Нисан

Әм ча дькарьн кʹаре бьстиньн жь ԝан пʹешкʹеша? Мәсәлә, әм дькарьн чʹәʹв бьдьнә баԝәри у мәсәла рʹуспийа. Ӧса жи ширәтед ԝан кӧ сәр һʹиме Кʹьтеба Пироз ьн, ԛәбул кьн (Ибрн. 13:7, 17). Бир нәкьн, ԝәки рʹуспи мә һʹьз дькьн у дьхԝазьн әм рʹӧһʹанида мәзьн бьн. Бәʹса хәбәре, һәрге әԝана дьвиньн кӧ әм щьвата бәрʹдьдьн йан жи хирәта хԝә ӧнда дькьн, әԝана ԝе әʹсәйи незики мә бьн сәва аликʹарийе бьдьнә мә. Әԝана ԝе гӧһ бьдьнә мә, бь дьлшәԝати мә бьшьдиньн у бь Кʹьтеба Пироз ширәт кьн. Ле һун әве аликʹарийа ԝан һʹәсаб дькьн ча һʹьзкьрьна Йаһоԝа һьндава хԝә? Бир нәкьн ԝәки щара рʹуспийарʹа һеса нинә незики ԝә бьн сәва ширәте бьдьнә ԝә. Ле һун чь дькарьн бькьн сәва рʹуспийарʹа һеса бә незики ԝә бьн? Мьлук, шекьр, у нәрм бьн. Аликʹарийа ԝан һʹәсаб кьн ча һʹьзкьрьна Хԝәде һьндава хԝә. Ԝи щурʹәйи һуне нә кӧ тʹәне хԝәха кʹаре бьстиньн, ле ӧса жи рʹуспи ԝе шьхӧле хԝәда шабуне ӧнда нәкьн. w18.03 31 ¶15-16

Һәр зарʹәк щурʹәки йә, демәк һʹәмушк нә мина һәв дьгьһижьн. Һьнә зарʹ зу рʹастийе фәʹм дькьн, сафикьрьнед аԛьлайи дькьн у дьхԝазьн бенә ньхӧмандьне. Һьнәк жи һʹәта кӧ һьнәки мәзьн нәбьн һазьр ниньн бенә ньхӧмандьне. Ләма жи де-бавед сәрԝахт тӧ щар зоре зарʹед хԝә накьн, кӧ бенә ньхӧмандьне. Ле әԝана алийе рʹӧһʹанида аликʹарийе дьдьнә зарʹед хԝә, ԝәки зарʹ хԝәха пешда һәрʹьн. Де-бав гәләк ша дьбьн чахе зарʹед ԝан һьлдьдьнә һʹәсаб гьлийе жь рʹеза ве рʹоже. Йәкә, де-бав гәрәке бир нәкьн кӧ нета ԝан әԝ ә, ԝәки али зарʹед хԝә бькьн, кӧ әԝана бьбьнә шагьрт. Ләма жи де-бав гәрәке пьрсәкә ӧса бьдьнә хԝә: «Гәло занәбуна зарʹа мьн һаԛас һәйә, ԝәки әԝ хԝә тʹәсмили Хԝәде кә у бе ньхӧмандьне?». w18.03 9 ¶6

Һәрге кәсәк мә тʹәглиф дькә у әм соз дьдьн кӧ әме һәрʹьн, әм гәрәке бе мәʹнийа фәрз жь созе хԝә вәнәгәрʹьн. Әԝе кӧ мә тʹәглиф кьрийә, дьбәкә ида тьшт һазьр кьрийә бона һатьна мә, у әԝ һʹәму щәфе ԝи дькарә бош-бәтал бә һәрге әм нәчьн (Мәт. 5:37). Һьнәк соз дьдьн кӧ ԝе мевани һәрʹьн, ле чахе ԝана тʹәглифи щики дьн жи дькьн әԝана жь созе хԝәйи пешийе вәдьгәрʹьн, чьмки һʹәсаб дькьн кӧ щийе дьн һе баш бә. Ле гәло әԝ йәк бь һʹьзкьрьн у ԛәдьр ә? Бь рʹасти әм гәрәке бь дьл у щан тʹәглифкьрьне ԛәбул кьн, у бьшекьриньн чь жи әԝана бона мә дькьн (Луԛа 10:7). Ле фәʹмдари йә, һәрге ньшкева тьштәк ԛәԝьми у әм нькарьн һәрʹьн, ԝе бь һʹьзкьрьн бә һәрге әм чьԛас дькарьн зу дәрһәԛа ве йәке ԝанрʹа бежьн. Ӧса жи гәләк фәрз ә әʹдәте мьһала хԝә һьлдьн һʹәсаб. Нава һьнә мьләтада меван кӧ ньшкева тен әԝ тьштәки нормал ә, ле һәнә щийед ӧса жи кʹидәре лазьм ә пешда бежьн, ԝәки тенә меван. Ӧса жи һьнә щийа ԛәйдә йә тʹәглифкьрьна пешьн у йа дӧда ԛәбул нәкьн; ле щийед дьнда әԝ нә бь ԛәдьр ә. Ԝәрә әм алийе хԝәда һәр тьшти бькьн сәва әԝед кӧ мә тʹәглиф дькьн, һатьна мәрʹа ша бьн. w18.03 18 ¶20-21

Бир нәкьн кӧ занәбуна Кʹьтеба Пироз бәс нинә сәва әм бьбьнә мәрьвед рʹӧһʹани (1 Пʹадш. 4:29, 30; 11:4-6). Демәк, хенщи занәбуна Кʹьтеба Пироз, диса чь лазьм ә? Лазьм ә әм бәрдәԝам кьн рʹӧһʹанида пешда һәрʹьн (Колс. 2:6, 7). Гавәкә фәрз әԝ ә, кӧ кʹьтеба «Хԝә Нава Һʹьзкьрьна Хԝәдеда Хԝәй кьн» хԝәрʹа леколин бькьн. Әв кʹьтеб ԝе али ԝә бькә принсипед Кʹьтеба Пироз жийина хԝәда бьдьнә хәбате. Һәрге ԝә әв кʹьтеб ида хьлаз кьрийә, ԝе баш бә һун әʹдәбйәтед дьн леколин бькьн, кʹижан кӧ ԝе али ԝә бькьн баԝәрийа хԝә ԛәԝи кьн (Колс. 1:23). Ӧса жи һун гәрәке бьфькьрьн сәр ԝан тьшта чь кӧ һин дьбьн, у Йаһоԝарʹа дӧа бькьн, ԝәки али ԝә бькә ԝан тьшта әʹмьре хԝәда бьдьнә хәбате. Бир нәкьн кӧ чахе әм леколина дькьн у дьфькьрьн, нета мә гәрәке әԝ бә ԝәки хԝәстьна мә ԛәԝи бә кӧ дьле Йаһоԝа ша кьн у гӧрʹа ԛанунед ԝи бькьн (Зәб. 40:8; 119:97). Хенщи ве йәке, әм гәрәке инкʹар кьн һәр тьшти чь кӧ дькарә рʹе мә бьгьрә рʹӧһʹанида пешда һәрʹьн (Тито 2:11, 12). w18.02 24-25 ¶7-9

Әм дькарьн баԝәрийа мина йа Нӧһ ԛазанщ кьн һәрге Хәбәра Хԝәде леколин бькьн, дьле хԝәда хԝәй кьн чь кӧ һин дьбьн, у ль гора ве йәке гӧһастьна бькьн у сафикьрьнед рʹаст бькьн (1 Пәт. 1:13-15). Паше, баԝәри у биланийа жь Хԝәде ԝе мә хԝәй кә жь тʹәлькед Шәйтʹан у жь рʹӧһʹе дьнйа ԝийә хьраб (2 Корн. 2:11). Мәрьвед ве дьнйайеда зӧлмийе у бенамусийе һʹьз дькьн. Һьн жи һʹьш-аԛьле ԝан тʹәне сәр хԝәстьнед ԝани бәдәни йә (1 Йуһʹн. 2:15, 16). Әԝана рʹӧһʹанида кʹәтинә, у пьшт гӧһе хԝәва давежьн ԝан избаткьрьна, кʹижан кӧ әшкәрә дьдьнә кʹьфше ԝәки рʹожа Хԝәде бәр шемике йә. Дина хԝә бьдьне кӧ чахе Иса ԝәʹде Нӧһ бәрамбәри ԝәʹде мә кьр, әԝи нә кӧ бәʹса зӧлмийе у бенамусийе кьр, ле әԝи гот кӧ мәрьв ԝе рʹӧһʹанида рʹазайи бьн (Мәт. 24:36-39). Хԝә бьщерʹьбиньн у пьрсед ӧса бьдьнә хԝә: «Гәло пе әʹмьре мьн те кʹьфше ԝәки әз бь рʹастийе Йаһоԝа нас дькьм? Гәло баԝәрийа мьн, мьн һелан дькә, ԝәки ль гора принсипед Йаһоԝа бьжим у ӧса жи мәрьвед дьнрʹа дәрһәԛа принсипед ԝи бежьм?» Щабед ԝә сәр ԝан пьрса, ԝе нишан кьн һәла һун жи мина Нӧһ рʹийа Хԝәдеда дьчьн йан на (Дәстп. 6:9). w18.02 9-10 ¶8-10

Әм бь тʹәмами нькарьн хԝә жь мәрьвед ԝи щурʹәйи хԝәй кьн, чьмки әм мәщбур ьн тʹәви ԝан бьхәбьтьн, йан жи һәрʹьнә мәкʹтәбе, йан жи тʹәви ԝан бьжин. Ле әм дькарьн хԝә дур бьгьрьн жь фькьред ԝан у чʹәʹв нәдьнә хәйсәт-һʹӧнӧред ԝан. Әме ве йәке бькарьбьн бькьн, һәрге бь сайа леколинкьрьна Кʹьтеба Пироз рʹӧһʹанида хԝә ԛәԝи кьн, у тʹәви ԝан һәвалтийе бькьн йед кӧ бь дьл Йаһоԝарʹа хьзмәт дькьн. Әм ӧса жи гәрәке алийе рʹӧһʹанида али мәрьвед дьн бькьн. Һәр мәщалә бьдьнә хәбате сәва шәʹдәтийе бьдьн, жь Йаһоԝа аликʹарийе бьхԝазьн ԝәки әԝ али ԝә бькә рʹаст хәбәр дьн у ԝәʹдә жи рʹаст бьжберьн. Әм гәрәке мәрьварʹа бежьн кӧ әм Шәʹдед Йаһоԝа нә, чьмки ԝи щурʹәйи әԝана дькарьн рʹабун-рʹуньштьна мәйә баш бьвиньн, у һӧрмәте бьдьнә Хԝәде, нә кӧ мә. Әм һатьнә һинкьрьне ԝәки «нәпʹакийе у дьлһавьжийед дьнйайе инкʹар кьн у аԛьлда гьран, бь рʹастийе у хԝәденасийе бьжин ль ве дьне» (Тито 2:11-14). Һәрге рʹабун-рʹуньштьна хԝәда әм чʹәʹв дьдьнә Хԝәде, мәрьв ԝе дина хԝә бьдьнә мә у һьнәк ԝе һәла һе бежьн жи: «Әм тʹәви ԝә бен, чьмки мә бьһист ԝәки Хԝәде тʹәви ԝә йә!» (Зәкәр. 8:23, ДТ). w18.01 31 ¶17-18

Гәло әԝ хьраб ә ԝәки хԝә һʹьз бькьн? На, әԝ тьштәки тʹәбийәти йә, у һәла һе жи лазьм ә. Йаһоԝа әм ӧса әʹфьрандьнә. Иса гот: «Һәвале хԝә ԝәкә хԝә һʹьз бькә» (Марԛ. 12:31). Бь рʹастийе ӧса нә, һәрге әм хԝә һʹьз нәкьн, әме нькарьбьн мәрьва һʹьз бькьн. Кʹьтеба Пироз ӧса жи дьбежә: «Гәрәке мер жьна хԝә һʹьз бькә, чаԝа бәдәна хԝә. Йе кӧ жьна хԝә һʹьз дькә, әԝ хԝә һʹьз дькә. Чьмки бәдәна тʹӧ кәси бәр чʹәʹве ԝи нә рʹәш ә, ле ԝе тʹер дькә у хԝәй дькә» (Әфәс. 5:28, 29). Демәк, әм дьвиньн ԝәки чахе әм хԝә һʹьз дькьн у әв һʹьзкьрьн жь синора дәрнайе, ве йәкеда тьштәки хьраб тʹӧнә. Хԝәһʹьзи дәрһәԛа кʹижани 2 Тимотʹейо 3:2-да те готьне, әв һʹьзкьрьна нәрʹаст ә. Мәрьвед кӧ хԝә гәләк һʹьз дькьн, жь ве зедәтьр сәр хԝә дьфькьрьн, нә кӧ чьԛас жь ԝан дькʹәвә (Рʹом. 12:3). Әʹмьре хԝәда әԝана тʹәне дәрһәԛа хԝә дьфькьрьн, ле дәрһәԛа мәрьвед дьн ԛә хәм накьн. Чахе әԝана тьштәки нәрʹаст дькьн, әԝана гӧне хԝә дькьнә стуйе кәсәки дьн, чьмки нахԝазьн щабдар бьн бона кьред хԝә. Мәрьвед ӧса кӧ тʹәне бона хԝә дьфькьрьн, бь рʹастийе бәхтәԝар ниньн. w18.01 23 ¶4-5

Бь сайа һинбуна шәхси тӧ гӧһ дьди Йаһоԝа, ле бь сайа дӧа тӧ хәбәр дьди тʹәви ԝи. Бона Мәсиһи дӧа гәрәке ритуал нибә, йан жи чаԝа тʹәлисмә, кʹижан кӧ бона ве йәке йә, сәва һʹәму тьшт тәрʹа ләв бе. Дӧа әв һәйә хәбәрдана реали тʹәви Әʹфьрандаре мә. Йаһоԝа дьхԝазә бьбьһе, кӧ тӧ чь дьхԝази жерʹа бежи (Фили. 4:6). Чахе тӧ бона тьштәки бәрхԝә дькʹәви, Кʹьтеба Пирозда ширәт те дайине кӧ «баре хԝә бьдә Хӧдан» (Зәб. 55:22). Ле тӧ баԝәр дьки кӧ әв ширәт дькарә хут али тә бькә? Бь милйона хушк-бьра һәнә, йед кӧ дькарьн тәрʹа гьли кьн чаԝа әԝе ширәте али ԝан кьрийә. Әԝ дькарә али тә жи бькә! Әм гәрәке тʹәне бона аликʹарийе Йаһоԝарʹа дӧа нәкьн. Щара әм ӧса дькʹәвьн һʹәйра чәтьнайед хԝә, кӧ кʹәрәмед хԝә бир дькьн. Ләма жи ԝе баш бә кӧ һәр рʹож бьфькьрьн, мәсәлә сәр се тьшта кӧ әм дьшекьриньн, у паше дӧада рʹазибуна хԝә Йаһоԝарʹа бьдьнә кʹьфше. w17.12 25-26 ¶10-11

Һәр сал бь һʹәзара мәрьв хԝә тʹәсмили Йаһоԝа дькьн у тенә ньхӧмандьне. Гәләк жь ԝан щаһьл ьн, кʹижан кӧ нава рʹастийеда мәзьн бунә у рʹийа лапә баш бьжартьнә (Зәб. 1:1-3). Һәрге һун Мәсиһи нә у зарʹед ԝә һәнә, бешьк һун бь дьл у щан һивийа ве рʹоже нә, чахе ԛиз йан кӧрʹе ԝә бе ньхӧмандьне (Бәрамбәр кьн 3 Йуһʹәнна 4). Һун чаԝа де-баве Мәсиһи, дьхԝазьн кӧ зарʹа ԝә ньвисаред пироз бьзаньбә, у иро әԝ Ньвисаред Ибрани у Ньвисаред Йунани нә. Һәла һе зарʹа бьчʹук жи дькарә һин бә дәрһәԛа мәрьв у ԛәԝьмандьнед жь Кʹьтеба Пироз. Тʹәшкиләта Йаһоԝада һәнә гәләк кʹьтеб, видео у диса һащәтед дьн, кӧ дькарьн али де-бава бькьн зарʹед хԝә һин кьн. Бир нәкьн кӧ зарʹа ԝә гәрәке бьзаньбә Кʹьтеба Пирозда чь те готьне, сәва кӧ һәләԛәтийа хԝә тʹәви Йаһоԝа ԛәԝи кә. w17.12 18 ¶1; 19 ¶4

Дьбәкә тӧ хушк и у мере тә нәбаԝәр ә. Тӧйе чь бьки һәрге мере тә һьндава тә нәбаш ә? Гәло тӧйе һерс кʹәви у тʹәви ԝи бькʹәви дәʹԝе, сәва әв чәтьнайи сафи бә? Һәрге тӧ зоре ԝи бьки кӧ ӧса бькә ча тӧ дьхԝази, гәло тӧйе ӧса бькарьби дьле ԝи бькʹьрʹи кӧ бе бал Йаһоԝа? Ле һәрге тӧ ԛәдьре ԝи бьгьри ча малхе мале, ԝе малбәтеда әʹдьлайи һәбә, тӧйе наве Йаһоԝа һӧрмәт ки, у дьбәкә мере тә бе сәр рʹийа рʹаст. Ӧса һун һәрдӧ жи дькарьн хәлате бьстиньн (1 Пәт. 3:1, 2). Дьбәкә тӧ бьра йи у жьна тә нәбаԝәр ә, тӧйе чь бьки һәрге жьна тә ԛәдьре тә нагьрә? Гәло әԝ ԝе һе ԛәдьре тә бьгьрә һәрге тӧ сәр ԝе бьки ԛарʹини у бьди кʹьфше малда кʹе йә сәрԝер? На. Хԝәде дьхԝазә ԝәки тӧ чʹәʹв бьди Иса кӧ бь һʹьзкьрьн малхетийе бьки. Иса бь һʹьзкьрьне у сәбьре сәрԝертийе щьвате дькә (Луԛа 9:46-48). Һәрге мер чʹәʹв бьдә Иса ве йәкеда, әԝ дькарә дьле жьна хԝә бькʹьрʹә сәва әԝ бе сәр рʹийа Хԝәде. w17.11 28-29 ¶13-14

Мәрьвед кӧ дькʹәвьнә бәр байе нет-фькьред ве дьнйайе, принсипед Йаһоԝа пьшт гӧһе хԝәва давежьн. У һәрге әм мьԛати хԝә нәбьн, әԝ нет-фькьр дькарьн һеди-һеди баԝәрийа мә сьст кьн. Иро һʹәму щийа ньһерʹандьна ве дьнйайе те кʹьфше, мәсәлә телевисйонеда, интернетеда, сәр хәбате йан жи мәкʹтәбеда. Гәләк ԝәлатада әʹщебмайи нинә чахе мәрьв дьбежьн, кӧ әԝана баԝәр накьн ԝәки Хԝәде һәйә. Әԝана тʹӧ религийа ԛәбул накьн. Әԝана нә жи дьбәкә леколин дькьн һәла Хԝәде һәйә йан на, чьмки дьхԝазьн аза бьжин чаԝа дьле ԝан дьхԝазә (Зәб. 10:4). Һьнәк жи йед кӧ дьфькьрьн ԝәки әԝана һаш жь һәр тьшти һәнә, дьбежьн: «Әз бей баԝәрийа һьндава Хԝәде жи дькарьм пе принсипед рʹаст бьжим». Гәло логики йә баԝәр кьн кӧ Әʹфьрандар тʹӧнә? Чахе мәрьв зандарийеда щаба ве пьрсе дьгәрʹьн, әԝана пе гәләк информасийа тʹәвһәв дьбьн. Ле бь рʹастийе щаба ве пьрсе гәләк һеса йә. Бьфькьрьн, ԛә мал хԝәха дькарә ава бә? Фәʹмдари йә на. Ле илаһи әʹфьринед сах кӧ сәр әʹрде нә у бь шанәйед чәтьн чекьри нә, чаԝа дькарьн хԝәха пешда бен? w17.11 20-21 ¶2-4

Чьрʹа фәрз ә кӧ әм бенә сәр Евара Биранине? Мәʹник әԝ ә кӧ щьвин пʹара һʹәбандьна мә йә. Бешьк, Йаһоԝа у Иса дина хԝә дьдьнә ԝан, йед кӧ алийе хԝәда һәр тьшти дькьн сәва бенә сәр ве щьвинәкә лапә фәрз. Бәле, әм дьхԝазьн ԝәки Йаһоԝа у Иса бьвиньн кӧ әме әʹсә бенә сәр Евара Биранине, хенщи ве мәʹнийе һәрге сьһʹәт-ԛәԝата мә ԝе нәһелә йан жи һәрге дәрәщәкә гьранда бьн. Чахе әм пе кьред хԝә нишан дькьн ԝәки щьвинед сәва һʹәбандьне бона мә фәрз ьн, әм диса мәщал дьдьнә Йаһоԝа сәва наве мә кʹьтеба «биранинеда» хԝәй кә. Әԝ кʹьтеб ӧса жи те навкьрьне «кʹьтеба жийине». Ве кʹьтебеда Йаһоԝа наве ԝан мәрьва дьньвисә, кʹижанарʹа әԝ дьхԝазә жийина һʹәта-һʹәтайе бьдә (Әʹйан. 20:15). Һʹәфтийед пешийа Евара Биранине, ԝе керһати бә кӧ ԝәʹдә хԝәрʹа башԛә кьн, сәва дӧа бькьн у кʹур бьфькьрьн дәрһәԛа һәләԛәтийа хԝә тʹәви Йаһоԝа (2 Корн. 13:5). w18.01 13 ¶4-5

Гава кӧ йе рʹәви дькʹәтә бажаре сьтʹарбуне, ԝедәре әԝ хԝәйкьри бу. Дәрһәԛа ван бажара Йаһоԝа гот: «Әԝ бона ԝә ԝе бьбьн щи-сьтʹар» (Йешу 20:2, 3, ДТʹ). Йаһоԝа дәʹԝа нәдькьр ԝәки әԝе кӧ бе һʹәмде хԝә кӧштьбу, диса бона ве йәке бе диԝанкьрьне. У әԝ мәрьве кӧ дькарьбу һʹәйфе һьлдә, изьна ԝи тʹӧнә бу бькʹәта бажаре сьтʹарбуне. Демәк, әв мәрьв тʹӧ щар ԝе нәтьрсийа кӧ кәсәке ԝи щәза бькә. Ԝи шәһәрида әԝ бьн хԝәйкьрьна Йаһоԝада бу. Әԝ кәледа нибу. Ви шәһәрида әԝ дькарьбу бьхәбьтийа, али мәрьва бькьра, у әʹдьлайеда Йаһоԝарʹа хьзмәт кьра. Бәле, әԝи дькарьбу бь әʹмьре бәхтәԝар бьжита! Һьнә Мәсиһи кӧ гӧнед гьран кьрьнә, ле паше тʹобә кьрьнә, йәкә диса хԝә дьчәрчьриньн сәва гӧнед хԝә. Һьнәк һәла һе жи дьфькьрьн кӧ Йаһоԝа ԝе тʹӧ щар бир нәкә гӧнед ԝан. Һәрге тӧ ӧса хԝә тʹәхмин дьки, дӧдьли нәбә кӧ чахе Йаһоԝа тә дьбахшинә, дьле тә гәрәке рʹьһʹәт бә, чьмки Йаһоԝа бь тʹәмами дьбахшинә. w17.11 9 ¶6; 11 ¶13-14

Әм дькарьн йәктийе хԝәй кьн, һәрге бьфькьрьн сәр симбола, кʹижан кӧ ԝәʹде Биранине тенә хәбьтандьне. Ԝе баш бә әм ве йәке бькьн пешийа Биранине у илаһи рʹожа Биранине. Симбол әԝ һәнә нане шкәва у шәрава сор (1 Корн. 11:23-25). Нан бь симболик те һʹәсабе бәдәна Исайә бегӧнә, кʹижан кӧ әԝи ча ԛӧрбан бәрва да. Шәрав те һʹәсабе хуна ԝи кӧ һатә рʹетьне. Бир нәкьн кӧ ԛӧрбана Мәсиһ дӧ щурʹе һʹьзкьрьна мәзьн әʹйан дькә. Әԝ һәйә һʹьзкьрьна Йаһоԝа кӧ әԝи Кӧрʹе хԝә бона мә ԛӧрбан кьр, у һʹьзкьрьна Иса кӧ әԝ бь рʹәзәдьли әʹмьре хԝә да бона мә. Һәрге әм бьфькьрьн сәр һʹьзкьрьна ԝан, дьле мә жи ԝе һьндава ԝан бь һʹьзкьрьне тʹьжә бә. Һʹьзкьрьна мә һәр кәси һьндава Йаһоԝа, чаԝа тʹел мә тʹәвайи гьредьдә у йәктийа мә ԛәԝи дькә. w18.01 14 ¶11

Йаһоԝа мәрьва ԛайим һʹьз дькә. Әԝ ӧса мә ԛимәт дькә кӧ Кӧрʹе хԝә ԛӧрбан кьр сәва әм жийина һʹәта-һʹәтайе бьстиньн (Йуһʹн. 3:16). Һәрге Йаһоԝа созед хԝә дәрһәԛа ахьрийе нәйнә сери, гьлийед Шәйтʹан ԝе рʹаст дәрен, кӧ йанчь Хԝәде тьштед баш жь мә вәдьшерә у кӧ әԝ сәрԝере хьраб ә. Һьн жи мәрьвед кӧ мьԛабьли Хԝәде нә, ԝе ԛәрфа созед Йаһоԝа бькьн бь ԝан гьлийа: «Кʹа әԝ созе һатьна ԝи? Бавед мә әʹмьре Хԝәде щи анин чун, ле һәр тьшт һе жь ԝәхте әʹфьрандьна дьнйайеда ӧса манә» (2 Пәт. 3:3, 4). Ле Йаһоԝа хԝәйе созед хԝә йә. Гава кӧ изьна сәрԝертийа ԝи бе избаткьрьне, ԝи чахи мәрьвед гӧһдар ԝе хьлаз бьн (Иша. 55:10, 11). Бәле, сәрԝертийа Йаһоԝа сәр һʹиме һʹьзкьрьне йә. Ләма әм гәрәке тʹӧ щар дӧдьли нәбьн, кӧ әԝ ԝе тʹьме хьзмәткʹаред хԝәйи амьн һʹьз бькә у ԛимәт кә (Дәркʹ. 34:6). w17.06 23 ¶7

Гава Йаһоԝа соз да дәрһәԛа кʹьрʹине у Хьлазкʹаре ахьрийе, чаԝа Дәстпебун 3:15-да ньвисар ә, һәма ве гаве Әԝи һʹәсаб кьр кӧ әԝ ԛӧрбан ида һатә дайине. Паше, чахе 4 000 сал дәрбаз бу, Йаһоԝа Кӧрʹе хԝәйи тайе тʹәне да ԛӧрбан бона һʹәму мәрьва (Йуһʹн. 3:16). Бәле, әм гәләк рʹази нә жь Йаһоԝа бона һʹьзкьрьна ԝийи мәзьн! Әм дькарьн һʹьзкьрьна рʹаст бьдьн кʹьфше, чьмки Йаһоԝа әм бь сурәта хԝә әʹфьрандьнә. Мәсәлә, Һабил һʹьзкьрьн бь ԝе йәке да кʹьфше, кӧ бь дьле тʹәмьз ԛӧрбанед лапә баш да Йаһоԝа (Дәстп. 4:3, 4). Нӧһ һʹьзкьрьна беһьләкари мәрьварʹа да кʹьфше, чахе бь сала әʹламәтийа Хԝәде гьли дькьр, у нәдьньһерʹи сәр ве йәке кӧ мәрьва гӧһ нәдьданә ԝи (2 Пәт. 2:5). Бьраһим нишан кьр кӧ һʹьзкьрьна ԝи һьндава Хԝәде сәр щийе пешьн ә, гава һазьр бу кӧрʹе хԝә Исһаԛ бькә ԛӧрбан (Аԛуб 2:21). Әм жи мина ԝан мәрьвед амьн дьхԝазьн һʹьзкьрьна хԝә Хԝәдерʹа бьдьнә кʹьфше ԝи чахи жи, гава мәрʹа чәтьн ә. w17.10 7-8 ¶3-4

Иса йә сәрәккʹаһине мә. Әԝ дьбежә кӧ «рʹәʹме бьстиньн у кʹәрәме бьбиньн кӧ гава әм һʹәԝщә бьн, аликʹарийа мә бькә» (Ибрн. 4:16). Ләма жи, хԝә бькә бьн сьтʹара Йаһоԝа у баԝәрийа хԝә ԛӧрбана Иса бинә. Баԝәр кә кӧ әԝ кʹьрʹин хут шәхси бона тә йә жи (Галт. 2:20, 21). Дӧдьли нәбә кӧ ԛӧрбана Иса әԝ һәйә һʹиме бахшандьна гӧнед тә. Ԛайим баԝәр кә кӧ әв ԛӧрбан тәрʹа мәщале дьдә кӧ жийина һʹәта-һʹәтайе бьстини. Ԛӧрбана Иса жь Йаһоԝа пʹешкʹеш ә хут бона тә жи. У чахе Йаһоԝа гӧнед мә дьбахшиньнә мә, әм гәрәке нәтьрьсьн кӧ әԝ мәʹнийа дьгәрә, ԝәки диса бона ԝан гӧна мә щәза кә (Зәб. 103:8-12). Бәле, әм дькарьн ԛә дӧдьли нәбьн бахшандьна Йаһоԝада. w17.11 11-12 ¶14-17

Ԝәʹде Евара Шива Хӧдан йа пешьн, Иса дӧа кьр кӧ һʹәму шагьртед ԝи ԝе бьбьнә йәк, чаԝа Иса тʹәви Баве хԝә йәктийеда нә. Йаһоԝа бь рʹастийе щаба дӧайе Кӧрʹе хԝәйи дәлал да, у ньһа бь милйона мәрьв баԝәр дькьн кӧ Йаһоԝа Кӧрʹе хԝә шандә сәр әʹрде. Евара Биранине әʹйан избат дькә кӧ Шәʹдед Йаһоԝа йәктийеда ньн. Һьнә щийада бона гәләка әԝ тьштәки әʹщеб ә кӧ мәрьвед жь щурʹә-щурʹә раса тʹәвайи тʹоп бьн, һьнәк мәрьв жи дьфькьрьн кӧ әԝ нә лайиԛ ә. Ле Йаһоԝа у Иса ӧса сәр ве йәке наньһʹерьн. Бәр чʹәʹве ԝан әԝ йәкти тьштәки бәдәԝ у хԝәш ә. Әм щьмәʹта Йаһоԝа нә, ләма әм әʹщебмайи наминьн кӧ йәктийа мә һәйә. Йаһоԝа хԝәха ве йәке пʹехәмбәрти кьр (Һәзԛл. 37:15-17; Зәкәр. 8:23). w18.01 14 ¶7-9

«Һоста», йед кӧ Иса Мәсиһ инкʹар кьрьн, сәрԝеред дине Щьһуйа бун. Ԝана нә тʹәне пьшта хԝә данә Иса у чаԝа Мәсиһ ԝи ԛәбул нәкьрьн, ле гәләк жь ԝана хԝәстьн кӧ ԝи бьдьнә кӧштьне (Луԛа 23:18-23). Бәле, ԝана ӧса кьр ԝәки Иса бе кӧштьне. Һәрге Иса ԛәбул нәкьрьн у кӧштьн, гәло әԝ ԝе ча бькарьбуйа бьбә «сәре әʹнишке»? Әԝ дькарьбу бьбуйа тʹәне һьнге, һәрге әԝ жь мьрьне рʹабуйа. Пәтрусе шанди гот дәрһәԛа «Иса Мәсиһе Ньсрәте . . . , әԝе кӧ ԝә сәр стуне дардакьр, ле Хԝәде ԝи жь мьрьне рʹакьр» (Кʹар. Шанд. 3:15; 4:5-11, ДТʹ; 1 Пәт. 2:5-7). Иса кӧ жь мьрьне рʹабу, бу әԝ Кәс, кʹижан нав мәрьвада навәки ӧса жерʹа һатә дайине, кӧ «әм бькарьбьн бь ԝи хьлаз бьн» (Кʹар. Шанд. 4:12; Әфәс. 1:20). w17.12 9-10 ¶6-9

Дәрһәԛа тәнгасийа мәзьн кӧ пешийа мә йә, Иса гот: «Ԝе . . . бьбиньн Кӧрʹе Инсан ль сәр әʹԝред әʹзмен бь ԛәԝат у рʹумәта мәзьн те. [Иса] мьлйакʹәтед хԝә бь борийа дәнге бьльнд бьшинә у ԝе бьжартийед ԝи . . . бәрәв кьн» (Мәт. 24:29-31). Щьвандьна йед бьжартийа ԝе һьнге бә, чахе һʹәму Мәсиһийед бьжарти йед кӧ сәр әʹрде манә, хәлата хԝәйә әʹзмани бьстиньн. Әԝ йәк ԝе бьԛәԝьмә ԝәʹде дәстпека тәнгасийа мәзьн, ле пешийа Һармәгәдоне. Паше Иса у 144 000, ԝе тʹәви пʹадшед дьнйайе шәрʹ бькьн (Әʹйан. 17:12-14). Евара Биранине ԝе щара пашьн дәрбаз бә, пешийа кӧ Иса бьжартийа бьщьвинә. w18.01 16 ¶15

Сәр әʹзмана Иса «һʹәта-һʹәтайе» дьжи (Әʹйан. 1:5, 18; Рʹом. 6:9; Колс. 1:18; 1 Пәт. 3:18). Иса соз да шандийед хԝәйи амьн, ԝәки ԝе тʹәви ԝи сәр әʹзмана сәрԝертийе бькьн (Луԛа 22:28-30). Паԝлос ньвиси кӧ «Мәсиһ жь мьрьне рʹабуйә, чаԝа бәре дәрәмәта пешьн жь нава мьрийа рʹабуйи». Бь ԝан гьлийа Паԝлос дьхԝәст бьгота, кӧ ԝе һәбьн йед ӧса, кʹижан кӧ ԝе жь мьрьне рʹабьн у бьжин сәр әʹзмана. Әԝи гот: «Һәр кәс дора хԝәда: Пешийе Мәсиһ чаԝа бәре дәрәмәта пешьн, паше йед пʹара Мәсиһ, ԝәхте һатьна ԝида» (1 Корн. 15:20, 23). Жь сала 1914-да һʹәта ньһа әм ида дьжин ԝәʹде «һатьна» Мәсиһ у ахьрийа ве дьнйа зӧлм ида бәр шемике йә. w17.12 10 ¶11; 11 ¶14-16

Баве мәйи дьлшәԝат жи мәрьвед хԝәйи незик ӧнда кьрийә у дәрд кьшандийә, мәсәлә, чахе Бьраһим, Исһаԛ, Аԛуб, Муса у падша Даԝьд мьрьн (Жьмар 12:6-8; Мәт. 22:31, 32; Кʹар. Шанд. 13:22). Кʹьтеба Пироз дьбежә кӧ Йаһоԝа бь дьл у щан һивийе йә, гава әԝ ԝана жь мьрьне рʹакә (Иб. 14:14, 15). Әԝана ԝе бәхтәԝар бьн у сьһʹәт-ԛәԝата ԝан бекемаси бә. Ле биньн бира хԝә, кӧ Йаһоԝа ӧса жи мьрьна Кӧрʹе хԝәйи дәлал дитийә, кʹижан кӧ «шабуна ԝи бу» (Мәтʹлк. 8:22, 30). Бь гьлийа әм нькарьн бежьн кӧ чьԛас дьле Йаһоԝа дешийа гава берʹәʹмти Кӧрʹе ԝи кӧштьн (Йуһʹн. 5:20; 10:17). Әм гәрәке сәд сәләфи баԝәр бьн кӧ Йаһоԝа ԝе әʹсә али мә бькә. Ләма жи лазьм ә әм дӧада дьле хԝә жерʹа вәкьн у дәрд-кӧлед хԝә гьли кьн. Әм чьԛас дьлгәрм дьбьн кӧ Йаһоԝа һʹале мә фәʹм дькә у дьле мә дәрман дькә у рʹьһʹәт дькә! (2 Корн. 1:3, 4). w17.07 13 ¶3-5

Иро бь милйона мәрьв жь дьле хԝә «һәбука» хԝә ԛӧрбан дькьн, мәсәлә, ԝәʹдә, ԛәԝат, у чь дәсте ԝан те хәрщ дькьн сәва пьштгьрийа һʹәбандьна рʹаст бькьн (Мәтʹлк. 3:9). Йаһоԝа ԝе тʹӧ щар шьхӧле мә у һʹьзкьрьна мә бир нәкә. Ԝан рʹожед ахьрийеда, һәр тьшт кӧ иро тʹәшкиләта Йаһоԝада те кьрьне, избат дькә кӧ бь сайа кʹәрәма Йаһоԝа у рʹебәрийа Мәсиһ тʹәшкиләт пешда дьчә. Әм бәхтәԝар ьн кӧ тʹәшкиләта ԝида ньн, кʹижан кӧ ԝе һʹәта-һʹәтайе һәбә. Ләма жи бьшекьриньн кӧ һун нава щьмәʹта Йаһоԝада ньн, у «гӧһдарийа Хԝәдейе хԝә Йаһоԝа бькьн, ДТʹ» (Зәкәр. 6:15). Һьнге һуне бьн хԝәйкьрьна Пʹадша у Сәрәккʹаһинда бьн. Чь дәсте ԝә те хьзмәтийа Хԝәдеда бь дьл у щан бькьн. У дӧдьли нәбьн кӧ Йаһоԝа ԝе ԝә хԝәй кә у хьлаз кә ԝәʹде ахьрийа ве дьнйайе у жийина һʹәта-һʹәтайе бьдә ԝә! w17.10 30 ¶18-19

Зутьрәке система Шәйтʹан, демәк йе политики, рʹелиги, у комерси ԝе кʹӧта бьн. Пʹехәмбәр Һәзәԛел у Сефанйа пʹехәмбәрти кьрьбун, ԝәки зерʹ у зив, демәк чь кӧ гәләк ԛимәт ә бона ве дьнйайе, ԝе пʹучʹ бьн у кери тьштәки нәйен (Һәзԛл. 7:19; Сефн. 1:18). Бьдьнә бәр чʹәʹве хԝә, һәрге мә хьлазийа әʹмьре хԝә фәʹм кьр, кӧ мә бадиһәԝа «һәбука нәрʹаст» тʹоп дькьр, ле һәбука рʹаст хԝәрʹа ԛазанщ нәкьр, гәло әме чь тʹәхмин кьн? Әме хԝә мина ԝи мәрьви тʹәхмин кьн, кʹижан кӧ тʹәмамийа әʹмьре хԝә дьхәбьти сәва гәләк пʹәрә тʹоп кә, ле әԝ пʹәрә ԛәлп дәркʹәтьн (Мәтʹлк. 18:11). Бәле, һәбука ве дьнйайе ԝе әʹсә кʹӧта бә, ләма жи изьне нәдьн тʹӧ тьшти рʹе ԝә бьгьрә сәва «һәвала» ль әʹзман ԛазанщ кьн. Һәр тьшт чь жи әм бона Йаһоԝа у Пʹадшатийа ԝи бькьн, әв йәк ԝе бь рʹастийе мә дәԝләти у бәхтәԝар кә. w17.07 11 ¶16

Һьнә Мәсиһийа гӧне хԝәйә гьран вәшартьнә, чьмки шәрм дькьн у нахԝазьн дьле кәсәки бешиньн (Мәтʹлк. 28:13). Ле әԝ йәк һьн ԝанрʹа зийане тинә, у һьн жи йед майинрʹа. Кьре ӧса нә бь һʹьзкьрьн ә, чьмки жь щьвате рʹӧһʹе пироз дькарә бе һьлдане, у әʹдьлайа щьвате жи хьраб бә (Әфәс. 4:30). Ле һʹьзкьрьна һʹәлал ԝе Мәсиһи һелан кә кӧ гӧне хԝә рʹуспийарʹа әʹйан кә у аликʹарийа рʹӧһʹани бьстинә (Аԛуб 5:14, 15). Һʹьзкьрьн һʹӧнӧрәкә лапә мәзьн ә (1 Корн. 13:13). Әв һʹӧнӧр мә әʹйан дькә кӧ әм шагьртед Иса нә, йед кӧ чʹәʹв дьдьнә Йаһоԝа, кʹижан кӧ Канийа һʹьзкьрьне йә. Паԝлос гот кӧ «һәгәр . . . һʹьзкьрьн дьле мьнда тʹӧнәбә, әз нә тʹӧ тьшт ьм» (1 Корн. 13:2). Ԝәрә әм тʹьме һʹьзкьрьна хԝә нә тʹәне пе зьмане хԝә нишан кьн, ле ӧса жи «бь кьра у рʹастийе»! (1 Йуһʹн. 3:18). w17.10 11 ¶17-18

Дина хԝә бьдьне Усьв чьԛас мерхас бу. Чахе жьна Потифар зоре ԝи дькьр кӧ тʹәви ԝе бенамусийе бькә, әԝ нәкʹәтә бәр байе ԝе. Дькарьн бежьн Усьв заньбу кӧ һәрге әԝ тʹәви ԝе рʹази нибә, әԝ йәк дькарә ахьрикә хьраб ԝирʹа бинә. Ле йәкә әԝ нәтьрсийа у дәрберʹа жь ԝе рʹәви (Дәстп. 39:10, 12). Рʹәхабе жи мәсәләкә баш һиштийә алийе мерхасийеда. Чахе дӧ щәсусед Исраели Әриһайеда һатьнә мала ԝе, әԝе әԝ дӧ мер вәшартьн у али ԝан кьр кӧ сах-сьламәт һәрʹьн (Йешу 2:4, 5, 9, 12-16). Шандийед Исайи амьн мерхасийеда чʹәʹв дьданә Иса, гава Садуԛийа мьԛабьли ԝан дәрдькʹәтьн. Шанди бәрдәԝам дькьрьн бь наве Иса һин кьн (Кʹар. Шанд. 5:17, 18, 27-29). Усьв, Рʹәхаб, Иса, у шандийед ԝи хԝәрʹа сафи кьрьбун ве йәке бькьн чь кӧ рʹаст ә. Мерхасийа ԝан ве йәкеда нибу кӧ әԝана хԝәда баԝәр бун. Әԝана мерхас бун, чьмки итʹбарийа хԝә Йаһоԝа дьанин. Әм жи рʹасти ԝан дәрәща тен, кʹидәре мәрʹа мерхаси лазьм ә. Ԝи чахи әм гәрәке итʹбарийа хԝә Йаһоԝа биньн, нә кӧ хԝә (2 Тимтʹ. 1:7). w17.09 29 ¶6-9

Бь ԛәԝата хԝә әм нькарьн бенә гӧһастьне, демәк мәрьве кәвьн ль сәр хԝә бехьн. Гәләк сәр хԝә дьхәбьтин сәва хәйсәт у кьред хьраб бьһельн. У мәрьвед кӧ ԝи шәрида сәр кʹәтьн, ԝана һʹьш у дьле хԝә вәкьрьн сәва Хәбәра Хԝәде у рʹӧһʹе ԝийи пироз ԝана бьгӧһезьн (Луԛа 11:13; Ибрн. 4:12). Сәва әм әве ԛәԝате бьстиньн, гәрәке һәр рʹож Кʹьтеба Пироз бьхуньн, сәр бьфькьрьн, у һәр гав дӧа бькьн, сәва Хԝәде биланийе у ԛәԝате бьдә мә, ԝәки әм ширәтед Кʹьтеба Пироз бьдьнә хәбате (Йешу 1:8; Зәб. 119:97; 1 Тʹеслн. 5:17). Хенщи ве йәке, чахе әм бона щьвате хԝә һазьр дькьн у тенә щьвате, һьнге жи әм кʹаре дьстиньн жь Хәбәра Хԝәде у рʹӧһʹе ԝийи пироз (Ибрн. 10:24, 25). Һьн жи, ԝе баш бә у керһати бә һәрге әм һәр һащәтед жь тʹәшкиләта Хԝәде кӧ әм дьстиньн, бьдьнә хәбате (Луԛа 12:42). Сәва кӧ ԛәбулкьрьна Хԝәде бьстиньн, бәс нинә тʹәне мәрьве кәвьн ль сәр хԝә бехьн. Әм ӧса жи гәрәке мәрьве ну ль сәр хԝә кьн (Колс. 3:10). w17.08 21 ¶16-17

Даԝьд Пʹадша жи рʹасти гәләк нәһәԛийа һат. Чахе Йаһоԝа Даԝьд бьжарт сәва әԝ ахьрийеда бьбә пʹадше Исраеле, әԝ һәла һе щаһьл бу. Ле Даԝьд 15 сала һивийе бу һʹәта әԝ бьбуйа пʹадше бәрәка хԝә (2 Сам. 2:3, 4). Һьнге, Пʹадша Шаԝул пәй Даԝьд кʹәт у дьхԝәст ԝи бькӧжә. Ләма Даԝьд ча хәриб дьжит, әԝ щара дьрʹәвийа ԝәлатед хәриб, щара жи бәрʹийеда шкәфтада дьма. Ле һәла һе паши мьрьна Шаԝул жи, Даԝьд ԝәкә 7 сала һивийе бу сәва пʹадшатийе бькә сәр тʹәмамийа Исраеле (2 Сам. 5:4, 5). Чьрʹа Даԝьд бь сәбьр һивийе бу? Әԝи заньбу ԝәки Йаһоԝа амьн ә у ԝи һʹьз дькә. Әԝ дьфькьри кӧ чаԝа Йаһоԝа али ԝи дькьр, у әԝ бь дьл һивийа хьлазкьрьна хԝә бу (Зәб. 13:6). Бәле, Даԝьд заньбу ԝәки әԝ бадиһәԝа һивийе нинә. w17.08 6 ¶14-15

Ԝәʹдә дәрбаз дьбу, у зьман дьһатьнә гӧһастьне. Мәсәлә, хәбәр йан гьли-готьнед бәре, ида щурʹәки дьн дьһатьнә фәʹмкьрьне. Зьмане Йунани у Ибрани жи, сәр кʹижана һʹәчʹи зәʹф Кʹьтеба Пироз һатийә ньвисаре, нава ԛьрʹнада һатийә гӧһастьне. Зьмане бәре йе Ибрани у Йунани, жь йе иройин гәләк щӧдә дьбьн. Ләма жи кәсе кӧ дьхԝазә Хәбәра Хԝәде рʹьнд фәʹм кә, бьхԝазә нәхԝазә гәрәке йа ԝәлгәрʹанди бьхунә, у һәла һе жи әԝе кӧ зьмане Ибрани йан жи Йунани йа иройин занә. Һьнәк фькьрин кӧ һәгәр әԝана зьмане Ибрани у Йунанийә кәвьн һин бьн, ԝе һе рʹьнд Кʹьтеба Пироз фәʹм бькьн. Ле йәкә әԝе йәке гәләк али ԝан нәкьр. Әм чьԛас рʹази нә ԝәки иро Кʹьтеба Пироз бь тʹәмами йан жи бь пʹар сәр ԝәкә 3 000 зьмана һатийә ԝәлгәрʹандьне. Әшкәрә те кʹьфше кӧ Йаһоԝа дьхԝазә мәрьв жь «һʹәму мьләта, бәрәка, зьмана» жь Хәбәра ԝи кʹаре бьстиньн (Әʹйан. 14:6). Занәбуна ве йәке мә һе незики Хԝәдайе мәйи һʹьзкьри дькә, кʹижан кӧ фьрԛийе накә нава мьләта. w17.09 19 ¶4

Һәрге мәрьве ԝәйи незик жь щьвате һатийә дәрхьстьне, хԝә бьгьрьн сәва кӧ кем тʹәви ԝи бькʹәвьнә хәбәрдане. Бәле, хԝәгьртьн хԝәва найе. Ле һәрге әм фәʹм дькьн кӧ бь ве йәке әм чʹәʹв дьдьнә Йаһоԝа у тʹәмийа ԝи тиньн сери, мәрʹа дьһа һеса дьбә хԝә бьгьрьн. Мәсәла Даԝьд Пʹадша дькарә мәрʹа кʹаре бинә. Чахе Шаԝул у Шимәи дьхԝәстьн һерса ԝи биньн, Даԝьд һерс нәкʹәт у һʹӧкӧм у ԛәԝата хԝә мьԛабьли ԝан нәда хәбате (1 Сам. 26:9-11; 2 Сам. 16:5-10). Ле һәбун дәрәщә чахе Даԝьд хԝә нәгьрт. Мәсәлә, чахе әԝи тʹәви Бат-Шәбайе бенамуси кьр у чахе һерса ԝи рʹабу сәр тьмайа Набал (1 Сам. 25:10-13; 2 Сам. 11:2-4). Ле йәкә әм жь Даԝьд дькарьн хԝәрʹа дәрсе һин бьн. Йа пешьн, бьред щабдар гәрәке фәсал бьн у хԝә бьгьрьн, сәва кӧ һʹӧкӧме хԝә бона кʹара хԝә нәдьнә хәбате. Йа дӧда, тӧ кәс гәрәке гәләк хԝәда баԝәр нибә у нәфькьрә кӧ тʹӧ щар ԝе нәкʹәвә щерʹьбандьне (1 Корн. 10:12). w17.09 5-6 ¶12-13