Адар

Дьбәкә щьватеда кәсәк ԝә әʹщьз дькә. Һәрге һун сәр ве йәке нәхәбьтьн ԝәки сәр ԝи әʹщьз нәбьн, чьԛас дьреж бькʹьшинә ԝе һаԛас ԝәрʹа чәтьн бә. Кʹьтеба Пироз дьбежә меванһʹьзи дькарә һәләԛәтийа мә тʹәви мәрьва баш кә, у һәла һе тʹәви дьжмьна жи (Мәтʹлк. 25:21, 22). Меванһʹьзи дькарә дьле ԝә нәрм кә һьндава ԝи мәрьви, кʹижан ԝә хԝәш найе у һуне ида һьндава ԝида бина хԝә тәнг нәкьн. Ԝи щурʹәйи һуне бькарьбьн нав ԝи мәрьвида һʹӧнӧред баш бьвиньн, кʹижан кӧ Йаһоԝа нав ԝида дит у ԝи ани сәр рʹийа рʹаст (Йуһʹн. 6:44). Ӧса жи чахе һун бь һʹьзкьрьне кәсәки тʹәглифи мала хԝә дькьн у әԝ нә жи һивийе бу, әԝ йәк дькарә бьбә дәстпека һәвалтийа баш. Ле ча һун дькарьн тедәрхьн ԝәки һʹьзкьрьн ԝә һелан дькә ве йәке бькьн? Мәсәлә, бьдьнә хәбате ширәта гьлийед рʹеза ве рʹоже. Бәле, әм гәрәке хушк-бьра сәр хԝәрʹа бьгьрьн ве йәкеда кӧ һʹӧнӧред ԝанә ӧса бьвиньн йед кӧ жь һʹӧнӧред мә баштьр ьн, мәсәлә баԝәрийа ԝанә ԛәԝи, сәбьр, мерхаси йан жи һʹӧнӧред дьнә баш. Әԝ йәк ԝе һʹьзкьрьна мә һьндава ԝан ԛәԝи кә у рʹе вәкә, ԝәки бь дьл у щан һьндава ԝанда меванһʹьз бьн. w18.03 17 ¶18-19

Де-бавед кӧ зарʹа ԝан жь щьвате һатийә дәрхьстьне, һәләԛәтийа ԝан тʹәви ве зарʹе дьбә щерʹьбандьна ԝанә лапә мәзьн. Дина хԝә бьдьнә мәсәла хушкәке, ԛиза кʹе жи жь щьвате һатә дәрхьстьне у жь мал чу. Әԝ де гьли дькә: «Мьн әʹдәбйәтед мәда мәʹни дьгәрʹийа, сәва кӧ бькарьбьм тʹәви ԛиза хԝә у нәбийа хԝә ԝәʹдә дәрбаз кьм. Ле малхе мьн мьнрʹа бь нәрми гот, ԝәки әз фәʹм кьм кӧ ԛиза мә ньһа дәсте Хԝәдеда йә у әм гәрәке нәкʹәвьнә нав ԝи шьхӧли». Ԝәʹдә шунда ԛиза ԝе вәгәрʹийа щьвате. Де гот: «Әԝ гәләк ԛәдьре мьн у баве хԝә дьгьрә, чьмки занә кӧ әм гӧрʹа Хԝәдеда бун». Һәрге зарʹа ԝә жь щьвате дәрхьсти йә, гәло һуне «бь тʹәмамийа дьле хԝә» итʹбарийа хԝә Йаһоԝа биньн, йан «һʹьше хԝә»? (Мәтʹлк. 3:5, 6). Ләма жи итʹбарийа хԝә ширәткьрьн у рʹебәрийа Йаһоԝа биньн, һьнге жи гава ԝәрʹа чәтьн ә. Гӧһ бьдьнә ширәткьрьна Хԝәде, мьԛабьли ԝи нәчьн. w18.03 31 ¶12-13

Кʹьтеба Пирозда найе готьне, ԝәки мәрьв гәрәке чәнд сали бә сәва бе ньхӧмандьне. Хәбәра Йунани кӧ те ԝәлгәрʹандьне «бькьн шагьрт» кʹижан кӧ Мәтта 28:19-да те готьне, фькьрәкә ӧса дьдә кʹьфше ча кәсәки һин кьн бь ве нете сәва әԝ бьбә шагьрт. Шагьрт әԝ ә, йе кӧ һин дьбә у фәʹм дькә һинкьрьнед Иса, у сафи дькә ԝан тьшта бинә сери. Демәк, нета һʹәму де-бава гәрәке әԝ бә кӧ зарʹед хԝә жь зарʹотийе һин кьн бь ве нете кӧ бьбьнә шагьртед Иса. Рʹаст ә зарʹа вьрʹни нькарә бе ньхӧмандьне, ле Кʹьтеба Пироз дьдә кʹьфше ԝәки һәла һе зарʹа бьчʹук жи дькарә рʹастийед Кʹьтеба Пироз фәʹм кә у һʹьз кә. Мәсәлә, Тимотʹейо һәла һе щаһьлтийеда рʹасти ԛәбул кьр у сафи кьр кӧ Хԝәдерʹа хьзмәт кә. Баԝәрийа ԝи ԛәԝи бу (2 Тимтʹ. 1:5; 3:14, 15). Чахе әԝ бу ԝәкә 20 сали, әԝи ида щьватеда щабдарийед мәхсус дьстанд (Кʹар. Шанд. 16:1-3). w18.03 9 ¶4-5

Чахе әм бунә хьзмәткʹаред Хԝәде, әм гәләк тьштада һатьнә гӧһастьне. Әԝ йәк һʹәму алийава сәр жийина мә һʹӧкӧм бу. Ле паши ньхӧмандьне жи мә бәрдәԝам дькьр бенә гӧһастьне. Әм гьшк гӧнәкʹар ьн, ләма әм гәрәке тʹьме гӧһастьна бькьн (Фили. 3:12, 13). Фьрԛи тʹӧнә әм щаһьл ьн йан әʹмьрда мәзьн ьн, һәр кәс жь мә дькарә пьрсед ӧса бьдә хԝә: «Гәло әз рʹӧһʹанида һе пешда дьчьм, йан на? Гәло хәйсәт-һʹӧнӧрада әз дьбьмә мина Мәсиһ? Гәло ньһерʹандьна мьн у рʹабун-рʹуньштьна мьн щьватеда, дәрһәԛа мьн чь әʹйан дькьн? Гәло хәбәрдана мьн дәрһәԛа хԝәстьнед мьн чь дьдә кʹьфше? Һинбуна шәхси, кʹьнщхԝәкьрьн, хәмьландьн, у әԝ йәк кӧ әз ча ԛәбул дькьм ширәта, чь әʹйан дькьн дәрһәԛа мьн? Чахе әз рʹасти щерʹьбандьна тем, әз ча хԝә дьдьмә кʹьфше? Гәло әз бумә Мәсиһийе гьһишти?» (Әфәс. 4:13). Чахе әм кʹур бьфькьрьн сәр щабед ԝан пьрса, әԝ йәк ԝе али мә бькә фәʹм кьн кӧ рʹӧһʹанида әм чьԛас пешда чунә. w18.02 24 ¶4-5

Нава тʹәрихийа инсанәтеда, әм ԝәʹдәки гәләк мәхсусда дьжин. Чаԝа Кʹьтеба Пироз пʹехәмбәрти кьрийә, Йаһоԝа «әʹлаләтәкә . . . мәзьн . . . жь һәр мьләти, жь һәр бәрәке, жь һәр щьмәʹте у жь һәр зьмани» тʹоп дькә. Әԝ «щьмәʹтәкә ԛәԝи йә» кӧ жь 8 милйон мәрьви зедәтьр ә. Әԝ мәрьв «шәв у рʹо [Хԝәде] дьһʹәбиньн» у бәхтәԝар ьн (Әʹйан. 7:9, 15; Иша. 60:22, ДТʹ). Тʹӧ щар һаԛас мәрьв тʹӧнә бун ча иро, йед кӧ һьн Хԝәде һьн жи мәрьва һʹьз дькьн. Кʹьтеба Пироз ӧса жи дәрһәԛа ԝәʹде мә пʹехәмбәрти кьрийә, кӧ һʹьзкьрьна нәрʹаст ԝе бәлабуйи бә. Әԝ хԝәһʹьзи йә, у һʹьзкьрьна ԝи щурʹәйи мәрьвед ӧса дьдьнә кʹьфше йед кӧ жь Хԝәде дур ьн. Паԝлосе шанди ньвиси: «Рʹожед ахьрийеда . . . мәрьве бьбьнә хԝәһʹьз, пәрәһʹьз, .  . . рʹьһʹәтиһьз, нә кӧ Хԝәдеһʹьз» (2 Тимтʹ. 3:1-4). Әв щурʹә һʹьзкьрьн тʹӧ щар накʹәвә нава һʹьзкьрьна Мәсиһитида. Бь рʹастийе әв һʹьзкьрьн жийин һе чәтьн дькә. w18.01 22 ¶1-2

Бь сайа занәбуна рʹаст, баԝәри у биланийа Нӧһ һәбу. Әԝе йәке али ԝи дькьр кӧ нәкʹәвә ԛәзийе, илаһи алийе рʹӧһʹанида зийане нәстинә. Бәʹса хәбәре, Нӧһ «рʹийа Хԝәдеда дьчу», әԝ рʹийа мәрьвед хьрабда нә дьчу, демәк тʹәви ԝан һәвалти нәдькьр. Һьнге мәрьв сәр ԝан щьна йед кӧ хԝә кьрьбун мәрьв, әʹщебмайи дьман, чьмки әԝана гәләк ԛәԝат бун, у дьԛәԝьмә һәла һе жи мәрьва ԝана дьһʹәбандьн. Ле Нӧһ йәкә нәһатә хапандьне (Дәстп. 6:1-4, 9). Әԝи заньбу кӧ Хԝәде дьхԝәст, ԝәки мәрьв зарʹа биньн у әʹрде тʹьжә кьн (Дәстп. 1:27, 28). Ләма жи Нӧһ фәʹм дькьр кӧ әԝ һәләԛәтийа сексуал ортʹа жьн у щьнед кӧ хԝә кьрьбун мәрьв, ӧса жи зарʹ кӧ ԝанрʹа дьбун, нә тʹәбийәти у нә рʹаст бу. Әԝ йәк әʹйан дьбу чахе әԝ зарʹ мәзьн дьбун у жь һʹәмуйед дьн ԛәԝаттьр бун. Ләма жи Йаһоԝа пешда готә Нӧһ, ԝәки әԝ дьхԝазә селаве бинә сәр әʹрде. Нӧһ баԝәрийа хԝә гьлийед Хԝәде ани у гәми ава кьр. Ӧса әԝ нәфәред хԝәва хьлаз бун (Ибрн. 11:7). w18.02 9 ¶8

Һәрге тә гӧнәки гьран кьрийә, Йаһоԝа һазьр ә бьбахшиньнә тә у али тә бькә кӧ рʹӧһʹанида ԛәнщ би. Ле тӧ гәрәке аликʹарийа ԝи кӧ әԝ бь сайа щьвате дьдә, ԛәбул ки (Мәтʹлк. 24:16; Аԛуб 5:13-15). Ләма жи паш нәхә аликʹарийе ԛәбул ки, чьмки әԝ йәк жийина тәйә һʹәта-һʹәтайева гьредайи йә! Ле тӧ чь дькари бьки һәрге гӧне тә һатә бахшандьне, ле исафа тә диса жи тә дьчәрчьринә сәва шашийед тәйи бәре? Щара Паԝлосе шанди дьлтәнг дьбу сәва гӧнед хԝәйи бәре. Әԝи гот: «Әз жь шандийа йе һәри паш ьм, кӧ нә лайиԛ ьм шанди жи бемә готьне, чьмки мьн щьвина Хԝәде зеранд» (1 Корн. 15:9). Йаһоԝа Паԝлос ԛәбул кьр чь жи әԝ һәбу, у Әԝ дьхԝәст ԝәки Паԝлос жи ве йәке фәʹм кә. Һәрге тә гӧнед хԝәйи бәре тʹобә кьрийә у дәрһәԛа гӧнед хԝәйи гьран тә тʹәви рʹуспийа хәбәр дайә, тӧ гәрәке дӧдьли нәби ԝәки Йаһоԝа ԝе әʹсә бьбахшиньнә тә. Баԝәр бә кӧ Йаһоԝа дьбахшиньнә тә, у бахшандьн у рʹәʹма ԝи ԛәбул кә (Иша. 55:6, 7). w18.01 11 ¶17-18

Сәва кӧ бьбьнә достед Йаһоԝа, әм гәрәке гӧһ бьдьнә ԝи у тʹәви ԝи хәбәр дьн. Чахе әм шәхси Кʹьтеба Пироз леколин дькьн, ӧса әм гӧһ дьдьнә Йаһоԝа. Әв ӧса жи те һʹәсабе кӧ әм гәрәке Хәбәра Хԝәде у ӧса жи әʹдәбйәтед мәйә сәр һʹиме Кʹьтеба Пироз, бьхуньн у сәр бьфькьрьн. Ӧса әм занәбуне дьстиньн. Ле бир нәкьн кӧ һинбуна Кʹьтеба Пироз ӧса нинә кӧ әзбәри һин би, чаԝа ԝәʹде екзамина. Һинбуна керһати мина ве йәке йә, чахе тӧ тьштәки леколин дьки у тьштед тʹәзә педьһʹәси дәрһәԛа хәйсәт-һʹӧнӧред Йаһоԝа. Һинбуна ӧса ԝе али тә бькә кӧ незики Хԝәде би, у паше әԝ жи ԝе незики тә бә. Тʹәшкиләта Йаһоԝа гәләк һащәт дьдә, кʹижан кӧ дькарьн али тә бькьн һинбуна тәйә шәхсида. Мәсәлә, jԝ.org-да һәнә рʹебәрийед бона леколинкьрьне, бь наве «Чь Һин Дькә Кʹьтеба Пироз?» (Зәб. 119:105). w17.12 25 ¶8-9

Дина хԝә бьдьн кӧ әв әʹдьлайи ԝе һьнге бә, чахе «дьнйа . . . бь занина Хӧданва тʹьжи бьбә». Фәʹмдари йә һʹәйԝан нькарьн дәрһәԛа Йаһоԝа пебьһʹәсьн, ләма жи әԝ те һʹәсабе кӧ әв пʹехәмбәрти дәрһәԛа мәрьва те готьне (Иша. 11:6, 7). Иро һәнә гәләк мәрьвед кӧ һʹӧнӧред һʹәйԝани дьданә кʹьфше, ле паше һатьнә гӧһастьне. Сәрһатийа һьнә ԝан мәрьва һун дькарьн бьхуньн сәр малпәра мә jԝ.org, рʹеза готареда бь наве «Кʹьтеба Пироз Жийина Мәрьва Дьгӧһезә». Әԝ мәрьв кӧ бәре зӧлм бун, «мәрьве ну» ль сәр хԝә кьрьн, кӧ «кьрасе Хԝәдеда бь рʹастийе у һʹәлалийе бе ԛәлпи хӧльԛи йә» (Әфәс. 4:23, 24). Чахе мәрьв дәрһәԛа Хԝәде педьһʹәсьн, әԝана тедәрдьхьн ԝәки ԝанрʹа лазьм ә ль гора принсипед ԝи бьжин. Паше әԝана һелан дьбьн кӧ баԝәрийа нәрʹаст бьһельн, һʹьш-аԛьле хԝә у рʹабун-рʹуньштьна хԝә бьгӧһезьн. Әв гӧһастьн һеса ниньн, ле ԛәԝата рʹӧһʹе Хԝәдейи пироз, али ԝан мәрьва дькә, йед кӧ бь дьл дьхԝазьн ԛьрара Хԝәде биньн сери. w18.01 31 ¶15-16

Кʹьтеба Пироз дәрһәԛа рʹабуна жь мьрьне бона жийина сәр әʹзмана, дьбежә «һәр кәс дора хԝәда» ԝе жь мьрьне рʹабә. Әм дькарьн дӧдьли нәбьн, ԝәки дьнйа тʹәзәда жи рʹабуна мьрийа ԝе бь организә бә. Рʹасти жи һʹәԝас ә пебьһʹәсьн әԝ йәк ԝе ча бьԛәԝьмә. Дьбәкә бал мә пьрс пешда тен: «Гәло әԝед кӧ ԝан пашԝәхтийада мьрьнә, ԝе дәстпека Һʹәзарсалийа Сәрԝертийа Мәсиһ жь мьрьне рʹабьн у рʹасти мәрьвед хԝәйи дәлал бен? Гәло дьбәкә пешийе меред жь һена бәре йед кӧ рʹебәред баш бун, ԝе рʹабьн, сәва кӧ дьнйа тʹәзәда организәкьрьнеда али щьмәʹта Хԝәде бькьн? Ле ԝе чь бьбә тʹәви ԝан мәрьва йед кӧ тʹӧ щар Йаһоԝарʹа хьзмәт нәкьрьнә? Әԝана ԝе кʹәнге у кʹидәре жь мьрьне рʹабьн?» Бәле, дәрһәԛа ван тьшта гәләк пьрс дькарьн пешда бен. Ле ԝе баш бә, һәрге әм дәрһәԛа ԝан тьшта гәләк бәрхԝә нәкʹәвьн, ле дәԝсе әм һивийе бьн у бьвиньн ԝе ча бә. Әм дькарьн баԝәр бьн ԝәки әм пе чʹәʹве хԝә бьвиньн кӧ Йаһоԝа ԝе чаԝа ван тьшта бькә. Һʹәта әԝ ԝәʹдә бе, әм гәрәке баԝәрийа хԝә һьндава Йаһоԝа ԛәԝи кьн. Йаһоԝа бь Иса мәрʹа соз да кӧ мьри бира Ԝида ньн у әԝ ԝе ԝана жь мьрьне рʹакә (Йуһʹн. 5:28, 29; 11:23). w17.12 12 ¶20-21

Бешьк, һәрге иро жи малбәтеда әԝан ширәта биньн сери, малбәт ԝе кʹаре бьстинә. Хԝәде мерарʹа дьбежә: «Мерно, кʹӧлфәтед хԝә һʹьз бькьн, дьле ԝан нәешиньн». Мере кӧ бь һʹьзкьрьн ә ԛәдьре жьна хԝә дьгьрә, у чахе әԝ фькьред хԝә дьбежә гӧһ дьдә ԝе. Ӧса әԝ жерʹа дьдә кʹьфше кӧ гьлийед ԝе бона ԝи фәрз ьн (1 Пәт. 3:7). Рʹаст ә һәр гав мер нькарә ӧса бькә чь кӧ жьна ԝи дьхԝазә, ле чахе әԝ тʹәви ԝе шеԝьр кә, һьнге ԝе сафикьрьна баш бькә (Мәтʹлк. 15:22). Мере кӧ жьна хԝә һʹьз дькә ԝе нә кӧ жь ԝе дәԝа бькә кӧ ԛәдьре ԝи бьгьрә, ле ӧса бькә кӧ ԛәдьргьртьна ԝе ԛазанч кә. Мер һәрге жьн-зарʹед хԝә һʹьз бькә, малбәта ԝи ԝе бәхтәԝар бә, чьмки әԝана ԝе бь шабуне Йаһоԝарʹа хьзмәт кьн у хәлата жийина һʹәта-һʹәтайе ԛазанч кьн. w17.11 28 ¶12; 29 ¶15

Паԝлосе шанди нәʹма Колосийарʹа ԝәкә сала 60-61  Д.М. ньвиси, чахе Рʹомеда гьрти бу. Әԝи ԝанрʹа шьровәкьр, ԝәки чьԛас фәрз ә «занәбуна рʹӧһʹанива тʹьжи бьн» (Колс. 1:9). Паԝлос ԝанрʹа гот: «Әз ве йәке дьбежьм, ԝәки тʹӧ кәс ԝә бь заре ширьн нәхальфинә. Һаш жь хԝә һәбьн, нәбә кӧ йәк бь сәрԝахтийа дәрәԝә пʹучʹ дьле ԝә бькә һесир. Әԝ жь әдәтед мәрьва у сьхьред ве дьнйайе тен, нә жь Мәсиһ» (Колс. 2:4, 8). Паше Паԝлос шьровәкьр кӧ чьрʹа һьнә нет-фькьред ԝе дьнйайе йед кӧ бәлабуйи нә, нәрʹаст ьн у чьрʹа гәләк мәрьв ԝан нет-фькьра ԛәбул дькьн. Мәсәлә, мәрьв бь ньһерʹандьна ве дьнйайе һелан дьбьн кӧ хԝә жь йед дьн гәләк аԛьлтьр һʹәсаб кьн у хԝә сәр ԝанрʹа бьгьрьн. Ләма жи Паԝлос нәʹмә ньвиси сәва али хушк-бьра бькә ԝәки нәкʹәвьнә бьн байе нет-фькьред ве дьнйайе у кьред хьраб бьтʹәрькиньн (Колс. 2:16, 17, 23). w17.11 20 ¶1

Мәсиһи чь гәрәке бьтʹәрькинә, сәва кӧ Йаһоԝа бәрдәԝам кә рʹәʹма хԝә жерʹа нишан кә? Әԝ гәрәке ԝан тьшта жи бьтʹәрькинә кʹижана әԝ бәгәм дькә, ле дькарьн ԝи бәрбь гӧнә бьвьн (Мәт. 18:9). Мәсәлә, һәрге һәвал тә һелан дькә ве йәке бьки чь кӧ Йаһоԝа хԝәш найе, гәло тӧйе диса бәрдәԝам ки тʹәви ԝи һәвалтийе бьки? Йан жи һәрге тӧ хԝә дьгьри ԝәки ичʹке гәләк вәнәхԝи, тӧ дькари хԝә дур бьгьри жь ԝан дәрәща, кʹидәреда ԝе тәрʹа чәтьн бә хԝә бьгьри? Һәрге тәрʹа чәтьн ә хԝәстьнед сексуали контрол ки, тӧйе хԝә дур бьгьри жь филм, малпәр, у тьштед дьн кʹижан кӧ фькьред нәтʹәмьз пешда тиньн? Бир нәкьн кӧ һежа йә әм тьштәки жь хԝә кем кьн сәва амьнийа хԝә һьндава Йаһоԝа хԝәй кьн. Һәрге Йаһоԝа мә бьһелә, жь ве хьрабтьр тьштәк тʹӧнә. Ле чахе әм тʹәхмин дькьн «һʹьзкьрьна ԝийә амьн», жь ве четьр тьштәк тʹӧнә (Иша. 54:7, 8, ДТʹ). w17.11 11 ¶12

Ԝә дина хԝә дайе кӧ Зәкәрйа 5:4-да те готьне, ԝәки ньфьрʹ «ԝе бькʹәвә мала дьз у . . . һӧндӧре мала ԝида бьсәкьнә» у һьлшинә? Бәле, жь диԝана Йаһоԝа тʹӧ кәс нькарә бьрʹәвә. Хԝәде дькарә һәр хьрабийе кӧ нава щьмәʹта ԝида вәшарти йә, әшкәрә кә у бьдә һьлдане. Һәрге жи кәсәк дьзийа хԝә жь мәрьвед дәԝләте, жь хәбатчийа, жь рʹуспийа йан жи жь де-бава вәшерә, ле жь Хԝәде әԝ нькарә вәшерә. Хԝәде дьбежә кӧ һәр дьз ԝе әʹсә әʹйан бә (Ибрн. 4:13). Әм бәхтәԝар ьн чьмки әм нава ԝе щьмәʹтеда ньн, йа кӧ дьхԝазә һәр тьштида рʹаст у һʹәлал бә (Ибрн. 13:18). Һʹәму щурʹә дьзи Йаһоԝа беһӧрмәт дькә. Бона мә ԛәдьрәки мәзьн ә кӧ әм заньн ԛанун у принсипед Йаһоԝа, кʹижан кӧ али мә дькьн әм ӧса бьжин, ԝәки наве ԝи беһӧрмәт нәбә. Бәле, һәрге әм гӧрʹа Хԝәде бькьн, ньфьрʹе Хԝәде ԝе нәйе сәр мә. w17.10 22 ¶6-7

Әм гәрәке тʹьме әʹдьлайе хԝәй кьн тʹәви хушк-бьра, һәла һе һьнге жи гава мә рʹаст фәʹм накьн йан жи һьндава мәда нәрʹастийе дькьн (Рʹом. 12:17, 18). Һәрге мә кәсәк дайә хәйдандьне, бәле әм гәрәке бахшандьне бьхԝазьн. Ле сәва кӧ дьле кәсәки нәрм кьн, бахшандьн гәрәке жь дьл бә. Зәԝащеда илаһи гәләк фәрз ә әʹдьлайе хԝәй кьн. Нәрʹаст ә һәрге жьн-мер бәр мәрьва хԝә нишан дькьн йанчь һәвдӧ һʹьз дькьн, ле чахе тʹәне нә һәврʹа хәбәр надьн, гьлийед хьраб һәвдӧрʹа дьбежьн, йан жи дәсте хԝә дьреж дькьн. Әм ӧса жи гәрәке һазьр бьн бь дьл у щан бьбахшиньн. Һәрге кәсәки әм данә хәйдандьне, әм дьбахшиньнә ԝи у хәйде жь дьле хԝә дәрдьхьн. Сәва бь дьл бьбахшиньн, әм гәрәке гәләк нәфькьрьн сәр хәйде, чьмки һʹьзкьрьн «кʹине нажо» (1 Корн. 13:4, 5). Ле һәрге әм хәйде жь дьле хԝә дәрнәхьн у әԝ мәрьв бәр чʹәʹве мә рʹәш бә, әм дькарьн һәләԛәтийа хԝә һьн тʹәви хушк-бьра, һьн жи тʹәви Йаһоԝа хьраб кьн (Мәт. 6:14, 15). w17.10 10 ¶14-15

Гәло һьнге ча әʹламәтийа Зәкәрйа сәр Щьһуйа һʹӧкӧм бу? Йаһоԝа соз да кӧ әԝ ԝе али ԝан бькә у ԝана хԝәй кә гава әԝана пʹарьстгәһе ава кьн. Әԝе йәке дьле ԝан һеса кьр у шьданд. Ле йәкә әԝана дьфькьрин кӧ ԝе ча ԝи шьхӧле мәзьн бькьн, нә әԝана һьндьк ьн. Гьлийед Зәкәрйа кӧ әԝи ԝанрʹа гот, тьрс у шьк жь дьле ԝан дәрхьст. Әԝи гот кӧ хенщи аликʹарийа Һәлдай, Тобийа у Йәдайа, Хԝәде гот кӧ жь дурва ԝе диса гәләк бен, сәва авакьрьна пʹарьстгәһа Йаһоԝада кʹомәке бьдьн. Щьһу баԝәр бун кӧ Хԝәде алийе ԝан ә, у рʹаст ә пʹадше Фарси әв шьхӧл ԛәдәхә кьр, ле йәкә әԝана бь мерхаси вәгәрʹийанә шьхӧле авакьрьна пʹарьстгәһе. Һьнә ԝәʹдә шунда, Йаһоԝа әԝ ԛәдәхә кӧ те бежи мина чʹийа рʹийа ԝан дадьда, кʹӧта кьр у ахьрийеда сала 515 Б.Д.М., пʹарьстгәһ һʹәта хьлазийе ава бу (Әзр. 6:22; Зәкәр. 4:6, 7). Ле гьлийед Йаһоԝа иро бона мә нә жи, чьмки иро тьштәки һе мәзьн дьԛәԝьмә. w17.10 29 ¶17

Йаһоԝа Сьлеман кʹьфш кьр у рʹебәри ԝи кьр сәва әԝ бәрпьрсийартийе авакьрьнәкә гәләк фәрз бькә. Әԝи гәрәке Оршәлимеда пʹарьстгәһ ава кьра. Әв авайи гәрәке «зәʹф мәзьн» буйа. «Һʹәму ԝәлатада» әв пʹарьстгәһ гәрәке бь бәдәԝийа хԝә әʹйан буйа. Хенщи ве йәке, әв пʹарьстгәһ гәрәке бьбуйа «мала Хӧдан», демәк мала Хԝәдейе рʹаст Йаһоԝа (1 Дир. 22:1, 5, 9-11). Даԝьд Пʹадша баԝәр бу кӧ Хԝәде ԝе али Сьлеман бькә. Ле һьнге Сьлеман щаһьл у нәщерʹьбанди бу. Ләма сәва дәстпекә әве пʹарьстгәһе ава кә, ԝирʹа мерхаси лазьм бу. Ле гәло мерхасийа ԝи һәбу? Гәло әв йәк кӧ әԝ щаһьл у нәщерʹьбанди бу, рʹе ԝи гьрт кӧ дәстпекә ԝи шьхӧли бькә? Һәрге Сьлеман мерхас нибуйа, ԝе тьрс бькʹәта дьле ԝи, у ԝе авакьрьн дәстпенәкьра. Ле әԝ йәк ԝе һе хьраб буйа, нә кӧ һәрге дәстпекьра у әԝ шьхӧл рʹьнд нәһата кьрьне. Мина Сьлеман мәрʹа жи аликʹарийа Йаһоԝа лазьм ә сәва мерхас бьн у шьхӧле кӧ әԝ дайә мә биньн сери. w17.09 28 ¶1-2; 29 ¶4-5

Һун ԛә фькьринә кӧ әʹмьре ԝә ԝе ча буйа һәрге Кʹьтеба Пироз тʹӧнә буйа? Бона жийина һәррʹожи ширәтед керһати ԝе тʹӧнә буна. Һуне һаш пе тʹӧнә буна кӧ Хԝәде кʹе йә у йәки ча нә, әʹмьр жь кӧ һатийә, у ахьрийеда ԝе чь бьбә. Ԝәйе нә жи бьзаньбуйа кӧ Йаһоԝа чаԝа бу тʹәви инсанәте һена бәреда. Әм гәләк ша дьбьн кӧ әм һʹаләки ӧсада ниньн! Йаһоԝа Хәбәра хԝә, Кʹьтеба Пироз дайә мә. Әԝи соз да кӧ әʹламәтийа жь Хәбәра ԝи ԝе һʹәта-һʹәтайе бьминә. Пәтрусе шанди гьлийед жь Ишайа 40:8 ԝәкʹьланд. Рʹаст ә әв рʹез һәма дәрһәԛа Кʹьтеба Пироз нинә, ле чаԝа әм заньн әԝ дәрһәԛа әʹламәтийа жь Кʹьтеба Пироз ә кӧ жь бина бәр Хԝәде һатийә ньвисаре (1 Пәт. 1:24, 25). Ле һәр гав ӧса һеса нибу Кʹьтеба Пироз бьхуньн, чьмки нава гәләк ԛьрʹнада пәй Кʹьтеба Пироз дькʹәтьн у дьхԝәстьн кʹӧта кьрана. Ле һәбун мәрьвед дьлсах кӧ ԝан пәйкʹәтьна нәдьтьрсийан, Ньвисаред Пироз ԝәлдьгәрʹандьн у бәла дькьрьн. Ԝана ль гора ԛьрара Хԝәде дьхԝәстьн кӧ «һʹәму мәрьв хьлаз бьн у рʹастийе нас кьн» (1 Тимтʹ. 2:3, 4). w17.09 18 ¶1-2

Иро гәләк щаһьлед мәйә Мәсиһи жи, рʹасти щерʹьбандьна мина йа Усьв тен (Дәстп. 39:7). Дина хԝә бьдьнә мәсәла Ким. Һәвалед ԝейә дәрсхане тʹьме хԝә ԛӧрʹә дькьрьн у гьли дькьрьн кӧ әԝана шәми у ләʹда дькʹәтьнә һәләԛәтийа сексуал. Ле Ким мина ԝан нибу, ләма дәрһәԛа ве тʹеме тьштәк тʹӧнә бу ԝанрʹа гьли кә. Ким гьли дькә кӧ щара әԝе хԝә тʹәне тʹәхмин дькьр, чьмки жь ԝана щӧдә дьбу. Һьн жи әԝан щаһьла һʹәсаб дькьрьн кӧ Ким бефәʹм ә, чьмки әԝ тʹәви тʹӧ гәда нәдьчу-нәдьһат. Ле Ким сәрԝахт бу, чьмки фәʹм дькьр кӧ жь бо хԝәстьна сексуал щаһьл һе зедә тенә щерʹьбандьне (2 Тимтʹ. 2:22). Һәвалед ԝейә дәрсхане гәләк щар жь ԝе дьпьрсин кӧ әԝ һәла һе ԛиз ә йан на. Һьнге Кимрʹа мәщал вәдьбу у әԝе ԝанрʹа шьровәдькьр кӧ чьрʹа әԝ намусийеда хԝә тʹәмьз хԝәй дькә. Әм гәләк фьрнаԛ дьбьн ԝан щаһьлед Мәсиһирʹа, йед кӧ нав-намус дьжин, у Йаһоԝа жи ԝанарʹа гәләк фьрнаԛ дьбә! w17.09 4 ¶8; 5 ¶10

Мәрьве кӧ зу һерс дькʹәвьн, гәләк щар һерса хԝә бь гьлийед нәщайиз дьдьнә кʹьфше. Әԝ хәйсәте мәрьве кәвьн, фәʹмдари йә ԝе малбәтерʹа бәхтәԝарийе нәйнә. Кʹьтеба Пироз дьбежә кӧ һерсе, хәбәрдана хьраб у ԛарʹә-ԛарʹе жь хԝә дур хьн (Әфәс. 4:31). Гәло чьрʹа? Чьмки әԝ тьшт дькарьн мәрьва бьбьнә бәрбь зорбәтийе. Ве дьнеда һерскʹәтьн у зорбәти нормал ә, ле әԝ йәк Әʹфьрандаре мә беһӧрмәт дькә. Гәләк хушк-бьред мә ԝан тьштада хԝә гӧһастьнә, у мәрьве ну ль сәр хԝә кьрьнә (Колс. 3:8-10). Дәрәԝи жи пʹара мәрьве кәвьн ә. Мәсәлә, гәләк мәрьв дәрәԝа дькьн сәва хәрще дәԝләте нәдьн, йан жи сәва шаши йан гӧне ԝан әшкәрә нәбә у щәзайе нәстиньн. Ле Йаһоԝа Хԝәде рʹастийе һʹьз дькә (Зәб. 31:5). Ләма әԝ дәʹԝа дькә, ԝәки һәр хьзмәткʹаре ԝи «һәвале хԝәрʹа рʹаст хәбәр дә» у «дәрәԝа» нәкә (Әфәс. 4:25; Колс. 3:9). Бәле, һәрге жи әм шәрм дькьн йан жи мәрʹа чәтьн ә, йәкә әм гәрәке тʹьме рʹастийе бежьн (Мәтʹлк. 6:16-19). w17.08 18 ¶3, 5; 20 ¶12-13, 15

Иро Йаһоԝа бь Хәбәра хԝә, демәк Кʹьтеба Пироз рʹебәрийе мә дькә. «Хәбәра ԝи зу бәла дьбә», демәк гава мәрʹа аликʹари лазьм ә, әԝ дәрберʹа дьдә мә. Бәса хәбәре, бьфькьрьн кӧ һун кʹарәкә чьԛас мәзьн дьстиньн чахе Кʹьтеба Пироз дьхуньн, әʹдәбйәтед «хӧламе амьн у сәрԝахт» леколин дькьн, JԜ Бродкастинге дьньһерʹьн, дькʹәвьнә малпәра мә jԝ.org, тʹәви рʹуспийа хәбәр дьдьн у тʹәви хушк-бьра һәвалтийе дькьн (Мәт. 24:45). Дьбәкә ԝә хԝәха әʹмьре хԝәда дитийә кӧ Йаһоԝа чаԝа зу у ԝәʹдәда рʹебәри дайә ԝә. Зәбурбеж заньбу кӧ Исраел щьмәʹта Хԝәдейә бьжарти йә. Һьнге тʹәне ԝана «хәбәра» Хԝәде у «ԛанун у ԛьраред» ԝи дьстандьн (Зәб. 147:19, 20). Ле иро әм кʹәрәмкьри нә, чьмки сәр тʹәмамийа әʹрде наве Хԝәде тʹәне сәр мә йә. Әм Йаһоԝа нас дькьн у Хәбәра ԝи рʹебәрийе мә дькә. Һьн жи әм дькарьн һәләԛәтийа незик тʹәви ԝи хԝәй кьн. Бәле, мина ньвискʹаре Зәбур 147, мәʹнийед ԝә жи гәләк һәнә кӧ пәсьне Йаһоԝа бьдьн у ве йәкеда мәрьвед дьн жи һелан кьн. w17.07 20 ¶15-16; 21 ¶18

Иро шагьртед Иса, кӧ жь ԝан милйонәки зедәтьр хьзмәткʹаред һәртʹьм ьн, әве ширәта Паԝлос жь рʹеза ве рʹоже дьдьнә хәбате. Әԝана чʹәʹв надьнә ве дьнйайе, кʹижан кӧ пʹәрәһьз ә у тьма йә у бир накьн әве принсипе: «Дәйндар дьбә хӧламе дәйндайи» (Мәтʹлк. 22:7). Шәйтʹан һәма әве йәке дьхԝазә ԝәки әм һʹәму ԝәʹде хԝә у ԛәԝата хԝә хәрщ кьн у бьбьнә хӧламед ве дьнйайе. Бәле, әм гәрәке мьԛати хԝә бьн, ԝәки сафикьрьнед ӧса нәкьн кӧ мә бькьнә хӧлам. Мәсәлә, һәрге әм пʹәре ԛальм дәйни һьлдьдьн сәва там бькʹьрʹьн, йан хԝәндьна бьльнд бьстиньн, йан жи авта бьһа бькʹьрʹьн, әм дькарьн сәр гәләк сала бькʹәвьнә бьн дәйна. Ләма жи аԛьлайи йә, кӧ пәй пʹәра нәкʹәвьн, дәйна нәкьнә стуйе хԝә у пʹәре хԝә рʹаст хәрщ кьн. Ӧса ԝе тʹӧ тьшт рʹе мә нәгьрә кӧ Хԝәдерʹа хӧламтийе бькьн у нәбьнә хӧламед комерсйа ве дьнйайе (1 Тимтʹ. 6:10). w17.07 10 ¶13

Тʹәне изьна Йаһоԝа һәйә сәрԝертийе бькә. Әԝ бь һәԛийе сәрԝертийе дькә. Йаһоԝа дьбежә: «Әз Йаһоԝа мә, әз бь һʹьзкьрьне, һәԛийе у рʹастийе мә һьндава әʹрде, чьмки әԝ йәк дьле мьн хԝәш те» (Йерәм. 9:24, ДТʹ). Йаһоԝа занә чь һәԛ у рʹаст ә, у жерʹа нәлазьм ә ԛанунед кӧ мәрьв хԝәха чекьрьнә. Йаһоԝа хԝәха ԛануна датинә, у әԝи ль гора һәԛийа хԝә мәрьварʹа ԛанун дайә. «Рʹасти у һәԛи әԝ бьнгәһед тәхте . . . [ԝи] нә». Ләма жи һʹәму ԛанун, принсип у сафикьрьнед ԝи рʹаст ьн (Зәб. 89:14). Шәйтʹан гот кӧ йанчь Йаһоԝа Һʹӧкӧмдаре һәԛ нинә, ле хԝәха Шәйтʹан һәԛийе у рʹастийе нькарә бинә сәр дьнйайе. 17.06 28 ¶5

Йаһоԝа йә Хԝәдейе рʹастийе (Зәб. 31:5). У әԝ мина бавәки мәрʹд, әԝан рʹастийа мәрьвед хԝәдехофрʹа әʹйан дькә. Әм гәләк рʹастийа пеһʹәсийан жь Хәбәра Хԝәде, жь әʹдәбйәтед мә, жь щьватед мәзьн, у щьватед һәр һʹәфтийе. У чьԛас дьчә, «хьзна мә» пе рʹастийед кәвьн у тʹәзә зедә дьбә (Мәт. 13:52). Һәрге әм мина хьзнәкә вәшарти рʹастийа бьгәрʹьн, Йаһоԝа ԝе али мә бькә, ԝәки әм «хьзна» хԝә пе рʹастийед тʹәзә зедә кьн (Мәтʹлк. 2:4-7). Ле ча әԝан рʹастийа бьгәрʹьн? Әм гәрәке тʹьме Хәбәра Хԝәде у әʹдәбйәтед мә бьхуньн, у кʹур леколин бькьн. Тʹәне бь ԝи щурʹәйи әме бьвиньн ԝан рʹастийа, кʹижан кӧ ԝе бона мә «ну» бьн, демәк кʹижан кӧ мә бәре ньзаньбу (Йешу 1:8, 9; Зәб. 1:2, 3). Бәле, әм гәрәке тʹьме бәрдәԝам кьн рʹастийед ԛимәт бьгәрʹьн у хьзна хԝә зедә кьн. w17.06 12 ¶13-14

Бьраки щаһьл у азәп, ԝәрә әм ԝи нав кьн Едуардо, дәрһәԛа пьрсәке хәбәр да тʹәви рʹуспики әʹмьрда мәзьн йе кӧ зәԝьщи йә. Наве ԝи рʹуспи Стефан ә. Едуардо дьфькьри дәрһәԛа гьлийед жь 1 Корьнтʹи 7:28: «Йед ӧса [йед зәԝащеда] ԝе рʹасти охьрмед гьран бен». Әԝи жь Стефан бьра пьрси: «Чь те һʹәсабе ‹охьрмед гьран›, у һәрге әз бьзәԝьщьм, ча гәрәке ԝан охьрмед гьран дәрбаз кьм?» Стефан пешийа кӧ щаба ве пьрсе бьда, готә Едуардо кӧ бьфькьрә сәр ван гьлийед Паԝлос: «Хԝәдейе һʹәму бәрдьлийе . . . нава һʹәму тәʹли-тәнгийада дьл дьдә бәр мә» (2 Корн. 1:3, 4). Баве мә Йаһоԝа мә һʹьз дькә у бәрдьлийе дьдә мә чахе әм рʹасти чәтьнайа тен. Дьбәкә бал ԝә жи ӧса ԛәԝьмийә, кӧ чәтьнайеда Хԝәде бь сайа Хәбәра хԝә аликʹари у рʹебәри дайә ԝә. Бәле, әм гәрәке дӧдьли нәбьн кӧ Йаһоԝа ча бәре, ӧса жи иро ԛәнщийа хьзмәткʹаред хԝә дьхԝазә (Йерәм. 29:11). w17.06 4 ¶1-2

Хушк-бьред мә йед рәви, һе зәʹф һʹәԝще аликʹарийа рʹӧһʹани у бәрдьлийе нә, нә кӧ һʹәԝще пʹәра (Мәт. 4:4). Мәсәлә, рʹуспи дькарьн сәр зьмане ԝан әʹдәбйәта дәстхьн у али ԝан бькьн сәва әԝана рʹасти ԝан бьра бен, йед кӧ сәр зьмане ԝан хәбәр дьдьн. Гәләк рʹәви жь малед хԝә, нәфәред хԝә, бьнәли ԝәлат у жь щьвате ԛәтийанә. Әԝана һини чь бунә ида тʹӧнә. Ләма жи әԝана гәрәке һʹьзкьрьна Йаһоԝа у дьлшәԝатийе нава хушк-бьрада тʹәхмин кьн. Һәрге әԝана жь хушк-бьра бәрдьлийе нәвиньн, әԝана ԝе аликʹарийе бал нәбаԝәра бьгәрʹьн, мәсәлә, бал ԝан йед кӧ дьбәкә жь ԝәлате ԝан ньн, әʹдәтед ԝан йәк ә у һʹаләкида ньн (1 Корн. 15:33). Әм гәрәке ӧса бькьн, ԝәки әԝана щьватеда хԝә тʹәхмин кьн ча мала хԝәда. Бона мә ԛәдьр ә ԝәки әм дькарьн хԝәйкьрьна хәрибада пьштгьрийа Йаһоԝа бькьн. Гәләк рʹәви нькарьн вәгәрʹьн ԝәлате хԝә, чьмки ль ԝедәре һʹал хьраб ә у һьнәк ԛә нә жи дьхԝазьн вәгәрʹьн ԝедәре. Гәләк жь ԝана рʹасти кӧл-дәрдед гьран һатьнә. Сәва бькʹәвьнә һʹәйра ԝан, пьрсәкә ӧса бьдьнә хԝә: «Һәрге әз һʹале ԝанда бума, мьне бьхԝәста кӧ һьндава мьнда ча буна?» (Мәт. 7:12). w17.05 6 ¶15-16

Ве дьнйа Шәйтʹанда, гәләк тьшт һәнә жь бо чь жи әм дькарьн дьлтәнг бьн. Ле һәрге әм гәләк дьлтәнг бьн у бәрхԝә кәвьн, баԝәрийа мә дькарә сьст бә у һʹьзкьрьна мә һьндава Хԝәдеда сар бә (1 Йуһʹн. 5:19). Дьԛәԝьмә әм сәва калбун-пирбуне, сьһʹәт-ԛәԝата хьраб, йан жи сәва чәтьнайед пʹәрава гьредайи бина хԝә тәнг дькьн. Йан жи дьԛәԝьмә әм бәрхԝә дькʹәвьн чьмки әм һивийа тьштәки бун, ле әԝ йәк нәһатә сери. Дьбәкә дьле мә дьшке, чьмки чь кӧ әм дьхԝазьн бькьн нькарьн бькьн. Фьрԛи тʹӧнә әм рʹасти чь чәтьнайа тен, әм гәрәке тʹӧ щар нәфькьрьн ԝәки Йаһоԝа әм һиштьнә, ләма әм ԝан кӧл-дәрда дькʹьшиньн. Йаһоԝа дьбежә ԝәки һʹьзкьрьна ԝи һьндава мә кʹӧта набә. Әԝ гьлийед ширьн әм дьхуньн Зәбур 136:23-да, кʹидәре те готьне: «Йе бәләнгазийа мәда мә бир тинә, чьмки һӧба ԝи һʹәта-һʹәтайе йә». Бәле, Йаһоԝа мә һәртʹьм һʹьз дькә. Ләма жи дӧдьли нәбьн ԝәки әԝ гӧһе хԝә дьдә сәр «заринийа» мә у щаба дӧайед мә жи дьдә (Зәб. 116:1; 136:24-26). w17.05 18 ¶8

Чаԝа Галати 2:11-14-да әм дьвиньн, һьнге тьрса мәрьва кʹәтә сәр Пәтрус (Мәтʹлк. 29:25). Рʹаст ә Пәтрус заньбу ԝәки Йаһоԝа мьләтед дьн жи ԛәбул кьрийә, ле ԝи чахи Пәтрус тьрсийа кӧ Щьһуйед сьнәткьри ԝе чь бежьн. Гава Паԝлос Антәкйайеда дӧрʹутийа Пәтрус дит, мьԛабьли ԝи рʹабу у дӧрʹутийа ԝи да рʹуйе ԝи (Кʹар. Шанд. 15:12; Галт. 2:13). Пәтрус йәки мьлук бу у әԝи ширәткьрьна Паԝлос ԛәбул кьр. Кʹьтеба Пироз набежә кӧ Пәтрус щабдарийед хԝәйә щьватеда ӧнда кьр. Бь рʹастийе, әԝ паше бь рʹебәрийа Хԝәде дӧ нәʹмә ньвисин, кʹижан кӧ бунә пʹара Кʹьтеба Пироз. Һьн жи Иса, демәк сәре щьвате, диса жи ԝи ԛәбул дькьр (Әфәс. 1:22). У әԝе дәрәще, мәщал чекьр ԝан хушк-бьрарʹа, сәва чʹәʹв бьдьнә Иса у Баве ԝи, у бьбахшиньн Пәтрус. Әм баԝәр ьн кӧ жь ԝан хушк-бьра тʹӧ кәс сәва шашийа мәрьве гӧнәкʹар нәлькʹӧмийә. w17.04 27 ¶16-18

Чахе Йаһоԝа әԝ дӧ шәһәр бь тʹәмами кʹӧта кьр, нета ԝи тʹәне әԝ нибу кӧ хьрабийе бьдә һьлдане. Йаһоԝа бь ве йәке «бона нәпʹакед пәй ԝанрʹа дәрсәк һьшт». Бәле, чаԝа бәре Йаһоԝа һʹәму кьред бенамуси да һьлдане, ӧса жи һʹәму кьред хьраб кӧ иро тенә кьрьне ԝе бьдә һьлдане. Әԝ йәк ԝе бьԛәԝьмә чахе Йаһоԝа ԛьрʹа ве дьнйайе бинә. Дәԝса ԝан кьред хьраб ԝе чь бьбә? Мәрьвед щьнәтеда ԝе бь шьхӧлед һʹәԝасва мьжул бьн. Мәсәлә, бьдьнә бәр чʹәʹве хԝә ԝәки ԝе чьԛас хԝәш бә чахе әм әʹрде бькьн щьнәт, йан жи бона хԝә у мәрьвед хԝәйи незик ханийа ава бькьн. Бьфькьрьн һәла ԝе чьԛас баш бә чахе милйона мәрьв ԝе жь мьрьне рʹабьн. Әме ԝана рʹейед Йаһоԝа һин кьн у ԝанрʹа гьли кьн кӧ нава тʹәрихийеда Хԝәде һьндава инсанәте чьԛас ԛәнщ бу (Иша. 65:21, 22; Кʹар. Шанд. 24:15). Дьнйа тʹәзәда әʹмьре мә ԝе бь шьхӧлед ӧса тʹьжә бә, кӧ мәрʹа шабуне бинә у әме пәсьна бьдьнә Йаһоԝа! w17.04 12 ¶11-12

Чахе Йәфтаһ әԝ сонд хԝар, әԝи заньбу ԝәки дьԛәԝьмә йа пешийе ԛиза ԝи бә кӧ жь мал дәркʹәвә у бе пешийа ԝи. Йәкә Йәфтаһрʹа у ԛиза ԝирʹа гәләк чәтьн бу, чьмки әԝ йәк бона һәрда жи ԛӧрбанәкә мәзьн бу. Гава кӧ Йәфтаһ ԛиза хԝә дит, «кʹьнще хԝә чьранд» у гот ԝәки дьле ԝи шкәст. Ԛиза ԝи жи «ԛизтийа хԝәрʹа» гьрийа. Гәло чьрʹа? Чьмки кӧрʹе Йәфтаһ тʹӧнә бу, ле ԛиза ԝи гәрәке тʹӧ щар мер нәкьра у нә жи зарʹ жерʹа бьбуна. Ләма жи наве Йәфтаһ ԝе жь малбәта ԝи бьһата һьлдане у мьлкʹе ԝи жи нәгьһишта тʹӧ кәси. Ле Йәфтаһ бона ԝан тьшта гәләк бинтәнг нәбу. Бона ԝи йа лапә фәрз әԝ бу, кӧ сонда хԝә бәр Хԝәде бинә сери. Әԝи гот: «Мьн жь Хӧданрʹа гот, иди әз нькарьм вәгәрʹьм». Ԛиза ԝи готә баве хԝә: «Чаԝа жь дәве тә дәркʹәтьбә, ӧса бькә» (Һʹакьм. 11:35-39). Бәле, Йәфтаһ у ԛиза ԝи мәрьвнә амьн бун. Чьԛас гьран жи сәр ԝан рʹуньшта, йәкә ԛә һʹьше ԝанрʹа жи дәрбаз нәдьбу, ԝәки созе хԝә кӧ ԝана Хԝәдейе Һәри Жорьнрʹа бьда, нәйньн сери (Ԛан. Дщр. 23:21, 23; Зәб. 15:4). w17.04 4 ¶5-6

Усьврʹа гәләк хьраби кьрьн. Мәсәлә, чахе әԝ ԝәкә 17 сали бу, бьред ԝийи һʹәлал ԝи ча дил фьрʹотьн. Паше, чахе әԝ Мьсьреда бу, шәрʹ авитьнә ԝи йанчь әԝи хԝәстийә тʹәви жьна ахайе хԝә рʹазе у ләма ԝи кьрьнә кәле (Дәстп. 39:11-20; Зәб. 105:17, 18). Усьв мәрьвәки амьн у һʹәйф бу, ле те бежи әԝ дьһатә щәзакьрьне, нә кӧ кʹәрәмкьрьне. Ле паши 13 сала, һʹале ԝи ньшкева һатә гӧһастьне. Ԝи жь кәле аза кьрьн, у әԝ бу сәрԝере дӧда Мьсьреда (Дәстп. 41:14, 37-43; Кʹар. Шанд. 7:9, 10). Ле гәло жь бо ԝан нәһәԛийа Усьв һатә гӧһастьне у бу йәки зӧлм? Гәло әԝи итʹбарийа хԝә һьндава Йаһоԝа ӧнда кьр? Тʹӧ щар на. Ле чь али ԝи кьр кӧ бь сәбьр һивийе бә? Баԝәрийа ԝи һьндава Йаһоԝа али ԝи кьр. Әԝи заньбу ԝәки Йаһоԝа һаш жь һәр тьшти һәйә у һәр тьшт дәсте ԝида йә. Баԝәрийа ԝи те кʹьфше жь ԝан гьлийа кӧ әԝи бьред хԝәрʹа гот: «Рʹаст ә һун һьндава мьнда хьраб фькьрин, ле Хԝәде фькьри кӧ ԝе бькә ԛәнщи, ԝәки мина рʹожа ироин, әʹмьре гәләк мәрийа хԝәй кә» (Дәстп. 50:19, 20). Бәле, Усьв фәʹм кьр ԝәки һежа бу әԝ һивийе бә. w17.08 4 ¶6; 6 ¶12-13