Щотмәһ

Йаһоwа «Хwәдейе сәбьре» у бәрдьлийе йә (Рʹом. 15:5). Тʹәне әw бь тʹәмами фәʹм дькә проблемед мә. Әw ӧса жи фәʹм дькә кӧ ча дәрәщед мә, емосйед мә, у ԛьсуртийа мә сәр мә һʹӧкӧм дьбьн. Ләма тʹәк әw ә кʹижан дькарә сәбьре бьдә мә. Ле чахе әм бона сәбьре Хwәдерʹа дӧа дькьн, әw ча щаба дӧайед мә дьдә? Чахе әм жь Йаһоwа һиви дькьн кӧ али мә бькә чәтьнайа дәрбаз кьн, әw wе әʹсә «дәлиләке . . . бькә» (1 Корн. 10:13). Ле гәло әw те һʹәсабе кӧ Йаһоwа wе мә жь тәнгасийе хьлаз кә? Дьбәкә. Ле гәләк щар әw али мә дькә сәва әм бькарьбьн «сәбьр бькьн» wан тәнгасийада. Бәле, Йаһоwа мә ԛәwи дькә у ләма әм дькарьн «һәр тьштида бь думька дьреж сәбьр бькьн» (Колс. 1:11). Чьмки Йаһоwа мә һʹәму алийава рʹьнд занә, әw wе тʹӧ щар нәһелә wәки әм бькʹәвьнә тәнгасийа ӧса гьранда, кʹидәреда әме нькарьбьн wирʹа амьн бьминьн. w16.04 2:5, 6

Хәбәра Хwәде мәрʹа дьбежә кӧ әм гӧрʹа сәрwертийед мәрьва бькьн. Ле ӧса жи мә һин дькә кӧ әм гәрәке гӧрʹа Хwәде бькьн, нә кӧ гӧрʹа мәрьва (Кʹар. Шанд. 5:29; Тито 3:1). Гәло Хәбәра Хwәде мьԛабьли хwә хәбәр дьдә? На! Принсипа дәрһәԛа гӧһдарикьрьне али мә дькә, кӧ фәʹм кьн у wан һәрдӧ тʹәмийа жи биньн сери. Иса әw принсип зәлал кьр бь wан гьлийа кӧ ве рʹеза рʹожеда ньвисар ә. Әм гӧрʹа ве һʹӧкӧмәтийе дькьн, бьн кʹижанеда дьжин, демәк әм ԛануна ве тиньн сери. Һьн жи әм ԛәдьре wан дьгьрьн йед кӧ ве һʹӧкӧмәтийеда ԛӧльх дькьн, у ӧса жи әм хәрще ве дәwләте дьдьн (Рʹом. 13:7). Ле йәкә, һәрге әw сәрwерти жь мә тьштәки ӧса дәwа дькьн, кӧ әм гәрәке гӧрʹа Хwәде нәкьн, әм бь ԛәдьр wанрʹа дьбежьн кӧ әме әве йәке нәкьн. Әм шьхӧлед политика дьнйайеда тʹәвнәбуйине хwәй дькьн (Иша. 2:4). Ӧса жи, әм мьԛабьли сәрwертийед мәрьва ниньн, чьмки Йаһоwа изьне дьдә кӧ әwана һәбьн. У әм нә жи тʹәви шьхӧлед wәлатпʹарезийе йан насийоналийе дькʹәвьн (Рʹом. 13:1, 2). Әм рʹабәрибуне саз накьн, нә жи дәнг дьдьнә кәсәки дәwләте. Һьн жи, әм хwәха пәй wе йәке накʹәвьн кӧ дәwләтеда ԛӧльх кьн йан жи сәрwера бьгӧһезьн. w16.04 4:1, 2

Мәсиһи һʹәчʹи зәʹф чәтьнайед ортʹа һәвдӧ, гәрәке хwәха тʹәви һәв сафи кьн. Ле Иса гот кӧ һьнә дәрәщада дьԛәwьмә лазьм ә щьватерʹа бежьн, демәк рʹуспийарʹа (Мәт. 18:15-17). Демәк, һәгәр мәрьве кӧ нәһәԛи кьр, нахwазә бьре хwә бьбьһе, нә жи дьхwазә шәʹдә бьбьһе, гәрәке бежьнә рʹуспийа. Ле һәрге әw рʹуспийа жи нәбьһе, тʹәви wи мәрьви гәрәке чаwа тʹәви «пʹутпʹарьст у хәрщгьра» бьн. Иро, әw те һʹәсабе wәки әw мәрьв гәрәке жь щьвате бе дәрхьстьне. Дәрхьстьна жь щьвате дьдә кʹьфше, wәки әw «нәһәԛийа» кӧ әwи һьндава бьре хwә кьр, тьштәки бьчʹук нибу. Демәк, һәгәр әw нәһәԛи дькарьбу ортʹа wанда сафи буйа, ле сафи нәбу у әw нәһәԛи нә тьштәки бьчʹук бу, әw мәрьв жь щьвате те дәрхьстьне. Нәһәԛийа ӧса дькарә бьбә, мәсәлә фелбази, йан жи бӧхдан сәва кӧ наве кәсәки хьраб кьн. Тʹәне дәрәщед ӧсада дькарьн wан се гава бькьн, кʹижан кӧ Иса Мәтта 18:15-17-да гот. w16.05 1:14

Кʹьтеба Пироз дәрһәԛа һʹәму дәрәща тʹәмийед конкрет надә. Мәсәлә, Кʹьтеба Пирозда найе готьне кӧ Мәсиһи чь кʹьнщ гәрәке хwә кьн. Ве йәкеда рʹасти жи биланийа Йаһоwа те кʹьфше. Һәр wәлатәкида стил у ԛәйде кʹьнщхwәкьрьне щурʹә-щурʹә йә, у һьн жи чьԛас wәʹдә дәрбаз дьбә, һаԛас щурʹе кʹьнщхwәкьрьне тенә гӧһастьне. Ләма жи, һәрге Кʹьтеба Пирозда бьһата рʹезкьрьне щурʹе кʹьнщхwәкьрьне у хәмьландьне, әw йәк wе лайиԛи кʹьнщхwәкьрьна иро нибуйа. Әм чь гәрәке бькьн, чахе тьштәки дьхwазьн сафи кьн, ле дәрһәԛа ве йәке Кʹьтеба Пирозда рʹастә-рʹаст тʹәми тʹӧнә йә? Wан дәрәщада, әм гәрәке нә кӧ сафи кьн ӧса ча әм дьхwазьн, ле гәрәке дәрһәԛа дәрәща хwә леколин бькьн, у сафикьрьна ӧса бькьн, кʹижан wе Йаһоwа ԛәбул кә у кʹәрәм  кә (Зәб. 37:5). w16.05 3:2, 6

Бешьк, щәм мә һәр кәси һәйә пʹаред Кʹьтеба Пироз, кʹижан кӧ әм һʹьз дькьн. Мәсәлә, һьнәка хwәш те чар кʹьтебед пешьнә Мьзгинийе. Чьмки ль wедәре те гьликьрьне кӧ чаwа Иса пе жийина хwә әʹйан кьр, кӧ Йаһоwа Хwәдейе чьԛас ԛәнщ ә (Йуһʹн. 14:9). Һьнәка хwәш те кʹьтебед пʹехәмбәртийе, мәсәлә кʹьтеба Әʹйанти. Чьмки ль wедәре пʹехәмбәрти һәнә, кʹижан кӧ «гәрәке зутьрәке бьԛәwьмьн» (Әʹйан. 1:1). Жь мә гәләка хwәш те кʹьтеба Зәбур, чьмки чахе әм әве кʹьтебе дьхуньн, әм бәрдьлийе дьстиньн. Гәләка жи хwәш те кʹьтеба Мәтʹәлок, чьмки ль wедәре әм дәрс у ширәтед керһати дьстиньн. Бь рʹастийе жи, Кʹьтеба Пироз бона һәр кәса йә. Әм чаwа кӧ Кʹьтеба Пироз һʹьз дькьн, әм ӧса жи әʹдәбйәтед мә һʹьз дькьн, кʹижан кӧ сәр һʹиме Кʹьтеба Пироз ьн. Мәсәлә, әм дьстиньн кʹьтеба, брошура, журнала, у әʹдәбйәтед дьн. Бәле, әм гәләк ԛимәт дькьн у рʹази нә бона хwарьна рʹӧһʹани. У әм заньн кӧ әw хwарьна рʹӧһʹани жь Йаһоwа йә. Бь сайа ве хwарьна рʹӧһʹани, әм рʹӧһʹанида һʹьшйар дьминьн у баwәрийа хwә ԛәwи хwәй дькьн (Тито 2:2). w16.05 5:1-3

Рʹӧһʹе пироз дькарә гәләк тьштада мә бьгӧһезә. Мәсәлә, әw али мә дькә әм Мәсиһийед һе баш бьн, у ӧса жи бәре рʹӧһʹ бьдьнә кʹьфше. Бәрәки әw һәйә һʹьзкьрьн. Әм Хwәде һʹьз дькьн, ләма тʹәмийед wи бона мә баргьран ниньн, у һьн жи әм дьхwазьн гӧрʹа wи бькьн у дьхwазьн әw мә бьгӧһезә. Рʹӧһʹе пироз ӧса жи мәрʹа ԛәwате дьдә, кӧ әм нәкʹәвьнә бәр байе ве дьнйайе (Әфәс. 2:2). Паwлосе шанди чахе щаһьл бу, нава сәрwеред рʹелигийа Щьһуйада бу, йед кӧ ԛӧрʹә у бабах бун. Ле бь сайа рʹӧһʹе пироз әw һатә гӧһастьне. Әwи ньвиси: «Әз һәр тьшти бь сайа wи дькарьм, йе кӧ ԛәwате дьдә мьн» (Фили. 4:13). Дә wәрә әм мина Паwлос, бь мьлукти тʹьме жь Йаһоwа рʹӧһʹе пироз бьхwазьн. Йаһоwа wе әʹсә щаба дӧайед мә бьдә (Зәб. 10:17). w16.06 1:12

Йаһоwа Хwәдайе мә тʹәк ә у йәк ә. Ләма, әм гәрәке хут тʹәне wи бьһʹәбиньн у бь тʹәмами wирʹа амьн бьн. Әм нькарьн һʹәбандьна хwә Йаһоwарʹа тʹәви һʹәбандьна хӧданед дьн кьн, ӧса жи тʹәви фькьр у кьред ԛәлп кьн. Әм гәрәке тʹьме бира хwәда хwәй кьн, кӧ Йаһоwа нә кӧ тʹәне жь хӧданед дьн мәзьнтьр ә, йан жь wан ԛәwаттьр ә, ле Хwәдейе рʹаст тʹәне Йаһоwа йә. У әм гәрәке тʹәне wи бьһʹәбиньн. Әм гәрәке нәһельн кӧ жийина мәда тʹӧ тьшт щийе пешьн бьгьрә, хенщи Йаһоwа. Ле әw чь тьшт ьн кӧ дькарьн щийе пешьн бьгьрьн? Йаһоwа Дәһ Ԛанунада щьмәʹта хwәрʹа зәлал гот, кӧ хенщи wи гәрәке тʹӧ хӧданед wан тʹӧнә бә. Ӧса жи әwи гот, кӧ әwана кьред ӧса нәкьн, кʹижан кӧ пʹутпʹарьстийева гьредайи нә (Ԛан. Дщр. 5:6-10). Иро щурʹә-щурʹә пʹутпʹарьсти һәйә, у һьнәк жь wан, тьштед ӧса ньн кӧ чәтьн ә тедәрхи wәки пʹутпʹарьсти йә. Ле дәʹwакьрьнед Йаһоwа нәһатьнә гӧһастьне, әw диса жи «тʹәк ә». Wәрә әм ньһа пебьһʹәсьн кӧ әw йәк бона мә чь те һʹәсабе (Марԛ. 12:29). w16.06 3:10, 12

Чахе Пәтрус жь Иса пьрси, гәло гәрәке әм «һʹәта һʹәфт щара» бьбахшиньн? Иса щаба wи да: «Әз набежьмә тә һʹәта һʹәфт щара, ле һʹәта һʹәфте щара һʹәфт». Әʹйан ә, кӧ бь wан гьлийа Иса дьхwаст бьгота, кӧ әм тʹьме һазьр бьн бьбахшиньн (Мәт. 6:15; 18:21, 22). Бира хwәда хwәй кьн кӧ кемасийед мә гьшка һәнә, у щара әме жи йед дьн бьхәйидиньн. Һәрге мә тедәрхьст кӧ мә кәсәк хәйидандийә, Кʹьтеба Пироз мә ширәт дькә кӧ әм гәрәке һәрʹьн, у бахшандьне жь wи бьхwазьн у ль һәв бен (Мәт. 5:23, 24). Бәле, әм гәләк рʹази нә чахе йед дьн шашийед мә дьбахшиньн. У әм жи гәрәке һьндава wан ӧса бьн (1 Корн. 13:5; Колс. 3:13). Һәрге әм бьбахшиньнә мәрьва, Йаһоwа жи wе бьбахшинә мә. Чахе әм дьвиньн кӧ мәрьв шашийа дькьн, wәрә әм рʹәʹм бьн һьндава wанда, чаwа Хwәдейе мә һьндава мә рʹәʹм ә. (Зәб. 103:12-14.) w16.06 4:15, 17

Wан рʹожед ахьрийеда щьмәʹта Йаһоwа бәла дькьн «мьзгинийа Пʹадшатийе . . . кӧ һәму мьләтарʹа бьбә шәʹдәти» (Мәт. 24:14). Әw «мьзгини» кӧ әм бәла дькьн, әw ӧса жи те һʹәсабе мьзгинийа ԛәнщийа нәһежа жь Хwәде. Ле чьрʹа әм дькарьн әwе йәке бежьн? Чьмки һʹәму кʹәрәм, кʹижан кӧ әме бьстиньн бь сайа Пʹадшатийа Хwәде, жь ԛәнщийа Йаһоwа те (Кʹар. Шанд. 20:24; Әфәс. 1:3). Бәле, Паwлос гәләк рʹази бу жь Йаһоwа бона ԛәнщийа wи. Ле һун рʹази нә жь Хwәде сәва ԛәнщийа нәһежа, кӧ әw һьндава мә дьдә кʹьфше? (Рʹом. 1:14, 15). Рʹаст ә әм мәрьвнә гӧнәкʹар ьн, ле жь ԛәнщийа Йаһоwа әм гәләк щурʹә кʹаре дьстиньн. Мә гәләк кʹәрәм стандийә жь Йаһоwа, ләма әм борщдар ьн мәрьвед дьненарʹа жи гьли кьн дәрһәԛа һʹьзкьрьна Йаһоwа. Әм ӧса жи wанрʹа гәрәке гьли кьн, кӧ чь кʹаре әwана дькарьн бьстиньн жь һʹьзкьрьна wи. w16.07 4:4, 5

Чәнд рʹож пешийа мьрьна хwә, Иса се щара шагьртед хwә пешда ширәт кьр дәрһәԛа «сәрwере ве дьнйайе» (Йуһʹн. 12:31; 14:30; 16:11). Иса заньбу кӧ Мире-щьна wе мәрьва бьхальфинә, сәва кӧ әwана гӧһ нәдьнә пʹехәмбәртийа Хwәде дәрһәԛа ахьрийе (Сефн. 1:14). Мире-щьна бь сайа рʹелигийед ԛәлп мәрьва дьхапинә. Һун дина хwә дьдьне кӧ ньһерʹандьна мәрьва ча йә? Гәләк әʹйан ә кӧ Шәйтʹан «шәвәрәша корʹа анийә сәр фәʹме нәбаwәра». У ләма мәрьв нә жи баwәр дькьн, кӧ хьлазийа ве дьнйайе незик ә, у кӧ ньһа Иса Мәсиһ Пʹадшатийа Хwәдеда сәрwертийе дькә (2 Корн. 4:3-6). Чахе әм дьбежьн дәрһәԛа хьлазийа ве дьнйайе, һʹәчʹи зәʹф мәрьв гӧһ надьнә мә. Әм гәрәке нәһельн, кӧ ньһерʹандьна мәрьва сәр мә һʹӧкӧм бә. Чьмки әм заньн рʹастийа ве йәке, кӧ чьԛас фәрз ә әм һʹьшйар бьминьн. w16.07 2:11, 12

Чахе бук у зәʹва рʹожа дәʹwате һәв дьвиньн, бь гьлийа найе готьне кӧ шабуна wана чьԛас зәʹф ә. Хәбәра Хwәде ширәта билани дьдә wан, йед кӧ дьхwазьн бьзәwьщьн. Чьмки Сазкʹаре зәwаще Йаһоwа дьхwазә, wәки щоте зәwаще бь рʹастийе шабуне бьстиньн зәwаща хwәда (Мәтʹлк. 18:22). Ле йәкә Хәбәра Хwәде дьбежә, кӧ щотед зәwаще ча мәрьвед гӧнәкʹар «wе рʹасти охьрмед гьран бен» (1 Корн. 7:28). Әw охьрмед гьран, демәк проблем, ча дькарьн кем бьн? У чь дькарә зәwаща Мәсиһити бәхтәwар кә? Кʹьтеба Пироз дьбежә кӧ һʹьзкьрьн гәләк фәрз ә. Һәнә щурʹед һʹьзкьрьне, у әwан һʹәму щурʹа мер у жьн зәwащеда гәрәке бьдьнә кʹьфше. Мәсәлә, дьлшәwати (Сәр зьмане Йунани, филеа) гәләк лазьм ә зәwащеда. Һʹьзкьрьна романтик жи (ерос) лазьм ә ортʹа мер у жьнда. Ӧса жи һʹьзкьрьна һьндава малбәте (сторге) гәләк фәрз ә, илаһи чахе малбәтеда зарʹ һәнә. Ле һәйә һʹьзкьрьнәкә ӧса, кʹижан кӧ сәр һʹиме принсипа йә, у бь рʹастийе малбәте бәхтәwар дькә. Әw һәйә һʹьзкьрьна агапе. w16.08 2:1, 2

Тимотʹейо хьзмәтийеда ида щерʹьбанди бу. Ле чьрʹа wирʹа лазьм бу кӧ һе пешда һәрʹә? Тимотʹейо заньбу кӧ ча мәрьв у ӧса жи дәрәщә тенә гӧһастьне. Ләма әwи фәʹм дькьр кӧ әw гәрәке методед һинкьрьна хwә бьгӧһезә. Чьмки ӧса әwи wе бькарьбуйа бьгиһанда дьле мәрьва. Әм жи гәрәке ӧса бькьн, чахе мьзгинийе бәла дькьн. Гәләк щар чахе әм мал бь мал хьзмәт дькьн, мәрьв малда ниньн. Һьнә щийада жи, әм нькарьн мәрьва малда бьвиньн, чьмки дәрийа ве авайе кʹидәре кӧ әwана дьжин дадайи нә. Һәрге мьһала wәда жи ӧса йә, гәло һун дькарьн методед дьн бьдьнә хәбате, сәва wан мәрьварʹа мьзгинийе гьли кьн? Бәлакьрьна мьзгинийе щийед кӧ гәләк мәрьв һәнә, методәкә гәләк баш ә. Әw щурʹе хьзмәтийе гәләк мьзгинвана хwәш те. Әwана дьчьнә щийед сәкьнандьна трена, отобуса, ӧса жи дькʹана у парка, сәва кӧ тʹәви мәрьва хәбәрдьн. w16.08 3:14-16

Йаһоwа бьратийа һʹәмдьнйайе да мә, демәк хушк-бьра, йед кӧ дькарьн али мә бькьн у мә ԛәwи кьн (Ибрн. 12:12, 13). Ԛьрʹна йәкеда гәләк Мәсиһи жь хушк-бьра аликʹарийа рʹӧһʹани дьстандьн у ԛәwи дьбун. Рʹожа иройин жи ӧса нә. Ле әм чь дькарьн бькьн? Бьфькьрьн кӧ чаwа Һарун у Һур бь рʹастийе дәсте Муса дьгьртьн (Дәркʹ. 17:8-13). Ле әм ча дькарьн дәстед сьст ԛәwи кьн? Әм гәрәке дина хwә бьдьн кӧ кʹе һʹәwще аликʹарийе йә, у чьда лазьм ә али wан бькьн. Мәсәлә, мәрьвед әʹмьрда мәзьн, сьһʹәт-ԛәwата кʹе жи хьраб ә, йан әwед кӧ нәфәред мале мьԛабьли wан дәртен, йед кӧ тʹәне нә, йан әwед кӧ мәрьве хwәйи незик ӧнда кьрьнә. Әм ӧса жи дькарьн щаһьла ԛәwи кьн, чьмки әwана ве дьнйайеда рʹасти щерʹьбандьна тен. Әв дьнйа, wана һелан дькә кӧ әwана тьштед нәрʹаст бькьн, йан жи пешдачуйи бьн мәсәлә хwәндьна бьльндда, материйалида, йан професийеда (1 Тʹеслн. 3:1-3; 5:11, 14). Бьфькьрьн кӧ wәʹде щьвате, хьзмәтийе, нанхwарьне, йан чахе пе тʹеле хәбәрдьдьн, һун ча дькарьн һʹале хушк-бьра бьпьрсьн у чьда дькарьн али wан бькьн. w16.09 1:13, 14

Әм борщдар ьн бәр Хwәде, хушк-бьред хwә у ӧса жи бәр мәрьвед дьн, кӧ кʹьнще ӧса хwә кьн, wәки лайиԛи wе мьзгинийе бә, кʹижан кӧ әм бәла дькьн. Хенщи wе йәке, бь кʹьнщхwәкьрьна хwә, әм Йаһоwа рʹумәт дькьн (Рʹом. 13:8-10). Гәләк фәрз ә кʹьнще лайиԛи хwә кьн, илаһи чахе шьхӧлед рʹӧһʹани дькьн, мәсәлә чахе тенә сәр щьвате у чахе әм хьзмәт дькьн. Әм гәрәке ӧса хwә кьн, «чаwа ль wан [мәрьва] дькʹәвә, йед кӧ наве хwәденасийе һьлданә сәр хwә» (1 Тимтʹ. 2:10). Һьнә кʹьнщ дьбәкә щики лайиԛ бьн, ле щийед дьн дькарә нәлайиԛ бьн. Ләма жи Шәʹдед Йаһоwа һьлдьдьн һʹәсаб ԛәйдед wи щийи, кʹидәре дьжин, wәки ԛәдьр бьдьн кʹьфше һьндава мәрьвед wи щийи. Чахе әм дьчьнә щьватед мәзьн, кʹьнщхwәкьрьна мә гәрәке маԛули у мьлукти бә, нә кӧ нәлайиԛ, мина йа wе дьнйайе. Ӧса әме фьрнаԛ бьн, кӧ әм хwә дьдьнә кʹьфше ча Шәʹдед Йаһоwа. У һьн жи wи чахи әме һеса бькарьбьн мьзгинийе бәла кьн чахе мәщал һәбә. w16.09 3:7, 8

Гьлийед Паwлос гәләк бь логики нә у ԛәwи нә. Бәле, тьштәки сах у чәтьн хwәха wе ченәбуйа. Метʹодәкә ӧса бьдьнә хәбате чахе һун хәбәр дьдьн тʹәви wи мәрьви, йе кӧ Кʹьтеба Пирозда дӧдьли йә. Пебьһʹәсьн кӧ әw чь баwәр дькә у тедәрхьн кӧ кʹижан тʹема wе жерʹа һʹәwас бә (Мәтʹлк. 18:13). Һәрге әw зандарийе һʹьз дькә, жерʹа гьли кьн кӧ ча Кʹьтеба Пироз алийе зандарийеда рʹаст ә. Йан һәрге әw һʹьз дькә тʹема дәрһәԛа тʹәрихийе, гьли кә кӧ ча пʹехәмбәртийед Кʹьтеба Пироз һатьнә сери у ча әw алийе тʹәрихийеда рʹаст ә. Wан мәрьварʹа, йед кӧ дьхwазьн пебьһʹәсьн ча дькарьн һе бәхтәwар бьн, гьли кә кӧ ча принсипед Кʹьтеба Пироз дькарьн али wан бькьн. Wанрʹа мәсәле бинә дәрһәԛа һинкьрьна Иса сәр чʹийе, кӧ кʹьтеба Мәтта сәре 5-7-да ньвисар ә. Щаһьлно, бира хwәда хwәй кьн wәки нета wә гәрәке әw бә кӧ дьле мәрьва бькʹьрʹьн, нә кӧ тʹәви wан бькʹәвьнә дәʹwе. Ләма жи, чахе һун пьрса дьдьнә wан, рʹьнд гӧһ бьдьнә wан. Бь ԛәдьр тʹәви wан хәбәрдьн, илаһи тʹәви йе әʹмьрда мәзьн. Ӧса әwана wе һелан бьн, кӧ ԛәдьре баwәрийа wә бьгьрьн. w16.09 4:14-16

Сәва кӧ али мәрьвед хәриб бькьн, wәки әwана щьватеда хwә тʹәхмин кьн чаwа мала хwәда, пьрсәкә ӧса бьдьнә хwә: «Һәрге әз wәлате хәрибда бума, мьне бьхwәста кӧ мәрьв һьндава мьн чь щурʹәйи буна?» (Мәт. 7:12). Бь сәбьр бьн һьндава wан, чьмки wанрʹа чәтьн ә wәлате хәрибда бьжин. Сәре-серида, дьбәкә әм бь тʹәмами фькьред wан йан кьред wан фәʹм нәкьн, чьмки әм жь һәв щӧдә дьбьн. Ләма әм гәрәке дәʹwа нәкьн кӧ әwана бенә сәр ԛәйде мә, ле әwана чь щурʹәйи нә ӧса wана ԛәбул кьн. Һәрге һун һе зедә пебьһʹәсьн дәрһәԛа wәлат у әʹдәтед wан, һуне тʹәви wан һе һеса хәбәрдьн. Wәʹде ԛӧльхкьрьна тʹәви малбәте, һун дькарьн леколин бькьн дәрһәԛа әʹдәтед wан, йед кӧ тенә щьвата мә. Ӧса жи һун дькарьн һе незики wан бьн, чахе wана тʹәглиф кьн мала хwә сәр нанхwарьне. Йаһоwа «дәргәһе баwәрийе» бәр һʹәму мьләта вәкьр. Wәрә әм жи чʹәʹв бьдьнә wи, у дәре мала хwә вәкьн бона хәриба, йед кӧ тʹәви мә Хwәдерʹа ԛӧльх дькьн (Кʹар. Шанд. 14:27; Галт. 6:10; Иб. 31:32). w16.10 1:15, 16

Чахе Паwлос гьли кьр дәрһәԛа щурʹә-щурʹә мер у жьнед амьн, әwи паше гьли кьр дәрһәԛа wи кәси, кʹижан бу мәсәләкә лапә ԛәwи. Әw һәбу Иса Мәсиһ. Ибрани 12:2-да Паwлос гот, wәки Иса «бона wе шабуна пешийа хwә», стуна щәфайе һьлда, «шәрм бәр тьштәки һʹәсаб нәкьр, паше кʹеләка Хwәдейә рʹасте сәр тʹәхт рʹуньшт». Иса щәфе гьран кʹьшанд у Хwәдерʹа амьн ма чьмки баwәрийа wи ԛайим бу, у әм гәрәке кʹур бьфькьрьн сәр мәсәла wи. Гәләк Мәсиһийед ԛьрʹна йәкеда әʹмьре хwә ӧнда кьрьн, чьмки мина Иса амьн ман Хwәдерʹа. Мәсәлә жь wана йәк Антипас бу (Әʹйан. 2:13). Ле әw һʹәму Мәсиһийед амьн, хәлата хwә ида стандьнә. Әwана жи, мина хьзмәткʹаред бәре, һивийе бун «wәки жь мьрьне рʹабьн бьгьһижнә жийинәкә һе ԛәнщ» (Ибрн. 11:35). У әw һʹәму Мәсиһийед амьн, паши сала 1914, чахе Пʹадшатийа Хwәде саз бу, һатьнә сахкьрьне wәки бьжин сәр әʹзмана у тʹәви Иса сәрwертийе әʹрде бькьн (Әʹйан. 20:4). w16.10 3:12

Һьнә де-бав пʹайе зарʹед хwә надьн, чьмки де-баве wан жи дьл нәдьданә wан. Мәрьвед мәзьн жи һʹәwще пʹайа нә, мәсәлә, гәләк хәбатчи дькьнә кӧтә-кӧт чьмки әwана бона шьхӧле хwә ԛә пʹайа настиньн. Әм дькарьн дьл бьдьнә мәрьва, чахе пʹайе wан дьдьн сәва кьре wани баш. Ӧса жи әм дькарьн wана дьлгәрм кьн бь ве йәке, кӧ wанрʹа бежьн wәки һʹӧнӧред wани баш һәнә, йан жи әм дькарьн бәр дьле wанда бен чахе әwана дьлтәнг ьн (1 Тʹеслн. 5:14). Хәбәра Йунани кӧ те һʹәсабе «дьл бьдьнә» бәр кәсәки, рʹастә-рʹаст те һʹәсабе «кʹеләка кәсәки бьсәньн». Бәле, әм гәләк щар тʹәви хушк-бьред мә нә, у гәләк мәщалед мә һәнә wәки гьлийед ширьн wанрʹа бежьн сәва дьл бьдьнә wан (Wаиз 4:9, 10). Wе керһати бә һәрге әм пьрсе бьдьнә хwә: «Гәло әз мәщале дьвиньм wәки йед дьненарʹа бежьм, кӧ чьрʹа әз wана ԛимәт дькьм у һʹьз дькьм?» Пешийа кӧ щаба ве пьрсе бьдьн, wе баш бә сәр ве рʹезе бьфькьрьн: «Готьна кӧ щийе хwәда те готьне, чьԛас хwәшьк ә!» (Мәтʹлк. 15:23). w16.11 1:3-5

Чахе щьмәʹта Исраеле гӧрʹа Йаһоwа дькьр, нава wанда тʹьме тʹәрбәти у йәкти һәбу. Йаһоwа дәрһәԛа щьмәʹта хwә пʹехәмбәрти кьр: «Мина кәрийәки дь нава черәгәһа хwәда нә, биньм щәм һәв» (Мих. 2:12). Һьн жи Йаһоwа бь Сефанйа пʹехәмбәр жи пешда гот: «Жь бәр кӧ wәки бь дьләки жь Хӧданрʹа ԛултийе бькьн, бона һʹәму банги наве Хӧдан бькьн, әзе wи чахи левед паԛьж бьдьм нәтʹәwәйан» (Сефн. 3:9). Чьԛас ԛәдьрәки мәзьн ә бона мә, wәки әм дькарьн йәктийеда Йаһоwа бьһʹәбиньн! Бәле, рʹьнд әʹйан ә, wәки Хәбәра Хwәде али Мәсиһийед ԛьрʹна йәке кьр, кӧ щьватеда тʹәмьзайи, әʹдьлайи, у йәкти хwәй кьрьн (1 Корн. 1:10; Әфәс. 4:11-13; 1 Пәт. 3:8). Иро, бь сайа wан мәрьва йед кӧ тʹәшкиләта Хwәдеда йәктийеда ньн, мьзгинийа Хwәде сәр тʹәмамийа әʹрде те бәлакьрьне. w16.11 2:16, 18

Wи wәʹдәйи гәләк мәрьв дькарьбун Кʹьтеба Пироз бьхуньн сәр зьмане Йунани йан жи Латини. У wана дькарьбу һинкьрьнед Хәбәра Хwәде, бәрамбәри һинкьрьнед дере бькьн. Чахе wана Кʹьтеба Пироз дьхwәнд, һьнәка тедәрдьхьстьн wәки дер тьштед ԛәлп һин дькьн, чь кӧ сәр һʹиме Кʹьтеба Пироз нибу, ләма әw мәрьв әwан һинкьрьна ԛәбул нәдькьрьн. Ле бона wан әw йәк гәләк хоф бу, чьмки һәрге wана әw фькьред хwә әʹйан бьготана, дькарьбун бьһатана кӧштьне жи. Wәʹдә дәрбаз дьбу, у мәрьв зьмане Йунани у Латини ида һьндьк дьданә хәбате. Ле сәрwеред дера нәдьхwәстьн, wәки Кʹьтеба Пироз сәр зьманед бәлабуйи бе wәлгәрʹандьне, кʹижан кӧ мәрьварʹа фәʹмдари бу. Һәрге кәсәк тʹәви һинкьрьнед дере ԛайил нибу, wи ԛайим щәза дькьрьн. Ләма, һәрге дьһатә сьтандьне wәки тʹәвайи тʹоп бьн, хьзмәткʹаред Хwәдейи амьн демәк рʹункьрийа, гәрәке дьзикава кʹом бь кʹом тʹоп буна сәва кӧ нәкʹәвьнә чʹәʹва. Рʹункьри жи, демәк «кʹаһинед пʹадшатийе», нькарьбун бь организә тʹәвайи Хwәдерʹа хьзмәт кьрана. Мәʹнийа wе йәке әw бу wәки Бабилона Мәзьн wи чахи мәрьва ԛайим кьрә бьн дәсте хwә! w16.11 4:8, 10, 11

Әм гәрәке хwә дур бьгьрьн жь гӧнед ӧса гьран, ча мәсәлә һьнә Корьнтʹийа дькьрьн. У әw йәк фәрз ә, чьмки һәрге «гӧнә сәрwерийе» мә бькә, wи чахи әме нькарьбьн һивийа кʹәрәма Хwәде бьн. Ле һәрге әм гӧнед бьчʹук дькьн, гәло әм дькарьн бежьн, wәки әм рʹасти бь дьл у щан гӧрʹа Хwәде дькьн? (Рʹом. 6:14, 17). Бьфькьрьн дәрһәԛа Паwлосе шанди. Әм дькарьн дӧдьли нәбьн кӧ әwи кьред ӧса нәдькьр, кʹижан кӧ 1 Корьнтʹи 6:9-11-да тенә гьликьрьне. Ле йәкә әwи фәʹм дькьр, wәки «гӧнә сәр wи йә». Әwи ньвиси: «Әз хун у гошт ьм, хӧламәки гӧнәрʹа фьроти. Чьмки әз фәʹм накьм чь дькьм. Нә кӧ wи тьшти дькьм, чь кӧ дьхwазьм, ле wи тьшти дькьм, чь кӧ бәр чʹәʹве мьн рʹәш ә» (Рʹом. 7:14, 15). Рʹаст ә Паwлос гӧнед гьран нәдькьр, ле жь wан рʹеза те кʹьфше, wәки Паwлос мьԛабьли һьнә тьштед дьн шәрʹ дькьр, йед кӧ әwи һʹәсаб дькьр ча гӧнә. Әwи тьштед бьчʹукда жи дьхwаст дьле Хwәде ша кә (Рʹом. 7:21-23). Wәрә әм жи чʹәʹв бьдьнә wи у һʹәму тьштида бь дьл у щан гӧрʹа Йаһоwа бькьн. w16.12 1:15, 16

Чахе һун сәва тьштәки бәрхwә дькʹәвьн, дьлтәнг дьбьн, йан дьчәрчьрьн, дьле хwә жерʹа вәкьн у гьли кьн дәрһәԛа чәтьнайед хwә. Чахе һун алийе хwәда һʹәму тьшти дькьн, сәва чәтьнайе дәрбаз кьн, ле чәтьнайи диса дьминә, бәрхwә нәкʹәвьн, бь дьл дӧа бькьн Хwәдерʹа. (Зәб. 94:18, 19). Чаwа Филипи 4:6, 7-да те готьне, Йаһоwа дькарә щаба дӧа у рәщайед мә бьдә. Ле гәло чаwа? Чахе дьле мәда у һʹьше мәда дәрд һәнә, Хwәде дьлрʹьһʹәтийе дьдә мә, wәки әм аза бьн жь wан дәрда. Гәләк хушк-бьред мә сәр хwә тʹәхмин кьрьнә, wәки wәʹде тәнгасийа, әwана нә кӧ тʹәвһәв бунә у тьрс кʹәтийә дьле wан, ле Хwәде әʹдьлайи у дьлрʹьһʹәти дайә wан кӧ жь һʹьш-аԛьле мәрьва зедәтьр ә. Һун жи дькарьн сәр хwә тʹәхмин кьн әве йәке. «Әʹдьлайийа Хwәде» дькарә али мә бькә һәр тәнгаси у чәтьнайа дәрбаз кьн! Бь тʹәмами итʹбарийа хwә ви созе Хwәде биньн: «Тӧ нәтьрсә, жь бәр кӧ әз бь тәрʹа мә; ль дора хwә нәньһерʹә, жь бәр кӧ Хwәдайе тә әз ьм; . . . бәле, әзе али тә бькьм» (Иша. 41:10). w16.12 3:3, 4

Муса пьшта хwә да хьзнед Мьсьре, чьмки дьфькьри кӧ «һе ԛәнщ ә тʹәви щьмәʹта Хwәде бьчәрчьрә, нә кӧ wәхтәки кьн нава кʹефа гӧнада дәрбаз кә» (Ибрн. 11:25, 26). Wәрә әм чʹәʹв бьдьнә wан мәрьвед амьн, мәсәлә Муса, wәки азайа хwә ԛимәт кьн у бьдьнә хәбате сәва ԛьрара Хwәде биньн сери. Һәрге әм һʹәсаб дькьн wәки һе баш ә дәwса мә кәсәки дьн сафикьрьна бькә, wи чахи әм дькарьн ӧнда кьн кʹәрәма. Дәрһәԛа wан кʹәрәма те готьне Ԛануна Дӧщари 30:19, 20-да. Рʹеза 19-да те готьне wәки Хwәде чь бьжартьн да Исраелийа. Рʹеза 20-да әм педьһʹәсьн кӧ Йаһоwа мәщал да wан, wәки әwана жерʹа нишан кьн чьԛас wи һʹьз дькьн. Әм жи дькарьн бьжберьн wәки Йаһоwа бьһʹәбиньн. Мәщала мәйә баш һәйә wәки пʹешкʹеша азайе бьдьнә хәбате, сәва нишан кьн кӧ әм чьԛас Хwәде һʹьз дькьн у дьхwазьн wи һӧрмәт-рʹумәт кьн! w17.01 2:10, 11

Йаһоwа дьхwазә кӧ әм wан фәрәсәта, кӧ әw дайә мә, рʹаст бьдьнә хәбате. Ле гәло чьрʹа? Чьмки әw мә һʹьз дькә у занә кӧ һәрге wан пʹешкʹеша, демәк фәрәсәта бьдьнә хәбате, әме бәхтәwар бьн. Рʹаст ә Йаһоwа дьхwазә, wәки әм фәрәсәтед хwә бьдьнә хәбате, ле әw ӧса жи занә кӧ ԛәwата мә һаԛас нагьһиже wәки бь тʹәмами wан фәрәсәта бьдьнә хәбате. Мәсәлә, әм нькарьн нә ԛьсуртийе, нә гӧнә у нә жи мьрьне бьдьнә һьлдане. Әм ӧса жи нькарьн мәрьвед дьн контрол кьн, чьмки азайа бьжартьна һʹәму мәрьва һәйә (1 Пʹадш. 8:46). У фьрԛи тʹӧнә занәбуна мә чьԛас һәйә йан әм чьԛас щерʹьбанди нә, йәкә әм бәр Йаһоwа тʹьме чаwа зарʹ бьн (Иша. 55:9). Әм гәрәке тʹьме рʹе бьдьнә Йаһоwа wәки әw рʹебәрийе мә бькә, у итʹбарийа хwә wи биньн кӧ әw wе али мә бькә. Ӧса жи чь кӧ әм нькарьн бькьн, әw wе бона мә бькә. Ле йәкә Йаһоwа дьхwазә, wәки әм хwәха жи бьфькьрьн дәрһәԛа ве йәке, кӧ әм чь дькарьн бькьн, сәва чәтьнайа сафи кьн у али йед дьн бькьн. Әм гәрәке итʹбарийа хwә Йаһоwа биньн у ԛәнщийе бькьн, у ӧса жи амьнийа хwә хwәй кьн. w17.01 1:2-4

Барзилла гот wәки әw wе нәчә тʹәви Даwьд. Гәло чьрʹа? Чьмки әw әʹмьрда мәзьн ә у нахwазә wәки бьбә баргьрани бона пʹадша. Әwи готә Даwьд, wәки һе баш ә дәwса wи Кимһам һәрʹә, кʹижан кӧ дьбәкә кӧрʹе wи бу (2 Сам. 19:31-37). Барзилла мәрьвәки шкәсти бу, ләма әwи сафикьрьнәкә рʹаст кьр, әw тʹәви Даwьд нәчу. Чьрʹа нәчу? Мәʹни әw нибу кӧ әw дьфькьри wәки wе нькарьбә шьхӧле зедә һьлдә сәр хwә, йан жи дьхwәст калбуна хwәда рʹьһʹәт бьжи. Ле әwи фәʹм дькьр кӧ ԛәwата wи чьԛас ә, у ләма һьлнәда сәр хwә һаԛас, чьԛас кӧ нькарьбу (Галт. 6:4, 5). Әм жи гәрәке чʹәʹв бьдьнә Барзилла. Һәрге әм дькʹәвьнә һʹәйра наве хwә, мәсәлә, наве хwә бьльнд дькьн сәва гьшк мә ԛәбул кьн, һьнге әм дькарьн бьбьнә кʹӧбар, у мәрьварʹа бькʹәвьнә ләще. Ле әw йәк хенщи зьраре, wе кʹаре мәрʹа нәйнә (Галт. 5:26). Ле чахе әм шкәсти бьн, әме һʹәму тьшти бькьн сәва Хwәде рʹумәт кьн у чьԛас дькарьн али мәрьвед дьн бькьн (1 Корн. 10:31). w17.01 4:5, 6

Йаһоwа Әʹфьрандарәки һьмзор ә. Һәр тьшт чь әwи чекьрийә, гәләк баш у һʹәwас ьн (Йерәм. 10:12). Йаһоwа жь һʹьзкьрьне һʹәму әʹфринарʹа синор дани. Әwи ԛанун данин бона тʹәбийәте у ӧса жи ԛанунед намусийе. Әwи ӧса кьр кӧ һʹәму тьшт дьнйайеда бь тʹәрбәти бьн (Зәб. 19:7-9). Чь кӧ гәрдунеда һәйә ль гора ԛьрара Хwәде щиwар ьн. Стандартед һәвкʹарийе нав һʹәму тьштед әʹфьранди, жь алийе Йаһоwава һатьнә данин. Мәсәлә, ԛануна гравитасйайе атмосфера незики әʹрде дьгьрә, ӧса жи әw хwәй дькә wәки океан жь щийе хwә дәрнәйен. Бей гравитасйайе жийин сәр әʹрде wе тʹӧнә буйа. Һʹәму әʹфрин, демәк мәрьв жи, бьн wан синора у ԛанунада дьжин. Әʹйан ә, wәки әw тʹәрбәти нава әʹфринада дьдә кʹьфше ԛьрара Хwәде сәва әʹрде у мәрьва. Хьзмәтийеда әм дькарьн дина мәрьва бьдьн сәр wан шьхӧлед дәсте Әʹфрандар у дәрһәԛа wи гьли кьн (Әʹйан. 4:11). w17.02 1:4, 5

Паши Муса, «фәрмандаре артеша Хӧдан», демәк мьлйакʹәт, али Йешу кьр wәки әw шәрʹда Кәнанийа алт кә (Йешу 5:13-15; 6:2, 21). Wәʹдә шунда, ордийа Асура Һьзԛийа Пʹадша данә тьрсандьне, wәки wе Оршәлиме кʹӧта кьн. Ле йәкә нава шәвәкеда, «мьлйакʹәте Хӧдан дәркʹәт» у 185 000 әскәред Асура кӧшт (2 Пʹадш. 19:35). Рʹаст ә мьлйакʹәта гәләк аликʹари дьданә рʹебәра, ле wана диса жи шаши дькьрьн. Мәсәлә, щарәке ӧса ԛәwьми кӧ Муса рʹумәт нәда Йаһоwа (Жьмар 20:12). Йешу чахе тʹәви Гибәонйа пәйман гьредьда, жь Йаһоwа нәпьрси һәла лазьм ә әwе йәке бькә йан на (Йешу 9:14, 15). Wәʹдәки, Һьзԛийа ԛӧрʹә бу (2 Дир. 32:25, 26). Рʹаст ә, әw мер гӧнәкʹар бун, ле жь Исраелийа дьһатә дәʹwакьрьне, wәки пәй рʹебәрийа wан һәрʹьн. Йаһоwа бь сайа мьлйакʹәтед хwә али wан мера дькьр, демәк әʹйан бу кӧ Йаһоwа хwәха рʹебәри щьмәʹта хwә дькьр. w17.02 3:7-9

Чахе әм кәсәки һӧрмәт дькьн, әw те һʹәсабе wәки әм һьндава wида бь щурʹәки мәхсус ьн у ԛәдьре wи дьгьрьн. Ле фәʹмдари йә, wәки әм бемәʹни һӧрмәте надьнә кәсәки, ле мәʹнийед мә һәнә. Мәсәлә, һәрге әwи кәси кьре ӧса кьрийә кӧ рʹасти жи һежайи һӧрмәте йә, йан жи һәрге әw щийе бьльнд дьгьрә. Ньһа пьрс пешда те: Гәло әм кʹе гәрәке һӧрмәт кьн у чьрʹа әw һежайи һӧрмәте йә? Wәрә шеwьр кьн щаба ве пьрсе. Чаwа Әʹйанти 5:13 зәлал дьдә кʹьфше, кӧ Йаһоwа «Йе сәр тʹәхт рʹуньшти» у «Бәрх», бешьк һежайи һӧрмәт-рʹумәте нә. Әʹйанти сәре 4-да әм педьһʹәсьн дәрһәԛа мәʹники кӧ чьрʹа Йаһоwа һежайи һӧрмәте йә. Ль wедәре әм дьхуньн wәки әʹфьринед рʹӧһʹани бь дәнге бьльнд пәсьна дьдьнә Йаһоwа, «Йе кӧ . . . Һʹәта-һʹәтайе сах ә». Әwана дьбежьн: «Йа Хӧдан Хwәдейе мә, тӧ һежа йи кӧ рʹумәт, һӧрмәте у ԛәwате бьстини. Чьмки тә һәр тьшт әʹфьрандьн у бь хwәстьна тә әw әʹфьрин у һәнә» (Әʹйан. 4:9-11). w17.03 1:1, 2

Ве дьнеда әв гьли-готьн гәләк бәлабуйи йә: Дьле тә ча дьхwазә ӧса жи бькә. Ле әw йәк гәләк хоф ә у һьн жи нә сәр һʹиме Кʹьтеба Пироз ә. Кʹьтеба Пироз мә ширәт дькә wәки пе хwәстьна дьле хwә сафикьрьна нәкьн. Сәрһатийед жь Кʹьтеба Пироз дьдьнә кʹьфше, кӧ чахе мәрьв гӧһ дьдә дьле хwә, әw дькарә ахьрийа нәбаш бинә. Гәло чьрʹа? Чьмки «дьл жь һәр тьшти зедәтьр хапиноки йә у ԛәлс ә» (Йерәм. 3:17; 13:10; 17:9; 1 Пʹадш. 11:9). Ле чь дькарә бьԛәwьмә һәрге әм гӧһ дьдьнә дьле хwә у дьһельн кӧ дьле мә һʹӧкӧм кә сәр фькьр у кьред мә. Мәсәлә, чахе әм һерс ьн, чәтьн ә сафикьрьна баш бькьн. У дьԛәwьмә wә хwәха жи әʹмьре хwәда әw йәк тʹәхмин кьрийә (Мәтʹлк. 14:17; 29:22). Йан жи чахе әм дьлтәнг ьн, һьнге жи wе нәаԛьлайи бә сафикьрьна бькьн (Жьмар 32:6-12; Мәтʹлк. 24:10). Бәле, чахе әм сафикьрьнед фәрз дькьн, әм гәрәке фәсал бьн кӧ пәй хwәстьна дьле хwә нәчьн. w17.03 2:12, 13

Әм гьшк гӧнәкʹар ьн у шашийа бәрʹдьдьн. Ле әм гәләк жь Йаһоwа рʹази нә, кӧ әw «wәкә гӧнәйед мә, сәре мә накә». Әwи Иса ԛӧрбан кьр сәва гӧнед мә бенә бахшандьне. У һәрге әм мьлук ьн у гӧнед хwә тиньн рʹуйе хwә, Хwәде дьбахшиньнә мә (Зәб. 103:10). Ле чаwа кӧ Даwьд готә Сьлеман, сәва кӧ Йаһоwа хьзмәтийа мә ԛәбул кә, әм гәрәке «бь һʹәмуйа дьл» жерʹа хьзмәт кьн (1 Дир. 28:9). Мәрьве кӧ «бь һʹәмуйа дьл» Хwәдерʹа хьзмәт дькә, тʹьме жерʹа амьн дьминә. Хәбәра «дьл» Кʹьтеба Пирозда гәләк щар те һʹәсабе кӧ мәрьв дьлда йәки ча нә, демәк хwәстьн, фькьр, хәйсәт-һʹӧнӧр, фәрәсәт у нетед wи чь нә. Мәрьве кӧ бь һʹәмуйа дьл Йаһоwарʹа хьзмәт дькә, беһʹәмде хwә Йаһоwа наһʹәбинә, ле бь хwәстьна хwә. Рʹаст ә әм гӧнәкʹар ьн, ле һәрге әм бь тʹәмами Хwәдерʹа амьн бьминьн, әм дькарьн бежьн wәки әм бь һʹәмуйа дьл Хwәдерʹа хьзмәт дькьн (2 Дир. 19:9). w17.03 3:1, 3

Һәрге мә шьхӧләки мәзьн кьрийә, дьԛәwьмә wи wәʹдәйи Йаһоwа мә дьһелә, сәва әшкәрә бә һәла дьле мәда чь йә. Бьдьнә бәр чʹәʹве хwә, бьрак щәфа дитийә wәки хwә һазьр кә бона готаре. Әwи әв готар бәр гәләк гӧһдара хwәндийә у паше хушк-бьра незики wи дьбьн у бона готаре пʹайе wи дьдьн. Гәло әw wе ча хwә бьдә кʹьфше, wе ԛӧрʹә бә, йан на? Чахе пʹайе мә дьдьн, wе баш бә тʹьме әван гьлийед Иса биньн бира хwә: «Гава әw һʹәму тьштед кӧ wәрʹа һатьнә әʹмьркьрьне бькьн, бежьн: ‹Әм хӧламед бекер ьн. Чь кӧ ль мә дькʹәт, мә әw кьр›» (Луԛа 17:10). Жь шашийа Һьзԛийа әм диса дәрсәкә баш һин дьбьн. Чахе әw бу йәки ԛӧрʹә, әwи ԛәнщийед Хwәде нәшекьранд (2 Дир. 32:24-27, 31). Әw мәрʹа дәрс ә wәки тʹьме бьфькьрьн кӧ Хwәде чь бона мә дькә. Әw йәк wе али мә бькә кӧ ԛӧрʹә нәбьн, чьмки әw һʹӧнӧр бәр чʹәʹве Йаһоwа рʹәш ә. Тʹьме шькьрийе бьдьнә Йаһоwа, йе кӧ бь амьни аликʹарийа щьмәʹта хwә дькә. w17.03 4:12-14