Илон

Кʹьтеба Пирозда сәбьр найе һʹәсабе, кӧ тʹәне чәтьнайада йолә һәрʹьн. Сәбьр һәйә һʹале һʹьше мә у дьле мә, йан жи әw йәк чаwа әм хwә дьдьнә кʹьфше тәнгасийада. Мәрьве кӧ сәбьр дькә мерхасийе, амьнийе у тәйах дьдә кʹьфше. Кʹьтебәкеда хәбәра сәбьр ӧса һатийә шьровәкьрьне: «Әw һәйә ньһерʹандьна ӧса, бь кʹижани тӧ дькари бәр тьшта тәйах ки, нә кӧ тʹәне мәщбур би тәйах ки, ле бь баwәрийе һивийе би. Әw һʹӧнӧрәк ә, кʹижан али мәрьва дькә, кӧ хwә сәр ньга бьгьрә чахе ба wи дьхә. Сәбьр кʹаре дьдә мә, бь аликʹарийа сәбьре тәнгасийа лапә гьран жи бона мә дьбә рʹумәт, чьмки әм пьшт ешева нете дьвиньн». Һʹьзкьрьн мә һелан дькә сәбьр кьн (1 Корн. 13:4, 7). Һʹьзкьрьна һьндава Йаһоwа мә һелан дькә чәтьнайа дәрбаз кьн, кʹижан кӧ Йаһоwа дьһелә (Луԛа 22:41, 42). Һʹьзкьрьна һьндава хушк-бьра али мә дькә сәбьр кьн ԛьсуртийа wан (1 Пәт. 4:8). Һʹьзкьрьн һьндава һәвалзәwаще мә, али мә дькә кӧ сәбьр кьн wәʹде «охьрмед гьран», кʹижан һәла һе рʹасти щотед бәхтәwар жи тен. Хенщи ве йәке, һʹьзкьрьн зәwаще ԛәwи дькә (1 Корн. 7:28).w16.04 2:3, 4

Wана «тʹьме хwә ль һинкьрьна шандийа дьгьрт, ль һәв дьщьвийан». Wи чахи Мәсиһийед пешьн дьжитьн бьн һʹӧкӧме Рʹоме у сәрwеред рʹелигийа Щьһуйада, у wанрʹа нәһеса бу кӧ һәрʹьнә щьвине. Ле йәкә, әwана тʹьме дьчунә щьвине. Иро жи гәләк хьзмәткʹаред Йаһоwа рʹазибуна хwә дьдьнә кʹьфше бона щьвата. Щорщ Гангас, кʹижан кӧ 22 сала хьзмәт дькьр Кʹома Рʹебәрийеда, гот: «Әʹмьре мьнда тʹопбуйина тʹәви хушк-бьра шабун у ԛәwикьрьна гәләк мәзьн ә бона мьн.» Әw зедә дькә: «Тʹьме фькьр у хwәстьна мьн wи алида йә кӧ һәрʹьмә щьвате». Тӧ жи әwе йәке сәр хwә тʹәхмин дьки, чахе әм тʹәвайи тʹоп дьбьн кӧ Йаһоwарʹа хьзмәт кьн? Һәрге әре, һәр тьшти бькә сәва һәртʹьм бейи сәр щьвине. Бь wи щурʹәйи те нишан ки, кӧ тӧ тʹәви гьлийед Даwьд Пʹадша ԛайил и, кӧ гот: «Әз һʹьз дькьм йа Хӧдан жь мала тә» (Зәб. 26:8, ИМ). w16.04 3:16-18

Бьдә бәр чʹәʹве хwә, кӧ тӧ пеһʹәсийайи wәки бьраки сәр тә хәйиди. Ве дәрәщеда тӧ гәрәке чь бьки? Тӧ гәрәке тʹәви бьре хwә хәбәрди. Дина хwә бьдә, кӧ чахе тʹәви бьре хwә гәрәке хәбәрди, нета тә гәрәке чь бә. Тӧ гәрәке нә кӧ бьре хwә нәһәԛ ки, ле шашийа хwә гәрәке бежи у әʹдьлайе чеки. Демәк, лапә фәрз әw ә, кӧ әм тʹәви хушк-бьред хwә әʹдьлайеда бьн. Мәсәлә, дина хwә бьдьн дәрәщәке кӧ ортʹа Бьраһим у Лутда ԛәwьми. Һʹәйwанед һәрда жи гәләк һәбун. У ләма дьԛәwьмә шьванед һʹәйwанед wан, бона әʹрд һәврʹа дькʹәтьнә дәʹwе. Бьраһим дьхwәст әʹдьлайи хwәй кьра, ләма әwи Лутрʹа гот, кӧ пешийе Лут хwәрʹа бьжберә әʹрде баш, кʹидәре кӧ мал у һʹәму һәбука wи щиwар буйа (Дәстп. 13:1, 2, 5-9). Бь рʹастийе мәсәләкә чьԛас баш ә! Бьраһим әʹдьлайи дьгәрʹийа, нә кӧ кʹара хwә. Ле гәло Бьраһим жь бо мәрʹданийа хwә зьраре кʹәт? Тʹӧ щар на! Дәрберʹа, һәма паши ве дәрәща тʹәви Лут, Йаһоwа кʹәрәмед гәләк мәзьн соз да Бьраһим (Дәстп. 13:14-17). Йаһоwа тʹӧ щар wе наһелә кӧ әм зьраре кʹәвьн, сәва ве йәке кӧ әм пе принсипед Кʹьтеба Пироз чәтьнайед ортʹа һәвдӧ сафи дькьн. w16.05 1:11, 12

Йаһоwа бь Кʹьтеба Пироз ԛанун у тʹәмийед зәлал дайә мә. Мәсәлә, Йаһоwа ԛәдәхә дькә бенамусийе, пʹутпарьстийе, дьзийе, у сәрхwәшийе (1 Корн. 6:9, 10). Хенщи ве йәке, Кӧрʹе Хwәде, Иса Мәсиһ әв тʹәмийа конкрет да пәйчуйед хwә: «Һәрʹьн һʹәму мьләта һин кьн у wана бь наве Бав, Кӧрʹ у Рʹӧһʹе Пироз бьньхӧминьн у wан һʹәму тʹәмийед кӧ мьн данә wә мьләта һин кьн, wәки әw хwәй кьн. Әз ирода тʹьме һʹәта ахьрийа дьнйайе тʹәви wә мә!» (Мәт. 28:19, 20). Рʹасти жи, ԛанун у тʹәмийед Хwәде чьԛас мә хwәй дькьн у кʹаре мәрʹа тиньн! Әw тʹәмийед Хwәде мә һин дькьн кӧ ԛәдьре хwә бьзаньбьн, сьһʹәт-ԛәwата хwә хwәй кьн, у ча малбәтеда бәхтәwар бьн. У һе зедә, чахе әм тʹәмийед Йаһоwа тиньн сери, у мьзгине бәла дькьн, әw мә ԛәбул дькә у мә кʹәрәм дькә. w16.05 3:1

Чахе әм пе рʹебәрийа рʹӧһʹе Хwәдейи пироз һәрʹьн, әме фькьр, хәбәрдан, у кьред хwәда һе рʹьнд чʹәʹв бьдьнә Йаһоwа (Луԛа 11:13; Галт. 5:22, 23). Ле йәкә, паши ве йәке жи әм гәрәке диса бәрдәwам кьн сәр кемасийед хwә бьхәбьтьн (Мәтʹлк. 4:23). Һәрге тӧ тʹәхмин дьки, кӧ тӧ рʹӧһʹанида һеди пешда дьчи, бира хwәда хwәй кә кӧ wәʹдә лазьм ә сәва wе йәке. Чьмки әм гәрәке тʹьме сәр хwә бьхәбьтьн, wәки чʹәʹв бьдьнә һʹӧнӧред Хwәде. У әм гәрәке сәбьр бьн, чахе дьхwазьн кӧ Кʹьтеба Пироз нав мәда гӧһастьна бькә. Пешийе, әм гәрәке хwә һин кьн кӧ ль гора һинкьрьнед Кʹьтеба Пироз бьжин. Паше, wе мәрʹа дьһа һеса бә кӧ мина Йаһоwа бьфькьрьн, у кьред ӧса бькьн, кʹижан wи хwәш тен (Зәб. 37:31; Мәтʹлк. 23:12; Галт. 5:16, 17). w16.05 4:14, 16

Иро, Йаһоwа мә рʹаст дькә у дьгӧһезә, бь сайа Кʹьтеба Пироз, рʹӧһʹе хwәйи пироз, у щьвате. Әм гәрәке тʹьме бьхуньн Кʹьтеба Пироз у чь дьхуньн сәр бьфькьрьн. Ӧса жи әм гәрәке дӧа бькьн Йаһоwарʹа, кӧ али мә бькә, wәки әм бьдьнә хәбате чь кӧ әм педьһʹәсьн. Даwьд ньвиси: «Чахе әз тә, нав ньвинада бьбир тиньм, дьрежайа шәведа, әз [дәрһәԛа] тә кʹур дьфькьрьм» (Зәб. 63:6, ИМ). Әwи ӧса жи гот: «Пәсне тә дьдьм, Хӧдане жь бо мьн ширәтдар, бь шәва жи дьле мьн жь мьнрʹа дьбә һиндар» (Зәб. 16:7, ИМ). Бәле, Даwьд кʹур дьфькьри сәр ширәткьрьна Хwәде, у әwи дьһишт кӧ ширәтед Хwәде кʹур дьле wида бьминьн, һәла һе wи чахи жи чахе чәтьн бу wирʹа ширәте ԛәбул кә (2 Сам. 12:1-13). Бәле, Даwьд гәләк мьлук бу, у әwи гӧрʹа Хwәде дькьр. Әм жи гәрәке чʹәʹв бьдьнә wи. Ле чахе һун дьхуньн Хәбәра Хwәде, һун дьфькьрьн сәр, у дьһельн кӧ гьлийед Хwәде дьле wә бьгьрьн? Ве йәкеда диса һун ча дькарьн һе пешда һәрʹьн? (Зәб. 1:3). w16.06 1:11

Әм гьшк гӧнәкʹар ьн, у ләма тӧ кәс жь шашийа хwәйкьри нинә. Ләма әм гәрәке жь хушк-бьра һивийе нибьн, кӧ әwана шашийа нәкьн. У wе нә баш бә кӧ әм гәләк дина хwә бьдьн сәр шашийед wан, чьмки ӧса әм дькарьн шабуне ӧнда кьн хьзмәтийеда, илаһи wан рʹожед хьлазийеда. Лапә хьраб wе әw бә, һәрге шашийед хушк-бьред мә, мә бьлькʹӧминьн, у сәва wан шашийа әм һәла һе жи тʹәшкиләта Йаһоwа бьһельн. Һәрге ӧса бьԛәwьмә, әме ида нькарьбьн ԛьрара Йаһоwа биньн сери, у жийина һʹәта-һʹәтайе бьстиньн. Сәва кӧ әм шабун у баwәрийа хwә ԛәwи хwәй кьн, әм гәрәке рʹьнд бира хwәда хwәй кьн әw созе Йаһоwа: «А вай, әз әʹзманед ну у әʹрдед ну дьәʹфьриньм у wе биранина тьштед бәре нәйен кьрьн у нәйен рамане» (Иша. 65:17; 2 Пәт. 3:13). Wәрә әм изьне нәдьнә хwә, кӧ сәва шашийед мәрьвед дьн, әм wан кʹәрәмед баш ӧнда кьн. w16.06 4:13, 14

Хәбәра «тʹәк», йане йәк, те һʹәсабе кӧ нет у кьред wи йәк ьн. Йаһоwа Хwәде найе гӧһастьне. Әw тʹьме амьн ә у рʹаст ә. Әwи соз дабу Бьраһим кӧ зӧрʹәта wи wе Әʹрде Создайи wар бә, у Йаһоwа кʹәрәмәтед мәзьн кьр сәва әwи сози бинә сери. Йаһоwа һәла һе жи 430 сал паши создайина хwә, созе хwә нәгӧһаст у ани сери (Дәстп. 12:1, 2, 7; Дәркʹ. 12:40, 41). Паши һьнә ԛьрʹна, чахе Йаһоwа Исраели нав кьрьн ча шәʹдед хwә, әwи wанарʹа да кʹьфше кӧ әw нәһатийә гӧһастьн, у ӧса жи гот: «Бәри мьн Хwәде нәбу у паши мьн жи набә». Әwи wанрʹа әʹйан кьр, кӧ нета wи найе гӧһастьн, у wәкʹьланд кӧ әw ә Хwәдейе тʹәк (Иша. 43:10, 13; 44:6; 48:12). Рʹасти жи чьԛас ԛәдьрәки мәзьн бу бона Исраелийа. Иро әw ԛәдьрәки мәзьн ә бона мә жи, кӧ әм хьзмәткʹаред Йаһоwа нә. Әм хьзмәткʹаред wи Хwәдейи нә, йе кӧ найе гӧһастьн, у тʹьме амьн ә (Малх. 3:6; Аԛуб 1:17). w16.06 3:6, 7

Иро гәләк wәлат синоред хwә хwәй дькьн бь «ԛәрәwьла», демәк әскәра. Ӧса жи әwана системед хwәйкьрьне дьдьнә хәбате, кʹижан кӧ пе техноложийед тʹәзә һатьнә чекьрьне. Әскәр щабдар ьн кӧ мьԛат бьн, wәки тӧ кәс беԛануни нәкʹәвә wәлатед wан. Әw әскәр ӧса жи wәлат жь дьжмьна хwәй дькьн, сәва бьнәлийед wәлатед wан зийане нәстиньн. Ле әw «ԛәрәwьл» wәлатед хwә дькарьн тʹәне жь wан хофийа хwәй кьн, кʹижан кӧ жь мәрьва тен. Әwана ньзаньн дәрһәԛа Пʹадшатийа Хwәде, сәрwере кʹижан кӧ Иса йә. Әw Пʹадшати зутьрәке wе диwана һʹәму сәрwертийед мәрьва бькә (Иша. 9:6, 7; 56:10; Дан. 2:44). Ле әм алийе хwәда гәрәке сәрхwә бьн у рʹӧһʹанида һʹьшйар бьминьн. Ӧса әме һазьр бьн бона ве рʹоже (Зәб. 130:6). Чьԛас жи әм незики хьлазийа wе дьнйайе дьбьн, һаԛас мәрʹа һе чәтьн дьбә һʹьшйар бьминьн. У wе чьԛас нәаԛьлайи бә, һәрге әм фәсал нибьн! w16.07 2:2, 9, 10

Паwлос рʹьнд фәʹм дькьр, кӧ әw һежайи рʹәмтийа Хwәде нибу, чьмки әwи бәре Мәсиһи дьзерандьн. Чахе Паwлос ида әʹмьрда мәзьн бу, әwи Тимотʹейорʹа ньвиси: «Әз жь Мәсиһ Исайе Хӧдане мә рʹази мә, йе кӧ ԛәwат да мьн, әз амьн һʹәсаб кьрьм, данимә сәр ве хьзмәткʹарийе» (1 Тимтʹ. 1:12-14). Ле гәло әw чь щурʹә хьзмәткьрьн бу? Паwлос готә рʹуспийед щьвата Әфәси: «Әз әʹмьре хwә лайиԛи тʹӧ тьшти накьм, тʹәне дькьм бьгьһижьмә мәрәме хwә у wе ԛӧльха кӧ мьн жь Хӧдан Иса стандийә биньмә сери, аwа готи Мьзгинийа кʹәрәма Хwәде бь мәʹрифәти даннасин кьм» (Кʹар. Шанд. 20:24). Паwлос бь хирәт хьзмәт дькьр, у бона Мәсиһийед иройин әwи мәсәләкә гәләк баш һишт. Әwи әʹйан кьр кӧ ԛәнщийа Хwәде һьндава wи, «бош-бәтал» нибу. w16.07 4:1-3

Щара дьбәкә Йаһоwа дьһелә кӧ әм һивийе бьн һʹәта щабдарийа бьстиньн, йан һʹәта дәрәща мә алийе башда бе гӧһастьне. Ле йәкә Йаһоwа тʹьме али хьзмәткарʹед хwәйи амьн дькә. Йаһоwа Бьраһимрʹа соз да кӧ кӧрʹ wе wирʹа бьбә (Ибрн. 6:12-15). Ле Бьраһимрʹа лазьм бу бь сала һивийа буйина Исһаԛ буйа. Бьраһим бь сәбьр һивийе бу у тʹӧ щар баwәрийа хwә һьндава Йаһоwа ӧнда нәдькьр. У Йаһоwа жи созе хwә ани сери (Дәстп. 15:3, 4; 21:5). Бәле, һеса нинә һивийе бьн (Мәтʹлк. 13:12). Һәрге әм гәләк дьфькьрьн дәрһәԛа дәрәща хwә, у кӧ нетед мә найенә сери, әм дькарьн дьлтәнг бьн. Дәwса wе йәке, wе бь билани бә әwи wәʹдәйи сәва ве йәке бьдьнә хәбате, wәки һʹӧнӧред хwә һе баш кьн у рʹӧһʹанида һе пешда һәрʹьн. Чахе әм Кʹьтеба Пироз дьхуньн у сәр дьфькьрьн, әм дькарьн һʹӧнӧред баш нав хwәда пешда биньн. Мәсәлә билани, фәʹмкʹари, сәрwахти, аԛьлда гьрани. Дькарьн бежьн һәр рʹож әм сафи дькьн кʹижан wәʹдәдәрбазкьрьна бьжберьн, ча хwә кьн у хwә бьхәмьлиньн, ча пʹәра хәрщ кьн, у һьндава мәрьва ча бьн. Wан тьштада әме сафикьрьнед рʹаст бькьн, һәрге ширәтед жь Кʹьтеба Пироз бьдьнә хәбате. w16.08 3:9-11

Йаһоwа али Исраелийа кьр, wәки әwана шәрʹда һьмбәри Амалекийа у Әтйупийа сәркʹәвьн. Йаһоwа ӧса жи ԛәwат да Нәһәмийа у йед кӧ тʹәви wи бун, wәки әwана шьхӧле авакьрьна пʹарьстгәһе хьлаз кьн. Хwәде wе ԛәwате бьдә мә жи wәʹде пәйкʹәтьна, йан чахе әм дьлтәнг дьбьн, сәва бәрдәwам кьн мьзгинийе бәла кьн (1 Пәт. 5:10). Ле бәле, әм һивийе ниньн кӧ Йаһоwа wе бона мә кʹәрәмәта бькә. Дәwсе, әм алийе хwәда гәрәке тьштәки бькьн. Әм гәрәке һәр рʹож Хәбәра Хwәде бьхуньн, щьвата нәһельн у һазьр бьн бона щьвате. Хенщи wе йәке, бь сайа һинбуна шәхси у ԛӧльхкьрьна тʹәви малбәте, әм гәрәке рʹӧһʹанида хwә тʹер кьн. Ӧса жи әм гәрәке тʹьме итʹбарийа хwә Йаһоwа биньн у wирʹа дӧа бькьн. Йаһоwа бь сайа wан тьшта мә ԛәwи дькә у мә дьшьдинә. Ләма wәрә әм тʹӧ щар нәһельн wәки әʹмьре мәда шьхӧлед дьн щийе пешьн бьгьрьн, дәwса шьхӧлед рʹӧһʹани. Һәрге wә тʹәхмин кьр кӧ wан шьхӧлед рʹӧһʹанида дәстед wә сьст бунә, аликʹарийе жь Хwәде бьхwазьн. Һуне бьвиньн кӧ ча әw бь рʹӧһʹе хwә ԛәwате дьдә wә, кӧ «һун дьхwазьн у дькьн, чаwа ль wи хwәш те». w16.09 1:12

Паwлосе шанди ширәт да Мәсиһийа кӧ һе баш ә азәп бьминьн, ле әwи ӧса жи гот: «Бона кӧ пешийа һәр щурʹә ԛавийе бе гьртьне, бьра мер бе жьн нәбә у жьн жи бе мер». Паше әwи зедә кьр: «Һәгәр хwә зәфт накьн, бьра бьзәwьщьн-мер кьн, чьмки ԛәнщ ә кӧ әw бьзәwьщьн-мер кьн, нә кӧ хwәда бьшәwьтьн». Хwәстьна бәдәнейә ԛәwи дькарә бьбә мәʹни, кӧ мәрьв тьштед хьраб бькә, мәсәлә мастурбасийа йан бенамуси. Ләма жи һьнәк сафи дькьн кӧ һе баш ә бьзәwьщьн йан мер кьн. Ле пешийа кӧ бьзәwьщьн йед азәп гәрәке бьфькьрьн, һәла әwана бь рʹастийе гьһишти нә сәва зәwаще йан на. Паwлос гот кӧ һәрге кәсәк ида гьһиштийә, у сафи кьрийә бьзәwьщә-мер кә, wи чахи wе йәкеда тьштәки хьраб тʹӧнә (1 Корн. 7:9, 36; 1 Тимтʹ. 4:1-3). Ле һәгәр кәсәк һе гәләк щаһьл ә у хwәстьна wийә бәдәни гәләк ԛәwи йә, әw найе һʹәсабе кӧ гәрәке ләзкʹәвә бьзәwьщә йан мер кә. Чьмки дьбәкә әw һе һазьр нинә һәр тьшти бькә, чь кӧ же те хwәстьне дь зәwащеда. w16.08 1:17

Гәләк мәрьв дәрһәԛа мә ӧса дьфькьрьн, чаwа кӧ әм рʹува тенә хане (1 Сам. 16:7). Ләма жи, әм чаwа хьзмәткʹаред Хwәде, фәʹм дькьн кӧ кʹьнщхwәкьрьна мә гәрәке нә кӧ тʹәне мә хwәш бе у комфорт бә, ле лазьм ә һе зедә тьшт бькьн. Принсипед жь Хәбәра Хwәде гәрәке мә һелан кьн, кӧ кʹьнще нәщайиз хwәнәкьн, мәсәлә кʹьнще тәнг, вәкьри, у кʹьнще ӧса, кӧ бьбьнә мәʹни wәки хәлԛ бь чʹәʹве хьраб мә бьньһерʹьн. Әw ӧса жи те һʹәсабе кʹьнщед ӧса, кӧ әндәмед бәдәне йе шәрми гәләк әʹйан дьдә кʹьфше. Әм гәрәке ӧса хwәнәкьн, кӧ мәрьв мә әʹщьз бьн у мәщбур бьн алийе мә нәньһерʹьн. Чахе кʹьнще мә лайиԛ, мьлук, тʹәрбәт у тʹәмьз ә, мәрьв wе ԛәдьре мә чаwа хьзмәткʹаред Йаһоwа, бьгьрьн. У әwана жи дькарьн бьбьнә хьзмәткʹаред Хwәде. Ӧса жи, кʹьнще мәйә лайиԛ, wе баш һʹӧкӧм бә сәр тʹәшкиләта Хwәде. У ахьрийеда йед майин дьбәкә гӧһ бьдьнә мьзгине, йа кӧ әʹмьре мәрьва хьлаз дькә. w16.09 3:5, 6

Дәрберʹа нәфькьрьн wәки һун рʹьнд заньн кӧ әwана чь баwәр дькьн. Чьмки һьнә мәрьв дьбежьн wәки әwана еволусийайе баwәр дькьн, ле һьн жи баwәр дькьн кӧ Хwәде һәйә. Әwана дьфькьрьн кӧ Хwәде һʹәму тьшт бь еволусийайе әʹфьрандийә. Һьнәк жи еволусийайе баwәр дькьн, чьмки дьфькьрьн кӧ һәрге әw нәрʹаст буйа, мәкʹтәбада әw теорийа wе һин нәкьрана. Һьнәк жи Хwәде баwәр накьн, чьмки баwәрийа хwә рʹелигийа найньн. Ләма жи, чахе һун тʹәви кәсәки дәрһәԛа Әʹфьрандар шеwьр дькьн, wе керһати бә кӧ пешийе пьрса бьдьнә wан, сәва тедәрхьн кӧ әwана чь баwәр дькьн. Һәрге һун бь дьл у щан wана бьбьһен, әwана жи wе һелан бьн гӧһ бьдьнә wә. Һәрге кәсәк wәрʹа дьбежә кӧ һун бадиһәwа баwәр дькьн, кӧ Әʹфьрандар һәйә бь нәрми жерʹа бежьн, кӧ бьра әw шьровәкә кӧ чаwа әʹмьр бе Әʹфьрандар пешда һатийә. Паше жи бежә, wәки сәва жь шанәйа (ущрә) бьчʹук тьштәки мәзьн пешда бе, лазьм ә әw шанә жь һәв зедә бә. Професорәки кʹимийайе гот: «Әw әʹщебмайи йә кӧ һәла һе шанәйа бьчʹук жи чьԛас чәтьн ә». w16.09 4:12, 13

Дьԛәwьмә Паwлос дьгот дәрһәԛа Набот у Зәкәрйа, кʹижан кӧ данә бәр кәвьра, чьмки wана гӧрʹа Хwәде дькьр (1 Пʹадш. 21:3, 15; 2 Дир. 24:20, 21). Данийел у һәвалед wи жи бәр бьжартьне бун, һәла Хwәдерʹа амьн бьминьн, йан жи сәре хwә бәр хӧданед ԛәлп дайньн. Wана дькарьбу «азайи» бьжбарта, ле wана баwәрийа хwә Хwәде дьанин у сәва wирʹа амьн бьминьн һазьр бун әʹмьре хwә жи бьдьн. Данийел авитьнә нав шерʹа, ле һәвалед wи авитьнә нава агьр. Йәкә wана ԛайим баwәр дькьр, кӧ Хwәде wе ԛәwате бьдә wан у али wан бькә сәбьр кьн wан чәтьнайада (Ибрн. 11:33, 34; Дан. 3:16-18, 20, 28; 6:13, 16, 21-23). Гәләк пʹехәмбәред амьн, мәсәлә Миха у Йерәмйа, кәлада дьһатьнә «зерандьне», у һьн жи мәрьва ԛәрфе хwә wана дькьрьн. Һьнәк жи мина Елйас, «ль бәри у чʹийа дьгәрʹийан, шкәфт у нәлада дьман». Һәр кәс жь wан Хwәдерʹа амьн ман, чьмки дӧдьли нибун wәки созед Хwәде wе әʹсә бенә сери (Ибрн. 11:1, 36-38; 1 Пʹадш. 18:13; 22:24-27; Йерәм. 20:1, 2; 28:10, 11; 32:2). w16.10 3:10, 11

Чахе әм бь дьл у щан сьлав дькьн хәрибед кӧ тенә Ода Щьвата мә, бь ве йәке әм wанрʹа ԛәнщийе дькьн. Дьԛәwьмә мә дина хwә да wәки мәрьвед хәриб кӧ тʹәзә һатьнә wәлате мә, шәрм дькьн у хwә башԛә дькьн. Йан жи, дьбәкә мьләтед дьн wана ньмьз дькьн, чьмки әwана нә мьләте wан ьн у щурʹәки майин һатьнә мәзьнкьрьне. Ләма пешийе әм гәрәке wана гәрм сьлав кьн у пебьһʹәсьн дәрһәԛа һʹале wан. Һәрге сәр зьмане wә һәйә «JW Languagе app», һун дькарьн ль wедәре һьнә хәбәр һин бьн, wәки сәр зьмане wани де, wана сьлав кьн (Фили. 2:4). Дьбәкә һун шәрм дькьн незики wан мәрьва бьн, йед кӧ нә жь мьләте wә нә. Сәва һун аза незики wан бьн, һун дькарьн дәрһәԛа хwә wанрʹа тьштәки гьли кьн. Зутьрәке һуне бьвиньн кӧ рʹаст ә һун һьнәк жь һәв щӧдә дьбьн, ле гәләк тьштада һун мина һәв ьн. Бь рʹастийе, һәр мьләтәкида чаwа тьштед баш һәнә, ӧса жи кемаси һәнә. w16.10 1:13, 14

Һәрге әм пәй рʹебәрийа Хәбәра Хwәде һәрʹьн, щьватеда әме тʹәмьзайа рʹӧһʹани хwәй кьн. Wәрә шеwьр кьн дәрәща щьвата Корьнтʹида. Wи шәһәрида Паwлос гәләк хьзмәт дькьр у хушк-бьред wедәре гәләк һʹьз дькьр (1 Корн. 1:1, 2). Ле бьдьнә бәр чʹәʹве хwә, wәки әw ча дьлтәнг бу, чахе бьһист wәки щьватеда кәсәк бенамусийе дькә, ле йәк ә wана щьватеда дьһельн. Паwлос готә рʹуспийа, wәки «wи мәрьви бьдьнә дәсте Мирещьн», йане бь гьлийед дьн бежьн, жь щьвате дәрхьн. Әw йәк лазьм бу сәва щьват хwә жь «һәвиртьршк» хwәй кә (1 Корн. 5:5-7, 12). Иро жи рʹуспи дькарьн сафи кьн, wәки жь щьвате дәрхьн wи мәрьви, кʹижан гӧне хwә найнә рʹуйе хwә. У һәрге әм тʹәви wи мәрьви ӧса бьн чаwа Кʹьтеба Пироз дьбежә, wи чахи әме тʹәмьзайа щьвате хwәй кьн. Һьн жи wи щурʹәйи әw мәрьв дькарә пʹошман бә у бахшандьне бьхwазә жь Йаһоwа. w16.11 2:14

Дьлдайин дькарә кʹарәкә гәләк мәзьн бинә. Бьраки мә дьбежә: «Бь сала әз нькарьм хwә хьлаз кьм жь wан фькьра кӧ әз бекер ьм. Ле щарәке мьн тʹәви рʹуспи хьзмәт дькьр кʹижани кӧ тедәрхьст wәки әз мәʹдәкьри мә. У чахе мьн жерʹа дьле хwә вәкьр, әwи гәләк бь дьлшәwати мьн дьбьһист. Паше әwи ани бира мьн кьред мьнә баш. Әwи ӧса жи ани бира мьн гьлийед Иса, wәки һәр мәрьв жь гәләк чʹьвика ԛимәттьр ә. Әз гәләк щар әwе рʹезе тиньм бира хwә у һʹәта ньһа әw мьн дьлгәрм дькә. Гьлийед рʹуспи гәләк дьле мьн гьрт ьн» (Мәт. 10:31). Кʹьтеба Пироз дьбежә wәки әм гәрәке тʹьме дьл бьдьнә һәв. Паwлосе шанди Мәсиһийед Ибранирʹа ньвиси: «Һәр рʹож дьл бьдьнә һәв, . . . wәки жь wә тʹӧ кәс бь гӧна нәхапә, нәбә сәрһʹьшк» (Ибрн. 3:13). Һәрге һун тиньн бира хwә кӧ ча һун пе гьлийед кәсәки ԛәwи бунә, һун ида заньн кӧ чьԛас фәрз ә дьл бьдьнә һәв. w16.11 1:2, 3

Сала 313 Д.М., Императоре Рʹоме Константин, йе кӧ пʹутпʹарьст бу, рʹелигийа Мәсиһитийә ԛәлп wәлатеда ԛануни кьр. Щарәки әwи чубу сәр щьвина сәрwеред дера. Паши ве щьвине, әwи фәрман да wәки Ариус кʹәшиш жь дере дәрхьн, чьмки Ариус инкʹар кьр wәки Иса Хwәде йә. Паше, wәʹде Император Теодоре I (379-395 Д.М.), рʹелигийа Мәсиһитийә ԛәлп, кӧ һатә наскьрьне ча Дера Католики, Империйа Рʹомеда бу рʹелигийа фәрми. Тʹәрихзан дьбежьн wәки Рʹоме пʹутпʹарьст, «Мәсиһитийе» ԛьрʹна чарада ԛәбул кьр. У һәма wи wәʹдәйи рʹелигийа Мәсиһитийә ԛәлп у рʹелигийед пʹутпʹарьсти тʹәвиһәв бун, у бунә әндәмед Бабилона Мәзьн. Ле һәла һе wи чахи жи кʹома бьчʹук йа Мәсиһийед рʹункьри, йед кӧ мина «гәньм» бун, һʹәму тьшт дькьрьн чь кӧ дәсте wан дьһат сәва Хwәдерʹа хьзмәт кьн (Мәт. 13:24, 25, 37-39). w16.11 4:8, 9

Әм дьжин рʹожед гәләк чәтьнда, чьмки Мире-щьн гәләк һерс ә у «мина шерʹ мьрә-мьра wи йә, дьгәрʹә кʹа кʹе һуфи хwә кә» (1 Пәт. 5:8; Әʹйан. 12:17). Ләма әм әʹщебмайи наминьн, wәки әм ча хьзмәткʹаред Хwәде, щара дьлтәнг дьбьн у кӧл-дәрда дьвиньн. Бәре жи хьзмәткʹаред Хwәде щара дьлтәнг дьбун. Мәсәлә, Кʹьтеба Пирозда те готьне, wәки Даwьд пʹадша жь хәмед хwә дьнәʹлийа (Зәб. 13:2). Ӧса жи биньн бира хwә, wәки Паwлос жи сәва һʹәму щьвина хәм дькьр (2 Корн. 11:28). Ле һәрге әм ида кӧл-дәрдада дьхәньԛьн, әм чь дькарьн бькьн? Баве мәйи әʹзмана кӧ мә һʹьз дькә, чаwа бәре али хьзмәткʹаред хwә дькьр, ӧса жи иро әw али мә дькә чахе әм кӧл-дәрда дькʹьшиньн. Чаwа? Хwәде дьлрʹьһʹәти дьдә мә, бь сайа дӧа, хwәндьна Хәбәра Хwәде у фькьрандьн сәр, рʹӧһʹе Хwәдейи пироз, у ӧса жи чахе әм дәрһәԛа хәмед хwә гьли дькьн wи кәсирʹа, итʹбарийа хwә кʹе жи тиньн. w16.12 3:1, 2

Хьзмәткʹаред Йаһоwа пешийа кӧ бьһатана нава рʹастийе, кьред нәрʹаст дькьрьн. Дьбәкә wана тьштед ӧса дькьрьн, бона «кʹижана ньһа . . . шәрм дькьн» (Рʹом. 6:21). Ле әwана кьред хьраб тʹәрькандьн, у һатьнә гӧһастьне. Мәсәлә, Паwлос Мәсиһийед Корьнтʹирʹа нәʹмә ньвиси, у жь wана һьнәк бәре пʹутпʹарьст, дьз, кʹонә, сәрхwәш бун. Ле йәкә әwана «жь гӧна һатьнә шуштьне» у «һатьнә бӧһӧрти-жьбарәкьрьне» (1 Корн. 6:9-11). Мәсиһийед Рʹомеда жи гәрәке әʹмьре хwә бьгӧһастана. Паwлос wанрʹа ньвиси: «Әндәмед ԛальбе хwә нәдьнә гӧнә кӧ бьбьнә һащәтед нәһәԛийе, ле бәле хwә бьдьнә дәсте Хwәде, чаwа йәки жь мьрьне рʹабуйи, бьра әндәмед wә бьбьнә һащәтед һәԛийе, бона Хwәде» (Рʹом. 6:13). Паwлос баwәр бу, wәки әwана дькарьн тьштед рʹаст бькьн у бәрдәwам кьн жь ԛәнщийа Хwәде кʹаре бьстиньн. w16.12 1:13

Йаһоwа мәрьв бь фәрәсәт у һʹӧнӧред баш әʹфьрандийә. Әwи һʹьш-аԛьл дайә мә сәва кӧ әм бькарьбьн чәтьнайа сафи кьн у нета дайньн пешийа хwә (Мәтʹлк. 2:11). Әwи ԛәwат дайә мә, wәки әм бькарьбьн нетед хwә биньн сери (Фили. 2:13). Әwи ӧса жи исаф дайә мә, wәки әм бькарьбьн тедәрхьн чь рʹаст ә у чь жи на. Исаф ӧса жи али мә дькә хwә жь кьред нәрʹаст дур бьгьрьн у шашийед хwә рʹаст кьн (Рʹом. 2:15). Бь сайа Хәбәра хwә, Йаһоwа тʹьме дькә бира мә wәки, фәрәсәтед хwә рʹаст у бона ԛәнщийе бьдьнә хәбате. Мәсәлә, Ньвисаред Ибранида те готьне, кӧ «тʹьвдира мәрьве хирәт әʹсә кʹаре тинә» у «тьште кӧ бона ль сәр хәбат кьрьне тә дитийә һәр чь бә, бь һеза [ԛәwата] хwә ль сәр wе бьхәбьтә» (Мәтʹлк. 21:5; Wаиз 9:10). Ле Ньвисаред Йунанида ньвисар ә: «Һʹәта кӧ wәхт дәстед мәда йә, һʹәмуйарʹа ԛәнщийе бькьн» у «жь wә кʹе чь пʹешкʹеш стандийә, бь wе жи һәврʹа хьзмәткʹарийе бькьн» (Галт. 6:10; 1 Пәт. 4:10). Әʹйан ә, Йаһоwа дьхwазә wәки әм чьԛас дькарьн һʹәму тьшти бькьн, wәки һьн хwәрʹа, һьн жи мәрьвед дьнрʹа кʹаре биньн. w17.01 1:1, 2

Адәм у Һеwайе гӧрʹа Хwәде нәкьрьн, у ләма һʹәму инсанәт гӧнәкʹар ьн у дьмьрьн. Ле йәкә, Хwәде азайи жь мә нәстандийә. Әwе йәкеда әм баwәр ьн, чьмки әм дьвиньн кӧ Хwәде ча бу һьндава щьмәʹта хwә Исраелда. Йаһоwа щьмәʹта хwәрʹа мәщал да wәки бьжберьн һәла әwана дьхwазьн бьбьнә мьлкʹе Wи, демәк щьмәʹта wи, йан на (Дәркʹ. 19:3-6). Ле гәло wана чь бьжарт? Wана бь рʹәзәдьли хwәст бьбьнә щьмәʹта Хwәде. Wана әʹйан әʹлам кьрьн: «Һʹәму готьнед Хӧдан әме бькьн!» (Дәркʹ. 19:8). Ле йазьх, әwе щьмәʹте жи азайа хwә нәрʹаст да хәбате у созе хwә нәани сери. Wәрә әм жь ве сәрһатийе дәрсе һьлдьн, кӧ тʹьме ԛимәт кьн азайа хwәйә бьжартьне, бәрдәwам кьн хwә ль Йаһоwа бьгьрьн у гӧрʹа тʹәмийед wи бькьн (1 Корн. 10:11). w17.01 2:9

Йаһоwа пʹехәмбәрәк жь Щьһудайе шандә щәм Йәровам Пʹадша, сәва әw һәрʹә у wи пʹадше нәамьнрʹа дәрһәԛа диwана Хwәде әʹлам кә. Әw пʹехәмбәре мьлук ӧса кьр ча Хwәде жерʹа готьбу, әw чу у дәрһәԛа диwана Хwәде әʹлам кьр. Чахе пʹадша сәр wи пʹехәмбәри һерс кʹәт у дьхwәст wи щәза кә, Йаһоwа әw пʹехәмбәр хwәй кьр (1 Пʹадш. 13:1-10). Йаһоwа тʹәми да wи пʹехәмбәри, wәки нан нәхwә у нә жи аве вәхwә, у рʹекә дьнрʹа вәгәрʹә мала хwә. Ле чахе әw дьчу мала хwә, рʹева мерәки әʹмьрда мәзьн рʹасти wи һат. Әwи мери гот wәки йанчь әw пʹехәмбәре Йаһоwа йә, у гот wәки әw тʹәви wи һәрʹә мала wи у нан бьхwә. Пʹехәмбәр тʹәмийа Йаһоwа нәани сери, чьмки чу мала wи мерьки у нан хwар. Жь бо wе йәке һерса Йаһоwа рʹабу. Паше, чахе әw пʹехәмбәр дьчу мала хwә, шер дәркʹәт у әw пʹехәмбәр кӧшт (1 Пʹадш. 13:11-24). Чьрʹа әw пʹехәмбәр кӧ шкәсти у мьлук бу, бь сәри хwә тʹәви мерәки дәрәwин чу? Кʹьтеба Пирозда найе готьне чьрʹа. Ле те кʹьфше wәки әwи пьшт гӧһе хwәва авит кӧ Йаһоwа жь wи дәwа дькьр, wәки әw «бь мьлуктийе тʹәви Хwәдейе хwә рʹе» һәрʹә. w17.01 4:1-3

Гьлийед пешьн жь Кʹьтеба Пироз бь щӧмләкә һеса ньвисар ә, ле теда фькьрәки гәләк кʹур ә: «Дәстпебунеда Хwәде әʹрд у әʹзман әʹфьрандьн» (Дәстп. 1:1). Чь кӧ Хwәде гәрдунеда чекьрийә әм тʹәне һьнә тьшт дьвиньн. У һе гәләк тьшт жи әм ньзаньн, мәсәлә дәрһәԛа космосе, рʹонайе у гравитасйайе (Wаиз 3:11). Ле Йаһоwа дәрһәԛа ԛьрара хwә һьндава әʹрде у инсанәте, мәрʹа зәлал әʹйан кьрийә. Ԛьрара wи әw бу, wәки мәрьвед кӧ бь дьлԛе Хwәде һатьнә әʹфьрандьне, бәхтәwар бьжин сәр әʹрде (Дәстп. 1:26). Әwана гәрәке бьбуна зарʹед wи, у Йаһоwа гәрәке бьбуйа Баве wан. Чаwа кʹьтеба Дәстпебун сәре 3-да те гьликьрьне, тьштәк бу мәʹни кӧ Йаһоwа ԛьрара хwә да сәкьнандьне (Дәстп. 3:1-7). Ле әwе мәʹнийе нькарьбу рʹе Йаһоwа бьгьрта wәки ԛьрара хwә бинә сери (Иша. 46:10; 55:11). Ләма жи әм гәрәке дӧдьли нәбьн, кӧ ԛьрара Йаһоwайә пешийе wе әʹсә wәʹдәда бе сери! w17.02 1:1, 2

Гәло Исраелийа ча дькарьбун бьдитана, wәки рʹӧһʹе пироз сәр Муса йә, нә ахьр рʹӧһʹе пироз найе дитьне? Исраелийа дьдитьн кӧ ча Муса кʹәрәмәта дькә у наве Хwәде Фьрәwьнрʹа да наскьрьне. Әwе йәке дьда кʹьфше wәки рʹӧһʹе пироз сәр wи йә у ԛәwате дьдә wи (Дәркʹ. 7:1-3). Хенщи ве йәке, бь сайа рʹӧһʹе пироз хәйсәт-һʹӧнӧред Мусайи баш һәбун, мәсәлә һʹьзкьрьн, мьлукти, у сәбьр. Әw һʹӧнӧр гәләк лазьм бун, wәки әw рʹьнд рʹебәрийе щьмәʹте бькә. Әʹйан бу, wәки Йаһоwа Муса бьжарт сәва әw бьбә рʹебәре щьмәʹта Wи. Паши Муса, Йаһоwа мәрьвед дьн дьжбарт у рʹӧһʹе пироз дьда wан, сәва рʹебәрийе щьмәʹта wи бькьн. Мәсәлә, Кʹьтеба Пироз дьбежә: «Йешуйе кӧрʹе Нун бь рʹӧһʹе сәрwахтийева һатә дагьртьне» (Ԛан. Дщр. 34:9). Ӧса жи, «рʹӧһʹе Хӧдан һатә сәр Гидәйон» (Һʹакьм. 6:34). У «рʹӧһʹе Хӧдан бьһез һатә сәр Даwьд» (1 Сам. 16:13). Әw һʹәму мер пәй рʹебәрийа рʹӧһʹе Хwәдейи пироз дьчун. Һьн жи, бь ԛәwата рʹӧһʹе пироз wана кьред ӧса мәзьн дькьрьн, кʹижан кӧ wе бь ԛәwата хwә нькарьбуна бькьн (Йешу 11:16, 17; Һʹакьм. 7:7, 22; 1 Сам. 17:37, 50). w17.02 3:3-5

Паwлос мәсәләкә баш мәрʹа һишт. Әwи заньбу wәки азайа хушк-бьра һәйә кӧ хwәха бона хwә сафикьрьна бькьн у әwи ԛәдьре азайа wан дьгьрт. Иро чахе рʹуспи ширәта дьдьнә хушк-бьра дәрһәԛа сафикьрьнед шәхси, чʹәʹв дьдьнә Паwлос. Әwана бь дьл у щан һазьр ьн ширәтед жь Кʹьтеба Пироз бьдьнә хушк-бьра. Ле йәкә рʹуспи фәсал ьн у дәwса wан сафикьрьна накьн, чьмки әw хушк-бьра wе хwәха щабдар ьн бона ахьрийа сафикьрьнед хwә. Ве йәкеда әм хwәрʹа дәрсәкә фәрз һин дьбьн: Әм дькарьн принсип у ширәтед жь Кʹьтеба Пироз нишани хушк-бьра кьн, ле диса жи әwана хwәха щабдар ьн бона хwә сафикьрьна бькьн. Чахе әwана бь билани сафикьрьна дькьн, кʹаре дьстиньн. Бәле, әм гәрәке тʹӧ щар нәфькьрьн кӧ һʹӧкӧме мә һәйә, wәки дәwса хушк-бьра сафикьрьна бькьн. w17.03 2:11

Кʹома Рʹебәрийе баwәрийа ԛайим дьдә кʹьфше, чьмки әw бәлакьрьна мьзгинийеда гәләк хирәт ә у әwи шьхӧли пешда дьбә. Ле гәло һун wи шьхӧлида пьштгьрийа Кʹома Рʹебәрийе дькьн? Һәрге әре, әме ша бьн чахе Рʹебәре мә Иса мәрʹа бежә: «Һәгәр wә ԛәнщи жь ван хушк-бьред мьнә йе һәри бьчʹук йәкирʹа кьр, wә мьнрʹа кьр» (Мәт. 25:34-40). Чахе Иса чу ль әʹзмен, әwи шагьртед хwә бей аликʹари нәһишт (Мәт. 28:20). Әwи заньбу кӧ чахе әw сәр әʹрде бу, рʹӧһʹе пироз, мьлйакʹәта у Хәбәра Хwәде али wи дькьрьн, wәки әw рʹебәрийе щьмәʹта Хwәде бькә. Иса аликʹарийа ӧса дьдә хӧламе амьн жи. Хӧламе амьн, демәк Мәсиһийед бьжарти, «пәй Бәрх дьчьн, кʹӧда кӧ әw дьчә» (Әʹйан. 14:4). У чахе әм пәй рʹебәрийа wан дьчьн, демәк әм пәй Рʹебәре хwә Иса дьчьн. Зутьрәке, Иса wе мә бьвә бәрбь жийина һʹәта-һʹәтайе (Әʹйан. 7:14-17). Бәле, тʹӧ сәрwер нькарә әwе йәке мәрʹа соз бьдә! w17.02 4:17-19

Әм гәрәке нә кӧ тʹәне чәтьнайед мәзьнда хwә бьсперьнә Йаһоwа, ле тьштед бьчʹукда жи. Гәло әм пе һʹьш-аԛьле хwә чәтьнайа сафи дькьн? Йан әм аликʹарийа Йаһоwа дьгәрʹьн у принсипед wи кӧ Кʹьтеба Пирозда ньвисар ьн, һьлдьдьн һʹәсаб? Мәсәлә, һәрге нәфәред мала тә рʹе тә дьгьрьн wәки нәчи щьвате йан жи щьватед мәзьн, тӧйе чь бьки? Гәло тӧйе аликʹарийе жь Йаһоwа бьхwази wәки бьзаньби чь бьки ве дәрәщеда? Йан жи дьбәкә тә хәбата хwә ӧнда кьр у анщах тә хәбатәкә тʹәзә дит, гәло тӧйе мәзьне хәбатерʹа бежи кӧ һәр һʹәфти гәрәке һәри щьвате? Чь чәтьнайед мә жи һәбьн, әм гәрәке wан гьлийед рʹеза ве рʹоже хwәй кьн. w17.03 4:6