Нисан

Һʹәта кӧ мәрьв баwәрийа хwә ԛӧрбана Иса найньн, Хwәде wана һʹәсаб дькә ча дьжмьнед хwә. Ләма әм борщдар ьн wанрʹа гьли кьн кӧ әwана дькарьн бьбьнә досте Хwәде. Йуһʹәннайе шанди ньвиси: «Әwе кӧ Кӧрʹ баwәр дькә, жийина wийә һʹәта-һʹәтайе һәйә. Әwе кӧ гӧрʹа Кӧрʹ накә, әw жийине набинә, ле хәзәба Хwәде ль сәр wи дьминә» (Йуһʹн. 3:36). Әм бәхтәwар ьн кӧ ԛӧрбана Иса мәщале дьдә мә, кӧ әм бьбьнә досте Хwәде (2 Корн. 5:18-20). Әм ӧса жи мәрьва һин дькьн дәрһәԛа рʹастийе у али wан дькьн кӧ незики Хwәде бьн у бьбьнә достед wи. Әw һәйә пʹарәкә фәрз шьхӧле бәлакьрьна мьзгинийеда. w16.07 4:8-10

Иса дӧайе хwәда пешийе гот wәки наве Хwәде пироз бә. Бәле, Йаһоwа пироз ә у ләма һʹәму принсип у ԛанунед wи пироз ьн. Ле Шәйтʹан Әдәнеда шәрʹ авитә Хwәде, wәки изьна wи тʹӧнә мәрьварʹа ԛануна дайнә. Әw дәрәwәкә мәзьн бу, у Шәйтʹан бь бӧхдан наве Хwәде беһӧрмәт кьр (Дәстп. 3:1-5). Ле Иса бь дьл наве Хwәде һʹьз дькьр (Йуһʹн. 17:25, 26). Әwи һʹәму тьшт дькьр сәва наве Хwәде пироз кә (Зәб. 40:8-10). Иса пе жийина хwәйә сәр әʹрде избат кьр, wәки һʹәму ԛанунед Йаһоwа рʹаст ьн у бона кʹара мә нә. Әw бь тʹәмами амьн бу Баве хwәйи әʹзманарʹа. Иса һʹәта мьрьна хwә избат кьр, wәки мәрьве беԛьсур дькарә һʹәму тьштида гӧрʹа Хwәде бькә. w17.02 2:2-4

Бәрх әw һәйә Иса Мәсиһ, «Бәрхе Хwәде, йе кӧ гӧнед дьнйайе һьлдьдә» (Йуһʹн. 1:29). Иса жь һʹәму пʹадша бьльндтьр ә, чаwа Кʹьтеба Пироз дьбежә: «Әw . . . Пʹадшайе пʹадшайа у Хӧдане хӧдана йә. Әw бь тʹәне бемьрьн ә у рʹонаийа кӧ тʹӧ кәс нькарә незик бьбә дә рʹудьнә. У жь мьрован тʹӧ кәси әw нәдитийә у нькарә бьбинә» (1 Тимтʹ. 6:14-16, ИМ). Дьнйайеда ԛә һәбуйә пʹадшаки ӧса, йе кӧ бь рʹәзәдьли әʹмьре хwә бьда бона гӧнед мәрьва? На, пʹадше ӧса тʹӧнә буйә. Ләма дьбәкә һун жи рʹази нә тʹәви гьлийед бь һʹәзара мьлйакʹәта кӧ дьбежьн: «Әw Бәрхе кӧ һатийә сәржекьрьне һежа йә кӧ зорайе, дәwләмәндтийе, сәрwахтийе, ԛәwате, һӧрмәте, рʹумәте у кʹәрәме бьстинә» (Әʹйан. 5:12, ДТʹ). Әм гәрәке Йаһоwа у Мәсиһ һʹӧрмәт-рʹумәт кьн. Жийина мәйә һʹәта-һʹәтайе ве йәкева гьредайи йә (Зәбур 2:11, 12; Йуһʹн 5:23). w17.03 1:3, 4

Йәфтаһ жь дирока Исраеле заньбу, кӧ Йаһоwа ча бу һьндава щьмәʹта Хwәда. Бь ве йәке әw һин бу тедәрхә, кӧ бәр чʹәʹве Йаһоwа чь рʹаст ә у чь нәрʹаст ә (Һʹакьм. 11:12-27). Принсипед Хwәде кӧ һʹиме Ԛануна Муса бун, һʹӧкӧм дьбун сәр ньһерʹандьн у дьле Йәфтаһ. Әwи заньбу кӧ Йаһоwа хwәш найе чахе мәрьв кʹине дажо, чьмки Хwәде жь щьмәʹта Хwә дәwа дькьр кӧ әwана һәвдӧ һʹьз бькьн. Ԛанун ӧса жи һин дькьр кӧ мәрьв гәрәке пьштгӧһе хwәва нәвежә һʹәwщед мәрьвед дьн, у һәла һе wи мәрьви жи кʹе wи нәфрʹәт дькә (Дәркʹ. 23:5; Ԛан. Кʹаһ. 19:17, 18). Дьԛәwьмә мәсәла Усьв жи һʹӧкӧм дьбу сәр Йәфтаһ. Усьв мәрьвәки амьн бу. У әw рʹәʹм бу һьндава бьред хwә, йед кӧ wи нәфрʹәт дькьрьн (Дәстп. 37:4; 45:4, 5). Дьбәкә Йәфтаһ дьфькьри сәр мәсәлед wи щурʹәйи, у әwе йәке али wи кьр тьштед ӧса бькә, чь кӧ Йаһоwа хwәш те. Бешьк, бьред Йәфтаһ дьле wи гәләк ешандьн, ле йәкә әwи диса бәрдәwам дькьр Йаһоwарʹа хьзмәт бькә у али щьмәʹта хwә бькә (Һʹакьм. 11:1-3). w16.04 1:8, 9

Щьмәʹта Йаһоwа һәртʹьм ԛимәт дькьр әw мәщал, кӧ тʹәви һәв тʹоп бьн. Паши wе йәке ча щьват һатә сазкьрьне, пәйчуйед Иса «тʹьме . . . ль һәв дьщьвийан». Бәле, тӧ жи дьбәкә wәк wан дьхwази тʹьме бейи сәр щьвине. Ле һәр Мәсиһи рʹасти чәтьнайа тен. Жь бо хәбата хwә, гәләк шьхӧла, у хәмед дьн, дькарә чәтьн бә һәртʹьм бенә щьвине. Һәрге әм щьвинед хwә ԛимәт дькьн, әw йәк wе али мә бькә кӧ wан чәтьнайа алт кьн, у һәртʹьм бенә щьвине. Һьнә хушк-бьред мә нькарьн һәртʹьм бенә щьвине, жь бо һьнә дәрәщед кӧ wанва гьредайи ниньн. Рʹуспи дькарьн али wан хушк-бьред бесьһʹәт бькьн, йед кӧ нькарьн бенә щьвине, бәрнама щьвине бьбьһен. Мәсәлә, рʹуспи дькарьн саз кьн дәнг ньвисандьна бәрнаме, йан жи ӧса бькьн кӧ әwана пе телефоне бьбьһен. w16.04 3:3

Мәсәлед хьзмәткʹаред амьн, дькарьн билани у ԛәwате бьдьнә мә, сәва әм сәбьр кьн. Мәсәлә, бьфькьрьн дәрһәԛа Шәдрак, Мәшак у Абәднәго. Wана инкʹар кьр кӧ сәре хwә бәр пʹут дайньн, кʹижан кӧ симбола сәрwертийа Бабилоне бу (Дан. 3:16-18). Иро, мәсәла wан али гәләк Шәʹдед Йаһоwа кьрийә, wәки бь мерхаси инкʹар кьн рʹумәте бьдьнә бәйраԛа wәлат, кʹидәре әwана дьжин. Иса жи ве йәкеда нәхшәки баш мәрʹа һиштийә. Әw нәдькʹәтә нава шьхӧлед политикайе у шәрʹед ве дьнйайе. Әwи заньбу кӧ ве йәкеда шагьртед wи wе чʹәʹв бьдьнә wи, у әwи wанрʹа гот кӧ «мерхас бьн! Хушк-бьред щьвата тәда дькарьн али тә бькьн кӧ тʹәвнәбуйине хwәй ки. Әwана wе тә ԛәwи кьн, һәрге әwана заньн дәрһәԛа чәтьнайед тә. Жь wан һиви кә кӧ бона тә дӧа бькьн. Бәле, һәрге әм дьхwазьн кӧ хушк-бьред мә али мә бькьн у дӧа кьн бона мә, әм жи гәрәке бона wан дӧа бькьн (Мәт. 7:12). w16.04 4:16, 18

Әм чь дькарьн бежьн дәрһәԛа Шәʹдед Йаһоwа? Шьхӧле wан пе пʹәре ԛӧрбанкьрьна рʹәзәдьли пешда дьчә (2 Корн. 9:7). Нә Ода Щьватада, нә жи щьватед мәзьнда, пʹәрә найе тʹопкьрьне. Сала 2015-да, Шәʹдед Йаһоwа wәкә 2 милиард сьһʹәт хәрщ кьрьнә сәр бәлакьрьна мьзгине, у һәр мәһ 9 милйона зедәтьр һинкьрьна Кʹьтеба Пироз дәрбаз кьрьнә. Рʹасти жи әʹщебмайи йә, wәки әwана нә кӧ тʹәне беһәԛ әwи шьхӧли дькьн, ле хенщи ве йәке әwана хәрще хwә кʹиси хwә дадьдьн. Леколинкʹарәки дәрһәԛа шьхӧле Шәʹдед Йаһоwа ӧса гот: «Нета wанә сәрәкә әw ә кӧ мьзгине бәла кьн у һин кьн. . . . Кʹәшишед wан тʹӧнә нә, ләма хәрще wан һьндьк ә». Wәки ӧса нә, нета мә чь йә кӧ мьзгине бәла дькьн? Һәрге кьн бежьн, әм әwи шьхӧли бь рʹәзәдьли дькьн, чьмки әм Йаһоwа у мәрьва һʹьз дькьн. Әw һазьрбуна мә, тинә сери пʹехәмбәртийа жь ве рʹеза рʹоже. w16.05 2:9

Әм гәрәке wәʹдәдәрбазкьрьна ӧса нәжберьн, кʹижан кӧ фькьред нәтʹәмьз пешда тиньн. У һәрге әм рʹьнд заньн кӧ Йаһоwа чь һʹьз дькә у чь нәфрʹәт дькә, әме һеса тедәрхьн кӧ wәʹдәдәрбазкьрьна чь щурʹәйи бьжберьн, мәсәлә кʹижан кʹьтеб бьхуньн, филм бьньһерʹьн, йан кʹижан листьк бьлизьн. Мәсиһийе сәрwахтрʹа, нәлазьм ә жь кәсәки бьпьрсә кӧ чь бьжберә, чьмки дәрһәԛа wан тьшта, фькьред Йаһоwа Хәбәра wида зәлал ьн. Әм дькарьн сафикьрьна бь щурʹә-щурʹә бькьн, у һәр щурʹе сафикьрьне Йаһоwа дькарә ԛәбул кә. Ле чахе мәрʹа лазьм ә сафикьрьнәкә фәрз бькьн, wе керһати бә һәрге әм жь рʹуспийа йан жь хушк-бьред щерʹьбанди ширәта һьлдьн (Тито 2:3-5; Аԛуб 5:13-15). Ле бәле, әw найе һʹәсабе кӧ әм жь wана бьхwазьн, wәки дәwса мә сафи кьн. Чьмки әм гәрәке һин бьн хwәха тедәрхьн, кʹижан сафикьрьн wе рʹаст бьн у кʹижан на (Ибрн. 5:14). Паwлосе шанди гот: «Чьмки һәр кәсе хӧрща хwә һьлгьрә» (Галт. 6:5). w16.05 3:15, 16

Йаһоwа дина хwә надә рʹуйе мәрьва. Дәwсе, әw дьле wан дьньһерʹә, демәк дьньһерʹә кӧ һьндӧрва әwана мәрьвнә ча ньн (1 Сам. 16:7б). Әw йәк һатә кʹьфше, чахе Йаһоwа щьвата Мәсиһи саз кьр. Әwи гәләк мәрьв жьбарт сәва незики хwә у Кӧрʹе хwә кә. Ле бәр чʹәʹве мәрьва, те бежи һьнәк жь wан нәһежа бун (Йуһʹн. 6:44). Мәсәлә, Шаwуле Ферьси. Ле йәкә Йаһоwа, Шаwул ча аха у һʹәрʹийа бекер һʹәсаб нәкьр (Мәтʹлк. 17:3). Дәwсе, Йаһоwа дьле wи дит у заньбу кӧ жь wи дькарә дәрданәкә ԛимәт дәре, демәк йа «бьжарти». Ӧса жи Йаһоwа заньбу кӧ Шаwуле wе «нәщьһуйа, пʹадша у зарʹед Исраелева» шәʹдәтийе бьдә (Кʹар. Шанд. 9:15). Хwәде ӧса жи йед майин жи дит, жь кʹижана «дәрданед бона рʹумәте» дькарьбун дәркʹәтана. У әw мәрьв, бәре сәрхwәш, бенамус, у дьз бун (Рʹом. 9:21; 1 Корн. 6:9-11). Ле чахе wана жь Хәбәра Хwәде занәбуна рʹаст стандьн у баwәрийа хwә һьндава Йаһоwа ԛәwи кьрьн, wана һишт кӧ Хwәде wана бьгӧһезә. w16.06 1:4

Хwәде бь сайа Хәбәра хwә, щьвате, у бь сайа хьзмәтийе, аликʹарийе дьдә мә кӧ мина һʹәрʹийа нәрм бьн. Чаwа ав халийе нәрм дькә, ӧса жи хwәндьна Кʹьтеба Пирозә һәррʹожи у фькьрандьн, али мә дькә кӧ әм дәсте Йаһоwада нәрм бьн. Йаһоwа жь пʹадшед Исраеле дәʹwа дькьр, wәки әwана хwәрʹа башԛә лекьн Ԛануна Хwәде у һәр рʹож бьхуньн (Ԛан. Дщр. 17:18, 19). Шандийа жи фәʹм дькьрьн, кӧ бона хьзмәтийе гәләк фәрз ә тʹьме Ньвисаред Пироз бьхуньн у сәр бьфькьрьн. Хенщи ве йәке, әwана ӧса жи wәʹде хьзмәтийе мәрьвед дьн жи һелан дькьрьн ӧса бькьн. Әwана ньвисаред хwәда жи, бь сәда щара готьнед жь Ньвисаред Ибрани дьwәкʹьландьн (Кʹар. Шанд. 17:11). Иро әм жи фәʹм дькьн, кӧ гәләк фәрз ә Кʹьтеба Пироз һәр рʹож бьхуньн у сәр бьфькьрьн (1 Тимтʹ. 4:15). Әw йәк али мә дькә кӧ мьлук бьн, у нәрм бьн дәсте Йаһоwада. w16.06 2:10

Әw йәк илаһи гәләк фәрз бу wан пашwәхтийада, чахе мәрьва шәрʹед һʹәмдьнйайеда һәвдӧ дькӧштьн. Мәсәлә, тʹәне Шәрʹе Һʹәмдьнйайейә II-да, wәкә 55 милйон мәрьв һатьнә кӧштьне. Ле щьмәʹта Йаһоwа тʹәви wи шәрʹи нибу, wана мәрьв нәдькӧштьн (Мих. 4:1, 3). Әwе йәке али wан кьр, кӧ әwана «щабдаре хуна» тʹӧ кәси нибьн (Кʹар. Шанд. 20:26). Рʹаст ә әв дьнйа хьраб ә, чьмки Шәйтʹан «мире ве дьнйайе» һʹӧкӧм дькә сәр, ле йәкә хьзмәткʹаред Йаһоwа һе зедә дьбьн у пешда дьчьн (2 Корн. 4:4). Шәйтʹан система политика ве дьнйайе у медйайе дьдә хәбате, сәва шьхӧле бәлакьрьна мьзгинийе бьдә сәкьнандьне. Шәйтʹан занә кӧ wәʹде wи һьндьк ә, у гәләк тьшт дькә, сәва әм жь Йаһоwа дур кʹәвьн у wирʹа хьзмәт нәкьн. У әw ве йәке бь щурʹә-щурʹә метода дькә. Ле әw нькарә әwи шьхӧли бьдә сәкьнандьне! (Әʹйан. 12:12). w16.06 4:3, 4

Иса диса жи дина мә дьдә сәр ве йәке, кӧ ча Йаһоwа мьԛати әʹфьринед хwә дьбә. Иса әʹйан кьр кӧ әм чь дькарьн һин бьн жь «сосьнед чоле». Дьԛәwьмә Иса дьгот дәрһәԛа кӧлиркед гәләк щурʹә-щурʹә, кʹижан кӧ чоледа шин дьбьн. Әw һʹәму кӧлирк гәләк бәдәw ьн. Әw кӧлирк хwәрʹа кʹьнща надьрун. Ле йәкә әwана гәләк бәдәw ьн! Иса гот кӧ «Сьлеман жи ль нава тʹәмамийа wе хер-хьзна хwәда мина жь wан йәке хwә нәкьр»! Бьфькьрьн дәрһәԛа wан гьлийед Иса: «Һәгәр гиһайе чоле, . . . Хwәде ӧса дьхәмьлинә, ле чьԛас зедә wе ль wә кә, кембаwәрно?» (Мәт. 6:29, 30). Шагьртед Иса гәрәке баwәрийа хwә һьндава Хwәде ԛәwи кьрана (Мәт. 8:26; 14:31; 16:8; 17:20). Әwана гәрәке баwәр буна, кӧ Йаһоwа wе әʹсә хәм бькә бона wан. Ле әм чь дькарьн бежьн дәрһәԛа хwә? Әм баwәр дькьн кӧ Хwәде wе бона мә жи хәм бькә? w16.07 1:15, 16

Әм рʹасти чь чәтьнайа жи бен, Йаһоwа wе али мә бькә, кӧ әм сәбьр кьн (1 Пәт. 1:6). Әw wе тʹьме һаԛаси али мә бькә, чьԛас кӧ мәрʹа лазьм ә сәва әм тәнгасийа тәйах кьн. Йаһоwа ԛәнщийа нәһежа дьдә кʹьфше бь ве йәке, кӧ гәләк кʹәрәма дьдә мә. Йәк жь wан кʹәрәма әw ә кӧ Йаһоwа гӧнед мә дьбахшинә. Ле әw тʹәне wи чахи дьбахшинә мә, һәрге әм гӧне хwә тиньн рʹуйе хwә у гьран дьхәбьтьн, сәва кемаси у хwәстьнед хьраб нав хwәда дәрхьн (1 Йуһʹн. 1:8, 9). Паwлос ньвиси: «Әwи әм жь һʹӧкӧмәтийа тәʹристанийе хьлаз кьрьн у щи-гӧһасти Пʹадшатийа Кӧрʹе хwәйи һʹьзкьри кьрьн, пе кʹижани әм аза бун, аwа готи мә бахшандьна гӧна станд» (Колс. 1:13, 14). Әм гәләк рʹази нә сәва рʹәмтийа Хwәде у дьхwазьн wи һʹӧрмәт у рʹумәт кьн. Әw йәк кӧ Йаһоwа гӧнед мә дьбахшинә, мәщал мәрʹа вәдьбә кӧ әм гәләк кʹәрәмед баш бьстиньн. w16.07 3:7-9

Шәйтʹан чь жи кьр, ле йәкә Йаһоwа хәм кьр кӧ мәрьв һивийа ахьрийа баш бьн. Дәрһәԛа wе йәке Кʹьтеба Пирозда пʹехәмбәртийа пешьнда һатә ньвисаре. Пʹехәмбәртида дьһатә готьне кӧ Хwәде гәрәке wи бьшанда, йе кӧ Мире-щьн «бьһʹьнщьрʹинә». Бь сайа wе йәке, мәрьвед гӧһдар wе бькарьбьн бьстиньн жийина һʹәта-һʹәтайе сәр әрде, кʹижан кӧ мәрьвед пешьн ӧнда кьрьн. Бь ве йәке ԛьрара Йаһоwайә пешийе wе бе сери (Йуһʹн. 3:16). Рʹабәрибуна Адәм у Һеwайе чаwа сәр зәwаща wан һʹӧкӧм бу, ӧса жи сәр һʹәму зәwащед дьн. Мәсәлә, чаwа Һеwа ӧса жи һʹәму кʹӧлфәтед паши wе, бь еше зарʹа тиньн. Кʹӧлфәт гәләк һʹәwще мере хwә нә, у мер жи ль сәр жьне һʹӧкӧм дькә у һәла һе бь зорбәтийе жи, у тьштед ӧса иро дь гәләк малбәтада һәнә (Дәстп. 3:16). Кʹьтеба Пироз дьбежә кӧ мер гәрәке бь һʹьзкьрьн сәрwертийе бькьн. Ле жьн гәрәке сәрwертийа мере хwә ԛәбул кьн (Әфәс. 5:33). Һәрге жьн у мере хwәдехоф һәвкʹарийе бькьн, проблемед wан дькарьн кем бьн. w16.08 1:6, 7

Һәнә дәрәщед ӧса кӧ Мәсиһи зәwьщи йә тʹәви wи мәрьви, кʹижан кӧ Йаһоwа наһʹәбинә. Кʹьтеба Пироз рʹьнд дьдә кʹьфше кӧ чьрʹа мер йан жьн гәрәке жь һәв нәԛәтьн, һәла һе wи чахи жи гава йәк жь wан Йаһоwа наһʹәбинә (1 Корн. 7:12-14). Әw жьн йан мер йед кӧ нә Мәсиһи нә, дьԛәwьмә тедәрнахьн, ле әwана жи тенә «пирозкьрьн», чьмки баwәрмәнде Хwәде стандьнә. Зарʹед кӧ wанарʹа дьбьн, әwана жи пирозкьри нә, у бьн пʹәре Хwәдеда ньн. Гәләк мәсәлед баш һәнә, кӧ жьн у меред Мәсиһи алийе мер йан жьна хwә кьрьнә у әwана жи бунә Шәʹдед Йаһоwа. Пәтрусе шанди ширәта дьдә жьнед Мәсиһийа, кӧ гӧрʹа мере хwәда бьн, «wәки жь wан һьнәк жи, һәгәр гӧһдарийа хәбәре накьн, бь пʹәргалийа жьнед хwә, бе готьн жи бенә сәр баwәрийе гава пʹәргалийа wәйә хофә у навә-намус бьбиньн» (1 Пәт. 3:1-4).w16.08 2:14, 15

Йаһоwа дьхwазә wәки хьзмәткʹаред wи, чаwа хушк-бьра һәвдӧ һʹьз бькьн у һәвдӧрʹа бәрдәстийе бькьн (Луԛа 22:24-27). Иса Кӧрʹе Хwәде, сәва кӧ али мәрьва бькә һʹәму тьшт дькьр, у әwи һәла һе әʹмьре хwә жи да бона wан (Мәт. 20:28). Табита гәләк кьред ԛәнщ дькьр у гәләк мәрʹд бу һьндава хушк-бьра (Кʹар. Шанд. 9:36, 39). Мәрйәм, хушкәкә жь Рʹоме бу, кʹижан кӧ сәва хушк-бьра гәләк гьран дьхәбьти (Рʹом. 16:6). Ле ча әм дькарьн али йед тʹәзә бькьн, wәки әwана фәʹм кьн, кӧ чьԛас фәрз ә али хушк-бьра бькьн? Чахе әм тʹәсәлийа хушк-бьред нәхwәш у йед әʹмьрда мәзьн дькьн, әм дькарьн мьзгинванед тʹәзә тʹәглиф кьн, кӧ тʹәви мә бен. Де-бав чахе сәрики wан хушк-бьра дьхьн, дькарьн зарʹед хwә жи тʹәви хwә бьвьн. Рʹуспи дькарьн тʹәви щаһьла йан жи тʹәви мьзгинванед тʹәзә ве йәкеда һәвкʹарийе бькьн. Мәсәлә, чахе һʹәwщәти һәйә, әwана хушк-бьред әʹмьрда мәзьнрʹа хwарьне бьвьн, йан жи мала wанда чь лазьм ә чекьн. Ӧса йед щаһьл wе һин бьн ԛәнщийе бькьн йед дьнрʹа у щьватеда гьшкарʹа һʹьзкьрьне бьдьнә кʹьфше (Рʹом. 12:10). w16.08 4:13, 14

Хушкәкә мәйә щаһьл дьбежә: «Дәрсдаред мьн зәндәгьрти дьминьн, кӧ дәрсханеда һе һәнә мәрьвед кӧ Кʹьтеба Пироз баwәр дькьн». Иро гәләк мәрьв баwәр накьн кӧ Хwәде әм әʹфьрандьнә. Һәрге тӧ щаһьл и у Йаһоwарʹа хьзмәт дьки, йан жи һе һин дьби Хәбәра Хwәде, щара дьбәкә дьфькьри кӧ ча тӧ дькари мәрьвед дьнрʹа избат ки, кӧ Йаһоwа йә Әʹфьрандаре мә. Кʹьтеба Пироз мә ширәт дькә wәки чахе әм тьштәки дьбьһен йан дьхуньн, рʹьнд сәр бьфькьрьн у бьщерʹьбиньн. Кʹьтеба Пироз дьбежә кӧ аԛьл wе «тә бьпʹарезә». Ле гәло ча? Аԛьл кӧ Хwәде дайә мә, wе али мә бькә һинкьрьн у философийед ԛәлп инкʹар кьн, у баwәрийа хwә һьндава Хwәдайе мә Йаһоwа ԛәwи кьн (Мәтʹлк. 2:10-12). Һәрге һун дьхwазьн кӧ баwәрийа хwә һьндава Йаһоwа ԛәwи кьн, һун гәрәке wи рʹьнд нас кьн (1 Тимтʹ. 2:4). Ләма чахе һун Хәбәра Хwәде у әʹдәбйәтед мә кӧ сәр һʹиме Кʹьтеба Пироз ьн дьхуньн, сәрʹа-бәрʹа нәхуньн, ле ӧса бьхуньн кӧ нете фәʹм кьн. w16.09 4:1-3

Мәсәлә, һәрге зарʹотийа мә хьраб дәрбаз буйә, йан ньһа әм тәнгасийада ньн у дьфькьрьн кӧ нькарьн жь wан тәнгасийа дәрен, әм жи гәрәке минани Усьв дьлтәнг нәбьн у сьст нәбьн, у ӧса жи дӧдьли нәбьн кӧ Йаһоwа wе мә әʹсә кʹәрәм кә (Дәстп. 39:21-23). Иро әм рʹасти щурʹә-щурʹә чәтьнайа тен. Мәсәлә, дьбәкә һьмбәри мә нәһәԛийе дькьн, йан хьраб сәр мә дьфькьрьн, йан жи ԛәрфе хwә мә дькьн. Ле гәрәке әм дьлтәнг нәбьн, у тʹьме бира хwәда хwәй кьн кӧ ча Аԛуб, Рʹаһеле у Усьв шабуна хwә ӧнда нәдькьрьн. Хwәде жи алийе хwәда wана ԛәwи кьр у кʹәрәм кьр, чьмки wана һәләԛәтийа хwә тʹәви wи гәләк ԛимәт дькьрьн. Wана бәрдәwам дькьр шәрʹ кьн у ль гора дӧайед хwә бьжин. Хьлазийа ве дьнйа хьраб, бәр шемике йә. Ләма әм гәрәке баwәрийа хwә ӧнда нәкьн у һивийа созед Йаһоwа бьн! Ле һун һʹәму тьшти дькьн сәва кʹәрәма Йаһоwа бьстиньн? w16.09 2:8, 9

Де-бавно, мәсәла баwәрийа wә гәләк фәрз ә. Һәрге баwәрийа wә һьндава Хwәде ԛәwи йә, зарʹед wә wе әве йәке бьвиньн у жь wә һин бьн. Бона ве йәке, де-бавно пешийе баwәрийа хwә ԛәwи кьн. Бьра зарʹед wә бьвиньн кӧ Йаһоwа бона wә чьԛас реали йә. Мер у жьнәк жь Бермудайе, гьли дькьн кӧ чахе әwана рʹасти чәтьнайа тен, дәрберʹа тʹәви зарʹед хwә Йаһоwарʹа дӧа дькьн сәва аликʹарийе. Әwана ӧса жи зарʹед хwә һелан дькьн, кӧ хwәха Хwәдерʹа дӧа бькьн. Әw мер у жьн дьбежьн: «Әм ӧса жи ԛиза хwәйә мәзьнрʹа дьбежьн: ‹Бь тʹәмами итʹбарийа хwә Йаһоwа бинә, нава шьхӧле бәлакьрьна мьзгинеда бә, у бона тьштәки гәләк дьлтәнг нәбә›. У чахе әw ӧса дькә, әw хwәха пе чʹәʹве хwә дьвинә кӧ Йаһоwа ча али мә дькә. Ӧса баwәрийа wе һьндава Хwәде у Кʹьтеба Пироз ԛәwи буйә». Бәле, һун нькарьн зоре бькьн, wәки баwәрийа зарʹед wә һәбә. Һун дькарьн тʹохьм бьчиньн у авдьн, ле тʹәне Хwәде мәзьн дькә (1 Корн. 3:6). Ләма тʹьме дӧа бькьн сәва рʹӧһʹе пироз, у бь дьл у щан зарʹед хwәйи ширьн һин кьн. Чахе һун ӧса бькьн, дӧдьли нәбьн кӧ Йаһоwа wе әʹсә wә кʹәрәм кә (Әфәс. 6:4). w16.09 5:16-18

Мер у жьн Серж у Муриел, дәшта зьмане дьнда хьзмәт дькьрьн. Паши се сала зедәтьр, wана тʹәхмин кьр wәки кӧрʹе wани 17 сали рʹӧһʹанида сьст буйә. Серж ӧса дьбежә: «Чахе мә фәʹм кьр wәки сәва ве йәке кӧрʹе мә рʹӧһʹанида сьст дьбә, мә сафи кьр кӧ диса вәгәрʹьн щьвата хwәйә бәре». Чь мәʹни дькарьн де-бава һелан кьн, wәки вәгәрʹьн щьвата хwә? Йа әʹwльн, де-бав гәрәке бьфькьрьн, һәла wәʹде wан һәйә, wәки зарʹа һин кьн кӧ Йаһоwа һʹьз бькьн, у һьм жи зьмане хәриб wана һин кьн. Йа дӧда, әwана дьбәкә дьвиньн wәки зарʹед wанрʹа ида һʹәwас нинә бенә сәр щьвате йан һәрʹьнә хьзмәтийе дәшта зьмане дьнда. Wан дәрәщада де-бав дьбәкә сафи кьн, wәки дәрбази щьвата хwәйә бәре бьн, һʹәта кӧ зарʹед wан рʹӧһʹанида ԛәwи бьн, чьмки зарʹед wан әwи зьмани рʹьнд фәʹм дькьн (Ԛан. Дщр. 6:5-7). w16.10 2:14, 15

Әм дькарьн бежьн кӧ мәрьвед дор-бәре Нӧһ же дьпьрсин, кӧ һәла чьрʹа әw гәмийа ӧса мәзьн чедькә. Ле Нӧһ хwә кәр нәдькьр. Баwәрийа wи гәләк ԛәwи бу, ләма әwи бь мерхаси шәʹдәти дьда у wанрʹа дьгот дәрһәԛа диwана Хwәде. Дьԛәwьмә Нӧһ һәма рʹастә-рʹаст гьлийед Йаһоwа wанрʹа дьwәкʹьланд, чахе Йаһоwа жерʹа гот: «Ԛьрʹа һʹәмуйед хwәйибәдән һатийә ль бәр чʹәʹве мьн, чьмки рʹуйе ванда әʹрд хьрабийава тʹьжи буйә . . . Ва әзе ава тофане ль сәр дьне рʹакьм, wәки һәр бәдәна кӧ бин ль бәр һәйә бьн пʹәре әʹзменда ԛьрʹ бә у ль сәр рʹуйе әрʹде жи чь кӧ һәйә ӧнда бә». Дьбәкә ӧса жи Нӧһ wанрʹа шьровәдькьр кӧ әwана дькарьн хьлаз бьн, тʹәне һәрге бькʹәвьнә гәмийе, чаwа Хwәде фәрман дабу. Ӧса Нӧһ баwәрийа хwә да кʹьфше, чьмки «рʹасти даннасин дькьр» (Дәстп. 6:13, 17, 18, ПКʹМ; 2 Пәт. 2:5). w16.10 4:7

Де-бав кӧ Мәсиһи нә, амьнийа хwә Йаһоwарʹа избат дькьн чахе зарʹед хwә ль гора Хәбәра wи мәзьн дькьн. Де-бавед хwәдехоф, зарʹед хwә пе әʹдәтед ве дьнйайе мәзьн накьн (Әфәс. 2:2). Бав кӧ Мәсиһи йә тʹӧ щар wе ӧса нәфькьрә: «Wәлате мәда, жьн зарʹа һин дькьн у ширәт дькьн». Кʹьтеба Пироз зәлал дьбежә дәрһәԛа ве йәке: «Бавно, зарʹед хwә . . . бь ширәт у һинкьрьна Хӧдан мәзьн кьн» (Әфәс. 6:4). Де-бав кӧ Хwәде һʹьз дькьн, дьхwазьн wәки зарʹед wан мина Самуйел бьн, чьмки Йаһоwа тʹьме тʹәви wи бу (1 Сам. 3:19). Гәло wе аԛьлайи бә һәрге әм бейи ширәта Кʹьтеба Пироз, сафикьрьна бькьн дәрһәԛа малбәта хwә у хәбата хwә? На! Мәрʹа лазьм ә аликʹарийа Баве мәйи әʹзмана, чьмки әм хwәха нькарьн рʹебәрийе гавед хwә бькьн. w16.11 3:14, 15

Әʹфрин избат дькьн wәки Хwәде тʹәрбәт у пʹәргал ә. Кʹьтеба Пироз дьбежә: «Хӧдан, бьнгәһа дьне бь занийарева авет у әʹзмана бь аԛьлива щиһ кьр» (Мәтʹлк. 3:19). Әм тʹәне дәрһәԛа «ԛәрахед рʹейед [Хwәде]» заньн у «тʹәне пʹьстә-пʹьст те бьһистьн дәрһәԛа wи» (Иб. 26:14, ДТʹ). Рʹаст ә әм һьнәки заньн дәрһәԛа планета, стәйрка, галактика, ле һәла һе әw һьнә тьшт жи рʹьнд дьдьнә кʹьфше, wәки гәрдунеда һәр тьшт ча тʹәрбәти у щи-wар ә. Нава галактикада бь милйона стәйрк һәнә, у әwана гьшк жи бь тʹәрбәти щигӧһасти дьбьн. Планетед кӧ нава система тәʹведа һәнә, әw жи бь тʹәрбәти дора тәʹве дьзвьрʹьн. Бәле, әм әʹйан дьвиньн wәки Йаһоwа ча бь һостәти у билани әʹрд у әʹзман чекьр, у әw һежа йә кӧ әм пәсьна бьдьнә wи, wирʹа амьн бьн у wи бьһʹәбиньн (Зәб. 136:1, 5-9). w16.11 2:3

Малахи 3:1-3-да те гьликьрьне дәрһәԛа wәʹде жь сала 1914 һʹәта дәстпека сала 1919, чахе Хwәде «лаwед Леwи», демәк рʹункьрийа рʹаст кьр у ширәт кьр. Wи wәʹдәйи, Йаһоwа Хwәде у «мьлйакʹәте пәймане», демәк Иса Мәсиһ, һатьнә пʹарьстгәһа рʹӧһʹани сәва кӧ бьщерʹьбинә wана, йед кӧ ль wедәре хьзмәт дькьрьн. Чахе Йаһоwа wана рʹаст кьр у ширәт кьр, щьмәʹта wи ида һазьр бун шьхӧләкә тʹәзә бькьн. Сала 1919-да, «хӧламе амьн у сәрwахт» һатә кʹьфшкьрьне, сәва хwарьна рʹӧһʹани бьдә һʹәму хьзмәткʹаред Хwәде (Мәт. 24:45). Демәк ахьрийа-ахьрийе щьмәʹта Хwәде жь дәсте Бабилона Мәзьн аза бу. Жь wи wәʹдәйи, хьзмәткʹаред Хwәде һе зедә педьһʹәсьн дәрһәԛа ԛьрара Йаһоwа у һʹьзкьрьна wан һьндава wи һе зедә дьбә. Әw һʹәму тьшт Хwәде пе ԛәнщийа хwә мәрʹа әʹйан кьр. Бәле, хьзмәткʹаред Хwәде гәләк рʹази нә сәва кʹәрәмед wи! w16.11 5:14

Әм Йаһоwа һʹьз дькьн, «чьмки әwи пешда әм һʹьзкьрьн» (1 Йуһʹн. 4:19). Йаһоwа ӧса жи һʹьзкьрьна хwә дьдә кʹьфше бь ве йәке, кӧ хьзмәткʹаред хwәйи амьн кʹәрәм дькә. Әм чьԛас зәʹф Хwәде һʹьз дькьн, һаԛас зәʹф баwәрийа мә ԛәwи дьбә. Әм ԛайим баwәр дькьн, wәки Йаһоwа wан хәлат дькә кʹижана һʹьз дькә (Ибрн. 11:6). Йаһоwа мәрьва кʹәрәм дькә, у әw йәк дьдә кʹьфше кӧ әw йәки ча нә у чь дькә. Һәрге әм дӧдьли нә, wәки Йаһоwа wе кʹәрәм кә wан йед кӧ ль wи дьгәрʹьн, wәки ӧса нә баwәрийа мә кем ә. Чьмки баwәри әw ә, чахе әм «дӧдьли ниньн, wәки чь кӧ әм һивийе нә, wе бе сери» (Ибрн. 11:1, ДТʹ). Бәле, һәрге баwәрийа мә һәйә, әме һивийа кʹәрәмед Хwәде бьн, кʹижан кӧ әwи соз дайә мә. Чаwа ве рʹеза рʹожеда те готьне, Йаһоwа мә тʹәглиф дькә кӧ кʹәрәмед wи бьстиньн. У чахе әм әве мәщале дьдьнә хәбате, бь ве йәке әм рʹазибуна хwә жерʹа дьдьнә кʹьфше. w16.12 4:1-3

Мәсиһийе кӧ һәла һе жи бь сала Йаһоwарʹа хьзмәт дькә, дькарә дәстпекә һʹьш-аԛьле хwә бьдә сәр хwәстьнед бәдәне. Ле әw найе һʹәсабе, wәки Мәсиһи гәрәке ԛә нәфькьрә сәва хwарьне, хәбате, һесабуне, йан һәла һе дәрһәԛа романтике жи. Әw тьшт тʹәбийәти нә әʹмьре мәда. Иса хwарьн дьхwар у ле хwәш дьһат, у әwи мәрьвед дьн жи тʹер дькьр у хwарьн дьда wан. Һьн жи әwи хwәрʹа wәʹдә дьдит, wәки һеса бә. Ӧса жи Паwлос нәʹма хwәда ньвиси, wәки тʹәбийәти йә кӧ мер у жьн зәwащеда, һәләԛәтийа сексуалида хwә рʹази кьн. Нета хәбәра Йунани кӧ һатийә wәлгәрʹандьне «дьфькьрьн» әw ә, кӧ кәсәк һʹьш-аԛьле хwә у дьле хwә дьдә сәр тьштәки, у әw йәк әʹмьре wида дьбә тьште лапи фәрз, у дьбә нет-мәрәма wи. Әwед кӧ бь «бьнйата мәрьвайе» дьжин, әwана бьн һʹӧкӧме бәдәна хwәйә гӧнәкʹарда дьжин. Зандарәк дәрһәԛа гьлийед жь Рʹомайи 8:5 дьбежә: «Әw мәрьв һʹьш-аԛьле хwә дьдьн сәр хwәстьнед бәдәне, демәк сәр ве йәке, дәрһәԛа чь әwана тʹьме хәбәрдьдьн, у чь кӧ дькьн у ӧса жи бона чь ԛӧрʹә дьбьн». w16.12 2:5, 9, 10

Һәр кәс жь мә дькарә тьшта бь сәри хwә бькә, һәрге пәй хwәстьнед бәдәне кәвьн. Гәләк мәрьв жь бо хwәһʹьзийе, һәвсудийе у һерсе, бь сәри хwә гәләк кьред нәрʹаст кьрьнә. Мәсәлә, Кʹьтеба Пирозда те гьликьрьне дәрһәԛа Абшалом, Узийа, у Нәбукәднәсәр. Йаһоwа wана ньмьз кьр чьмки әwана кʹӧбар бун (2 Сам. 15:1-6; 18:9-17; 2 Дир. 26:16-21; Дан. 5:18-21). Диса һәнә мәʹни кӧ чьрʹа һьнә мәрьв щара нәмьлуктийе дьдьнә кʹьфше. Дина хwә бьдьнә wан дӧ сәрһатийед жь Кʹьтеба Пироз, кӧ Дәстпебун 20:2-7 у Мәтта 26:31-35-да тенә гьликьрьне. Wан сәрһатийада әм дьхуньн дәрһәԛа Абимәләх у Пәтрус. Гәло әм дькарьн бежьн wәки wана әw кьред нәрʹаст бь сәри хwә кьрьн, чьмки пәй хwәстьнед нәрʹаст кәтьн? Йан wана ньзаньбу дәрһәԛа һʹәму дәрәща у wана беһәмде хwә шаши кьр? Әм дьла нькарьн бьхуньн, ләма жи wе бь билани бә у бь һʹьзкьрьн бә, һәрге әм лома мәрьва нәкьн. w17.01 3:9, 10

Мина wе жьнәбикә бәләнгаз, иро жи гәләк хушк-бьред мә итʹбарийа хwә Йаһоwа тиньн кӧ әw wе бона wан хәм бькә, һәрге әwана шьхӧле wи дайньн щийе пешьн (Мәт. 6:33). Wәрә бьньһерʹьн мәсәла бьраки мә бь наве Малкам. Әw һʹәта мьрьне Хwәдерʹа амьн ма. Нава гәләк салед хьзмәткьрьна wи у жьна wида, wана чәтьнайи жи дитьнә у шабун жи. Әwи гот: «Жийина мә щара дәрберʹа дькарә бе гӧһастьне, ӧса бә кӧ әм ньзаньбьн сәр чь нә-бәр чь нә, у һәла һе гәләк чәтьн жи. Ле Йаһоwа wана кʹәрәм дькә йед кӧ хwә ль wи дьгьрьн». У әw бьра ширәт да: «Дӧа бькьн wәки шьхӧле Йаһоwада хирәт бьн у пешда һәрʹьн. Һʹьш-аԛьле хwә бьдьнә сәр ве йәке чь кӧ һун дькарьн бькьн, нә кӧ чь нькарьн бькьн». Әw дьнйа «хьрабийеда» пешда дьчә, у әм гәрәке һазьр бьн wәки әме һе зедә рʹасти чәтьнайа бен (2 Тимтʹ. 3:1, 13). У әм ида ньһа гәрәке һин бьн кӧ нәкʹәвьн һʹәйра чәтьнайед хwә. Дәwсе әм гәрәке ԛайим итʹбарийа хwә Йаһоwа биньн у чь дәсте мә те бькьн. w17.01 1:17-19

Даwьд бәрхwә дькʹәт wәки «мала», демәк пʹарьстгәһа Йаһоwа тʹӧнә бу. Ләма әwи хwәрʹа нет дани, wәки бона Йаһоwа пʹарьстгәһе ава кә. Ле Йаһоwа щурʹәки майин щаба Даwьд да, чаwа рʹеза ве рʹожеда те готьне. Рʹаст ә Йаһоwа бь һʹьзкьрьн Даwьд да баwәркьрьне, wәки әwе диса жи тʹьме тʹәви wи бә у wи кʹәрәм кә, ле йәкә әwи гот, wәки кӧрʹе wи Сьлеман wе пʹарьстгәһе ава кә. Ле гәло Даwьд ча хwә да кʹьфше чахе дәрһәԛа wе йәке пеһʹәсийа? (1 Дир. 17:1-4, 8, 11, 12; 29:1, ДТʹ). Даwьд дьлтәнг нәбу, wәки wе пʹарьстгәһе ава нәкә у наве wи wе әʹйан нәбә кӧ әwи пʹарьстгәһа Хwәде ава кьр. Чахе пʹарьстгәһ ава бу, әw нас бу ча пʹарьстгәһа Сьлеман, нә кӧ йа Даwьд. Даwьд дьбәкә бәрхwә дькʹәт, wәки нькарьбу нета дьле хwә бинә сери, ле әwи аликʹарийа мәзьн да бона авакьрьне. Әwи сәва авакьрьне хәбатчи һазьр кьрьн, ӧса жи һʹәсьн, сьфьр, зив у зерʹ, у ӧса жи даред әрзе тʹоп кьр. Хенщи ве йәке, әwи дьл да бәр кӧрʹе хwә Сьлеман: «Ньһа кӧрʹе мьн, бьра Йаһоwа тʹәви тә бә, у тӧ пешда һәри у мала Хwәдейе хwә Йаһоwа ава ки» (1 Дир. 22:11, 14-16, ДТʹ). w17.01 5:6, 7

Һәла һе wәʹде пәйкʹәтьна жи, әм гәрәке һʹәму тьшти бькьн сәва ԛанун у принсипед Хwәде биньн сери. Чахе әм кьред рʹаст дькьн, әм наве Йаһоwа рʹумәт дькьн (Мәт. 5:14-16). Чаwа щьмәʹта пироз, әм пе жийина хwә избат дькьн wәки ԛанунед Йаһоwа рʹаст у баш ьн, ле готьнед Шәйтʹан дәрәw ьн. Әм гьшк гӧнәкʹар ьн у ләма жи шашийа дькьн. Ле әм бь дьл гӧнед хwә тиньн рʹуйе хwә у пьшта хwә дьдьнә wан кьра, кʹижан кӧ наве Хwәде беһӧрмәт дькьн. Һәрге әм баwәрийа хwә ԛӧрбана Иса тиньн, Йаһоwа гӧнед мә дьбахшинә. Йед кӧ хwә тʹәсмили Йаһоwа дькьн, әw wана ԛәбул дькә ча хьзмәткʹаред хwә. Йаһоwа Мәсиһийед бьжарти рʹаст һʹәсаб дькә ча кӧрʹед хwә у йед кӧ жь «пәзед дьн» ьн һʹәсаб дькә ча достед хwәйи рʹаст (Йуһʹн. 10:16; Рʹом. 5:1, 2; Аԛуб 2:21-25). Демәк, һәла һе ньһа жи кʹьрʹин мәщале дьдә мә, wәки әм бәр чʹәʹве Баве хwә Йаһоwа рʹаст бенә һʹәсабе у наве wи пироз кьн. w17.02 2:5, 6