Сьбат

Чь «кʹар» гәрәке сәбьр тʹәмам бькә? Әw али мә дькә кӧ бьбьнә «мәрьвед кʹамьл у гьһишти, у тьштәкида кемасийа [мә] тʹӧнә бә» (Аԛуб 1:4, ДТʹ). Чәтьнайада гәләк щар сьстбунед мә тенә кʹьфше, демәк нав мәда әw тьшт, кʹижан әм гәрәке һе баш кьн. У һәрге әм сәбьр дькьн wан чәтьнайада, әм дьбьнә Мәсиһийед һе кʹамьл, йане һе гьһишти. Мәсәлә, әм һин дьбьн тәйах кьн, рʹази бьн, у дьлшәwат бьн. Чьмки сәбьр мә дькә Мәсиһийед һе баш, ләма әм ӧса накьн кӧ принсипед Хwәде бьтʹәрьбиньн, сәва жь чәтьнайе хьлаз бьн. Мәсәлә, һәрге тӧ мьԛабьли фькьред нәтʹәмьз шәрʹ дьки, дәwса кӧ бькʹәви тʹәльке, дӧа кә кӧ wан хwәстьнед нәрʹаст бьтʹәркини. Бь wе йәке тӧйе хwәгьртьна хwә һе ԛәwи ки. Ле һәрге нәфәре мала тә пәй тә дькʹәвә бона баwәрийа тә? Дәwса кӧ дәсте хwә пәйа ки, бәрдәwам кә Хwәдерʹа бь дьл у щан хьзмәт кә. Бира хwәда хwәй кә, әм гәрәке сәбьр кьн, wәки ԛәбулкьрьна Хwәде бьстиньн (Рʹом. 5:3-5; Аԛуб 1:12). w16.04 2:15, 16

Әм заньн кӧ һәрге әм ԛӧрʹә дьбьн у һӧрмәт дькьн мьләт, бәрәк йан wәлате хwә, әw ԛӧрʹәбун Йаһоwа хwәш найе. Ньһерʹандьна Йаһоwа һьндава мәрьва әw ә, кӧ тʹӧ мьләт йан култура жь йед дьн баштьр нинә. Бь рʹастийе, әw йәк гәләк һʹәwас ә кӧ мәрьв щурʹә-щурʹә нә. Ле әм гәрәке тʹьме бира хwәда хwәй кьн кӧ Хwәде сәр һәр кәса wәк һәв дьньһерʹә (Рʹом. 10:12). Һәрге әм ԛӧрʹә дьбьн жь бо мьләт йан жь wәлате хwә, әw дькарә бьбә мәʹни кӧ әм тʹәвнәбуйине хwәй нәкьн. Чьмки әw те һʹәсабе кӧ әм фьрԛийе дькьн ортʹа мьләта. Дьԛәwьмә ԛӧрʹәбуна wи щурʹәйи щәм мә пешда бе. Һәла һе ԛьрʹна йәкеда жи щьватеда әw проблем һәбу. Һьнә бьред Щьһу нәһәԛи хушк-бьред Йунани дькьрьн (Кʹар. Шанд. 6:1). Ле чаwа әм дькарьн тедәрхьн, һәла ԛӧрʹәбуна ӧса һәйә бал мә йан на? Бьдьнә бәр чʹәʹве хwә кӧ кәсәк жь хушк-бьред мә жь wәлате хәриб wәрʹа ширәтәке дьдә. Һуне хwә ча кʹьфш кьн, һуне дәрберʹа инкʹар кьн әве ширәте, чьмки ӧса дьфькьрьн: «Әм wәлате хwәда һе баш дькьн әве йәке?» Дәwса ве йәке, һе рʹьнд ә кӧ әм әве тʹәмийе биньн сери кӧ рʹеза рʹожеда ньвисар ә. w16.04 4:12, 13

Иса «Мьзгинийа Пʹадшатийа Хwәде» бәла дькьр, у дьхwәст wәки шагьртед wи жи әве мьзгине бәла кьн. Ле гәло кʹе иро «һʹәму мьләтарʹа» әве мьзгине бәла дькә? (Мәт. 28:19). Щаб әʹйан ә, тʹәне Шәʹдед Йаһоwа! Мәсәлә, кʹәшише мисйонер щарәке Шәʹде Йаһоwарʹа гот, wәки әw щурʹә-щурʹә wәлатада дьжит, у wан һәр wәлатада жь Шәʹдед Йаһоwа дьпьрси, һәла әwана чь әʹламәтийе бәла дькьн. Ле чь щаб әwи кʹәшиши дьстанд? Әwи гот: «Әwана һаԛас бефәʹм ьн, wәки щаба хwә мина һәв дан: ‹Мьзгина дәрһәԛа Пʹадшатийа Хwәде›». Ле бь рʹастийе, жь гьлийед кʹәшиш те кʹьфше, wәки әwана ча Мәсиһийед рʹаст йәктийеда ньн, нә кӧ «бефәʹм ьн» (1 Корн. 1:10). Wана һәма әw әʹламәти бәла дькьр, кʹижан кӧ әʹлам дькә журнала бь наве «Бьрща Ԛәрәwьлийе Дәрһәԛа Пʹадшатийа Йаһоwа Әʹлам Дькә». Әв журнал сәр 254 зьмана дәрдькʹәвә, у һәр дәрхьстьна ве wәкә 59 милйон һәв те нәшьркьрьне. Нав тʹәмамийа дьнйайеда әв журнал лапи бәлабуйи йә. w16.05 2:6

Чаwа хьзмәткʹаред Хwәде, дьбәкә әм дьхwазьн пешәнгед һәртʹьм бьн. Сәва кӧ әве нете биньн сери, әм дәстпедькьн әʹмьре хwә һеса кьн, сәва һе зедә хьзмәт кьн. Һьнге дьбәкә әм хәмгин дьбьн, кӧ дьбәкә әм бәхтәwар нибьн, чьмки алийе материалида әме дәwләти нибьн. Бәле, Кʹьтеба Пирозда найе готьне кӧ әм әʹсә гәрәке пешәнг бьн. Әм дькарьн пешәнг нибьн, ле бәрдәwам кьн Йаһоwарʹа бь амьни хьзмәт кьн. Ле Иса гот кӧ һәрге әм бона Пʹадшатийе ԛӧрбана дькьн, әме гәләк кʹәрәма бьстиньн (Луԛа 18:29, 30). Хенщи ве йәке, Кʹьтеба Пирозда те готьне, кӧ чахе әм «пәсне жь дьл» дьдьнә Йаһоwа, у бь дьл у щан wирʹа хьзмәт дькьн, дьле wи гәләк ша дьбә (Зәб. 119:108, ИМ). Бәле, һәрге әм бьфькьрьн сәр wан рʹеза, у Йаһоwарʹа дӧа бькьн кӧ рʹебәрийа мә бькә, әме фәʹм бькьн ԛьрара wи. Бь сайа ве йәке, әме бькарьбьн сафикьрьна баш бькьн, кʹижан кӧ бона мә керһати бә у Йаһоwа wе мә кʹәрәм кә. w16.05 3:13

Гәләк проблемед кӧ рʹасти щаһьла тен, рʹасти мәзьна жи тен. Мәсәлә, мә һʹәмушкарʹа лазьм ә баwәрийа хwә хwәй кьн, емосийед хwә контрол бькьн, щерʹьбандьнада тәйах кьн у дур бьн жь һәвалед хьраб у wәʹдәдәрбазкьрьнед нәрʹаст. Бәле, әw әʹдәбйәт һатьнә дәрхьстьне бона щаһьла. Ле гәло Мәсиһийед мәзьн гәрәке бабах бьн у нәхуньн wан әʹдәбйәтед бона щаһьла? На! Чьмки һʹәму әʹдәбйәтед мә сәр һʹиме принсипед Кʹьтеба Пироз ьн, у ләма һәр кәс жь мә дькарә кʹаре бьстинә жь wан әʹдәбйәта. Әʹдәбйәтед мә кӧ бона щаһьла һатьнә дәрхьстьне, дькарьн ви алида жи али wан бькьн, кӧ рʹӧһʹанида һе мәзьн бьн у незики Йаһоwа бьн. Бәле, йед мәзьн жи дькарьн жь ве йәке кʹаре бьстиньн (Wаиз 12:13). w16.05 5:15, 16

«Хwәдайе мә Йаһоwа, тʹәк ә Йаһоwа, ДТ». Рʹасти жи чьԛас гьлийед ԛәwи нә! Чахе Исраели рʹасти тәнгасийа дьһатьн wәʹде дькʹәтьнә Әрде Создайида, әwан гьлийа әwана гәләк ԛәwи кьрьн. Әw гьли дькарьн мә жи ԛәwи кьн, чьмки әм гәрәке тәнгасийа мәзьн дәрбаз бьн, у Щьнәта дьнйа тʹәзәда жи әʹдьлайе у йәктийе хwәй кьн. Wәрә әм бәрдәwам кьн бь тʹәмами Йаһоwарʹа амьн бьминьн. Әм гәрәке wи һʹьз кьн у бь дьл у щан wирʹа хьзмәт кьн. Ӧса жи wәрә әм тʹьме тʹәви хушк-бьред хwә йәктийеда у әʹдьлайеда бьн. Һәрге әм ӧса бькьн, әм дькарьн баwәр бьн кӧ Иса wе гьлийед ӧса бежә мә: «Wәрьн бьмбарәкбуйийед алийе Баве мьнда! Әw Пʹадшатийа кӧ бона wә жь wәхте әʹфьрандьна дьнйайеда һазьр буйә wар бьн» (Мәт. 25:34). w16.06 3:2, 20

Жь бо ԛӧрʹәбуне әм дькарьн кьред хwәйә нәрʹаст һәԛ дәрхьн. Чахе әм ӧса дькьн, әм мина халийа нәрм ниньн. Дәрәща тәйә ӧса һәбуйә, кӧ тӧ сәр хушк йан бьра хәйидийи? Йан жи дьле тә ешийа йә чьмки щьватеда щабдари жь тә һатә стандьн? Һәрге ӧса ԛәwьми, тә хwә ча кʹьфш кьр? Тә ԛӧрʹәбун да кʹьфше, йан тә дьхwәст тʹәви бьра әʹдьлайе хwәйи ки у Йаһоwарʹа амьн майи? (Зәб. 119:165; Колс. 3:13). Һәрге әм гӧнә дькьн, у гӧнед хwә вәдьшерьн, әw дькарә бьбә мәʹни кӧ әм ширәткьрьн у рʹасткьрьна Хwәде ԛәбул нәкьн. У wи чахи мәрʹа ида дькарә бьбә хәйсәт кӧ гӧна бькьн. (Wаиз 8:11). Бьраки дәрһәԛа хwә гьли кьр, кӧ бәре әwи порнографиа дьньһерʹи. Әw дьбежә: «Мьн тедәрхьст wәки мьн һеди-һеди дәстпедькьр бь критики бьньһерʹьм сәр рʹуспийа». Әwи кӧ порнографиа дьньһерʹи, бь ве йәке рʹӧһʹанийа wи сьст бу. Ахьрийе кьрьнед wийи нәрʹаст әʹйан бун у паше әwи аликʹари жь рʹуспийа сьтанд. Бәле, әм гьшк жи гӧнәкʹар ьн. Ле һәрге әм дәстпедькьн бь критики бьньһерʹьн сәр йед дьн, йан жи сәва кьред хwәйи нәрʹаст хwә һәԛ дәрдьхьн, дәwса кӧ бахшандьне у аликʹари жь Хwәде бьхwазьн, һьнге дьле мә дькарә һʹьшк бә. w16.06 2:5, 6

Гӧһдарванед Иса бона тьштед нәлазьм хәмгин дьбун. Иса мәʹни гот кӧ чьрʹа әве йәке нәкьн. Әwи шьровәкьр кӧ хәмгини йан бәрхwәкʹәтьна зедә, һәла һе бона тьштед лазьм жи, дькарьн нет-фькьред мә жь тьштед рʹӧһʹанийә фәрз дур хьн. Иса бь дьл у щан хәм дькьр сәва шагьртед хwә. Ләма әwи wәʹде Һинкьрьна сәр Чʹийе, чар щара зедәтьр дәрһәԛа ве хофийе wанрʹа гот (Мәт. 6:27, 28, 31, 34). Иса заньбу дәрһәԛа һʹәwщед мәрьва йед һәррʹожи. Хенщи ве йәке, әwи заньбу кӧ шагьртед wи, йед кӧ wе бьжин «рʹожед ахьрийеда», wе рʹасти тәнгасийа бен. Чьмки wи чахи wе «зәманед хьраб» бьн (2 Тимтʹ. 3:1). Гәләк жь wан рʹасти чәтьнайед wи щурʹәйи бьһатана, мәсәлә, хәбат тʹӧнә бә, баһе тьшта һе бьльнд бә, кемасийа хwарьне бә, у гәләк кʹәсиббунеда бьжин. Ле йәкә Иса фәʹм дькьр кӧ жийин жь хwарьне һе фәрзтьр ә у бәдән жь кʹьнща. w16.07 3:3, 4

Һәрге мә һʹәму ԛанун у дәʹwакьрьнед Йаһоwа бь тʹәмами бьанийана сери, wи чахи әме һежайи ԛәнщийа wи буна. Ле әм әwе йәке накьн. Ләма Пʹадша Сьлеман йе кӧ билан бу, ньвиси: «Ль рʹуйед әʹрде зьламе сальһ [мәрьве рʹаст] тʹӧнәйә, һәртʹьм ԛәнщийе бькә у ԛәт гӧнә нәкә» (Wаиз 7:20). Паше Паwлосе шанди жи гот: «Һʹәмуйа гӧнә кьр у нәгьһиштьнә рʹумәта Хwәде» у «маше гӧнә мьрьн ә» (Рʹом. 3:23; 6:23а). Әw һәйә чь кӧ әм һежа нә. Ле Йаһоwа һʹьзкьрьна мәзьн һьндава мә гӧнәкʹара да кʹьфше. Әwи «Кӧрʹе хwәйи тайе тʹәне» шандә сәр әʹрде кӧ бона мә бьмьрә. Рʹасти жи Йаһоwа ԛәнщийа чьԛас мәзьн әʹйан кьр һьндава мә, кʹижан кӧ әм һежа ниньн (Йуһʹн. 3:16). Паwлос гот кӧ Иса «бәр щәфайе мьрьне тʹаща рʹумәт у сийанәте wәргьртийә, . . . да кӧ кʹәрәма Хwәде жь бо һәр кәси мьрьне тʹам бькә» (Ибрн. 2:9, ИМ). Бәле, «пʹешкʹеша Хwәде жийина һʹәта-һʹәтайе йә, бь сайа Хӧдане мә Мәсиһ Иса» (Рʹом. 6:23б). w16.07 3:3, 4

Зәwащ тьштәки тʹәбийәти йә әʹмьре мәрьвада. Ле зәwащ ча дәстпебу у нета wе чь йә? Щабед wан пьрса wе али мә бькьн кӧ рʹаст бьньһерʹьн сәр зәwаще у сәр кʹәрәмед жь wе. Чахе Хwәде мәрьве пешьн Адәм әʹфьранд, готә wи кӧ нав бьдә сәр һʹәйwана. Ле «меррʹа кʹомәкдарәк кӧ лайиԛи wи буйа дәст нәкәт, ПКʹМ». Ләма Хwәде хәwәкә кʹур кьрә чʹәʹве Адәм, пʹарханәкә wи һьлда, кʹӧлфәтәк чекьр у ани щәм мер (Дәстп. 2:20-24). Чаwа әм дьвиньн, Хwәде зәwащ саз кьрийә. Иса зәлал гот: «Мер wе де у баве хwә бьһелә, хwә ль жьне бьгьрә у һәр дӧ wе бьбьнә бәдәнәк» (Мәт. 19:4, 5). Хwәде пʹарханәкә жь Адәм һьлда у кʹӧлфәта пешьн чекьр, ләма wана фәʹм кьр кӧ әwана чаwа щоте зәwаще бунә йәк. Изьн тʹӧнә бу wәки мер у жьн жь һәвдӧ бьԛәтийана, нә жи изьна wан һәбу кӧ йәке зедәтьр бьстиньн. w16.08 1:1, 2

Иса нә кӧ тʹәви әʹлаләте хәбәрдьда, ле ӧса жи гәләк щар шәхси тʹәви мәрьва хәбәрдьда. Мәсәлә, әwи бь һәвалти хәбәрдьда тʹәви жьнькәке, кʹижан кӧ незики шәһәре Сухар ав жь бире һьлдьда (Йуһʹн. 4:5-30). Ӧса жи Иса тʹәви Мәтта хәбәрдьда, кʹижан кӧ хәрщгьр бу. Мәтта дәрберʹа ԛәбул кьр тʹәглифкьрьна Иса у бу пәйчуйе wи. Мәтта тʹәглифи мала хwә кьр Иса у мәрьвед дьн, у ль wедәре жи Иса тʹәви гәләк мәрьва хәбәрда (Мәт. 9:9; Луԛа 5:27-39). Иса ӧса жи хәбәрдьда тʹәви Натанйел, кʹижан кӧ нәбаш дьньһерʹи сәр мәрьвед жь Ньсрәте. Ле Иса йәкә бь һәвалти тʹәви wи хәбәрда. Әw йәк Натанйел һелан кьр wәки ньһерʹандьна хwә бьгӧһезә. У әwи дьхwәст һе зедә пебьһʹәсә дәрһәԛа Иса у һинкьрьнед wи (Йуһʹн. 1:46-51). Бәле, әм гәрәке чʹәʹв бьдьнә Иса, кӧ әwи ча бь һәвалти у нәрм хәбәрдьда тʹәви мәрьва. У әм гәрәке йед тʹәзә жи һин кьн, wәки чахе тʹәви мәрьва хәбәрдьдьн чʹәʹв бьдьнә Иса. Чахе әwана ӧса бькьн, wе хьзмәтийеда һе шабуне бьвиньн, чьмки мәрьвед дьлсах wе гӧһ бьдьнә wан. w16.08 4:7-9

Чахе проблем нәсафикьри дьминьн, һьнә мер у жьн сафи дькьн йан башԛә бьжин йан жи һәв бьԛәтьн. Пешийа кӧ сафи кьн башԛә бьжин гәрәке кʹур бьфькьрьн. Дькарә ӧса бе кʹьфше кӧ һәрге башԛә бьжин, проблем wе сафи бьн, ле бь рʹастийе проблем һе зедә дьбьн. Иса гьлийед Баве хwә wәкʹьланд, кӧ мер wе де у баве хwә бьһелә, хwә ль жьне бьгьрә. Паше әwи гот: «Әwед кӧ Хwәде кьрьнә йәк, бьра мәрьв жь һәвдӧ нәԛәтинә» (Мәт. 19:3-6; Дәстп. 2:24). Әw те һʹәсабе кӧ нә жьн нә жи мер гәрәке жь һәвалзәwаще хwә нәԛәтә, чьмки Хwәде әw кьрьнә йәк. Йаһоwа дьхwазә wәки мер у жьн һʹәта-һʹәтайе тʹәви һәв бьжин (1 Корн. 7:39). Һәр кәс жь мә гәрәке бира хwәда хwәй кә, кӧ әме бәр Йаһоwа щаба хwә бьдьн. Әw йәк дькарә али мә бькә проблема сафи кьн, һʹәта кӧ әw проблем һе гьран нәбунә. w16.08 2:10, 11

Дьжмьнед мә дькарьн һʹӧщӧми сәр мә кьн, чахе әм ԛә һивийе ниньн у чахе әм сьст ьн. Ләма гәләк фәрз ә, кӧ әм тʹьме сәр хwә бьн у фәсал бьн. Гьлийед «нәһелә хьраби сәр тә кʹәвә», дьдә кʹьфше кӧ әм дькарьн хьрабийе алт кьн. Әме сәр хьрабийе кʹәвьн, һәрге әм бәрдәwам кьн шәрʹ кьн мьԛабьли хьрабийе. Ле һәрге әм сәр хwә нибьн у шәрʹда сьст бьн, wи чахи Шәйтʹан, дьнйа wийә хьраб, у кемасийед мә wе мә алт кьн. Шәйтʹан һәма әве йәке жи дьхwазә. Ләма тʹӧ щар дьлтәнг нәбьн у бьра дәстед wә сьст нәбьн! (1 Пәт. 5:9). Сәва wи шәрʹида сәр кʹәвьн, әм гәрәке бир нәкьн кӧ әм чьрʹа шәрʹ дькьн. Бәле, әм дьхwазьн ԛәбулкьрьн у кʹәрәма Хwәде ԛазанщ кьн. Ибрани 11:6-да ньвисар ә: «Әwе кӧ незики Хwәде дьбә, гәрәке баwәр бькә, кӧ Хwәде һәйә у wе wан хәлат кә, кʹижан кӧ ль wи дьгәрʹьн». Хәбәра Йунани кӧ сәр зьмане мә һатә wәлгәрʹандьне ча хәбәра «дьгәрʹьн», те һʹәсабе кӧ әм гәрәке гьран бьхәбьтьн сәва ԛәбулкьрьн у кʹәрәма Хwәде ԛазанщ кьн (Кʹар. Шанд. 15:17). w16.09 2:4, 5

Хәбәра Хwәдеда рʹебәри һәйә, кʹижан кӧ дькарә али мә бькә wәки әм бьжартьна ӧса бькьн, кӧ Хwәде һʹӧрмәт-рʹумәт кьн. Ле йәкә әве бьжартьне әм ӧса дькьн чаwа кӧ мә хwәш те. Кʹьнщхwәкьрьна мә wе йәкева жи гьредайи йә, кӧ чьԛас пʹәрә дәсте мәда һәйә. Ле гәрәке тʹьме кʹьнще мә тʹәмьз у бь маԛули бә, ӧса жи лайиԛи wи щийи бә кʹидәре әм дьжин. Бәле, щара һеса нинә кӧ сафикьрьнед бь билани бькьн у wәʹде сафикьрьна һʹәму тьшти һьлдьн һʹәсаб. Гәләк дькʹанада кʹьнще ӧса дьфрʹошьн кӧ нәщайиз ә әм хwәкьн. Ләма жи лазьм ә һьм хушк һьм жи бьра һьнәки зәмәте бьвиньн у wәʹде хwә хәрщ кьн, сәва кʹьнщед ӧса хwәрʹа бьвиньн, кӧ гәләк тәнг нибьн. Чахе әм ӧса дькьн, хушк-бьред мә дьбәкә әwе йәке тʹәхмин кьн, у гәләк жь мә рʹази бьн. Кʹьнщ бьжьберьн чьԛас жи чәтьн бә, чахе әм заньн кӧ әм хwәстьна Йаһоwа тиньн сери, әм ша дьбьн кӧ әм Йаһоwа һӧрмәт дькьн. У ләма жи әм ида дина хwә надьн сәр wан чәтьнайа. w16.09 3:15, 16

Де-бавно чахе һун зарʹед хwә һин дькьн, мәсәла бьдьнә хәбате, чьмки зарʹ һʹьз дькьн тьшта бьдьнә бәр чʹәʹве хwә. Бь мәсәла һун дькарьн зарʹа һин кьн, wәки баwәр бькьн, кӧ чь Кʹьтеба Пироз дьбежә әw рʹаст ә. Мәсәлә, тʹәви зарʹе бьхуньн рʹеза иройин. Һун ча дькарьн зарʹе бьдьнә фәʹмкьрьне, кӧ әw информасийа жь Хwәде бу? Зарʹе һелан кьн кӧ әве дәрәще бьдә бәр чʹәʹве хwә у хwәха бьфькьрә. У һьнге зарʹера бежьн кӧ wәʹде Ибода мәрьв нәдьчун космосе у нә жи телескоп һәбун. Зарʹ дькарә ӧса бьдә кʹьфше йанчь wирʹа чәтьн ә баwәр кә, демәк мәрьвед бәрерʹа чәтьн буйә баwәр кьн кӧ әʹрд сәр тӧ тьшти нинә. У әw дькарә тʹопе һьлдә дәсте хwә сәва нишан кә, wәки тьштәки бь гьранийе гәрәке сәр тьштәки йан щики бә. Әw мәсәлә дькарә зарʹа wә бьдә баwәр кьрьне, кӧ рʹаст ә Кʹьтеба Пироз зудава һатә ньвисаре, ле йәкә әw рʹаст ә чьмки жь Йаһоwа йә (Нәһәм. 9:6). w16.09 5:9, 12

Баwәри тʹәне әw йәк нинә кӧ әм дәрһәԛа ԛьрара Хwәде заньн. Ле ӧса жи әw ә кӧ әм дьхwазьн ӧса бьжин, чаwа Хwәде хwәш те. Баwәри мә һелан дькә wәки әм али мәрьвед дьн жи бькьн, кӧ пебьһʹәсьн мьзгинийа Хwәде. Бәле, сәва кӧ жийина һʹәта-һʹәтайе бьстиньн, баwәрийа ԛәwи лазьм ә. Ле гәло чьрʹа фәрз ә кӧ баwәрийа мә ԛәwи бә? Wәрә мәсәла шинкайе шеwьр кьн. Сәва шинкайи шин бә у мәзьн бә, жерʹа ав лазьм ә. Һәрге ав кем бә, ахьрийеда әw wе бьчʹьлмьсә у һʹьшк бә. Баwәрийа мә жи ӧса нә, һәрге әм ле хwәй нәкьн, ахьрийеда әw wе сьст бә у кʹӧта бә (Луԛа 22:32; Ибрн. 3:12). Ле һәрге әм мьԛати баwәрийа хwә бьн, әw wе сахләм бьминә у тʹьме мәзьн бә (2 Тʹеслн. 1:3; Тито 2:2). w16.10 4:4, 5

Чахе Данийел у һәвалед wи Бабилонеда дил бун, Бабилонийа дьхwәстьн зоре wана бькьн кӧ биньн сәр әʹдәт у религийа хwә. Бабилонийа «зьмане Кьлданийа» әwана һин кьрьн. Хенщи wе йәке, сәрwере бәрдәстийа йе кӧ щабдар бу wәки зьман wана һин кә, наве Бабилонийа да сәр wан (Дан. 1:3-7). Наве Данийел данибун Бел, кʹижан кӧ наве хӧданәки сәрәкә йе Бабилонийа бу. Дьбәкә Нәбукәднәсәр пʹадша дьхwәст Данийел бьдә баwәркьрьне, wәки хӧдане Бабилонийа, жь Йаһоwа һе ԛәwаттьр ә (Дан. 4:8). Бабилонеда Данийелрʹа изьн һәбу кӧ хwарьна пʹадша бьхwә. Ле әwи дьле хwәда сафи кьр кӧ бь wан хwарьна хwә һʹәрам нәкә (Дан. 1:8). Рʹаст ә әw wәлате хәрибда бу, ле әwи һәләԛәтийа хwә тʹәви Йаһоwа ԛәwи хwәй кьр. Ле гәло ча? Әwи сәр зьмане Ибрани, демәк сәр зьмане хwә, «пʹьртукед» пироз дьхwәнд (Дан. 9:2). Рʹаст ә әw wәкә 70 сала Бабилоне бу, ле йәкә диса wи бь наве Ибрани нас дькьрьн (Дан. 5:13). w16.10 2:7, 8

Һьнәк дьфькьрьн wәки әwана бейи аликʹари дькарьн Кʹьтеба Пироз фәʹм кьн. Ле Иса «хӧламе амьн» кʹьфш кьрийә сәва әw хwарьна рʹӧһʹани бәла кә (Мәт. 24:45-47). Жь сала 1919, Иса бь сайа хӧламе амьн али шагьртед хwә дькә, wәки әwана Кʹьтеба Хwәде фәʹм кьн у пәй рʹийа wи һәрʹьн. У чахе әм гӧрʹа тʹәмийед Кʹьтеба Хwәде дькьн, әм щьватеда тʹәмьзайе, әʹдьлайе у йәктийе хwәй дькьн. Һәр кәс жь мә гәрәке пьрсе бьдә хwә: «Ле әз гӧрʹа Иса дькьм у пәй рʹебәрийа хӧламе амьн дьчьм?» Әм жь Хәбәра Йаһоwа педьһʹәсьн дәрһәԛа пʹара тʹәшкиләта wийә сәр әʹзмана. Мәсәлә, Һәзәԛел пʹехәмбәр дитьнокеда дит пʹара тʹәшкиләта Хwәдейә сәр әʹзмана (Һәзԛл. 1:4-28). Зутьрәке Иса wе тʹәви мьлйакʹәта ԛьрʹа ве дьнйа зӧлм бинә, у ләма жи әʹрәба Йаһоwа зу дьчә wәки сәрwертийа Хwәде избат кә у наве wи пироз кә! w16.11 3:9, 10

Әм жи мина шагьртед Иса йә ԛьрʹна йәкеда, тʹәвайи тʹоп дьбьн сәва һин бьн у дьл бьдьнә һәв (1 Корн. 14:31). Һәла һе хьзмәткʹаред щерʹьбанди жи һʹәwщә нә кӧ һелана бьдьнә wан. Wәрә әм мәсәла Йешу шеwьр кьн. Әwи гәләк сала Хwәдерʹа бь амьни хьзмәт дькьр. Ле йәкә Йаһоwа готә Муса кӧ һәрә Йешу ԛәwи кә. Йаһоwа гот: «Ль Йешу әʹмьр кә, дьл бьдә ль бәр wи у бьшьдинә, чьмки әwе пешийа ви мьләтива һәрә у wи әʹрди кʹижани те бьбини wанрʹа бькә мьлкʹ» (Ԛан. Дщр. 3:27, 28, ПКʹМ). Йешу гәрәке рʹебәри Исраелийа бькьра сәва әwана әʹрде создайи wар буна. Әw гәрәке бькʹәта нав гәләк шәрʹа у һәла һе жи йа лапә кем шәрʹәкида wе бьда дәр (Йешу 7:1-9). Бешьк, Йешурʹа гәләк лазьм бу wәки дьл бьдьнә wи у wи ԛәwи кьн. Wәрә әм жи дьл бьдьнә рʹуспийа у ӧса жи бәрпьрсийаред мьһале, чьмки әwана хәбата гьран дькьн бона щьмәʹта Хwәде (1 Тʹеслн. 5:12, 13). w16.11 1:12, 13

Леколинкʹаред Кʹьтеба Пироз фәʹм дькьрьн кӧ бәс нинә тʹәне һәвал у мәрьвед хwәйи незикрʹа бежьн, wәки әwана дьхwазьн жь рʹелигийа ԛәлп бьԛәтьн. Wана дьхwәст кӧ дьнйа әʹлам пебьһʹәсә wәки Бабилона Мәзьн әw һәйә ԛава рʹелиги! Ләма хьлазийа сала 1917 һʹәта дәстпека сала 1918, чәнд һʹәзар Леколинкʹаред Кʹьтеба Пироз бь хирәт бәла кьрьнә 10 000 000 бәлавок. Ве бәлавокеда һәбу готар бь наве «Һьлшандьна Бабилоне». Әw бәлавок әʹйан кьр рʹасти дәрһәԛа Мәсиһитийа ԛәлп. Бьдьнә һʹәсабе хwә wәки сәрwеред дере чьԛас һерс дькʹәтьн. Ле әw йәк Леколинкʹаред Кʹьтеба Пироз нәда сәкьнандьне, wана бәрдәwам дькьр шьхӧле хwә бькьн. Wана ԛәwи сафи кьр wәки «гӧрʹа Хwәде бькьн, нә кӧ йа мәрьва» (Кʹар. Шанд. 5:29). Гәло әм чь педьһʹәсьн жь wан ԛәwьмандьна? Әм педьһʹәсьн wәки wәʹде шәрʹе һʹәмдьнйайе йа I, Мәсиһийед амьн нә кӧ кʹәтьбун дилтийа Бабилона Мәзьн, ле әwана дәрдькʹәтьн жь дилтийа wе, у һьн жи али мәрьва дькьрьн кӧ әwана жи аза бьн. w16.11 5:2, 4

Һьнәк дьбәк бьфькьрьн, wәки ве рʹезеда Паwлос бәрамбәри һәв дькә мәрьвед ве дьнйайе у Мәсиһийед рʹаст. Ле әwи әw нәʹмә Мәсиһийед Рʹомерʹа ньвиси, кʹижан кӧ «пирозбунерʹа газикьри» бун, демәк йед бьжартирʹа (Рʹом. 1:7). Әм дьвиньн wәки Паwлос wан рʹезада фьрԛи дькьрә ортʹа Мәсиһийед кӧ бь хwәстәка бәдәне дьжитьн, у йед кӧ бь рʹебәрийа рʹӧһʹе Хwәдейи пироз дьжитьн. Паwлос гот кӧ жийина «бь бьнйатʹа мәрьвайе», те һʹәсабе кӧ «тәме гӧна» нав бәдәна мәрьвада «йа хwә» дькә, демәк сәрwертийе дькә (Рʹом. 7:5). Паwлос гот, кӧ «йед кӧ ль гора бьнйатʹа мәрьвайе дьжин», әwана пәй хwәстьнед бәдәне дькʹәвьн. Әw мәрьв тʹәне сәр хwәстьнед хwә дьфькьрьн, фьрԛи тʹӧнә хwәстьнед сексуали йан хwәстьнед майин. Әw мәрьв ве йәке дькьн чь кӧ әwана дьхwазьн. w16.12 2:5, 7

Һьнәк дьбәкә дьлтәнг дьбьн сәва кьред хwә йан шашийед хwәйә бәре. Пʹадша Даwьд жи щара дьлтәнг дьбу, жь бо ве йәке кӧ нәһәԛийед wи сәр сәре wирʹа бьльндтьр бьбун. Әwи гот: «Дькьм зарин жь ахинийа дьле хwә» (Зәб. 38:3, 4, 8, 18). Ве дәрәщеда Даwьд чь гәрәке бькьра? Әwи ча хwә да кʹьфше һʹаләки ӧсада? Әwи баwәр дькьр, wәки Йаһоwа рʹәʹм ә у дьбахшинә wи (Зәб. 32:2, 3, 5). Щара әм дькарьн дәстпекьн гәләк хәма бькьн сәва рʹожа иройин. Мәсәлә, чахе Даwьд ньвиси Зәбура 55, wи wәʹдәйи әw гәләк дьлшькәсти бу, чьмки әʹмьре wи бьн ԛәзийеда бу (Зәб. 55:2-5). Ле йәкә wи һʹале чәтьнда у дьлтәнгийеда, әwи диса жи баwәрийа хwә Йаһоwа дьани. Ве тәнгасийеда Даwьд тʹьме Хwәдерʹа дӧа дькьр, ле йәкә хwәха жи тьштәк дькьр сәва хәмед хwә кем кә (2 Сам. 15:30-34). Wәрә әм жи чʹәʹв бьдьнә Даwьд. Wәʹде тәнгасийа гәләк дьлтәнг нәбьн, ле чь дәсте мә те бькьн, сәва чәтьнайа дәрбаз кьн. Чь жи әм нькарьн, wәрә әм бьдьнә дәсте Йаһоwа, wәки әw али мә бькә. w16.12 3:14, 15

Даwьд ԛәбул кьр wәки Йаһоwа али wи бькә кӧ рʹӧһʹанида ԛәнщ бә. Ле әwи ча әв йәк да кʹьфше? Йа пешьн, әwи ширәткьрьна Натʹан пʹехәмбәр ԛәбул кьр. Даwьд гӧнед хwә дьани рʹуйе хwә у Йаһоwарʹа дӧа дькьр, wәки бьбахшинә wи. Әwи бь дьл у щан дьхwәст диса ԛәбулкьрьна Йаһоwа бьстинә (Зәб. 51:1-17). Даwьд дәwса кӧ дьлтәнг буйа жь бо гӧнед хwә, дәрсәкә баш хwәрʹа һин бу. Әwи ида тʹӧ щар гӧне ӧса гьран нәдькьр. Әw һʹәта мьрьне амьн ма, у әw бира Йаһоwада нә ча мәрьве амьн у дьлсах (Ибрн. 11:32-34). Әм чь дькарьн һин бьн жь мәсәла Даwьд? Һәрге әм гӧнәки гьран бькьн, әм гәрәке жь Йаһоwа бахшандьне һиви кьн. Әм гәрәке бәр wи «гӧнед хwә бьдьнә рʹуйе хwә» (1 Йуһʹн. 1:9). Ӧса жи әм гәрәке һәрʹьнә щәм рʹуспийа, сәва кӧ әwана рʹӧһʹанида али мә бькьн (Аԛуб 5:14-16). Чахе әм аликʹарийа Йаһоwа ԛәбул дькьн, бь ве йәке әм нишан дькьн wәки әм итʹбарийа хwә созе wи тиньн, кӧ әw wе мә ԛәнщ кә у бьбахшинә. Паши ве йәке әм гәрәке жь шашийед хwә дәрсе хwәрʹа һьлдьн, бәрдәwам кьн Йаһоwарʹа хьзмәт кьн, у бь баwәрийе һивийа ахьрийе бьн (Ибрн. 12:12, 13). w17.01 1:13, 14

Гәло кьред кʹӧбари чь йә? Чахе мәрьв бь сәри хwә тьштәки ӧса дькә чь кӧ жерʹа изьн тʹӧнә, дькарьн бежьн wәки әw кʹӧбар ә. Әм гьшк гӧнәкʹар ьн, ләма щара әм дькарьн тьшта бь сәри хwә бькьн. Ле һәрге әw мәрʹа дьбә хәйсәт ча дәрәща Шаwулда бу, зу йан дәрәнг әме һәләԛәтийа хwә тʹәви Хwәде хьраб кьн. Зәбура 119:21-да, дәрһәԛа Йаһоwа те готьне: «Тӧ кʹӧбаред ньфьркьри һьлтейи». Ле гәло чьрʹа Йаһоwа һьндава wанда ӧса нә? Чахе әм бь сәри хwә тьштәки дькьн әw һе хьраб ә, нә кӧ беһʹәмде хwә шашийе бькьн. Чьрʹа? Чьмки бь wе йәке, әм беһӧрмәтийе дьдьнә кʹьфше һьндава Йаһоwа, йе кӧ Сәрwере мә йә. Һьн жи, һәрге әм тьштед ӧса бькьн чь кӧ изьна мә тʹӧнә у мә накʹәвә, һәләԛәтийа мә тʹәви мәрьва дькарә хьраб бә (Мәтʹлк. 13:10). Ӧса жи, чахе мәрьвед дьн пебьһʹәсьн кӧ жь бо кʹӧбарийе мә кьред ӧса кьрийә, әме шәрми бьн у хwә ньмьз тʹәхмин кьн (Луԛа 14:8, 9). Бәле, кʹӧбари ахьрийа баш мәрʹа найнә, у ләма чаwа кӧ Кʹьтеба Пироз дьдә кʹьфше, Хwәде дьхwазә wәки әм шкәсти у мьлук бьн. w17.01 3:4, 5

Адәм ида нькарьбу бь тʹәмами чʹәʹв бьда һʹӧнӧред Хwәде, чьмки бу гӧнәкʹар. Адәм нә кӧ тʹәне ахьрийа хwә хьраб кьр, ле ӧса жи ахьрийа зарʹед хwә, әwана бь гӧнә у мьрьне һатьнә дьне (Рʹом. 5:12). Бона гӧне Адәм, рʹькʹьнйата wи жи жийина һʹәта-һʹәтайе ӧнда кьр. Шәйтʹан Адәм у Һеwа жь Хwәде ԛәтанд, у һьнгеда һʹәта рʹожа иройин әw мәрьва дьхальфинә сәва wана жь Хwәде дур хә (Йуһʹн. 8:44). Һʹьзкьрьна Хwәде һьндава мәрьва йәкә кʹӧта нәбу. Рʹаст ә Адәм у Һеwайе хwә жь Хwәде дур хьстьн, йәкә Йаһоwа дьхwазә wәки мәрьв незики wи бьн у бьбьнә достед wи. Әw нахwазә wәки кәсәк бьмьрә (2 Пәт. 3:9). Ләма паши гӧне Адәм у Һеwайе, Хwәде дәрберʹа сафи кьр тьштәки бькә, wәки диса мәрьв бькарьбьн бьбьнә достед wи (Йуһʹн. 3:16). w17.02 1:12-14

Әме һе мьлук бьн, һәрге әм чʹәʹв бьдьнә Хwәде ве йәкеда, кӧ нав мәрьвед дьнда һʹӧнӧред баш бьгәрʹьн. Һәрге әм ӧса бькьн, әме дина мәрьва нәкʹьшиньн сәр хwә у нә жи wанрʹа бежьн, wәки әwана чь бькьн чь нәкьн. Дәwсе әме бь мьлукти ширәта жь wана һьлдьн у гӧһ бьдьнә гьлийед wан. Әме хушк-бьрарʹа ша бьн чахе әwана щабдари у кʹьфшкьрьнед тʹәзә бьстиньн. Ӧса жи әме Йаһоwа рʹумәт бькьн чахе бьвиньн, кӧ әw ча һʹәму хушк-бьред мә нав тʹәмамийа дьнйайеда кʹәрәм дькә (1 Пәт. 5:9). Чахе әм һин бьн сәр тьшта бьньһерʹьн бь чʹәʹве Йаһоwа, әме сәрwахт бьн. Һәрге әм тʹьме Кʹьтеба Пироз у әʹдәбйәтед мә бьхуньн, дӧа бькьн, у чь кӧ һин дьбьн бьдьнә хәбате, бь ве йәке әме исафа хwә рʹаст һин кьн (1 Тимтʹ. 1:5). Әме һин бьн пешийе бькʹәвьнә һʹәйра кʹара мәрьвед дьн, нә кӧ һʹәйра кʹара хwә. Һәрге әм алийе хwәда һʹәму тьшти дькьн, Йаһоwа соз дьдә, wәки wе мә «кʹамьл кә», у али мә бькә wәки әм мьлук бьн у һʹӧнӧред дьн жи нав хwәда пешда биньн (1 Пәт. 5:10). w17.01 4:17, 18

Хушк-бьред мә һежайи һӧрмәт у ԛәдьр ьн, илаһи рʹуспи, кӧ рʹебәрийе мә дькьн. Әм наньһерʹьн кӧ әwана чь мьләти нә, хwәнди йан нәхwәнди нә, дәwләти йан кʹәсиб ьн. Әwана шьхӧләки мәзьн дькьн тʹәшкиләта Хwәдеда, чьмки мьԛати щьмәʹта Хwәде дьбьн. Кʹьтеба Пироз wана нав дькә «пʹешкʹеш бь щурʹе мәрьва» (Әфәс. 4:8, ДТʹ). Ԛьрʹна йәкеда хушк-бьра гәләк ԛәдьре wан бьра дьгьртьн, йед кӧ рʹебәри дькьрьн. Әм жи гәрәке ӧса бькьн. Бьфькьрьн дәрһәԛа рʹуспийед щьвате, бәрпьрсийаред мьһале, әндәмед Комитейа Филиале у әндәмед Кʹома Рʹебәрийе. Әм wан бьра щурʹәки мәхсус рʹумәт накьн у чахе wана дьвиньн, һʹәсаб накьн ча һори кʹеләка мә нә. Ле әм ԛәдьре wан бьра бьльнд дьгьрьн, чьмки әwана мьлук ьн у бона шьхӧле Хwәде гьран дьхәбьтьн (2 Корн. 1:24; Әʹйан. 19:10). w17.03 1:13

Рʹасти жи Һеродәс Әгрипайе Йәке, йе кӧ бу пʹадше Щьһустане, жь Иса чьԛас щӧдә дьбу. Щарәке сәр щьвинәке, Һеродәс «кʹьнще пʹадшатийе» ль хwә кьр у бәр щьмәʹте ӧса хәбәр да, wәки щьмәʹте кьрә ԛарини: «Әва дәнге хwәдеки йә, нә йе мәрийа йә». Әʹйан ә, wәки Һеродәс дьхwәст кӧ мәрьв wи һӧрмәт кьн. Ле «дәстхwәда мьлйакʹәтәки Хӧдан wи хьст, бона кӧ wи шькьри нәда Хwәде, кӧрми бу мьр» (Кʹар. Шанд. 12:21-23). Әʹйан бу wәки Йаһоwа wи нәбьжарт чаwа сәрwере щьмәʹта хwә. Ле Иса избат кьр wәки Хwәде wи бьжарт. Әwи тʹьме рʹумәт дьда Йаһоwа кӧ әw ә Рʹебәре Лапи Мәзьн йе щьмәʹта хwә. Хwәде Иса бьжарт ча рʹебәр, нә тʹәне сәр чәнд сала. Чахе Иса жь мьрьне рʹабу, әwи готә шагьртед хwә: «Һʹәму һʹӧкӧме әʹрд у әʹзмен мьнрʹа һатә дайине». Паше әwи зедә кьр: «Әз ирода тʹьме һʹәта ахьрийа дьнйайе тʹәви wә мә!» (Мәт. 28:18-20). w17.02 3:20, 21