрьв әwи дӧайи тʹьме дьwәкʹьлиньн. Ле гәло Иса дьхwәст wәки әм һәртʹьм чахе дӧа дькьн, бьwәкʹьлиньн әw дӧайе wи? На. Әwи гот: «Гава кӧ һун дӧа дькьн, гьлийа диса у диса нәwәкʹьлиньн» (Мәт. 6:7, ДТʹ). Щарәкә дьн жи, чахе Иса шагьртед хwә һин дькьр кӧ чаwа дӧа бькьн, әwи әw дӧакьрьн wәкʹьланд, ле бь хәбәред дьн (Луԛа 11:1-4). Демәк, Иса әw дӧа мәрʹа чаwа мәсәлә дайә, wәки әм һин бьн, кӧ дәрһәԛа чь гәрәке дӧа бькьн. w15 1/6 4:​1, 2

Йаһоwа рʹӧʹһе хwәйи пироз дьдә мә, wәки али мә бькә кӧ әм нәкʹәвьнә тʹәлькед Шәйтʹан. Әw бь Кʹьтеба Пироз у щьвата, пешда әʹлами мә дькә дәрһәԛа тʹәлькед Шәйтʹан. Мәсәлә, әw пешда дьбежә кӧ әм гәрәке гәләк wәʹдә, пʹәрә у ԛәwата хwә хәрщ нәкьн, сәр тьштед кӧ мәрʹа бь рʹастийе нә лазьм ьн. Еспен у Йана чаwа пешәнг хьзмәт дькьрьн у ньһа дӧ зарʹед wан һәнә. Еспен дьбежә: «Әм тʹьме Йаһоwарʹа дӧа дькьн, wәки нәкʹәвьнә щерʹьбандьне, чьмки әм ньһа һаԛас wәʹдә хәрщ накьн, чаwа кӧ бәре мә сәр шьхӧле даннасинкьрьне хәрщ дькьр. Ләма әм жь Йаһоwа һиви дькьн, кӧ али мә бькә, сәва әм рʹӧʹһанийа хwә хwәй кьн у даннасинкьрьнеда хирәт бьн». Тʹәлькәкә дьн, жь кʹижани әм гәрәке бьрʹәвьн әw һәйә порнографиа. Һьнәк кʹәтьнә тʹәлька порнографиайе, чьмки wана дәрберʹа фькьред нәрʹаст жь сәре хwә дәрнәхьстьн. Ле гәләк хушк-бьред мә, хwә жь ве тʹәльке хwәй кьрьнә у әм жи дькарьн хwә хwәй кьн (1 Корн. 10:13). w15 1/6 5:​15, 16

Чь wе бьԛәwьмә паши кʹӧтакьрьна религийа ԛәлп? Wи wәʹдәйи wе әʹйан бә, һәла бь рʹастийе дьле мәда чь йә. Wи чахи, гәләк мәрьв wе жь «ԛәйед чʹийада», демәк жь тʹәшкиләтед мәрьва, хьлазкьрьне у аликʹарийе бьгәрʹьн. Ле щьмәʹта Йаһоwа wе гӧмана хwә бьдә сәр wи, кӧ әw wе wана хьлаз кә. Чахе ԛьрʹна йәкеда һʹӧщӧмкьрьна сәр Оршәлиме «кьн» бу, һьнге әw wәʹдә нә бона һʹәму Щьһуйа бу, wәки әwана ньшкева бьбуна Мәсиһи. Ле әw wәʹдә бона Мәсиһийа бу, сәва кӧ әwана жь Оршәлиме бьрʹәвьн, чаwа кӧ Иса тʹәми да wан. Ахьрийеда жи wе ӧса бьбә. Чахе һʹӧщӧмкьрьна Бабилона мәзьн «кьн» бә, әм гәрәке һивийе нибьн кӧ гәләк мәрьв ньшкева бьбьнә Мәсиһийед рʹаст. Дәwса wе йәке әw wәʹдә, wе мәщал бә бона ԛӧльхкʹаред рʹаст, сәва кӧ әwана избат кьн һʹьзкьрьна хwә һьндава Йаһоwа у али рʹункьрийа бькьн (Мәт. 25:34-40). w15 1/7 2:7

Әм гьшк заньн кӧ ԛӧльхкʹаред Йаһоwа чаwа щьмәʹтәкә йәктийеда нә, ләма жи әм гәрәке тӧ щар ӧса нәфькьрьн кӧ щик йан жи wәлатәк жь щи йан wәлате дьн баштьр ә. Ле нәфәред мала тә йан кәсәки дьн, дькарьн һелана бьдьнә тә кӧ тӧ борщдари һʹьз бьки wи щийи кʹидәре тӧ һати буйине. Ләма жи дьԛәwьмә щара тӧ сәр мәрьвед жь мьләт, култура йан зьмане дьн, нәбаш бьфькьри. Ле чь дькарә али тә бькә кӧ ньһерʹандьна хwә бьгӧһези? Бьфькьрә сәр wе йәке, кӧ чаwа Йаһоwа дьньһерʹә сәр wан кʹе ԛӧрʹә дьбә жь бо wәлате хwә, йан жи кʹе дьфькьрә кӧ әw һе баш ә, нә кӧ кәсед дьн. Һе зедә леколин бькә дәрһәԛа ве пьрсе. У паше жь Йаһоwа һиви кә, сәва кӧ тӧ бь ньһерʹандьна wи, сәр мәрьва бьньһерʹи (Рʹом. 12:2). Әм дьхwазьн бь исафа тʹәмьз Йаһоwарʹа ԛӧльх бькьн. Ләма жи щара әм дькарьн жь мәрьвед дьн гәләк щӧдә бьн у бькʹәвьнә чʹәʹва, мәсәлә тʹәви кʹе әм дьхәбьтьн йан һин дьбьн, йан жи жь щинаред хwә, йан жь мәрьвед мәйи незик. w15 1/7 3:​14, 15

Йаһоwа дӧа-дьрозгед мәйә бь дьл дьбьһе. Һьн жи чахе тʹӧ кәс нькарә мә фәʹм кә, ле Йаһоwа мә фәʹм дькә. Щабед wи сәр дӧакьрьнед мә избат дькьн, кӧ һʹьзкьрьна wи һьндава мә кʹӧта набә. Әм дькарьн гәләк тьшт һин бьн жь дӧа, кʹижан кӧ дь Кʹьтеба Пирозда һәнә. У wе гәләк керһати бә, кӧ щара сәр ԛӧльхкьрьна тʹәви малбәте, дәрһәԛа wан дӧа шеwьр кьн. Чахе әм бьфькьрьн сәр дӧайед ԛӧльхкʹаред Йаһоwайи бәре, дӧайед мә wе һе баш бьн. Мәсәлә, әм дькарьн сәр дӧакьрьна Уньс бьфькьрьн, чахе әw дь зьке мәʹсийе мәзьнда бу (Унс. 1:17–2:10). Әм ӧса жи дькарьн бьфькьрьн сәр дӧайе Сьлеманә бь дьл у щан, чахе әwи wәʹде тʹәсмилкьрьна пʹарьстгәһе дӧа кьр (1 Пʹадш. 8:22-53). Ӧса жи гәләк керһати йә, кӧ бьфькьрьн сәр дӧакьрьна Иса (Мәт. 6:9-13). Тʹьме бьра «хwәстьна wә  . . . Хwәдева әʹйан бә». Бь wе йәке «әʹдьлайийа Хwәде кӧ жь һәр һʹьш-аԛьли дәрбазтьр ә, wе дьл у фькьред wә . . . хwәй кә» (Фили. 4:6, 7). w15 1/8 1:​11, 12

Дьнйа тʹәзәда әме гәләк ша бьн, чахе пәй рʹебәрийа тʹәшкиләта Йаһоwа һәрʹьн, кӧ әʹрде бькьнә щьнәта бәдәw, у али wан бькьн у һин кьн йед кӧ wе вәгәрʹьнә жийине. Йаһоwа wе гәләк шьхӧл бьдә мә. Ле әме хwә ча кʹьфш кьн, һәрге йед щабдар жь мә һиви кьн, кӧ wан тьшта бькьн, чь кӧ әм һʹьз накьн? Гәло әме гӧрʹа wана бькьн? Гәло әме wи шьхӧли рʹьнд бькьн у перʹа ша бьн? Сәва кӧ һазьр бьн бона жийина дьнйа тʹәзәда, әм гәрәке ида ньһа гӧһ бьдьнә рʹебәрийа тʹәшкиләта Йаһоwа. Һәрге әм дьхwазьн һазьр бьн бона жийина дьнйа тʹәзәда, әм гәрәке һин бьн кӧ ԛайил бьн у шьхӧлкʹарийе бькьн тʹәви тʹәшкиләта Йаһоwа у тʹәви һәвдӧ. Мәсәлә, чахе мәрʹа шьхӧләки тʹәзә дьдьн әм гәрәке һазьр бьн, кӧ һәвалшьхӧлкʹарийе бькьн у һʹәму тьшти бькьн, сәва кӧ бәхтәwар у рʹази бьн. Һәрге әм ньһа тʹәви йед щабдар шьхӧлкʹарийе бькьн, әме дьнйа тʹәзәда жи ӧса бькьн. w15 1/8 3:​6, 7

Һәвалтийа хьраб сәр Сьлеман һӧкӧм бу, ләма Йаһоwарʹа амьн нәма (1 Пʹадш. 11:1-6). Һәрге әw йәк тʹәви Сьлеман ԛәwьми, тʹәви мә һәр кәси жи дькарә бьԛәwьмә. У ләма, әм гәрәке ԛә нәфькьрьн жи, кӧ бьзәwьщьн тʹәви wан ке Йаһоwа һʹьз накә! Ле чь әм дькарьн бежьн дәрһәԛа wан мәрьва, кʹижан кӧ пешийа бьбуна ԛӧльхкʹаред Йаһоwа, зәwьщи йан меркьри бун тʹәви нәбаwәра? Кʹьтеба Пироз дьбежә: «Кʹӧлфәтно, гӧрʹа мере хwәда бьн, wәки жь wан һьнәк жи, һәгәр гӧһдарийа хәбәре накьн, бь пʹәргалийа жьнед хwә, бе готьн жи бенә сәр баwәрийе» (1 Пәт. 3:1). Һьлбәт, әw ширәт бона wан мера йә жи, жьнед кʹижана кӧ ԛӧльхкʹаре Йаһоwа ниньн. Демәк Кʹьтеба Пироз ширәте дьдә кӧ Мәсиһи мер йан жьна баш бә, у зәwащеда принсипед Кʹьтеба Пироз бьдә хәбате. Паше, чахе жьн йан мере wе кӧ Мәсиһи нинә, бьвинә кӧ әw алийе башда һатийә гӧһастьне, әw жи дьбәкә wе бьхwазә Йаһоwарʹа ԛӧльх кә. Гәләк щотед зәwащеда әw йәк дитьнә. w15 1/8 4:​15, 16

Иро һьнә нәхwәши һәнә, кӧ ԛәнщкьрьнед wан әʹйан ниньн. Ләма жи әм гәрәке фәсал бьн бона wан ԛәнщкьрьна, йан жи дәрмана, кʹижан кӧ избаткьри нинә әw ԛәнщ дькьн йан на. Паwлос ньвиси: «Бьра бәрбьһерийа wә һʹәму мәрьвава әʹйан бә» (Фили. 4:5). Бәрбьһери али мә дькә, кӧ әм һе зедә дина хwә бьдьн сәр ԛӧльхкьрьна хwә Йаһоwарʹа, нә кӧ сәр әʹмьр у сьһʹәт-ԛәwата хwә. Һәрге әʹмьре мәда сьһʹәт-ԛәwата мә щийе пешьн бьгьрә, wи чахи әм дькарьн ида тʹәне дәрһәԛа хwә бьфькьрьн (Фили. 2:4). Әм заньн, кӧ дь ве дьнйайеда әм нькарьн бь кʹамьли сьһʹәт-ԛәwат бьн. Ләма жи баwәр бә, кӧ әʹмьре тәда ԛӧльхкьрьна тә Йаһоwарʹа йа лапә фәрз ә (Фили. 1:10). Һәр кәс гәрәке хwәха сафикьрьна бькә бона сьһʹәт-ԛәwата хwә, у хwәха жи щабдар ә бона сафикьрьна хwә. w15 1/9 2:​8, 10

Йаһоwа «Хwәдайе рʹастийе» йә (Зәб. 31:5, ИМ). Әw гәләк дьхwазә мә рʹастийе һин кә дәрһәԛа хwә. Әw ӧса жи мә һин дькә кӧ чаwа wирʹа ԛӧльх кьн у чаwа бь жийина лапә баш бьжин. Ле әwи мәрʹа чь әʹйан кьрийә у бь wе йәке ча мәрʹа дайә кʹьфше, кӧ мә зәʹф һʹьз дькә? Йа әʹwльн Йаһоwа мәрʹа дәрһәԛа хwә гьли дькә. Әw дьхwазә, кӧ әм wи нас кьн (Аԛуб 4:8). У ләма әw мәрʹа наве хwә әʹйан дькә. Рʹасти жи, наве wи дь Кʹьтеба Пирозда жь һʹәму навед дьн зәʹфтьр ньвисар ә. Йаһоwа ӧса жи мәрʹа гьли дькә, кӧ әw Кәсәки ча нә. Чахе әм сәр әʹфьринед wи дьньһерʹьн, әм фәʹм дькьн, кӧ әw чьԛас гәләк ԛәwат ә у билан ә (Рʹом. 1:20). У чахе әм Кʹьтеба Пироз дьхуньн, әм педьһʹәсьн, кӧ әw һәԛ ә, у кӧ әw мә чьԛас зәʹф һʹьз дькә. Чахе әм педьһʹәсьн, кӧ Йаһоwа чьԛас баш ә, әм һе незики wи дьбьн. w15 1/9 4:​8, 9

Гәләк мәрьв дьфькьрьн, кӧ тʹалаша Хwәде нинә әwана чь дькьн. Әwана дьфькьрьн кӧ бь рʹастийе хәма Хwәде нинә, кӧ чь сәре wан дьԛәwьмә. Мәсәлә, чахе Филипинеда сала 2013 мәһа Тʹәшрине, фьртонәкә мәзьн ԛәwьми әw wәлат ниве зʹәф кʹӧта бу, сәрәккʹомаре шәһәрәки Филипинейи мәзьн гьлийед ӧса гот: «Хwәде дьбәкә wи чахи щики дьн бу». Һьнә мәрьв жи дьфькьрьн, кӧ Хwәде нькарә бьвинә кӧ әwана чь дькьн (Иша. 26:10, 11; 3 Йуһн. 11). Wәʹде Паwлос жи, һьнә мәрьв ӧса дьфькьрин. Паwлос дәрһәԛа wана ӧса гот: «Wана нәхwәст Хwәде занәбуна хwәда хwәйкьрьна». Әwана мәрьвнә нәһәԛ, зӧлм, тьма у хьраб бун (Рʹом. 1:28, 29). Ле әм чь дькарьн бежьн дәрһәԛа хwә? Әм заньн кӧ Йаһоwа һʹәму тьшти дьвинә, чь кӧ әм дькьн. Ле гәло әм баwәр дькьн кӧ әw бона мә хәм дькә? Гәло әм дәсте wи жийина хwәда дьвиньн? w15 1/10 1:​1-3

Лапә баш, кӧ ча әм дькарьн баwәрийа хwә бьдьнә кʹьфше, әw һәйә хьзмәткьрьн. Гәло чьрʹа? Чьмки чахе әм мьзгинийе бәла дькьн әм әʹйан дькьн кӧ әм баwәр дькьн, wәки хьлази незик ә у кӧ «әw дәрәнг наминә» (Һәбԛ. 2:3). Сәва кӧ пебьһʹәсьн һәла баwәрийа мә ԛәwи йә, әм дькарьн пьрсе бьдьнә хwә: «Гәло бәлакьрьна мьзгине бона мьн чьԛас фәрз ә? Гәло әз чь кӧ дькарьм, һʹәму тьшти дькьм, сәва кӧ мәрьварʹа дәрһәԛа Хwәде гьли кьм? Гәло әз мәщала дьгәрʹьм, сәва кӧ һе зедә Йаһоwарʹа хьзмәт бькьм?» (2 Корн. 13:5). Wәрә әм баwәрийа хwә бьдьнә кʹьфше, бь ве йәке кӧ «хьлазбуне» әʹлам кьн, демәк мьзгине бәла кьн (Рʹом. 10:10). Әм баwәрийа хwә дьдьнә кʹьфше, ӧса жи чахе тәнгасийа тәйах дькьн. Һәрге проблемед мә һәнә, мәсәлә, нәхwәши, дьлтәнги, депресийа, кʹәсиббун йан проблемед дьн, әм гәрәке баwәр бьн, кӧ Йаһоwа у Иса wе али мә бькьн (Ибрн. 4:16). У әм баwәрийа хwә һьндава Йаһоwа дьдьнә кʹьфше чахе аликʹарийе жь wи дьхwазьн. w15 1/10 2:​12-​14

Дьбәкә ӧса бьԛәwьмә кӧ Кʹьтеба Пироз бе ԛәдәхәкьрьне у әв бал тә тʹӧнә бә, йәкә тʹӧ кәс нькарә тәрʹа ԛәдәхә кә, кӧ тӧ бьфькьри сәр wан тьшта, кʹижан кӧ бира тәда ньн, мәсәлә рʹезед жь Кʹьтеба Пироз кʹижан кӧ тӧ һʹьз дьки, йан жи кʹьламед Пʹадшатийе (Кʹар. Шанд. 16:25). У рʹӧһʹе Хwәдейи Пироз wе али тә бькә, кӧ бини бира хwә wан тьшта чь кӧ һин буйи, у әв йәк wе али тә бькә кӧ амьн бьмини. Тӧ ча дькари ӧса бьки кӧ Кʹьтеба Пироз һәр рʹож бьхуни? Ньһа ида һазьр бә у wәʹдә хwәрʹа башԛә ԛә сәва бьхуни у бьфькьри сәр бәрнама хwәндьна Кʹьтеба Пироз йа һʹәфтийе. Ӧса жи wәʹдә хwәрʹа башԛә кә сәва бьхуни чар кʹьтебед пешьн жь Мьзгини, демәк Мәтта, Марԛос, Луԛа, Йуһʹәнна у бьфькьри кӧ Иса чь дьгот у чь дькьр (Рʹом. 10:17; Ибрн. 12:2; 1 Пәт. 2:21). Әʹдәбйәтәкә мә жи һәйә, кʹидәре кӧ ԛәwьмадьнед жь жийина Иса тенә гьликьрьне у ӧса жи һатьнә рʹезкьрьне, кӧ әwана кʹәнге у ча ԛәwьминә. Әw әʹдәбйәт дькарә али тә бькә, кӧ һе кʹаре бьстини жь хwәндьна wан чар кʹьтеба (Йуһʹн. 14:6). w15 1/10 4:​11, 12

Иса бона шагьртед хwә тʹәне аха нибу, әw ӧса жи һәвале wан бу. Wәʹде бәре, аха тʹәви хӧламед хwә дәрһәԛа фькьред хwә йан жи һәстед хwә хәбәрнәдьдан. Ле Иса тʹәви шагьртед хwә ӧса нибу. Әwи әwана һʹьз дькьрьн у wәʹдә тʹәви wан дәрбаз дькьр. Wирʹа һʹәwас бу кӧ wанрʹа фькьред хwә у һәстед хwә гьли кә, у чахе wана жи фькьред хwә у һәстед хwә гьли дькьрьн, әwи гӧһ дьда wан (Марԛ. 6:30-32). Жь бо wе һәләԛәтийе әwана бунә һәвалед Исайә гәләк незик, у һазьр бун бона wи шьхӧли, кʹижан кӧ гәрәке ахьрийеда бькьрана. Иса заньбу кӧ һәрге хирәта шагьртед wи һәбә бона Йаһоwарʹа хьзмәт кьн, у һәрге әwана нава шьхӧле бәлакьрьна мьзгинеда гәләк кʹар бькьн, әwана wе бь рʹастийе бәхтәwар бьн. Ләма жи әwи шагьртед хwә һелан кьр, кӧ гәләк кʹар бькьн дь шьхӧле хьзмәтийеда, у әwи соз да wан кӧ wе али wан бькә (Мәт. 28:19, 20). w15 1/11 2:​3, 5

Һʹьзкьрьн һӧнӧре Йаһоwайи сәрәкә йә (1 Йуһʹн. 4:16). Әʹфьрине wийи пешийе Иса Мәсиһ, бь милйарда сала тʹәви Баве хwә ль әʹзмана бу, у дьдит кӧ Йаһоwа Хwәде чьԛас бь һʹьзкьрьн ә (Колс. 1:15). Иса жи һʹьзкьрьна ӧса дьда кʹьфше тʹәмамийа жийина хwәда, ча ль әʹзмана ӧса жи сәр әрде. Демәк, әм дькарьн баwәр бьн кӧ Йаһоwа у Иса wе тʹьме бь һʹьзкьрьн сәрwертийе бькьн. Чахе кәсәки жь Иса пьрси кӧ кʹижан тʹәми йә лапә гьринг, Иса гот: « ‹Хӧдан Хwәдейе хwә һʹьз бькә бь тʹәмамийа дьле хwә, бь тʹәмамийа щанийа хwә у бь тʹәмамийа һьше хwә›. Әв ә тʹәмийа пешьн у һәрә мәзьн. У йа дӧда жи мина ве йә: ‹Һәвале хwә wәкә хwә һʹьз бькә› » (Мәт. 22:37-39). Гәләк фәрз ә һʹәму һәләԛәтийада һʹьзкьрьне бьдьнә кʹьфше. Иса гот кӧ әм гәрәке Йаһоwа у ӧса жи һәвале хwә һʹьз бькьн. w15 1/11 4:​1-3

Йаһоwа тʹьме тʹәви мәрьва сәр зьмане Ибрани хәбәрнәдьда. Чахе Исраели жь дилтийа Бабилонеда аза бун, һьнәк жь wана сәр зьмане Арамийи хәбәрдьдан. Дьбәкә ләма Данийел, Йерәмйа, у Әзра һьнә пʹар жь Кʹьтеба Пироз сәр зьмане Арамийи ньвисин. Чахе Искәндәре Мәзьн дьнйа ниве зәʹф кьрә бьн дәсте хwә, зьмане Коине, демәк Йунани гәләк wәлатада бу зьмане сәрәкә. Гәләк Щьһуйа дәстпекьрьн хәбәрдьн сәр зьмане Йунани, у ахьрийеда Ньвисаред Ибрани һатә wәлгәрʹандьне сәр зьмане Йунани. Әw wәлгәрандьн һатә навкьрьне «Септуагинт». Әw wәлгәрʹандьна Кьтеба Пироз йа пешийе у йа лапә фәрз бу. Експерт баwәр дькьн кӧ «Септуагинт» 72 wәлгәрʹа wәлгәрʹандьн. Һьнәк wәлгәрʹа жь зьмане Ибрани хәбәр пәй хәбәр wәлгәрандьн, ле йед дьн ӧса нәдькьрьн. Ле йәкә, Щьһуйед кӧ сәр зьмане Йунани хәбәрдьдан у ӧса жи Мәсиһийа баwәр дькьрьн кӧ әв «Септуагинт» Хәбәра Хwәде йә. w15 1/12 1:​4-6

Аԛуб дьбежә: «Зьман жи агьрәк ә» (Аԛуб 3:6). Бь «зьман» әм дькарьн хәбәрдьн. У готьна мә жи мина агьр дькарә бьбә мәнийа гәләк зийана. Гьлийед мә дькарьн гәләк ԛайим сәр мәрьва һʹӧкӧм бьн. Кʹьтеба Пироз дьбежә кӧ готьна мә дькарә һәла һе жийине йан мьрьне бьдә (Мәтʹлк. 18:21). Ле гәло әw те һʹәсабе кӧ әм гәрәке тʹӧ тьшти нәбежьн, тʹәне жь бо ве йәке кӧ дьбәкә тьштәки хьраб жь дәве мә дәре? Һьлбәт на. Рʹаст ә агьр дькарә мә бьшәwьтинә, ле әw найе һʹәсабе кӧ әм гәрәке агьр нәдьнә хәбате. Дәwсе, әм гәрәке агьр фәсал бьдьнә хәбате. Мәсәлә, әм дькарьн агьр бьдьнә хәбате сәва кӧ хwарьне чекьн, хwә гәрм кьн, у кӧ рʹонайи һәбә. Ӧса жи зьман, һәрге әм хәбәрдана хwәда фәсал ьн, әм әwи фәрәсәти дькарьн бьдьнә хәбате сәва кӧ Йаһоwа рʹумәт кьн у кʹаре биньн йед дьненарʹа (Зәб. 19:14). Йаһоwа фәрәсәте ӧса дайә мә, кӧ әм дькарьн фькьред хwә у һәстед хwә бьдьнә кʹьфше йан бь хәбәрдане йан бь нишанкьрьна дәста. Әм гәрәкә әwе пʹешкʹеше бьдьнә хәбате сәва кӧ мәрьва дьлгәрм кьн (Аԛуб 3:9, 10). w15 1/12 3:​1-3

Дьԛәwьмә кӧ Луԛа али Паwлосе у йед дьн дькьр, чахе әwана дь рʹеwитийа хwәйә мисйонертида нәхwәш дькʹәтьн (Галт. 4:13). Чаwа кӧ Иса гот, «сахләм нә һʹәwще һәким ьн, ле нәхwәш» (Луԛа 5:31). Луԛа нә кӧ тʹәне әw мәрьв бу, йе кӧ һʹьз дькьр ширәта бьдә дәрһәԛа сьһʹәт-ԛәwате. Әw бь професийа хwә һәким бу. Кʹьтеба Пирозда найе готьне кӧ кʹидәре йан кʹәнге Луԛа професийа хwә һин бу. Ле те готьне кӧ Паwлос жь алийе Луԛада пьрс-сьлав шандә Колосйара. Жь ве йәке те кʹьфше кӧ дьбәкә Луԛа мәкʹтәба медисинайе дь Лаwдькйайеда һин буйә, кʹижан кӧ незики Колосйайе бу. Ӧса жи, чахе Луԛа кʹьтеба Кʹаред Шандийа у Луԛа ньвиси, әwи хәбәред медисинайе да хәбате. У чьмки әw һәким бу, дь ньвисаред хwәда әwи гәләк ԛәwьмандьн ньвиси, чахе Иса мәрьв ԛәнщ дькьрьн. w15 1/12 4:​11, 12

Чахе Йаһоwа Кӧрʹе хwәйи тайе тʹәне шандә сәр әʹрде, бь wе йәке Әwи жь һʹьзкьрьне пʹешкʹешәкә лапә мәзьн да мә! (Йуһʹн. 3:16; 1 Йуһʹн. 4:9, 10). Паwлосе шанди әw пʹешкʹеша Хwәде нав кьр ча пʹешкʹеша кӧ «найе готьн». Паwлос заньбу кӧ Хwәде wе бь сайа ԛӧрбана Мәсиһ һʹәму созед хwәйи ԛимәт әʹсә бинә сери. Әw пʹешкʹеша Хwәде кӧ «найе готьн» дьдә кʹьфше рʹәʹм у һʹьзкьрьна wи, кʹижан кӧ әwи бь сайа ԛӧрбана Иса мәрʹа да кʹьфше. Бь рʹастийе әw пʹешкʹеш ӧса гьринг ә, кӧ мәрьв нькарә ԛимәте wе бь хәбәра бежә. Әw пʹешкʹеша ԛимәт ча гәрәке сәр мә һʹӧкӧм бә? Әw пʹешкʹеш гәрәке мә һелан кә кӧ әм чь бькьн? Гәло әw һʹьзкьрьна мәзьн кӧ һьндава тә данә кʹьфше, wе тә һелан кә wәки әʹмьре хwә бьгӧһези? Гәло тӧйе һе мәрʹд би у бь һʹьзкьрьне тʹьжә би һьндава мәрьва, у һәла һе һеса бьбахшини wан кʹе тә дьхәйидинә? Бир нәкьн wәки пешкеша кӧ Йаһоwа бь сайа Мәсиһ да мә, жь һәму пʹешкʹеша ԛимәттьр ә. (1 Пәт. 3:18) w16.01 2:​1, 2, 4, 5

Һьнәк кӧ һатьнә бьжартьне чаwа рʹункьри, дьбәкә пьрсед ӧса дьдьнә хwә: «Чьрʹа әз һатьмә бьжартьне? Чьрʹа әз, нә кӧ кәсәки дьн?» Әwана дькарьн һәла һе бьфькьрьн жи, кӧ әwана һежа ниньн бона ве бьжартьне. Ле әwана тʹӧ щар дӧдьли ниньн кӧ һатьнә бьжартьне. Дьле wан бь шабун у рʹазибуна мәзьн тʹьжә йә. Әwана тʹәхмин дькьн ве йәке чь кӧ Паwлос гот: «Шькьр жь Хwәдерʹа, Баве Хӧдане мә Иса Мәсиһ, кӧ жь рʹәма хwәйә пʹьр, щарәкә дьн әм дьне хьстьн, бь рʹабуна Иса Мәсиһә жь мьрийа, wәки бьбьнә хwәйе гӧмана сах у wан соз-ԛьраред нәбәталә нәрьзи у нәчʹьлмьси wар бьн. Әwана ль әʹзмана wәра хwәйкьри нә» (1 Пәт. 1:3, 4). Чахе рʹункьри әwан гьлийа дьхуньн, әwана бешьк заньн, кӧ бь wан гьлийа Баве wани әʹзмана тʹәви wан шәхси хәбәрдьдә. w16.01 3:​11, 12